དཔལ་ནཱ་ལེནྡྲ། བྱོན་པ་ལེགས།
༄༅། །སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས།[1]
སེང་ལྡེང་ནགས་ཀྱི་སྒྲོལ་མའི་སྒྲུབ་ཐབས་ནི། སྒྲུབ་པ་པོས་སེམས་བསྐྱེད་ལ། སྙིང་གར་པད་ཟླའི་སྟེང་དུ་ཏཱྃ་དེའི་འོད་ཀྱིས་ཚོགས་རྟེན་སྤྱན་དྲངས་ལ་ཚོགས་གཉིས་བསགས། སྟོང་པའི་ངང་ལས་ལུས་སྒྱུ་མ་ཙམ་གྱི་སྙིང་གར། པད་ཟླ་ལ་ཏཱྃ་དེ་ལས་ཨུཏྤ་ལ་ཏཱྃ་གིས་མཚན་པ་དེ་ལས་འོད་སྤྲོས་བསྡུས་ཐིམ། གྱུར་པ་ལས་སྒྲོལ་མ་བསྐྱེད་དོ། །རང་ཆས་སུའོ། །གཡས་ན་འོད་ཟེར་ཅན་སེར་མོ། །
གཡས་མྱ་ངན་མེད་པའི་ཤིང་གི་ཡལ་ག་ནས་བཟུང་བ། གཡོན་རྔ་ཡབ་དཀར་པོ་གཙོ་མོ་ལ་གཡོབ་པའོ། །གཡོན་ན་རལ་གཅིག་མ་སྔོན་མོ་གཡོན་ཐོད་པ། གཡས་རྔ་ཡབ་དཀར་པོ་གཡོབ་པའོ། །དེ་དག་དུས་གཅིག་ཏུའོ། །དེ་དག་གཞོན་ནུ་མ་ལ་བཅུ་དྲུག་ལོན་པ་ལྟ་བུ་སྟེ་ལངས་ནས་བཞུགས་པའོ། །ས་བོན་གྱི་འོད་ཀྱིས་ཡེ་ཤེས་པ་དགུག་གཞུག་བྱའོ། །བཟླས་པ་གཞན་དང་འདྲའོ། །ལྡང་བ་ན་ཡི་གེ་བརྒྱ་པ་བརྗོད་པ་ལ་སོགས་པ་བྱའོ། །འདི་ཁ་ཅིག་ནཱ་གཱ་རྫུ་ནས་མཛད་ཅེས་ཀྱང་གྲགས་སོ། །ཨི་ཐི།། །།
དཔྱད་གཞིའི་ལུང་ཁུངས་ཡིག་ཆ།
[1] ས་སྐྱ་བཀའ་འབུམ། ༼ཉ༽ གྲགས་རྒྱན་གསུམ་པ། འཕྲུལ་དཔར་དཔེ་རིང་། ཤོག་གྲངས་ ༢༣བ༣ ནས་ ༢༤ན༡ བར།
ཡོང་ཁུངས། མགོན་པོ་ཀླུ་སྒྲུབ་ཀྱིས་མཛད་པའི་བསྟན་བཅོས་ཐོར་བུ་སྣ་ཚོགས་ཕྱོགས་བསྒྲིགས། ཕྱོགས་སྒྲིག་པ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༢༧ ནས་ ༢༧ བར་གསལ་བ་ལས་བཏུས་པའོ།།