དཔལ་ནཱ་ལེནྡྲ། བྱོན་པ་ལེགས།
༄༅། །ཕྱི་ལོ་ ༢༠༡༧ ཟླ་བ་ ༣ ཚེས་ ༩ ཉིན་བཞུགས་སྒར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་སྩལ་པའི་བཀའ་སློབ་ལས་བཏུས།
རིག་གཞུང་གཅེས་སྐྱོང་བྱ་རྒྱུ་ནི། བོད་མི་རིགས་ཀྱི་རིག་གཞུང་ཞིག་ཡིན་པ་དང་། བོད་མི་རིགས་ཀྱི་རིག་གཞུང་དེ་དག་ལོ་སྟོང་ཕྲག་ལྷག་དང་། གཅིག་བྱས་ན་ལོ་ངོ་ཉིས་སྟོང་ལྷག་གི་རིང་ནས་ཡོང་བ་ཞིག་ཆགས་ཡོད། ཐོག་མར་ནང་ཆོས་མ་དར་གོང་ང་ཚོར་རིག་གནས་ཡོད་ལ། ཞང་ཞུང་བོན་གྱི་རིག་གཞུང་ཡང་ཡོད། སྐབས་དེར་གསོ་བ་རིག་པ་ཡང་ཕལ་ཆེར་ཡོད་འདུག །
དེ་དག་གིས་མཚོན་བོད་ཀྱི་རིག་གཞུང་དེ་དག་ལོ་ངོ་སྟོང་ཕྲག་ཕྱིན་པའི་རིག་གཞུང་ཞིག་ཆགས་ཡོད། མི་རབས་མང་པོ་ཞིག་གིས་རིག་གནས་གསར་པ་རྣམས་ཡར་རྒྱས་བཏང་ཞིང་། ལྷག་པར་རྒྱ་གར་ནས་ཐད་ཀར་མཁན་ཆེན་ཞི་བ་འཚོ་གདན་ཞུ་གནང་སྟེ། སངས་རྒྱས་པའི་ཆོས་གདན་དྲངས་པ་དང་། སངས་རྒྱས་པའི་ཆོས་ནི། སྨོན་ལམ་བརྒྱབ་ནས་བསྡད་པ་གཅིག་པུའི་སྐད་ཆ་མིན་པར་ལྟ་གྲུབ་དང་འབྲེལ་བ་ཞིག་ཆགས་ཡོད། དེར་བརྟེན་མཁན་ཆེན་ཞི་བ་འཚོ་ནི། དབུ་མའི་གྲུབ་མཐའ་སྨྲ་བ་ཞིག་ཡིན་ལ། ཁོང་ཇི་ལྟ་བུ་ཞིག་ཡིན་པ་ནི་དབུ་མ་དང་ཚད་ཆེན་ལ་བལྟས་ན་ཤེས་གསལ་ཡིན། ཁོང་གིས་དངོས་སུ་ཞལ་ཆེམས་གནང་སྟེ་མ་འོངས་པར་དཀའ་ངལ་འཕྲད་ན་ངའི་དགེ་ཕྲུག་ཀ་མ་ལ་ཤཱི་ལ་གདན་དྲོངས་ཞེས་གསུངས་པ་ལྟར་ཀ་མ་ལ་ཤཱི་ལ་བོད་ལ་ཕེབས་ཤིང་། ཁོང་གིས་མཛད་པའི་དབུ་མ་སྣང་བ་ནི། ད་ལྟའང་གཞུང་ལུགས་ཧ་ཅང་གལ་ཆེན་པོ་ཞིག་ཆགས་ཡོད། དེ་བཞིན་ཚད་ཆེན་གྱི་འགྲེལ་པ་བསྟན་འགྱུར་ནང་ལ་པོ་ཏི་ཆུང་བ་གཉིས་འདུག །བོད་རང་གི་ས་གནས་ས་ཐོག་ལ་ཕེབས་ནས་སྒོམ་རིམ་མཛད་ཡོད། མཁས་པ་ཇི་ལྟ་བུ་ཞིག་ཡོད་མེད་དང་། འདུལ་བ་འཛིན་པ་དང་མཁས་གྲུབ་གཉིས་ལྡན་ཇི་ལྟ་བུ་ཡིན་མིན་དེ་དག་ལས་ཤེས་ཐུབ།
ཆབ་སྲིད་ཀྱི་ཐོག་ལ་ང་ཚོར་ཁུངས་ཆེན་པོ་ཡོད་པ་མ་རེད། ཆེ་ས་མ་མཐོང་བར་ཆུང་སར་མགོ་འཁོར་ནས་བསྡད་པར་མ་ཟད། ལུང་ཆུང་རེ་ལ་དཔོན་ཆུང་རེ་དང་། ལུང་ཆུང་རེ་ལ་བླ་མ་རེ་བྱས་ཏེ་སོ་སོའི་ལུང་ཆུང་དེ་དག་ལ་མགོ་འཁོར་ནས་བསྡད་པ་ལས། སྔར་ཆོས་རྒྱལ་མེས་དབོན་རྣམ་གསུམ་སྐབས་ཀྱི་བོད་སྤྱི་ཇི་ལྟ་བུ་ཞིག་ཡིན་པ་ལ་བསམ་བློ་མེད་པར་ཕྱིན་པ་རེད། ཡིན་ནའང་། མཁན་ཆེན་ཞི་འཚོ་ཡབ་སྲས་ཀྱིས་ཆོས་དང་རིག་གཞུང་བོད་ལ་ལག་སྤྲོད་གནང་བ་དེ་དག་ང་ཚོ་བོད་ཀྱི་མེས་པོ་དག་གིས་ཧུར་ཐག་འབད་ཐག་གིས་འཛིན་སྐྱོང་གནང་འདུག །མཁན་ཆེན་ཞི་བ་འཚོ་ནི། ནཱ་ལེནྡྲའི་མཁས་པ་དང་། ཀླུ་སྒྲུབ་ཡབ་སྲས་སོགས་ཀྱི་རྗེས་འབྲང་ཆགས་ཡོད། དཔལ་ནཱ་ལེནྡྲའི་མཁས་པའི་དབང་པོ་དེ་སྔ་རྒྱན་དྲུག་མཆོག་གཉིས་བཤད་བཞིན་པ་དང་། བར་སྐབས་ནས་ངོས་ཀྱིས་པཎ་གྲུབ་བཅུ་བདུན་ཞེས་བརྗོད་བཞིན་པ་དེ་དག་ལོ་རྒྱུས་ནང་བླ་མ་རྩ་ཆེན་པོ་རེད་ཅེས་བརྗོད་པ་ཙམ་མིན་པར། བསྟན་འགྱུར་ནང་གི་བུདྡྷ་པཱ་ལི་ཏ་དང་། དེ་བཞིན་དབུ་མ་འཇུག་པ་རྩ་འགྲེལ་སོགས་ལ་ང་ཚོས་ལྟ་བཞིན་ཡོད། དེར་བརྟེན་ནཱ་ལེནྡྲའི་རྒྱན་དྲུག་མཆོག་གཉིས་ཞེས་ནམ་རྒྱུན་བཤད་བཞིན་པའི་སྟེང་མཁས་པའི་དབང་པོ་གཞན་རྣམས་ཀྱང་བསྣོན་པ་བརྒྱབ་སྟེ་པཎ་གྲུབ་བཅུ་བདུན་བཟོས་པ་ཡིན།
པཎ་གྲུབ་བཅུ་བདུན་གྱིས་བརྩམས་པའི་ལེགས་བཤད་དེ་དག་ལ་ང་ཚོས་སློབ་སྦྱོང་བྱེད་ཀྱི་ཡོད་ཅིང་། སློབ་སྦྱོང་བྱེད་པ་དེ་ཡང་ཆོ་ག་འདོན་པ་ལྟ་བུ་དང་། རྔ་ཇི་ལྟར་རྡུང་བ་དང་སྦུབ་ཇི་ལྟར་དཀྲོལ་དགོས་པ་ལྟ་བུའི་སྐད་ཆ་མིན་པར་སེམས་ཇི་ལྟར་འདུལ་ཚུལ་གསུངས་ཡོད། སེམས་འདུལ་བ་དེ་ཡང་སྨོན་ལམ་བརྒྱབ་ནས་འདུལ་དགོས་ཞེས་གསུངས་མེད། རང་གཞན་ཚང་མ་སྡུག་བསྔལ་མི་འདོད་ཅིང་། བདེ་བ་འདོད་པ་ཤ་སྟག་ཡིན་ལ། བདེ་སྡུག་གི་རྒྱུ་གང་གིས་བྱེད་པ་དང་། ཕྱི་རོལ་ཁོ་ན་ལས་ཡོང་བ་ཞིག་མིན་པར། གཙོ་བོ་ནང་སེམས་རྒྱུད་ནས་བདེ་བ་དང་སྡུག་བསྔལ་ཡོང་བཞིན་ཡོད། མིའི་རྣམ་དཔྱོད་བེད་སྤྱོད་ཀྱིས་དེ་དག་ལ་ཞིབ་འཇུག་བྱས་ཏེ་སེམས་མ་སྐྱིད་པ་བཟོ་མཁན་གྱི་ཆ་དེར་གཞི་རྟེན་ཅི་ཞིག་འདུག །སྨོན་ལམ་བརྒྱབ་ནས་བསྡད་པ་མ་ཡིན་པར་སེམས་མ་སྐྱིད་པ་གང་ནས་ཡོང་བཞིན་པ་ལ་བརྟག་དཔྱད་བྱས་ཏེ་སེམས་མ་འདུལ་བའི་རྒྱུ་རྐྱེན་དེ་ལ་འགྱུར་བ་གཏོང་རྒྱུ་དང་། སེམས་འདུལ་བའི་རྒྱུ་རྐྱེན་དེ་དག་ཇི་ལྟར་ཡོང་བཞིན་པ་ཤུགས་ཆེ་རུ་གཏོང་རྒྱུ་རིགས་པའི་རྒྱུ་མཚན་གྱི་ཐོག་ནས་འགྲོ་བཞིན་ཡོད། དེར་བརྟེན་དཔལ་ནཱ་ལེནྡྲའི་མཁས་པ་གཙོ་བོའི་གྲས་སློབ་དཔོན་ཕྱོགས་གླང་དང་། དཔལ་ལྡན་ཆོས་གྲགས་སོགས་ཀྱིས་རིགས་པ་འགོད་སྟངས་ཇི་ལྟར་བྱེད་དགོས་པའི་སྐོར་ལ་མཐོང་བ་མངོན་གྱུར་ལ་སྒྲུབ་བྱེད་བཀོད་དགོས་དོན་མེད། ཅུང་ཟད་ལྐོག་གྱུར་གྱི་རིགས་ལ་རིགས་པས་ཇི་ལྟར་སྒྲུབ་ཀྱི་ཡོད་པ་དང་། ཐར་པ་དང་བདེན་འཛིན་གྱི་རྣམ་གཞག་མང་དུ་གསུངས་ཡོད། མདོར་ན། ནང་གི་སེམས་རྒྱུད་འདུལ་བའི་འགྲོ་སྟངས་ལ་དཔྱད་པ་བྱས་ཏེ་འགྲོ་བཞིན་པ་ཞིག་ཆགས་ཡོད།[1]
[1] https://gyalwarinpoche.com/news/2017/2017-03-09