དཔལ་ནཱ་ལེནྡྲ། བྱོན་པ་ལེགས།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལས[1]། ཕྱོགས་གཅིག་ནས་ནང་ཆོས་ནས་གཙོ་བོ་བློ་ཡི་རྣམ་གཞག་དང་བྱེད་ལས་སོགས་ཀྱི་སྐོར་གསུངས་ཡོད་ལ། ཚད་མ་རིག་པ་དང་གཏན་ཚིགས་རིགས་པའི་རྣམ་གཞག་ཀྱང་ཧ་ཅང་ཕྱུག་པོ་ཡོད། དེར་བརྟེན་རྒྱ་གར་འཕགས་ཡུལ་སྤྱི་དང་། ལྷག་པར་དཔལ་ནཱ་ལེནྡྲའི་གཙུག་ལག་སློབ་གྲྭའི་པཎ་གྲུབ་རྣམས་ཀྱིས་ཕྱི་རོལ་པ་རྣམས་རིགས་པའི་ལམ་ནས་ཚར་བཅད་པ་དང་སྦྲགས། ནང་པའི་གཞུང་ལུགས་ཀྱང་ཕྱུག་ཏུ་ཕྱིན་པ་བྱུང་ཡོད།
དེ་མཚུངས་ཁྱེད་རང་ཚོས་ཀྱང་གཞུང་འདྲ་མིན་མང་པོར་གཟིགས་དགོས་ཤིང་། དེ་ལྟར་བྱུང་ན་གཞུང་ལུགས་སྤྱིའི་གོ་བ་ཡག་པོ་ལོན་ཐུབ། དཔལ་ནཱ་ལེནྡྲའི་མཁས་པ་དཔལ་མགོན་འཕགས་པ་ཀླུ་སྒྲུབ་དང་། དཔལ་ལྡན་ཟླ་བ་གྲགས་པ། སློབ་དཔོན་ལེགས་ལྡན་འབྱེད། སློབ་དཔོན་སངས་རྒྱས་བསྐྱངས་སོགས་ཧ་ཅང་མཁས་པ་ཆེན་པོ་དེ་ལྟར་གྲངས་ལས་འདས་པ་བྱོན་ཡོད། མཁས་པ་དེ་དག་གིས་སངས་རྒྱས་ཀྱི་བཀའི་དགོངས་དོན་རྣམས་ལེགས་པར་བཀྲལ་བ་ཙམ་དུ་མ་ཟད། ཐེག་པ་གསུམ་དང་རྒྱུད་སྡེ་བཞིས་བསྡུས་པའི་རྒྱལ་བའི་གསུང་རབ་ཀྱི་དགོངས་དོན་རྣམས་ལུང་ཙམ་ལ་མ་བརྟེན་པར། དཔྱད་གསུམ་རྣམ་པར་དག་པའི་སྒོ་ནས་གཏན་ལ་ཕབ་པའི་ལེགས་བཤད་དེ་དག་དེ་སྔ་ཙམ་མ་ཟད། དེང་སྐབས་དུས་རབས་ཉེར་གཅིག་པའི་ནང་འཚེ་མེད་ཞི་བའི་འཛམ་གླིང་ཞིག་བསྐྲུན་རྒྱུར་ཞབས་འདེགས་རླབས་པོ་ཆེ་སྒྲུབ་ཐུབ་པའི་ནུས་པ་ལྡན་ཡོད། ཅེས་བཀའ་སློབ་སྩལ་ཏོ།།
[1] ཕྱི་ལོ་ ༢༠༡༧ ཟླ་བ་ ༣ ཚེས་ ༡༨ ཉིན་བྷི་ཧཱར་མངའ་སྡེའི་ནཱ་ལེནྡྲ་རྫོང་དུ་རྟེན་གཞི་བྱས་པའི་རྒྱལ་པོའི་ཁབ་ཏུ་ན་ལེནྡྲ་གཙུག་ལག་ཁང་ཆེན་གསར་པའི་ནང་སྩལ་བའི་བཀའ་སློབ་ལས་བཏུས།