༄༅། །རྗེ་བཙུན་མ་འཕགས་མ་སྒྲོལ་མའི་སྒྲུབ་ཐབས་སྤྱིའི་མངོན་པར་རྟོགས་པ་ཞེས་བྱ་བ། །

༄༅། །རྗེ་བཙུན་མ་འཕགས་མ་སྒྲོལ་མའི་སྒྲུབ་ཐབས་སྤྱིའི་མངོན་པར་རྟོགས་པ་ཞེས་བྱ་བ།

༄༅། །རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །སྒྲོལ་མ་ལས་ཀྱི་སྦྱོར་བ་ཡིས། །བསྲུང་བའི་ཆོག་བྱ་བ་ནི། །བདེ་བའི་སྟན་ལ༌[1]འདུག་ནས་ནི། །རང་གི་སྙིང་གར༌[2]ས་བོན་བསམ། །དེ་ལས་སྤྲོས་པའི་འོད་ཟེར་གྱིས། །བླ་མ་དང་བཅས་སངས་རྒྱས་ནི། །བདག་གི་མདུན་དུ་གསལ་བྱས་ལ། །འོད་ཟེར་དེ་ལས་བྱུང་བ་ཡི།[3] །མེ་ཏོག་སོགས་ཀྱིས་མཆོད་པར་བྱ། །དེ་ནས་སྡིག་བཤགས་ལ་སོགས་བྱ། །དེ་ནས་ལྷ་རུ་བསྒོམ༌[4]བྱ་སྟེ། །དང་པོར་ཆོས་རྣམས་སྟོང་པར་བསྒོམ། །

དེ་འོག་པད༌[5]འདབ་བརྒྱད་པ༌[6]དང་། །ཟླ་བའི་དབུས་སུ་ཡི་གེ་ཏཱཾ། །ས་བོན་དེ་ལས་ཨུཏྤ་ལ། །ལྟེ་བར་ཏཱཾ་གིས་མཚན་པར་བསྒོམ། །ཨུཏྤལ་ཏཱཾ་བཅས་གྱུར་པ་ལས། །བདག་ཉིད་སྒྲོལ་མའི་གཟུགས་སུ་བསྒོམ། །ཕྱག་གཡས་མི༌[7]འཇིགས་སྟེར་བའོ། །གཡོན་པ་ཨུཏྤལ་བསྣམས་པ་ནི། །འདབ་མ་རྣ་བར༌[8]མ་རེག་པའོ། །སྐུ་མདོག་ལྗང་སྔོན་དག་ཏུ་བསྒོམ། །དེ་ལྟར་བདག་ཉིད་བསྐྱེད་པའི་མཐར། །ཡན་ལག་དྲུག་ཏུ་དགོད་པ་ནི། །ཨོཾ་ཏཱ་རེ་སྭཱ་ཧཱ། ཨོཾ་ཏུཏྟཱ་རེ་སྭཱ་ཧཱ། ཨོཾ་ཏུ་རེ་སྭཱ་ཧཱ། ཨོཾ་ཏུ་སྭཱ་ཧཱ། ཨོཾ་རེ་སྭཱ་ཧཱ། ཨོཾ་ཏཱ་རེ་ནི༌[9]སྭཱ་ཧཱ་ཞེས་བྱ་བ་རྣམས་མིག་དང་། རྣ་བ་དང་། སྣ་དང་། ལྕེ་དང་། སྙིང་ག༌[10]དང་། སྤྱི་བོར་གོ་རིམས༌[11]བཞིན་དགོད་དོ། །དེ་ནས་སྙིང་གར༌[12]པདྨ་འདབ་མ་བརྒྱད་ཀྱི་ལྟེ་བ་ལ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ས་བོན་ཏཱཾ་ལྗང་གུ༌[13]བསམས་ལ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཞེས་སྔགས་སུམ་འབུམ་ཡན་ཆོད་དུ་ཅི་ནུས་སུ་བཟླས་སོ། །དེ་ནས་འཁོར་ལོ་བསམ་པ་ནི། །ལྟེ་བ་དང་བཅས་རྩིབས་བརྒྱད་ལ། །མུ་ཁྱུད་བསྐོར་བ་སྙིང་གར༌[14]བསམ། །འཁོར་ལོ་ཁ་དོག་ལྗང་སྔོན་ནོ།[15] །འཁོར་ལོའི་དབུས་ཀྱི་ལྟེ་བ་ལ། །ཐོག་མའི་ཨོཾ་དང་ཐ་མའི་ཧཱ། །མིང་དང་སྤེལ་ཏེ་བསྒོམ་པར་བྱ། །བསྲུང་བ་ཨོཾ་ལྷ་སྦྱིན་ལ་རཀྵ་ཧཱ་ཞེས་པ་བསྒོམ། །ཏཱ་རེ་ཏུཏྟཱ་རེ་སྭཱ་ཞེས་པ་རྣམས་ནི། ཤར་སོགས་རྩིབས་ལ་རིམ་བཞིན་དགོད། །རང་གི་ལུས་ལ་འཁོར་ལོ་ནི། །ཡིག་འབྲུ་རྣམས་ཀྱང་ལྗང་སྔོན་ནོ། །དེ་ལྟར་བསྒོམ་པ་གོམས་བྱས་ནས། །བདག་ཉིད་སྒྲོལ་མའི་སྐུ་དང་ནི། །སྔགས་དང་བཅས་པའི་འཁོར་ལོ་ལས། །སྤྲོས་པའི་འོད་ཟེར་དག་གིས་ནི། །བསྒྲུབ་བྱའི་ལུས་ལ་དགང་བར་བྱ། །བསྲུང་བའི་སྐབས་སུ་ཕྲེང་བའི་སྔགས། །ཨོཾ་ཏཱ་རེ་ཏུཏྟཱ་རེ་ཏུ་རེ་ལྷ༌[16]སྦྱིན་ལ་རཀྵ་རཀྵ་སྭཱ་ཧཱ་ཞེས་པས་བསྲུང་བའི་ལས་ལ་ནི། ཁྱད་པར་དུ་ནི་བྱ་བར་གསུངས། །སྦྱོར་བ་དེ་ཡིས་རྒྱལ་པོ་ཡི། །བཙོན་ར་ལ་སོགས་བསྲུང་བར་བྱ། །སྒྲོལ་མ་ལས་ཀྱི་སྦྱོར་བ་ཡིས། །ལས་རྣམས་ཡང་དག་བསྒྲུབ་བྱ་སྟེ།[17] ། ནད་སོགས་ཞི་བའི་ལས་དང་ནི། །དབང་དུ་བྱ་བའི་སྦྱོར་བ་ལའང་། །ཆོ་ག་གོང་མ་དེ་ཉིད་ལས། །འཁོར་ལོ་ལ་སོགས་ཁ་དོག་དང་། །སྔགས་ཀྱི་སྤེལ་བ་བསྟན་པར་བྱ། །རང་གི་ལས་དང་མཐུན་པར་བྱ། །སྒྲོལ་མ་ཡི་ནི་ཏིང་འཛིན་གྱིས། །ལས་གཞན་དག་ཀྱང་བྱ་བར་ནུས། །བསྒྲུབ་བྱ་ཤེས་རབ་ཞན་པ༌[18]དང་། །ལེ་ལོ་ཅན་སོགས་རྣམས་ལ་ནི། །གོང་མའི་ཆོ་ག་དེ་ཉིད་ལས། །གཞན་དུ་བྱ་བར་བསྟན་པ་དེ།[19] །འཁོར་ལོ་སྔ༌[20]མ་དེ་ཉིད་ལས། །སྔགས་རྣམས་གཡོན་སྐོར༌[21]དག་ཏུ་དགོད། །མུ་ཁྱུད་ལ་ཡང་ཨ་སོགས་དགོད། །དེ་ལྟར་བསྒོམ་དང་བཟླས་བྱས་ན། །བློ་དམན་རྣམས་ནི་བློ་ལྡན་འགྱུར། །གཞན་ཡང་སྦྱོར་བ་བྱ་བ་ནི། །འདི་ལྟ་བུར་ཡང་བསྟན་པ་ཡིན། །གྲོ་ག་ལ་སོགས་གཞི་ལ་ནི། །འཁོར་ལོ་གོང་མ་ལྟར་བྲིས་ནས། །ལུས་ལ་བཅང་པར་བྱས་ན་ཡང་། །དེ་ཙམ་གྱིས་ཀྱང་བསྲུང་བར་འགྱུར། །ཐུགས་རྗེ་ཆེན་པོ་འཕགས་མ་སྒྲོལ་མའི་སྒྲུབ་ཐབས་སྤྱིའི་མངོན་པར་རྟོགས་པ་ཞེས་བྱ་བ། སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ། །

 

བསྡུར་མཆན།

[1] ལ་ ༼པེ།༽ ལས་

[2] སྙིང་གར་ ༼སྣར།༽ སྙིང་ཁར་ ༼པེ།༽ ཀར་

[3] བྱུང་བ་ཡི། ༼པེ།༽ བྱུང་བ་ཡིས།

[4] བསྒོམ་ ༼པེ།༽ སྒོམ་

[5] པད་ ༼སྣར། པེ།༽ པདྨ་

[6] བརྒྱད་པ་ ༼སྣར། པེ།༽ བརྒྱད་

[7] གཡས་མི་ ༼པེ།༽ གཡས་མ་

[8] བར་ ༼སྣར། པེ།༽ བ་

[9] ནི་ ༼པེ།༽ ནཱི་

[10] སྙིང་ག་ ༼སྣར།༽ སྙིང་ཁ་

[11] རིམས་ ༼སྣར།༽ རིམ་

[12] སྙིང་གར་ ༼སྣར།༽ སྙིང་ཁར་

[13] གུ་ ༼སྣར།༽ ཁུ་

[14] སྙིང་གར་ ༼སྣར།༽ སྙིང་ཁར་

[15] སྔོན་ནོ། ༼སྣར།༽ སྔོན་ནི།

[16] ལྷ་ ༼པེ།༽ ལྷས་

[17] བསྒྲུབ་བྱ་སྟེ། ༼སྣར།༽ བསྒྲུབ་ཡིས།

[18] ཞན་པ་ ༼སྣར།༽ གཞན་པ་

[19] བསྟན་པ་དེ། ༼སྣར།༽ བསྟན་པ་སྟེ།

[20] སྔ་ ༼སྣར།༽ ལྔ་

[21] སྐོར་ ༼པེ།༽ བསྐོར་