དཔལ་ནཱ་ལེནྡྲ། བྱོན་པ་ལེགས།
ཁ༽ ནཱ་ལེནྡྲའི་གཙུག་ལག་ཁང་གི་མཁན་རབས་རིམ་བྱོན་གྱི་རྣམ་ཐར།
༡༽ སྒྲ་གཅན་འཛིན་འོད།
དེ་ཡང་དཔལ་ནཱ་ལེནྡྲའི་གཙུག་ལག་ཁང་གི་མཁན་པོའི་ཐོག་མ་སྒྲ་གཅན་འཛིན་འོད་ནི། མཁས་དབང་དུང་དཀར་བློ་བཟང་འཕྲིན་ལས་ (1927-1997) མཆོག་གིས་མཛད་པའི་དེབ་དམར་མཆན་འགྲེལ་ལས། སློབ་དཔོན་ས་ར་ཧ།
སློབ་དཔོན་སྒྲ་གཅན་འཛིན་ཡང་ཟེར། སློབ་དཔོན་འདི་སློབ་དཔོན་ཀླུ་སྒྲུབ་ཀྱི་རྩ་བའི་བླ་མ་ཡིན་པས་དུས་རབས་དང་པོའི་གོང་ཙམ་དུ་བྱུང་བ་ཡིན་འདྲ། སློབ་དཔོན་འདིའི་འཁྲུངས་ཡུལ་ནི། ལོ་རྒྱུས་འགའ་ཞིག་ན། རྒྱ་གར་ལྷོ་ཕྱོགས་བེ་རྡབྷ་ཡིན་ཟེར་བ་དང༌། འགའ་ཞིག་གིས་རྒྱ་གར་ཤར་ཕྱོགས་ཀྱི་གྲོང་ཁྱེར་ར་དྷི་ཞེས་བྱ་བ་ཡིན་ཟེར། གང་ལྟར་ཕ་མ་གཉིས་ཀ་བྲམ་ཟེའི་ཆོས་ལུགས་པ་ཡིན་ཀྱང་། རང་ཉིད་སངས་རྒྱས་ཆོས་ལུགས་ལ་དད་པ་སྐྱེས་ནས་ཉིན་མོ་བྲམ་ཟེའི་ཆོས་ལུགས་དང༌། མཚན་མོ་སངས་རྒྱས་ཆོས་ལུགས་བྱས། སྐབས་རེར་ཆང་ཡང་འཐུང་བས་བྲམ་ཟེ་རྣམས་ཆོས་ལུགས་དང་འགལ་བར་བརྩིས་ནས་རྒྱལ་པོ་ལ་ཞུས་པས་རྒྱལ་པོས་གནས་ནས་བསྐྲད། དེ་ནས་སངས་རྒྱས་ཆོས་ལུགས་ལ་རབ་ཏུ་བྱུང་ནས་ནཱ་ལེན་དྲ་དགོན་པར་བྱོན། སློབ་དཔོན་སྒྲ་གཅན་འཛིན་འོད་བྱ་བ་སོགས་སློབ་དཔོན་མཁས་པ་མང་པོ་བསྟེན་ནས་ཐེག་པ་ཆེ་ཆུང་གི་ཆོས་དང༌། གཙོ་བོར་གསང་སྔགས་ཀྱི་ཆོས་གསན། དེ་ནས་གསང་སྔགས་ཀྱི་ལམ་ལ་བསྟེན་ནས་རྟོགས་པ་མཐོན་པོར་སོང་སྟེ་མདའ་མཁན་གྱི་བུ་མོ་ཕྱག་རྒྱར་བསྟེན་ཏེ་སྤྱོད་པ་ལ་གཤེགས། ཞེས་དང་། དེ་བཞིན་ཇོ་ནང་རྗེ་བཙུན་ཏཱ་ར་ནཱ་ཐས་ (1575-1634) མཛད་པའི་རྒྱ་གར་ཆོས་འབྱུང་ལས་ཀྱང་། རྒྱལ་པོ་ (ཙནྡན་སྐྱོང་) དེ་རྒྱལ་སྲིད་དུ་འཁོད་པའི་དུས་ཙམ་ན། སློབ་དཔོན་ཆེན་པོ་བྲམ་ཟེ་སྒྲ་གཅན་འཛིན་བཟང་པོ་ན་ལེནྡྲར་བྱོན་ཏེ། དེ་ཡང་བཙུན་པ་ནག་པོ་ཞེས་བྱ་བ་ཞིག་ལས་བསྙེན་པར་རྫོགས་ཤིང་། ཉན་ཐོས་ཀྱི་སྡེ་སྣོད་རྣམས་གསན། ཁ་ཅིག་ཏུ་བཙུན་པ་སྒྲ་གཅན་འཛིན་འོད་བྱ་བ་ལས་བསྙེན་པར་རྫོགས། དེའི་མཁན་པོ་ནག་པོ་ཡིན་ཡང་ཟེར་ཏེ། འདིའི་ནག་པོ་ནི་གཏད་རབས་ཀྱི་དེ་མིན་ནོ། །ཞེས་བྲམ་ཟེ་སྒྲ་གཅན་འཛིན་གྱི་རྣམ་ཐར་སྐབས་སྒྲ་གཅན་འཛིན་འོད་ནི་ནཱ་ལེནྡྲའི་མཁན་པོ་ཡིན་པ་དང་། ཁོང་གི་དྲུང་ནས་གྲུབ་ཆེན་ས་ར་ཧས་རབ་ཏུ་བྱུང་བར་གསུངས་པ་འདི་ཙམ་ལས་རྣམ་ཐར་གྱི་དཔྱད་གཞི་གཞན་གཏན་ནས་མ་རྙེད་པས་འགོད་ཐབས་བྲལ་ལོ།། །།
ཡོང་ཁུངས། དཔལ་ནཱ་ལེནྡྲའི་བྱུང་རབས་སྲིད་ཞིའི་མཛེས་རྒྱན། སྨད་ཆ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ཝ་ཤིང་ཀྲོན། ༢༠༢༣ ལོ། ཤོག་གྲངས་ ༨༧ ནས་ ༨༨ བར་གསལ་བ་ལས་བཏུས།