དཔལ་ནཱ་ལེནྡྲ། བྱོན་པ་ལེགས།
རས་ཆུང་མའི་རྣམ་ཐར།
མི་ལའི་རྣམ་མགུར་ལས་རས་ཆུང་མ་དང་མཇལ་བའི་སྐོར།
གཙང་སྨྱོན་ཧེ་རུ་ཀ་རུས་པའི་རྒྱན་ཅན་གྱིས་བརྩམས།
ན་མོ་གུ་རུ། རྗེ་བཙུན་མི་ལ་རས་པ་དེ་ཉིད་ཀྱི་ཕྱག་ཕྱི་ཐུགས་སྲས་རས་ཆུང་པས་བགྱིས་ཏེ། འབྲིག་མཚམས་ཀྱི་མཚོ་ལྔ་དེའུ་ཆུང་གི་ཕྱོགས་ན་མར། རོ་སྙོམས་ཀྱི་ལྡོམ་བུ་དང་། སེམས་ཅན་གྱི་འགྲོ་དོན་ལ་བྱོན་པའི་ཚེ། རྗེ་བཙུན་ཡབ་སྲས་ཀྱིས་གངས་ཏི་སེ་དང༌། མཚོ་མ་ཕམ་གྱི་ཕྱོགས་སུ་སྒྲུབ་པ་མཛད་འདུག་ཅེས་སྙན་པ་དང་གྲགས་པ་ལྷོ་རོ་འབྲིག་མཚམས་ཀྱི་ཉ་མ་རྣམས་ཀྱིས་ཆེན་པོ་བྱུང་བས།
ལྕོ་རོ་འབྲིག་མཚམས་ཀྱི་ཉ་མ་རྣམས་ཀྱིས་ཀྱང་སྙན་གྲགས་ཐོས་ནས་ཡ་མཚན་ཞིང་ངོ་མཚར་ཆེ་བར་ཐག་ཆོད་ནས། མོས་གུས་སྐྱེས་ཏེ་གྲུབ་ཐོབ་དཔོན་སློབ་གཉིས་བྱོན་ཡོད་པར་འདུག་པས་ཞལ་བལྟ་རུ་འགྲོ་ཟེར། བསྙེན་བཀུར་གྱི་ཡོ་བྱད་གྱ་ནོམ་པ་ཁྱེར་ནས། རྗེ་བཙུན་ཡབ་སྲས་ཀྱི་ཞལ་བལྟ་རུ་བྱུང་བ་ལས། ཉ་མ་དེ་རྣམས་ཀྱི་ནང་ནས་རྗེ་བཙུན་གྱི་རྣམ་ཐར་ཐོས་པས་མི་ཕྱེད་པའི་དད་པ་ཐོབ་པའི་བུ་མོ་ཡེ་ཤེས་ཀྱི་མཁའ་འགྲོའི་སྤྲུལ་པ་དད་བརྩོན་ཤེས་རབ་སྙིང་རྗེ་ཆེ་ཞིང་། རིགས་དང་སྐལ་བར་ལྡན་པ་གཅིག་འདུག་པ་དེས་གཙོ་བྱས་པའི་བུ་མོ་གཞོན་པ་ལྔས་མགྲིན་གཅིག་ཏུ་བསྡེབས་ནས། རྗེ་བཙུན་ཡབ་སྲས་ཀྱི་སྙན་གྲགས་དང་མཐུན་པའི་ཐུགས་དམ་གྱི་ཉམས་སད་པའི་ཕྱིར་རྒོལ་བའི་ཞུ་དོན་འདི་གླུ་རུ་ཕུལ་བ།
ལྷ་དཀོན་མཆོག་གསུམ་ལ་སྐྱབས་སུ་མཆི། །ཐུགས་རྗེ་ཅན་གྱིས་བྱིན་གྱིས་རློབས། །རྗེ་ཡས་བྱོན་གྱི་རས་པ་རྣམ་གཉིས་པོ། །སྐུ་སྙན་པ་ཆེ་བས་རྒྱང་ནས་གྲགས། །འདིར་ཚོགས་ཀྱི་དད་འདུས་ཕོ་མོ་ཀུན། །གླེང་བརྗོད་མ་མང་དར་ཅིག་གསོན། །འདིར་ཚོགས་ཀྱི་དད་འདུས་ཕ་མ་ཀུན། །ངེད་རང་གཞོན་ནུ་རིགས་ཀྱི་བུ་མོ་རྣམས། །གླུ་གྲེ་མཐུན་གྱི་རོལ་མོ་མཆོད་པར་འབུལ། །ཚིག་སྡེབ་སྦྱོར་དཔེ་ཡིས་མཚོན་པ་ཡིན། །དོན་དགོས་བྱེད་ཅི་གདའ་ཐུགས་ལ་ཞོག །ཁྱེད་རས་པ་གཉིས་ལ་ཞུ་བ་ལགས། །གངས་དཀར་ཏི་སེ་སྐད་པ་དེ། །མ་མཐོང་རྒྱང་ནས་སྒྲ་ཆེ་བ། །གངས་ཤེལ་གྱི་མཆོད་རྟེན་འདྲའོ་སྐད། །མཐོང་ནས་དྲུང་དུ་སླེབས་ཙ་ན། །རི་མགོ་ཁ་བས་གཏུམས་པ་གཅིག །དེ་མཐའ་གངས་ཀྱིས་བསྐོར་བ་གཅིག །དེ་མཐའ་སྤང་རིས་བརྒྱན་པ་གཅིག །དེ་ལ་ངོ་མཚར་ཆེ་རྒྱུ་མེད། །དེ་ལ་ཡ་མཚན་ཅི་ཆེ་ཨང་། །མ་ཕམ་གཡུ་མཚོ་སྐད་པ་དེ། །མ་མཐོང་དུས་ན་སྒྲ་ཆེ་བ། །མཚོ་གཡུའི་མཎྜལ་འདྲའོ་སྐད། །མཐོང་ནས་དྲུང་དུ་སླེབས་ཙ་ན། །ཀོ་མོག་ཆབ་ཀྱིས་གང་བ་གཅིག །དེ་ལ་ཆུ་ཐིགས་བཏབ་པ་གཅིག །དེ་སྤང་དང་བྲག་གིས་བསྐོར་བ་གཅིག །དེ་ལ་ངོ་མཚར་ཆེ་རྒྱུ་མེད། །དེ་ལ་ཡ་མཚན་ཅི་ཆེ་ཨང་། །བྲག་དམར་སྤོ་མཐོ་སྐད་པ་དེ། །མ་མཐོང་རྒྱང་ནས་སྒྲ་ཆེ་བ། །བྲག་རིན་ཆེན་སྤུངས་པ་འདྲའོ་སྐད། །མཐོང་ནས་དྲུང་དུ་སླེབས་ཙ་ན། །སྤང་ལ་བྲག་རི་འབུར་བ་གཅིག །དེ་ལ་ནགས་ཚལ་སྐྱེས་པ་གཅིག །དེ་མཐའ་ཆུ་ཡིས་བསྐོར་བ་གཅིག །དེ་ལ་ངོ་མཚར་ཆེ་རྒྱུ་མེད། །དེ་ལ་ཡ་མཚན་ཅི་ཆེ་ཨང་། །ཁྱེད་རས་ཆེན་རས་ཆུང་སྐད་པ་དེ། །མ་མཐོང་གོང་ནས་སྒྲ་ཆེ་བ། །གྲུབ་ཐོབ་རྣལ་འབྱོར་ལགས་སོ་སྐད། །མཐོང་ནས་དྲུང་དུ་སླེབས་ཙ་ན། །རྒན་བྱིས་ངོ་ཚ་མེད་པ་གཉིས། །ཁྲེལ་མེད་གཅེར་ཉལ་བྱེད་པ་གཉིས། །ཁ་ནས་གླུ་ཆུང་ལེན་པ་གཉིས། །ཆ་ལུགས་གང་དགར་སྟོན་པ་གཉིས། །ལུས་ལ་རས་གོས་གྱོན་པ་གཉིས། །འཚོ་བ་སྤྲང་ཟས་ཟ་བ་གཉིས། །སྤྱོད་པ་ཅི་དགའ་བྱེད་པ་གཉིས། །དེ་ལ་ངོ་མཚར་ཆེ་རྒྱུ་མེད། །དེ་ལ་ཡ་མཚན་ཅི་ཆེ་ཨང་། །སྤུན་མ་བསྐོར་བ་གཅིག་མེད་པ་ལ། །ད་ནངས་བསྐོར་བ་དོན་རེ་ཆུང༌། །སྤུན་མ་ཕྱིན་པ་ཞིག་མེད་པ་ལ། །ད་ནངས་འོངས་པ་རྐང་ཚེགས་ཆེ། །སྤུན་མ་མཐོང་བ་ཞིག་མེད་པ་ལ། །ད་རིང་མཐོང་བ་རྒན་བྱིས་གཉིས། །སྤུན་མ་ཐོས་པ་ཞིག་མེད་པ་ལ། །དེ་རིང་ཐོས་པ་ཅལ་ཅོལ་གཏམ། །ཁྱོད་ཡང་ན་རྒྱལ་བའི་གདུང་འཚོབ་གཉིས། །ཡང་ན་བདུད་ཀྱི་བར་ཆད་བྱུང༌། །ལམ་འདི་གཉིས་གཅིག་ལས་བཏང་ས་མེད། །དེ་ཡང་བདུད་ཀྱི་བར་ཆོད་བྱུང་། །གླུ་དེ་ལ་ཤེས་ན་ལན་ཞིག་ཐོབ། །མི་ཤེས་རྣལ་འབྱོར་ཡུལ་ལ་བཞུད། །ཅེས་རྩོད་པའི་གླུ་ཕུལ་བས། རྗེ་བཙུན་གྱི་ཞལ་ནས་རས་ཆུང་པ། གངས་རི་མཚོ་གསུམ་འདི་བཅོམ་ལྡན་འདས་ཀྱིས་ལུང་བསྟན་པའི་སྒྲུབ་གནས་ལ། སྨད་ར་བཏང་བ་ལ་ལན་མ་བཏབ་ན། འདི་རྣམས་ཀྱིས་སྡིག་གསོག་ཅིང་སྒྲུབ་གནས་ཀྱི་ཆེ་བ་ཡང་འཆོར། རང་རེ་རྣལ་འབྱོར་པའི་སྒོ་གསུམ་གྱི་སྤྱོད་པ་མ་བཅོས་པར་སྐྱོང་བ་ལ་བརྙས་པའི་གནས་སུ་བྱས་བྱུང་བས། རྣལ་འབྱོར་གྱི་ཡིན་ལུགས་ལ་ལན་བཏབ་ནས། ཁོང་ཚོས་སྐྱོན་དུ་བཟུང་བ་རྣམས་རང་རེས་ཡོན་ཏན་དུ་ངོ་སྤྲོད་པ་ཡིན་པས། ཕའི་རམ་ཐེག་ཅིག་གསུངས། བུ་མོ་རྣམས་ཀྱི་ཞུས་ལན་དུ་མགུར་འདི་གསུངས་སོ། །
ཁྱེད་འདིར་ཚོགས་ཀྱི་དད་འདུས་ཉ་མ་ཚོ། །གླུ་གྲེ་འགྱུར་མཐུན་པའི་གཞོན་པ་རྣམས། །ཚིག་སྡེབ་སྦྱོར་ལེན་པའི་བུ་མོ་ལྔ། །དོན་དམིགས་ནས་གླུ་ལེན་གཙོ་མོ་ཉོན། །མི་ང་ངོ་ཁྱོད་ཀྱིས་ཤེས་མ་ཤེས། །མི་ང་ངོ་ཁྱོད་ཀྱིས་མ་ཤེས་ན། །ངེད་རས་ཆེན་རས་ཆུང་བྱ་བ་ཡིན། །ང་མི་རྒན་གཡས་ནས་གླུ་ལེན་པ། །མི་ལ་རྣལ་འབྱོར་བྱ་བ་ཡིན། །ཁོང་གཞོན་པ་གཡོན་ནས་རམ་འདེགས་པ། །རས་ཆུང་རྡོར་གྲགས་བྱ་བ་ཡིན། །སྙན་པའི་ཚིག་དོན་ཟུར་བསྡེབས་ནས། །དྲིས་པའི་བརྡ་ལོན་དངོས་རང་འཆད། །ཉམས་རྟོགས་པ་ཁོང་ནས་བརྡོལ་བའི་གླུ། །དོན་དགོས་བྱེད་ཅི་འདུག་སེམས་ལ་ཞོག །གངས་དཀར་ཏི་སེ་སྐད་པ་དེ། །མ་མཐོང་རྒྱང་ནས་སྒྲ་ཆེ་བ། །ཤེལ་དཀར་གྱི་མཆོད་རྟེན་འདྲའོ་སྐད། །མཐོང་ནས་དྲུང་དུ་སླེབས་ཙ་ན། །རི་མགོ་ཁ་བས་གཡོགས་པ་གཅིག །རི་མགོ་ཁ་བས་གཡོགས་པ་དེ། །སྔོན་བདེ་གཤེགས་ཉིད་ཀྱིས་ལུང་བསྟན་པ། །རི་བོ་གངས་ཅན་བྱ་བ་ཡིན། །སྤྱིར་འཛམ་བུའི་གླིང་གི་ལྟེ་བ་ཡིན། །སེང་གེ་དཀར་མོའི་འགྱིང་ས་ཡིན། །ཤེལ་དཀར་གྱི་མཆོད་རྟེན་འདྲ་བ་དེ། །དཔལ་འཁོར་ལོ་སྡོམ་པའི་ཕོ་བྲང་ཡིན། །དེ་མཐའ་གངས་རིས་བསྐོར་བ་དེ། །དགྲ་བཅོམ་ལྔ་བརྒྱའི་བཞུགས་གནས་ཡིན། །སྡེ་བརྒྱད་ཀུན་གྱིས་མཆོད་པའི་རྟེན། །དེ་མཐའ་སྤང་རིས་བསྐོར་བ་དེ། །སྤོས་ངད་ལྡན་པའི་རི་བོ་ཡིན། །སྨན་ཤི་གསོས་ཀྱི་བདུད་རྩི་འཁྲུངས་ས་ཡིན། །གྲུབ་པ་ཐོབ་པའི་གནས་ཆེན་ཡིན། །ཟག་མེད་ཏིང་འཛིན་བརྙེས་ས་ཡིན། །ངོ་མཚར་དེ་བས་ཆེ་བ་མེད། །ཡ་མཚན་དེ་བས་ཆེ་བ་མེད། །མ་ཕམ་གཡུ་མཚོ་སྐད་པ་དེ། །མ་མཐོང་རྒྱང་ནས་སྒྲ་ཆེ་བ། །མཚོ་གཡུའི་མཎྜལ་འདྲའོ་སྐད། །མཐོང་ནས་དྲུང་དུ་སླེབས་ཙ་ན། །ཀོ་མོག་ཆབ་ཀྱིས་གང་བ་གཅིག །ཀོ་མོག་ཆབ་ཀྱིས་གང་བ་དེ། །སྔོན་བདེ་གཤེགས་ཉིད་ཀྱིས་ལུང་བསྟན་པའི། །མཚོ་མ་དྲོས་པ་ཞེས་བྱ་བ་ཡིན། །སྤྱིར་ཆུ་བོ་བཞི་འདུས་ཀྱི་མགོ་བོ་ཡིན། །ཉ་སྲམ་རྣམས་ཀྱིས་འཕྱོ་ས་ཡིན། །མཚོ་གཡུའི་མཎྜལ་འདྲ་བ་དེ། །ཀླུ་ཆེན་བརྒྱད་ཀྱི་ཕོ་བྲང་ཡིན། །དེ་ལ་ཆུ་ཐིགས་བཏབ་པ་དེ། །བདུད་རྩི་འོ་མའི་ཆུ་རྒྱུན་ཡིན། །ལྷ་མཆོད་སྦྱིན་བརྒྱ་པའི་ཁྲུས་ཆབ་ཡིན། །ཆུ་ཡན་ལག་བརྒྱད་དང་ལྡན་པ་ཡིན། །དེ་མཐའ་སྤང་དང་བྲག་གིས་བརྒྱན། །ཀླུ་ཕྲན་རྣམས་ཀྱི་བང་མཛོད་ཡིན། །ཤིང་འཛམ་བུ་ཏྲི་ཤའི་སྐྱེ་གནས་ཡིན། །ལྷོ་འཛམ་བུ་གླིང་ཞེས་དེ་ལ་དྲས། །ངོ་མཚར་དེ་བས་ཆེ་བ་མེད། །ཡ་མཚན་དེ་བས་ཆེ་བ་མེད། །བྲག་དམར་སྤོ་མཐོ་སྐད་པ་དེ། །མ་མཐོང་རྒྱང་ནས་སྒྲ་ཆེ་བ། །བྲག་རིན་ཆེན་སྤུངས་པ་འདྲའོ་སྐད། །མཐོང་ནས་དྲུང་དུ་སླེབས་ཙ་ན། །སྤང་ལ་བྲག་རི་འབུར་བ་གཅིག །སྤང་ལ་བྲག་རི་འབུར་བ་དེ། །སྔོན་བདེ་གཤེགས་ཉིད་ཀྱིས་ལུང་བསྟན་པ། །རི་ནག་པོ་འབིགས་བྱེད་བྱ་བ་ཡིན། །ཡུལ་དབུས་འགྱུར་ཚལ་གྱི་བྱང་ཕྱོགས་ཡིན། །སྤྱིར་རྒྱ་བོད་གཉིས་ཀྱི་སོ་མཚམས་ཡིན། །རྒྱ་སྟག་ཁྲ་བོའི་འགྲིམ་ས་ཡིན། །དེ་ལ་ནགས་ཚལ་སྐྱེས་པ་དེ། །ཙན་དན་སྨན་གྱི་སྡོང་པོ་ཡིན། །བཟང་དྲུག་སྨན་གྱི་ལྗོན་ཤིང་ཡིན། །བྲག་རིན་ཆེན་སྤུངས་པ་འདྲ་བ་དེ། །ལྷ་དྲང་སྲོང་རྣམས་ཀྱི་ཕོ་བྲང་ཡིན། །མཁའ་འགྲོས་ལུང་བསྟན་དབེན་གནས་ཡིན། །སྔར་འདས་ཀྱི་གྲུབ་ཐོབ་བཞུགས་ས་ཡིན། །དེ་མཐའ་ཆུ་ཡིས་བསྐོར་བ་དེ། །ཀུན་གྱིས་བགྲོད་པ་དཀའ་བ་ཡིན། །ངོ་མཚར་དེ་བས་ཆེ་བ་མེད། །ཡ་མཚན་དེ་བས་ཆེ་བ་མེད། །ངེད་རས་ཆེན་རས་ཆུང་སྐད་པ་དེ། །མ་མཐོང་རྒྱང་ནས་སྒྲ་ཆེ་བ། །གྲུབ་ཐོབ་རྣལ་འབྱོར་ཡིན་ནོ་སྐད། །མཐོང་ནས་དྲུང་དུ་སླེབས་ཙ་ན། །རྒན་བྱིས་ངོ་ཚ་མེད་པ་གཉིས། །རྒན་བྱིས་ངོ་ཚ་མེད་པ་དེ། །མཚན་མའི་རྣམ་རྟོག་ཟད་པ་ཡིན། །ཁྲེལ་མེད་གཅེར་ཉལ་བྱེད་པ་དེ། །གཟུང་འཛིན་གོས་དང་བྲལ་བ་ཡིན། །ཆ་ལུགས་གང་དགར་སྟོན་པ་དེ། །བཅོས་མའི་ངོ་ཚ་སྤངས་པ་ཡིན། །ཁ་ནས་གླུ་ཆུང་ལེན་པ་དེ། །ཉམས་མྱོང་ཁོང་ནས་ཤར་བ་ཡིན། །ལུས་ལ་རས་གོས་གྱོན་པ་དེ། །གཏུམ་མོའི་བདེ་དྲོད་འབར་བ་ཡིན། །འཚོ་བ་སྤྲང་ཟས་ཟ་བ་དེ། །འདོད་ཡོན་སྲེད་པ་བསྐྱུངས་པ་ཡིན། །སྤྱོད་པ་ཅི་དགའ་བྱེད་པ་དེ། །ཚོགས་དྲུག་ལྷུག་པར་བཞག་པ་ཡིན། །ངེད་སྐལ་ལྡན་འདྲེན་པའི་བླ་མ་ཡིན། །དད་ལྡན་གདམས་ངག་ཞུ་ས་ཡིན། །ཁྱེད་ཡོན་བདག་ཕོ་མོ་འཁོར་ས་ཡིན། །མཁས་བཙུན་རྣམས་ཀྱི་གཏུགས་ས་ཡིན། །སྒོམ་ཆེན་ཉམས་རྟོགས་འབུལ་ས་ཡིན། །སྒྲོ་འདོགས་ནང་ནས་གཅོད་ས་ཡིན། །གཞི་གནས་ལུགས་གཏན་ལ་ཕབ་པ་ཡིན། །དོན་སྐྱེ་མེད་མངོན་དུ་གྱུར་པ་ཡིན། །སེམས་གཉུག་མ་རང་སོར་ཆུད་པ་ཡིན། །ལམ་དྲོད་རྟགས་རྒྱུད་ལ་སྐྱེས་པ་ཡིན། །རང་དོན་ཆོས་སྐུ་རྟོགས་པ་ཡིན། །ཐུགས་རྗེས་གཞན་དོན་བྱེད་པ་ཡིན། །ངོ་མཚར་འདི་ལས་ཆེ་བ་མེད། །ཡ་མཚན་འདི་ལས་ཆེ་བ་མེད། །ཁྱེད་འདིར་ཚོགས་ཀྱི་དད་འདུས་ཉ་མ་ཚོ། །ཁྱེད་མ་བསྐོར་བ་ཞིག་མེད་པ་ལ། །སྔོན་ཆད་བསྐོར་བ་ངལ་དུབ་ཡིན། །ད་བསྐོར་ན་འཕགས་པ་ཝ་ཏི་བསྐོར། །ཁྱེད་མ་ཕྱིན་པ་ཞིག་མེད་པ་ལ། །སྔོན་ཆད་ཕྱིན་པ་རྐང་ཚེགས་ཡིན། །ད་འགྲོ་ན་རྡོ་རྗེ་གདན་དུ་སོངས། །ཁྱེད་མ་མཐོང་བ་ཞིག་མེད་པ་ལ། །སྔོན་ཆད་མཐོང་བ་དོན་མེད་ཡིན། །ད་བལྟ་ན་ལྷ་ས་འཕྲུལ་སྣང་ལྟོས། །ཁྱེད་མ་ཐོས་པ་ཞིག་མེད་པ་ལ། །སྔོན་ཆད་ཐོས་པ་ཅལ་ཅོལ་ཡིན། །ད་ཉན་ན་སྙན་བརྒྱུད་གདམས་ངག་ཉོན། །ཁྱེད་མ་བསྟེན་པ་ཞིག་མེད་པ་ལ། །སྔོན་ཆད་བསྟེན་པ་ཉེ་དུ་ཡིན། །ད་བསྟེན་ན་བླ་མ་དམ་པ་སྟེན། །ཁྱེད་མི་བྱེད་པ་ཞིག་མེད་པ་ལ། །སྔོན་ཆད་བྱས་པ་ལས་སུ་སོང་། །ད་བྱེད་ན་དམ་པའི་ལྷ་ཆོས་གྱིས། །ང་མི་རྒན་གྱི་ཁ་ནས་ལན་བྱུང་བ། །དེ་གོ་བས་བསམས་ན་གདམས་ངག་ཡིན། །མ་གོ་བ་ཡི་གླུ་ཆུང་གྱིས། །ངེད་རྣལ་འབྱོར་གྱི་སྤྱོད་པ་གང་བདེ་ཡིན། །ཁྱེད་ཉ་མ་རྣམས་ཡུལ་དུ་ལོག་ལ་སོངས། །ཞེས་གསུངས་པས། དེ་རྣམས་ཀྱི་ནང་ནས་དབུས་མ་དེ་དད་པ་ལྷག་པར་སྐྱེས། མཆི་མ་མང་དུ་ཕྱུང་ནས། སྐེ་ན་ཡོད་པའི་ནོར་བུ་དང༌། མགོའི་འགྲོན་ཐོད་ཕུད་དེ། རྗེ་བཙུན་གྱི་ཕྱག་ཏུ་ཕུལ་ནས། བདག་བུ་མོ་ལྔ་པོ་འདི་ཆོས་སྒོར་ཞུགས། རི་ཁྲོད་འགྲིམ་པས་ཟབ་མོའི་གདམས་པ་ཐུགས་རྗེས་འཛིན་པར་ཞུ་ཞེས་གསོལ་བ་འདི་ལྟར་བཏབ་པ།
ཆོས་སྐུ་རྡོ་རྗེ་འཆང་ཆེན་ནས། །མར་མེ་གཅིག་ལ་གཅིག་མཆེད་ལྟར། །ཐུགས་རྗེ་ཉམས་རྟོགས་བརྒྱུད་པ་དེ། །ཏཻ་ལོ་ནཱ་རོ་མ་ལགས་སམ། །ཏཻ་ལོ་ནཱ་རོའི་སྤྱན་སྔ་རུ། །དཀའ་བ་སྤྱད་ནས་བྱོན་པ་དེ། །སྒྲ་སྒྱུར་མར་པ་མ་ལགས་སམ། །སྒྲ་སྒྱུར་མར་པའི་ཞབས་དྲུང་དུ། །དཀའ་བ་སྤྱད་པའི་ངོ་མཚར་ཅན། །བརྟུལ་ཞུགས་རས་ཆེན་མ་ལགས་སམ། །སྐུ་གཅེར་བུའི་ལུས་ལ་གཟི་མདངས་ཅན། །གསུང་སྣ་ཚོགས་ཚངས་པའི་སྒྲ་སྒྲོག་ཅིང་། །ཐུགས་མཁྱེན་བརྩེ་འོད་གསལ་རྒྱུན་ཆད་མེད། །ཕ་རས་པའི་སྐུ་གསུང་ཐུགས་ལ་འདུད། །བདག་འདིར་ཚོགས་བུ་མོ་རྣམ་པ་ལྔ། །སྔོན་ཆད་བསོད་ནམས་མ་བསགས་པས། །མི་ལུས་ཐོབ་ཀྱང་སྐྱེ་བ་དམན། །ལྷ་ཆོས་བྱེད་པའི་རང་དབང་མེད། །ད་རེས་རྗེ་བཙུན་བྱིན་རླབས་ཀྱིས། །རང་སེམས་དད་པ་གཏིང་ནས་སྐྱེས། །སྐེ་ཡི་ནོར་བུ་རིན་ཆེན་དང༌། །མགོ་ལ་གྱོན་པའི་འགྲོན་ཐོད་འདི། །རྗེ་རས་པ་ཁྱེད་ལ་འབུལ་ལགས་ཀྱིས། །བཀའ་དྲིན་ལྷ་ཆོས་གནང་བར་ཞུ། །རྗེ་རས་པ་ཆེན་པོ་ཁྱེད་རྣམས་ཀྱི། །སྔོན་ཆད་ཀྱི་རྣམ་ཐར་ཅུང་ཟད་ཀྱང་། །རྣ་བའི་བུ་གར་གསུང་དུ་གསོལ། །ཞེས་ཆོས་སྒོར་འཇུག་དགོས་པའི་གསོལ་བ་བཏབ་པས། རྗེ་བཙུན་གྱི་ཞལ་ནས། ཁྱོད་ཀྱི་འགྲོན་ཐོད་དང་ནོར་བུ་ང་ལ་མི་དགོས། ཁྱེད་རྣམས་སྙིང་ནས་ཆོས་བྱེད་ན། བླ་མ་ང་ལས་ཆོས་མཁས་པ་དང་བཟང་བ་གཞན་ན་ཡོད་པས། ཁྱེད་རང་རྣམས་ཆོས་གཞན་དུ་གྱིས། ང་ལྟོ་གོས་ཀྱི་ཞེན་པ་དང་བྲལ་བས་མི་མེད་ཀྱི་ལུང་སྟོང་འགྲིམ་པའི་ཟླ་ལ་ཁྱེད་ཀྱིས་མི་ཟུག །ལྟོ་གོས་ཀྱི་གྱོང་ཨེ་ཐེག་མི་ཤེས་པས། དེ་བས་ངའི་གླུ་འདི་ལ་གསོན་ཅིག་གསུངས་ནས་མགུར་འདི་གསུངས་སོ། །
རྗེ་རྡོ་རྗེ་འཆང་གིས་བྱིན་བརླབས་པ། །ཏཻ་ལོ་ནཱ་རོའི་སྤྱན་སྔ་རུ། །དཀའ་བ་སྤྱད་པའི་ངོ་མཚར་ཅན། །ཕ་སྐད་གཉིས་སྨྲ་བའི་ལོ་ཙཱ་བ། །སྒྲ་སྒྱུར་མར་པ་མ་ལགས་སམ། །དེ་ཡི་ཐུགས་རྗེས་བསྐྱངས་པ་ཡི། །ང་རང་མི་ལ་རས་པ་འདི། །ཕ་མི་ལ་ཤེས་རབ་རྒྱལ་མཚན་དང༌། །ཨ་མ་མྱང་ཚ་དཀར་རྒྱན་ཡིན། །ང་རང་ཐོས་པ་དགའ་ཞེས་ཟེར། །སྔོན་གྱི་རྒྱུ་འབྲས་མི་སླུ་བས། །ངེད་མ་སྨད་བསོད་ནམས་ཆུང་བའི་ཕྱིར། །ཡབ་མི་ལ་དེ་ཉིད་དགུང་ལ་གཤེགས། །སྒྱུ་མའི་ཟས་ནོར་གང་ཡོད་རྣམས། །ཨ་ནེ་དང་ཨ་ཁུ་གཉིས་ཀྱིས་འཕྲོགས། །ངེད་མ་སྨད་ཀྱིས་ཁོང་གི་གཡོག་པོ་བྱས། །ཟ་མ་ཁྱི་ཡི་ལྟོ་བ་ལ། །གོས་སུ་དུག་པོ་ཚེམ་བེར་གྱོན། །སྐྱེ་སེར་རླུང་དང་འཁྲུག་པ་ཤོར། །ཨ་ཁུའི་འཐབ་རྡུང་རྒྱུན་དུ་ཁུར། །ཨ་ནེའི་ངོ་འཛུམ་དཀར་ནག་བལྟས། །བྲན་གཉའ་ཤོར་གྱི་གདན་ས་ངེད་ཀྱིས་འཕྲོགས། །ངེད་མ་སྨད་ལ་སྡུག་པའི་རེ་མོས་བབ། །སྡུག་བསྔལ་གྱི་ཡི་མུག་བཟོད་གླགས་མེད། །བླ་མ་གཡུང་སྟོན་དང་རོང་སྟོན་ལྷ་དགའ་ལ། །མཐུ་སེར་གཏད་གསུམ་པོ་རྫོགས་པར་བསླབས། །ཨ་ཁུ་དང་ཨ་ནེས་ཐོག་དྲངས་པའི། །ཡུལ་མི་ཁྱིམ་མཚེས་ཕུང་ལ་བཏང་། །ང་དེ་ཕྱིར་བསམས་ཤིང་འགྱོད་པ་སྐྱེས། །རྗེ་ནཱ་རོ་དང་མེེ་ཏྲིས་བྱིན་བརླབས་པ། །ལྷོ་ཆུ་ཁྱེར་ཕུ་ན་བཞུགས་སོ་སྐད། །ཕ་ལོ་ཙཱ་བའི་སྙན་པ་རྒྱང་ནས་ཐོས། །ལམ་དཀའ་བ་སྤྱད་ནས་དྲུང་དུ་ཕྱིན། །ཕ་དྲིན་ཅན་དེ་ཡི་ཞབས་དྲུང་དུ། །ཁོ་བོ་མི་ལ་རས་པ་ངས། །ལོ་དྲུག་ཟླ་མཐོང་བརྒྱད་དུ་བསྡད། །སྲས་མཁར་དགུ་ཐོག་ཁྱམས་དང་བཅས། །དེ་རྣམས་ང་ཡིས་སངས་ཀྱིས་བརྩིགས། །ཕ་དྲིན་ཅན་དེས་ཀྱང་ཐུགས་རྗེས་བཟུང༌། །ལྟ་བའི་མཐར་ཐུག་ཕྱག་རྒྱ་ཆེ། །གནས་ལུགས་ཟབ་མོའི་ངོ་སྤྲོད་དང༌། །ཐབས་ལམ་ནཱ་རོའི་ཆོས་དྲུག་དང༌། །སྨིན་ལམ་དབང་བཞིའི་ཆུ་རྒྱུན་དང་། །དཔལ་ལྡན་ནཱ་རོའི་ཕྱག་ལེན་ལ། །ཡིད་ཆེས་ཞལ་གདམས་བཅས་པར་གནང༌། །ངས་ཀྱང་ལེ་ལོ་མ་བགྱིས་པར། །ཚེ་འདི་བློས་བཏང་བསྒོམས་པ་ལས། །གཏན་གྱི་སྐྱིད་མགོ་དེ་ནས་ཚུགས། །ང་རྣལ་འབྱོར་བྱུང་ཚུལ་དེ་ལྟར་གདའ། །ཁྱེད་བུ་མོ་ལྔ་སྐྱིད་དོ་ལོག་ལ་བཞུད། །ཅེས་གསུངས་པས། ཁོང་རྣམས་རྗེ་བཙུན་གྱི་རྣམ་ཐར་ལ་མཆོག་ཏུ་མི་ཕྱེད་པའི་དད་པ་སྐྱེས་ནས། ཕྱག་ཕྱིར་འཁྲིད་དགོས་པའི་ཞུ་བ་ནན་གྱིས་ཕུལ་བ་ལས། རྗེ་བཙུན་གྱི་ཞལ་ནས། ཁྱེད་རྣམས་ཕྱུག་པོའི་གཅེས་ཕྲུག་ངེད་ཀྱི་ཕྱི་ལ་ཕྱིན་རུང་སྡུག་མི་ཐེག །ཆོས་བྱེད་ན་འདི་ལྟ་བུའི་དཀའ་བ་སྤྱོད་དགོས་པས། ཨེ་ཡོང་བསམ་མནོ་ཐོངས་གསུངས། ཁོང་རྣམས་ལ་སྤྲོ་བ་དྲི་བའི་མགུར་འདི་གསུངས་སོ། །
སྒྲ་སྒྱུར་མར་པའི་ཞབས་ལ་འདུད། །ཁྱེད་འདིར་ཚོགས་བུ་མོ་སྤུན་ལྔ་པོ། །སྙིང་ནས་ལྷ་ཆོས་བྱེད་སྙམ་ན། །མི་ང་ཕྱིར་ཅིས་ཀྱང་འབྲང་བ་ན། །གླུ་འདི་དོན་སོམས་ལ་ལན་ཞིག་ཐོབ། །སྙིང་རུས་ཞེ་བཅད་དྲག་པོ་ཡིས། །དཀའ་སྤྱད་སྡུག་ཁུར་འཛུགས་བཞིན་དུ། །བླ་མའི་བཀའ་བཞིན་སྒྲུབ་ནུས་སམ། །ཕ་ཡུལ་བདུད་ཀྱི་བཙོན་ར་དེ། །དེང་ནས་རྟག་ཏུ་སྤངས་ནས་ཀྱང་། །གཉན་ས་རི་ཁྲོད་འགྲིམ་ནུས་སམ། །གཉེན་ཚན་བདུད་ཀྱི་རྟོད་ཐག་དེ། །གནོད་པར་ཤེས་ཏེ་སྤངས་ནས་ཀྱང༌། །མཚན་ལྡན་བླ་མ་བསྟེན་ནུས་སམ། །ཟས་ནོར་བདུད་ཀྱི་བསླུ་བྲིད་དེ། །དུག་ཏུ་ཤེས་ཏེ་སྤངས་ནས་ཀྱང་། །འཚོ་བ་དཀའ་ཐུབ་བྱེད་ནུས་སམ། །དབུས་ཕྲུག་འཇམ་ལེགས་སྤངས་ནས་ཀྱང༌། །གཏུམ་མོའི་བདེ་དྲོད་སྤོར་ནུས་སམ། །གྲོང་ཡུལ་དགའ་གྲོགས་སྤངས་ནས་ཀྱང་། །མི་མེད་ལུང་སྟོང་འགྲིམ་ནུས་སམ། །འཇིག་རྟེན་ཆོས་བརྒྱད་སྤངས་ནས་ཀྱང༌། །སྒོ་གསུམ་དམན་ཆ་འཛིན་ནུས་སམ། །ཚེ་འདིའི་རྟག་རྩིས་སྤངས་ནས་ཀྱང་། །ནམ་འཆི་ངེས་མེད་སྒོམ་ནུས་སམ། །དེ་ཀུན་ནུས་ན་ང་ཕྱིར་ཤོག །བཀའ་བརྒྱུད་བླ་མའི་ཕྱག་སྲོལ་བཞིན། །གསང་སྔགས་ཐབས་ལམ་གདམས་ངག་སྟེར། །འཇུག་སྒོ་དབང་དང་བྱིན་རླབས་བྱེད། །ཅེས་གསུངས་པས། བུ་མོ་དེ་རྣམས་དགའ་མགུ་ཡི་རངས་ཏེ། བུ་མོ་གཙོ་མོ་དེ་ན་རེ། བདག་ཅག་རྣམས་འབྱུང་བཞིའི་ལུས་བུད་མེད་དུ་སྐྱེས་པས་སྐྱེ་བ་དམན་རུང་། ཀུན་གཞིའི་སེམས་ལ་ཕོ་མོ་མ་མཆིས་ཤིང་། འཁོར་བའི་ཉེས་དམིགས་བསམས་ནས། བླ་མའི་བཀའ་བཞིན་སྒྲུབ་མི་ནུས་མཐུ་མེད་ལ་སོང་གདའ་བས། ཕྱག་ཕྱིར་འཁྲིད་པར་ཞུ། སྒྲུབ་པ་ཨེ་ནུས་མི་ནུས་ཐུགས་མི་ཁྲེལ་བའི་གཟིགས་པ་འབུལ་བ་ཡིན་ཟེར། རྗེ་བཙུན་གྱི་བཀའ་བཞིན་སྒྲུབ་ནུས་ཤིང་ཕྱག་ཕྱིར་འབྲང་བར་ཞུ་བའི་ཞུ་དོན་འདི་གླུར་ཕུལ་ལོ། །
ཕ་མཚན་ལྡན་བླ་མ་རིན་པོ་ཆེ། །གཅེར་བུའི་ལུས་ལ་གཟི་མདངས་ཅན། །བརྟུལ་ཞུགས་སྤྱོད་པས་གཞན་དོན་མཛད། །རྗེ་བཙུན་རས་པའི་ཞབས་ལ་འདུད། །ངེད་འདིར་འཚོགས་བུ་མོ་སྤུན་ལྔ་པོ། །ཚེ་འདིར་སྐྱེ་བ་དམན་ལགས་ཀྱང་། །བྱང་ཆུབ་སེམས་ལ་ཕོ་མོ་མེད། །འཁོར་བའི་ཉེས་དམིགས་བསམས་པ་ཡིན། །དཀའ་སྤྱད་སྡུག་ཁུར་དྲག་པོ་ཡིས། །བླ་མའི་བཀའ་བཞིན་བསྒྲུབ་པར་བགྱི། །ཕ་ཡུལ་བདུད་ཀྱི་བཙོན་ར་དེ། །རྟག་ཏུ་སྤངས་ནས་རི་ཁྲོད་འགྲིམ། །གཉེན་ཚན་བདུད་ཀྱི་བཤོལ་འདེབས་དེ། །རྟག་ཏུ་སྤངས་ནས་བླ་མ་བསྟེན། །ཟས་ནོར་བདུད་ཀྱི་བསླུ་བྲིད་དེ། །རྟག་ཏུ་སྤངས་ནས་དཀའ་ཐུབ་བགྱིད། །དབུས་ཕྲུག་ཚེམ་བེར་སྤངས་ནས་ཀྱང༌། །གཏུམ་མོའི་བདེ་དྲོད་སྦར་བར་བགྱི། །གྲོང་ཡུལ་དགའ་གྲོགས་སྤངས་ནས་ཀྱང༌། །མི་མེད་ལུང་སྟོང་འགྲིམ་པར་བགྱི། །འཇིག་རྟེན་ཆོས་བརྒྱད་སྤངས་ནས་ཀྱང་། །སྒོ་གསུམ་དམན་ཆ་གཟུང་བར་བགྱི། །ཚེ་འདིའི་རྟག་རྩིས་སྤངས་ནས་ཀྱང༌། །ནམ་འཆི་ངེས་མེད་བསྒོམ་པར་བགྱི། །མདོར་ན་བླ་མའི་བཀའ་བཞིན་བསྒྲུབ། །མཚན་ལྡན་བླ་མ་རིན་པོ་ཆེ། །བདག་ཅག་བུ་མོ་སྤུན་ལྔ་པོ། །བླ་མའི་ཕྱག་ཕྱིར་འཁྲིད་པར་ཞུ། །བཀའ་དྲིན་ལྷ་ཆོས་གནང་བར་ཞུ། །
ཞེས་ཞུས་པས། རྗེ་བཙུན་གྱིས་ལས་ཅན་གྱི་སློབ་མར་དགོངས་ཏེ་ཕྱག་ཕྱིར་ཁྲིད། དེའི་དུས་རྗེ་བཙུན་ཡབ་སྲས་ཀྱང་མཚོ་ལྔ་དེའུ་ཆུང་ལ་བཞུགས་ནས། བུ་མོ་དེ་རྣམས་ལ་དབང་དང་གདམས་པ་གནང་སྟེ་བསྒོམ་དུ་བཅུག་པས། བུ་མོ་གཙོ་མོ་དེ་ལ་ཞག་གསུམ་ནས་གཏུམ་མོའི་བདེ་དྲོད་ལ་སོགས་པའི་ཡོན་ཏན་རྣམས་རིམ་གྱིས་སྐྱེས་ནས་འདུག་པ་ལ། དུས་ནམ་ཞིག་མོ་ན་ཞིང་འདུག་པའི་ཚེ། རྗེ་བཙུན་གྱིས་རི་ཁྲོད་འགྲིམ་ནུས་མི་ནུས་དང་། དད་པ་བརྟན་མི་བརྟན་བརྟག་པའི་ཕྱིར། གང་དགར་བོར་ནས་བཏང་བ་ལས། ན་རུང་རི་ཁྲོད་རང་འགྲིམས་ཏེ། རྐྱེན་ཐུབ་པའི་གདེང་ཐོབ་ནས། སླར་ཡང་རྗེ་བཙུན་ཡུལ་གཞན་ཞིག་ན་བཞུགས་པའི་དུས་སུ་ཞབས་དྲུང་དུ་འོངས་པ་ལས། དེའི་ཚེ་ཉ་མ་མང་པོ་ཡང་རྗེ་བཙུན་དང་མཇལ་དུ་བྱུང་བ་ལས། བུ་མོ་དེ་དད་པ་ལོག་མ་ལོག་བལྟ་བའི་ཕྱིར། རྗེ་བཙུན་གྱིས་ཉ་མ་རྣམས་ལ་དགོངས་པ་ཅན་གྱི་མགུར་འདི་གསུངས་སོ། །
རྗེ་བླ་མ་རྣམས་ལ་གསོལ་བ་འདེབས། །ཡི་དམ་ལྷ་ལ་སྐྱབས་སུ་མཆི། །འདིར་འཚོགས་དད་འདུས་ཉ་མ་ཀུན། །འཇིག་རྟེན་ཆོས་བརྒྱད་མ་སྤངས་པའི། །དད་པ་ཅན་ཡིན་མ་ཟེར་ཅིག །དད་པ་རྐྱེན་གྱིས་བསྒྱུར་བ་ཡིན། །མི་དགེ་བཅུ་ལ་མི་འཛེམ་པའི། །ཚུལ་ཁྲིམས་ཡོད་ཅེས་མ་སྨྲ་ཞིག །སླར་ངན་སོང་རྒྱུ་རུ་འགྲོ་ཉེན་ཡོད། །རང་སེམས་གཡོ་སྒྱུ་མ་སྤངས་པའི། །དམ་ཚིག་བསྲུང་ཞེས་མ་བརྗོད་ཅིག །རྡོ་རྗེ་དམྱལ་བར་འགྲོ་ཉེན་གདའ། །ཐོས་བསམ་ཕྱོགས་མེད་མ་བྱས་པའི། །ཐེག་པ་གཞན་ལ་མ་སྨོད་ཅིག །ཆོས་སྤོང་གིས་རང་རྒྱུད་སྲེག་ཉེན་གདའ། །སྒྱུ་མ་ལྟ་བུར་མ་རྟོགས་པའི། །ལས་དགེ་སྡིག་ཁྱད་དུ་མ་གསོད་ཅིག །ངན་སོང་གསུམ་དུ་འགྲོ་ཉེན་གདའ། །ཕ་རོལ་སེམས་རྒྱུད་མི་ཤེས་པའི། །ཆོས་དང་གང་ཟག་མ་སྨོད་ཅིག །རློམ་སེམས་ལྟུང་བས་ཕོག་ཉེན་གདའ། །སེམས་དང་ཆོས་ཉིད་མ་འདྲེས་པའི། །ཉམས་མྱོང་བཟང་ཞེས་མ་སྨྲ་ཞིག །བདུད་ཀྱི་བར་ཆད་ཡོང་ཉེན་ཡོད། །བརྗོད་མེད་དོན་ལ་མ་སླེབས་པར། །ལྟ་བ་མཐོ་ཞེས་མ་སྨྲ་ཞིག །འབྲས་བུ་ཡིད་སྨོན་དུ་ལུས་ཉེན་གདའ། །ཤུགས་འབྱུང་ནང་ནས་མ་བརྡོལ་བའི། །ལྟ་སྟངས་གང་དགར་མ་སྟོན་ཅིག །རང་ཟོག་རང་གི་བྱུར་རྡོ་ཡིན། །ཆོས་ཁ་ནས་བཤད་པ་སེམས་ལ་ཟུངས། །དོན་ཡིད་ལ་བསྐོར་ཞིང་ཝལ་ལེ་གྱིས། །ཞེས་གསུངས་པས། དེ་རྣམས་ཀྱི་ནང་ནས་རས་ཆུང་མས་གོ་བ་བླངས་ཏེ། བླ་མ་གྲུབ་ཐོབ་ཀྱི་མཛད་སྤྱོད་ལ་དད་པ་སྐད་ཅིག་ཙམ་ཡང་ལོག་པ་མེད་ལགས། ཞེས་ཞུ་དོན་བཅོ་ལྔའི་རྟོགས་པ་འདི་ལྟར་ཕུལ་བ།
རྗེ་བླ་མ་རྣམས་ལ་ཕྱག་འཚལ་ལོ། །ཕ་གཅིག་བླ་མ་རྗེ་བཙུན་ལ། །དད་གུས་རྒྱུན་ཆད་མི་བགྱིད་འཚལ། །ལྷ་གཅིག་དཀོན་མཆོག་གསུམ་པོ་ལ། །རྒྱབ་རྟེན་སྤོང་ལེན་མི་བགྱིད་འཚལ། །བླ་མའི་སྙན་བརྒྱུད་གདམས་ངག་ལ། །ཐ་སྙད་ལྷན་པ་མི་གདབ་འཚལ། །ཡི་དམ་རྗེ་བཙུན་རྣལ་འབྱོར་ལ། །ཐུན་བཞིའི་རྣལ་འབྱོར་མི་བཅག་འཚལ། །སྣང་བ་སྒྱུ་མའི་རང་བཞིན་ལ། །དངོས་ཞེན་བག་ཆགས་མི་བཞག་འཚལ། །སེམས་ཉིད་རང་བཞིན་འོད་གསལ་ལ། །རྣམ་རྟོག་ལྷད་ཀྱིས་མི་བསླད་འཚལ། །ཤེས་བྱ་དངོས་པོའི་གནས་ལུགས་ལ། །གཟུང་འཛིན་དྲི་མས་མི་གཡོག་འཚལ། །གཉུག་མ་སེམས་ཀྱི་ངོ་བོ་ལ། །བག་ཆགས་རྟེན་ས་མི་བགྱིད་འཚལ། །སེམས་ཆོས་སྐུ་སྟོང་པའི་རང་བཞིན་ལ། །མཚན་མའི་དྲི་མས་མི་གོས་འཚལ། །ལུས་འབྱུང་བཞིའི་ནད་ཀྱིས་ཐེབས་པ་ལ། །གྲོགས་གཞན་ལ་གྱོད་ཀ་མི་བགྱིད་འཚལ། །གདོན་བགེགས་དགེ་སྦྱོར་གྱི་གྲོགས་པོ་ལ། །ལོག་རྟོག་གི་མོ་པྲ་མི་བགྱིད་འཚལ། །རྨི་ལམ་བག་ཆགས་ཀྱི་འཁྲུལ་སྣང་ལ། །བདེན་ཞེན་གྱི་རྟོག་པས་མི་བཟུང་འཚལ། །སྡང་དགྲ་བཟོད་པའི་བླ་མ་ལ། །གནོད་ལན་བསམ་སྦྱོར་མི་བགྱིད་འཚལ། །བླ་མ་གྲུབ་ཐོབ་ཀྱི་མཛད་སྤྱོད་ལ། །རྟོག་དཔྱོད་ཀྱི་སྒྲོ་སྐུར་མི་གདབ་འཚལ། །རང་ཤར་ལྷུན་གྲུབ་ཀྱི་སངས་རྒྱས་ལ། །འབྲས་བུ་གཞན་ནས་མི་བཙལ་འཚལ། །རྗེས་འཇུག་སྣོད་ལྡན་སློབ་མ་ལ། །ཐུགས་རྗེའི་ཆུ་རྒྱུན་མི་འཆད་འཚལ། །རྗེ་བླ་མ་དམ་པ་སྐུ་དྲིན་ཅན། །བདག་བློ་དམན་སློབ་མ་དྲང་དུ་གསོལ། །ཐུགས་རྗེའི་ལྕགས་ཀྱིས་གཟུང་དུ་གསོལ། །ཞེས་ཞུས་པས།
རྗེ་བཙུན་ཤིན་ཏུ་མཉེས་ཏེ། མཚན་ལྡན་གྱི་རྣལ་འབྱོར་མ་སྤྱོད་པའི་གྲོགས་སུ་འོས་པ་གཅིག་ཏུ་དགོངས་ནས། མན་ངག་རྣམས་ཀྱང་ལྷག་མ་མ་ལུས་པར་གནང་སྟེ། རས་ཆུང་པ་ལ་ཁྱོད་སློབ་མ་སྐྱོང་བ་ལ་མཁས་པ་ཡིན་པས། འདི་རྗེས་སུ་ཟུངས་ཤིག་གསུངས་ནས་རས་ཆུང་པ་ལ་གནང་ནས། རེ་ཞིག་གི་བར་དུ་རས་ཆུང་པའི་ཐུགས་དམ་གྱི་གྲོགས་མཛད། དེ་ནས་བྱང་གི་གནམ་མཚོ་ཕྱུག་མོའི་སེ་མོ་དོ་ལ་ངག་བཅད་ནས་ལོ་བརྒྱད་ཀྱི་བར་དུ་བསྒོམས་པའི་མཐར། ཉམས་སུ་བླངས་པའི་རྟགས་བཅུ་དང་ཡོན་ཏན་བརྒྱད་ལ་སོགས་པ་ས་ལམ་གྱི་སྤངས་རྟོགས་མངོན་དུ་གྱུར་ནས། སྐུ་ཚེ་འདི་ཉིད་ཀྱིས་མཁའ་སྤྱོད་དུ་གཤེགས་པ་ཡིན་ནོ། །རྗེ་བཙུན་གྱི་སྲས་རྣམས་ཀྱི་སྲིང་བཞི་ལས་ལྕོ་རོ་འབྲིག་མཚམས་ཀྱི་མཚོ་ལྔ་དེའུ་ཆུང་དུ་རས་ཆུང་མ་དང་མཇལ་བའི་སྐོར་རོ།།[1] །།