དཔལ་ནཱ་ལེནྡྲ། བྱོན་པ་ལེགས།
ཅ༽ སློབ་དཔོན་སེངྒེ་བཟང་པོ་རིགས་གང་དུ་སྐུ་འཁྲུངས་མིན།
དེ་ཡང་དབྱངས་ཅན་དགའ་བློས་ (1740-1827) མཛད་པའི་རྒྱལ་སྲས་བདག་ཉིད་ཆེན་པོ་སློབ་དཔོན་སེངྒེ་བཟང་པོ་ལ་བསྟོད་པ་བྱིན་རླབས་མྱུར་འཇུག་ལས[1]།
རིང་ནས་ཐུགས་བསྐྱེད་རྩ་བ་རབ་བརྟན་ཅིང་། །
ཐུབ་བསྟན་སྙིང་པོ་ཕྱོགས་བརྒྱར་སྤེལ་བའི་སླད། །
ཕུན་ཚོགས་དཔལ་གྱིས་མཐོ་བའི་རྒྱལ་རིགས་སུ། །
བསམ་བཞིན་འཁྲུངས་པར་མཛད་ལ་གསོལ་བ་འདེབས། །
ཞེས་གསུངས་པ་ལྟར། སློབ་དཔོན་སེངྒེ་བཟང་པོ་རིགས་གང་དུ་སྐུ་འཁྲུངས་པ་ནི། ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད་པའི་བདག་ཉིད་ཆེན་པོ་སློབ་དཔོན་སེངྒེ་བཟང་པོ་ལ་བསྔགས་པའི་རབ་ཏུ་བྱེད་པ་ཐེག་ཆེན་ཆོས་ཀྱི་སྒྲ་དབྱངས་ལས[2]། དེ་ཡང་འདི་ལྟར་ཐོས་ཏེ། སྔོན་ཡུན་རིང་པོ་ནས་བྱང་ཆུབ་མཆོག་ཏུ་སེམས་བསྐྱེད་དེ་རྒྱལ་སྲས་ཀྱི་སྤྱོད་པ་རླབས་པོ་ཆེ་རྣམས་ལ་བསླབས་པ། སྔོན་གྱི་རྒྱལ་བ་དུ་མ་ལ་དགེ་བའི་རྩ་བ་བསྐྲུན་ཏེ་ལྷག་པར་བྱ་བ་བྱས་པ། རྒྱལ་བའི་དམ་ཆོས་འཛིན་པའི་སྨོན་ལམ་རླབས་ཆེའི་མཐུ་གྲུབ་པ། རྒྱལ་སྲས་སེང་གེ་བཟང་པོ་ཞེས་ཡོངས་སུ་གྲགས་པ་དེ་ནི། སྲིད་པ་མཐའ་དག་མེ་འབར་བའི་ཀླུབས་ལྟར་མཐོང་ཡང་སྙིགས་མར་ལུས་པའི་འགྲོ་བ་ཉམ་ཐག་པ། བློ་གྲོས་ཀྱི་མིག་ལྡོངས་པ། རྒྱལ་བ་དགྱེས་པའི་ལམ་ལ་འཇུག་པ་ལ་འགྲོན་པོ་ཕྱོགས་བསླད་པ་ལྟར་གྱུར་པ་རྣམས་ལ་ཐུགས་རྗེས་མ་བཟོད་ནས་ཞིང་འདིར་རྒྱལ་བའི་དགོངས་པ་མཐར་ཐུག་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་རིན་པོ་ཆེའི་དོན། དང་པོར་ཐར་པ་ཆ་མཐུན་གྱི་དགེ་རྩ་བསྐྱེད་པ་ནས་བཟུང་། མཐར་འབྲས་བུ་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པའི་བར་གྱི་ཐེག་པ་ཆེན་པོའི་ལམ་གྱི་ལུས་ཡོངས་སུ་རྫོགས་པ་རྗེ་བཙུན་བྱམས་པ་མགོན་པོས་མཛད་པའི་མངོན་པར་རྟོགས་པའི་རྒྱན་ཡུམ་གྱི་མདོ་དང་སྦྱར་ཏེ་འཛམ་བུའི་གླིང་འདིར་ཆེས་ཆེར་གསལ་བར་བྱ་བའི་ཕྱིར་འཛམ་བུའི་གླིང་གི་ཡུལ་དབུས་བསྐལ་བཟང་གི་སངས་རྒྱས་སྟོང་པོ་ཐམས་ཅད་གང་དུ་འཚང་རྒྱ་བའི་ཚུལ་སྟོན་པའི་གནས་རྡོ་རྗེ་གདན་དང་ཉེ་བའི་ཕྱོགས་སུ་བསམ་བཞིན་དུ་མིའི་སྲིད་པ་བཟུང་སྟེ་རྒྱལ་རིགས་ཤིག་ཏུ་སྐུ་འཁྲུངས་སོ་ཞེས་གྲག་གོ །ཞེས་གསལ་བ་ལྟར་རྒྱལ་རིགས་སུ་སྐུ་བལྟམས་པའོ།།
ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད་པའི་བདག་ཉིད་ཆེན་པོ་སློབ་དཔོན་སེངྒེ་བཟང་པོ་ལ་བསྔགས་པའི་རབ་ཏུ་བྱེད་པ་ཐེག་ཆེན་ཆོས་ཀྱི་སྒྲ་དབྱངས་ལས[3]།
དང་པོ་མེད་པའི་རྣམ་པ་ནས་བཟུང་སྟེ། །
རྣམ་པ་ཐམས་ཅད་མཁྱེན་པ་ཉིད་ཀྱི་བར། །
མཁྱེན་གསུམ་རྣམ་པ་མ་ལུས་ཉམས་ལེན་དུ། །
སྦྱོར་མཛད་སེང་གེ་བཟང་པོར་གུས་པས་འདུད། །
རིགས་སད་ཐར་པ་ཆ་མཐུན་ནས་བཟུང་སྟེ། །
གཉིས་སྣང་འཁྲུལ་པ་འཇོམས་བྱེད་ས་བཅུའི་བར། །
སྦྱོར་བ་བཞི་ཡི་ཉམས་ལེན་སྟོན་མཛད་པ། །
ཐེག་མཆོག་བསྟན་པའི་སྒྲོན་མེ་བཟང་པོར་འདུད། །
ཅེས་ཀྱང་གསུངས་སོ།། །།
དཔྱད་གཞིའི་ལུང་ཁུངས་ཡིག་ཆ།
[1] དབྱངས་ཅན་དགའ་བློའི་གསུང་འབུམ། པོད། ༼ཁ༽ སེང་བསྟོད། དཔེ་རིང་། ཤོག་གྲངས་ ༡ན༢
[2] ཡོངས་འཛིན་ཡེ་ཤེས་རྒྱལ་མཚན་གྱི་གསུང་འབུམ། ༼༥༽ དཔེ་རིང་། ཤོག་གྲངས་ ༣བ༣
[3] ཡོངས་འཛིན་ཡེ་ཤེས་རྒྱལ་མཚན་གྱི་གསུང་འབུམ། ༼༥༽ དཔེ་རིང་། ཤོག་གྲངས་ ༣༣བ༣
ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཅ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༡༡༡ ནས་ ༡༡༣ བར་གསལ་བ་ལས་བཏུས་པའོ།།