དཔལ་ནཱ་ལེནྡྲ། བྱོན་པ་ལེགས།
ང༽ བསྟན་བཅོས་རྩོམ་པའི་རྒྱུ་དྲུག
དེ་ཡང་བསྟན་བཅོས་རྩོམ་པ་ལ་ཐེག་ཆེན་གྱི་དབང་དུ་བཏང་ན། འཕགས་པ་ཐོགས་མེད་ (310-390) ཀྱིས་མཛད་པའི་གཏན་ལ་དབབ་པ་བསྡུ་བ་བམ་པོ་ཉེར་གཉིས་པ་ལས[1]། བསྟན་བཅོས་ཉེ་བར་སྦྱོར་བར་འདོད་པས་རྒྱུ་རྣམ་པ་དྲུག་གིས་བསྟན་བཅོས་ཉེ་བར་སྦྱར་བར་འོས་པ་ཡིན་ཏེ། ཆོས་ཀྱི་དོན་མང་དུ་བྱས་པར་འགྱུར་རོ་སྙམ་པ་དང་། སེམས་ཅན་རྣམས་ལ་མོས་པ་སྣ་ཚོགས་ཡོད་པའི་ཕྱིར་དེ་དག་ཁ་ཅིག་འདིས་འཇུག་པར་འགྱུར་རོ་སྙམ་པ་དང་།
དོན་ཉམས་པ་དང་རབ་ཏུ་ཉམས་པ་རྣམ་པར་རབ་ཏུ་དབྱེ་བར་བྱ་བའི་ཕྱིར་རོ་སྙམ་པ་དང་། དོན་འཐོར་བ་རྣམས་བསྡུ་བར་བྱ་བའི་ཕྱིར་རོ་སྙམ་པ་དང་། དོན་ཟབ་མོ་རྣམས་གསལ་བར་བྱ་བའི་ཕྱིར་རོ་སྙམ་པ་དང་། ཚིག་འབྲུ་མཛེས་པས་མཛེས་པ་བསྐྱེད་པར་བྱ་བའི་ཕྱིར་རོ་སྙམ་པའོ། །ཞེས་གསུངས་པ་ལྟར། རང་གཞན་གྱི་དགེ་རྩ་བསྐྱེད་ཕྱིར་བསྟན་བཅོས་རྩོམ་ལ་འཇུག་པའི་རྒྱུའི་ཀུན་སློང་ངམ། རྒྱུ་བསམ་པའི་ཁྱད་པར་དྲུག་དང་ལྡན་དགོས་པར་གསུངས་ལ། ཐ་སྙད་མཁན་པོའི་དབང་དུ་བཏང་ནའང་། སློབ་དཔོན་དབྱུག་པ་ཅན་གྱིས་མཛད་པའི་སྙན་ངག་མེ་ལོང་མ་ལས[2]།
རང་བཞིན་གྱིས་གྲུབ་སྤོབས་པ་དང་། །མང་དུ་ཐོས་དང་དྲི་མེད་དང་། །
མངོན་པར་སྦྱོར་བ་མི་དམན་པ། །སྙན་ངག་ཕུན་སུམ་ཚོགས་པའི་རྒྱུ། །
ཞེས་པ་འདི་ལ་མཆོག་དམན་ནམ་སྒྲ་ཡངས་དོག་གཉིས་ལས་ཡངས་པའི་དབང་དུ་བཏང་ན། སྐྱེ་བ་གོང་མ་གཞན་དུ་རྒྱལ་བའི་གསུང་རབ་ཕྱི་ནང་རིག་པའི་གནས་རྣམས་ལ་གོམས་པ་སྔོན་དུ་བྱས་པའི་མཐུ་ཡོངས་སུ་སད་པའི་བག་ཆགས་ཀྱིས་ཚེ་འདིར་རང་བཞིན་གྱིས་གྲུབ་པའི་སྤོབས་པ་སྟེ། སྐྱེ་བས་ཐོབ་པའི་ཤེས་རབ་ཟབ་མོ་དང་། བྱེ་བྲག་སྤྱིར་གོང་ལྟར་དང་ཁྱད་པར་རིག་གཞུང་འདི་གའི་གཞུང་དང་བསྟན་བཅོས་ཀྱི་ཚོགས་དེ་དང་འབྲེལ་བའི་སྔོན་གྱི་གཏམ་རྒྱུད་མིང་གི་མངོན་བརྗོད་ལ་སོགས་པ་ལེགས་བཤད་ཀྱི་ཚོགས་མང་དུ་ཐོས་པ་དེས་ཀྱང་མི་ཆོག་པར་ཐེ་ཚོམ་གྱི་དྲི་མ་མེད་པ། དེ་སེམས་པ་དང་གོམས་པ་ལ་མངོན་པར་སྦྱོར་བའི་གུས་སྦྱོར་དང་རྟག་སྦྱོར་གྱི་བརྩོན་འགྲུས་མི་དམན་པ་སྟེ། གསུམ་ནི་སྐབས་དོན་སྙན་ངག་དང་། གཞུང་ལུགས་གང་གིའང་རིགས་ཚུལ་ཕུན་སུམ་ཚོགས་པ་རྒྱུད་ལ་བསྐྲུན་པའི་རྒྱུར་བཤད་པ་དང་། གསོ་བ་རིག་པ་འདི་དང་གསང་སྔགས་བླ་ན་མེད་པའི་ལུགས་ལ། ཁ་ཆེའི་པཎྜི་ཏ་ཟླ་དགའི་ཟླ་ཟེར་དུ[3]།
བླ་མའི་ལུང་ནི་ཡང་དག་དོན། །
གསལ་བར་རྟོགས་ནས་བརྩམ་པར་བྱ། །
ཞེས་རབ་ཆོས་ཉིད་ཀྱི་བདེན་པ་མཐོང་བ་དང་།
དཔལ་ལྡན་སྒྲིབ་མེད་ལྷ་ཡིས་ནི། །
སྙིང་ནི་རྣམ་པར་དྲངས་པས་ན། །[4]
ཞེས་འབྲིང་ཡི་དམ་ལྷའི་གནང་བ་ཐོབ་པ་སོགས་དང་། ཐ་མ་དབང་ལུང་ལག་འཁྲིད་སོགས་བརྒྱུད་པའི་ཆུ་བོ་མ་ཆད་ཅིང་། རང་སྒྲུབ་ཕྱོགས་ཀྱི་ཤེས་བྱ་དང་དགག་བཞག་སྤོང་བར་མཁས་ལ། ལུང་ལ་འདྲིས་པ་དང་། སྒྲ་ཚད་སྙན་ངག་ལ་བྱང་ཆུབ་པས་བསྟན་བཅོས་རྩོམ་རུང་བར་གསུངས། ཞེས་གསལ་བ་ལྟར། དཔལ་ནཱ་ལེནྡྲའི་པཎ་གྲུབ་བཅུ་བདུན་རྣམས་ལ་བསྟན་བཅོས་རྩོམ་པའི་རྒྱུ་དྲུག་པོ་རྣམས་ཡོངས་སུ་ཚང་ངེས་ལ། དེ་ལ་ཡིད་གཉིས་ཐེ་ཚོམ་མེད་དོ།།
དེ་ཡང་དཔེར་ན། ཇོ་བོ་རྗེ་དཔལ་ལྡན་ཨ་ཏི་ཤར་བསྟན་བཅོས་རྩོམ་པའི་ཕུན་སུམ་ཚོགས་པའི་རྒྱུ་གསུམ་མངའ་ཚུལ་ནི། རྗེ་བདག་ཉིད་ཆེན་པོས་ (1357-1419) མཛད་པའི་བྱང་ཆུབ་ལམ་རིམ་ཆེན་མོ་ལས[5]། དེ་ལྟར་ཐུབ་པའི་དགོངས་པ་གསལ་བར་བྱེད་པའི་གཞུང་རྩོམ་པ་ལ་ཡང་ཕུན་སུམ་ཚོགས་པའི་རྒྱུ་གསུམ་ཡོད་དེ། འདི་ལྟར་ཤེས་བྱ་རིག་པའི་གནས་ལྔ་ལ་མཁས་པ་དང༌། དེ་དག་གི་དོན་ཉམས་སུ་ལེན་པའི་གནད་ཀྱི་གདམས་པ། ཡང་དག་པར་རྫོགས་པའི་སངས་རྒྱས་ནས་བཟུང་སྟེ་དམ་པ་བར་མ་ཆད་པ་ལས་བརྒྱུད་པའི་མན་ངག་དང་ལྡན་པ་དང༌། ཡི་དམ་གྱི་ལྷའི་ཞལ་གཟིགས་ནས་གསུང་གི་གནང་བ་ཐོབ་པའོ། །འདི་དག་རེ་རེས་ཀྱང་གཞུང་རྩོམ་པར་ནུས་ན། གསུམ་ག་ཚང་ན་ཆེས་ཕུན་སུམ་ཚོགས་པར་འགྱུར་རོ། །སློབ་དཔོན་ཆེན་པོ་འདི་ལ་ནི་གསུམ་ག་མངའོ། །དེ་ལ་ཡི་དམ་གྱིས་རྗེས་སུ་བཟུང་བ་ནི། བསྟོད་པ་ལས། དཔལ་ལྡན་དགྱེས་པའི་རྡོ་རྗེ་དང༌། །དམ་ཚིག་བཀོད་པའི་རྒྱལ་པོ་དང༌། །དཔའ་བོ་འཇིག་རྟེན་དབང་ཕྱུག་དང༌། །ཇོ་མོ་རྗེ་བཙུན་སྒྲོལ་མ་སོགས། །ཞལ་གཟིགས་གནང་བ་ཐོབ་པས་ན། །རྨི་ལམ་ན་འམ་མངོན་སུམ་དུ། །ཟབ་པ་དང་ནི་རྒྱ་ཆེ་བའི། །དམ་ཆོས་རྟག་ཏུ་གསན་པ་ལགས། །ཞེས་སོགས་གསུངས་པ་ལྟར་རོ།། །།
དཔྱད་གཞིའི་ལུང་ཁུངས་ཡིག་ཆ།
[1] བསྟན་འགྱུར་དཔེ་བསྡུར་མ། སེམས་ཙམ། ༼ཞི༽ དེབ་ཨང་ ༧༤ པ། ༢༠༠༨ ལོ། ཤོག་གྲངས་ ༤༧༧
[2] བསྟན་འགྱུར་དཔེ་བསྡུར་མ། སྒྲ་མདོ། ༼སེ༽ དེབ་ཨང་ ༡༡༠ པ། ༢༠༠༨ ལོ། ཤོག་གྲངས་ ༡༠༣༨
[3] བསྟན་འགྱུར་དཔེ་བསྡུར་མ། གསོ་རིག །༼ཀོ༽ དེབ་ཨང་ ༡༡༣ པ། ༢༠༠༨ ལོ། ཤོག་གྲངས་ ༣
[4] བསྟན་འགྱུར་དཔེ་བསྡུར་མ། གསོ་རིག །༼ཀོ༽ དེབ་ཨང་ ༡༡༣ པ། ༢༠༠༨ ལོ། ཤོག་གྲངས་ ༣
[5] རྗེ་ཙོང་ཁ་པ་ཆེན་པོའི་གསུང་འབུམ། པོད། ༼པ༽ མཚོ་སྔོན་མི་རིགས་དཔེ་སྐྲུན་ཁང་། ༢༠༠༠ ལོ། ཤོག་གྲངས་ ༡༡
ཡོང་ཁུངས། པཎ་གྲུབ་བཅུ་བདུན་གྱི་གསུང་འབུམ་དཀར་ཆག་བསྟན་པའི་མཛེས་རྒྱན། སྟོད་ཆ། རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༢༡ ནས་ ༢༤ བར་གསལ་བ་ལས་བཏུས་པའོ།།