༄༅། །དཔེ་མེད་པར་བསྟོད་པ། །

༄༅། །དཔེ་མེད་པར་བསྟོད་པ།

༄༅༅། །རྒྱ་གར་སྐད་དུ། ནི་རུ༌[1]པ་མ་སྟ་བཾ། བོད་སྐད་དུ། དཔེ་མེད་པར་བསྟོད་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་ཞིག་ལྟ་བས་ཕོངས་པ་ཡི། །འཇིག་རྟེན་འདི་ལ་ཕན་བརྩོན་ཁྱོད། །དངོས་པོ་མེད་པའི་དོན་རིག་པས། །དཔེ་མེད་ཁྱོད་ལ་ཕྱག་འཚལ་བསྟོད། །གང་ཞིག་ཁྱོད་ཀྱིས༌[2]ཅུང་ཞིག་ཀྱང་། །སངས་རྒྱས་སྤྱན་གྱིས་མ་གཟིགས་པ། །ཁྱོད་ཀྱིས༌[3]གཟིགས་པ་བླ་མེད་དེ། །དེ་ཉིད་དོན་ནི་རིག་པ་ལགས། །དོན་དམ་པ་ཡི་ཡོད་པ་ཉིད། །
རྟོགས་དང་རྟོགས་བྱ་མི་མངའ་ཞིང་། །ཨེ་མའོ༌[4]མཆོག་ཏུ་རྟོགས་དཀའ་བའི། །ཆོས་ཉིད་སངས་རྒྱས་རྣམས་ཀྱིས་རྟོགས། །ཁྱོད་ཀྱིས་ཅུང་ཞིག་མ་བསྐྱེད་ཅིང་། །ཆོས་རྣམས་བཀག་པའང་མ་ལགས་ལ། །མཉམ་པ་ཉིད་ཀྱི་ལྟ་བ་ཡིས། །བླ་ན་མེད་པའི་གོ་འཕང་བརྙེས། །འཁོར་བ་སྤངས་པར་གྱུར་པ་ཡིས། །མྱ་ངན་འདས་ཁྱོད་མི་བཞེད་ཀྱི།[5] །འཁོར་བ་མ་དམིགས་པ་ཉིད་ཀྱི། །ཞི་དེ་མགོན་པོ་ཁྱོད་ཀྱིས་རྟོགས། །ཁྱོད་ཀྱིས་ཀུན་ནས་ཉོན་མོངས་དང་། །རྣམ་བྱང་རོ་གཅིག་གྱུར་རིག་པས། །ཆོས་དབྱིངས་མངོན་པར་དབྱེར་མེད་པ། །ཀུན་དུ་རྣམ་པར་དག་པར་གྱུར། །གཙོ་བོ་ཁྱོད་ཀྱིས་འགའ༌[6]ཞིག་ཏུ། །ཡི་གེ་གཅིག་ཀྱང་མ་གསུངས་ལ། །གདུལ་བྱའི་འགྲོ་བ་མ་ལུས་པ། །ཆོས་ཀྱི་ཆར་གྱིས་ཚིམ་པར༌[7]མཛད། །མཁའ་དང་མཉམ་པའི་ཐུགས་མངའ་ཁྱོད། །ཕུང་པོ་ཁམས་དང་སྐྱེ་མཆེད་ལ། །ཆགས་པར་གྱུར་པ་མི་མངའ་བས། །ཆོས་རྣམས་ཀུན་ལ་བརྟེན་མ་ལགས། །མགོན་ཁྱོད་སེམས་ཅན་འདུ་ཤེས་ཀྱིས། །འཇུག་པ་ཀུན་དུ་མི་མངའ་ཡང་། །སྡུག་བསྔལ་གྱུར་པའི་སེམས་ཅན་ལ། །སྙིང་རྗེའི་བདག་ཉིད་གྱུར་པའང་ཁྱོད། །བདེ་དང་སྡུག་བསྔལ་དེ་བཞིན་དུ།[8] །རྟག་མི་རྟག་སོགས་ལ༌[9]གཙོ་ཁྱོད། །དེ་ལྟའི་རྣམ་རྟོག་སྣ་ཚོགས་ཀྱིས། །ཐུགས་ནི་ཆགས་པར་གྱུར་མ་ལགས། །ཆོས་རྣམས་གང་དུའང་འགྲོ་འོང་མེད། །དེ་བཞིན་ཁྱོད་ཀྱིས༌[10]གཤེགས་པའང་ལགས། །འགའ་རུ་སྤུངས་པ༌[11]མ་ལགས་ལ།[12] །དེ་ཕྱིར༌[13]དོན་དམ་རིག་པའང་ལགས། །ཀུན་གྱི་རྗེས་སུ་ཞུགས་གྱུར་ཀྱང་། །འགའ་རུ་འབྱུང་བའང་མ་ལགས་ལ། །སྐྱེ་དང་ཆོས་དང་སྐུ་རྣམས་ཀྱང་། ། ཐུབ་ཆེན་ཁྱོད་ཀྱི་བསམ་མི་ཁྱབ། །གཅིག་དང་གཞན་པ་རྣམས་སྤངས་པ། །བྲག་ཅ་ལྟ་བུའི་འགྲོ་བ་རྣམས། །འཕོ་དང་འཇིག་པ་རྣམ༌[14]སྤངས་པ།[15] །སྨད་པ་མེད་པ༌[16]ཁྱོད་ཀྱིས་རྟོགས། །རྟག་དང་ཆད་པ་དང་བྲལ་ཞིང་། །མཚན་ཉིད་མཚོན་བྱ་རྣམ་སྤངས་པར། །གཙོ་བོས་རྨི་ལམ་སྒྱུ་ཚོགས༌[17]བཞིན། །འཁོར་བ་ངེས་པར་རྟོགས་པ་ལགས། །བག་ཆགས་གཞིར༌[18]གྱུར་མཐར་ཐུག་པའི། །ཁྱོད་ཀྱིས་ཉོན་མོངས་སྡིག་པ་སྤངས། །ཉོན་མོངས་ཉིད་ཀྱི་རང་བཞིན་ཡང་། །ཁྱོད་ཀྱིས༌[19]བདུད་རྩི་ཉིད་དུ་བསྒྲུབས། །དཔའ་བོ་ཁྱོད་ཀྱིས༌[20]གཟུགས་རྣམས་ཀྱི། །མཚན་མ་མེད་མཐོང་གཟུགས་མེད་བཞིན། །མཚན་གྱིས་འབར་བའི་སྐུ་ཉིད་ཀྱང་། །གཟུགས་སུ་སྤྱོད་ཡུལ་ཉིད་དུ་མཐོང་། །གཟུགས་སུ་མཐོང་བས་མཐོང་མིན་ཡང་། །མཐོང་ངོ་ཞེས་ནི་རྗོད་པར་བྱེད། །ཆོས་མཐོང་བས་ནི་ཤིན་དུ་མཐོང་། །ཆོས་ཉིད་མཐོང་བ་མ་ཡིན་ནོ། །ཁོང་སྟོང་ཁྱོད་ཀྱི་སྐུ་ལ་མེད། །ཤ་དང་རུས་པ་ཁྲག་མེད༌[21]ཀྱང་།[22] །ནམ་མཁའི་དབང་པོའི་གཞུ་བཞིན་དུ། །ཁྱོད་ཀྱི་སྐུ་ནི་སྟོན་པར་མཛད། །སྐུ་ལ་བསྙུན་མེད་མི་གཙང༌[23]མེད། །བཀྲེས་དང་སྐོམ་པ་འབྱུང་མེད་ཀྱང་། །ཁྱོད་ནི་འཇིག་རྟེན་རྗེས་འཇུག་ཕྱིར། །འཇིག་རྟེན་སྤྱོད་པའང་སྟོན་པར༌[24]མཛད། །ལས་ཀྱི་སྒྲིབ་པའི་སྐྱོན་རྣམས་ནི།[25] །སྡིག་མེད་ཁྱོད་ཀྱིས༌[26]ཀུན་སྤངས་ཀྱང་། །ཁྱོད་ཀྱིས༌[27]སེམས་ཅན་རྗེས་གཟུང༌[28]ཕྱིར། །ལས་སྤངས་པར༌[29]ཡང་རབ་ཏུ་བསྟན། །ཆོས་ཀྱི་དབྱིངས་ལ་དབྱེར་མེད་ཕྱིར། །གཙོ་བོ་ཐེག་དབྱེར༌[30]མ་མཆིས་ཀྱང་། །ཁྱོད་ཀྱི༌[31]ཐེག་པ་གསུམ་བསྟན་པ། །སེམས་ཅན་གཞུག་པའི་ཆེད་དུ་ལགས། །རྟག་ཅིང་བརྟན་ལ་ཞི་བ་ཡི། །ཆོས་ཀྱི་རང་བཞིན་ཁྱོད་ཀྱི་སྐུ། །རྒྱལ་བས་གདུལ་བྱ་འགྲོ་བའི༌[32]ཕྱིར། །ཁྱོད་ཉིད༌[33]མྱ་ངན་འདས་པར་བསྟན། །གྲངས་མེད་འཇིག་རྟེན་ཁམས་རྣམས་སུ། །འདས་དང་བལྟམས་དང་མངོན་བྱང་ཆུབ། །འཁོར་བའང༌[34]ཐར་པར་མོས་རྣམས་ཀྱི། །ཁྱོད་ལ་གུས་རྣམས་ཀྱིས་ཡང༌[35]མཐོང་། །མགོན་པོ་སེམས་པ་མི་མངའ་ཞིང་། །རྣམ་རྟོག་གཡོ་བ་མི་མངའ་ཡང་། །ཁྱོད་ཉིད༌[36]ངང་གིས་འཇིག་རྟེན་ལ། །སངས་རྒྱས་མཛད་པའང་འཇུག་པར་འགྱུར། །དེ་ལྟར་བདེ་གཤེགས་ཡོན་ཏན་ཚད་མེད་བསམ་མི་ཁྱབ། །མེ་ཏོག་གིས་བརྒྱན་པ་ལས༌[37]བསོད་ནམས་གང་ཐོབ་པར། ། གྱུར་པ་འདི༌[38]ནི་སེམས་ཅན་མ་ལུས་པ་འདི་དག །མཆོག་ཏུ་རྟོགས་དཀའ་ཐུབ་པའི་ཆོས་ཀྱི་སྣོད་གྱུར་ཅིག །དཔེ་མེད་པར་བསྟོད་པ་སློབ་དཔོན་འཕགས་པ༌[39]ཀླུ་སྒྲུབ་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀྲྀཥྞ་པཎྜི་ཏ་དང་། ལོ་ཙཱ་བ་དགེ་སློང༌[40]ཚུལ་ཁྲིམས་རྒྱལ་བས་བསྒྱུར་བའོ།[41] །

 

བསྡུར་མཆན།

[1] ནི་རུ་ ༼སྣར། པེ།༽ ནི་རཱུ་

[2] ཁྱོད་ཀྱིས་ ༼སྣར། པེ།༽ ཁྱོད་ཀྱི་

[3] ཁྱོད་ཀྱིས་ ༼སྣར། པེ།༽ ཁྱོད་ཀྱི་

[4] ཨེ་མའོ་ ༼སྣར། པེ།༽ ཨེ་མ་ཧོ་

[5] བཞེད་ཀྱི། ༼སྣར། པེ།༽ བཞེད་ཀྱིས།

[6] ཀྱིས་འགའ་ ༼སྣར། པེ།༽ ཀྱི་གང་

[7] ཚིམ་པར་ ༼སྣར། པེ།༽ ཚིམ་པའང་

[8] སྡུག་བསྔལ་དེ་བཞིན་དུ། ༼སྣར། པེ།༽ སྡུག་བསྔལ་དེགྱུར་པ།

[9] ལ་ ༼སྣར། པེ།༽ ལས་

[10] ཁྱོད་ཀྱིས་ ༼སྣར། པེ།༽ ཁྱོད་ཀྱི་

[11] སྤུངས་པ་ ༼སྣར། པེ།༽ སྤུངས་པའང་

[12] ལགས་ལ། ༼སྡེ། ཅོ།༽ མཆིས་པ།

[13] དེ་ཕྱིར་ ༼སྣར། པེ།༽ དེ་བཞིན་

[14] རྣམ་ ༼སྣར། པེ།༽ རྣམས་

[15] པ། ༼སྣར། པེ།༽ པར།

[16] མེད་པ་ ༼སྣར། པེ།༽ མེད་པར་

[17] ཚོགས་ ༼སྣར། པེ།༽ སོགས་

[18] གཞིར་ ༼སྣར།༽ བཞིར་

[19] ཁྱོད་ཀྱིས་ ༼སྣར། པེ།༽ ཁྱོད་ཀྱི་

[20] ཁྱོད་ཀྱིས་ ༼སྣར། པེ།༽ ཁྱོད་ཀྱི་

[21] ཁྲག་མེད་ ༼སྣར། པེ།༽ ཁྲག་

[22] ཀྱང་། ༼སྣར། པེ།༽ ཀྱང་མེད།

[23] མི་གཙང་ ༼སྣར། པེ།༽ རུས་པའང་

[24] སྟོན་པར་ ༼སྣར། པེ།༽ བསྟེན་པར་

[25] རྣམས་ནི། ༼སྣར། པེ།༽ རྣམས་ཀྱང་།

[26] ཁྱོད་ཀྱིས་ ༼སྣར། པེ།༽ ཁྱོད་ཀྱི་

[27] ཁྱོད་ཀྱིས་ ༼སྣར། པེ།༽ ཁྱོད་ཀྱི་

[28] རྗེས་གཟུང་ ༼སྣར། པེ།༽ རྗེས་འཇུག་

[29] སྤངས་པར་ ༼སྣར། པེ།༽ སྤངས་པ་

[30] དབྱེར་ ༼སྣར། པེ།༽ དབྱེ་

[31] ཁྱོད་ཀྱི་ ༼སྣར། པེ།༽ ཁྱོད་ཀྱིས་

[32] འགྲོ་བའི་ ༼སྣར། པེ།༽ དགྲོལ་བའི་

[33] ཁྱོད་ཉིད་ ༼སྣར། པེ།༽ ཁྱོད་ཀྱིས་

[34] འཁོར་བའང་ ༼སྣར། པེ།༽ འཁོར་བ་

[35] ཀྱིས་ཡང་ ༼སྣར། པེ།༽ ཀྱིས་ཀྱང་

[36] ཁྱོད་ཉིད་ ༼སྣར། པེ།༽ ཁྱོད་ཀྱིས་

[37] ལས་ ༼སྣར། པེ།༽ ལས་བདག་གི་

[38] འདི་ ༼སྣར། པེ།༽ འདིས་

[39] སློབ་དཔོན་འཕགས་པ་ ༼སྣར། པེ།༽ སློབ་དཔོན་

[40] ཙཱ་བ་དགེ་སློང་ ༼སྣར། པེ།༽ ཙཱ་བ་

[41] བསྒྱུར་བའོ། ༼པེ།༽ བབསྒྱུར་བའོ་མངྒ་ལཾ།