དཔལ་ནཱ་ལེནྡྲ། བྱོན་པ་ལེགས།
གུང་རུ་མཁའ་འགྲོ་མ།
མདོ་སྨད་རྒན་རྒྱ་ཁུལ་དུ་བྱུང་བའི་བུད་མེད་ཀྱི་སྤྲུལ་སྐུ་ཞིག་སྟེ། འདིའི་སྐུ་ཕྲེང་དང་པོ་ལྷ་རྩེ་དཔོན་མོ་བསོད་ནམས་རྒྱན། དེའི་སྐུ་ཕྲེང་གཉིས་པ་མདོ་སྨད་ཁུལ་དུ་འཁྲུངས་པ་བློ་བཟང་ཆོས་སྒྲོན། སྐུ་ཕྲེང་གསུམ་པ་བློ་བཟང་སྒྲོལ་མ། སྐུ་ཕྲེང་བཞི་པ་དཀོན་མཆོག་ཆོས་སྒྲོན། (གུང་ཐང་བསྟན་པའི་སྒྲོན་མེ་དང་དུས་མཚུངས) སྐུ་ཕྲེང་ལྔ་པ་དཀོན་མཆོག་རིག་འཛིན་སྒྲོལ་མ། སྐུ་ཕྲེང་དྲུག་པ་དཀོན་མཆོག་རིག་འཛིན་དཔལ་མོ་བཅས་མཚན་ཐོ་ཙམ་སྐུ་འབུམ་གདན་རབས་ལས་གསལ་ཞིང་། སྐུ་ཕྲེང་དྲུག་པ་འདིའི་དྲུང་ནས་ཐུའུ་བཀྭན་ཡོངས་འཛིན་བསྟན་པ་རྒྱ་མཚོས་ཆོས་འབྲེལ་མང་པོ་གསན་པ་དང༌།
རྣམ་ཐར་ཡང་དམ་པ་དེས་མཛད་པ་ཁ་བྱང་དུ་གུང་རུ་ཡེ་ཤེས་ཀྱི་མཁའ་འགྲོ་མའི་རྣམ་པར་ཐར་པ་པད་དཀར་འཁྲི་ཤིང་ལ་ཤོག་གྲངས་ ༡༨ ཡོད་པ་ཞིག་དམ་པ་དེའི་གསུང་འབུམ་པོད་ ༼ཀ༽ པའི་ནང་བཞུགས། སྐུ་ཕྲེང་བདུན་པ་དཀོན་མཆོག་བསྟན་པའི་དབང་མོ། སྐུ་ཕྲེང་བརྒྱད་པ་དཀོན་མཆོག་དམ་ཆོས་སྒྲོལ་མ། ༡༩༩༠ ལོར་དགུང་ལོ་ལྔ་བཅུ་ལྷག་ཙམ་དུ་ཕེབས་སྐད་འདུག[1] །ཅེས་བྱུང་བ་ལྟར། ཞང་སྟོན་བསྟན་པ་རྒྱ་མཚོའི་གསུང་འབུམ་ནང་གསལ་བའི་རྣམ་ཐར་གཤམ་དུ་འགོད་པར་བྱའོ།།
༄༅། །གུང་རུ་ཡེ་ཤེས་ཀྱི་མཁའ་འགྲོ་མའི་རྣམ་པར་ཐར་པ་པད་དཀར་འཁྲི་ཤིང་ཞེས་བྱ་བ་བཞུགས་སོ།།
༄༅། །ན་མོ་གུ་རུ་པྲཛྙཱ་པཱ་ར་མི་ཏ་ཡེ། དུས་གསུམ་འཕགས་ཚོགས་བསྐྱེད་པའི་ཡུམ་གཅིག་བུ། །རང་བཞིན་སྤྲོས་བྲལ་ཤེས་རབ་ཕ་རོལ་ཕྱིན། །གངས་ཅན་གྲུབ་པའི་དབང་མོ་ལབ་ཀྱི་སྒྲོན། །བླ་མ་རྣལ་འབྱོར་དབང་མོས་བདག་སྐྱོངས་ཤིག།།ཇི་སྙེད་བརྟན་གཡོ་ཀུན་གྱི་རང་བཞིན་གདོད་ནས་རྣམ་དག་དབྱིངས་ཀྱི་བཅུད། །རང་རིག་འོད་གསལ་སེམས་ཀྱི་རྡོ་རྗེས་རྟག་ཏུ་འཐུང་བའི་ལང་ཚོའི་བཞིན། །རབ་དམར་བདེ་ཆེན་མུ་ཁྱུད་གཅིག་གིས་འཁོར་འདས་མ་ལུས་སྡོམ་མཛད་པ། །དཔལ་ལྡན་རིགས་རྣམས་ཀུན་གྱི་ཁྱབ་བདག་ཧེ་རུ་ཀ་དཔལ་རྒྱལ་གྱུར་ཅིག། །དྲུག་ལྡན་མཚོ་སྐྱེས་གསར་པའི་སྦྲང་ཆང་གིས། །དཔའ་བོའི་དབང་ཕྱུག་སྲིད་མཐར་དགྱེས་མཛད་ཅིང་། །རྗེས་ཆགས་དམ་དུ་འཁྱུད་པའི་དགའ་བ་མོ། །རྣལ་འབྱོར་མ་ཁྱོད་བརྩེ་བས་རྟག་ཏུ་སྐྱོངས། །བྲག་དཀར་ཞེས་གྲགས་མདོ་སྨད་གནས་ཆེན་འདིར། །མཁའ་སྤྱོད་ཞིང་གི་གཙོ་མོ་རྒྱལ་བའི་ཡུམ། །བསམ་བཞིན་མི་ཡི་སྲིད་པ་བཟུང་བ་ཡི། །དཀོན་མཆོག་རིག་འཛིན་དཔལ་མོར་སྙིང་ནས་གུས། །ཨ་མ་ལབ་ཀྱི་སྒྲོན་མ་ཡུམ་སྲས་ཀྱིས། །མཐའ་འཁོབ་ཡུལ་འདི་བདག་གིར་མཛད་པ་བཞིན། །ཀུན་མཁྱེན་བླ་མ་མཆོག་དང་ལྷན་ཅིག་ཏུ། །ཐུགས་བསྐྱེད་སྨོན་ལམ་ཕ་མཐའ་སུ་ཡིས་དཔོག།།འོན་ཀྱང་རྨད་བྱུང་མཛད་པའི་ཟླ་ཟེར་གྱིས། །སྙིང་ལ་བསིལ་བ་ཐོབ་པའི་དགེ་སྦྱོང་ཞིག།།སོར་བཅུའི་འདབ་མ་སྙིང་གར་ཟུམ་བྱས་ཏེ། །དད་པའི་ཡིད་ཀྱིས་ཅུང་ཟད་གླེང་བར་བྱ། །
དེ་ཡང་། རྒྱུད་རྡོ་རྗེ་མཁའ་འགྲོ་ལས། མཁའ་འགྲོ་མ་ཞེས་ཡང་དག་གྲགས། །རྡོ་རྗེ་དཀྱིལ་འཁོར་གཙོ་མོ་སྟེ། །ཡེ་ཤེས་ལྡན་རྣམས་ཡུལ་ཡུལ་དུ། །རང་བཞིན་སྐྱེ་གནས་རྣམས་སུ་སྐྱེ། །ཞེས་དང་། མན་ངག་སྙེ་མ་ལས་གསུངས་པ་ལྟར། འཛམ་གླིང་གི་གནས་ཆེན་ཉེར་བཞི་སོགས་གྲུབ་པའི་གནས་ཆེན་པོ་རྣམས་སུ་མཁའ་འགྲོ་མ་རྣམས་བུད་མེད་ཐ་མལ་པའི་ཚུལ་བཟུང་ནས་བཞུགས་པར་གསུངས་ལ། དེ་ལ་ཡང་བསྐྱེད་རིམ་ལ་གནས་པའི་སྔགས་སྐྱེས་མ་དང་། དབེན་གསུམ་ལ་གནས་པའི་ཞིང་སྐྱེས་མ་དང་། ཟུང་འཇུག་ཡན་ཆད་ལ་གནས་པའི་ལྷན་སྐྱེས་མ་དང་གསུམ་ཡོད་པར་གསུངས་སོ།།
དོན་ལ་མི་སློབ་པའི་ཟུང་འཇུག་པ་ཡིན་ཀྱང་། སྣང་ཚོད་ལ་བསྐྱེད་རིམ་པ་སོགས་ཀྱི་ཚུལ་བཟུང་བ་ཡོད་པ་ལ་ཐེ་ཚོམ་མེད་པར་མ་ཟད། ཚེ་རིང་མཆེད་ལྔའི་ལོ་རྒྱུས་སོགས་ཀྱིས་ཀྱང་ཤེས་སོ། །ཡེ་ཤེས་ཀྱི་མཁའ་འགྲོ་ལ་ཡང་། རྣལ་འབྱོར་མ་སོ་བདུན་གྱི་རིགས་སོ་སོར་ཡོད་ཚུལ་དང༌། དེ་དག་གི་རྟགས་མཚན་སོགས་འཁོར་ལོ་བདེ་མཆོག་གི་རྒྱུད་ལས་རྒྱ་ཆེར་གསུང་ཞིང་། འཇིག་རྟེན་པའི་མཁའ་འགྲོ་ཤ་ཟ་ཕྲ་མེན་མ་གདུག་པ་ཅན་ཡང་མང་དུ་ཡོད་པར་གསུངས་སོ།།
དེ་དག་ལས་མདོ་སྨད་ཀྱི་ལྗོངས་འདིར་འཁོར་ལོ་བདེ་མཆོག་གི་ཕོ་བྲང་དངོས་ཡིན་པར་ཚད་ལྡན་གྱི་སྐྱེས་བུ་དམ་པ་ཐམས་ཅད་ཞལ་མཐུན་པའི་བྲག་དཀར་གྱི་གནས་འདིའི་བདག་པོ་གུང་རུ་ཡེ་ཤེས་ཀྱི་མཁའ་འགྲོ་མ་དཀོན་མཆོག་རིག་འཛིན་དཔལ་མོའི་རྣམ་པར་ཐར་པ་ཅུང་ཟད་བརྗོད་པར་བྱའོ། །
དེ་ལ་སྐུ་ཐོག་དང་པོ་བློ་བཟང་སྒྲོལ་མ་བྱ་ཁྱུང་སྐུ་འབུམ་སོགས་དགོན་སྡེ་དུ་མར་ཕན་གྲོགས་མཛད། རྫུ་འཕྲུལ་མངོན་ཤེས་ཐོགས་པ་མེད་པའི་གྲུབ་ཐོབ་ཚད་ལྡན་དུ་རྗེ་སྐལ་ལྡན་རྒྱ་མཚོས་གསུངས། དབུས་ལམ་ནས་ཁམས་གུང་རུར་ཕེབས་ཏེ་མགོན་ཁང་དུ་མཇལ་རྒྱུ་ཡིན་བྱས་པར། མཁའ་འགྲོ་མ་གཤེགས་ནས་སྒོ་འབྱེད་མ་མྱོང་ལྡེ་མིག་གར་ཡོད་མི་ཤེས་ཟེར། ལྡེ་མིག་འདི་ན་ཡོད་ཅེས་སྙན་ཤལ་གསེབ་ནས་བླངས་ཏེ་སྒོ་ཕྱེ་བས་མཁའ་འགྲོ་མ་གཤེགས་དུས་སྤར་བའི་མར་མེ་ད་དུང་ཡོད་པས་གུང་རུ་མཁའ་འགྲོ་མའི་སྐྱེ་བར་ངོས་བཟུང་། གཞུང་ནས་བཀའ་ཤོག་གིས་གཟེངས་བསྟོད།
དེའི་སྤྲུལ་སྐུ་བློ་བཟང་ཆོས་སྒྲོན་ཟེར། དེའི་སྤྲུལ་སྐུ་རྗེ་འདི་པ་ཡིན་ལ་ཁོང་འཁྲུངས་དུས་སོགས་ཀྱི་ལོ་རྒྱུས་རྗེ་ཉིད་ནས་ཡི་གེ་ཞིག་གནང་འདུག་པ་ནི་འདི་ལྟར། ངའི་སྐྱེ་བ་སྔ་མ་དཀོན་མཆོག་ཆོས་ཀྱི་སྒྲོན་མེ་ཟེར་བ་དེས་གུང་ཐང་རིན་པོ་ཆེ་དང༌། རྗེ་འཇིགས་མེད་རིགས་པའི་སེང་གེ་རྣམ་གཉིས་བསྟེན་ནས་བཀའ་ཆོས་མང་དུ་གསན། སྒྲུབ་པ་ཉམས་ལེན་མང་པོ་གནང་ཡང་། ཐུགས་ཧ་ཅང་གཏུམ་ཞིང་མཐོ་དམན་བར་གསུམ་ཆ་ཡོད་མེད་སུ་ལ་ཡང་ཁ་བརྡལ་དང་ངོ་འཛིན་མི་བྱེད་པར་རང་ཚུགས་ཅན་ཞིག་ཡིན་སྟབས། ཁ་ཏོན་ཉམས་ལེན་འདི་འདྲ་བྱས་ཟེར་བ་སུ་ལ་ཡང་བཤད་རྒྱུ་མེད། གཞན་དང་མི་འདྲ་བ་ཞིག་ཡིན་ཚོད་རེད། ཐུའུ་བཀྭན་རིན་པོ་ཆེ་བློ་བཟང་ཆོས་ཀྱི་ཉི་མ་སོགས་ཀྱིས་བསྔགས་བརྗོད་གནང་བའི་ལོ་རྒྱུས་རེ་ཡོད། དགུང་ལོ་དྲུག་ཅུ་རྩ་བདུན་བཞུགས། ལུག་གི་ལོ་ཟླ་བ་བདུན་པའི་ནང་ལ། རྒན་གྱའི་ཕྱོགས་ལ་ཕེབས་ཞོར་ཞིག་ལ་ངའི་ཕ་མའི་ཁྱིམ་དེར་ཕེབས་དོན་གཞན་མེད་ཀྱང་། རང༌གར་ཕེབས་ནས་ཞག་གཉིས་བཞུགས། ངའི་མ་དེ་ལ་མར་གྱི་རིལ་བུ་ཞིག་གནང་ནས་འདི་ཁྱོད་ཀྱིས་ཟོ། ཁྱོད་ལ་གོས་སྐུད་སེར་པོ་ཡོད་ན་ངས་ཕྲེང་ཐག་སྤོར་གསུངས་ནས་ཐུའུ་བཀྭན་རིན་པོ་ཆེའི་ཕྱག་ཕྲེང་ཞིག་ཡོད་པ་དེའི་ཕྲེང་ལུང་བརྗེས་ནས་ཕུལ། ཕྱི་ཉིན་ཕེབས་དུས་སྦ་སྒོ་ནས་ཞལ་ཕྱིར་འཁོར་ནས་སྦ་སྒོ་ཕྱག་གཉིས་ཀྱིས་བཟུང་ནས་ཐོ་གཏུག །གཡང་སྒོ་འདི་འདྲ་བྱས་ནས་ཞོག་དང་བཟང་གསུངས་ནས་ཕེབས་ཟེར། དེ་ནས་ཆེར་མ་འགྱང་བར་ཟླ་བ་བརྒྱད་པའི་ཡར་ངོའི་ཚེས་བཅུའི་ཉིན་སྐུ་གཤེགས། དེ་དུས་རྗེ་འཇིགས་མེད་རིགས་པའི་སེང་གེ་ཕེབས་ནས་བསྔོ་སྨོན་གང་རྒྱས་དང་། སྤྲུལ་སྐུ་མྱུར་འབྱོན་ཞིག་ཀྱང་མཛད་འདུག །
དེ་ནས་བྱའི་ལོའི་སོས་ཀ་ངའི་མའི་རྨི་ལམ་དུ་ངའི་སྐྱེ་བ་སྔ་མ་དེ་བ་རྟ་དཀར་པོ་ཞིག་ལ་ཆིབས་ནས་ཁྱིམ་དུ་ཟབ་ཕེབས་པ་རྨིས། དེའི་འཕྲོར་ཡང་ནུབ་གཅིག་ཁོང་གི་དབུ་ནབ་སེར་པོ་ཞིག་ཡོད་པ་མོའི་མགོ་ཐོག་ན་ཡོད་པ་ཞིག་རྨིས། ཡང་ནུབ་གཅིག་གནས་ཁང་གི་ལུང་པའི་ཕུ་ན་སྤྲིན་མང་པོ་འཐིབ་ཅིང་འབྲུག་སྒྲ་དྲག་པོ་དང་བཅས་ཆར་མང་པོ་བབས། དེའི་ནང་ནས་སྦྲང་མ་སེར་པོ་ཆེ་བ་ཞིག་སྐད་སྒྲ་སྒྲོག་བཞིན་འཕུར་ཡོང་ནས་མོའི་པང་དུ་བབས་པ་རས་དཀར་པོ་ཞིག་གིས་བཀབ་ནས་བཞག་པ་རྨིས་ཟེར། དེ་ནས་བཟུང་ཞག་མ་ཆ་རེས་མཚམས་ནས་རྔ་མོང་རྟ་དྲེའུ་ཞོན་པའི་མི་མང་པོ་སྟག་རྔ་འདྲ་ཁུར་ནས་ཁྱིམ་དུ་འོང་སྟེ་ཅུང་ཟད་རེ་བསྡད་ནས་འགྲོ་བ་ཡང་ཡང་རྨིས་ཟེར། ཕ་མ་གཉིས་ཀྱིས་སྔོན་ཆད་བྱིས་པ་གསུམ་ཡོད་པ་མ་མཚམས་པའི་སྟབས་ཀྱིས་བསེ་སྐུ་གོང་མར་གསུང་བརྟགས་ཞུས་པས། བྱིས་པ་སྔ་མ་རྣམས་བུ་ལོན་ཡིན། འདི་ལ་ཤ་ས་ན་འབུམ་དང་མགོན་པོ་ཞི་བའི་སྦྱིན་སྲེག་བླུག་ན་སྐྱོན་མེད་གསུངས།
དེ་ནས་ཁྱིའི་ལོའི་གཉིས་པའི་བཅུ་གཅིག་གི་ཉིན་ང་སྐྱེས། དེ་དུས་མའི་ཕུང་པོ་ཅུང་ཟད་མ་བདེ་བས་རྒན་གྱའི་སྐུ་སྐྱེ་ཟེར་བའི་སྨན་པ་ཞིག་ཡོད་པ་དེའི་ལག་ཏུ་སྨན་ཞིག་ལེན་གི་སོང་བས་བྱིས་པ་དེ་ལ་མིང་མ་འདོགས། འཕྲོ་ཁོས་འདོགས་དགོས་ཟེར། རྗེས་སོར་སྐར་བཟང་ཞིག་ལ་སོང་བས་མིང་ལ་རིག་འཛིན་སྒྲོལ་མ་བཏགས། ཟླ་བ་གཅིག་གི་འཕྲོ་ནས་ཕུང་པོ་མ་བདེ་ཆར་བས་སྔགས་པ་ཞིག་གིས་རིམ་གྲོ་བྱས་པས་ནུབ་མོ་དེའི་རྨི་ལམ་དུ་བྲག་དཀར་ཕྱོགས་ནས་རྟ་ནག་པོ་ཞོན་པའི་མི་ཞིག་ཡོང་ནས་ཁྱེད་ཀྱིས་དེ་ལ་ཕན་མི་ཐོགས་བྲག་དཀར་ལ་ཁྱེར་ཟེར་བ་ཞིག་རྨིས་པས་གསུམ་པའི་ཉི་ཤུ་གསུམ་གྱི་ཉིན་བྲག་དཀར་ལ་ཁྱེར། དེ་ནས་བཟུང་སྟེ་བྲག་དཀར་ནས་བསྡད། ལོ་གསུམ་གྱི་ཐོག་སྔོན་གྱི་སྐུ་བདག་རྣམས་ཀྱིས་གུང་ཐང་རིན་པོ་ཆེར་གསུང་བརྟག་ཞུས་པས་མཁའ་འགྲོ་མའི་སྐུ་སྐྱེ་ཡིན་གསུངས་ནས་ཐག་བཅད་མན་ཛིའི་ཕྱག་མདུད་ཕུར་མདུད་གནང་། ལོ་བཞིའི་ཐོག་ལྔ་པའི་ཚེས་པ་ལྔའི་ཉིན་གུང་ཐང་རིན་པོ་ཆེའི་སྐུ་མདུན་ལ་མཇལ། ཁོང་གིས་ངའི་མགོ་ལ་ཕྱག་བཞག་ནས་ཡུན་རིང་གཟིགས་རྟོག་གནང་། ཀ་ར་ལན་གསུམ་གནང་། མིང་ལ་དཀོན་མཆོག་རིག་འཛིན་དཔལ་མོ་བཏགས། དེ་ནས་ཕྱིར་རང་ཡུལ་དུ་ཡོང་དུས་ཨ་ཁུ་ཞིག་ཡོད་པ་དེ་བས་བོས་ནས་རྟ་དཀར་པོ་ཞིག་བྱིན། ལོ་ལྔའི་ཐོག་གུང་ཐང་རིན་པོ་ཆེ་དགོན་ལུང་ལ་ཕེབས། ཕྱིར་ལམ་བྲག་དཀར་ལ་ཕེབས་ནས་ཁོང་ལ་མཇལ་ནས་སྔར་གྱི་རྙེད་པ་དང་པོ་རྟ་དཀར་པོ་དེ་ཕུལ། དེ་དུས་བསམ་པ་ཅང་མེད་ཀྱང་འདང་བརྒྱབ་ན་རྙེད་པའི་དང་པོ་བླ་མ་ལ་འབུལ་རྒྱུ་བྱུང་བ་རྟེན་འབྲེལ་འགྲིགས་བསམ།
ལོ་ལྔའི་ཐོག་ནས་ཡི་གེ་སོགས་བསླབ་པས་དཀའ་ཚེགས་ཆེར་མེད་པར་ཤེས་པ་ཞིག་བྱུང་། ལོ་བདུན་གྱི་ཐོག་དགེ་རྒན་བཀའ་དྲིན་ཅན་ཞིག་ཡོད་པ་དེས་ཁྲིད་ནས་ཡབ་རྗེ་བཀའ་དྲིན་ཅན་བསྟན་པའི་སྒྲོན་མེའི་དྲུང་དུ་ཁྲིད་ནས་འཇིགས་བྱེད་ཀྱི་དབང་ཞུས་པས། ཁོང་གིས་འདིའི་སྐྱེ་བ་སྔ་མས་བདེ་མཆོག་འདོན་ཚོད་ཡིན། བདེ་མཆོག་ཅིག་བཏོན་ན་བཟང་གསུངས་ནས་དྲིལ་བུ་ལྷ་ལྔའི་དབང་དང༌། ཛམ་དཀར་ལྷ་ལྔའི་རྗེས་གནང་། མགོན་པོའི་རྗེས་གནང་སོགས་ཐོབ། ཆོས་ཉན་པའི་ཐོག་མ་དེ་ཡིན་ལགས། ཁྱེད་ཀྱིས་འདི་འདྲ་ཞིག་བྲིས་ནས་བསྐུར་ཟེར་བས་བསྐུར་བ་ཡིན་པས་འདི་འདྲ་ལ་དགོས་པ་ཅི་ཡང་མེད་སུ་ལ་གཏན་ནས་མ་སྟོན་ཞེས་པ་འདི་ཉིད་ཀྱི་ཕྱག་བྲིས་མ་ཡིག་ལྟར་གསུང་མ་བཅོས་པར་བཀོད་པའོ།།
དེ་དོན་བཞིན་ཡབ་གཡུང་དྲུང་རྒྱལ་དང་། ཡུམ་ལྷ་མོ་རྒྱལ་གཉིས་ཀྱི་སྲས་སུ་གསེར་ཆེན་གཞུང་ནས་སྐུ་བལྟམས། ཞལ་ནས་ང་ཆུང་ངུའི་དུས་ཡུལ་ནས་བསྡད་ན་ཕུང་པོ་མི་བདེ་བས་མས་ཁྱེར་འོང་ནས་བྲག་དཀར་དུ་བསྡད་པས་འབྲོག་པ་དེ་ཙམ་མི་ཤེས་གསུངས། སྐུ་གོང་མ་ཁྱིམ་དུ་ཕེབས་ནས་གྲྭ་པ་རྣམས་ལ་ཁྱེད་ཚོ་སོང་ནས་མེ་རྡོ་ཆེ་བ་ཞིག་ཁྱེར་ཤོག་ང་ལ་དགོས་གསུངས་ནས་མངགས། དེའི་ཤུལ་ནས་ཕྲེང་ཐག་བརྗེས། རྡོ་ཁྱེར་འོང་བ་བཅག་པས་ནང་ན་འབུ་ཆེན་པོ་ཞིག་འདུག་པར་ཡ་མཚན་རྡོའི་ནང་ན་འབུ་ཡོད་པ་ཡིན་རྒྱུ་རེད་གསུངས། དོན་ལ་སེམས་ཅན་དེའི་ཆེད་དུ་ཡིན་པར་འདུག་པས་མངོན་ཤེས་ཀྱིས་གཟིགས་ནས་གྲྭ་པ་ཚོའི་ལག་ཏུ་ཆུད་པར་བྱིན་གྱིས་བརླབས་པ་ཡིན་པར་སྣང་ངོ༌། །
གནས་ཁང་གི་ཐད་ཀྱི་རི་འགོ་དེར་མས་ཁྱེར་བས་འདི་ན་གཏེར་ཞིག་འདོན་རྒྱུ་ཡོད་ཀྱང་བདག་དང་མི་གསུམ་མེད་པར་ལེན་མི་ཐུབ་ཅེས་བཤད་འདུག །བྱིས་པའི་སྐད་ཆ་ཡིན་པས་ངེས་པ་ཅི་ཡོད་ཅེས་འདི་དག་བདག་ལ་དངོས་སུ་གསུངས་སོ། །གདན་སར་བཀོད་ནས་རི་ཁྲོད་པ་འཇམ་དབྱངས་མཆོག་གྲུབ་ཟེར་བ་དགེ་རྒན་ལ་གདན་འདྲེན་དུ་སོང་བས་ཁོ་རང་གི་རྨི་ལམ་དུ་མི་ནག་པོ་ཞིག་འོང་ནས་སང་ཉིན་ཁྱོད་འབོད་མཁན་ཞིག་འོང་བས་དེ་ལ་ཅིས་ཀྱང་སོང་ཟེར་བ་ཞིག་བྱུང་བས་འཕྲལ་དུ་ཕེབས་ཏེ་བཅར་བཞུགས་མཛད། འདོན་ཆ་ཆོས་སྤྱོད་སོགས་བསླབས། བླ་མཆོད། དཔའ་གཅིག །བརྒྱ་རྩ། མགོན་པོ། ལྷ་མོ་སོགས་ཆག་མེད་བྱེད་རྒྱུའི་འགྲིགས་ཡིག་འདྲ་བ་ཞིག་བྱིན་པས་དགེ་རྒན་བཞུགས་མེད་སྐབས་ཀྱང་དེ་ལྟར་མ་ཆག་པར་བྱས་གསུངས། ཆུང་ངུའི་དུས་ནས་བག་མེད་ཀྱི་སྤྱོད་པ་ལ་འཛེམ་པས་རྭ་སྐོར་ཕྱི་མ་ན་གྲོང་པ་མང་པོ་འདུག་ཀྱང་། དེ་ལ་གཏན་ནས་མ་སོང་། ཆུང་དུས་མི་མང་དང་འགྲོགས་ན་ལད་འགྲོ་ཞེས་གསུངས་ཏེ་ངོ་མཚར་ཆེ་བར་སྣང་ངོ༌། །
དེ་དུས་ཕྱག་རྫས་སྲབ་པས་བཞེས་པ་ཡང་བཟང་པོ་མེད། གསོལ་ཇ་དུས་སུ་མ་འབྱོར་ཀྱང་རུང་ཁོང་དུ་མ་ཕེབས་སྐབས་ཤིག་སྡེ་ཁྲི་རིན་པོ་ཆེ་ཚོགས་ཆེན་ཁྲི་པའི་དུས་དེར་ཕེབས་ནས་དགོན་པའི་ལྟག་རྒྱབ་ནས་སྒར་བཏབ་ནས་བཞུགས། ཉིན་ཁ་ཤས་ལ་མདུན་དུ་མ་སོང་བར་མཁའ་འགྲོ་མ་འདིར་མི་འོང་གིའང་གསུངས་པ་ཐོས་པས་མདུན་དུ་ཕེབས་པར་གནས་ཁང་ནས་ཕྱིར་བྱོན་འདུག་པས་ང་གནས་ཁང་དུ་སོང་བ་ཡིན། དེ་ན་ཚིལ་མང་པོ་འདུག །འདི་ཚིལ་རེད་ཅེས་རྡོ་དཀར་པོ་ཞིག་བསྟན་པར་དེ་རྡོ་ཞིག་རེད་ཞུས་པས་མ་རེད་ཅེས་སྐུ་རྩེད་མཛད། ད་ཁྱོད་རང་སོང་ནས་རྩེད་མོ་རྩེས། ངེད་ཚོས་གྱོད་ཅིག་བཤད་གི་ཡོད། ཉིན་གཅིག་ཤོག་དང་ངས་བདེ་མཆོག་གི་རྗེས་གནང་ཞིག་བསྐུར་གསུངས་ནས་དེ་བཞིན་གནང་བ་དགོས་པ་ཁྱད་པར་ཅན་ཡོད་འདུག་གོ།
ཡང་སྐབས་ཤིག་གཉན་ཁྲོད་པ་འགའ་ཆུ་ཁ་ནས་རས་གུར་ཕུབ་སྟེ་བསྡད་འདུག །ཕྱི་ཉིན་ཇ་མ་རྒད་པོ་ཞིག་ཡོད་པས་དེ་བསོད་གྲགས་ཚང་རེད་ཟེར་བས་མཚན་ཐོས་པ་ཙམ་གྱིས་སྡོད་མི་ཚུགས་པ་བྱུང་སྟེ་མདུན་དུ་ཕེབས། གནས་ཁང་དུ་ཕེབས་གྲབས་བྱེད་པར་འདུག་པས་ང་ཡང་འགྲོ་རྒྱུ་ཡིན་ཞུས་པར། དེ་མི་རུང་ཁྱོད་ལྷུང་འགྲོ་གསུངས་པར་སྐྱོན་མེད་ང་ཅིས་ཀྱང་འགྲོ་རྒྱུ་ཡིན་ཞུས་ནས་ཞབས་ཕྱིར་སོང་བ་ཡིན། གནས་ཁང་དུ་དང་པོ་ཁོང་དང་མཉམ་དུ་སོང་བ་དེ་རྟེན་འབྲེལ་ལེགས་འདུག །གཤིན་རྗེའི་འཕྲེང་ནས་རྗེ་དེ་ཉིད་ཀྱིས་ཐག་པ་བསྣམས་ཏེ་རྐང་བརྒྱད་གསུང་ཞིང་མི་རྣམས་ཡར་འཐེན་གྱིན་འདུག་ཅེས་ཞལ་ནས་དངོས་སུ་ཐོས་སོ། །འདི་དག་ནི་ཆུང་ངུའི་དུས་ཀྱི་མཛད་པའི་སྐོར་རོ།།
གུང་ཐང་འཇམ་པའི་དབྱངས་ལས་རབ་བྱུང་མར་བསྒྲུབས། མཚན་ལ་མཁན་པོའི་མཚན་ཟུར་གྱིས་དཀོན་མཆོག་རིག་འཛིན་སྒྲོལ་མར་བཏགས། དཀར་ཡོལ་ཕྱི་ནང་གཉིས་ཀ་སེར་པོ་ཡིན་པ་ཞིག་ཞོས་བཀང་སྟེ་གནང་། རྗེ་དེ་ཉིད་ཀྱི་ཞལ་རས་གཏན་ནས་མི་བརྗེད་གསུངས། རྗེ་འདི་ལ་ནམ་མཇལ་ན་ཡང་ཕྱག་གཡོན་པས་མཇལ་ཁ་དང༌། གཡས་པས་ཕྱག་མདུད་གནང་གསུངས་ཏེ་བདེ་མཆོག་གི་རྒྱུད་དོན་དང་འབྲེལ་བའི་དགོས་པ་ཁྱད་པར་ཅན་ཡོད་པས་བླ་སློབ་གཉིས་ཀའི་རྣམ་ཐར་རྨད་དུ་བྱུང་བའོ། །
དེ་ནས་མང་ཐོས་ཇི་ལྟར་མཛད་པའི་ཚུལ་ནི། ༸སྐྱབས་མགོན་ཐམས་ཅད་མཁྱེན་ཅིང་གཟིགས་པ་ཆེན་པོ་རྗེ་བཙུན་བློ་བཟང་ཐུབ་བསྟན་འཇིགས་མེད་རྒྱ་མཚོའི་ཞལ་སྔ་ནས་དང༌། མགོན་དེའི་སྤྲུལ་པའི་སྐུ་རྗེ་བཙུན་སྐལ་བཟང་ཐུབ་བསྟན་དབང་ཕྱུག་དཔལ་བཟང་པོ། མཚན་དང་དོན་མཐུན་པའི་ངེས་པ་དོན་གྱི་འཇམ་པའི་དབྱངས་དཀོན་མཆོག་བསྟན་པའི་སྒྲོན་མེ། དེའི་སྤྲུལ་པའི་སྐུ་དཀོན་མཆོག་བསྟན་པའི་རྒྱ་མཚོ་དང༌། དེའི་ཡང་སྤྲུལ་འཇམ་དབྱངས་བསྟན་པའི་ཉི་མ་སྟེ་སྐུ་ཕྲེང་གསུམ། རྒྱལ་བ་གཉིས་པའི་རྒྱལ་ཚབ་ཧོར་ཚང་རིན་པོ་ཆེ་འཇིགས་མེད་བསྟན་པའི་ཉི་མ། སྐལ་བཟང་དཔལ་ལྡན་གྲགས་པ་སྟེ་གཉིས། ཁྱབ་བདག་དང་པོའི་སངས་རྒྱས་རྗེ་བཙུན་འཇམ་དབྱངས་ཐུབ་བསྟན་ཉི་མ། བློ་བཟང་ལུང་རིགས་ཉི་མ། འཇིགས་མེད་ཐུབ་བསྟན་ཉི་མ་སྟེ་གསུམ། དབལ་མང་རྡོ་རྗེ་འཆང་དཀོན་མཆོག་རྒྱལ་མཚན། ཡུམ་ཆེན་ལབ་ཀྱི་སྒྲོལ་མའི་ཐུགས་སྲས་གྲུབ་དབང་བསོད་གྲགས་རིན་པོ་ཆེ་དཀོན་མཆོག་རྒྱ་མཚོའི་ཞལ་སྔ་ནས་དང༌། འཇིགས་མེད་བསོད་ནམས་རྒྱ་མཚོ་གཉིས། བསྟན་པའི་སྲོག་ཤིང་མཁན་པོ་ངག་དབང་ཐུབ་བསྟན་རྒྱ་མཚོ། ལུང་རྟོགས་མངའ་བདག་སྒོ་མང་མཁན་སྤྲུལ་བློ་བཟང་ཚུལ་ཁྲིམས་རྒྱ་མཚོ། གླིང་ཁྲི་ཆེན་དཀོན་མཆོག་དགྱེས་པའི་བློ་གྲོས་དང༌། འཇིགས་མེད་བློ་གྲོས་རྒྱ་མཚོ་གཉིས། ཁྲི་ཆེན་སྟག་ལུང་པ་དཀོན་མཆོག་ཉི་མ་དང༌། དེའི་སྤྲུལ་སྐུ་བློ་བཟང་དམ་ཆོས་རྒྱ་མཚོ། མཁས་བཙུན་བཟང་གསུམ་གྱི་ཡོན་ཏན་འགྲན་ཟླ་མེད་པ། ༸རྗེ་བཙུན་ཤེས་རབ་རྒྱ་མཚོ་དཔལ་བཟང་པོ་སོགས་བཤེས་གཉེན་དམ་པ་དུ་མ་ལས་ཆོས་བཀའ་རྒྱ་ཆེར་གསན་འདུག་ན་ཡང་གསན་ཐོ་མ་རྙེད་པས་ཞིབ་པར་འབྲི་མ་ནུས་སོ།།
དེ་དག་ཀྱང་ཆོས་ཉན་པ་ཙམ་ལ་མ་བཞག་པར་དག་སྣང་དད་གུས་ཀྱིས་ཚུལ་བཞིན་ཏུ་བསྟེན་ཏེ་སོ་སོའི་སྤྲུལ་སྐུ་རྣམས་ལ་ཡང་ཆོས་འབྲེལ་གསན། བླ་མ་ཐམས་ཅད་ཀྱི་ཞལ་ཐང་བཞེངས་ཏེ་དེའི་མདུན་ནས་རྒྱུན་དུ་ཕྱག་འཚལ། དེའི་གྲངས་སུ་ཁོང་གི་དགེ་རྒན་གྱི་སྐུ་ཡང་བཞེངས་དགེ་རྒན་བཀའ་དྲིན་ཅན་ཞེས་དད་གུས་ཆེན་པོ་མཛད། ཁྱད་པར་དུ་སྡེ་ཁྲི་རིན་པོ་ཆེ་དང་། བསོད་གྲགས་ཚང་གཉིས་ལ་དད་གུས་གཞན་དང་མི་འདྲ་ཞིང་ཐུན་མོང་མ་ཡིན་པའི་རྣམ་པར་ཐར་པ་ཡང་མང་དུ་ཡོད་དོ། །བསྟེན་ཚུལ་ཕྱིན་ཅི་མ་ལོག་པའི་དབང་གིས་བླ་མ་ཐམས་ཅད་ཀྱིས་ཐུགས་རྩིས་ཤིན་ཏུ་ཆེ་ཞིང་ཚུར་ཡང་དད་གུས་དཔེ་མེད་མཛད། དུས་ཕྱིས་ཤིག་སྐུ་ཞབས་མཆོག་སྤྲུལ་རིན་པོ་ཆེ་ལ་ཞལ་ཕུ་ཞིག་ཞུས་པར་དེ་མི་རུང་གསུངས། དེ་ཅི་སྐྱོན།
མགོན་པོ་ཁྱོད་ཀྱི་ཞལ་གྱི་དབུགས་ཙམ་ཡང་། །
མཐའ་དག་འགྲོ་ལ་སྨན་པའི་རྒྱུར་འགྱུར་ན། །
གསུངས་འདུག་མོད་ཞུས་པར། དེ་རྗེ་རིན་པོ་ཆེ་རེད་མོད་གསུངས་པར། ང་ལ་རྗེ་རིན་པོ་ཆེ་དང་ཁོང་གཉིས་ལ་ཁྱད་པར་ཅི་ཡང་མེད་ཞུས་པར་འོ་འོ་དེས་ན་ཆོག་གི་གསུངས་ནས་ཞལ་ཕུ་མཛད། གཞན་ཚོ་ལ་ཡང་སྐུ་ཞབས་རིན་པོ་ཆེ་ལ་དད་པ་གྱིས་ཞེས་ཡང་དང་ཡང་དུ་འདོམས་པར་མཛད་དོ།།
བླ་བྲང་ལ་ཕེབས་རེས་ཀྱིས་རྭ་སྐོར་དུ་བྱོན་ནས་སྐུ་འཕྲེང་རྣམས་ཀྱི་གསོལ་འདེབས་གསུངས་ཏེ་ཇ་ཕུད་ཕུལ། ཞལ་ཕྱིར་ཕྱོགས་ཏེ།
སྒྲིབ་བྲལ་ལྷན་སྐྱེས་བདེ་བའི་ངོ་བོ་ཉིད། །
སྣ་ཚོགས་སྒྱུ་འཕྲུལ་དྲ་བས་རོལ་བ་ལས། །
དག་པའི་བརྟན་དང་གཡོ་བའི་རང་བཞིན་གྱིས། །
རྟེན་དང་བརྟེན་པར་ཤར་ལ་མཆོད་པ་འབུལ། །
ཞེས་གསུངས་ཏེ་བྲག་དཀར་ཕྱོགས་ལ་མཆོད། དེ་ནས་རྐང་བརྒྱད་གསུངས་བཞིན་པར་ཕེབས་པ་ཡིན་འདུག །རྗེ་ཐུའུ་བཀྭན་རིན་པོ་ཆེ་བློ་བཟང་ཐུབ་བསྟན་ཆོས་ཀྱི་རྒྱལ་མཚན་པ་ཕེབས་དུས་ཆིབས་བསུ་ཞུས་ཀྱང་ལོ་ཆུང་བས་ཆོས་འབྲེལ་མ་ཞུས་འདུག །བྱང་མཇལ་དུ་སོང་སྐབས་སྤྲུལ་སྐུ་ཆུང་བ་ཚང་དེ་ལ་ཡང་མཇལ། སྐུ་འདི་པ་ལ་ཡང་མཇལ་བས་སྐལ་བ་བཟང་གསུངས། རྗེ་དེ་ཉིད་ནས་གནང་བའི་ཁ་དར་རྣམས་ལ་ཡང་འདི་ཁོང་གིས་གནང་བ་ཡིན་ཞེས་བདེ་མཆོག་གི་གསང་ཐང་ལ་འབུལ་བར་མཛད་ཅིང་ཐུགས་དད་གཞན་དང་མི་འདྲ་བ་ཞིག་འདུག་སྟེ་སྐུ་འཕྲེང་དུ་མའི་བར་དུ་འབྲེལ་ཆེ་བར་མངོན་ནོ། །དེ་དག་ནི་བཤེས་གཉེན་དམ་པ་རྣམས་བསྟེན་ནས་གདམས་ངག་གསན་པ་ཀློག་པ་ཐོས་བསམ་གྱི་སྐོར་རོ། །
གདམས་དོན་ཉམས་སུ་བཞེས་པའི་ཚུལ་ལ། རྗེ་བདག་ཉིད་ཆེན་པོས་གསུངས་པ་ལྟར་གདམས་ངག་སྣ་རེ་ཙམ་མ་ཡིན་པར་སྡོམ་གསུམ་དག་པ་ཉམས་ལེན་གྱི་མཐིལ་དུ་མཛད་དེ་ཉིན་རེ་བཞིན་ཐུན་དྲུག་རྣལ་འབྱོར་དུས་དྲུག་ཏུ་ཆག་མེད་མཛད། ནང་རེ་བཞིན་ངག་བྱིན་རླབས་དའཇམ་དབྱངས་གང་བླ་མ་སྒྲོལ་དཀར་ལྗང་དགའ་ལྡན་ལྷ་བརྒྱ་མ་གསུམ་མ་དམིགས་བརྩེ་མ་གང་འགྲུབ་བདེ་མཆོག་གི་ཆོ་ག་དང་བརྒྱ་རྩ་མཁའ་འགྲོའི་སྤྱི་གཏོར་དཀར་གཏོར་བཅས་དང་། དེ་རྗེས་ཕྱག་དང་། འབྲེལ་བར་ལྟུང་བཤགས་སྨན་བླ། བླ་མཆོད། དཔའ་ཅིག་བཟང་སྤྱོད་བྱམས་པའི་དམ་བཅའི་གཟུངས། བདེ་གསང་འཇིགས་གསུམ་གྱི་རྩ་རྒྱུད། དུས་འཁོར་བསྡུས་རྒྱུད་མཚན་བརྗོད་བྱམས་ཆོས་སྡེ་ལྔ་དབུ་མ་འཇུག་པ། སྐལ་བཟང་རྒྱན་འཕྲེང་གསེར་འོད་བརྒྱད་སྟོང་པ་རྣམས་ཅི་ཐུབ་རེ་ལྗགས་ཀློག །དེ་རྗེས་བསྐོར་བ་གང་འགྲུབ། ཚེ་དཔག་མེད། མཁའ་སྤྱོད་མ་ཁྲོས་ནག །དམིགས་བརྩེ་མ། ཁྱུང་ཁྲ། རྟ་མགྲིན། འཁོར་ཆེན། སེང་གདོང་མ། རིག་བྱེད་མ། རྣམ་འཇོམས། ལོ་གྱོན་མ། རྣམ་རྒྱལ་མ། བདེ་མཆོག་དཀར་པོ། ཧེ་རུ་ཀའི་ཡིག་བརྒྱ་རྣམས་བརྒྱ་རྩ་རེ། བཞེས་པའི་སྐབས་གཅོད་ཀྱི་་ཚོགས་འཁོར། ཕྱི་དྲོ་མགོན་པོ་ལྷ་མོ་གཉིས་ཀྱི་བསྐངས་ཆོག །ཆོས་སྐྱོང་གཞན་གྱི་གཏོར་བསྔོས། ལུས་སྦྱིན་བཅས་འདི་རྣམས་ཆག་མེད་དུ་གནང་། བདེ་གསང་འཇིགས་གསུམ་དུས་འཁོར། འཁོར་ཆེན། མཁའ་སྤྱོད་མ། རིག་བྱེད་མ། རྟ་མགྲིན། ཀུན་རིག །རྣམ་སྣང་མངོན་བྱང་། ཚེ་དཔག་མེད། ཐུགས་རྗེ་ཆེན་པོ། སྒྲོལ་དཀར། གསང་བདག །འཇམ་དབྱངས་དཀར་པོ། ཁྱུང་ཁྲ། སེང་གདོང་མ། མགོན་ཆོས་གཉིས་སོགས་ཀྱི་བསྙེན་པ་ཡང་གནང་། དུས་འཁོར་གྱི་སྐབས་སྡེ་ཁྲི་རིན་པོ་ཆེ་ནས་སྦྱིན་སྲེག་དཀའ་བས་གྲྭ་ཚང་གི་གྲངས་ལ་སོང་ན་ཆོག་གསུངས་པ་ལྟར། བསྲེགས་རྫས་ཐམས་ཅད་ང་རང་གི་ཡུལ་ནས་སོང་བ་ཡིན་གསུངས། གཉན་ཁྲོད་ལ་ཕེབས་རྒྱུ་་བསོད་གྲགས་རྡོ་རྗེ་འཆང་ལ་ཞུས་ཡོད་པས། རྒྱ་ལོའི་ནང་ཞིག་ལ་དེའི་ཆེད་དུ་བླ་བྲང་ལ་བྱོན་པར་ཁོང་གྲོང་ཆོག་ཞིག་ལ་ཕེབས་སོང་འདུག །སྡེ་ཁྲི་རིན་པོ་ཆེར་མཇལ་བས་ཁྱོད་གཉན་ཁྲོད་ལ་འགྲོ་གི་མི་འཇུག་པ་འདྲ་ཁོང་གིས་གང་གསུངས་པ་ལྟར་གྱིས་གསུངས། ཕྱི་ཉིན་རྗེ་དེ་ཉིད་ཕྱིར་ཕེབས་བས་མདུན་དུ་མཇལ་བར་ཁྱོད་རང་ཕྱི་མཚམས་ལྟར་འགྲོ་མི་དགོས་ཆུ་མིག་བརྒྱ་རྩ་ནས་རྡེའུ་བླང་སྟེ་གདན་འོག་ཏུ་ཞོག །བྲག་ངོས་ན་ཁྱོད་རང་ལ་མཚམས་ཁང་ཡོད་པ་དེ་ནས་སྡོད། བདུན་མཚམས་གསུམ་སོགས་ཞག་གྲངས་དང་ཐུན་གྲངས་ཐམས་ཅད་བཤད་ཚོད་ལྟར་གྱིས་དང་དེས་ཆོག་གསུངས། མི་གཉིས་ང་རང་དང་མཉམ་དུ་འགྲོ་རྒྱུ་བྱས་ཡོད་པས་དེ་ལྟར་བསྡད་ཨེ་ཆོག་ཞུས་པར་དེ་གཉིས་ཀྱིས་དེ་ལྟར་བྱས་མི་ཆོག་གསུངས། ཕྱིས་སུ་མཚམས་ཁང་དེ་གཅོད་ཀྱི་གཞུང་ནས་བཤད་པ་ལྟར་གྱི་གནས་རེད་གསུངས། མཚམས་ཁང་དེར་གཞན་སུ་ཡིན་ཀྱང་སྡོད་མི་ཐུབ་པ་ཞིག་ཡིན་འདུག །གུང་ཐང་འཇམ་པའི་དབྱངས་ནས་སྤྱན་རས་གཟིགས་ཀྱི་ཞིང་བཀོད་ཞིག་ནང་འདུག་པ་དེའི་མདུན་ནས་སྨྱུང་གནས་བརྒྱད་བརྒྱ། མ་ཎི་དུང་ཕྱུར། ཡིག་བརྒྱ་འབུམ་ཐེར་གསུམ། འགྲེལ་པ་བཞི་སྦྲགས་ས་ཁུང་བསྒྲིགས་ནས་ཚར་བཅུ་གསུམ་གསུང་། ལོ་རེ་བཞིན་བདེ་གསང་འཇིགས་གསུམ། རྣལ་འབྱོར་མ་རྣམས་ཀྱི་བདག་འཇུག་ཉིན་བདུན་རེ། ཟླ་བ་དང་པོ་ཚེས་གཅིག་ནས་བདེ་མཆོག་དཀར་པོའི་ཚེ་སྒྲུབ་སྔགས་འབུམ་འགྲོ་ངེས་གནང་སྟེ་བླ་མ་རྣམས་ལ་བུམ་ཆུ་འབུལ་བར་མཛད། ལོ་ཀྱ་ཏུན་དུ་ལན་དྲུག་ཕེབས་ནས་བདག་འཇུག་བཞེས། དང་པོར་ཕེབས་སྐབས་བདེ་མཆོག་གི་ཞལ་རས་སྔོན་པོ་ཡིན་པར་གཟིགས་གསུངས་ཏེ། ཧེ་རུ་ཀའི་ཞལ་དངོས་སུ་གཟིགས་སམ་སྙམ་མོ།།
དེར་བཞུགས་སྐབས་ཤིག་མཚན་ལམ་དུ་བླ་མ་པཎ་ཞྭ་སྣེ་རིང་ཅན་སྐུ་གཟུགས་རིང་བ་ཞིག་ཕེབས་ནས། ང་བློ་བཟང་ཆོས་ཀྱི་ཉི་མ་ཡིན་གསུང་བ་ཞིག་རྨིས་གསུངས། འདི་དུས་ནང་ཇེ་དཀར་ཇེ་དཀར་ལ་སོང་ནས་བླ་མ་དེ་ཉིད་མངོན་སུམ་ལྟ་བུར་ཕེབས་བྱུང་གསུངས་པས་ཉམས་སྣང་ཡིན་པ་འདྲའོ། །སྐབས་ཤིག་དཀྱིལ་འཁོར་ཀྱི་འོག་གི་ཅོག་ཙེའི་སྟེང་དུ་མིའི་རྐང་རྗེས་གསལ་བར་བབས་པ་ད་དུང་ཡོད་འདུག །དེ་ནས་རྡོའི་ཐོད་པ་ནང་ན་སྙིང་འདྲ་བ་ཡོད་པ་ཞིག་ཀྱང་རྙེད། ཕེབས་རེས་གཅིག་རྨ་ཆུའི་ཁ་ན་མར་འབྲོག་མོ་ཞིག་འགྲོ་གིན་འདུག་པས་ང་ལ་ཡང་ཡང་བལྟས་བྱུང༌། རྒྱ་ནང་ན་དེ་འདྲ་མེད་ཀྱང་ཅི་ཡིན་མ་ཤེས་གསུངས། དུས་རྒྱུན་ཡར་མར་གྱི་ཚེས་བཅུ་གཉིས་ལ་བདེ་མཆོག་གི་བདག་འཇུག་ཚོགས་འཁོར་དང་བཅས་བ་གནང་། འདི་དག་ནི་སྤོང་བ་བསམ་གཏན་གྱི་ཉམས་བཞེས་མཛད་པའི་སྐོར་རོ།།
ལོ་ཀྱ་ཏུན་དུ་དང་པོ་ཕེབས་སྐབས་དོང་ཙེ་ཆེ་བ་ཁྲོན་འགའ་མི་ཞིག་གིས་ཕུལ་བས་མགོན་པོའི་བྲིས་སྐུ་བཞེངས་པ་རྟེན་བཞེངས་ཀྱི་ཐོག་མ་ཡིན། གཟིམས་ཁང་དང་ལྷ་ཁང་ཧ་ཅིང་རྙིང་ནས་གསར་བཞེངས་བྱེད་རྩིས་གནང་བར་ཁྲོན་བརྒྱ་ལས་མེད་པས་ཐབས་མ་རྙེད་པར་བཞུགས་སྐབས་མཚན་ལམ་དུ་གྲྭ་པ་ཞིག་གིས་ཁྱེད་ཀྱིས་བཞེངས་ཐབས་ཀྱིས་དང་ངས་གྲོགས་བྱེད་ཟེར་བ་བྱུང་བས་དེ་ནས་བཟུང་གདན་འདྲེན་པ་མང་དུ་བྱུང་སྟེ་ལེགས་པར་གྲུབ། འོན་ཀྱང་འཚུབ་ཆ་ཤིན་ཏུ་ཆེ་བས་བསོད་གྲགས་རིན་པོ་ཆེ་གློ་བུར་དུ་ཕེབས་ནས་ཁྲོས་མའི་གཏོར་ཟློག་ཞིག་གསུངས། ཧེ་རུ་ཀའི་ཡིག་བརྒྱ་མང་དུ་བསྒྲུབ་གསུང་བ་ལྟར་བསྒྲུབས་པས་རང་ཞིར་སོང་།།
ཡང་ནུབ་གཅིག་ཁོང་སྒམ་ཞིག་གི་ནང་དུ་བཅུག་འདུག་པར་སྔར་གྱི་གྲྭ་པ་དེ་འོང་ནས་བུ་ག་ཕྲ་མོ་ཞིག་ནས་ལག་པ་བཟེད་པས། དེ་མ་ཐག་ཕྱིར་ཐོན་ཏེ་ནང་དུ་ཕེབས་པ་ན་གྲྭ་པ་དེ་ཧོར་ཚང་རིན་པོ་ཆེའི་ཕྱག་བྲིས་ཀྱི་བཀྲ་ཤིས་རྟགས་བརྒྱད་ཅིག་ཡོད་པ་ལ་ཐིམ་འགྲོ་བ་རྨིས་གསུངས། དེ་དམ་ཅན་གྱི་འཕྲུལ་དུ་འདུག །སྡེ་ཁྲི་རིན་པོ་ཆེས་ཁྱོད་ཀྱིས་དམ་ཅན་རེ་ཐོན་དང་བཟང་གསུང་ཡོད་གསུངས་ནས་རྗེ་ཆོས་ཀྱི་ཉི་མས་མཛད་པའི་དམ་ཅན་གྱི་ཆོ་ག་རྒྱས་པ་དེ་སྐབས་རེར་འདོན་དུ་འཇུག་པ་གནང༌། བླ་བྲང་བཀྲ་ཤིས་འཁྱིལ་དུ་མང་བསྐོལ་ལན་བདུན། བྲག་དཀར་དགོན་དུ་འགྱེད་མང་བསྐོལ་ལན་གྲངས་དུ་མ་དང་གཏོར་ཆེན་ཡང་མང་དུ་བཏང་། ལྷ་ཁང་དང་འདུ་ཁང་གསར་བཟོས་དང་འདུ་ཁང་ཕྱིའི་བྱམས་སྐུ། ཇོ་བོ་རྡོ་རྗེ་འཆང་གསུམ་ཞིག་གསོས་མཛད་ནས་རྟེན་སྣ་མང་པོ་གཟུངས་འཇུག་ཏུ་ཕུལ། ཧོར་ཚང་དང་རྣམ་གཉིས་ཀྱིས་རབ་གནས་རྒྱས་པ་མཛད། དེ་ནས་བཟུང་ཟླ་རེ་བཞིན་བྱམས་ཁང་དུ་ཁྲུས་གསོལ་དང་རྟེན་འབྲེལ་བསྟོད་པ་བྱམས་བསྟོད་བཅས་དུས་ཆེན་རྣམས་ལ་ཆག་མེད་མཛད་དེ་དགོས་པའི་གསུང་བཀོད་སྩལ། ཉིད་ཀྱི་ལྷ་ཁང་ལ་གྲིབ་ཕོག་པའི་རྐྱེན་གྱིས་ཁྲུས་གསོལ་དང༌། མཁའ་འགྲོའི་རྨུག་བསངས་གནང་བས་ཐུབ་དབང་གི་ཐུགས་ཀའི་གཟུངས་ཐག་དེ་སོར་དོ་ལས་མེད་པ་རིམ་གྱིས་སྐྱེ་ས་བྲག་དཀར་དུ་དབྱར་གནས་མི་འདུག་པས་ཉིད་ཀྱི་ནང་དུ་གྲྭ་པ་བདུན་རེ་གདན་དྲངས་ནས་ལོ་བདུན་ལ་དབྱར་གནས་བཟུང་སྟེ་འདི་དག་ནི་བྱ་བ་ལས་ཀྱི་འཁོར་ལོའི་སྐོར་རོ།།
དེ་ལྟར་འཁོར་ལོ་གསུམ་གྱི་ཉམས་བཞེས་མཛད་པས་རྟོགས་པའི་ཡོན་ཏན་ཇི་ལྟར་འཁྲུངས་པ་བདག་ལྟ་བུས་ཤེས་པར་དཀའ་མོད། སྔར་བཤད་པ་ལྟར་བསྟན་པ་སྤྱིའི་བབས་དང་མཐུན་ཞིང་། སྙིགས་དུས་བསྟན་འགྲོའི་དམིགས་རྐྱེན་ལ་ཕན་ངེས་པ་རང་གི་མཐོང་ཐོས་སུ་གྱུར་པ་འགའ་ཞིག་བྲི་ན། དེ་ཡང་མཁའ་འགྲོ་མ་ཟེར་བའི་མཚན་ཡོད་པ་རྒྱུ་མཚན་དུ་བྱས་ནས་གྲུབ་རྟགས་དང་མངོན་ཤེས་ལྟ་བུ་དེ་འདྲ་གཏན་ནས་མི་གནང་བས། ཇི་སྐད་དུ། གུང་ཐང་འཇམ་པའི་དབྱངས་ཀྱིས་ལྷ་མཐོང་འདྲེ་མཐོང་མངོན་ཤེས་བདག་ལ་མེད། །དགྲ་བོ་སྒྲོལ་བའི་ནུས་པ་བདག་ལ་མེད། །ཅི་དགར་སྤྱོད་པའི་སྙིང་སྟོབས་བདག་ལ་མེད། །ལས་ཅན་ཆོས་མགོ་ཐོན་པའི་རྣམ་ཐར་ཡིན། །ཞེས་གསུངས་པ་ལྟར། བུད་མེད་ཀྱི་རྟེན་ཅན་ཕར་ཟད་དགེ་སློང་ལ་ཡང་བསླབ་ཁྲིམས་རྣམ་དག་སྲུང་མཁན་དཀའ་བའི་དུས་འདིར། ཚངས་པར་སྤྱོད་པའི་བརྟུལ་ཞུགས་ཁོ་ན་ལ་གནས་ནས་བཞུགས་པ་ནི་ངོ་མཚར་བའི་རྣམ་པར་ཐར་པ་ཡིན་ལ། དེ་ཡང་རྩ་བ་ནང་གི་ཀུན་སློང་ལ་རག་ལས་པས། དེང་སང་གི་དུས་སུ་སྲེད་པའི་ཁ་གདངས་བརྣབ་སེམས་ཀྱི་མཆེ་བ་གཙིགས་ནས་གང་ཚོ་གང་ཞིམ་ལ་ཁྱི་རྐུན་ལྟར་རྒྱུག་པ་ལ་གཞན་དོན་དུ་མིང་བཏགས་པ་རྣམས་ཀྱིས་འགྲན་པར་མི་ནུས་པའི་རྣམ་པར་ཐར་པ་ཡིན་ཏེ་རིམ་གྱིས་འཆད་པར་འགྱུར་རོ།།
བྱང་སེམས་ཀྱི་སྡོམ་པ་ཕྱིན་དྲུག་ཏུ་འདུ་བས་དེ་ལ་བསླབ་ཚུལ་ནི་རྟག་ཏུ་ཕན་སེམས་ཀྱི་ལྷག་བསམ་ཁོ་ན་མ་གཏོགས་གནོད་སེམས་དང་ཁོན་འཛིན་སོགས་གཏན་ནས་མི་མངའ་བས་གཞན་གྱིས་ལོག་སྒྲུབ་ཇི་ལྟར་བྱས་ཀྱང་གནོད་ལན་གཏན་ནས་བྱེད་གཞན་གྱི་ཕུལ་བའི་རྫས་ཐ་ན་དོང་ཙེ་བརྒྱ་ཡན་ཆད་ཆ་དུ་མི་འཇུག །གསུམ་དུ་བྱས་ཏེ་ཆ་གཅིག་བླ་མ་རྣམས་ཀྱི་འབུལ་བ། གཅིག་དགེ་འདུན་དང་དཀོན་མཆོག་གི་མཆོད་ཐེབས། གཅིག་ནང་ཆེན་གྱི་ཆ་རྐྱེན་ལ་གནང་བར་མཛད། སྡེ་ཁྲི་རིན་པོ་ཆེའི་གསུང་བཀོད་ལྟར་དུས་འཁོར་ཞལ་ཐང་རིགས་ལྡན་ཉེར་ལྔས་བསྐོར་བ་དང་། སྐྱབས་མགོན་རིན་པོ་ཆེས་གཙོས་བླ་མ་རྣམས་ཀྱི་ཞལ་ཐང་བཅས་བཞེངས། ཟོག་ལུག་འབུལ་མཁན་བྱུང་བ་རྣམས་མ་ཤི་བར་དུ་བཤའ་བ་དང་བཙོང་བ་སོགས་གཏན་ནས་བྱེད་མི་འཇུག །ནང་ནས་མཛོ་མོ་མི་འཛིན་ཅིང་འབྲི་འགའ་རེ་ཡོད་པའི་མར་གྱིས་ཚེ་འབར་གནང༌། ལུག་གི་བལ་རྣམས་དགེ་འདུན་ལ་བསྔོས་ཏེ་ཁོ་རང་ཚོ་ལ་ཡང་འབྲེལ་འཇོག་ཏུ་བཅུག་པ་ཡིན་གསུངས། དགུང་རེ་བཞིན་རྣ་ལམ་དུ་མཚན་དང་གཟུངས་སྔགས་སྒྲོགས་པར་མཛད་ཅིང་བདག་འཇུག་གི་བུམ་ཆུ་ལ་རྟེན་གསུམ་བསྲེས་ནས་ལོ་རེ་བཞིན་ཁ་ནང་དུ་བླུགས་པ་ཡིན་གསུངས། ཕྱག་མོ་ཞུ་མཁན་རྣམས་ལ་སྐྱབས་འགྲོ་དང་དམིགས་བརྩེ་མ། བརྒྱད་སྟོང་པ། གསེར་འོད་སོགས་ཕབས་ནས་ཕན་པའི་ལམ་ལ་སྦྱར། གྲོང་བ་རྣམས་ཀྱང་རིམ་གྱིས་ཁྲིད་དེ་ད་ལྟ་དམིགས་བརྩེ་མ་དང་སྐྱབས་འགྲོ་ཡང་འདོན་གི་ཡོད་གསུངས། གསང་སྔགས་ཀྱི་སྡོམ་པ་ཡང་སྔར་སྨོས་པ་ལྟར་རྩ་བ་བླ་མའི་དམ་ཚིག་ཚུལ་བཞིན་དུ་བསྲུང་བར་མཛད་ཅིང་བདག་འཇུག་ཡིག་བརྒྱ་སོགས་ཀྱིས་ཉམས་ཆག་སྦྱོང་བའི་ཐབས་ཀྱང་མང་དུ་མཛད།
དེ་ལྟར་ནང་གི་ཉམས་བཞེས་ཀྱི་མཐུས་ཕྱོགས་ཐམས་ཅད་ནས་མཇལ་བ་མང་དུ་འདུས་ཤིང་དགོན་པར་དགྲ་ཇག་གི་གནོད་པ་རྒྱུན་ཆད། ཁྱད་པར་སྲི་ཅན་གྱི་རིགས་ཁོང་ལ་བསྐྱབས་པ་མི་ཐར་བ་མེད་པ་ཞིག་འདུག །བླ་ཆེན་གྲགས་ཅན་གྱི་རིགས་ཕལ་ཆེར་ཕེབས་པས་ཕྱོགས་འདིར་ཡུལ་ལ་གཡང་ཆགས། ས་ལ་བཀྲ་ཤིས་པའི་རང་སྐྱིད་གཞན་སྨོན་གྱི་གནས་སུ་གྱུར། ཙ་རི་ལ་རྩེ་སྐོར། བར་སྐོར། རོང་སྐོར་གསུམ་ཡོད་པ་ལྟར་ཕྱིའི་སྐོར་ལམ་གསར་དུ་བཏོད་ནས་ལན་གསུམ་ཕེབས་ཏེ་སྐོར་ཚད་ཀྱང་དེ་བཞིན་གནང་། གནས་ཁང་དུ་བསང་གཏོང་བར་ཕེབས་ནས་ཕྱག་ནས་དུང་དཀར་ཤོར་བ་སྒྲ་དང་བཅས་ཏེ་གྲམ་པའི་ནང་དུ་ལྷུང་ཡང་སྐྱོན་གང་ཡང་མ་བྱུང་། ཡང་ཕེབས་རེས་གཅིག་ཡབ་ཡུམ་གྱི་མཚོ་གཉིས་འཕྱུར་ནས་ནང་གང༌འགྲོ་རྒྱུ་རེད་སྙམ་པ་འདུག་གསུངས།
ཡང་རེབ་གཅིག་སྟེང་ངོས་ནས་གློ་བུར་དུ་ཆུ་འཁྱོར་བ་གང་བབས་པ་པའི་ཐབ་ཞལ་དུ་བཞེས། སྡེ་ཁྲི་རྗེ་ནས་ཁྱོད་ཤེལ་དགོན་དུ་ཅིག་སོང་ན་བཟང་གསུང་པ་ལྟར་དེར་ཕེབས། དེའི་གནས་ཁང་གི་སྒོ་གཞན་ཞིག་གིས་བཅད་འདུག་པ་ཕྱེ་ནས་ནང་དུ་ཕེབས་པས་བྲག་ཟླ་ཕྱེད་རྡོ་རྗེ་འདྲ་བ་ཞིག་གིས་བཅད་འདུག་པའི་ཕར་ནང་ན་རུས་པ་ཆེ་ཆུང་མང་པོ་དང༌། ཤ་རློན་པ་སྤུངས་འདུག་པའི་ནང་ནས་དུམ་བུ་རེ་བསྣམས་ནས་ཕེབས་ཏེ་ཨ་ཁུ་རིན་པོ་ཆེ་ལ་ཕུལ། བདག་ལ་ཡང་དུམ་བུ་ཞིག་གནང་སྟེ་མཁའ་འགྲོའི་ཚོགས་འཁོར་གྱི་རྫས་ཡིན་འདུག་པས་གནས་ཚོད་ལ་ཇི་ལྟར་གནང་བ་ཡིན་དཔག་པར་དཀའོ། །
ནང་དེར་མཚན་ཐོག་ཐག་བཞུགས་པའི་བྲག་ངོས་ཐམས་ཅད་ཡི་གེས་གང་འདུག་པ་གཟིགས་ཀྱང་ནམ་ལངས་པ་ན་མེད་འགྲོ་བར་འདུག་གསུངས། གཏེར་སྲུང་ཀླུ་བདུད་བཙན་གསུམ་ལ་གཏོར་འབུལ་སྡེ་ཁྲི་རིན་པོ་ཆེ་ལ་ཞུས། བརྒྱ་རྩའི་མཇུག་ཏུ་དཀར་གཏོར་སྐབས་དྲང་སྲོང་ཆེན་པོ་སོགས་ལ་ཡང་གཏོར་འབུལ་གནང་གི་ཡོད་ཀྱང་གཞན་ལ་མི་མངོན་པར་མཛད། སྡེ་པ་རྡོ་རྗེ་འཆང་ནས་འདིའི་བྲག་སོར་མོའི་དབྱིབས་སུ་འདུག་པས་སྐུ་འཁོར་གྱི་གནས་ནཱ་ག་ར་ཡིན་པར་འདུག །དེ་ན་དཔལ་ཧེ་རུ་ཀ་དང་ཤིན་ཏུ་དཔའ་མོ་གསུང་འདུག་པས་ཤིན་ཏུ་དཔའ་མོ་ཁྱོད་ཡིན་རྒྱུ་རེད་གསུངས། དབལ་མང་རིན་པོ་ཆེར་མཇལ་བར་ཕེབས་སྐབས་སྐུ་མདུན་པ་སོང་ནས་རྗེ་འདི་པ་ཕེབས་འདུག་ཚུལ་ཞུས་པར། གུང་རུའི་མཁའ་འགྲོ་མ་དམག་ཟོར་མ་དངོས་ཡིན་པ་རེད་གསུངས། གྲུབ་པ་དང་སྣ་ནམ་མཇལ་ཀྱང་སྨྲ་བསམ་བརྗོད་མེད་མ་བཏོན་ནས་མཇལ་ཟེར། ཁོ་རང་གི་སྒྲུབ་ཁང་དུ་རྗེ་ཉིད་འཁོར་བཅས་ལན་གསུམ་གདན་འདྲེན་ཞུས། སྐབས་ཤིག་དབུས་ལ་འབྱོན་བཞེད་པར། གྲུབ་པ་མདུན་དུ་མཇལ་ཏེ། ས་མཐའ་སྐོར་གྱི་འདུག་པ་ལས་སེམས་མཐའ་བསྐོར་ན་དེའི་དགའ་མོད་ཞུས་པས། དེའི་རྒྱུ་མཚན་སྡེ་ཁྲི་རིན་པོ་ཆེ་ལ་ཞུས་པར། དེ་ཏན་ཏན་པོ་རེད་གསུངས་པས་དབུས་ལ་ཕེབས་རྒྱུ་བཤོལ་གསུངས། བླ་མའི་རྣལ་འབྱོར་ཞུ་མཁན་རྣམས་ལ་ལམ་ཟབ་ཐོན་དང་དེའི་ཆོག་ཅེས་དང་། སྐུ་འདྲ་བཞེངས་རྒྱུ་ཡིན་ཞུས་པ་ལ་ལབ་སྒྲོན་བཞེངས་ན་བཟང་། དེ་འདྲ་བ་བཞེངས་པས་ཅི་བྱེད་གསུངས། ཡིག་བསྐུར་ཞིག་ཏུ་ཟངས་རིའི་མཁའ་འགྲོ་མའི་ཡི་གེ་ཞེས་གནང་བ་དང་། ཉིད་ཀྱི་ཞལ་ཚབ་ལྟ་བུར་ལབ་སྒྲོན་གྱི་སྐུ་གཟུགས་བཞེངས་པ་རང་བྱོན་ལྟ་བུར་ཕེབས་ཤིང་ཤིན་ཏུ་བྱོན་ལེགས་པས་སྐུ་ཕྱོགས་ནས་ཀྱང་འདི་གསོན་པོ་ལྟ་བུར་འདུག་གསུངས། ལོ་གཅིག་གི་རང་ཉིན་རེ་བཞིན་ཉིད་ཀྱིས་རབ་གནས་འཆག་མེད་མཛད། འདིའི་དཀར་ཆག་མཁན་པོ་སྤྲུལ་པའི་སྐུ་རིན་པོ་ཆེ་ངག་དབང་མཚན་ཅན་ནས་རྒྱས་པ་ཞིག་གནང་འདུག་པ་དེའི་ཚིགས་བཅད་དུ། དག་པའི་སྒྱུ་ལུས་དགྱེས་འཛུམ་བཞད་པའི་ཉམས། །བཅོས་མ་མིན་པར་གང་དུ་རོལ་བ་ཡི། །རྟེན་འདི་འཕགས་མའི་རིགས་པའི་སྤྲུལ་པའི་སྐུ། །མིན་ཞེས་སྐུར་བ་འདེབས་པ་རུང་ངམ་ཅི། །ཕྱི་དང་ནང་གི་རྟེན་འབྱུང་ཕན་ཚུན་དུ། །འཆར་བ་མེ་ལོང་ནང་དུ་གཟུགས་བརྙན་བཞིན། །བྱ་བ་ལས་ཀྱི་འཁོར་ལ་འདི་ཡིས་ཀྱང་། །བྱེད་པོའི་སྒྱུ་མར་གྱུར་པའི་རྣམ་ཐར་མཚོན། །ཞེས་གསུངས་འདུག་པ་ནི་གསང་སྔགས་མཁྱེན་པ་ཞིག་གིས་བལྟས་ན་ཤིན་ཏུ་ཡ་མཚན་པའི་གནས་ཡིན་པས་མཐོང་ཐོས་དྲན་རེག་ཙམ་ཡང་ཤིན་ཏུ་དོན་ཆེའོ།།
བྱང་ཆུབ་ཀྱི་སེམས་སླར་ཡང་གོང་དུ་འཕེལ་ཕྱིར་མཁན་པོ་ངག་དབང་རིན་པོ་ཆེ་ལ་སེམས་བསྐྱེད་མཆོད་པ་ཞུས། དེ་རིང་ནས་ང་བྱང་ཆུབ་སེམས་དཔའ་ངེས་པར་ཡིན་ཞུས་པར། རྗེ་དེ་ཉིད་ནས་ཁོང་བྱང་ཆུབ་སེམས་དཔའ་ལོས་ཡིན་ཏེ་ཁོང་དང་མཉམ་དུ་སེམས་བསྐྱེད་རྒྱུ་ཞིག་བྱུང་བ་ང་ཡང་སྐལ་བ་བཟང་གསུངས། ཕེབས་བཞུད་ཀྱི་ལམ་ཞིག་ནས་རྡེའུ་ཞིག་ཞལ་དུ་འཕང་བ་ལ་ཧཱུཾ་ཡིག་དཀར་པོ་ཞིག་བབས་པ་ཀུན་རིག་གི་སྐུ་ཞིག་གི་དཔྲལ་པར་བཞག་འདུག །གླང་གི་ལོ་བདག་བྲག་དཀར་དུ་སོང་ནས་ཟླ་བ་རེ་གཉིས་བསྡད་སྐབས་ཚེས་བཅུ་རྣམས་ལ་མདུན་ནས་གོང་ཚིགས་གནང་སྟེ་ཞལ་བརྡ་ཡུན་རིང་གནང་། གཅོད་གདོན་ཚོགས་དགུ་མ་སོགས་ལུང་ཁ་ཤས་ཀྱང་སྩལ། བྲག་དཀར་མགོན་གྱིས་ལམ་ཁྲིད་ཞུས་པར། དེ་བཀའ་དྲིན་ཆེ་འདི་རྒྱུད་གྲྭ་ཡིན་པས་དབང་རེ་ཞུ་གིན་འདུག །ལམ་རིམ་གོ་མ་མྱོང་བས་སྐས་ཀྱི་རྟིང་བ་ནས་མི་འགྲོ་བར་མགོ་ནས་མར་བབས་པ་ཅི་ཡང་མ་རེད་གསུང་སྟེ་གནད་ཆེ་བར་སྣང་ངོ༌།།
དངུལ་སོགས་ཀྱི་འབུལ་བ་མི་བཞེས་ཀྱང་རྗེ་ཐུའུ་བཀྭན་ཧོ་ཐོག་ཐུ་ནས་དངུལ་སྲང་ལྔ་བཅུ་གནང་བ་མི་བཞེས་ཐབས་མེད་བྱུང་བ་དེས་གཞི་བྱས་ཏེ་བྲག་དཀར་གྱི་དགེ་འདུན་པ་རྣམས་ནང་དུ་གདན་དྲངས་ཏེ་ཉིན་ཁ་ཤས་ལ་སྐྱབས་འགྲོ་དང་དམིགས་བརྩེ་མ་སྒྲུབ་ཏུ་བཅུག །ཁྱོད་རང་ཁོང་ལ་འབྲེལ་ཆེ་བས་ད་རེས་རྟེན་འབྲེལ་འགྲིགས་སྟབས་ཚོགས་དབུར་སོང་ནས་བསྔོ་སྨོན་གྱིས་གསུངས། སྐྱེ་བ་རྗེས་མ་ཚོ་ལ་རྗེའི་བསྟན་པ་འདི་དང་ཨེ་མཇལ་གྱི་རེ་བས་དམིགས་བརྩེ་མ་མང་དུ་སྒྲུབ་བཅུག་པ་ཡིན་གསུངས་སྟེ་གཞུང་ཆེན་ལ་སྦྱངས་པ་མ་མཛད་ཀྱང་རྟོགས་པའི་སྟོབས་ཀྱིས་བསྟན་པའི་གནད་མཁྱེན་པས་རྗེའི་རིང་ལུགས་ལ་ཐུགས་ཞེན་ཤིན་ཏུ་ཆེ་བ་མཛད། གཞན་གྱི་ལུང་ཕྲན་ཚེགས་རེ་ཞུས་པ་རྣམས་འཕྲལ་དུ་གནང་། རེ་གཉིས་ཙམ་ལ་མཁའ་སྤྱོད་མའི་བྱིན་རླབས་ཡང་གནང་འདུག །ཉང་ཚང་སྤྲུལ་པའི་སྐུས་ཞུས་ངོར། བསླུ་མེད་གཏན་གྱི་སྐྱབས་གནས་བླ་མ་དང༌། །བརྩེ་ཆེན་ཐུགས་རྗེའི་གཏེར་ཆེན་ཝ་ར་ཧི། །ཁྱོད་མིན་རེ་སའི་སྐྱབས་གཞན་མ་མཆིས་པས། །མཁའ་སྤྱོད་ཞིང་དུ་འཁྲིད་པར་མཛད་དུ་གསོལ། །ཞེས་པ་གནང༌། བླ་བྲང་གི་རྒྱུད་པའི་གྲྭ་རིགས་རྗེ་ཉིད་ལ་ཤིན་ཏུ་དད་པ་ལུང་རིགས་རྒྱ་མཚོས་ནན་གྱིས་ཞུས་ངོར། དཀོན་མཆོག་ཀུན་འདུས་བླ་མ་རྗེ་བཙུན་མ། །རིག་འཛིན་མཁའ་འགྲོ་ཀུན་འདུས་རྗེ་བཙུན་མ། །དཔལ་མོ་ཐུགས་རྗེའི་གཏེར་ཆེན་རྗེ་བཙུན་མ། །དེང་ནས་བཟུང་སྟེ་བྱང་ཆུབ་སྙིང་པོའི་བར། །ཨརྱ་ཏཱ་རེ་འགྲོ་བའི་སྐྱབས་གཅིག་མ། །ཁྱོད་མིན་རེ་སའི་སྐྱབས་གཞན་མ་མཆིས་པས། །སྲིད་ཞིའི་འཇིགས་པ་ཀུན་ལས་བསྐྱབ་ཏུ་གསོལ། །ཚེ་བསོད་དཔལ་འབྱོར་ལེགས་ཚོགས་མ་ལུས་པ། །ཡར་ངོའི་ཟླ་ལྟར་འཕེལ་བར་བྱིན་གྱིས་རློབས། །ཞེས་པ་འདི་གཞན་ལ་མ་སྟོན་གསུངས་ནས་གནང་། འདི་གསུངས་མི་ཉམས་པའི་ཆེད་དུ་འདིར་བཀོད་དོ།།
བོ་ཆུང་པན་དེ་ཟེར་བ་ཞིག་ལ་སེམས་ཁུག་ལ་ཁ་ཏོན་རེ་གྱིས་གསུང་བར། ངའི་སེམས་ཁུག་འདུག་ཞུས་པར། ཁྱོད་མར་སོང་ལ་ང་སེམས་ལ་ཨེ་འཆར་བལྟས་ནས་སྐྱབས་འགྲོ་བརྒྱ་ཐོན་ལ་ཡར་ཤོག །གསུངས་པ་ལྟར་བྱས་ཏེ་མདུན་དུ་སོང་ནས། སེམས་མི་ཁུག །བླ་བྲང་མན་ཆད། ཟ་ལར་ཡན་ཆད་ལ་སོང་ནས་མི་ཐུབ་པར་འདུག་ཞུས་པར། འོ་འོ་དེ་ཡིན་ཁྱོད་ཀྱིས་སེམས་ཁུག་པ་མ་རེད་བསམ་ཤེས་པ་རེད། ཕྱིན་ཆད་ང་འམ་བསོད་གྲགས་རིན་པོ་ཆེ་སེམས་ལ་ཨེ་འཆར་བལྟས་ནས་གསོལ་བ་རེ་ཐོབ། མང་པའི་ཁ་ན་མེད་ཅེས་གསུང་སྟེ་བཀའ་གདམས་གོང་མའི་གསུང་ལྟར་སྣང་ངོ༌།།
བླ་བྲང་ལྷ་སྡེའི་མི་ཞིག་ངག་ལྐུག་ནས་ཁ་ནས་སྒྲ་ཙམ་ཡང་མི་ཐོན་པ་ལ་སྐྱབས་མགོན་མཆོག་ནས་མཁའ་འགྲོ་མ་ཚང་གི་མདུན་དུ་སོང་གསུངས་པ་ལྟར་དེར་ཡོང་ཡང་སྐུ་མཚམས་ཡིན་པས་མ་ཆུད། ཕྱི་ཉིན་ཉིད་ཀྱི་དབུ་སྐྲ་དང་བསྔགས་གུལ་ཐུན་གཅིག་བདུག་རྒྱུ་དང་བསྲུང་མདུད་བུམ་ཆུ་བཅས་གནང༌། དེའི་མཚན་མོ་ཁོ་རང་གི་རྨི་ལམ་དུ་ཕུ་དུང་གི་ནང་ཤིག་གིས་གང་བ་མཐོང་བས་སྐྲག་ནས་ཀཱན་ནོ་སྐད་ཆེན་པོ་བཏོན་པས་ཟླ་བོ་ཞིག་ཡོད་པས་སང་ནས་ཁྱོད་ཀྱིས་ཁ་གྲགས་ཐུབ་པ་ཨེ་རེད་ཟེར་བར་ཐུབ་པར་འདུག་བྱས་ནས། མ་ཅིག་ལབ་ཀྱི་སྒྲོན་མ་ཞེས་གསོལ་བ་བཏབ་པས་དེ་ཕྱིན་ངག་གྲོལ། ལ་ནག་གི་བྱིས་མོ་ཞིག་ཀྱང་ངག་ལྐུག་པ་ལ་ལུས་སྦྱིན་དང་བུམ་ཆུ་གནང་དོ་ནུབ་གནས་ཁང་ནས་ཉོལ་གསུངས་པ་ལྟར་བྱས་པས་ཕྱི་ཉིན་ལེགས་པར་གྲོལ་འདུག །མཛེ་མོ་ཞིག་ལ་ཡང་ཕྱག་གཉིས་ཀས་མགོའི་གཡས་གཡོན་ནས་བརྟེན་ཏེ་མཚན་དང་གཟུངས་སྔགས་གསུངས་ཤིང་ཞལ་ཕུ་བཏབ། དོང་ཙེ་ཁྲོན་འགའ་རེ་ཡང་གནང་། དེ་བཞིན་དུ་དགོན་པའི་གྲྭ་རྐྱང་རྣམས་དང༌། དབུལ་ཕོངས་དང་ནད་པ་སོགས་ལ་གནང་སྦྱིན་དང་སྨོན་ལམ་མཛད། ཡང་ཞལ་ནས་ངའི་ཁང་པ་འདི་གུང་ཐང་རིན་པོ་ཆེ་དང༌། སྡེ་པ་ཚང་། བསོད་གྲགས་ཚང་གང་རུང་ལ་ཕུལ་ནས་ང་རང་མཚམས་ཁང་དུ་བསྡད། ཕྱིན་ཆད་སྤྲུལ་སྐུ་སོགས་མེད་པ་བྱས་ན་ཞེས་ཨ་ཁུ་རིན་པོ་ཆེར་ཞུས་པར། དེ་མི་ཆོག་ཁྱོད་ཀྱི་རྗེས་ནས་མཁའ་འགྲོ་མ་ཟེར་བ་ཞིག་དགོས་པ་རེད། གནས་འདིའི་བདག་པོ་ཡིན་པས་ཅིས་ཀྱང་དགོས་པ་རེད་གསུངས། དེ་ལྟ་ན་དཔའ་བོ་ཞིག་ཡོང་ན་བཟང་རྒྱུ་རེད་གྲྭ་ས་རེ་ལ་བསྡད་ན་ཆོག །རྟེན་བཟང་པོས་གང་བྱས་ཀྱང་ལེགས་པོ་ཡོང་རྒྱུ་རེད་དཔའ་མོ་མི་བཟང་། བྱིས་མོ་ཞིག་ཡོང་ན་སྐྱུག་བྲོ་བོ་བྱས་ཡོང་། དེ་འདྲའི་ཆེད་དུ་ཨ་ལགས་གླིང་ཚང་ལ་འདུལ་བའི་གླེང་འབུམ་མཉན་པ་ཡིན་གསུངས། ངའི་བསམ་པ་ལ་གོ་ས་འདིར་མ་ཅིག་གི་སྐུ་བཞག་ནས་མཇལ་བ་ཚོ་དེ་ལ་མཇལ་ན་སྙམ་པ་ཡིན་ཏེ་ཁོང་རྣམས་ཚོས་གནང་བ་མི་སྟེར་གསུངས་སྟེ་རྒྱུ་མཚན་འོག་ཏུ་འཆད་དོ།།
ཡང་སྐུ་ན་ཕྲ་མོའི་དུས་སྡེ་ཁྲི་རིན་པོ་ཆེར་མཇལ་སྐབས་དགྱེས་པའི་ཉམས་ཀྱིས་རང་རེ་ཚོ་སྔར་ཡང་འགྲོགས་ནས་འོང་བ་ཞིག་ཡིན། ད་དུང་ཡང་འགྲོགས་ནས་སོང་ན་ཆོག་གསུངས། ཁོང་ནས་ཅི་ཙམ་གྱི་བར་འགྲོགས་ཞུས་པར། ཟུང་འཇུག་ཐོབ་ཀྱི་བར་ཡིན་མོད་གསུངས། ཟུང་འཇུག་ནམ་ཐོབ་རྒྱུ་རེད་ཞུས་པར། འདི་འདྲ་བྱས་འགྲོ་གི་བསྡད་ན་སྐབས་ཤིག་ཐོབ་ལོས་ཡོང་གསུངས། ཡང་སྡེ་ཁྲི་རིན་པོ་ཆེ་སྐུ་བསྙུན་སྐབས་ཤིག་རྗེ་འདི་པ་མདུན་དུ་ཕེབས་ནས། ཐུགས་ཀའི་ནབ་བཟའ་བསལ་ཏེ་ཞལ་ཕུ་ཞིག་བཏབ་པས་ཞལ་འཛུམ་མཛད། དེའི་རྗེས་མཇལ་ཁ་ཞུས། ཡང་ཞལ་ནས་ང་ལ་ཡོན་ཏན་མེད་ཀྱང་ཐམས་ཅད་ཀྱིས་རེ་ལྟོས་བྱེད་གི་འདུག་བླ་མ་རྣམས་ཚོ་ལ་སྐྱབས་འཇུག་རེ་ཞུས་ཡོད། ད་དམྱལ་བར་ལྟུང་ཡང་གཅེས་འཛིན་གྱི་དབང་དུ་མ་སོང་ན་བཟང་གི་ཞེས་འདི་དག་ཕྱིས་སུ་རྭ་རྒྱ་སྤྲུལ་པའི་སྐུ་ལས་ཐོས་པ་འདིར་བྲིས་སོ།།
སྟག་ལོའི་དགུན་མཚམས་ནང་ནས་སྐུ་བསྙུང་ཚུལ་བསྟན། དགུང་ལོ་དོན་བརྒྱད་པ་ཡོས་བུའི་ལོ་རྒྱ་ལོའི་ཉེར་ལྔ་ལ་གྲྭ་མང་དང་མཇལ་མཁན་རྣམས་ལ་མཇལ་ཁ་གནང༌། གཉིས་པའི་ནང་རང་དགོན་ལུང་དུ་འགྲོ་ལམ་ནས་བཅོ་ལྔའི་ཉིན་མདུན་དུ་མཇལ་བར་དུས་རྒྱུན་ཁོ་བོ་ཅག་སོང་ན་ཕྱི་རོལ་ཏུ་ཕེབས་པ་གནང་གིན་ཡོད་པས་མི་གཉིས་ཀྱིས་བསྟེན་ནས་རྭ་སྐོར་དུ་ཕེབས་འདུག་ཀྱང་སྐུ་ཉམས་ཞན་པར་འདུག །ནང་དུ་སོང་ནས་བརྟན་བཞུགས་ཕུལ་ཀྱང་ཞལ་བཞེས་མ་གནང༌། ཐུའུ་བཀྭན་རིན་པོ་ཆེར་འབུལ་བ་འགའ་བསྐུར་ནས་ཁྱོད་ཀྱིས་ངས་གོ་ཆོད་པའི་སྐྱབས་འཇུག་ནན་ཏན་ཞུས་གསུངས། ཁོ་བོ་ཅག་ལ་གསང་བའི་གསུང་འགའ་རེ་གནང་ཀྱང་འབྲི་བར་མ་ནུས་སོ།།
སྐུ་འཁོར་རྣམས་ལ་སྨོན་ལམ་ཞིག་གི་ཡང་དེ་འདྲ་བ་ཞིག་མི་ཡོང་བའི་ཐབས་མི་འདུག །ཆུང་དུས་གྲོང་ཆོག་ལ་གཏན་ནས་མ་འཁྱེར། ངས་སྟབས་རེད། ཆོས་སྐྱོང་ལ་གཏད་གཉེར་ཡང་བྱས་ཡོད་ཅེས་ནན་ཏན་ཆེན་པོས་གསུང་བ་འདི་སེམས་ལ་འཛིན་དགོས་སོ། །གསུམ་པའི་ནང་མཚན་སྒྲོགས་མཁན་པོ་མཇལ་ཏེ་རྗེ་ཡབ་སྲས་གསུམ་བཟོས་གྲུབ་ཅིག་ཕུལ་བར་རྟེན་འབྲེལ་ལེགས་ཞེས་ཤིན་ཏུ་མཉེས་མཉེས་གནང་བ་ནི་འབུལ་བ་ཀུན་གྱི་ཐ་ཉིད་ཀྱི་སྐུ་གདུང་གནས་རིའི་ངོས་དེར་ཁོང་གི་མ་ཡུལ་བཞག་མའོ། །ཤུལ་དུ་བཞག་ནས་བྱ་ལ་བྱིན་ན་བཟང་། རུས་པ་རྣམས་བརྡུང་ནས་བྲག་ངོས་མི་མི་ཐར་བ་ཞིག་ཏུ་སྐྱོལ། རུས་དུམ་ཅུང་ཟད་ཙམ་ཡང་གདུང་མཇལ་སོགས་ཀྱང་མི་དགོས། འཁྱེར་དུས་བླང་མི་ཆོག །གནས་ཁང་ཕྱོགས་ཀྱི་སྒོ་འདི་ནས་ཁྱེར། མཛོ་ལ་བཀལ་ན་ཆོག །འར་འུར་མང་པོ་བྱེད་གི་མ་འདུག་གསུངས་ཀྱང་བསོད་གྲགས་རིན་པོ་ཆེ་ནས་ནན་ཞུས་བྱས་པས་དབུ་ཐོད་བླངས་ཆོག་པ་དང་གདུང་མཇལ་ཀྱང་ཤུའི་ནང་སྔ་བར་ཇ་དཀར་པོ་ཞིག་བྱེད་རྒྱུ་གནང་། གསུམ་པའི་ཉི་ཁྱེར་ཤོག་ཐ་མ་རེད་མོད་གསུངས། སྡེ་པ་ཚང་གི་ཡི་གེ་ཞིག་ཁྱེར་ཡོང་པ་དེ་སུས་ཁྱེར་ཡོང་པ་རེད་གསུངས་པར། དེ་འདྲ་མ་ཡོང་ཞུས་པས། ཁོང་གི་ལོས་ཡོང་ངས་སྒོ་ལ་བུད་ནས་བཏོན་པ་ཡིན་གསུངས་པར་མཚན་ལམ་རྨིས་པ་ཡིན་འགྲོ། སུ་མ་ཡོང་ཞུས་པས་ཅིང་མ་གསུངས། དེ་ནས་དཔའ་བོ་མཁའ་འགྲོའི་ཕོ་བྲང་གནས་ཁང་གི་ཕྱོགས་ལ་ཞལ་བསྟན་ནས་བཞུགས་ཏེ་ཕྱག་དཔྲལ་བར་ཐལ་མོ་སྦྱར་ནས་བཞུགས་པ་རིམ་གྱིས་མདུན་དུ་བསྒྱུར་ཏེ་ཧིག་མཐོན་པོ་ཞིག་ནང་ནས་འོད་གསལ་ནང་གི་མཁའ་སྤྱོད་མངོན་དུ་མཛད་དོ།།
གསུང་བཀོད་ལྟར་བསོད་ཞག་གསུམ་གྱི་བར་དུ་གཞན་ལ་གྲགས་ཚང་གི་སྐུ་གཟན་བཀབ་སྟེ་གསང་། དེ་ནས་སྐུ་གདུང་ལྷ་ཁང་དུ་སྤྱན་དྲངས་སྐབས་ཕྱག་གཉིས་འཁྱུད་རྒྱ་མཛད་ཅིང་ཤངས་བུག་ནས་བྱང་སེམས་དམར་པོ་བབས་པ་སོགས་ཐུགས་དམ་གྱི་རྟགས་ཁྱད་པར་ཅན་བྱུང་འདུག །སྲིད་ཞིའི་གཙུག་རྒྱན་༸གོང་ས་སྐུ་ཞབས་རིན་པོ་ཆེ་དང༌། བསྟན་འགྲོའི་མགོན་སྐྱབས་རོང་པོའི་ཤར་སྤྲུལ་པའི་སྐུ་རིན་པོ་ཆེ་རྣམ་གཉིས་གདན་འདྲེན་ཞུས་པ་སོགས་གདུང་མཆོད་ཀྱི་རིམ་པ་གང་འབྱོར་བྱས་ཀྱང་རྗེ་ཉིད་ནས་སྔ་མོ་ཞིག་ནས་ཕབས་བཞུད་བཙན་ཆོད་གནང་སྟེ་བྱ་བཏང་རི་ཁྲོད་པ་གནང་ཡོད་པས་ཤིན་ཏུ་ངོས་གཙང་བ་བྱུང༌། དེ་ཡང་རྗེ་བཙུན་མི་ལའི་མགུར་འབུམ་ལས།
གངས་དཀར་ཏི་སེ་སྐད་པ་དེ། །མ་མཐོང་རྒྱང་ན་སྒྲ་ཆེ་ཡང་། །
མཐོང་ནས་དྲུང་དུ་སླེབ་ཙ་ན། །རི་འགོ་ཁ་བས་བཏུམ་པ་གཅིག །
ཅེས་གསུངས་པ་ལྟར་རྣམ་ཐར་ལ་ཡང་དེ་ལྟར་སོང་བ་མང་མོད་ཀྱང་། འདིར་ནི་བཀའ་གདམས་གོང་མའི་གསུངས་ལས། དགེ་བའི་བཤེས་གཉེན་བྱ་བ། བཀྱེད་ན་གསལ་བ་ཧས་པོའི་གངས་ལྟ་བུ། བཏུད་ན་གསལ་བ་རྨ་བྱའི་མདོངས་ལྟ་བུ་གསུངས་པ་ལྟར་སྙན་པ་རྒྱང་ན་ཆེ་བ་ལྟར་སྐུ་དྲུང་དུ་ཡུན་རིང་དུ་བསྡད་ན་མཛད་སྤྱོད་ལ་ལྷག་པར་དད་པ་སྐྱེ་བ་ཞིག་ཡོད་ལ། པོ་ཏོ་པ་ཆེན་པོས། ངེད་ཀྱི་སློབ་དཔོན་ཞང་བཙུན་སྨྲ་མཁས་པ་ཡེ་མེད། ཡོན་བཤད་ཅིག་ནང་ན་ཡང་ཀུན་གྱིས་མི་གོ་སྙམ་པ་ལས་མི་མཁྱེན་ཀྱང་སྔ་མ་གཉིས་པོ་ཡོད་པས། དྲུང་ན་སུ་ཉེ་བ་ལ་ཕན་ཞེས་གསུངས་པ་ལམ་རིམ་ཆེན་མོར་དྲངས་འདུག་པ་ལྟར། གཞུང་ཆེན་མོ་ལ་སྦྱངས་པ་མ་མཛད་ཀྱང་། ཐུགས་རྒྱུད་བྱང་ཆུབ་ལམ་གྱི་རིམ་པས་གང་བའི་དབང་གིས་སྐུ་གསུང་ཐུགས་ཀྱི་མཛད་པ་ཐམས་ཅད་བསྟན་འགྲོའི་དམིགས་རྐྱེན་ལ་ཕན་ངེས་པ་ཤ་སྟག་ཏུ་སྣང་ངོ༌།།
ཐུན་མོང་མ་ཡིན་པའི་རྣམ་པར་ཐར་བ་ཤེས་དཀའ་ཡང་ཕྱོགས་ཙམ་ནི། དེ་ཡང་ཡུམ་ཆེན་ལབ་ཀྱི་སྒྲོལ་མའི་སྲས་སྟོང་སྡེ་ངག་ནད་གི་དབང་ཕྱུག་ནི་ཀུན་མཁྱེན་བླ་མ་ཡིན་ཅིང་། གྲོལ་སྡེ་རྒྱལ་བའི་འབྱུང་གནས་སྡེ་ཁྲི་རིན་པོ་ཆེ་དང༌། ཐོད་སྙོན་བསམ་འགྲུབ་ནི་རྗེ་ཐུའུ་བཀྭན་པ་ཡིན་པར་ཚད་མའི་ལུང་ལས་གསུངས་ལ་ཡུམ་སྲས་རྣམས་ལྷན་ཅིག་ཕྱོགས་འདིར་ཕེབས་ནས་བྱིན་གྱིས་བརླབས་ཏེ་གཏེར་སྦེད་པ་སོགས་གནང་བ་བཞིན་ཀུན་མཁྱེན་ཆེན་པོས་བཀྲ་ཤིས་འཁྱིལ་ཕྱག་འདེབས་མཛད། དེའི་བྱང་ཕྱོགས་མཁའ་འགྲོའི་གནས་ཆེན་འདིར་ཨ་མ་ཡུམ་ཆེན་ཉིད་དངོས་སུ་བྱོན་ནས་བཞུགས་པ་ཡིན་པ་ནི་གོང་དུ་བྲིས་པའི་རྣམ་ཐར་གྱི་བབས་ཀྱིས་ཤེས་ནུས་སོ།།
དེ་དོན་བཞིན་སྐྱབས་མགོན་ཐམས་ཅད་མཁྱེན་པ་ལ་སྤྲུལ་སྐུ་ཨེ་འབྱོན་ཞུས་པར། དགོན་པའི་བྱང་ཕྱོགས་འདི་ནས་མ་ཅིག་ལབ་ཀྱི་སྒྲོལ་མ་བཞུགས་འདུག་དགོས་པ་རེད། གནས་འདིའི་བདག་པོ་ཡིན་པས་སྤྲུལ་སྐུ་ལོས་ཕེབས། ཁ་མཁོ་མ་ཐུག་ན་བཟང་གསུངས་པ་ནི་དུས་གསུམ་རྗེན་པར་གཟིགས་པའི་གསུངས་ཡིན་ནོ། །མཁན་པོ་སྤྲུལ་པའི་སྐུ་ནས་འདིའི་དཀར་ཆག་ཏུ་གསུངས་པའི་ལུང་སྔར་བཀོད་པ་དེའི་དོན་བཞིན་འོད་གསལ་མངོན་དུ་མཛད་ནས། སྒྱུ་མའི་སྐུ་ནི་རགས་པའི་རྟེན་སྐུ་བརྙན་འདི་ལ་ཡང་བཞུགས་ཤིང་། དེས་སླར་ཡང་སྤྲུལ་པའི་སྐུ་འཛིན་པ་ནི་གསང་སྔགས་རྒྱུད་སྡེའི་དགོངས་པ་མ་ནོར་བ་ཡིན་ནོ།།
དཔའ་བོ་རྣམས་ཀྱི་ལོ་རྒྱུས་གསན་ན་ཐུགས་དགྱེས་པ་ཞིག་ཡོད་འདུག་པ་ནི། བདེ་མཆོག་རྩ་རྒྱུད་ལས།
གཡུལ་དུ་འཆི་བ་རྣམས་ཀྱི་ནི། །གཏམ་དག་ལ་ནི་རྟག་ཏུ་དགའ། །
ཞེས་ལཱ་མའི་རིགས་ཅན་གྱི་མཁའ་འགྲོ་མའི་རྟགས་སུ་གསུངས་ལ། དུས་འཁོར་གྱི་རྒྱུད་ལས་ཀྱང་། རྣལ་འབྱོར་མ་སོ་དྲུག་པོ་སོ་སོའི་མཚན་ཉིད་གསུངས་པ་རྣམས་དང་བསྟུན་ན་ངོ་མཚར་བ་ཡོད་པར་སྣང་ན་ཡང་བདག་ལྟ་བུས་ཤེས་པར་དཀའ་འོ། །སྡེ་པ་རྡོ་རྗེ་འཆང་ནས་བདེ་མཆོག་རང་བྱོན་གྱི་མདུན་དུ་འདོན་རྒྱུའི་སྨོན་ཚིག་ཅིག་རྗེ་འདི་ལ་གནང་བ་ལ་ཤིན་ཏུ་གསང་བའི་གནས་མང་དུ་ཡོད་ལ། མཁན་པོ་སྤྲུལ་པའི་སྐུ་ནས་དཀར་ཆག་ཏུ་གསུངས་པ་ལ་ད་དུང་ཐུན་མོང་མ་ཡིན་པ་བཤད་དུ་ཡོད་ལ། ཁོང་ནས་ཕྱག་ཐལ་མོ་སྦྱར་ཏེ་གུང་རུ་ཡེ་ཤེས་ཀྱི་མཁའ་འགྲོ་མ་ཞེས་ཐུགས་དད་ཆེན་པོ་གནང་བ་དང༌། མཚན་ལམ་ཡ་མཚན་ཅན་ཞིག་ཀྱང་འདུག་སྟེ་ཡི་གེ་འགོད་པར་མི་རུང་བས་ཡབ་སྲས་རྣམས་ཀྱི་རྣམ་པར་ཐར་པ་ལ་དད་ཅིང་གུས་པར་བྱ་བ་ནི་རྣམ་ཐར་བྲིས་པའི་དགོས་པའི་གཙོ་བོ་ཡིན་པར་ཤེས་པར་བྱའོ།།
སྨྲས་པ། བྱི་རུའི་དམར་འོད་ཆགས་པ་ཡི། །ཟླ་བ་གསར་པའི་བཞིན་རས་ཅན། །མཛེས་མའི་མིག་ཟུར་ཡིད་སྲུབས་མདའ། །སྙིང་ལ་འཕོས་པའི་ཆགས་ལྡན་བཞིན། །རྣམ་ཐར་པདྨ་དཀར་པོ་ཡི། །དྲི་ཡི་བསུང་གིས་བསྐྱོད་པ་ན། །ནམ་གཞུག་བུང་བ་རྒན་པོ་ཞིག །གཤོག་རླུང་དབྱངས་སྙན་སླར་ཡང་ལེན། །འདོད་པ་རྣམ་ལྔའི་དུག་གི་མེ་ཏོག་གིས། །ལུས་སྟོབས་ལྷག་པར་རྒྱས་པའི་མ་ཡུ་ར། །ཆགས་བྲལ་ཚངས་པར་སྤྱོད་པའི་བརྟུལ་ཞུགས་ཀྱིས། །བསྟན་པའི་རྨང་གཞི་ཟིན་པའི་རྣམ་ཐར་ཡིན། །རྨད་བྱུང་བྱམས་དང་སྙིང་རྗེ་བདུད་རྩི་ཡིས། །ཐུགས་ཀྱི་བུམ་བཟང་རིང་ནས་གང་བའི་མཐུས། །ཅི་མཛད་གཞན་དོན་ཁོ་ནར་གཞོལ་བ་ནི། །རྒྱལ་སྲས་གཞུང་ལམ་ཟིན་པའི་རྣམ་ཐར་ཡིན། །རྣམ་དག་དབང་བཞི་ལྷ་ཡི་ཆུ་བོའི་རྒྱུན། །བཤེས་གཉེན་ཐུགས་གསང་རྒྱ་མཚོ་ལས་འོང་བ། །དད་ཅིང་གུས་པའི་གཤོང་བུར་འཁྱིལ་བ་ནི། །གསང་ཆེན་འཇུག་སྒོ་མ་ནོར་རྣམ་ཐར་ཡིན། །ཆུང་ངུའི་དུས་སུ་དུང་ལྟར་དཀར་ན་ཡང་། །ན་ཚོད་རྫོགས་ཀྱིན་སོལ་བ་ལྟར་ནག་པས། །ཁྭ་ཏའི་ཕྲུ་གུའི་རྗེས་སུ་མ་ཞུགས་པ། །རྨད་བྱུང་སྐྱེས་བུ་དམ་པའི་རྣམ་ཐར་ཡིན། །གཞན་ལ་བཟང་བཤད་ངན་བཤད་སྣ་ཚོགས་ཀྱིས། །གྲུབ་མཐའི་དེ་ཉིད་འབྱེད་པ་མི་མཛད་ཀྱང་། །དགེ་ལྡན་རིང་ལུགས་ཐུགས་ཀྱི་གཅེས་ནོར་བུ། །མཛད་འདི་རྒྱལ་བས་བསྔགས་པའི་རྣམ་ཐར་ཡིན། །རྟོགས་པའི་ཡོན་ཏན་བུམ་ནང་མར་མེ་བཞིན། །སྦས་ཀྱང་རང་འོད་ཁོང་ནས་རྡོལ་བ་ཡིས། །མཆོག་དམན་ཀུན་ཀྱི་གུས་པས་འདུད་པ་ནི། །རྒྱུ་འབྲས་བསླུ་བ་མེད་པའི་རྣམ་ཐར་ཡིན། །ཡིད་ཆེས་ཚད་མའི་ལུང་གིས་གྲུབ་པ་བཞིན། །ཡུམ་ཆེན་ལབ་ཀྱི་སྒྲོལ་མའི་མཚན་སྙན་པོ། །བསྒྲགས་པ་མིན་པར་ཕྱོགས་ཀུན་ཁྱབ་པ་ནི། །གྲགས་སྙན་ལྷ་ཡིས་བསྒྲགས་པའི་རྣམ་ཐར་ཡིན། །གྲུབ་རིགས་དཔའ་བོ་བྱེ་བའི་བསྟི་གནས་བདེ་མཆོག་སྦས་ཆུའི་རྒྱ་མཚོའི་བཅུད། །ཧེ་རུ་ཀ་དཔལ་ཞལ་ལུང་མངར་པོ་སྙིང་གི་བཅུད་དུ་སིམ་པ་ལས། །རིམ་གཉིས་གྲུབ་པའི་བཅུད་ལེན་མཆོག་གིས་འཆི་མེད་ཟུང་འཇུག་གནས་ཐོབ་པའི། །གསང་བ་མཆོག་གི་རྣམ་པར་ཐར་པ་བདག་འདྲའི་སྤྱོད་ཡུལ་ག་ལ་ཞིག།།རྣལ་འབྱོར་མ་དཔལ་རྗེས་ཆགས་གློག་ཕྲེང་གིས། །འཁྱུད་པའི་སྤྲིན་སྔོན་རོལ་བའི་གདེངས་ཀ་ལས། །དུས་སུ་འཇོ་བ་ཐུགས་རྗེས་གྲུ་ཆར་ལས། །རང་གི་བསོད་ནམས་སྐལ་བར་ཤས་ཙམ་ཐོབ། །བླ་མ་མཆོག་དང་དབྱེར་མེད་ཧེ་རུ་ཀ།།དགྱེས་བསྐྱེད་མཁའ་སྤྱོད་ཞིང་གི་གཙོ་མོ་མཆོག།།དོན་ལྡན་ཚིག་གི་པད་དཀར་འཁྲི་ཤིང་འདིས། །མཆོད་པས་དོན་གཉིས་ལྷུན་གྱིས་གྲུབ་གྱུར་ཅིག།།རྒྱལ་གསུང་འོ་མའི་རྒྱ་མཚོ་བསྲུབས་པའི་བཅུད། །དགེ་ལྡན་རིང་ལུགས་ཉི་མ་འོད་པོ་ཆེ། །མཁའ་ཁྱབ་ཞིང་དུ་རྟག་ཏུ་གསལ་བ་དང༌། །བསྟན་འཛིན་ཚོགས་རྣམས་ཞབས་པད་བརྟན་གྱུར་ཅིག།།ཁྱད་པར་རྣལ་འབྱོར་དབང་མོ་དེ་ཉིད་ཀྱི། །སྤྲུལ་པའི་སྐུ་མཆོག་ཟླ་བ་གཞོན་ནུ་གང༌། །ལུས་ཅན་བསོད་ནམས་ཤར་རིའི་ཟུར་ཕུད་ལ། །མཛད་བཟང་འོད་དཀར་ངོམས་བཞིན་རྩེན་གྱུར་ཅིག།།གསང་སྔགས་སྨིན་རྒྱས་གླིང་གི་རྒྱུད་གྲྭ་འདིར། །ཧེ་རུ་ཀ་དཔལ་ཡབ་ཡུམ་ཐུགས་བསྐྱེད་བཞིན། །ཁྲིམས་ལྡན་འདུས་པའི་ཚོགས་ཀྱིས་ཡོངས་གང་ཞིང་། །བསྟན་པའི་བྱ་བ་མི་ཉམས་གོང་འཕེལ་ཤོག །དང་པོར་བཀྲ་ཤིས་བླ་མ་ཚུལ་བཞིན་བསྟེན། །བར་དུ་བཀྲ་ཤིས་ཐོས་དོན་ཉམས་སུ་བཞེས། །ཐ་མར་བཀྲ་ཤིས་བསྟན་འགྲོའི་མགོན་དུ་གྱུར། །རྨད་བྱུང་རྣམ་ཐར་མཆོག་གི་བཀྲ་ཤིས་ཤོག །ཅེས་རྗེ་བཙུན་ཡེ་ཤེས་ཀྱི་མཁའ་འགྲོ་མ་༸དཀོན་མཆོག་རིག་འཛིན་དཔལ་མོའི་རྣམ་ཐར་པད་དཀར་འཁྲི་ཤིང་ཞེས་བྱ་བ་འདི་ནི་བྲག་དཀར་དགོན་གྱི་གྲྭ་རྒན་དད་གུས་དང་ལྡན་པའི་དགེ་སློང་བློ་གསལ་རྒྱ་མཚོ་དང་། དུས་འཁོར་གྲྭ་ཚང་གི་གྲྭ་རིགས་རྗེ་བཙུན་མ་ཉིད་ཀྱི་སྐུ་ཚ་གསུང་རབ་རྒྱ་མཚོ་གཉིས་ཀྱིས་ས་བོན་གང་རྙེད་དང་བཅས་བསྐུལ་ཞིང༌། རྗེ་འདི་ལ་མཆོག་ཏུ་དད་པ་དགེ་སློང་འཇམ་དཔལ་རྒྱ་མཚོས་ལྷ་རྫས་བཅས་བསྐུལ་བ་ལ་བརྟེན་ནས་རྗེ་ཉིད་ཀྱི་གཟིམ་ཆུང་དུ་རྡོ་རྗེ་རྣལ་འབྱོར་མའི་སིནྡྷུ་རའི་དཀྱིལ་འཁོར་སྒྲུབ་པའི་མདུན་དུ་བདུན་པའི་ཚེས་བཅུ་ལ་དབུ་བཙུགས་ཏེ་དགུ་པའི་ཡར་ཚེས་རྒྱལ་བ་དང་པོ་ལྷག་པ་ལྷ་མཚམས་ཀྱི་འགྲུབ་སྦྱོར་ཉིན་མང་ཐོས་དགེ་སློང་བསྟན་པ་རྒྱ་མཚོས་སྦྱར་བའི་ཡི་གེ་བ་ནི་བྲག་དཀར་གྱི་བླ་མ་དབུ་མཛད་སྔགས་རམས་པ་སྟོབས་ལྡན་རྒྱ་མཚོས་བགྱིས་པ་འདིས་ཀྱང་སྲས་བཅས་རྒྱལ་བའི་ཐུགས་བཞེད་ལྷུན་གྱིས་གྲུབ་པར་གྱུར་ཅིག།།
ཚུལ་འདིར་འབྲེལ་བ་ཐོགས་པའི་སྐྱེ་བོ་ཀུན། །
ཡུམ་ཆེན་ལབ་ཀྱི་སྒྲོལ་མས་རྗེས་བཟུང་སྟེ། །
གནས་སྐབས་མཐར་ཐུག་འདོད་དོན་མ་ལུས་པ། །
བླ་མའི་ཐུགས་དགོངས་བཞིན་དུ་འགྲུབ་པར་ཤོག། །།[2]
[1] དུང་དཀར་ཚིག་མཛོད་ཆེན་མོ། མཁས་དབང་དུང་དཀར་བློ་བཟང་འཕྲིན་ལས་ (1927-1997) མཆོག་གིས་བརྩམས། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༢ ལོ། ཤོག་གྲངས་ ༥༡༨ ཐོག་བཞུགས་པ་ལས་བཏུས་པའོ།།
[2] ཞང་སྟོན་བསྟན་པ་རྒྱ་མཚོའི་གསུང་འབུམ། ༼༡༽ ཀན་སུའུ་མི་རིགས་དཔེ་སྐྲུན་ཁང་། ༢༠༠༤ ལོ། ཤོག་ ༡༨༡ ནས་ ༢༠༨ བར་དང་། ཤིང་དཔར་དཔེ་རིང་ཤོག་གྲངས་ ༡༨ ཅན་ལས་བཏུས་པའོ།།