དཔལ་ནཱ་ལེནྡྲ། བྱོན་པ་ལེགས།
ག༽ བུདྡྷའི་སྒྲ་བཤད་ཀྱི་དོགས་དཔྱོད།
དེ་བཞིན་ཀུན་མཁྱེན་གོ་རམས་པ་བསོད་ནམས་སེང་གེས་ (1429-1489) མཛད་པའི་དབུ་མ་ལ་འཇུག་པའི་དཀྱུས་ཀྱི་ས་བཅད་པ་དང་གཞུང་སོ་སོའི་དཀའ་བའི་གནད་ལ་དཔྱད་པ་ལྟ་བ་ངན་སེལ་ལས[1]། རང་སངས་རྒྱས་ལ་སངས་རྒྱས་འབྲིང་དུ་བརྗོད་པའི་རྒྱུ་མཚན་ནི། འགྲེལ་པར། སངས་རྒྱས་ཀྱི་སྒྲ་འདི་སངས་རྒྱས་ཀྱི་དེ་ཉིད་ཉན་ཐོས་དང་། རང་སངས་རྒྱས་དང་། བླ་ན་མེད་པ་ཡང་དག་པར་རྫོགས་པའི་སངས་རྒྱས་གསུམ་ཆར་ལའང་འཇུག་སྟེ་ཞེས་གསུངས་ལ།
དེའི་དོན་བུདྡྷ་ཞེས་པའི་སྒྲ་མ་རིག་པའི་གཉིད་སངས་པ་དང་། ཤེས་བྱ་ལ་བློ་གྲོས་རྒྱས་པ་གཉིས་ལ་འཇུག་པ་ལས། དགྲ་བཅོམ་འོག་མ་གཉིས་ལ་ཉོན་མོངས་པ་ཅན་གྱི་མ་རིག་པའི་གཉིད་སངས་པ་ཡོད་པས་བུདྡྷའི་སྒྲ་འཇུག་པའི་དབང་དུ་བྱས་པའོ། །ཁ་ཅིག་ཏཏྭ་བུདྡྷ་ཞེས་པའི་སྒྲ་གང་ཟག་གསུམ་ཆར་ལ་འཇུག་པ་འཆད་པ་ལྟར་ལེགས་ཏེ། ཏཏྭ་ནི་དེ་ཁོ་ན་ཉིད་དང་། བུདྡྷ་ཁོང་དུ་ཆུད་པ་ལའོ། །ཞེས་བྱུང་བ་ལྟར། དེ་ཉིད་རྟོགས་པའི་བུདྡྷའི་སྒྲ་དོན་དུ་བྱས་པའི་ཚེ་དོན་དེ་གང་ཟག་གསུམ་ཀ་ལ་ཡོད་པས། དེ་ཉིད་རྟོགས་པའི་སྒྲས་རང་སངས་རྒྱས་ཀྱང་བསྙད་ཅེས་ཟེར་རྒྱུ་ཡིན་པ་ལ་སངས་རྒྱས་སུ་བསྒྱུར་རོ།།
སྤྱིར་བུདྡྷའི་སྒྲ་སངས་རྒྱས་ལ་བསྒྱུར་དུ་ཡོད་ཀྱང་། བུདྡྷའི་སྒྲ་ནི་པད་འདབ་རྒྱས་པ་དང་། གཉིད་སད་པ་ལའང་འཇུག་པར་བཤད་པས། སངས་རྒྱས་ཁོ་ན་ལ་བསྒྱུར་མི་དགོས་སོ་ཞེས་ཟེར་རོ། །དེ་དག་ནི་མི་འཐད་དེ། བུདྡྷ་ཁོང་དུ་ཆུད་པ་ལ་འཆད་པའི་ཚེ། མ་རིག་པའི་གཉིད་སངས་པ་དང་། ཤེས་བྱ་ལ་བློ་གྲོས་རྒྱས་པ་གཉིས་ཀྱི་ནང་ནས་ཕྱི་མ་ཡིན་པས་དེ་ཁོ་ན་ཉིད་ལ་བློ་གྲོས་རྒྱས་པ་ཞེས་འགྱུར་ལ། དེ་དགྲ་བཅོམ་འོག་མ་གཉིས་ལ་ཡོད་ན་ཉན་རང་གིས་དེ་ཁོ་ན་ཉིད་རྒྱས་པ་མ་རྟོགས་པར་གསུངས་ཤིང་། རང་ཉིད་ཀྱིས་ཀྱང་ཁས་བླངས་པ་དང་འགལ་བའི་ཕྱིར་དང་། དེ་ཉིད་རྟོགས་པའི་སྒྲས་རང་སངས་རྒྱས་ཀྱང་བསྙད་ཅེས་ཟེར་རྒྱུ་ཡིན་པ་སངས་རྒྱས་སུ་བསྒྱུར་ཞེས་པ་ནི། ཉན་ཐོས་དེ་ཉིད་རྟོགས་འབྲིང་སངས་རྒྱས་སྐྱེས། །ཟེར་རྒྱུ་ཡིན་པ་ལ་སངས་རྒྱས་འབྲིང་དུ་བསྒྱུར་ཞེས་སུན་འབྱིན་དགོས་པར་མཚུངས་པའི་ཕྱིར་དང་། སྤྱིར་བུད་དྡྷའི་སྒྲ་སངས་རྒྱས་ལ་བསྒྱུར་དུ་ཡོད་ཀྱང་སྐབས་འདིར་མི་འཚམ་ཞེས་པ་ནི་སྐབས་འདིར་སངས་རྒྱས་འབྲིང་གི་སྒྲ་བཤད་མི་འཚམ་པ་ཁས་ལེན་དགོས་པའི་ཕྱིར་དང་། བུད་དྡྷའི་སྒྲ་པད་འདབ་རྒྱས་པ་དང་། གཉིད་སངས་པ་ལ་འཇུག་པར་བཤད་པ་གཉིས་ཀྱིས་སངས་རྒྱས་ཁོ་ན་ལ་བསྒྱུར་དགོས་པར་གྲུབ་པའི་ཕྱིར། ཞེས་དོགས་དཔྱོད་དང་བཅས་གསལ་བར་གསུངས་སོ།།
དཔྱད་གཞིའི་ལུང་ཁུངས་ཡིག་ཆ།
[1] དཔལ་ལྡན་ས་སྐྱའི་གསུང་རབ། པོད། ༼༦༽ མི་རིགས་དཔེ་སྐྲུན་ཁང་། ༢༠༠༣ ལོ། ཤོག་གྲངས་ ༣༠༩
ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཁ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༡༧༩ ནས་ ༡༨༠ བར་གསལ་བ་ལས་བཏུས།