དཔལ་ནཱ་ལེནྡྲ། བྱོན་པ་ལེགས།
ང་ཚོ་བོད་ཀྱི་རིག་གཞུང་ནི་ལོ་ངོ་སྟོང་ཕྲག་རིང་ལ་སྤྱིར་སངས་རྒྱས་བཅོམ་ལྡན་འདས་ཀྱི་བཀའ་དང་། ཡང་སྒོས་ནཱ་ལེནྡྲའི་མཁས་པའི་དབང་པོ་རིམ་པར་བྱུང་བ་དག་གི་གཞུང་ལ་བརྟེན་ནས་སེམས་ཀྱི་རྣམ་གཞག་དང་། སེམས་ཁམས་རིག་པའི་སྐོར་ཧ་ཅང་ཞིབ་ཚགས་པོ་རེད། ངོས་ལ་མཚོན་ན་ཆུང་ཆུང་སྐབས་ནས་རིགས་ལམ་ཆུང་ངུ་དང་། འབྲིང་། ཆེན་མོ། དེ་ནས་བློ་རིགས་ལ་བལྟས་པ་དང་། སེམས་དང་སེམས་བྱུང་ལ་སློབ་སྦྱོང་བྱས་ཡོད་པས་ཁོང་ཁྲོ་ཟ་བ་སོགས་རེ་དོགས་ལུ་གུ་རྒྱུད་དུ་ཡོང་དུས་
དེ་དག་ལ་བསམ་བློ་བཏང་བ་དེས་ཧ་ཅང་ཕན་ཐོགས་འདུག དེར་བརྟེན་ང་ཚོ་བོད་ཀྱི་རིག་གཞུང་ནང་ཆོས་ལས་གཞན་བསམ་བློ་གཏོང་སྟངས་དང་སེམས་ཁམས་རིག་པ་ནི་ཧ་ཅང་ཟབ་མོ་རེད། ཅེས་དང་།
ང་ཚོའི་བོད་རྒྱ་དཀར་ནག་གཉིས་ཀྱི་དཀྱིལ་དུ་ཡོད་པ་རེད། ང་ཚོ་ཆོས་རྒྱལ་སྲོང་བཙན་སྒམ་པོའི་སྐབས་ནས་སོ་སོའི་ཡི་གེ་བཟོས་ཏེ་རང་མགོ་ཐོན་པ་ཞིག་ཆགས་ཡོད། མཁན་ཆེན་ཞི་བ་འཚོ་བོད་ལ་ཕེབས་དུས་ཁྱོད་ཚོར་ཡི་གེ་ཡོད་པས་བསྒྱུར་རྒྱུ་མ་གཏོགས་ཡི་གེ་གསར་པ་བཟོ་དགོས་པ་མི་འདུག་ཅེས་བསྒྱུར་རྒྱུ་མགོ་བཙུགས་པ་རེད། དེ་ནས་བཀའ་འགྱུར་དང་བསྟན་འགྱུར་པོ་ཏི་སུམ་བརྒྱ་ལྷག་བོད་ཡིག་ཏུ་བསྒྱུར་ཡོད་པ་རེད། རྒྱ་གར་མཁས་པའི་གཞུང་གཙོ་ཆེ་བ་རྣམས་ང་ཚོའི་ཡི་གེའི་ནང་ཡོད། ངོས་ཀྱིས་རྒྱ་གར་ངོ་ཤེས་པ་ཁ་ཤས་ལ་རྩེད་མོ་དང་སྦྲགས་སྔ་མོ་ཁྱོད་ཚོ་ང་ཚོའི་དགེ་རྒན་རེད། དེང་སང་ང་ཚོ་ཁྱོད་ཚོའི་དགེ་རྒན་ཆགས་ཡོད་ཅེས་བཤད་ཀྱི་ཡོད། ང་ཚོས་ཀླུ་སྒྲུབ་ཡབ་སྲས་ཀྱིས་མཚོན་པའི་ཕྱོགས་གླང་ཆོས་གྲགས་ཀྱི་གཞུང་རྣམས་ལ་བདག་པོ་བརྒྱབ་ཡོད།
(ཕྱི་ལོ་ ༢༠༢༢ ཟླ་བ་ ༥ ཚེས་ ༢༧ ཉིན་སྨོན་ལམ་ཚིག་མཛོད་ཆེན་མོ་པོད་ ༢༢༣ གྱི་བདག་ཉིད་ཅན་དབུ་འབྱེད་སྐབས་སྩལ་བ་ལས་བཏུས།)