ག༽ སློབ་དཔོན་སེངྒེ་བཟང་པོའི་སྐུ་ཡི་ཆ་ལུགས།

ག༽ སློབ་དཔོན་སེངྒེ་བཟང་པོའི་སྐུ་ཡི་ཆ་ལུགས།

 

དེ་ཡང་ཚིག་དོན་གཉིས་ལ་མཁས་པའི་སློབ་དཔོན་སེངྒེ་བཟང་པོའི་སྐུ་ཡི་ཆ་ལུགས་ནི། གཉན་དགོན་སྤྲུལ་སྐུ་གསུང་རབ་མདོ་སྔགས་ཆོས་ཀྱི་རྒྱ་མཚོས་ (1903-1957) མཛད་པའི་མཁན་ཆེན་བོ་དྷི་ས་ཏྭ་ལ་བརྟེན་པའི་བླ་མའི་རྣལ་འབྱོར་ཐུབ་བསྟན་ཉིན་བྱེད་འདྲེན་པའི་སྐྱ་རེངས་ལས^[1]།

གཡས་ཀྱི་སེང་ཁྲིར་འཕགས་ཡུལ་རྒྱལ་ཚབ་མཆོག །

ཤེར་ཕྱིན་བཀའ་བབས་སེངྒེ་བཟང་པོའི་ཞབས། །

ཕྱག་གཉིས་ཆོས་འཁོར་དབུ་ལ་པཎ་ཞུ་དང་། །

སྐུ་ལ་ཆོས་གོས་གསུམ་གསོལ་སྐྱིལ་ཀྲུང་བཞུགས། །

ཞེས་གསུངས་པ་ལྟར། ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད་པའི་བྱང་ཆུབ་ལམ་གྱི་རིམ་པའི་བླ་མ་བརྒྱུད་པའི་སྐུའི་སྣང་བརྙན་གསལ་བར་བྱེད་པའི་མེ་ལོང་ལས^[2]། སློབ་དཔོན་སེངྒེ་བཟང་པོ་ཅུང་ཟད་གཡོན་འགྱིང་། ཕྱག་གཡས་འཁར་གསིལ་དང་གཡོན་ལྷུང་བཟེད་བསྣམས་པ། ཆོས་གོས་དང་དབུ་པཎ་ལེབ་ཞྭ་མཛད་པ། ཞེས་གསུངས་སོ།།

དེ་བཞིན་རྫོང་གསར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་ (1893-1959) ཀྱིས་མཛད་པའི་མཁས་དང་གྲུབ་པའི་སློབ་དཔོན་ཆེན་པོ་སེངྒེ་བཟང་པོའི་བླ་རྣལ་ལས^[3]། ཆོས་ཀུན་སྐྱེ་མེད་སྟོང་པའི་ངང་། །ཨ་ག་རུ་ཡི་ཁྲི་པད་ཟླར། །སློབ་དཔོན་ཆེན་པོ་སེངྒེ་བཟང་། །དཀར་དམར་མདངས་ལྡན་གཟི་བརྗིད་འབར། །པཎྜི་ཏ་ཡི་ཆ་བྱད་ཅན། །དབུ་ལ་སྡེ་སྣོད་གསུམ་ཞུ་གསོལ། །ཕྱག་གཡས་ཆོས་འཆད་གཡོན་མཉམ་བཞག །གླེགས་བམ་བསྣམས་ཤིང་ཕྱེད་སྐྱིལ་བཞུགས། །ཐུགས་ཀར་ཤེས་རབ་ཕ་རོལ་ཕྱིན། །ཞེས་གསུངས་པ་ལྟར་སློབ་དཔོན་སེངྒེ་བཟང་པོ་ནི། སྐུ་མདོག་དཀར་ལ་དམར་མདངས་ཆགས་ཤིང་། རྟེན་དགེ་སློང་ཡིན་པས་སྐུ་ལ་ཆོས་གོས་རྣམ་གསུམ་ལེགས་པར་གསོལ་ཞིང་། གནས་ལྔ་རིག་པ་སྤྱི་དང་། ལྷག་པར་སྡེ་སྣོད་གསུམ་གར་མཁྱེན་པ་ཕུལ་དུ་བྱུང་བས་དབུ་ལ་པཎ་ཞྭ་དམར་པོ་སྐེད་འཆིང་གསུམ་ལྡན་མནབས་པ། ཕྱག་གནས་ཆོས་འཆད་དང་གཡོན་མཉམ་བཞག་གམ། ལ་ལར་ཕྱག་གཡས་སྐྱབས་སྦྱིན་གྱི་ཕྱག་རྒྱ་དང་། མཛད་པ་ཀུན་ལས་མཆོག་ཏུ་གྱུར་པའི་གསུང་གི་མཛད་པའི་མཚོན་དོན་དུ་ཕྱག་གཡོན་མཉམ་བཞག་གི་སྟེང་དུ་ཤེར་ཕྱིན་གྱི་གླེགས་བམ་བསྣམས་པའམ་ཕྱག་གཉིས་ཆོས་ཀྱི་འཁོར་ལོ་བསྐོར་བའི་ཕྱག་རྒྱ་ཅན་ཏེ། ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད་པའི་བདག་ཉིད་ཆེན་པོ་སློབ་དཔོན་སེངྒེ་བཟང་པོ་ལ་བསྔགས་པའི་རབ་ཏུ་བྱེད་པ་ཐེག་ཆེན་ཆོས་ཀྱི་སྒྲ་དབྱངས་ལས^[4]།

ཤཱཀྱ་སེངྒེའི་བསྟན་པ་ཡི། །སྙིང་པོ་མཐར་ཐུག་ཤེར་ཕྱིན་དོན། །

འབྱེད་ལ་སྨོན་ལམ་མཐུ་གྲུབ་པ། །རྒྱལ་སྲས་བཟང་པོའི་མཚན་ཅན་རྒྱལ། །

ཞེས་གསུངས་པ་ལྟར་རིགས་རྒྱལ་རིགས་སུ་སྐུ་འཁྲུངས་པའི་མཚོན་དོན་དུ་རྔུལ་ལེན་སྔོ་སྐྱ་བཞེས་ཤིང་། བཞུགས་གདན་འབོལ་རྩེག་གི་སྟེང་དུ་གདིང་བའི་སྟན་ལ་ཞབས་གཉིས་སྐྱིལ་ཀྲུང་དུ་བཞུགས་པའི་ཆ་ལུགས་ཅན་ནོ།།

གཞན་ཡང་སྟག་ཚང་ལོ་ཙཱ་བ་ཤེས་རབ་རིན་ཆེན་ (1405-1477) གྱིས་མཛད་པའི་སེམས་དཔའ་ཆེན་པོ་ནམ་མཁའ་འོད་ཟེར་གྱི་རྣམ་ཐར་ལས^[5]། བདག་ཉིད་ཆེན་པོ་འདི་དགུང་ལོ་བཅུ་པ་ཙམ་གྱི་དུས་སུ། ཕར་ཕྱིན་ལ་སློབ་གཉེར་ཤིན་ཏུ་འགྲུས་པར་མཛད་པའི་སྐབས་རྣམས་སུ། མནལ་ལམ་དུ་རྒྱ་གར་གྱི་པཎྜི་ཏ་མང་པོ་གཟིགས་ཤིང་། ཁྱད་པར་སློབ་དཔོན་སེང་གེ་བཟང་པོ་ཡིན་ཟེར་བའི་པཎྜི་ཏ་སྐུ་གཟུགས་རིང་པོ་ན་བཟའ་ངུར་སེར་བཞེས་པ་ཞིག་གིས་ལས་འབྲས་དང་བསམ་གཏན་སྒོམ་པའི་མན་ངག་ལ་སོགས་པའི་ཆོས་མང་དུ་བསྟན་པར་རྨི་བ། ཞེས་གསལ་བ་ལྟར་སློབ་དཔོན་སེངྒེ་བཟང་པོའི་སྐུ་གཟུགས་ཀྱི་རིང་ཚད་དང་། ན་བཟའི་ཁ་དོག་གང་ཞིག་བཞེས་མིན་སོགས་གསལ་བ་འདི་ཡང་དཔྱད་གཞི་གལ་ཆེན་ཞིག་ཡིན། མདོར་ན། སློབ་དཔོན་འདིའི་སྐུ་བརྙན་ནི། སྐུ་ཅུང་ཟད་གཡོན་འགྱིང་དུ་བཞུགས་ཤིང་། ཕྱག་གཡས་འཁར་གསིལ་དང་། གཡོན་ལྷུང་བཟེད་བསྣམས་པ། ཆོས་གོས་དང་དབུ་པཎ་ལེབ་ཞྭ་མཛད་པའི་ཆ་བྱད་ཅན་ནོ།།  །།

 

ལུང་ཁུངས་དཔྱད་གཞིའི་ཡིག་ཆ།

^[1]  གཉན་དགོན་སྤྲུལ་སྐུའི་གསུང་འབུམ། ༼༢༽ སི་ཁྲོན་མི་རིགས་དཔེ་སྐྲུན་ཁང་། ༢༠༠༦ ལོ། ཤོག་གྲངས་ ༣༧༩

^[2]  ཡོངས་འཛིན་ཡེ་ཤེས་རྒྱལ་མཚན་གྱི་གསུང་འབུམ། ༼༣༠༽ ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༡༡ ལོ། ཤོག་ ༢༤༣

^[3]  ཆོས་ཀྱི་བློ་གྲོས་བཀའ་འབུམ། ༼ང༽ ཆོས་ཚན་ ༧ འཕྲུལ་པར་དཔེ་རིང་། ཤོག་གྲངས་ ༢བ༡ ནས་ ༣བ༤ བར།

^[4]  ཡོངས་འཛིན་ཡེ་ཤེས་རྒྱལ་མཚན་གྱི་གསུང་འབུམ། ༼༥༽ དཔེ་རིང་། ཤོག་གྲངས་ ༢ན༢

^[5]  སྟག་ཚང་ལོ་ཙཱ་བའི་གསུང་འབུམ། གསུམ་པ། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༧ ལོ། ཤོག་གྲངས་ ༧༠

 

ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཅ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༨༥ ནས་ ༨༧ བར་གསལ་བ་ལས་བཏུས་པའོ།།