དཔལ་ནཱ་ལེནྡྲ། བྱོན་པ་ལེགས།
ཁ༽ སློབ་དཔོན་ལེགས་ལྡན་གྱི་སྐུ་ཡི་ཆ་ལུགས།
སློབ་དཔོན་ལེགས་ལྡན་འབྱེད་ཀྱི་སྐུའི་ཆ་ལུགས་ནི། པཎ་གྲུབ་བཅུ་བདུན་གྱི་གསོལ་འདེབས་དད་གསུམ་གསལ་བྱེད་ལས། ཡོངས་རྫོགས་པཎྜི་ཏ། ཞེས་གསུངས་པ་ལྟར་གནས་ལྔ་རིག་པར་ནང་བྱན་ཆུད་པའི་པཎྜི་ཏའི་ཆ་བྱད་ཅན་ཏེ་དབུ་ལ་པཎ་ཞྭ་དམར་པོ་སྐེད་འཆིང་གསུམ་ལྡན་མནབས་ཤིང་། སྐུ་མདོག་དཀར་ལ་དམར་བའི་མདངས་དང་ལྡན་ལ། རྟེན་དགེ་སློང་ཡིན་པས་སྐུ་ལ་ཆོས་གོས་རྣམ་གསུམ་གསོལ་བ།
རྒྱལ་རིགས་སུ་སྐུ་འཁྲུངས་པའི་མཚོན་རྟགས་སུ་རྔུལ་ལེན་སྔོ་སྐྱ་བཞེས་ཤིང་། ཕྱག་གཡས་བྱང་ཆུབ་དང་གཡོན་སྐྱབས་སྦྱིན་གྱི་ཕྱག་རྒྱ་དང་། བཞུགས་གདན་འབོལ་རྩེག་སྟེང་གདིང་བའི་སྟན་ལ་ཞབས་གཉིས་སྐྱིལ་ཀྲུང་དུ་བཞུགས་པའི་རྣམ་པའོ།།
གཞན་ཡང་སློབ་དཔོན་འདི་ཉིད་དང་། དེ་བཞིན་ཇོ་བོ་རྗེ་དཔལ་ལྡན་ཨ་ཏི་ཤ་སོགས་པཎ་གྲུབ་གཞན་རྣམས་ཀྱི་བྲིས་ཆ་ལ་ལར་སྐུའི་ཉེ་འཁྲིས་གཡས་གཡོན་གང་རུང་དུ་ཟ་མ་ཏོག་རེ་འབྲི་བཞེངས་གནང་སྲོལ་ཡོད་ཅིང་། དེ་ཡང་ཟ་མ་ཏོག་ཅེས་པ་ནི། ཆོས་གོས་དང་། རིན་པོ་ཆེ་དང་། མངར་ཆ། ནོར་རྫས་སོགས་ཡོ་བྱད་འཇུག་སྣོད་ཅིག་གི་མིང་སྟེ། དག་ཡིག་གི་འགྲེལ་པ་ལས། ཟ་མ་ཏོག་རིན་ཆེན་གྱི་སྣོད་དམ་མངར་ཆའི་སྣོད་དམ་གའུ། ཞེས་གསལ་བ་ལྟར། རྒྱལ་རོང་ཚུལ་ཁྲིམས་ཉི་མས་ (དུས་རབས་19པ།) བརྩམས་པའི་ས་རྒྱན་ལམ་བསྒྲིགས་ལས་ཀྱང་། སྐྱེས་རིན་ཐང་མེད་པའི་ནོར་བུ་དུ་མས་གང་བའི་ཟ་མ་ཏོག་གཅིག་ལག་ཏུ་འོང་བའི་སྔ་ལྟས་སུ། ཞེས་དང་། རྙིང་རྒྱུད་ཁ་པ་ལས[1]།
སངས་རྒྱས་རིན་ཆེན་དེ་ཡི་དབྱིག །ཁ་སྦྱོར་སྙིང་པོ་ཟ་མ་ཏོག །
སྐུ་གསུང་ཐུགས་ཀྱི་ཕོ་བྲང་ལས། །མ་ལུས་ཐིག་ལེ་གནས་པར་མཛད། །
ཅེས་གསུངས་པ་ལྟར་རྗེའི་གསུང་ལས་ཀྱང་། སངས་རྒྱས་རིན་ཆེན་ཞེས་སོགས་ལ། རྡོ་རྗེ་དང་པདྨ་ཨེ་ཝཾ་གྱི་དོན་ལ་འཆད་པ་ནི། ཟ་མ་ཏོག་གི་མིང་ཅན་གྱི་སྣོད་དང་། དེའི་ནང་གི་རིན་ཆེན་ཁྱད་མེད་དུ་འགྱུར་བས། སྟོང་གཟུགས་ཕྱག་རྒྱ་དང་མཉམ་པར་སྦྱར་བའི་གསང་བའི་རྡོ་རྗེ་པདྨ་ལ་བྱའོ། །ཞེས་གསུངས་སོ།།
དེ་བཞིན་མཁས་དབང་དུང་དཀར་བློ་བཟང་འཕྲིན་ལས་ (1927-1997) མཆོག་གིས་མཛད་པའི་དུང་དཀར་ཚིག་མཛོད་ཆེན་མོ་ལས་[2]ཀྱང་། རིན་པོ་ཆེའི་རིགས་ལས་གྲུབ་པའི་སྣོད་ཁྱད་པར་ཅན་དག་ལ་ཟེར་ཞེས་གསལ་ལ། དབྱངས་ཅན་དགའ་བློས་ཀྱང་སྒམ་ཁ་སྦྱར་གྱི་མིང་དུ་གསུངས་ཤིང་། འདུལ་བའི་གླེང་འབུམ་གྱི་མིང་བརྡའི་རྣམ་བཤད་ལས། ཟ་མ་ཏོག་ནི་སྒམ་ཁ་སྦྱར་ཞིག །ཅེས་གསུངས། དཔེར་ན། ༸རྒྱལ་དབང་དགེ་འདུན་གྲུབ་ (1476-1542) ཀྱིས་མཛད་པའི་འདུལ་བའི་གླེང་འབུམ་ལས[3]། རས་བལ་ཉོས་ཏེ་དོག་པ་བཀལ་ནས་ཐ་ཀ་པ་མཁས་པ་ལ་རས་ཟུང་བཟང་པོ་འཐག་ཏུ་བཅུག་ནས་རས་དེ་སྤོས་སྣ་ཚོགས་ཀྱིས་བསྒོས་ཏེ་གོས་ཀྱི་ཟ་མ་ཏོག་ཏུ་བཅུག་ནས་བཞག་གོ །ཞེས་གསལ་བ་ལྟར། སློབ་དཔོན་མདོ་སྡེ་འཛིན་པ་དགེ་བའི་བཤེས་གཉེན་གྱིས་མཛད་པའི་འདུལ་བ་ལུང་བླ་མའི་བྱེ་བྲག་ལུང་ཞུ་བའི་འགྲེལ་པ་ལས[4]། ཆོས་གོས་ཀྱི་ཟ་མ་ཏོག་ནི། ཆོས་གོས་ཀྱི་གཞག་ཏུ་རུང་བའི་སྣོད་ཀྱི་ཁྱད་པར་འདམ་བུའི་རྩེ་མོའི་སྡོང་བུ་ཕྲ་ཞིང་མཉན་པ་ལ་སོགས་པས་བྱས་པ་ཟླུམ་པོ་ཞིག་གོ །ཞེས་གསུངས་པ་ལྟར་ཟ་མ་ཏོག་ཅིག་འབྲི་སྲོལ་ཡོད་དོ།། །།
དཔྱད་གཞིའི་ལུང་ཁུངས་ཡིག་ཆ།
[1] སྡེ་དགེ་བཀའ་འགྱུར། རྙིང་རྒྱུད། ༼ཁ༽ དཔེ་རིང་། ཤོག་གྲངས་ ༡༦༠ན༤
[2] དུང་དཀར་ཚིག་མཛོད་ཆེན་མོ། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༢ ལོ། ཤོག་གྲངས་ ༡༨༠༡
[3] དགེ་འདུན་གྲུབ་པའི་གསུང་འབུམ། ༼༡༽ སེར་གཙུག་ནང་བསྟན་དཔེ་རྙིང་འཚོལ་སྡུད་ཁང་། ༢༠༡༡ ལོ། ཤོག་ ༥༥༠
[4] བསྟན་འགྱུར་དཔེ་བསྡུར་མ། འདུལ་བ། ༼ཛུ༽ དེབ་ཨང་ ༨༨ པ། ཤོག་གྲངས་ ༦༢༨
ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཁ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༢༦༩ ནས་ ༢༧༡ བར་གསལ་བ་ལས་བཏུས།