པཎ་གྲུབ་བསྟོད་ཚོགས།

  ༄༅། །རིགས་པའི་དབང་ཕྱུག་ཆོས་ཀྱི་གྲགས་པ་ལ་བསྟོད་པ་སྨྲ་ངན་ཕམ་པའི་རྒྱལ་རྔ་ཞེས་བྱ་བ་བཞུགས་སོ།།[1]   ༼མཛད་པ་པོ། ཆོས་རྗེ་བློ་བཟང་ཆོས་འཛིན་དཔལ་བཟང་པོ།༽   ཆོས་ཀྱི་རིགས་པས་ཆོས་མིན་ཕམ་མཛད་ཅིང་། །གྲགས་པའི་སྒྲ་ཆེན་འཇིག་རྟེན་གསུམ་ན་བསྒྲགས། །སྨྲ་ངན་མུན་འཇོམས་སྨྲ་བའི་ཉི་མ་མཆོག །ཆོས་ཀྱི་གྲགས་པའི་ཞབས་ལ་ཕྱག་འཚལ་ལོ། །གནས་གསུམ་གཞལ་བྱའི་དེ་ཉིད་མ་ལུས་པ། །ཚད་མ་གསུམ་གྱིས་གཏན་ལ་ཕབ་པའི་དོན། །སྒྲུབ་དང་སུན་འབྱིན་ངག་གིས་འདོམས་མཛད་པ། །རིགས་པའི་དབང་ཕྱུག་ཞབས་ལ་ཕྱག་འཚལ་ལོ། །

  ༄༅། །དཔལ་ལྡན་ཆོས་ཀྱི་གྲགས་པར་གསོལ་བ་འདེབས་པ་སྡེ་བདུན་ཡིད་ལ་འགུགས་པའི་ལྕགས་ཀྱུ་ཞེས་བྱ་བ་བཞུགས་སོ།།[1]   ༼འཇམ་དབྱངས་གྲུབ་པའི་བློ་གྲོས་ (ཁྲུངས་དུས།1932-?) ཀྱིས་མཛད་པ།༽   དྷཱིཿ རྡུལ་སྙེད་ཞིང་གི་རྒྱལ་ཀུན་མཁྱེན་པའི་གཏེར། །རྡུལ་བྲལ་འཇམ་པའི་ཀློང་དུ་འུབ་ཆུབ་པ། །སྒྱུ་འཕྲུལ་དྲྭ་བའི་དཔལ་གྱི་འཇོ་སྒེག་ཅན། །རིག་པའི་དབང་ཕྱུག་ཁྱེད་ལ་གསོལ་བ་འདེབས། ། ༼༡༽ གང་གི་ཐུགས་གསང་དཔལ་གྱི་བེའུ་ནས། །རིགས་ལམ་རལ་གྲིའི་རྣོ་རྒྱུན་སྟོང་འབར་བ། །མུ་སྟེགས་འཆལ་བའི་སྙིང་ལ་གཟན་པའི་གཏམ། །སྡེ་བདུན་ཚད་མའི་ཆོས་ཀྱི་གྲགས་པ་ཅན། །

  ༄༅། །དཔལ་ཆོས་ཀྱི་གྲགས་པའི་བླ་རྣལ་ཚངས་དབྱངས་འབྲུག་སྒྲ་བཞུགས།[1]   ༼ གཏེར་ཆེན་རིག་འཛིན་ཉི་མས་ (འཁྲུངས་དུས།1931-?) མཛད་པ།༽   ཨེ་མ་ཧོ༔ མདུན་མཁའ་དག་པའི་ཕོ་བྲང་ན༔ དབྱིངས་རིག་དབྱེར་མེད་དགའ་རབ་རྗེ༔ ཐུགས་ཀར་མཚོན་འཁོར་གྲུ་བཞིའི་དབུས༔ པཎ་ཆེན་ཆོས་ཀྱི་གྲགས་པ་ནི༔ སྐུ་མདོག་སྔོ་སྐྱ་པཎྜི་ཏ༔ ཆ་བྱད་རིག་པའི་གཏེར་སྒོ་ལས༔ ལུང་རིགས་ཆོས་ཀྱི་མཛོད་སྒོ་འབྱེད༔ ཤེས་བྱས་རྨོངས་པ་ཁོང་ནས་འབྱིན༔ མ་རིག་གཏི་མུག་གཉིད་ལས་སད༔ འཇམ་དཔལ་རྣོན་པོ་རལ་གྲི་ཅན༔

  ༄༅། །དཔལ་ཆོས་ཀྱི་གྲགས་པའི་བླ་སྒྲུབ་བཞུགས།།[1]   ༼རྫོང་གསར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་ (1893-1959) ཀྱིས་མཛད་པ།༽   སྐྱབས་སེམས་ཚད་མེད་སྔོན་དུ་བཏང་། ཨ། ཆོས་ཀུན་སྟོང་པའི་ངང་ཉིད་ལས། །རིན་ཆེན་ཁྲི་རྐང་པད་ཟླའི་སྟེང་། །སྨྲ་བའི་དབང་ཕྱུག་ཆོས་ཀྱི་གྲགས། །དཀར་དམར་འཛུམ་ཁྲོའི་ཉམས་ལྡན་པ། །རབ་བྱུང་ཆ་ལུགས་ཕྱག་གཡས་པ། །ཕྱོགས་ལས་རྣམ་རྒྱལ་ཕྱག་རྒྱ་ཅན། །གཡོན་པ་ལུས་སྟེང་སྐྱབས་སྦྱིན་མཛད། །དབུ་ལ་པཎ་ཞྭ་ལེབ་མོར་གསོལ། །ཞབས་གཉིས་རོལ་སྟབས་སྐུ་འགྱིང་ཉམས། །