དཔལ་ནཱ་ལེནྡྲ། བྱོན་པ་ལེགས།
༄༅། །སྭསྟི། འཕགས་པ་ལྷའི་ཞལ་སྔ་ནས་ཀྱི་རྟོགས་པ་བརྗོད་པ།[1]
༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽
དེ་ཉིད་ཀྱི་ཞབས་ལ་ཕྱག་འཚལ་ལོ། །སིངྒྷ་ལའི་ཡུལ་རྒྱལ་པོ་ཡི། །ཐུགས་ཀྱི་སྲས་གྱུར་དེ་ཉིད་ཀྱི། །སྐྱེད་ཚལ་ཡིད་འོངས་འདབ་བརྒྱ་པའི། །ལྟེ་བར་བརྫུས་ཏེ་འཁྲུངས་ཁྱོད་ནི། །འཇམ་དཔལ་རྩ་རྒྱུད་སངས་རྒྱས་ཀྱིས། །ལུང་བསྟན་སོ་སྐྱེའི་དུས་ཉིད་ནས། །སྤྱན་ཡང་སློང་ལ་བཏང་བཟོད་པས། །འཕགས་པའི་མཚན་ཐོབ་རྒྱལ་སྲས་ལྷ། །མངལ་སྐྱེས་གཞན་གྱིས་མི་འདུལ་བའི། །
མཆོག་སྦྱིན་ཐོབ་པའི་མུ་སྟེགས་ཅན། །དྲེགས་ཅན་སངས་རྒྱས་བསྟན་པ་ལ། །འཇུག་མཛད་ཀུན་གྱིས་བཀུར་ཁྱོད་ནི། །ཀླུ་སྒྲུབ་སྲས་ཀྱི་མཆོག་གྱུར་ནས། །ཕྱི་མོར་གྱུར་པའི་གཞུང་བརྩམས་པ། །འཕགས་པའི་གཞུང་བཞིན་སྲས་ཀུན་གྱིས། །བསྔགས་པས་སྙན་གྲགས་བདེ་ཐོབ་པ། །ཁྱོད་ཀྱིས་མཐར་འཛིན་དྲུངས་འབྱིན་ཚེ། །རིགས་ཚོགས་ལྷུར་བླངས་ཉམས་ལེན་གྱི། །སྙིང་པོ་ཡེ་ཤེས་ལ་གཞོལ་བའི། །བསྟན་བཅོས་བཞི་བརྒྱ་པ་དེ་ཡི། །སྲོལ་ཆེན་ཐོག་མར་ཆོས་སྐྱོང་གིས། །རབ་བཟུང་ཕྱི་དུས་ཞི་བ་འཚོ། །སྲས་དང་བཅས་པས་དར་མཛད་ལ། །རྣལ་འབྱོར་སྤྱོད་པའི་དབུ་མ་གྲགས། །ཆོས་སྐྱོང་གིས་ནི་གཞུང་བརྩམས་པ། །སེམས་ཙམ་ལུགས་ཡིན་ལྷག་པའི་ལྷས། །རྗེས་བཟུང་ངོ་བོ་ཉིད་མེད་དུ། །གནས་གྱུར་ཞེས་པ་རང་འགའི་ཚིག །ཡིན་ནོ་ཤེས་བྱེད་ཕྱི་དུས་འདིར། །ངོ་བོ་ཉིད་མེད་སྨྲ་གཞུང་ལས། །གཞན་པའི་དབུ་མ་མེད་སྨྲ་བ། །དེ་རྗེས་འཇུག་པའི་གཏམ་བཅལ་པོ། །ཡིན་ནོ་ཤེས་བྱེད་ཆོས་སྐྱོང་གིས། །ཐོག་མར་གསང་སྔགས་གང་ཞིག་ནི། །ཉམས་སུ་བླངས་པས་ལྷ་གང་གཟིགས། །རྗེས་སུ་བིརྺ་པར་གྱུར་ཚེ། །མན་ངག་གཞུང་ཆེན་གང་མཛད་པ། །དེ་དང་དེ་ནི་དབུ་མ་ཡི། །ལྟ་སྒོམ་གང་དང་གང་ཡོད་པ། །དེ་དང་དེ་འདིར་ཁྱོད་ཀྱིས་སྨྲོས། །ཕ་རོལ་ཕྱིན་པའི་ལྟ་བ་དང༌། །ན་སྙམ་བྱས་ནས་ཟུང་འཇུག་གི །།ཡེ་ཤེས་སྒོམ་བྱར་བཤད་སྙམ་བྱེད། །འདིར་ཡང་སེམས་ཙམ་ཡིན་ཞེས་དང༌། །གཞན་འགའ་ཞིག་ནི་སྤྲོས་མེད་སོགས། །ཐལ་རང་གཞུང་བཞིན་ཡིན་ཟེར་བའི། །མགོ་འཁོར་སྤངས་ནས་གདེང་ཐོབ་བྱོས། །ཡེ་ཤེས་སྙིང་པོ་ཀུན་ལས་བཏུས། །མཛད་པོ་འཕགས་པ་ལྷ་འདི་ཡིས། །ཡེ་ཤེས་དམ་པའི་དོན་ཉིད་དུ། །མེད་པར་བཤད་པ་ཅི་ཞེ་ན། །སྒྲོ་འདོགས་བཅད་པའི་ཤེས་པའི་ངོར། །ཅི་ཡང་ཡོད་པ་མ་ཡིན་དང༌། །རང་རིག་ཡེ་ཤེས་སྤྱོད་ཡུལ་ལ། །ཉམས་ལེན་བྱེད་ཅེས་མ་སྨྲས་སམ། །སྒྲོ་འདོགས་གང་བཅད་སྒོམ་པ་ཡི། །ཉམས་ལེན་དགོས་པ་སངས་རྒྱས་ཀྱི། །དགོངས་པ་ཡིན་ན་དྲི་མེད་འོད། །སྒྲོན་གསལ་བཅས་ལ་ཁྱོད་ཀྱིས་རྒོལ། །ཀླུ་སྒྲུབ་གཞུང་ལུགས་གསང་སྔགས་དང༌། །སྦྱོར་ཚེ་ཨཱརྻ་དེ་ཝ་དང༌། །བིརྺ་པས་བཤད་དེ་ལས་ནི། །གཞན་དུ་བཙལ་བྱ་མ་ཡིན་པའི། །དབང་པོ་གྲུབ་པའི་སར་གཞུག་པའི། །རྣམ་འགྲེལ་མཁན་དང་ཞི་བ་འཚོ། །པདྨའི་ངང་ཚུལ་ཡེ་ཤེས་ཞབས། །དེ་སོགས་སྔགས་གཞུང་མཛད་ཀུན་ནོ། །འཕགས་པ་ལྷ་འདིས་ཕྱི་དུས་སུ། །གསང་བ་འདུས་པའི་ཉམས་ལེན་གྱིས། །ས་བརྒྱད་པ་ལ་བཞུགས་སོ་ཞེས། །ཚད་ལྡན་མང་པོའི་གསུང་ལས་འབྱུང༌། །འདིས་མཛད་སྤྱོད་བསྡུས་སྒྲོན་སོགས་ན། །ཐལ་རང་གཞུང་དུ་མ་གྲགས་པའི། །སྒྱུ་མ་དང་ནི་འོད་གསལ་དང༌། །ཟུང་འཇུག་ལྟ་བའི་རིམ་པ་ཡང༌། །རྒྱས་པར་བཤད་དོ་དེ་དག་ཀུན། །རྣལ་འབྱོར་དབང་ཕྱུག་བིརྺ་པའི། །བཞེད་པ་ཡིན་པ་ཡོད་མིན་ཕྱིར། །དེ་ཡང་སེམས་ཙམ་ལུགས་སུ་སྨྲོས། །རང་བྱིན་རླབས་ལས་ཕྱིར་ཕྱོགས་པས། །རྨི་ལམ་སྒྱུ་འདྲ་མི་རྟོགས་ཞེས། །གང་དེས་བཤད་དོ་དབུ་མ་ལ། །འཇུག་པ་ལས་བརྒལ་ལྟ་བ་འདི། །སྔགས་ཀྱི་ཐུན་མོང་མ་ཡིན་པའི། །དབུ་མ་ལས་བྱུང་འདི་ཡང་ནི། །སེམས་ཙམ་ཡིན་ཞེས་ཁྱེད་ཅག་གིས། །སྤོབས་པ་བསྐྱེད་ནས་སྨྲ་ནུས་སམ། །མདོར་ན་ཀླུ་སྒྲུབ་འཕགས་པ་ལྷའི། །དགོངས་པ་ཟླ་བས་གསལ་འཇུག་ཏུ། །བཤད་ལས་གཞན་དུ་མེད་ཅེས་པ། །མཁས་པ་རྣམས་ཀྱི་མི་སྨྲའི་གཏམ། །འདི་བཤད་པ་ལས་བྱུང་བ་ཡི། །དགེ་བ་གངས་ཅན་རི་བོའི་རྩེར། །བདེ་འབྱུང་གཙུག་རྒྱན་འཕོས་འདྲ་བ། །དེ་ཡིས་རྫོགས་སངས་རྒྱས་ཐོབ་ཤོག །མངྒ་ལཾ།། །།
[1] པཎ་ཆེན་ཤཱཀ་མཆོག་བཀའ་འབུམ། པོད། ༼མ༽ འཕྲུལ་པར་དཔེ་རིང་། ཤོག་གྲངས་ ༤ན༤ ནས་ ༥བ༡ བར།