དཔལ་ནཱ་ལེནྡྲ། བྱོན་པ་ལེགས།
༄༅། །ཕྱི་ལོ་ ༢༠༡༩ ཟླ་བ་ ༥ ཚེས་ ༡༧ ཉིན་ཐེག་ཆེན་ཆོས་གླིང་གཙུག་ལག་ཁང་དུ་བོད་གཞུང་མང་གཞིས་བྱེས་ཆོལ་གསུམ་ཆོས་བརྒྱུད་དང་བཅས་པ་དང་ལྷ་མི་ཡོངས་ནས་བརྟན་བཞུགས་བསྟར་འབུལ་སྐབས་སྩལ་བའི་བཀའ་སློབ་ལས་བཏུས།
དེ་ནས་ངོས་ལ་སྐྱེས་རབས་གོང་མའི་སྐད་ཆ་བཤད་རྒྱུ་མེད། འོན་ཀྱང་ངོས་རང་ཚེ་འདིར།
སྟོན་དེའི་རྗེས་སུ་རབ་ཏུ་བྱུང་གྱུར་ཏེ། །རྒྱལ་བའི་གསུང་ལ་སྦྱངས་པ་མི་དམན་ཞིང༌།།
རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག།།དྲང་སྲོང་ཆེན་པོ་དེ་ལ་དེ་ལྟར་གུས།།
ཞེས་རྗེ་རིན་པོ་ཆེས་གསུངས་པ་ལྟར་ཆགས་ཡོད། སྟོན་དེའི་རྗེས་སུ་རབ་ཏུ་བྱུང་ཞིང་། སྟོན་པའི་གསུང་ལ་སློབ་སྦྱོང་དགའ་རབ་བྱས་ཡོད་ལ། སྟོན་པའི་གསུང་ལ་སློབ་སྦྱོང་བྱེད་པའི་དོ་སྣང་ཧ་ཅང་ཐུགས་ཆེ་སླེབས་སྐབས་པཎ་གྲུབ་བཅུ་བདུན་ལ་ཐུན་མོང་མ་ཡིན་པའི་དད་པ་སྐྱེས་པ་ཞིག་ཆགས་ཡོད། དེ་སྔ་བོད་ལ་རྒྱན་དྲུག་མཆོག་གཉིས་ཀྱི་ནང་དུ་ཟླ་བ་གྲགས་པ་དང་། ཞི་བ་ལྷ། འཕགས་པ་གྲོལ་སྡེ། སློབ་དཔོན་སེངྒེ་བཟང་པོ་སོགས་ཚུད་མེད། དེ་དག་ངེས་པར་དུ་ཚུད་དགོས་ཀྱི་འདུག་སྙམ་སྟེ། པཎ་གྲུབ་བཅུ་བདུན་གྱི་མཚན་མཐོང་ཡར་བཏེགས་ན་ངོས་ལ་གསོལ་རས་རག་རྒྱུ་གང་ཡང་མེད་ཀྱང་། མཁས་པ་འདི་དག་གི་གཞུང་ལ་བལྟས་ནས་སངས་རྒྱས་ཀྱི་ཆོས་འཛམ་གླིང་འདིར་གོང་དུ་འདེགས་ཐུབ་པ་ཞིག་ཡོང་ཐུབ་ཀྱི་འདུག །དེར་བརྟེན་ངོས་ནས་ཆེན་པོ་ཤེས་ཀྱི་མེད་ཀྱང་། གཞུང་ཆེན་པོ་འདི་དག་ལ་སློབ་སྦྱོང་བྱེད་པར་ཧ་ཅང་དོ་སྣང་བྱེད་ཀྱི་ཡོད། དེང་སྐབས་ཀྱང་དུས་ཚོད་ཡོད་སྐབས་གཞུང་ཆེན་མོ་འདི་དག་ལ་ཅུང་ཟད་མིག་བཤེར་རྒྱག་པ་དང་མཇལ་གྱི་ཡོད། དེར་བརྟེན།
སྟོན་དེའི་རྗེས་སུ་རབ་ཏུ་བྱུང་གྱུར་ཏེ། །རྒྱལ་བའི་གསུང་ལ་སྦྱངས་པ་མི་དམན་ཞིང༌།།
རྣལ་འབྱོར་སྤྱོད་ལ་བརྩོན་པའི་དགེ་སློང་ཞིག།།
གསུངས་པ་ལྟར་ཆུང་ངུའི་སྐབས་ནས་དབུ་མའི་ལྟ་བའམ་སྟོང་ཉིད་ཀྱི་ལྟ་བར་ངོས་རང་དོ་སྣང་ཡོད། དེ་ཡང་ཕལ་ཆེར་རང་ལོ་བཅུ་གཉིས་བཅུ་གསུམ་སྐབས་ནས་ངོས་རང་སྟོང་ཉིད་ཀྱི་ལྟ་བར་དམིགས་བསལ་གྱིས་དོ་སྣང་ཡོད། དེ་དག་གི་ཐོག་ཏུ་བསམ་བློ་མང་པོ་བཏང་བ་རེད། གཙོ་བོ་རྒན་དངོས་གྲུབ་ཚོགས་གཉིས་ལ་གོ་བསྡུར་ཞུ་བ་སོགས་མང་པོ་བྱས་ཡོད།[1]
[1] https://gyalwarinpoche.com/news/2019/2019-05-17