གཞུང་ཆེན་སློབ་གཉེར་གྱི་རྨང་གཞི་དང་། སྔགས་ཆོག་ཀྱི་རྒྱན་ཆ།

ཕྱི་ལོ་ ༢༠༡༤ ཟླ་བ་ ༡༢ ཚེས་ ༢༩ ཉིན་མོན་གྷོ་ས་སྐྱ་རྩེ་ཆེན་མདོ་སྔགས་ཆོས་གླིང་དུ་སྩལ་པའི་བཀའ་སློབ་ལས་[1]།

 

སངས་རྒྱས་ཀྱི་བསྟན་པ་ལ་ལུང་རྟོགས་ཀྱི་བསྟན་པ་གཉིས་ཡོད་པ་ལས། ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་བྱ་རྒྱུ་དེ་བཤད་པ་དང་སྒྲུབ་པ་གཉིས་ཀྱི་ལམ་ནས་བསྟན་པ་འཛིན་སྐྱོང་སྤེལ་གསུམ་བྱེད་དགོས། ཞེས་མཁས་མཆོག་དབྱིག་གཉེན་གྱིས་གསུངས་པས་ན། ང་ཚོ་ས་དགེ་བཀའ་རྙིང་རིས་སུ་མ་ཆད་པའི་དགོན་སྡེ་སོ་སོས་ཀྱང་།

གཙོ་བོ་གཞུང་ཆེན་སློབ་གཉེར་བྱ་རྒྱུ་གལ་གནད་ཆེན་པོ་ཡིན་ལ། གཞུང་ཆེན་སློབ་གཉེར་བྱས་ནས་སྟན་ཐོག་གཅིག་ལ་ཚུར་ཉམས་ལེན་དུ་བསྒྲིལ་སྐབས་སྣང་གསུམ་དང་རྒྱུད་གསུམ་ཞེས་རྡོག་ལ་བསྒྲིལ་ནས་ཉམས་ལེན་བྱེད་དགོས། དེའི་རྒྱབ་རྟེན་ལྟ་བུ་གཞུང་ཆེན་དེ་དག་ལ་གཟིགས་རྒྱུ་ཧ་ཅང་གལ་ཆེན་པོ་རེད།

དེ་ལྟར་དཔལ་ལྡན་ས་སྐྱ་པར་ཆ་མཚོན་ན། ས་པཎ་རང་ཉིད་ཀྱིས་ཚད་མ་རིགས་གཏེར་མཛད་པ་སོགས་ཚད་མར་དམིགས་བསལ་ཐུགས་སྣང་གནང་ཡོད། ངོས་ནས་རྟག་ཏུ་ཞུ་བཞིན་པ་ལྟར། དབུ་མ་རིགས་ཚོགས་དྲུག་དང་། བྱམས་ཆོས་སྡེ་ལྔ་བཅས་རྩ་བར་བྱས་ཏེ་སྔོན་གྱི་བུ་སྟོན་སོགས་ཀྱིས་གཞུང་ཆེན་མོ་དེ་དག་ལ་འགྲེལ་པ་མཛད་ཡོད། དེར་བརྟེན་གཞུང་ཆེན་གཟིགས་རྒྱུ་ཧ་ཅང་གལ་ཆེན་པོ་རེད། སྔར་ས་སྐྱའི་གདན་ས་ཆེན་པོ་དེ་དག་གིས་དངོས་གནས་གཞུང་ཆེན་སློབ་གཉེར་ཤུགས་ཆེ་གནང་སྲོལ་ཡོད་ལ། རྗེ་རིན་པོ་ཆེས་གཞུང་ཆེན་གཟིགས་རྒྱུའི་དཔེ་ལྟ་ས་ཡང་དཔལ་ལྡན་ས་སྐྱ་པ་རེད། རྗེ་རིན་པོ་ཆེ་རང་ཉིད་ཀྱིས།

མདོ་སྔགས་ལེགས་བཤད་འབྱུང་གནས་ས་སྐྱ་པ། །

ཞེས་གསུངས་ཡོད། གཞན་ཡང་སྔགས་རིམ་ཆེན་མོའི་ནང་དུའང་ཡོད་ལ། ཀྱེ་རྡོར་སྐོར་ལ་ཐུང་ཙམ་གསུངས་ནས་རྒྱུད་སྡེའི་སྐོར་ལ་གསུང་སྐབས་རྒྱུད་སྡེ་འདིའི་སྐོར་ལ་དཔལ་ས་སྐྱ་པའི་ལམ་འབྲས་བརྒྱུད་པའི་བླ་མ་རྣམས་ཀྱིས་དག་ཐེར་རྨད་དུ་བྱུང་བ་མཛད་ཡོད། དེ་ལས་ལྷག་པའི་གསལ་བཤད་དགོས་པ་མེད། ཅེས་གསུངས་ཡོད། དེར་བརྟེན་དཔལ་ས་སྐྱའི་ནང་སྔོན་གྱི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་དག་གིས་ལེགས་བཤད་སྨད་དུ་བྱུང་བ་མཛད་པ་དེ་དག་ལ་ཁྱེད་རང་ཚོས་བལྟས་ནས་གཞི་རྩའི་བོད་གངས་ཅན་གྱི་ལྗོངས་སུ་རྙིང་མ་དང་། བཀའ་བརྒྱུད། ས་སྐྱ། བཀའ་གདམས་པ། ཕྱིས་སུ་རི་བོ་དགེ་ལུགས་བཅས་དེ་དག་ཚང་མ་དཔལ་ནཱ་ལེནྡྲའི་ཆོས་རྒྱུད་ཆགས་ཡོད། དེར་བརྟེན་ང་ཚོ་ཚང་མས་ནཱ་ལེནྡྲའི་མཁས་པའི་གཞུང་ལུགས་ལ་ལྟ་ཀློག་སློབ་གཉེར་བྱ་རྒྱུ་ཧ་ཅང་གལ་ཆེན་པོ་རེད། ཁྱེད་རང་ཚོས་ངེས་པར་དཔེ་ཆ་ཡག་པོ་གཟིགས་རོགས་གནང་། དེ་དག་གཞི་རྩར་ཡོད་པའི་ཐོག་ནས་ཁྱེད་རང་ཚོས་འདིར་སྒྲུབ་ཆོས་ཚོགས་རྒྱུ་དེ་དག་གིས་དཔལ་དང་རྒྱན་བྱས་ནས་ཧ་ཅང་ཡག་པོ་ཡོང་ངེས་རེད། གཞུང་ཆེན་བལྟས་ནས་གཞི་ལམ་འབྲས་གསུམ་གྱི་རྣམ་གཞག་ཤེས་པ་ཞིག་མ་བྱུང་ན། སྔགས་ཀྱི་ཆོ་ག་བཏོན་པ་ཙམ་གྱིས་བསྟན་པ་ཡོངས་རྫོགས་ཀྱི་གོ་བ་ཡང་ཆགས་མི་ཐུབ་པར་མ་ཟད། ཉམས་ལེན་ཡང་གནད་ལ་འཁེལ་བ་ཞིག་ཡོང་ཐབས་མེད་པ་ངོས་ཀྱི་ཉམས་མྱོང་ཐོག་ནས་བརྗོད་ཐུབ་པ་ཞིག་ཡིན།

[1] ཕྱི་ལོ་ ༢༠༡༤ ཟླ་བ་ ༡༢ ཚེས་ ༢༩ ཉིན་མོན་གྷོ་ས་སྐྱ་རྩེ་ཆེན་མདོ་སྔགས་ཆོས་གླིང་དུ་སྩལ་པའི་བཀའ་སློབ་ལས་བཏུས།