ག༽ སྤྱན་རས་གཟིགས་བརྟུལ་ཞུགས་ཀྱིས་ཇི་ལྟར་གསུངས་པ།

ག༽ སྤྱན་རས་གཟིགས་བརྟུལ་ཞུགས་ཀྱིས་ཇི་ལྟར་གསུངས་པ།

༡༽ སྟག་རྣམ་རྩེན་ལྟ་བུའི་ཚིགས་བཅད་ཀྱི་དོན་བཅུ།

 

ཕྱི་ལོའི་དུས་རབས་བདུན་པ་སྟེ་ཕྱི་ལོ་ ༦༨༠ ཙམ་ལ་ཕེབས་པའི་མདོ་སྡེ་སྤྱོད་པའི་དབུ་མ་རང་རྒྱུད་པའི་སློབ་དཔོན་སྤྱན་རས་གཟིགས་བརྟུལ་ཞུགས་^[1]ཀྱིས་ཇི་ལྟར་གསུངས་པ་ནི། སློབ་དཔོན་འདི་ཉིད་དཔལ་ལྡན་ཟླ་བ་གྲགས་པ་ལས་ཅུང་ཟད་འཕྱི་བས། ཟླ་བ་གྲགས་པ་འདས་ཟིན་པའི་རྗེས་ཙམ་ལ་ཕེབས་པ་ཡིན་ནམ་སྙམ་མོ། །དེས་མཛད་པའི་དབུ་མ་ཤེས་རབ་སྒྲོན་མའི་རྒྱ་ཆེར་འགྲེལ་ལས^[2]།

ད་ནི་འགྲེལ་པ་བྱེད་པ་ཉིད་ཀྱིས་སློབ་དཔོན་གྱི་ཞལ་སྔ་ནས་ཀྱིས་དབུ་མའི་བསྟན་བཅོས་ཤེས་རབ་ཅེས་བྱ་བ་རབ་ཏུ་བྱེད་པ་ཉི་ཤུ་བདུན་དང་ཚིག་ལེའུར་བྱས་པ་བཞི་བརྒྱ་ཞེ་དགུ་པ་མཛད་པའི་འགྲེལ་པ་ཤེས་རབ་སྒྲོན་མ་ཞེས་བྱ་འདི་བྱས་པའི་ཚུལ་བསྟན་པ་དང༌། དེ་བྱས་པའི་དགེ་བའི་རྩ་བ་འཁོར་གསུམ་ཡོངས་སུ་དག་པའི་ཚུལ་གྱིས་བདག་དང་གཞན་ལ་བསྔོ་བའི་ཚུལ་བསྟན་པའི་ཕྱིར་སྟག་རྣམ་པར་རྩེན་པ་ལྟ་བུའི་ཚིགས་སུ་བཅད་པ་གཉིས་སྟོན་ཏེ། ཞེས་གསུངས་པས། སློབ་དཔོན་ལེགས་ལྡན་འབྱེད་ཀྱིས་སྟག་རྣམ་པར་རྩེན་པ་ལྟ་བུའི་ཚིགས་སུ་བཅད་པ་གཉིས་གསུངས་སོ་ཞེས་འགོ་སྨོས་ནས། ཚིགས་བཅད་དང་པོ་དེ་འགྲེལ་བའི་ཚེ་ན། དོན་རྣམ་པ་བཅུར་ཕྱེ་ནས་གསུངས་ཏེ། འདི་ལྟར། དེ་ལ།^[3] ༡ འཇིག་རྟེན་སྣང་མཛད་གཞན་དོན་མཁས་རྣམས་༢སངས་རྒྱས་ཉིད་ཐོབ་མཛད་སླད་དུ། །?༣ ཤེས་རབ་ཕ་རོལ་ཕྱིན་སོགས་མདོ་སྡེ་གསུངས་༤ཚུལ་གསལ་བར་སྟོན་པ་ན། །༤ ཐུབ་དབང་སྲས་པོ་ཀླུ་སྒྲུབ་གསུངས་པ་༦དབུ་མའི་བསྟན་བཅོས་གང་ཡིན་པ། །༧ དེ་ཡི་རྣམ་བཤད་༨ལྟ་ངན་ཞི་བྱེད་༩ཤེས་རབ་སྒྲོན་མ་༡༠བདག་གིས་བྱས། །ཞེས་ཚིགས་སུ་བཅད་པ་དེ་དྲངས་ནས། དང་པོ། ས་ཆེན་པོ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡོན་ཏན་བརྗོད་པ་ནི། ཞེས་བྱ་བ་འདིས་ནི་བདག་གིས་བྱས་པའི་ཚུལ་བསྟན་ཏེ། འཇིག་རྟེན་སྣང་མཛད་གཞན་དོན་མཁས་རྣམས། ཞེས་བྱ་བ་ནི་ས་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་རྣམས་ཏེ། དེ་རྣམས་ནི་སྣོད་ཀྱི་འཇིག་རྟེན་སངས་རྒྱས་ཀྱི་ཞིང་ཡོངས་སུ་དག་པའི་རྒྱན་ཕུན་སུམ་ཚོགས་པས་སྣང་བ་དང༌། སེམས་ཅན་གྱི་འཇིག་རྟེན་བྱང་ཆུབ་སྙིང་པོའི་ཡེ་ཤེས་ཕུན་སུམ་ཚོགས་པས་སྣང་བ་འདས་པ་དང་ད་ལྟར་དང་མ་འོངས་པའི་དུས་སུ་མཛད་པ་དང༌། མཛད་བཞིན་པ་དང༌། མཛད་པར་འགྱུར་བའི་ཕྱིར་དང༌། བདག་ཉིད་ཀྱི་སངས་རྒྱས་ཀྱི་ཆོས་ཡོངས་སུ་སྨིན་པར་བྱ་བ་དང༌། ཕྱི་རོལ་གྱི་སེམས་ཅན་ཡོངས་སུ་སྨིན་པར་བྱ་བའི་ཕྱིར་གཞན་གྱི་དོན་མཛད་པ་ལས་ཤེས་རབ་ཀྱིས་དབང་པོའི་རིམ་པ་ལ་སོགས་པ་བརྟག་པ་དང༌། ཆོས་ཀྱི་དེ་ཁོ་ན་ཉིད་བསྟན་པ་ལ་མཁས་ཤིང་ཐབས་ཀྱིས་བསྡུ་བ་རྣམ་བཞི་ལ་སོགས་པས་རིམ་གྱིས་བསྡུ་བ་དང༌། མངོན་པར་མཐོ་བ་དང༌། ངེས་པར་ལེགས་པའི་འབྲས་བུ་ལ་སོགས་པ་ལ་འཇོག་པར་མཁས་པ་ཡིན་པའི་ཕྱིན་ཏེ། དེས་ནི་བྱང་ཆུབ་སེམས་དཔའ་རྣམས་ཀྱི་ཡོན་ཏན་སྟོན་ཏོ། །ཞེས་དང༌།

གཉིས་པ། སངས་རྒྱས་ཉིད་ཀྱིས་བྱང་ཆུབ་སེམས་དཔའ་དེ་རྣམས་སངས་རྒྱས་ཀྱི་གོ་འཕང་ལ་འགོད་པར་བྱ་བའི་སླད་དུ་དམ་པའི་ཆོས་སྟོན་པར་མཛད་པར་གསུངས་པ་ནི། སངས་རྒྱས་ཉིད་ཐོབ་མཛད་སླད་དུ། །ཞེས་བྱ་བ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་རྣམས་སངས་རྒྱས་ཉིད་ཐོབ་པར་མཛད་པའི་སླད་དུ་སྟེ། དེ་བཞིན་གཤེགས་པ་ནི་རང་གི་སྲས་ཐུགས་ལས་སྐྱེས་པ་ཞལ་ནས་སྐྱེས་པ་ཆོས་ལས་སྐྱེས་པ་རྣམས་བྱང་ཆུབ་སེམས་དཔའི་ལམ་འབྲས་བུ་དང་བཅས་པ་ཉིད་འཐོབ་པར་མཛད་པའི་སླད་དུ་དམ་པའི་ཆོས་སྟོན་པར་མཛད་པ་ཡིན་པའི་ཕྱིར་ཏེ། དེས་ནི་སངས་རྒྱས་ཀྱི་མཛད་པ་བསྟན་ཏོ། །ཞེས་དང༌།

གསུམ་པ། ཁྱད་པར་དུ་གཞན་དོན་ལ་མཁས་པའི་བྱང་སེམས་རྣམས་ཀྱི་ཆེད་དུ་ཡུམ་ཤེར་ཕྱིན་ལ་སོགས་པ་ཐེག་པ་ཆེན་པོའི་མདོ་སྡེ་རྣམས་གསུངས་ནས་འཇིག་རྟེན་སྣང་བར་མཛད་པ་གསུངས་པ་ལ། ཤེས་རབ་ཕ་རོལ་ཕྱིན་སོགས་མདོ་སྡེ་གསུངས། ཞེས་བྱ་བ་ནི་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་རྣམས་སངས་རྒྱས་ཉིད་ཐོབ་པར་མཛད་པའི་སླད་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ཐེག་པ་ཆེན་པོའི་མདོ་སྡེ་གསུངས་པ་སྟེ། ཐེག་པ་ཆེན་པོའི་མདོ་སྡེ་ནི་བྱང་ཆུབ་སེམས་དཔའ་འཇིག་རྟེན་སྣང་བར་མཛད་པ་དང༌། གཞན་གྱི་དོན་ལ་མཁས་པ་རྣམས་ཀྱི་ཆེད་ཡིན་པའི་ཕྱིར་ཏེ། དེས་ནི་དེ་བཞིན་གཤེགས་པའི་གསུང་རབ་ཀྱི་ཚུལ་བསྟན་ཏོ། །ཞེས་དང༌།

བཞི་པ། སངས་རྒྱས་ཀྱིས་དངོས་སུ་ལུང་བསྟན་པའི་འཕགས་མཆོག་ཀླུ་སྒྲུབ་ཀྱིས་ཐེག་པ་ཆེན་པོའི་དྲང་བའི་དོན་དང་། ངེས་པའི་དོན་རྣམས་ཚུལ་ཇི་ལྟ་བ་བཞིན་དུ་གསལ་བར་སྟོན་པའི་ཆེ་བ་གསུངས་པ་ལ། ཚུལ་གསལ་བར་སྟོན་པ་ན། །ཞེས་བྱ་བ་ནི་སློབ་དཔོན་མཁས་པ་ཀླུ་སྒྲུབ་གྱི་ཞལ་སྔ་ནས། བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་མདོ་སྡེ་གསུངས་པའི་ཚུལ་དྲང་བའི་དོན་དང་ངེས་པའི་དོན་ཡང་དག་པ་ཇི་ལྟ་བ་བཞིན་དུ་གསལ་བར་སྟོན་པའི་ཚེ་ན་སྟེ། སློབ་དཔོན་གྱི་ཞལ་སྔ་ནས་ནི་བདེ་བར་གཤེགས་པ་ཡོངས་སུ་མྱ་ངན་ལས་འདས་པའི་འོག་ཏུ་སངས་རྒྱས་ཀྱིས་བསྟན་པའི་ཚུལ་གསལ་བར་སྟོན་པ་ཡིན་པའི་ཕྱིར་ཏེ། དེ་ལྟར་ཡང་འཕགས་པ་ལང་ཀར་གཤེགས་པའི་མདོ་ལས^[4]།

བདེ་གཤེགས་མྱ་ངན་འདས་འོག་ཏུ། །ཚུལ་རྣམས་འཛིན་པར་འགྱུར་བ་སྟེ། །

དུས་དག་འདས་ནས་འབྱུང་བ་ནི། །བློ་གྲོས་ཆེན་པོ་ཁྱོད་ཤེས་བྱོས། །

ལྷོ་ཕྱོགས་བེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །

དེ་མིང་ཀླུ་ཞེས་བོད་པ་སྟེ། །ཡོད་དང་མེད་པའི་ཕྱོགས་འཇིག་པ། །

ང་ཡི་ཐེག་པ་འཇིག་རྟེན་དུ། །བླ་མེད་ཐེག་ཆེན་རབ་བཤད་ནས། །

རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོ་འོ། །

ཞེས་གསུངས་པ་དང༌། འཕགས་པ་སྤྲིན་ཆེན་པོའི་མདོ་ལས་^[5]ཀྱང༌། ལིཙྪ་བཱི་གཞོན་ནུ་འཇིག་རྟེན་ཐམས་ཅད་ཀྱིས་མཐོང་ན་དགའ་བ་ལུང་བསྟན་པ་ལས་ང་ཡོངས་སུ་མྱ་ངན་ལས་འདས་ནས་འདི་རྒྱལ་པོ་མཐར་འགྲོ་ཞོན་གྱི་དུས་ན། དགེ་སློང་ཀླུ་ཞེས་བྱ་བར་གྱུར། ངའི་བསྟན་པ་གསལ་བར་བྱས་ཏེ། རིམ་གྱིས་འཇིག་རྟེན་གྱི་ཁམས་དང་བའི་འོད་ཅེས་བྱ་བར་དེ་བཞིན་གཤེགས་པ་ཡེ་ཤེས་འབྱུང་གནས་འོད་ཅེས་པར་འགྱུར་རོ་ཞེས་ལུང་བསྟན་པའི་ཕྱིར་ཏེ། དེས་ནི་སློབ་དཔོན་གྱི་ཞལ་སྔ་ནས་ཀྱི་ཆེ་བ་ཉིད་བསྟན་ཏོ། །ཞེས་དང༌།

ལྔ་པ། ས་དང་པོ་རབ་ཏུ་དགའ་བ་བརྙེས་པའི་ཀླུ་སྒྲུབ་ཀྱིས་ཐོག་མར་ཡུམ་ཤེར་ཕྱིན་གྱི་དོན་ཟབ་མོ་རང་ཉིད་ཀྱིས་ཐུགས་སུ་ཆུད་ནས། དེ་ནས་གཞན་ལའང་དེ་དེ་བཞིན་དུ་གསུངས་པས། རང་གཞན་གྱི་དོན་ཕུན་སུམ་ཚོགས་པ་རབ་ཀྱི་མཐར་ཕྱིན་པའི་མཛད་པ་གསུངས་པ་ལ། ཐུབ་དབང་སྲས་པོ་ཀླུ་སྒྲུབ་གསུངས་པ། ཞེས་བྱ་བ་ནི་ཐུབ་པའི་དབང་པོས་སངས་རྒྱས་བཅོམ་ལྡན་འདས་ཀྱི་སྲས་བྱང་ཆུབ་སེམས་དཔའི་ས་དང་པོ་རབ་ཏུ་དགའ་བ་བརྙེས་པ་སློབ་དཔོན་འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱིས་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་མདོ་སྡེ་ལས་གསུངས་པའི་ཚུལ་གསལ་བར་སྟོན་པ་ནི་ཉིད་ཀྱིས་ཇི་ལྟར་ཐུགས་སུ་ཆུད་པའི་དེ་ཁོ་ན་གཞན་ལ་ཡང་དེ་བཞིན་དུ་གསུངས་པ་སྟེ། སློབ་དཔོན་གྱི་ཞལ་སྔ་ནས་ནི་བདག་དང་གཞན་གྱི་དོན་སུམ་ཚོགས་པ་རབ་ཀྱི་མཐར་ཕྱིན་པ་བླ་ན་མེད་པ་དད་པ་མཆོག་གིས་སྒྲུབ་པར་མཛད་པ་ཡིན་པའི་ཕྱིར་ཏེ། དེས་ནི་སློབ་དཔོན་གྱི་ཞལ་སྔ་ནས་ཀྱིས་མཛད་པ་བསྟན་ཏོ། །ཞེས་དང༌།

དྲུག་པ། སློབ་དཔོན་ཀླུ་སྒྲུབ་ཀྱིས་མཛད་པའི་གཞུང་མང་པོ་ཡོད་པ་རྣམས་ཀྱི་ནང་ནས་དཔེ་ཚད་ཆེ་ཤོས་མ་ཡིན་ཡང༌། ཟབ་མོ་སྟོང་པ་ཉིད་ཀྱི་དོན་གཏན་ལ་ཕབ་པའི་རིགས་པ་རྫོགས་པར་བསྟན་པའི་ཆ་ནས་གཙོ་བོར་གྱུར་པ་ནི། དབུ་མའི་བསྟན་བཅོས་ཚིག་ལེའུར་བྱས་པ་ཤེས་རབ་ཅེས་བྱ་བ་རབ་བྱེད་ཉེར་བདུན་དང༌། ཤླཽ་ཀ་བཞི་བརྒྱ་བཞི་བཅུ་རྩ་དགུ་ཡོད་པ་ཞིག་མཛད་དོ་ཞེས་གསུངས་པ་ལ། དབུ་མའི་བསྟན་བཅོས་གང་ཡིན་པ། །ཞེས་བྱ་བ་ནི་ཐུབ་དབང་སྲས་པོ་ཀླུ་སྒྲུབ་ཀྱིས་གསུངས་པ་རྣམ་པ་མང་པོ་དག་གི་ནང་ནས་དབུ་མའི་བསྟན་བཅོས་ཤེས་རབ་ཅེས་བྱ་བ་རབ་ཏུ་བྱེད་པ་ཉི་ཤུ་བདུན་དང༌། ཚིག་ལེའུར་བྱས་པ་བཞི་བརྒྱ་བཞི་བཅུ་དགུ་པ་འདི་གང་ཡིན་པ་སྟེ། སློབ་དཔོན་ལེགས་ལྡན་འབྱེད་ཉིད་ཀྱིས་དེའི་འགྲེལ་པ་ཤེས་རབ་སྒྲོན་མ་ཞེས་བྱ་བ་འདི་བྱས་པའི་ཚུལ་སྟོན་པར་འདོད་པའི་ཕྱིར་ཏེ། དེས་ནི་སློབ་དཔོན་གྱི་ཞལ་སྔ་ནས་ཀྱིས་གསུངས་པ་དབུ་མའི་བསྟན་བཅོས་ཤེས་རབ་ཅེས་བྱ་བ་འདི་ཉིད་ཀྱི་གཞུང་བསྟན་ཏོ། །ཞེས་དང༌།

བདུན་པ། བསྟན་བཅོས་དེའི་དོན་ཟབ་རྣམས་ཆེས་ཆེར་གསལ་བར་བྱ་བའི་སླད་དུ་དེའི་རྣམ་པར་བཤད་པའི་འགྲེལ་བ་ཤེས་རབ་སྒྲོན་མ་འདི་བྱས་པ་ཡིན་ནོ་ཞེས་གསུངས་པ་ལ། དེའི་རྣམ་བཤད་ཅེས་བྱ་བ་ནི་དབུ་མའི་བསྟན་བཅོས་ཤེས་རབ་ཅེས་བྱ་བ་དེའི་རྣམ་པར་བཤད་པ་སྟེ། འདི་ནི་དེའི་འགྲེལ་པ་ཡིན་པའི་ཕྱིར་ཏེ། དེས་ནི་གཞུང་འདི་དེའི་རྣམ་པར་བཤད་པ་ཡིན་པར་བསྟན་ཏོ། ཞེས་དང༌།

བརྒྱད་པ། རྣམ་བཤད་འདིའི་ངོ་བོ་ནི། ལྟ་བ་ངན་པའི་དྲ་བ་ཞི་བར་བྱེད་པའི་ནུས་པ་དང་ལྡན་པ་ཡིན་ནོ་ཞེས་གསུངས་པ་ལ། ལྟ་ངན་ཞི་བྱེད་ཅེས་བྱ་བ་དེ་ནི་རྣམ་པར་བཤད་པ་འདིའི་ངོ་བོ་ཉིད་ཡིན་ཏེ། འདི་ནི་ལྟ་བ་ངན་པའི་དྲ་བ་ཞི་བར་བྱེད་པ་དང་ལྡན་པ་ཡིན་པའི་ཕྱིར་ཏེ། དེས་ནི་འགྲེལ་པ་འདིའི་ངོ་བོ་ཉིད་བསྟན་ཏོ། །ཞེས་དང༌།

དགུ་པ། རྣམ་པར་བཤད་པའི་འགྲེལ་པ་འདིའི་མིང་ནི། སློབ་དཔོན་ཀླུ་སྒྲུབ་ཀྱི་དབུ་མའི་བསྟན་བཅོས་རྩ་བ་ཤེས་རབ་ཅེས་པ་དེ་གསལ་བར་བྱེད་པའི་སྒྲོན་མ་ལྟ་བུ་ཡིན་པས་ན་ཤེས་རབ་སྒྲོན་མ་ཞེས་བྱའོ་ཞེས་གསུངས་པ་ལ། ཤེས་རབ་སྒྲོན་མ་ཞེས་བྱ་བ་ནི་དེའི་རྣམ་པར་བཤད་པ་ལྟ་བ་ངན་པ་ཞི་བར་བྱེད་པ་འདིའི་མིང་ཡིན་ཏེ། འདི་ནི་སློབ་དཔོན་གྱི་ཞལ་སྔ་ནས་ཀྱིས་དབུ་མའི་བསྟན་བཅོས་ཤེས་རབ་ཅེས་བྱ་བ་མཛད་པ་དེ་གསལ་བར་བྱེད་པའི་སྒྲོན་མ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་སྒྲུབ་པར་བྱེད་པ་ཡིན་པའི་ཕྱིར་ཏེ། དེས་ནི་འགྲེལ་པ་འདིའི་མིང་བསྟན་ཏོ། །ཞེས་དང༌།

བཅུ་པ། རྣམ་བཤད་འདི་ནི་ལེགས་ལྡན་འབྱེད་བདག་གིས། གང་དག་ཤེར་ཕྱིན་གྱི་བརྗོད་བྱ་ཟབ་མོ་དབུ་མའི་དོན་དེ་ཀླུ་སྒྲུབ་ཀྱི་དབུ་མ་རྩ་བ་ཁོ་ན་ལ་བརྟེན་ནས་རྟོགས་མི་ནུས་པ་རྣམས་ཀྱིས། རྣམ་བཤད་འདི་ལ་བརྟེན་ནས་བདེ་བླག་ཏུ་རྟོགས་པར་བྱ་བའི་ཕྱིར་དུ་བྱས་སོ་ཞེས་གསུངས་པ་ལ། བདག་གིས་བྱས། །ཞེས་བྱ་བ་ནི་སློབ་དཔོན་ལེགས་ལྡན་འབྱེད་ཀྱིས་བྱས་པའི་ཚུལ་བསྟན་པ་སྟེ། སློབ་དཔོན་གྱི་ཞལ་སྔ་ནས་ཀྱིས་ཚིག་ལེའུར་བྱས་པ་དག་ཁོ་ནས་རྗེས་སུ་དཔག་པ་དང༌། སུན་དབྱུང་བའི་གསལ་བ་དང༌། དེ་ཁོ་ན་དག་བསྟན་པ་དང༌། ལྟ་བ་ངན་པའི་དྲ་བ་ཞི་བར་བྱེད་པ་དང་ལྡན་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་བཀའ་སྩལ་མོད་ཀྱི། ཚངས་པ་མཚུངས་པར་སྤྱོད་པ་རྣམས་ལས་ཁ་ཅིག་གིས་མི་རྟོགས་པས་དེའི་ཕྱིར་དེ་དག་གིས་རྟོགས་པར་བྱ་བར་འདོད་ནས་ལུང་ཇི་ལྟ་བ་བཞིན་དུ་དབུ་མའི་བསྟན་བཅོས་བཤད་པར་བྱས་པའི་ཕྱིར་ཏེ། དེས་ནི་བདག་གིས་བྱས་པའི་ཚུལ་བསྟན་ཏོ། །ཞེས་གསུངས་ཏེ་འདི་དག་ནི་ཀླུ་སྒྲུབ་ཀྱི་ལུང་བསྟན་དང༌། མཛད་པ་དང༌། ཆེ་བའི་ཡོན་ཏན་རྣམས་བརྗོད་པའི་རྒྱ་གཞུང་སྔ་གྲས་དང་ཁུངས་ལྡན་ཤ་སྟག་ཡིན་ལ། ཀླུ་ཡུལ་ནས་ཤེར་ཕྱིན་གདན་དྲངས་ཏེ་སླར་རྒྱ་གར་འཕགས་པའི་ཡུལ་དུ་ཕེབས་ནས། མུ་སྟེགས་ཀྱི་རྒོལ་བ་ལ་སོགས་པའི་ལོག་སྨྲ་རྣམས་ཚར་བཅད་པ་དང༌། ཡུམ་ཤེར་ཕྱིན་གྱི་དོན་ཕྱིན་ཅི་མ་ལོག་པར་བསྟན་ཏེ་སྐལ་བ་དང་ལྡན་པ་རྣམས་རྗེས་སུ་བཟུང་བའི་སྒོ་ནས་བསྟན་པ་ཆེས་ཆེར་སྤེལ་བའི་ཚུལ་རྣམས་གསལ་བར་གསུངས་པས། ལོ་རྒྱུས་ཀྱི་རིན་ཐང་ཤིན་ཏུ་ཆེ་ཡང༌། ཀློག་པ་པོ་ཕལ་པ་ཞིག་གིས་གཞུང་ཆེན་འདི་དག་ཀློག་པའི་གོ་སྐབས་ནི་ཤིན་ཏུ་ཕྲ་ཞིང༌། གཞུང་རེ་གཉིས་མིག་ལམ་དུ་སོན་ཀྱང་འདི་རིགས་ལ་དམིགས་གསལ་གྱི་དོ་སྣང་སླེབས་པ་དང་། གཞུང་མང་གཅིག་ཏུ་བསྒྲིགས་ནས་གོ་རིམ་བཞིན་དུ་གཏན་ལ་ཕབ་པ་ནི་ཅུང་ཟད་དཀའ་བས། ཡི་གེ་ལ་མ་འཛེམ་པར་ལུང་རྣམས་རྫོགས་པ་བཤུས་པ་ཡིན་ནོ།།^[6]

གཞན་ཡང་སློབ་དཔོན་ཝེན་ཚེགས་ (613-695) ཀྱིས་མཛད་པའི་འཕགས་པ་དགོངས་པ་ཟབ་མོ་ངེས་པར་འགྲེལ་པའི་མདོ་རྒྱ་ཆེར་འགྲེལ་པ་ལས^[7]། གཞལ་མེད་ཁང་ཡོངས་སུ་དག་པར་ངོ་བོ་ཉིད་གསུམ་རྣམ་པར་ཕྱེ་བ་ཡིན་ཏེ། དེའི་ཕྱིར་འཕགས་པ་བྱམས་པ་ལས་དོན་དམ་པ་དང་། ཀུན་རྫོབ་གཉིས་ཀ་ཡོད་པར་རྣམ་པར་གཞག་ལ། སྐྱེས་བུ་ཆེན་པོ་ཀླུ་སྒྲུབ་ཀྱིས་ནི་སྟོང་པ་དང་། ཡོད་པ་གཉིས་ཀ་ཡང་ཡོངས་སུ་གསལ་བ་ཡིན་ནོ། །ཞེས་དང་། ཡང་དེ་ཉིད་ལས^[8]། འདིར་ཐེག་པ་ཆེན་པོའི་གཞུང་དང་སྦྱར་ན། དེ་ཡང་མི་མཐུན་པར་སྨྲ་བ་རྣམ་པ་གཉིས་ཡོད་དོ། །དང་པོ་ནི་ནཱ་གརྫུ་ནའི་གཞུང་སྟེ། ཆོས་ཀྱི་རྣམ་གྲངས་མང་ཉུང་ངེས་པར་བསྟན་པའི་བསྟན་བཅོས་མེད་དེ། ཤེས་རབ་ཀྱི་ཕ་རོལ་ཏུ་ཕྱིན་པའི་འགྲེལ་པ་ལས་ཆོས་རྣམས་ཀྱི་མཚན་ཉིད་རྣམ་པར་བཤད་པ་ཡང་ཕལ་ཆེར་ཐམས་ཅད་ཡོད་པར་སྨྲ་བར་འདོད་པ་དག་དང་མཐུན་པར་ཆོས་ནི་མདོར་བསྡུ་ན་བདུན་བརྒྱ་དྲུག་ཅུ་རྩ་གཅིག་ཡོད་པར་བསྟན་ཏེ། དེ་ལྟར་བསྟན་པ་ཡང་ཐམས་ཅད་ཡོད་པར་སྨྲ་བའི་གཞུང་གིས་ཆོས་བདུན་ཅུ་རྩ་ལྔར་འདོད་པ་དང་། གནས་པ་བཅུ་བཤད་པའི་བསྟན་བཅོས་ལས་མཚུངས་པར་ལྡན་པ་མ་ཡིན་པའི་ཆོས་བདུན་བརྒྱ་ཡོད་པར་རྣམ་པར་གཞག་པའི་ཕྱིར་མཚུངས་པར་ལྡན་པ་མ་ཡིན་པའི་ཆོས་བཅུ་བཞི་སྟོན་ཏེ། མཚུངས་པར་ལྡན་པ་མ་ཡིན་པའི་བདུན་བརྒྱས་བསྣན་ན། ཆོས་བདུན་བརྒྱ་དྲུག་ཅུ་རྩ་གཅིག་ཏུ་འགྱུར་རོ། །ཞེས་ཀྱང་བྱུང་ངོ་།།  །།

 

དཔྱད་གཞིའི་ལུང་ཁུངས་ཡིག་ཆ།

^[1]  སློབ་དཔོན་སྤྱན་རས་གཟིགས་བརྟུལ་ཞུགས་ནི། ལྷོ་ཕྱོགས་ཡུལ་ས་ཀེ་ཏ་རུ་བྲམ་ཟེའི་རིགས་སུ་སྐུ་འཁྲུངས། དེ་ཡང་ལ་ལས་རྒྱལ་པོ་དེ་ཝ་པཱ་ལའི་དུས་སུ་བྱོན་པས་དུས་རབས་ ༨ པའི་མཇུག་ཙམ་དུ་བྱོན་ཟེར། རང་དང་གཞན་གྱི་གྲུབ་མཐའ་ལ་མཁས་པར་གྱུར་ཏེ་དབུ་མ་རྩ་བའི་འགྲེལ་པ་ཤེས་རབ་སྒྲོན་མའི་རྒྱ་ཆེར་འགྲེལ་པ་མཛད་དོ།།

^[2]  བསྟན་འགྱུར་དཔེ་བསྡུར་མ། དབུ་མ། ༼ཟ༽ དེབ་ཨང་ ༥༩ པ། ༡༩༩༤ ལོ། ཤོག་གྲངས་ ༡༧༤༧

^[3]  བསྟན་འགྱུར་དཔེ་བསྡུར་མ། དབུ་མ། ༼ཟ༽ དེབ་ཨང་ ༥༩ པ། ༡༩༩༤ ལོ། ཤོག་གྲངས་ ༡༧༤༨

^[4]  བཀའ་འགྱུར་དཔེ་བསྡུར་མ། མདོ་སྡེ། ༼ཅ༽ དེབ་ ༤༩ པ། ༡༩༩༤ ལོ། ཤོག་གྲངས་ ༤༠༦

^[5]  བསྟན་འགྱུར་དཔེ་བསྡུར་མ། དབུ་མ། ༼འ༽ དེབ་ཨང་ ༦༠ པ། ༡༩༩༤ ལོ། ཤོག་གྲངས་ ༦༦༠

^[6]  ཀླུ་སྒྲུབ་ཀྱི་རྣམ་ཐར་ལུང་རིགས་རྒྱ་མཚོའི་གཏེར་མཛོད། མི་རིགས་དཔེ་སྐྲུན་ཁང་། ༢༠༡༩ ལོ། ཤོག་གྲངས་ ༡༣༦

^[7]  བསྟན་འགྱུར་དཔེ་བསྡུར་མ། མདོ་སྡེ། ༼ཏི༽ དེབ་ཨང་ ༦༨ པ། ༢༠༠༨ ལོ། ཤོག་གྲངས་ ༤

^[8]  བསྟན་འགྱུར་དཔེ་བསྡུར་མ། མདོ་སྡེ། ༼ཏི༽ དེབ་ཨང་ ༦༨ པ། ༢༠༠༨ ལོ། ཤོག་གྲངས་ ༡༧

 

ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཀ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༤༤༧ ནས་ ༤༥༤ བར་གསལ་བ་ལས་བཏུས།