དཔལ་ནཱ་ལེནྡྲ། བྱོན་པ་ལེགས།
༄༅། །དགེ་སློང་མ་དཔལ་མོའི་མཛད་རྣམ་ཤེལ་དཀར་ཕྲེང་བ་ཞེས་བྱ་བ་བཞུགས་སོ། །
༼གསེར་ཁྲི་བྲག་དཀར་རིན་ཆེན་གསེར་ཆོས་དགེ་བློ་བཟང་བསྟན་དར།[1]༽
༄༅། །ཨོཾ་སྭ་སྟི། །དུས་གསུམ་རྒྱལ་བ་ཀུན་གྱི་འཕྲིན་ལས་མ་ལུས་པ། །གཅིག་ཏུ་བསྡུས་ཏེ་སྙིགས་མའི་དུས་འདི་རུ། །འགྲོ་བའི་དཔལ་དུ་བྱོན་པའི་རྣལ་འབྱོར་མ། །དཔལ་ལྡན་དཔལ་མོ་མཆོག་ལ་ཕྱག་འཚལ་ལོ། །འཇིག་རྟེན་དབང་ཕྱུག་སྤྱན་རས་གཟིགས་མགོན་དང་། །གཉིས་མེད་གཉིས་སུ་སྣང་བའི་གྲུབ་པའི་དབང་། །དགེ་སློང་མ་ནི་དཔལ་མོ་ཞེས་པ་ཡི། །སྙན་གྲགས་བ་དན་ས་གསུམ་གཡོ་དེར་འདུད། །
སེམས་ཅན་དོན་ལ་ཐུགས་རྗེས་ལེགས་གཟིགས་ནས། །འགྲོ་དོན་ཕྱོགས་མེད་ཕྱག་སྟོང་སྤྱན་སྟོང་སྤྲུལ། །སངས་རྒྱས་རབ་བདུན་བདེ་གཤེགས་བཅུ་གཅིག་ཞལ། །ཐུགས་རྗེ་ཆེན་པོ་ཉིད་ལ་ཕྱག་འཚལ་བསྟོད། །མཁྱེན་རབ་རལ་གྲི་རྣོན་པོ་ཡིས། །ལོག་རྟོག་ཡིད་གཉིས་དྲ་བ་ཀུན། །གཅོད་མཛད་དཔལ་ལྡན་བླ་མ་གང་། །རྣམ་པ་ཀུན་ཏུ་རྒྱལ་གྱུར་ཅིག །གང་ཞལ་གསེར་གྱི་བུམ་བཟང་ནས། །དོན་གཉེར་རེ་སྐོང་འདི་ན་སྨྲ། །དེ་ལྟ་བུའི་རྣལ་འབྱོར་མ་དེ་ཉིད་དུས་གསུམ་རྒྱལ་བའི་ཡུམ་མཆོག་རྡོ་རྗེ་ཕག་མོ་འགྲོ་བ་བུད་མེད་ཀྱི་ལུས་སུ་སྤྲུལ་ནས་སེམས་ཅན་གྱི་དོན་བསམ་གྱིས་མི་ཁྱབ་ཅིང་བརྗོད་ཀྱིས་མི་ལངས་པ་ཞིག་མཛད་པ་ལས་རྒྱུ་སྐར་གྱི་དབུས་ནས་ཉི་ཟླའི་ཟུར་ཙམ་སྟོན་པ་ལ།
༡༽ སྲས་དང་སྲས་མོ་བལྟམས་པ།
དེ་ཡང་རྒྱ་གར་གྱི་ཡུལ་ཁ་ཆེ་ཁྲི་བརྟན་ཅེས་བྱ་བ་ན། ཡབ་རྒྱལ་པོ་ཨིནྡྲ་བྷཱ་ཏི་དང་། ཡུམ་ཡིད་འོང་བཟང་མོ་གཉིས་ལ་རྒྱལ་སྲིད་མངའ་ཐང་བསམ་གྱིས་མི་ཁྱབ་པ་ཡོད་པ་ལས། ནམ་ཞིག་གི་ཚེ་བཙུན་མོ་ལ་མཚན་ལྟས་བཟང་པོ་བྱུང་ནས་ཟླ་དགུ་ངོ་བཅུ་ལོན་པ་དང་སྲས་གཅིག་འཁྲུངས་སོ། །ཁྱེའུ་དེ་གཟུགས་མཛེས་ཤིང་ཤིན་ཏུ་སྡུག་པ་ཀུན་གྱིས་མཐོང་ན་ཡིད་དུ་འོང་བ་ཞིག་ཡོད་པ་ལ། མཚན་ཡང་དྷརྨ་པཱ་ལ་ཞེས་བཏགས་སོ། །དེ་ནས་སྲས་དེ་ལོ་དྲུག་ལོན་པ་དང་། ཡུམ་ཡིད་འོང་བཟང་མོ་ནུབ་མོ་ཉལ་བའི་རྨི་ལམ་ཤིན་ཏུ་བཟང་ནས། ཡབ་རྒྱལ་པོ་ཨིནྡྲ་བྷཱུ་ཏིའི་དྲུང་དུ་ཕྱིན་ཏེ། འདི་སྐད་ཅེས་ཞུས་སོ། །
ཡབ་གཅིག་གསོན་དང་ཨིནྡྲ་བྷཱ་ཏི་ལགས། །ཁྱད་པར་རྨི་ལམ་བཟང་པོ་འདི་ལྟར་བྱུང་། །བདག་གི་སྙིང་ནས་ཉི་ཟླ་གཉིས་ཤར་ཏེ། །གླིང་བཞི་གླིང་ཕྲན་ཐམས་ཅད་གསལ་བ་དང་། །དམ་པའི་ཆོས་ཀྱི་སྒྲ་ཆེན་སྒྲོག་པ་དང་། །འཇིག་རྟེན་མི་རྣམས་ཆོས་ལ་འཇུག་པ་མཐོང་། །ཞེས་ཞུས་པ་དང་། ཡབ་ཨིནྡྲ་བྷཱུ་ཏི་ཐུགས་ཤིན་ཏུ་མཉེས་ནས། ཡུམ་ཡིད་འོང་བཟང་མོ་ལ་འདི་སྐད་ཅེས་གསུངས་སོ། །
ཡུམ་གཅིག་གསོན་དང་ཡིད་འོང་བཟང་མོ་ལགས། །རྒན་རྒོན་གཉིས་ཀྱི་འདོད་པའི་དོན་གྲུབ་བྱུང་། །ཁྱད་པར་རྨི་ལམ་བཟང་པོ་བྱུང་བ་དེ། །བྱང་ཆུབ་སེམས་དཔའི་སྤྲུལ་པ་འབྱོན་ལས་ཆེ། །ཞེས་གསུངས་པས་ཡུམ་ཡིད་འོང་བཟང་མོས་ཀྱང་ཡབ་ཀྱི་བཀའ་བཞིན་ཟས་ངན་སོགས་སྤངས་ནས་སྐུ་གཟུགས་ལ་ནན་ཏན་བགྱིས། དེ་ནས་ཟླ་བདུན་ལོན་པའི་རྗེས་ཡུམ་གྱི་ལྷུམས་སུ་ཡོད་པའི་བྱིས་པས་འདི་སྐད་ཅེས་སྨྲས་སོ། །ཨོཾ་མ་ཎི་པདྨེ་ཧཱུྃ། འགྲོ་བ་རིགས་དྲུག་གི་སྡུག་བསྔལ་འབྲལ་བར་ཤོག །ཅེས་སྨྲས་པས། ཡུམ་ཡིད་འོང་བཟང་མོ་སེམས་ཤིན་ཏུ་འཇིགས་ཤིང་སྐྲག་ནས། ཡབ་རྒྱལ་པོ་ཨིནྡྲ་བྷཱུ་ཏིའི་དྲུང་དུ་ཕེབས་ནས། འདི་སྐད་ཅེས་ཞུས་སོ། །
ཡབ་གཅིག་གསོན་དང་ཨིནྡྲ་བྷཱུ་ཏི་ལགས། །བདག་གི་མངལ་དུ་ཡོད་པའི་བྱིས་པ་འདི། །ཟླ་བདུན་སོང་ནས་འདི་སྐད་སྨྲས་ནས་བྱུང་། །ༀ་མ་ཎི་པདྨེ་ཧཱུཾ། འགྲོ་བ་རིགས་དྲུག་གི་སྡུག་བསྔལ་འབྲལ་བར་ཤོག །ཅེས་སྨྲས་བྱུང་བས། བྱང་ཆུབ་སེམས་དཔའི་སྤྲུལ་པ་ག་ལ་ཡིན། །མགོན་པོ་ཕྱག་དྲུག་ཆོ་འཕྲུལ་ཡིན་ཉེན་འདུག །བྲག་རི་མཐོན་པོའི་རྩེ་ནས་མཆོང་དགོས་སམ། །ཆུ་བོ་ཆེན་པོའི་གཏིང་ལ་ལྕེབ་དགོས་སམ། །རང་སྲོག་རང་མཚོན་བརྒྱབས་ནས་འཆི་དགོས་སམ། །སྡུག་བསྔལ་ཅན་མ་བདག་ལ་བཀའ་གནང་ཞུ། །ཞེས་ཞུས་པས། ཡབ་ཀྱིས་འདི་སྐད་ཅེས་གསུངས་སོ། །
ཡུམ་གཅིག་གསོན་དང་ཡིད་འོང་བཟང་མོ་ལགས། །ༀ་མ་ཎི་པདྨེ་ཧཱུཾ། ཞེས་པ་འདི། ཡི་དམ་ཐུགས་རྗེ་ཆེན་པོ་བཞུགས་པའི་རྟགས། །ཞལ་ནས་ཡི་གེ་དྲུག་མའི་ཆོས་སྒྲ་སྒྲོགས། །བུ་སྐྱེས་ཐུགས་རྗེ་ཆེན་པོའི་སྤྲུལ་པ་ཡིན། །བུ་མོ་སྐྱེས་ན་རྡོ་རྗེ་ཕག་མོ་ཡིན། །བྱང་ཆུབ་སེམས་དཔའི་སྤྲུལ་པ་འབྱོན་ལས་ཆེ། །བློ་ཕུགས་བསམ་པའི་དོན་ཆེན་འགྲུབ་ནས་འོང་། །ཞེས་གསུངས་སོ། །དེ་ནས་ཟླ་བ་དགུ་རྫོགས་བཅུའི་ངོ་མཐོང་བའི་ཚེ། ཆོ་འཕྲུལ་ཟླ་བའི་ཚེས་བཅོ་ལྔའི་ཉིན་བཙུན་མོར་སྲས་མོ་གཅིག་བལྟམས་པས། དེ་དུས་གཞན་ལྟས་བཟང་པོ་ཉི་ཟླ་གཉིས་མཉམ་དུ་ཤར་བ་དང་གླིང་བཞི་གླིང་ཕྲན་ཐམས་ཅད་འོད་ཀྱིས་ཁེངས་པ་དང་དབུས་ཀྱི་རི་བོའི་རྩེ་མོ་ནས་དམ་པའི་ཆོས་ཀྱི་སྒྲ་ཆེན་སྒྲོགས་པ་དང་། ལྷའི་བུ་དང་བུ་མོ་རྣམས་ཀྱིས་ཁྲུས་ཆབ་གསོལ་བ་དང་བཅས་ཡུམ་ཡིད་འོང་བཟང་མོའི་སྐུ་ལུས་ལ་སྙུང་ཟུག་ཅི་ཡང་མེད་པའི་ངང་ནས་སྲས་མོ་གཅིག་སྐུ་བལྟམས་སོ། །དེ་མ་ཐག་ཏུ་སྲས་མོ་དེས་ཕྱོགས་བཞིར་སྤྱན་ཆེས་ཆེར་གཟིགས་ནས། ཨོཾ་མ་ཎི་པདྨེ་ཧཱུྃ། ཞེས་གསུངས་སོ། །དེ་དུས་བར་སྣང་ཁམས་སུ་འཇའ་འོད་སྤྲིན་དཀར་གྱི་གུར་ཕུབ་པ་དང་། དེ་ཡང་ཡེ་ཤེས་མཁའ་འགྲོའི་མཚན་རྟགས་དང་ལྡན་པ་ལ། སྲས་མོ་དེའི་མཚན་ལ་ལཀྵམི་ཀ་རར་གྲགས་སོ།།
སྲས་མོ་ལཀྵམི་ཀ་རས་དང་པོ་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་ཆེན་གྲངས་མེད་གསུམ་དུ་ཚོགས་བསགས། མཐར་འཛམ་བུ་གླིང་འདིར་རྣལ་འབྱོར་མ་དེ་ཉིད་དུས་གསུམ་རྒྱལ་བའི་ཡུམ་མཆོག་རྡོ་རྗེ་ཕག་མོ་འགྲོ་བ་བུད་མེད་ཀྱི་སྐུར་སྤྲུལ་ནས་སེམས་ཅན་གྱི་དོན་ལ་བསམ་གྱིས་མི་ཁྱབ་ལ་བརྗོད་ཀྱིས་མི་ལང་བ་མཛད་ཕྱིར་སྐུ་ན་ཆུང་ངུའི་དུས་སུ་གཞོན་ནུ་རོལ་རྩེད་སོགས་རྩལ་གཡེངས་ཀྱི་རིགས་རྣམས་མི་གཙང་བའི་རྫས་བཞིན་དུ་བོར་ནས། ཨོྃ་མ་ཎི་པདྨེ་ཧཱུཾ། འགྲོ་བ་སེམས་ཅན་ཐམས་ཅད་ངན་འགྲོའི་སྡུག་བསྔལ་དང་བྲལ་ཏེ། བདེ་བ་དང་ལྡན་པར་གྱུར་ཅིག །ཅེས་སྨྲས་ནས། ཏིང་ངེ་འཛིན་ལ་སྙོམས་པར་ཞུགས་སོ། །ཡབ་རྒྱལ་པོ་ཨིནྡྲ་བྷཱུ་ཏི་དང་ཡུམ་ཡིད་འོང་བཟང་མོ། མིང་པོ་དྷརྨ་པཱ་ལ་དང་། གཡོག་མོ་རྣམས་སྲས་མོའི་མཛད་ཚུལ་དེ་ལ་གཟིགས་ནས་ཡ་མཚན་དུ་གྱུར་ཏོ།། །།
༢༽ སྲས་མོ་ལཀྵམི་ཀ་ར་བག་མར་འདྲི་མཁན་འབྱོར་པ།
དེ་ནས་སྲས་དྷརྨ་པཱ་ལ་དགུང་ལོ་བཅོ་བརྒྱད་ལོན་པ་དང་རྒྱལ་སྲིད་སྲས་ཀྱིས་འཛིན། སྲས་མོ་ལཀྵམི་ཀ་རའི་སྙན་གྲགས་ཉི་ཟླ་ལྟར་ཁྱབ་པ་ལས། ཕྱོགས་ཕྱོགས་ནས་ལྟ་བའི་མི་མང་པོ་བྱུང་། བུ་མོ་འདོད་མཁན་གྱི་རྒྱལ་པོ་ཡང་བཞི་བྱུང་། རྒྱ་གར་ཆོས་ཀྱི་རྒྱལ་པོ། རྒྱ་ནག་སྟོང་གི་རྒྱལ་པོ། གེ་སར་དམག་གི་རྒྱལ་པོ། སྟག་གཟིག་ནོར་གྱི་རྒྱལ་པོ་བཅས་ཀྱིས་རྟ་དང་གླང་པོ་ཆེ་སོགས་ལ་ནོར་བུའི་ཕྲེང་བ་དང་། གསེར་དངུལ་དང་གོས་དར་སོགས་ནོར་ལོངས་སྤྱོད་བསམ་གྱིས་མི་ཁྱབ་པ་བཀལ་ནས་ཡབ་རྒྱལ་པོ་ཨིནྡྲ་བྷཱ་ཏི་ཡི་དྲུང་དུ་ཕེབས་སོ། །དེ་ནས་བློན་པོ་ཤེས་རབ་ཀྱིས་ཡབ་རྒྱལ་པོ་ཨིནྡྲ་བྷཱ་ཏི་ལ་འདི་ལྟར་ཞུས།
ཀྱེ་མ་གསོན་དང་རྒྱལ་པོ་རིན་པོ་ཆེ། །ཤར་ལྷོ་ནུབ་བྱང་རྒྱལ་པོ་ཕེབས་འདུག་པས། །ཁྱེད་ཀྱི་སྲས་མོ་བཙུན་མོར་ཞུ་དགོས་གསུངས། །རྒྱལ་བློན་འཁོར་བཅས་གཟིམ་ཆུང་ཕེབས་ཆོག་པ། །ཡབ་ཆེན་རྒྱལ་པོས་གནང་བ་སྩལ་དུ་གསོལ། །ཞེས་ཞུས། དེ་ནས་རྒྱ་གར་ཆོས་རྒྱལ། རྒྱ་ནག་སྟོང་རྒྱལ། གེ་སར་དམག་རྒྱལ། སྟག་གཟིག་ནོར་རྒྱལ་བཅས་རྒྱལ་བློན་འཁོར་བཅས་ཆོས་རྒྱལ་ཨིནྡྲ་བྷུ་ཏིའི་གཟིམ་ཆུང་ནང་དུ་ཕེབས། ཡབ་རྒྱལ་པོ་ཡིས་ཕྱོགས་ཕྱོགས་ནས་ཕེབས་པའི་རྒྱལ་བློན་རྣམས་ལ་དགའ་བསུ་དཔག་མེད་ཞུས་སོ། །
དེ་ནས་ཡབ་རྒྱལ་པོ་ཨིནྡྲ་བྷཱུ་ཏིས་རྒྱལ་བློན་འཁོར་བཅས་ལ་འདི་ལྟར་གསུངས། ངའི་བུ་མོ་ལཀྵམི་ཀ་ར་ཁྱེད་རྒྱལ་པོ་རྣམས་ཀྱི་སྲས་ལ་བཙུན་མོར་འགྲོ་མི་འགྲོའི་བདམ་ཁ་བུ་མོ་རང་ལ་འདྲི་ཟེར་བ་ལས། ཕྱོགས་ཕྱོགས་ནས་ཕེབས་པའི་རྒྱལ་བློན་རྣམས་ཀྱི་སྲས་མོ་ལཀྵམི་ཀ་ར་ལ་དྲིས་སོ། །
༣༽ ཁྱིམ་ཐབ་སྤངས་ནས་ཆོས་ལ་གཤེགས་པ།
དེ་ནས་སྲས་མོ་ལཀྵམི་ཀ་ར་ཡིས་བསམ་བློ་ཞིག་བཏང་ནས་ཡབ་རྒྱལ་པོ་ཨིནྡྲ་བྷཱུ་ཏི་ལ་འདི་ལྟར་ཞུས། ཡབ་ཆེན་ཨིནྡྲ་བྷུ་ཏི་བདག་ལ་གསོན། །སྐྱེ་གཟུགས་ཕུན་སུམ་ཚོགས་པའི་བུ་མོ་ང་། །སྨོན་ལམ་བཟང་བས་ཡབ་ཡུམ་གཉིས་དང་མཇལ། །ད་ལྟ་ཅི་བྱེད་རང་དབང་ཡོད་དུས་སུ། །གཏན་འདུན་དམ་པའི་ལྷ་ཆོས་མ་བྱེད་ན། །རིན་ཆེན་གླིང་གི་ཚོང་པ་སྟོང་ལོག་འདྲ། །བུ་མོ་དམ་པའི་ཆོས་ལ་བཀའ་གནང་ཞུ། །ཞེས་གདུང་བའི་སྨྲེ་ངག་གིས་ཞུས་པ་ལས། ཡབ་ཀྱིས་བུ་མོ་ལ་སྤྱན་ཆེས་ཆེར་གྱིས་གཟིགས་ཏེ། སྤྱིར་བུད་མེད་རྣམས་ཀྱི་ཆོས་མགོ་མི་འཐོན་པའི་དཔེ་མང་པོ་གསུངས་ཤིང་། ཤིང་ཁྲུ་གང་གཅོད་པ་ལ་རྩ་བ་འདོམ་གང་བསལ་དགོས་ཟེར་བའི་དཔེ་ཡོད། བུ་མོ་ཆོས་མགོ་འཐོན་ན་དེ་ལས་ལེགས་པ་ཅི་ཡོད། ཚེ་ཐུང་འདི་ལ་ཆོས་ཤིག་མ་བསྒྲུབས་ན། །རིན་ཆེན་གླིང་གི་ཚོང་པ་སྟོང་ལོག་འདྲ། །བུ་མོ་ཆོས་ལ་དཀར་བ་དགའ་སྤྲོ་ཆེ། །ཡབ་ཡུམ་གཉིས་ཀྱི་འདོད་པའི་དོན་འགྲུབ་བྱུང་། །བུ་མོ་རང་ཆོས་མགོ་འཐོན་ན་གསེར་བྲེ་གང་ཁྱེར་ལ་ཡང་དག་པའི་བླ་མ་ཞིག་གི་དྲུང་དུ་སོང་ཞེས་གསུངས་སོ། །
དེ་ནས་བུ་མོ་ཆོས་བྱེད་པའི་དོན་དུ་ཡུམ་ཡིད་འོང་བཟང་མོ་ལ་འདི་ལྟར་ཞུས། ལུས་སྲོག་དྲིན་གྱིས་གསོ་བའི་ཡུམ་ཆེན་མ། །ཡུམ་ཆེན་ཕ་རོལ་ཕྱིན་མ་བདག་ལ་གསོན། །སྙིགས་དུས་མི་ཚེ་དགུན་ཀའི་ཉིན་དང་འདྲ། །མཐོ་རིས་མི་ཡི་བདེ་སྐྱིད་ཡད་ཡུད་ཙམ། །ལས་ངན་འཁོར་བའི་སྡུག་བསྔལ་མི་སེལ་བས། །བུ་མོ་དམ་པའི་ཆོས་ལ་འགྲོ་བར་ཞུ། །ཡུམ་ཡིད་འོང་བཟང་མོས་སྙིང་དང་འདྲ་བའི་བུ་མོ་ལཀྵམི་ཀ་ར་ཡི་ཞལ་རས་མེ་ཏོག་པདྨ་ཁ་ཕྱེ་བ་དང་འདྲ་བ་དེ་ལ་གཟིགས་ནས་སྤྱན་ཆབ་མང་དུ་བསིལ་ཞིང་འདི་སྐད་ཅེས་སྨྲས། ཨ་མའི་སྙིང་དང་འདྲ་བའི་ལཀྵམི་ཀ་ར་མ། །བུ་མོ་ཆོས་མགོ་འཐོན་ན་སྐལ་བ་བཟང་། །བུ་མོ་ཆོས་ལ་དཀར་བ་ངོ་མཚར་ཆེ། །བུ་མོའི་འདོད་པའི་དོན་རྣམས་འགྲུབ་པར་ཤོག །ཅེས་གསུངས་ནས། བུ་མོ་ཆོས་ལ་འགྲོ་ན་མིང་པོ་དྷརྨ་པ་ལཱ་ལ་དྲིས་གསུངས་སོ། །བུ་མོ་རང་ཆོས་མགོ་འཐོན་ན་གཡུ་བྲེ་གང་དང་གའུ་གྲུ་བཞི་ཅན་གཅིག་ཡོད་པའི་རིན་ཆེན་གསེར་གྱི་ས་གཞི་བྱས་དེའི་མགོ་ལ་གཡུ་ནོར་བུ་འདྲ་བ་དེ་དང་མཉམ་རིན་ཆེན་གསེར་གྱི་སོར་གདུབ་གཅིག་ཁྱེར་ལ་འཚོ་བའི་མཐུན་རྐྱེན་བྱས་ནས་རི་ཁྲོད་འགྲིམ་ལ་སོང་གསུངས་སོ། །
དེ་ནས་ལཀྵམི་ཀ་ར་མིང་པོ་དྷརྨ་པཱ་ལའི་དྲུང་དུ་ཕེབས་ནས་འདི་སྐད་ཅེས་ཞུས། ས་སྐྱོང་རྒྱལ་པོ་ཐུགས་དགོངས་གཏོད་པར་ཞུ། །བརྩེ་བའི་ཐུགས་ཀྱིས་བཀའ་བཀྱོན་མི་གནང་འཚལ། །ཚེ་འདིར་བདེ་སྐྱིད་ཕུན་སུམ་ཚོགས་གྱུར་ཀྱང་། །འཆི་བདག་འབྱུང་དུས་རང་དབང་མི་འདུག་པས། །སྲིང་མོ་དམ་པའི་ཆོས་ལ་བཀའ་གནང་ཞུ། །ཞེས་ཞུས་པ་དང་། མིང་པོ་དྷརྨ་པཱ་ལ་ལ་ཐུགས་གཏུམ་པོའི་སྟབས་ཀྱིས་མར་ཁུ་ལ་ཆུ་བླུགས་པ་ལྟར་གྱུར་ནས། ཤེལ་གྱི་རལ་གྲི་ཤུབས་ནས་ཕྱུང་སྟེ་ཕྱག་གཡོན་པས་སྲིང་མོའི་སྤྱི་བོ་ནས་བཟུང་། ཕྱག་གཡས་པས་རལ་གྲི་མགོ་ཐོག་ཏུ་འཕྱར་བཞིན་འདི་ལྟར་གསུངས། སྲིང་མོ་ཉོན་དང་ལཀྵམི་ཀ་ར་མ། །ཐང་སྟོང་སྐམ་ལ་ཉ་མོ་མི་འབྱུང་བཞིན། །སྲིང་མོ་དམ་པའི་ཆོས་ནི་ཤིན་ཏུ་དཀའ། །དེ་བས་རལ་གྲིས་སྡང་བའི་དགྲ་བོ་བཏུལ། །སྲིང་མོ་འདོད་པའི་གཉེན་ལ་སྟེར་བ་ཡིན། །གང་དགའི་རྒྱལ་སྲིད་གདམ་ལ་འགྲོ་བ་ལེགས། །
ཡང་ལཀྵམི་ཀ་རས་མིང་པོ་ལ་འདི་ལྟར་ཞུས། ཉོན་དང་བདག་གི་མིང་པོ་ཁྱེད་ཉིད་ཀྱང་། །ཚེ་སྔོན་བསོད་ནམས་བསགས་པའི་འབྲས་བུ་ལས། །ཚེ་འདིར་སྟོབས་འབྱོར་ལྡན་པའི་རྒྱལ་པོར་སྐྱེས། །ཕྱི་མ་མིང་སྲིང་གར་འགྲོ་ངེས་པ་མེད། །རྒྱལ་པོའི་རྒྱལ་སྲིད་མདང་སུམ་རྨི་ལམ་ཙམ། །འདོད་ཡོན་ལོངས་སྤྱོད་རྩྭ་ཁའི་ཟིལ་པ་འདྲ། །བྱང་ཆུབ་སེམས་ལ་ཕོ་མོ་མ་མཆིས་པས། །བདག་ནི་དམ་ཆོས་མཐར་ཕྱིན་བྱུང་གྱུར་ནས། །ཕ་མ་གཉེན་དང་མིང་པོའི་དྲིན་ལན་འཇལ། །སྲིང་མོ་རྒྱལ་སྲས་གཅིག་ལ་བྱིན་ན་ཡང་། །གཉེན་འདེབས་གཅིག་ལ་དགྲ་བོ་གསུམ་དུ་སྤེལ། །ཕ་རོལ་དགྲ་ཡིས་མིང་པོ་བཟོད་མི་བདེ། །སླར་ནི་ཕུང་གི་རྩ་བ་བུད་མེད་ཡིན། །དེ་བས་མི་གཅིག་ཆོས་ཀྱི་རྒྱུ་ཡིན་པས། །སྲིང་མོ་དམ་པའི་ཆོས་ལ་བཀའ་གནང་ཞུ། །ཞེས་ཞུས་སོ། །
དེ་ནས་མིང་པོ་ཆོས་རྒྱལ་གྱིས་འདི་ལྟར་གསུངས། འོ་ན་ལཀྵམི་ཀ་ར་རང་ཆོས་མགོ་འཐོན་ནས་སེམས་ཅན་གྱི་དོན་རྒྱ་ཆེན་པོ་ཞིག་མཛད་ཐུབ་ན་ཧ་ཅང་གི་སྐལ་བ་བཟང་། དེ་ནས་ཁྱོད་ཆོས་བྱེད་པ་ལ་གར་འགྲོ་གསུངས། ལཀྵམི་ཀ་རས་མིང་པོ་ལ་འདི་ལྟར་ཞུས། མིང་པོ་ང་ཆོས་བྱེད་པར་བླ་མ་ཇོ་བོ་དཔལ་གྱི་དྲུང་དུ་འགྲོའོ་ཞུས་པས། མིང་པོ་དྷརྨ་པཱ་ལས་རྒྱལ་སྲས་གཅིག་ལ་སྲིང་མོ་གཉེན་འདེབས་ཕྱིར་སྟེར་དགོས་བསམ་ཀྱང་སྲིང་མོ་ཆོས་བྱེད་པ་ལ་འགྲོ་བར་ཐག་བཅད་ཟིན་པས་བྱེད་ཐབས་དང་བྲལ་ནས། ཕྱོགས་ཕྱོགས་ནས་ཕེབས་པའི་རྒྱལ་བློན་འཁོར་བཅས་དང་ཕོ་ཉ་བ་རྣམས་ལ་འདི་ལྟར་སྨྲས། ང་ཡི་སྲིང་མོ་ལཀྵམི་ཀ་ར་དེ་སང་སྔ་དྲོ་དམ་པའི་ཆོས་ལ་འགྲོ་བ་ཐག་ཆོད་པས། ད་ཁྱེད་རྒྱལ་བློན་འཁོར་བཅས་རྣམས་ཀྱང་རང་རང་སོ་སོས་འབུལ་བའི་ནོར་རྣམས་ཁྱེར་ནས་སླར་ཡང་རང་ཡུལ་དུ་འགྲོ་བ་འཐད་གསུངས་སོ། །
དེ་ནས་རྒྱལ་བློན་རྣམས་ན་རེ། བུ་མོ་ཆོས་མགོ་འཐོན་ན་སྐལ་བ་བཟང་། བུ་མོ་ལ་རྒྱགས་ཀྱི་ཡོ་བྱད་ངེད་རྣམས་ཀྱིས་ཀྱང་འབུལ་ཆོག །དམ་པའི་ཆོས་ལས་ལེགས་པ་མེད་གསུང་བཞིན་ཕྱོགས་ཕྱོགས་ཀྱི་རྒྱལ་བློན་འཁོར་བཅས་རང་གནས་སུ་ལོག་ནས་ཕེབས་སོ། །དེ་ནས་བུ་མོ་ལཀྵམི་ཀ་རས་ཡབ་རྒྱལ་པོ་ཨིནྡྲ་བྷུ་ཏི་ལས་གསེར་བྲེ་གང་ཞུས། ཡུམ་ཡིད་འོང་བཟང་མོ་ནས་གཡུ་བྲེ་གང་དང་རིན་ཆེན་གསེར་གྱི་གའུ་གཅིག་དང་གསེར་གྱི་སོར་གདུབ་གཅིག་ཞུས། མིང་པོ་དྷརྨ་པཱ་ལ་ནས་ཆོས་བྱེད་ཆོག་པའི་བཀའ་ཤོག་བཅས་ཞུས་སོ། །དེ་ནས་བུ་མོ་ལཀྵམི་ཀ་རས་བདག་ལ་གཡོག་མོ་ཞིག་ཀྱང་དགོས་ཞེས་ཞུས་པ་ན། མིང་པ་དྷརྨ་པཱ་ལས་བུ་མོ་ཁྱེད་རང་ཆོས་རྣམ་དག་ཅིག་བསྒྲུབ་ཐུབ་ན་ཕྲན་གྱིས་ཀྱང་རྒྱལ་སྲིད་ཕྱེད་བགོས་ནས་སྟེར་ཆོག །སྲིང་མོ་ཁྱེད་རང་ལ་གཡོག་མོ་དགོས་ན་ཁྱེད་རང་གི་སེམས་དང་གང་མཐུན་པ་ཞིག་ཁྲིད་ཆོག་ཅེས་གསུངས་སོ། །
དེ་ནས་ལཀྵམི་ཀ་རས་ཆུང་གྲོགས་གཞོན་དུས་ནས་རྩེ་གྲོགས་བྱེད་ཅིང་ཐུགས་ལ་བཅངས་པའི་གཡོག་མོ་བསམ་འཕེལ་མ་ཁྲིད། བསམ་འཕེལ་མས་ཀྱང་བླ་མས་རྡོག་ཁྲེས་དང་འཚོ་བ་ཕྲན་བུ་ཁུར། དེ་ནས་དགུང་ལོ་བཅུ་གཉིས་ནས་འཇིག་རྟེན་འཁོར་བའི་ཁྱིམ་ཐབ་རྣམས་མི་གཙང་བའི་རྫས་བཞིན་དུ་དོར་ནས། ལཀྵམི་ཀ་རས་སྤྱི་གཙུག་ཏུ་ནོར་བུ་ཁུར་ཏེ་དམ་ཆོས་བུ་བཞིན་དུ་ལེན་ནས་བསམ་འཕེལ་མ་ཕྱག་ཕྱིར་ཁྲིད་དེ་ནགས་ཚལ་དྲ་བ་ཅན་གྱི་དགོན་པར་བླ་མ་ཇོ་བོ་དཔལ་གྱི་དྲུང་དུ་ཆོས་ཞུ་རུ་ཕྱིན་དུས་ཡབ་རྒྱལ་པོ་ཨིནྡྲ་བྷཱུ་ཏི། ཡུམ་ཡིད་འོང་བཟང་མོ། མིང་པོ་དྷརྨ་པཱ་ལ་དང་བློན་གཡོག་འཁོར་བཅས་རྒྱང་གྲགས་གཅིག་གི་སར་གདན་སྐྱེལ་ལ་ཕེབས་སོ། །དེ་ནས་རྒྱང་གྲགས་གཅིག་གི་སར་ཕེབས་ཟིན་པ་དང་། ཡབ་རྒྱལ་པོ་ཨིནྡྲ་བྷཱ་ཏིས་སྤྱན་ཆབ་མང་དུ་བསིལ་བཞིན་འདི་སྐད་ཅེས་གསུངས་སོ། །དཀོན་མཆོག་རྣམ་གསུམ་མཁྱེན་ནོ། །བདེན་པའི་སྨོན་ལམ་གྲུབ་ཅིག །ང་ཡི་སྙིང་དང་འདྲ་བའི། །བུ་མོ་ལཀྵམི་ཀ་རར། །ཆོས་ལམ་ལ་འགྲོ་བར་ཤོག །ལམ་ལ་བར་ཆད་མེད་པར་ཤོག །ཅི་གསུངས་བཀའ་བཞིན་འགྲུབ་པར་ཤོག །ཅེས་གསུངས་སོ། །དེ་ནས་ཡུམ་ཡང་སྤྱན་ཆབ་མང་དུ་བསིལ་ཞིང་འདི་སྐད་ཅེས་གསུངས། ཨ་མའི་སྙིང་དང་འདྲ་བའི་བུ་མོ་ལགས། །ལས་ཀྱིས་ཤི་བྲལ་བྱུང་ན་བྱ་ཐབས་མེད། །རྒན་རྒོན་མ་ཤི་ཚེ་རིང་བྱུང་གྱུར་ན། །བུ་མོ་མྱུར་མགྱོགས་མཇལ་བའི་སྨོན་ལམ་ཡིན། །ཅེས་གསུངས་བཞིན་བུ་མོ་ལཀྵམི་ཀ་རའི་སྐེ་ལ་མེ་ཏོག་གི་ཕྲེང་བ་གཅིག་ཕུལ་ནས། བུ་མོ་ཕེབས་ཕེབས་གསུངས་སོ། །དེ་ནས་ཡབ་ཡུམ་སྲས་དང་བློན་གཡོག་རྣམས་སྤྱན་ཆབ་མང་དུ་བསིལ་ཞིང་ཕྱི་མིག་ལོག་བཞིན་ལོག་བཞིན་སྐུ་མཁར་ལ་ལོག་ནས་ཕེབས་སོ། །
དེ་ནས་བཟུང་ལཀྵམི་ཀ་ར་དང་གཡོག་མོ་བསམ་འཕེལ་མ་གཉིས་པོ་རྒྱ་གར་ཤར་ཕྱོགས་སུ་ནགས་ཚལ་དྲ་བ་ཅན་བྱ་བའི་ཡུལ་དུ་བླ་མ་ཇོ་བོ་དཔལ་གྱི་དྲུང་དུ་ཆོས་ཞུ་བ་ལ་ཕེབས་པའི་འགོ་འཛུགས་མཛད། ཁ་ཆེ་ཁྲི་བརྟན་བྱ་བའི་ཡུལ་ནས་ནགས་ཚལ་དྲ་བ་ཅན་བྱ་བའི་ཡུལ་དེའི་བར་ལ་ཧ་ལམ་ལོ་གཅིག་དང་ཟླ་བ་གསུམ་ལས་མང་ཙམ་འགོར། ཕེབས་ལམ་ལ་མི་མེད་ལུང་སྟོང་ནགས་ཚལ་དང་ཆུ་ཕྲན་དང་ལུང་འཕྲང་དང་ཚ་གྲང་མང་པོ་མྱོང་བཞིན་ཕེབས་པའི་ཟླ་བ་བཅུ་དང་ཕྱེད་ཙམ་ན་མཉམ་དུ་ཡོད་པའི་འཚོ་བ་རྣམས་རྫོགས། ལུང་པ་དེར་འབྲོག་དང་ཁ་ཟས་ཤིང་ཏོག་སོགས་གཅིག་ཀྱང་མེད་པས་ཟླ་བ་གཅིག་དང་ཉིན་བཅུའི་རིང་ལ་ཤིང་སྡོང་གི་ལོ་མ་རྣམས་བཙོས་ནས་བཞེས་བཞིན་ཕེབས་སོ། །
དེ་ནས་ཉིན་ཁ་ཤས་ཀྱི་རྗེས་འཚོ་བ་དཀོན་རྐྱེན་གྱིས་ལཀྵམི་ཀ་ར་དང་བསམ་འཕེལ་མ་ལ་ཧ་ཅང་གི་དཀའ་ངལ་བྱུང་། དེ་ནས་ཉིན་བདུན་ཕེབས་པའི་རྗེས་ལི་ཁ་ར་ཤིང་འཕེལ་བྱ་བའི་ཡུལ་དེའི་རྟ་སྒོའི་གཞི་བདག་གིས་འཚོ་བ་ཕུལ། དེ་ནས་ཕེབས་པའི་ཉི་མ་བཅུ་གསུམ་གྱི་རྗེས་ལ་རྒྱང་གྲགས་གསུམ་ཙམ་ཞིག་ནས་ནགས་ཚལ་དྲ་བ་ཅན་གྱི་གསེབ་ཅིག་ན་བླ་མ་ཇོ་བོ་དཔལ་གྱི་འབིགས་ཤྲཱི་གཙུག་ལག་ཁང་དེ་མཇལ་པས་དཔོན་གཡོག་གཉིས་ཀྱི་སེམས་ལ་དགའ་བ་ཚད་མེད་བྱུང་ངོ་། །ལཀྵམི་ཀ་ར་དང་གཡོག་མོ་བསམ་འཕེལ་མ་གཉིས་ཡུལ་དེར་བྱོན་སྐབས་ཉི་མ་ཤར་ཏེ་ཕོག་པ་དང་དུས་མཉམ་དུ་བྱུང་ཞིང་། སངས་རྒྱས་ཀྱི་བསྟན་པ་ལ་ཉི་མ་ཤར་བའི་སྣང་བ་བྱུང་། ཐུགས་སྤྲོ་བཞིན་པའི་ངང་ནས་རྟེན་འབྲེལ་ཡང་བཟང་པོ་བྱུང་། ནགས་ཚལ་གྱི་ཤིང་དང་ལོ་འདབ་རྣམས་སོ་སོར་བྲལ་བས་སྲིད་གསུམ་གྱི་སྡུག་བསྔལ་ལས་ཆད་པའི་སྣང་བ་བྱུང་། སྟག་གཟིག་དོམ་གསུམ་ལ་སོགས་པའི་གཅན་གཟན་རྣམས་ཀྱང་བླ་མ་ལ་དད་ཅིང་གུས་པའི་ཚུལ་གྱིས་མ་བུ་འཕྲད་པ་བཞིན་གྱི་སྣང་བ་བྱུང་། ནགས་ཚལ་དྲ་བ་ཅན་གྱི་གསེབ་ནས་ཕེབས་དུས་གཅན་གཟན་སྟག་གཟིག་དོམ་དྲེད་དུག་སྦྲུལ་རྣམས་ངང་པའི་འགྲོས་འདྲ་གླང་ཆེན་དྲེགས་ལྟར་གཤེགས་པའི་སྣང་བ་བྱུང་། གཅན་གཟན་རྣམས་ཀྱི་སྐད་གདངས་ལས་དགེ་བའི་བཤེས་གཉེན་གྱིས་ལྐུགས་པར་སྨྲ་ལྕེ་གསར་དུ་སྩལ་པའི་སྣང་བ་བྱུང་ངོ་། །
དེ་ནས་ལཀྵམི་ཀ་རས་འབིགས་ཤྲཱི་གཙུག་ལག་ཁང་གི་ཆོས་ཁྲིམས་པ་ལ་བླ་མ་མཇལ་ཆོག་པའི་གནང་བ་ཞུས་པས། ཆོས་ཁྲིམས་པས་བླ་མ་ལས་གནང་བ་ཞུས། བླ་མའི་ཞལ་ནས་རྒྱལ་པོ་དྷརྨ་པཱ་ལ་དེ་ཐུགས་ཤིན་ཏུ་གཏུམ་པོའི་རྒྱལ་པོ་ཞིག་ཡིན་པས། དེ་ལ་ཆོས་བྱེད་ཆོག་པའི་བཀའ་ཤོག་ཡོད་མེད་ལྟོས་ཤིག་གསུངས། ཆོས་ཁྲིམས་པས་ཆོས་བྱེད་ཆོག་པའི་བཀའ་ཤོག་མཉམ་དུ་འདུག་ལགས་ཞུས་པས། བླ་མས་འོ་ན་བཀའ་ཤོག་བླ་མས་མཉམ་དུ་ཡོད་ན་ཁྲིད་ཤོག་གསུངས་སོ། །
དེ་ནས་ལཀྵམི་ཀ་ར་བླ་མའི་ཞབས་དྲུང་དུ་མཇལ་བ་དང་དད་པའི་སྤུ་ཉག་ཐམས་ཅད་གཡོ་ཞིང་ཕྱག་གསུམ་བཙལ་ནས་ཡབ་རྒྱལ་པོས་གནང་བའི་གསེར་བྲེ་གང་དེ་བླ་མ་ཇོ་བོ་དཔལ་ལ་དར་དཀར་སྣང་མཛོད་ཅིག་དང་བཅས་གུས་པས་ཕུལ། དེ་ནས་བླ་མས་མང་ཇ་གཅིག་ཕུལ་སྒྲིགས་གསུངས་པ་ལྟར་ལཀྵམི་ཀ་རས་བླ་མའི་སྐུ་མདུན་དུ་མང་ཇ་བཀོལ་ནས་ཕུལ་རྗེས་བླ་མའི་ཞལ་ནས་བུ་མོ་ཁྱོད་འཇིག་རྟེན་སྤངས་ནས་ཆོས་བྱེད་པའི་དོན་ཅི་ཡིན་ཞེས་དྲིས་པ་དང་། དེར་བླ་མའི་གཡས་གཡོན་དང་མདུན་ན་ཡོད་པའི་གྲྭ་བཙུན་རྣམས་ཀྱིས་བུ་མོ་འདིས་གང་ཞུ་འོང་བསམས་ནས་ཉན་བཞིན་ཡོད་པ་ལ། བུ་མོས་བླ་མ་ལ་འདི་ལྟར་ཞུས། འདི་ཕྱིའི་སྐྱབས་གནས་བླ་མ་རིན་པོ་ཆེ། །མི་ཚེ་འདི་བས་ཕྱི་མ་ཤུལ་ཐག་རིང་། །འཁོར་བའི་སྡུག་བསྔལ་བཟོད་གླགས་མི་འདུག་པས། །ཆོས་དབྱིངས་ཐར་པའི་ལམ་བཟང་སྟོན་པར་ཞུ། །བུ་མོ་བདག་ནི་བློ་དམན་ཤེས་རབ་ཆུང་། །ཚིག་ཉུང་དོན་ཆེན་གདམས་ངག་ཟབ་མོ་ཞིག །བརྩེ་བའི་ཐུགས་ཀྱིས་བདག་ལ་གནང་བར་ཞུ། །ཞེས་ཞུས་པ་དང་། དེར་བཞུགས་པའི་གྲྭ་བཙུན་རྣམས་ཀྱང་ཧ་ལས་སོ། །
དེ་ནས་བུ་མོ་ལཀྵམི་ཀ་ར་དགུང་ལོ་བཅོ་ལྔ་ནས་ཆོས་སྒོར་བཞུགས་ཏེ་བླ་མ་ཇོ་བོ་དཔལ་གྱི་དྲུང་ནས་རིག་པའི་གནས་ལྔ་ལ་སྦྱངས་པར་མཛད་ནས་སློབ་མ་གཞན་དག་ལས་མཁས་པར་གྱུར། དེ་ནས་ཉིན་རེ་བཞིན་དུ་ལཀྵམི་ཀ་ར་ཡིས་ཉིན་མོར་བླ་མའི་དྲུང་ནས་ཆོས་ཞུས། མཚན་མོར་ཡུལ་དེར་སྤྱན་རས་གཟིགས་ཁ་སར་པ་ཎི་ཞེས་པའི་ལྷ་ཁང་ཞིག་ཡོད་པས་བསམ་འཕེལ་མ་དང་མཉམ་དུ་དེའི་ནང་དུ་བྱོན་ནས། མཚན་མོ་གཟིམ་དུས་ཡང་དག་པའི་བླ་མ་ཞིག་དང་མཇལ་བར་ཤོག་ཅིག་གསུངས་ནས་གསོལ་བ་བཏབ་སྟེ་མནལ་གཟིམ་པར་མཛད། ཉིན་གཅིག་ཐོ་རངས་ཀྱི་མནལ་ལམ་དུ་རང་གི་ཡབ་རྒྱལ་པོ་ཨིནྡྲ་བྷཱ་ཡིན་ཟེར་བའི་ཁྱེའུ་ཆུང་ངུ་ཞིག་གིས་ཤེལ་དཀར་པོའི་བུམ་པ་མཛེས་ཤིང་ཡིད་དུ་འོང་བ་ཞིག་ཕྱག་ལ་བཞེས་ནས། ཁྱེའུ་དེ་ན་རེ། བུ་མོ་ཁྱེད་བླ་མ་འདི་དང་འཕྲད་པའི་སྐལ་ལྡན་ཡིན་པས་ཐུགས་རྗེ་ཆེན་པོ་སྒྲུབས་ཤིག་དང་འདོད་པའི་དོན་རྣམས་འགྲུབ་པར་འགྱུར་རོ། །ཞེས་གསུངས་སོ། །
དེ་ནས་ལཀྵམི་ཀ་ར་ཡིས་གཡོག་མོ་བསམ་འཕེལ་མ་ལ་རྨི་ལམ་འདི་འདྲ་མཐོང་གསུངས་ཤིང་ཡུལ་འདིར་ཐུགས་རྗེ་ཆེན་པོའི་ཆོས་འཁོར་བསྐོར་བ་ལ་མཁས་པའི་བླ་མ་སུ་ཞིག་བཞུགས་ཞེས་ཡུལ་དེའི་མི་རྣམས་ལ་དྲིར་བྱོན་དུས་དཔལ་ཕྱག་ན་རྡོ་རྗེའི་སྤྲུལ་པ་བཙུན་པ་ཞིག་དང་ཞལ་མཇལ་ནས། བཙུན་པ་དེ་ན་རེ། ཐུགས་རྗེ་ཆེན་པོའི་ཆོས་འཁོར་བསྐོར་བ་ལ་མཁས་པའི་བླ་མ་སངས་རྒྱས་འོད་དཔག་མེད་ཀྱི་རྣམ་སྤྲུལ་བླ་མ་ཇོ་བོ་དཔལ་དངོས་གྲུབ་ཅེས་བྱ་བ་འདི་རང་ཡིན་པས་ད་བུ་མོ་ཁྱོད་བླ་མའི་དྲུང་ནས་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་གི་དབང་ལུང་ཁྲིད་གསུམ་མན་ངག་དང་བཅས་པ་ཞུས་ཤིག་གསུངས་ནས་ལུང་བསྟན་ཏོ། །དེ་ནས་ལཀྵམི་ཀ་རས་རང་གི་དྲིན་ཅན་རྩ་བའི་བླ་མ་ཇོ་བོ་དཔལ་དངོས་གྲུབ་ནི་སངས་རྒྱས་འོད་དཔག་མེད་དངོས་ཡིན་པར་ངོས་ཟིན་ནས་དད་པའི་ལུས་ཀྱི་བ་སྤུ་ཐམས་ཅད་གཡོ་ཞིང་དགུང་ལོ་ཉི་ཤུ་རྩ་གཉིས་ལ་ཕེབས་པ་དང་བླ་མ་ཇོ་བོ་དཔལ་དངོས་གྲུབ་ཀྱི་དྲུང་ནས་རབ་ཏུ་བྱུང་བར་མཛད་ནས་བླ་མས་ལཀྵམི་ཀ་རའི་མཚན་ལ་དགེ་སློང་མ་དཔལ་མོ་ཞེས་མཚན་གསོལ་ཏོ།། །།
༤༽ གཞན་དོན་དུ་སྙུང་མཛེ་བཞེས་པ།
དེ་ནས་དགེ་སློང་མ་དཔལ་མོས་བླ་མའི་དྲུང་ནས་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཕྱག་སྟོང་སྤྱན་སྟོང་གི་དབང་ལུང་ཁྲིད་གསུམ་མན་ངག་དང་བཅས་པ་ཞུས་ཏེ། རང་གི་དྲིན་ཅན་རྩ་བའི་བླ་མ་ཇོ་བོ་དཔལ་དངོས་གྲུབ་ཀྱི་དྲུང་ནས་དགོངས་པ་ཞུས་ནས་རྒྱང་གྲགས་ཉི་ཤུ་རྩ་གཅིག་གི་རིང་ལ་ཕེབས་ནས་འཇག་མའི་སྤྱིལ་པོ་ཞིག་ཏུ་བཞུགས་ནས་ཐུགས་རྗེ་ཆེན་པོ་སྒྲུབ་པར་མཛད་ཅིང་ཟླ་བ་བདུན་ཙམ་གྱི་རྗེས་ལ། ཉིན་གཅིག་ཞབས་ཀྱི་མཐེ་བོང་གཅིག་གཡའ་བ་ཙམ་བྱུང་བས་འབྲུམ་ཆུང་ཞིག་བྱུང་། དེ་ནས་སྲིན་ཐོར་གཅིག་ཏུ་སོང་བས། དེའི་རྐྱེན་བྱས་ཞབས་ཀྱི་མཐིལ་ནས་སྤྱི་བོའི་གཙུག་བར་འབྲུམ་མཛེས་གང་ངོ་། །གློ་བུར་དུ་སྙུང་མཛེ་དྲག་པོ་དེ་བཞེས་པའི་དོན་ནི་ཕྲན་གྱི་ལུས་ལ་སྙུང་མཛེ་དྲག་པོ་དེ་མ་ལེན་ན་ཡུལ་དེའི་མི་རྣམས་ཧ་ཅང་གི་སྡུག་བསྔལ་ཞིག་མྱོང་དགོས་པ་འདུག་དགོངས་ནས་བྱང་སེམས་མའི་ཐུགས་ལ་འཁྲུངས་སོ། །
དེ་ནས་དགེ་སློང་མའི་སྙུང་མཛེ་དྲག་པོ་དེ་གཡོག་མོ་བསམ་འཕེལ་མས་མཐོང་བ་དང་ཁོ་ཧ་ཅང་གི་སེམས་སྐྱོ་ནས་ངུས། དེ་ནས་དགེ་སློང་མས་བསམ་འཕེལ་མ་བློ་ཕམ་བྱེད་མི་དགོས། ཕྲན་མ་རྒན་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་ལ་ན་བ་ཡིན་གསུངས་སོ། །དེའི་སྐབས་ལ་གཡོག་མོ་བསམ་འཕེལ་མས་དགེ་སློང་མ་ལ་ལུས་ཀྱི་སྒོ་ནས་ཅི་དྲག་གིས་ཞབས་ཏོག་དང་། ངག་གི་སྒོ་ནས་བསྔགས་བརྗོད་དང་། ཡིད་ཀྱི་སྒོ་ནས་དད་པའི་ཞབས་ཏོག་བཅས་ལུས་ངག་ཡིད་གསུམ་གྱིས་ཞབས་ཏོག་ཚད་མེད་ཞུས་སོ། །དགེ་སློང་མ་སྙུང་མཛེ་དྲག་པོ་ཞིག་གིས་ཟིན་ཏེ་བཞུགས་པའི་ཚེ་གཡོག་མོ་བསམ་འཕེལ་མར་དེ་ནས་བཟུང་སེམས་ལ་མདའ་ཕོག་པ་ལྟ་བུའི་སྡུག་བསྔལ་བྱུང་བས། ཞབས་ཏོག་གང་འདྲ་ཞིག་བྱས་ཀྱང་མ་ཕན། དེ་ནས་དགེ་སློང་མ་དཔལ་མོའི་སྐུ་ལུས་ཀྱི་སྙུང་ཟུག་སྔར་ལས་ཀྱང་སྡུག་ཏུ་སོང་ནས་དཀའ་ངལ་ཆེ་ཡང་ད་དུང་ཡང་བྱང་སེམས་མས་ཐུགས་རྒྱུད་ལ་སེམས་ཤུགས་དང་བློ་སྟོབས་མ་ཆུང་བའི་ངང་ནས་སེམས་ཅན་གྱི་དོན་ལ་ཉིན་རེ་བཞིན་དུ་འཕགས་པ་སྤྱན་རས་གཟིགས་ཀྱི་གཟུངས་སྔགས་ཡི་གེ་དྲུག་མ་ཨྃ་མ་ཎི་པདྨེ་ཧཱུཾ་སྒྲོང་བཞིན་བཞུགས་སོ། །
ཟླ་བ་གཉིས་ཀྱི་རྗེས་ལ་སླར་ཡང་འབིགས་ཤྲཱི་གཙུག་ལག་ཁང་དུ་བཞུགས་པའི་རང་གི་རྩ་བའི་བླ་མ་ཇོ་བོ་དཔལ་གྱི་དྲུང་དུ་བྱོན། ཕྱག་གསུམ་འཚལ་ནས། བླ་མ་རིན་པོ་ཆེ་ལགས། བདག་གི་ལུས་ལ་བྱུང་བའི་མཛེ་ནད་འདི་ལ་ཕན་པའི་ཡི་དམ་གྱི་ལྷ་ཞིག་གནང་བར་ཞུ་ཞུས་པས། བླ་མའི་ཞལ་ནས་ཀླུ་དང་ས་བདག་འདུལ་བ་ལ་འཕགས་པ་ཐུགས་རྗེ་ཆེན་པོ་བཅུ་གཅིག་ཞལ་འདི་ལས་ལྷག་པ་མེད་པས། ད་ཁྱོད་འདིར་མ་སྡོད་པར་འདི་ནས་རྒྱ་གར་ཤར་ཕྱོགས་སུ་ལི་ཁ་ར་ཤིང་འཕེལ་བྱ་བའི་ཡུལ་ཞིག་ཡོད་པས། དེ་ན་འཕགས་པ་སྤྱན་རས་གཟིགས་ཀྱི་ལྷ་ཁང་ཁྭ་སར་པ་ཎི་ཞེས་པ་ཞིག་ཡོད་པ་དེའི་དྲུང་དུ་སོང་ལ་འཕགས་པ་ཐུགས་རྗེ་ཆེན་པོ་སྒྲུབས་ཤིག་ཅེས་ལུང་བསྟན་ཏོ། །དེ་ནས་དགེ་སློང་མ་དཔལ་མོས་བླ་མ་ལ་འདི་ལྟར་ཞུས།
མི་འགྲོ་བྱས་ན་བླ་མའི་བཀའ་དང་འགལ། །འགྲོ་ན་རྐྱེན་བྱུང་ཟེར་ནས་ཞུས་པ་དང་། །
བླ་མའི་ཞལ་ནས་འདི་ལྟར་གསུངས།རྐྱེན་བྱུང་ན་དགེ་བའི་བཤེས་གཉེན་ཡིན། །
ལས་བྱུང་ན་སྡིག་པའི་ཕྱག་ཤིང་ཡིན། །
ཞེས་གསུངས་སོ། །དགེ་སློང་མ་དཔལ་མོ་བླ་མ་དང་འབྲལ་མ་ཕོད་པར་སྙིང་ལ་མདའ་ཕོག་པ་ལྟ་བུའི་སྡུག་བསྔལ་དཔག་ཏུ་མེད་པ་བྱུང་ནས་སྤྱན་ཆབ་མང་དུ་བསིལ་བཞིན་འདི་སྐད་ཅེས་ཞུས་སོ། །
ཀྱེ་མ་ཀྱེ་ཧུད་བླ་མ་རིན་པོ་ཆེ། །ཚེ་རབས་སྔོན་ནས་ད་ལྟ་ཚུན་ཆད་དུ། །ལས་དང་སྨོན་ལམ་དག་པས་ཞལ་མཇལ་པའི། །ང་ཡི་བློ་གཏད་བླ་མ་ཁྱེད་ལས་མེད། །ང་ལ་ཚེ་འདིར་ཁྱེད་རང་མ་གཏོགས་པ། །ནོར་དང་གྲོགས་ནི་བདག་ལ་དགོས་པ་མེད། །ལས་ཀྱི་ཤི་འབྲལ་བྱུང་ན་བྱ་ཐབས་མེད། །མ་ཤི་གསོན་འབྲལ་བྱེད་པ་ག་ལ་ཕོད། །ཅེས་ཞུས་ནས་བླ་མའི་ཞབས་ལ་ཕྱག་འཐམས་ནས་འབྲལ་བ་མེད་པར་རྗེས་སུ་ཟུངས་ཤིག་ཅེས་སྨོན་ལམ་བཏབ་པས། བླ་མས། བླ་མ་དང་སློབ་མ་རྒྱང་ན་དགའ། ཁྱེད་ཀྱི་འདོད་པའི་དོན་རྣམས་འགྲུབ་པར་འགྱུར་རོ་ཞེས་གསུངས་སོ། །དེ་ནས་དགེ་སློང་མ་དཔལ་མོ་བླ་མ་དང་བྲལ་མི་ཕོད་པ་ཡིན་ཀྱང་བླ་མའི་བཀའ་བཞིན་ཕེབས་དགོས་པའི་སྤྱན་ཆབ་མང་དུ་བསིལ་ཞིང་བླ་མར་ཕྱི་མིག་ལོག་བཞིན་ལོག་བཞིན་གཡོག་མོ་བསམ་འཕེལ་མ་དང་མཉམ་དུ་རྒྱ་གར་ཤར་ཕྱོགས་སུ་ལི་ཁ་ར་ཤིང་འཕེལ་བྱ་བའི་ཡུལ་ལ་ཕེབས་པའི་འགོ་འཛུགས་མཛད་དོ། །
དེ་ནས་ཁོང་གཉིས་འབིགས་ཤྲཱི་གཙུག་ལག་ཁང་གི་ནགས་ཚལ་དུ་འབྱོར་ནས་དེར་སྒྲུབ་པ་ཉམས་ལེན་མཛད་ཀྱིན་བཞུགས་སྐབས་དེར་གཙུག་ལག་ཁང་དེའི་བླ་མ་དགོངས་པ་རྫོགས་ནས་ལོ་ལྔ་དྲུག་ཙམ་སོང་ཡང་ད་བར་ཡང་སྲིད་ལྟ་བུ་མ་འབྱོར་བར་ལུས། དེ་དུས་ཡུལ་དེའི་རྒྱལ་བློན་རྣམས་དང་དགེ་སློང་ཀུན་ལ་འབིགས་ཤྲཱིའི་ནགས་ཚལ་ན་དགེ་སློང་མ་མཁས་ཤིང་སྒྲུབ་པ་ལ་གཞོལ་བ་ཞིག་བཞུགས་ཡོད་པར་རྒྱུས་སོང་ནས་དེ་ཉིད་འབིགས་ཤྲཱིའི་གཙུག་ལག་ཁང་གི་མཁན་པོར་བསྐོ་དགོས་པའི་གྲབས་གྲོས་མཛད་ནས་དགེ་སྐོས་སོགས་ཁོང་མཇལ་དུ་ཕེབས་ཏེ་ཁོང་གི་གནས་ཚུལ་ཀུན་ཞུས་པས། དགེ་སློང་མས་གཅིག་ནི་ངེད་རང་བུད་མེད་ཅིག་ཡིན་པས་སྐྱེས་པ་གྲྭ་པའི་མཁན་པོ་བྱེད་པ་གང་ལ་འོས་གསུངས་ཏེ་ཞལ་གྱིས་མ་བཞེས་ཀྱང་དེ་རྣམས་ཀྱིས་འུ་ཚུགས་བརྒྱབས་པས་ཞལ་གྱིས་བཞེས་ཏེ་དགུང་ལོ་ཉེར་གཅིག་ནས་འབིགས་ཤྲཱིའི་གཙུག་ལག་ཁང་དུ་ཕེབས། དེར་དགེ་འདུན་རྣམས་ཀྱིས་མཁན་པོའི་བཞུགས་ཁྲིར་མངའ་གསོལ་མཛད་པ་ལྟར་འདུས་སྡེར་དུས་རྒྱུན་ཇི་ལྟར་འཚམ་པའི་གསུང་ཆོས་ཟབ་མོ་སྩལ་དང་སྩོལ་བཞིན་བཞུགས། འདུལ་བའི་བཅས་པ་ཕྲ་ཞིང་ཕྲ་བ་རྣམས་ཀྱང་མིག་འབྲས་བཞིན་དུ་བསྲུངས། མ་ཟད་དགེ་འདུན་གྱི་སྡེ་ཡང་སྤྱིར་སྡེ་སྣོད་གསུམ་དང་ལྷག་པར་དུ་ཆོས་འདུལ་བ་ལ་བྱང་ཆུབ་པར་མཛད་ནས་གཞི་གསུམ་གྱི་ཉམས་ལེན་ལ་བརྩོན་པར་མཛད་པས། མི་སྐྱ་ཕོ་མོ་རྣམས་ཀྱིས་ཀྱང་འབིགས་ཤྲཱིའི་གཙུག་ལག་ཁང་གི་གྲྭ་པ་རྣམས་ལ་བསྔགས་བརྗོད་ཆེན་པོ་བྱས། དེ་ཡང་དགེ་སློང་མ་དཔལ་མོའི་སྐུ་དྲིན་ལ་དེ་ལྟར་བྱུང་བར་བརྗོད་དོ། །
དེ་ནས་དགུང་ལོ་ཉེར་ལྔ་ལོན་པའི་སྐབས་སྔར་གྱི་སྙུང་ཟུག་སྡུག་ཏུ་སོང་སྟེ་ཟླ་བ་གསུམ་ཙམ་གྱི་རྗེས་ལ་དགེ་སློང་མ་དཔལ་མོའི་ཞབས་ཀྱི་སོར་མཛུབ་བཅུ་ཆད། དེ་ནས་ཟླ་བ་ལྔ་ལོན་པ་དང་ཕྱག་མཛུབ་བཅུ་ཆད། དེའི་ཚེ་དཔོན་གཡོག་གཉིས་ཀའི་ཐུགས་ལ་སྡུག་བསྔལ་དྲག་པོ་བྱུང་བས། བསམ་འཕེལ་མས་བླ་མ་འཇག་མའི་སྤྱིལ་པོ་ཞིག་གི་འགྲམ་དུ་ཡོལ་བས་བསྐོར་ཏེ། སྐུ་ལུས་གཞན་གྱིས་མི་མཇལ་བ་ལྟར་བྱས་ནས་བཞག་པའི་དུས་སྐབས་དེར་ཀུན་གྱིས་རྣག་ཁྲག་གི་དྲི་ཚོར་ནས་གྲྭ་པ་གཞོན་པ་ཁ་ཤས་ཀྱིས་དགེ་སློང་མ་ཕྱི་ལ་ཐོན་ཞུས་པས། བསམ་འཕེལ་མས་འཐོན་རྒྱུ་མེད་ཟེར་བས། དེ་ནས་དགེ་སློང་མས་གསུངས། བསམ་འཕེལ་མ་ང་རང་རྫུན་ངེད་ཀྱང་མི་རྫུན་རང་གི་ལུས་པོ་དེ་རྫུན་གསུངས་སོ། །བསམ་འཕེལ་མས་བླ་མ་ཁུར་བ་ན་ཕྱག་ཞབས་མེད་པའི་སྟབས་ཀྱིས་དེར་སྟོན་ནས་ཁུར་ཅིག་གསུངས་སོ། །
དེ་ནས་བསམ་འཕེལ་མས་ཁུར་ནས་བྱོན་པས་ཞབས་ས་ལ་གཏུགས་པ་ལས། སྐུ་ལུས་དེ་ཉིད་ཁུར་བོར་བ་ལྟར་བྱུང་བས། དགེ་སློང་མ་འོ་བརྒྱལ་ལན་གསུམ་བྱུང་ཞིང་འབག་པའི་ཏོག་ཏུ་གྱུར་ཏོ། །དེ་ནས་ནང་གི་མི་རྣམས་མ་དགའ་བས་ལམ་ཁའི་བྲག་ཕུག་གཅིག་ཏུ་ཟླ་བ་གསུམ་བཞུགས་པའི་ཚེ། དགེ་སློང་མ་ན་རེ། བསམ་འཕེལ་མ་གླེང་མོ་བྱེད་ཡར་ཤོག་གསུངས། དེ་ནས་དགེ་སློང་མ་དཔལ་མོས་བླ་མའི་བཀའ་བཞིན་རྒྱ་གར་ཤར་ཕྱོགས་ལི་ཁ་ར་ཤིང་འཕེལ་བྱ་བའི་ཡུལ་ལ་འགྲོ་ན་དགའ། གང་བྱེད་བདག་གི་མཛེ་ནད་ད་སྔར་ལས་ཀྱང་ཇེ་ལོང་དུ་སོང་ན་འགྲོ་མི་ཐུབ་པས་བླ་མའི་བཀའ་དང་འགལ་ལོ་སྙམ་ནས། བསམ་འཕེལ་མ་ལ་འདི་ལྟར་གསུངས། ད་ཁྱོད་རང་ཁང་པ་ཤར་ལ་བསྟན་ནས་ཡོད་པའི་ཡུལ་ཕྱོགས་དེ་ལ། གནས་པོ་གནས་མོ་གཉིས་ཡོད་ས་དེར་སོང་ལ་གླང་གཉིས་ཁྲིད་ཤོག་གསུངས་པས། དགེ་སློང་མའི་བཀའ་བཞིན་བསམ་འཕེལ་མས་ཡུལ་དེར་ཕྱིན་ནས་གླང་གཉིས་དེད་ནས་འོངས་པས་དགེ་སློང་མ་དེ་ཉིད་ཕྱག་ཞབས་མེད་པས་ཆུབ་མ་ཐུབ། གླང་དེ་ཉིད་བྱོལ་སོང་དུད་འགྲོ་ཡིན་པའི་སྟབས་ཀྱིས་ལུས་སྒུར་མ་ཤེས། དེ་ནས་གླང་གི་རྐང་ལག་བཞི་སར་བསྐུམས་ནས་བཞག་པས། དགེ་སློང་མ་བཞོན་ཚུགས་པ་བྱུང་། བསམ་འཕེལ་མས་ཀྱང་བླ་མའི་རྡོག་ཁྲེས་དང་བཞེས་ཆས་སོགས་ཁུར་ཏེ་བླ་མའི་རྗེས་སུ་ཕྱིན།
དེ་ནས་ཟླ་བ་གཅིག་ཙམ་ཕེབས་པའི་རྗེས་ལམ་ཁའི་བྲག་ཕུག་གཅིག་ཏུ་ཕྱིན་ནས་བཞུགས་པའི་ཚེ། དེའི་ལམ་དུ་ཚོང་པ་མི་ལྔ་འགྲོ་བ་གཟིགས་ནས་ཡར་ཤོག་གསུངས། དེ་ནས་དགེ་སློང་མ་དཔལ་མོས་ཁྱེད་རང་རྣམས་ཡུལ་གང་ནས་ཡིན་གསུངས་པས། ཚོང་པ་རྣམས་ན་རེ། ཕྲན་རྣམས་ཁ་ཆེ་ཁྲི་བརྟན་ཟེར་བའི་ཡུལ་ནས་ཡིན་ལགས་ཞུས། ཁྱེད་ཅག་རྣམས་རྒྱལ་པོ་སུ་ཡི་ཞབས་འོག་ཡིན་གསུངས། ཕྲན་རྣམས་རྒྱལ་པོ་ཨིནྡྲ་བྷ་ཏིའི་ཕྱག་ཞབས་ཡིན་ལགས་ཞུས། རྒྱལ་པོ་བཞུགས་ཡོད་དམ་གསུངས་པས། རྒྱལ་པོ་སྐུ་གཤེགས་སོང་ཞུས། ཡུམ་ཡིད་འོང་བཟང་མོ་བཞུགས་ཡོད་དམ་གསུངས་པས། ཡུམ་ཆེན་ཡང་སྐུ་གཤེགས་སོང་ཞུས། རྒྱལ་པོ་དྷརྨ་པཱ་ལ་བཞུགས་ཡོད་དམ་གསུངས་པས། རྒྱལ་པོ་དྷརྨ་པཱ་ལ་ནི་ནུབ་ཕྱོགས་རྣམ་དག་ཨོ་རྒྱན་གླིང་ལ་ཆོས་ཞུ་བར་ཕེབས་ཞུས། འབིགས་ཤྲཱི་ལྷ་ཁང་གི་བླ་མ་ཇོ་བོ་དཔལ་དངོས་གྲུབ་བཞུགས་འདུག་གམ་གསུངས་པས། བླ་མ་ཇོ་བོ་དཔལ་དངོས་གྲུབ་ཀྱང་དགོངས་པ་ཆོས་དབྱིངས་སུ་གཤེགས་ནས་ཟླ་བ་ཁ་ཤས་སོང་འདུག་ཞུས་སོ། །དགེ་སློང་མ་དཔལ་མོའི་སྐུ་ལུས་ལ་མཛེ་ནད་དྲག་པོས་ཟིན་ཏེ་བཞུས་པའི་ཁར་ཚོང་པ་རྣམས་ནས་ལོ་རྒྱུས་འདི་ལྟར་གསན་པས། དགེ་སློང་མ་ཐུགས་སྐྱོ་བ་ཚད་བཟུང་མེད་པའི་ངང་ནས་དེར་ངལ་གསོ་བའི་ཚོང་པ་ལྔ་པོ་དང་བསམ་འཕེལ་མ་ལ་འདི་ལྟར་གསུངས།
ཀྱེ་མ་ཀྱེ་ཧུད་འདི་འདྲའི་སྡུག་བསྔལ་ལ། །སྐྱོ་བའི་ལུས་ལ་སྐམ་པའི་མཛེ་ཡིས་ཟིན། །ལུས་ནས་ཐོན་པའི་རྣག་ཁྲག་མཚོ་ལྟར་འཁྱིལ། །སྡོད་པའི་གནས་ན་བྲག་ཕུག་སྟོང་པའི་ནང་། །འཁོར་བའི་མི་ནི་སྦྲང་མ་ཙམ་ཡང་མེད། །ཡབ་ཆེན་ཆོས་ཀྱི་རྒྱལ་པོ་དགོང་ལ་གཤེགས། །ཡུམ་ཆེན་ཨ་མ་ཚེ་འདིའི་སྣང་བ་ནུབ། །བསམ་བློ་གཏད་པའི་མིང་པོ་ཆོས་ལ་བྲོས། །ཆོས་བསྐུར་སྤྲོས་པའི་བླ་མ་ཞིང་ལ་གཤེགས། །དམ་ཚིག་མེད་པའི་སློབ་མས་བླ་མ་བཏོན། །སེམས་ལ་སྐྱོ་བ་ཡོད་དོ་བསམ་འཕེལ་མ། །ལས་ཀྱི་ཤི་འབྲལ་བྱུང་ན་བྱ་ཐབས་མེད། །མ་ཤི་གསོན་འབྲལ་མེད་དོ་བསམ་འཕེལ་མ། །ཞེས་གདུང་བའི་སྨྲེ་ངག་འདི་ལྟར་གསུངས་པ་དང་། འབིགས་ཤྲཱི་ལྷ་ཁང་གི་བྲིས་སྐུ་རྣམས་ཀྱང་ཞལ་དགེ་སློང་མ་བཞུགས་པའི་ཕྱོགས་ལ་གྱུར་ཏེ་བཞུགས་སོ། །
དེ་ནས་དགེ་སློང་མ་དཔལ་མོ་དང་བསམ་འཕེལ་མ་གཉིས་པོ་ཧ་ལམ་རྒྱང་གྲགས་གསུམ་ཙམ་ཕེབས་ནས་དེ་གར་རྩྭའི་སྤྱིལ་པོ་ཞིག་གི་ནང་དུ་བཞུགས་ནས་ཐུགས་རྗེ་ཆེན་པོ སྒྲུབ་པར་མཛད་ཅིང་ཟླ་བ་གཉིས་ཙམ་བཞུགས་པ་ན། དགེ་སློང་མའི་སྙུང་ཟུག་སྔར་ལས་ཀྱང་སྡུག་ཏུ་སོང་བས་དགེ་སློང་མའི་ཞལ་ནས། བསམ་འཕེལ་མ་གནས་འདིར་མཚམས་ཁང་ཞིག་རྒྱོབས་གསུངས་པས། དེ་བཞིན་བསམ་འཕེལ་མས་དགེ་སློང་མའི་བཀའ་བཞིན་མཚམས་ཁང་འདོམ་གང་གྲུ་བཞི་མ་ཞིག་བརྒྱབས་པས། མཚམས་ཁང་དེ་བདུན་ཞག་གསུམ་གྱི་རིང་ལ་ལེགས་པར་བསྒྲུབས།
དེ་ནས་དགེ་སློང་མས་བསམ་འཕེལ་མ་ད་འདི་རུ་བསྡད་ན་རྒན་པ་དང་མོ་མཉམ་དུ་རུལ་པའི་དཔེ་བཞིན་འདུག་པས་འདི་རུ་སྡོད་པ་བས་བསམ་འཕེལ་མ་རང་གླང་གཉིས་པོ་ཡང་བདས་ནས་སྤྲོད། སླར་རང་ཡུལ་ཁ་ཆེ་ཁྲི་བརྟན་ལ་ཡུམ་ཆེན་ཨ་མས་གནང་བའི་གཡུ་བྲེ་གང་དེ་ཡང་བསམ་འཕེལ་མ་རང་གིས་ཁྱེར་ནས་སོང་གསུངས་པས། བསམ་འཕེལ་མ་དེ་ཉིད་སེམས་ལ་སྐྱོ་ཤས་ངེས་འབྱུང་དྲག་པོའི་སྒོ་ནས་མིག་ནས་མཆི་མ་བྱུང་སྟེ་འདི་ལྟར་ཞུས།
ཀྱེ་མ་ཀྱེ་ཧུད་སློབ་དཔོན་རིན་པོ་ཆེ། །སྨོན་ལམ་དབང་གིས་དཔོན་གཡོག་ལྷན་ཅིག་འཛོམས། །ཁྱེད་ཐུགས་བརྩེ་བའི་བུ་ཡང་ང་ཡིན་ཞིང་། །ང་ཡི་བློ་གཏད་ཕ་མ་ཁྱེད་ལགས་པས། །ཁྱོད་དང་བྲལ་ནས་གང་ཡང་བག་མི་ཆགས། །སྐད་ཅིག་ཙམ་ཡང་འབྲལ་བར་མ་མཆིས་པས། །ང་ལ་ཚེ་འདིར་ཁྱོད་རང་མ་གཏོགས་པ། །ནོར་དང་གྲོགས་ནི་བདག་ལ་དགོས་པ་མེད། །དགེ་འདུན་སློབ་མའི་དཀྱིལ་དུ་བཞུགས་དུས་ཀྱང་། །ཁྱེད་སྐུ་བར་ཆད་ནད་ཀྱིས་ཟིན་ན་ཡང་། །ང་ནི་ཁྱེད་དང་ཡུད་ཙམ་འབྲལ་མི་ཕོད། །ད་ནི་བྱེ་ཐང་དེ་ལ་སླེབས་པའི་དུས། །ལས་ཀྱིས་ཤི་བྲལ་བྱུང་ན་བྱ་ཐབས་མེད། །མ་ཤི་གསོན་བྲལ་བྱེད་པ་ག་ལ་ཕོད། །བདག་ནི་ཞབས་ཏོག་སྒྲུབ་བཞིན་སྡོད་པར་ཞུ། །ཞེས་ཞུས་པ་དང་། དགེ་སློང་མ་དཔལ་མོའི་ཕྱག་བསམ་འཕེལ་མའི་མགོ་ལ་བཞག་ནས་འདི་ལྟར་གསུངས། ཆུང་ནས་འགྲོགས་ཤིང་ཕན་སེམས་ཆེ་བའི་གྲོགས། །བརྩེ་གདུང་ཅན་གྱི་བུ་མོ་བསམ་འཕེལ་མ། །ད་ནི་ཁྱེད་ལ་ཕན་པའི་མཐའ་རྫོགས་པས། །སྤང་ལྗོངས་འདི་ནི་ང་ཡི་དུར་ས་ཡིན། །སེམས་ཅན་དོན་ལ་གྲུབ་པའི་ན་ཚ་འདི། །ཇི་ལྟར་བྱས་ཀྱང་ཕན་པ་མི་སྲིད་པས། །ད་ནི་མི་མིན་མཛེ་མའི་རོ་ཡིན་ནོ། །མཛེ་མའི་རོ་ལ་ཞེན་ཆགས་མ་བྱེད་པར། །བུ་མོ་གང་དགའི་ཡུལ་དུ་འགྲོ་ན་ལེགས། །ཞེས་གསུངས་པ་དང་། ཡང་བསམ་འཕེལ་མས་ཞུ་བ་འདི་ལྟར་ཕུལ།
ཚེ་རབས་སྔོན་ནས་ད་ལྟ་ཚུན་ཆད་དུ། །ལས་དང་སྨོན་ལམ་དག་པས་ཞལ་མཇལ་བའི། །བློ་གཏད་སྐྱབས་མགོན་བྱེད་པའི་དགེ་སློང་མ། །ང་ཡིས་ཆུང་ནས་ཁྱོད་ཀྱི་ཞབས་ཏོག་ཞུས། །ལུས་ངག་ཡིད་གསུམ་ཞབས་ཏོག་ཅི་འགྲུབ་བྱས། །རང་དོན་བདེ་སྐྱིད་ཙམ་ཡང་བྱེད་མ་མྱོང་། །ཁྱོད་ཀྱི་ལུས་ལ་ཐེབས་པའི་ན་ཚ་དང་། །བདག་གི་སེམས་ལ་ཕོག་པའི་སྡུག་བསྔལ་གཉིས། །ཚ་གྲང་མཉམ་དུ་མྱོང་བ་མ་གཏོགས་པར། །རང་དོན་སྐད་ཅིག་ཙམ་ཡང་བྱེད་མ་མྱོང་། །ཁྱོད་ཀྱི་ཐུགས་ལ་འགྱོད་པ་མ་དགོངས་ན། །ང་ལ་སྐལ་བ་བཟང་པོ་ཡོད་གྱུར་ན། །དགེ་སློང་ཁྱོད་དང་ཚེ་འདིར་མཇལ་བར་ཤོག །གལ་ཏེ་ཚེ་འདིར་མཇལ་བར་མ་གྱུར་ན། །སྐྱེ་བ་འདི་ནས་ཕྱི་མར་གར་སྐྱེས་ཀྱང་། །ཁྱོད་ནི་ང་ཡི་སློབ་དཔོན་འགྱུར་བ་དང་། །ཁྱོད་ཐུགས་དགྱེས་པའི་ཞབས་ཏོག་བསྒྲུབ་པར་ཤོག །ཕྱི་མ་བདེ་བ་ཅན་དང་མཁའ་སྤྱོད་དུ། །དཔོན་གཡོག་ལྷན་ཅིག་མཇལ་བའི་སྨོན་ལམ་ཡིན། །ཞེས་ཞུས། དེ་ནས་བཟུང་མཚམས་ཁང་ནང་དུ་དགེ་སློང་མ་སྤྱོད་པའི་བསམ་གཏན་ལ་བཞུགས་པ་ལ་ངེས་པར་གྱུར། མཚམས་ཁང་གི་ཕྱོགས་བཞི་ལ་བུ་ག་སྟོན་ནས་མཚམས་ཤིང་རེ་རེ་བཀལ། མཚམས་རྡོ་མཐོ་ཡོར་གསུམ་གསུམ་རེ་བརྩིགས་སོ། །དེ་ནས་བསམ་འཕེལ་མ་བླ་མ་དང་འབྲལ་མ་ཕོད་ཀྱང་ཡུལ་གནས་ལ་བླ་མའི་བཀའ་བཞིན་སླར་འགྲོ་དགོས་བྱུང་། བླ་མས་གནང་བའི་གཡུ་དེ་ཁུར་ནས་གླང་གཉིས་པོ་མདུན་དུ་བཅུགས་ནས་ཤར་གྱི་བུ་ག་དེ་ནས་ཕར་ལ་འདི་ལྟར་ཞུས།
འདི་ཕྱིའི་སྐྱབས་གནས་བླ་མ་རིན་པོ་ཆེ། ང་རང་ཡུལ་གནས་ལ་ཅི་ཙམ་བསྡད་དེ་ལོག་ཞུས་པས། བླ་མས། བསམ་འཕེལ་མ་ཁྱེད་རང་ཁ་ཆེ་ཁྲི་བརྟན་དུ་མི་ལོ་བཅུ་གསུམ་སྡོད་ལ་ལོག་ཤོག་གསུངས། དེ་ནས་བསམ་འཕེལ་མ་དེ་ཉིད་སེམས་ལ་སྐྱོ་ཤས་ངེས་འབྱུང་དྲག་པོའི་སྒོ་ནས་མིག་ཆུ་ཆར་ལྟར་འབབ་བཞིན་ལན་གཉིས་པ་ཞུས་པས། དེ་ནས་དགེ་སློང་མས་མི་ལོ་དགུ་ཟླ་བ་དགུ་དང་ཞག་དགུ་སྡོད་ལ་ལོག་ཤོག་གསུངས། བསམ་འཕེལ་མས་ཕྱག་མང་འཚལ་ཞིང་འདི་སྐད་ཞུས།
ཀྱེ་མ་ཀྱེ་ཧུད་ཐུགས་རྗེ་ཆུང་། །བདག་གི་བློ་གཏད་སུ་ལ་འཆའ། །ང་ལ་ཚེ་འདིར་ཁྱེད་རང་མ་གཏོགས་པ། །ཆོས་འབྲེལ་ཞུ་བའི་བླ་མ་བདག་ལ་མེད། །ལས་ཀྱིས་ཤི་བྲལ་བྱུང་ན་བྱ་ཐབས་མེད། །མ་ཤི་གསོན་བྲལ་བྱེད་པ་ག་ལ་ཕོད། །དགེ་སློང་མས་འོ་ན་མི་ལོ་བདུན་དང་ཞག་བདུན་སྡོད་ལ་ལོག་ཤོག་གསུངས་སོ། །དེ་ནས་བསམ་འཕེལ་མས་བླ་མ་དང་འབྲལ་མ་ཕོད་ཀྱང་བླ་མའི་བཀའ་བཞིན་བྱེད་ཐབས་དང་བྲལ་ནས། བསམ་འཕེལ་མས་ཕྱག་མང་དུ་འཚལ་ཞིང་བླ་མ་བཞུགས་པའི་ཤར་གྱི་བུ་ག་ནས་མེ་ཏོག་གི་ཕྲེང་བ་ཞིག་ཕུལ་ནས་མྱུར་མགྱོགས་མཇལ་བའི་སྨོན་ལམ་བཏབ་སྟེ་མིག་ཆུ་འབྲལ་མེད་དུ་གཏོང་བཞིན་དབུགས་རིང་ཐོན་ནས་སྡུག་བསྔལ་བཟོད་གླགས་མེད་བཞིན་དུ་རྐང་པ་ཕྱི་འཐེན་བཅས་འགྲོའོ། །
༥༽ བསམ་འཕེལ་མ་རང་ཡུལ་དུ་ལོག་པ།
དགེ་སློང་མ་དཔལ་མོས་གཡོག་མོ་བསམ་འཕེལ་མ་སླར་འགྲོ་བའི་ཚེས་ནས་བཟུང་སྟེ་ཞབས་རྡོ་རྗེ་སྐྱིལ་ཀྲུང་དུ་བཞུགས། སྒལ་ཚིག་མདའ་ལྟར་བསྲང་། རང་ལུས་འཕགས་པའི་དཀྱིལ་འཁོར། ངག་གིས་ཡི་གེ་དྲུག་མའི་དཀྱིལ་འཁོར། ཐུགས་གསལ་སྟོང་འཛིན་པ་མེད་པའི་དཀྱིལ་འཁོར། དཀྱིལ་འཁོར་གསུམ་གྱིས་སྒྲུབ་པ་ལ་བཞུགས་སོ། །
དེ་ནས་བསམ་འཕེལ་མ་མཚམས་ཁང་ནང་དུ་བཞུགས་པའི་བླ་མ་དང་བྲལ་དུས་སུ་གནམ་ས་ལ་བརྡིབས་པ་ལྟར་སྡུག་བསྔལ་བཟོད་གླགས་མེད་བཞིན་དུ་གླང་གཉིས་མདུན་ལ་འདེད་ཀྱིན་མིག་ཆུ་མང་དུ་གཏོང་ཞིང་ཕྱི་མིག་ལོག་གིན་ལོག་གིན་ཁ་ཆེ་ཁྲི་བརྟན་གྱི་ཡུལ་ལ་ལོག་གོ །བསམ་འཕེལ་མ་ལམ་དུ་སྔར་གྱི་དཔོན་གཡོག་གཉིས་པོ་བཞུགས་པའི་བྲག་ཕུག་དེའི་ནང་ལ་སླེབས་པས། བླ་མ་དྲན་པའི་གདུང་ཤུགས་ཀྱིས་སྐྱོ་ཤས་དྲག་པོའི་སྒོ་ནས་མིག་ནས་མཆི་མ་ཕྱུང་སྟེ་སྡོད་པའི་ཚེ། སྤོས་དྲི་ངད་བཟང་པོའི་དྲི་ཚོར་བ་ལྟ་བུ་བྱུང་ངོ་། །དེར་བླ་མའི་སྐུ་ལུས་ལས་བབས་པའི་རྣག་ཁྲག་ཐམས་ཅད་རྡུལ་ཆགས་པ་དེ་རྣམས་བཞེས་ནས་སླར་ལམ་དུ་ཕྱིན་ཏོ། །
དེ་ནས་གླང་གཉིས་གནས་པོ་དེའི་ལག་ཏུ་སྤྲད། བསམ་འཕེལ་མ་མོ་རང་ཁ་ཆེ་ཁྲི་བརྟན་ཡུལ་རྒྱལ་ཁམས་དེ་ལ་སླེབས་པ་དང་། དེར་བླ་མའི་ཐུགས་རྗེས་རྒྱལ་པོ་དྷརྨ་པཱ་ལར་སྲས་ཆེ་བ་བྱང་ཆུབ་ནམ་མཁའ་དང་། ཆུང་བ་བྱང་ཆུབ་ལེགས་པ་གཉིས་འཁྲུངས་ནས་འདུག །བསམ་འཕེལ་མ་རྒྱལ་པོའི་མཁར་དུ་སླེབས་པ་དང་རྒྱལ་པོ་དྷརྨ་པཱ་ལ་དེ་ཐུགས་ཤིན་ཏུ་གཏུམ་པོ་ཞིག་བཞུགས་ཡོད་པས་ལོ་མང་པོ་ཞིག་གི་སྔོན་ལ་ང་དང་མཉམ་དུ་ཕེབས་པའི་རྒྱལ་པོའི་སྲིང་མོ་ལཀྵམི་ཀ་ར་མི་མེད་ཐང་སྟོང་ཞིག་ཏུ་བཞུགས་ནས་ཡོད་པའི་གཏམ་རྣམས་རྒྱལ་པོ་ལ་ཞུ་མ་ཐུབ་པར་བསམ་འཕེལ་མ་ཡན་ལག་རྣམས་འདར་བཞིན་འདར་བཞིན་ཕྱིན་པ་དང་ཡབ་རྒྱལ་པོའི་གཟིམ་ཆུང་ཀ་བཞི་པའི་ནང་དུ་འབྱོར། དེར་སྔར་བཞུགས་པའི་རྒྱལ་པོ་ཨིནྡྲ་བྷཱུ་ཏི་དང་། ཡུམ་ཡིད་འོང་བཟང་མོ་ཡང་ཞིང་ལ་གཤེགས་ནས་མེད་པ་དང་། རྒྱལ་པོ་དྷརྨ་པཱ་ལ་ཡང་ནུབ་ཕྱོགས་རྣམ་དག་ཨོ་རྒྱན་གྱི་ཡུལ་ལ་གསུང་ཆོས་ཞུ་བར་ཕེབས་ནས་བཞུགས་མེད་པ་དང་། སྔར་སྐྱོ་བའི་སྒྲ་ཐོས་པ་དེ་ལ་དངོས་མར་མཐོང་བ་དང་བསམ་འཕེལ་མ་ཤིན་ཏུ་བློ་ཕམ་ཆེ་བའི་ངང་དུ་ལུས། དེ་ནས་མོས་ཉིན་རེ་བཞིན་དུ་རང་གི་བླ་མ་དྲན་པའི་གདུང་ཤུགས་སྐྱོ་ཤས་དྲག་པོའི་སྒོ་ནས་སྡུག་བསྔལ་གྱི་ངང་ནས་ཉིན་རེ་ནས་མི་ལོ་བདུན་ནམ་ཞིག་རྫོགས་ཡོང་བསམས་ནས་རྩི་བཞིན་བསྡད་དོ། །
༦༽ ལི་ཁ་ར་ཤིང་འཕེལ་དུ་བྱོན་པ།
དེ་ནས་བཟུང་དགེ་སློང་མ་དཔལ་མོ་ལ་འཕགས་པ་སྤྱན་རས་གཟིགས་ཕྱག་སྟོང་སྤྱན་སྟོང་གི་ཞལ་གཟིགས་མ་བྱུང་བར་དུ་དམིགས་བསལ་དུ་སྡོངས་གྲོགས་བྱེད་པའི་བཀའ་སྲུང་ལྷ་ཆེན་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་དང་། ལི་ཁ་ར་ཤིང་འཕེལ་བྱ་བའི་ཡུལ་དེའི་རྟ་སྒོའི་གཞི་བདག་གིས་འཚོ་བ་ལེགས་པར་ཕུལ་བར་མཛད། དེར་ཟླ་བ་བདུན་དང་ཞག་བདུན་ལོན་པ་དང་། དགེ་སློང་མ་ལ་མནལ་དང་འོད་ཟེར་འདྲེས་པའི་ཉམས་སྣང་ཞིག་ལ། སྐུ་སྨད་ཀྱི་བཤང་ལམ་ཆུ་ལམ་ནས་སྦལ་ལྕོང་ཉ་སྦྲུལ་ལ་སོགས་པ་མང་པོ་ཐོན་ཏེ་ས་འོག་ལ་སོང་བར་མནལ་ལམ་དུ་གཟིགས་ཏེ། ཞལ་ནས་ཡི་གེ་དྲུག་མ་གཡེང་མེད་ཀྱི་ངང་ནས་འདོན་བཞིན་བཞུགས།
དེ་ནས་ལོ་གསུམ་ཟླ་བ་གསུམ་དང་ཞག་གསུམ་ལོན་པ་དང་དགེ་སློང་མས་སྔོན་བླ་མ་ཇོ་བོ་དཔལ་དངོས་གྲུབ་ཀྱི་བཀའ་བཞིན་རྒྱ་གར་ཤར་ཕྱོགས་སུ་ལི་ཁ་ར་ཤིང་འཕེལ་བྱ་བའི་ཡུལ་དུ་འཕགས་པ་སྤྱན་རས་གཟིགས་ཀྱི་ལྷ་ཁང་ཁ་སར་པ་ཎི་རུ་འགྲོ་ནས་ཐུགས་རྗེ་ཆེན་པོ་བསྒྲུབ་དགོས་བསམས་ནས་ཐུགས་གསལ་ཏིང་ངེ་འཛིན་ལས་བཞེངས་ཏེ་མཚམས་སྒོ་ཕྱེ་བར་མཛད་དོ། །
དགེ་སློང་མ་དཔལ་མོ་རྒྱ་གར་ཤར་ཕྱོགས་སུ་ལི་ཁ་ར་ཤིང་འཕེལ་བྱ་བའི་ཡུལ་དུ་སྐུ་རྐྱང་ཕེབས་པར་མཛད་དུས་སྐུ་ལུས་ལ་བསྣམས་པའི་སྙུང་མཛེ་སྔར་ལས་ཀྱང་སྡུག་ཏུ་སོང་ནས་ཞབས་བཅག་དུས་ཧ་ཅང་གི་དཀའ་ངལ་བྱུང་། ཡིན་ཀྱང་ཟླ་བ་གསུམ་དང་ཞག་གསུམ་ཕེབས་ནས་འཇག་མའི་སྤྱིལ་པོ་ཞིག་གི་འགྲམ་དུ་བཞུགས་ནས་ཉིན་རེ་བཞིན་དུ་འཕགས་པ་སྤྱན་རས་གཟིགས་སྒོམ་བཞིན་གཟུངས་སྔགས་ཡི་གེ་དྲུག་མ་ཨོཾ་མ་ཎི་པདྨེ་ཧཱུྃ་སྒྲོང་བཞིན་བཞུགས་སོ། །དེ་ནས་དགེ་སློང་མ་དེར་འཇག་མའི་སྤྱིལ་པོའི་འགྲམ་དུ་ལོ་གཅིག་ཟླ་གཅིག་དང་ཞག་གཅིག་བཞུགས་ནས། ཡང་བསྐྱར་རྒྱ་གར་ཤར་ཕྱོགས་ལ་ཕེབས་པར་མཛད། ཡིན་ཀྱང་སྙུང་མཛེ་སྔར་ལས་ཀྱང་ཧ་ཅང་གི་སྡུག་ཏུ་སོང་ནས་ཕེབས་པ་ལ་དཀའ་ངལ་ཆེན་པོ་བྱུང་ངོ་། །
དེ་ནས་དགེ་སློང་མའི་མཛེས་ཤིང་ཡིད་དུ་འོང་བའི་དབུ་སྐྲ་རྣམས་གར་སོང་ཆ་མེད་དུ་འཐོར་ནས་དགེ་སློང་མའི་དབུ་མར་སྐོགས་དང་ཁྱད་མེད་གྱུར། རེ་ཞིག་ལུས་ཀྱི་མདོག་ཀྱང་ཁམ་མདོག་ཏུ་གྱུར། སྤྱན་གྱི་ཟེའུ་འབྲུ་རྣམས་ཉམས་ནས་ཁ་དོག་འཛིན་མ་ཐུབ། སྤྱན་རིལ་རྣམས་མཐིལ་ལ་བབས་ནས་ཞལ་རས་སྟེང་དུ་ཆུ་དོང་འདྲར་གྱུར། ཞལ་ཚེམས་དཀར་པོ་རྣམས་སེར་པོར་གྱུར། ཕྱག་མཛུབ་དང་ཞབས་མཛུབ་རྣམས་མཁྲིག་མ་ནས་ཆད་དེ་རིལ་རིལ་གྱུར། གསུང་སྐད་ཀྱང་ཉམས་ནས་སྒྲ་མ་ཐོན། སྐུ་ལུས་ལ་ལྕགས་གཟེར་བཏབ་པ་བཞིན་དུ་སྡུག་བསྔལ་མཐའ་ཡས་པ་ཞིག་བྱུང་། དགེ་སློང་མའི་ལུས་ལ་གྱོན་པའི་ན་བཟའ་རྣམས་ཁྲག་དང་རྣག་གིས་ཚོན་མདོག་གྱུར། སྐུ་ལུས་ཀྱི་ཤ་ཁྲག་རྣམས་རུལ་ནས་སྡོད་པའི་གནས་ཀྱང་དྲི་ངན་གྱིས་ཁྱབ། མི་རྣམས་ཀྱང་ཉེ་འཁོར་དུ་འགྲོ་བ་ལ་འཛེམས། འདི་འདྲ་ཞིག་གི་སྡུག་བསྔལ་མྱོང་ཡང་སེམས་ཅན་གྱི་དོན་ལ་བསྣམས་པའི་མཛེ་ནད་དྲག་པོ་དེ་ལ་བྱང་སེམས་མའི་ཐུགས་བློ་སྤུ་ཉག་ཙམ་ཡང་མ་སྐྱོ། ད་དུང་ཡང་བྱང་ཆུབ་སེམས་མའི་ཐུགས་རྒྱུད་ལ་སེམས་ཤུགས་དང་བློ་སྟོབས་མ་ཆགས་པའི་ངང་ནས་སེམས་ཅན་གྱི་དོན་ལ་ཉིན་རེ་བཞིན་དུ་འཕགས་པ་སྤྱན་རས་གཟིགས་ཀྱི་གཟུངས་སྔགས་ཡི་གེ་དྲུག་མ་བགྲང་བཞིན་བཞུགས་སོ། །
དེ་ལྟར་བླ་མའི་ལུང་བསྟན་བཞིན་དགེ་སློང་མ་རྒྱ་གར་ཤར་ཕྱོགས་སུ་ཕེབས་པ་ལ་ཕྱག་ཞབས་གཉིས་མཁྲིག་མ་ལས་ཆད་ནས་མེད་པས་ཧ་ཅང་གི་དཀའ་ངལ་ཆེ་ཞིང་ཐབས་ཤེས་མཛད་ནས་སྐུ་ལུས་ས་ལ་རིལ་བཞིན་རིལ་བཞིན་ཉིན་རེ་བཞིན་དུ་བྱོན། ཉིན་ཞག་ཉེར་གཅིག་འདས་པའི་ནུབ་ཅིག་ལ་ཤིང་དྲུང་ཞིག་ཏུ་གཟིམ་པ་ན། དེ་ནས་ནུབ་ཕྱོགས་ཨོ་རྒྱན་གླིང་ནས་རྗེ་བཙུན་འཕགས་མ་སྒྲོལ་མའི་རྣམ་འཕྲུལ་མཁའ་འགྲོ་མ་དམར་མོ་ཉེར་གཅིག་ནམ་མཁའ་ནས་འོད་ཟེར་དཔག་ཏུ་མེད་པར་འཕྲོ་ཞིང་རང་གི་མདུན་འཁོར་ལ་ཕེབས་པར་མཇལ། དེ་ནས་དགེ་སློང་མ་ན་རེ། ཁྱེད་རྣམས་མཁའ་འགྲོ་མ་ཡིན་ན་བདག་འདི་ནས་ལི་ཁ་ར་ཤིང་འཕེལ་གྱི་ཡུལ་དུ་འཕགས་པ་སྤྱན་རས་གཟིགས་ཀྱི་ལྷ་ཁང་ཁ་སར་པ་ཎི་རུ་ད་ལྟ་རང་སླེབས་པའི་དངོས་གྲུབ་ཅིག་སྩལ་ཏུ་གསོལ་ཞེས་ཞུས་པས། མཁའ་འགྲོ་མ་དེ་རྣམས་ཀྱིས་རྫུ་འཕྲུལ་གྱི་ངང་ནས་དགེ་སློང་མ་ལི་ཁ་ར་ཤིང་འཕེལ་གྱི་ཡུལ་དུ་བསྐྱལ་ནས་རས་ཀྱི་ན་བཟའ་དང་འབྲས་ཀྱི་འཚོ་བ་རྣམས་ཕུལ་ནས་ནམ་མཁར་ཡལ་ལོ། །
དགེ་སློང་མ་དཔལ་མོས་ལི་ཁ་ར་ཤིང་འཕེལ་ཞེས་པའི་ཡུལ་དུ་ཁ་སར་པ་ཎིའི་གཙུག་ལག་ཁང་དེ་མཇལ་བ་དང་སེམས་ལ་དགའ་བ་ཚད་མེད་བྱུང་། དགེ་སློང་མ་གཙུག་ལག་ཁང་གི་ནང་དུ་བྱོན་སྐབས་ཉི་མ་ཤར་ཏེ་ཕོག་པ་དང་དུས་མཉམ་བྱུང་ཞིང་སངས་རྒྱས་ཀྱི་བསྟན་པ་ལ་ཉི་བསྟན་མ་ཤར་བའི་སྣང་བ་བྱུང་། ལི་ཁ་ར་ཤིང་འཕེལ་བྱ་བའི་ཡུལ་དེ་ཡང་མཁའ་སྤྱོད་དག་པའི་སྣང་བ་བྱུང་། ཐུགས་སྤྲོ་ཟིང་པའི་ངང་ནས་དགེ་སློང་མ་ལ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཀྱི་ཐུགས་རྗེ་མྱུར་མགྱོགས་འབྱུང་བའི་རྟེན་འབྲེལ་ཡང་ཧ་ཅང་བཟང་པོ་བྱུང་ངོ་། །
དགེ་སློང་མ་དཔལ་མོ་ལྷ་ཁང་དེའི་ནང་དུ་བཞུགས་པར་འདོད་པས། ཁ་སར་པ་ཎིའི་ལྷ་ཁང་དེ་ལ་བདག་འཛིན་བྱེད་པའི་དཀོན་གཉེར་ཞིག་ཡོད་པས། དཀོན་གཉེར་དེ་ན་རེ། ཁྱེད་ལྷ་ཁང་འདི་རུ་སྡོད་པའི་འདོད་པ་ཡོད་ཀྱང་དང་པོ་སྐྱེ་བ་དམན་པའི་བུད་མེད་ཀྱི་སྐྱེ་བ་དང་། གཉིས་པ་མཛེ་ནད་དྲག་པོ་དེ་འབྱར་ནད་ཡིན་པས་ན། ཁྱེད་འདིར་སྡོད་དུ་མི་རུང་གི་ཕྱིར་སོང་ཞིག་བྱས་ནས་སྒོར་ཕྱིར་བཏོན་ནས་སྡོད་དུ་མ་བཅུག་གོ །དགེ་སློང་མ་ལྷ་ཁང་གི་རྒྱབ་ཕྱོགས་སུ་བྱོན་ཏེ་རྩྭའི་སྤྱིལ་པོ་ཞིག་གི་ནང་དུ་བཞུགས་ནས་ཉིན་གཅིག་བསྙེན་གནས་དང་ཉིན་གཅིག་སྨྱུང་གནས་ལ་རེས་མོ་བྱས་ཏེ་ལོ་གསུམ་དང་ཟླ་གསུམ་དང་ཞག་གསུམ་སྒྲུབ་པར་མཛད་དོ། །
དེ་ནས་ནུབ་གཅིག་ལ་རྩྭའི་སྤྱིལ་བུའི་ནང་དུ་འཇའ་འོད་སྣ་ཚོགས་ཀྱིས་འགེངས་པར་གཟིགས། རྗེ་བཙུན་འཇམ་དཔལ་དབྱངས་ཡིན་ཟེར་བའི་ཁྱེའུ་སེངྒེ་ལ་བཞོན་པ་ཞིག་བྱུང་བ་ལ། དེ་ལ་དགེ་སློང་མ་ན་རེ། ཁྱེའུ་ཁྱོད་འཇམ་དཔལ་དབྱངས་ཡིན་ན་ད་ལྟ་ཉིད་དུ་སངས་རྒྱས་པའི་དངོས་གྲུབ་སྩལ་ཏུ་གསོལ་ཞུས་པས། ཁྱེའུ་དེའི་ཞལ་ནས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་འཕགས་པ་ཐུགས་རྗེ་ཆེན་པོ་བཅུ་གཅིག་ཞལ་དེ་རང་སྒྲུབས་དང་། ཁྱེད་ཚེ་འདི་ལ་སངས་རྒྱས་ཀྱི་གོ་འཕང་ཐོབ་པར་འདུག་གོ །ཞེས་གསུངས་ཤིང་དགེ་སློང་མ་དཔལ་མོའི་ལྕེ་ཐོག་ཏུ་བདུད་རྩི་རིལ་བུ་ཞིག་བཞག་ནས་ཁྱེའུ་དེ་དེ་མ་ཐག་ཏུ་མི་སྣང་བར་གྱུར་ཏོ། །རིལ་བུ་དེ་དགེ་སློང་མས་བཞེས་པའི་ཐབས་ཤེས་མཛད། དེ་ནས་དགེ་སློང་མ་དཔལ་མོའི་ལྕེ་ཐོག་ཏུ་ཡོད་པའི་བདུད་རྩི་རིལ་བུ་དེ་ཁོག་ནང་དུ་སོང་བའི་སྣང་བར་ཤར་རོ། །
ཉིན་དེ་ནས་བཟུང་དགེ་སློང་མའི་མཛེ་ནད་དེ་སྔར་ལས་ཀྱང་སྙུང་གཞི་དྭངས་པའི་ངོ་ཤར། དེ་ནས་དགོང་ཞག་དྲུག་ཅུ་རེ་གཅིག་སོང་བའི་དུས་ན། དགེ་སློང་མ་རང་གི་མདུན་གྱི་ནམ་མཁའ་ལ་ལོ་བརྒྱད་གཉིས་བཅུ་དྲུག་ལོན་པའི་ལང་ཚོ་དང་ལྡན་པ་ཕྱག་གཡས་ཤེལ་གྱི་འཕྲེང་བ་བརྒྱ་རྩ་བརྒྱད་བསྣམས། གཡོན་པས་ཆུ་སྐྱེས་ཀྱི་སྡོང་པོ་འཛིན་པ་ཞིག་གིས། དགེ་སློང་མ་དཔལ་མོ་ཚ་མོ་ཁྱོད་ལ་ཚེ་འདིར་མཆོག་ཐུན་མོང་གི་དངོས་གྲུབ་མི་འདོད་དམ། འདོད་ན་འདི་ནས་ཕར་ཟླ་བ་བདུན་དང་ཞག་གསུམ་བགྲོད་པའི་སར་ལིང་ཁར་ཤྲཱིའི་གཙུག་ལག་ཟེར་བའི་ལྷ་ཁང་ཞིག་ཡོད་པས། དེའི་ནང་ལ་འཕགས་པ་ཐུགས་རྗེ་ཆེན་པོ་བཅུ་གཅིག་ཞལ་སྐུ་དངོས་བཞུགས་ཡོད། དེར་མཇལ་བར་སོང་ཞིག་གསུངས་སོ། །
དེ་ནས་དགེ་སློང་མ་དཔལ་མོ་འཕགས་པའི་བཀའ་སྒྲུབ་ཕྱིར་དཀའ་སྤྱད་དང་དུ་བླངས་ཏེ་བྱོན་པས། ཉིན་ཅིག་བྱོན་པ་དང་སྐུའི་སྙུང་གཞི་མཛེ་ཡིན་སྟབས་ཞབས་ཀྱིས་བྱོན་མ་ཐུབ། དེ་ནས་དགེ་སློང་མ་དཔྱི་བཤུད་རྒྱབ་ཅིང་བྱོན་པས། དེང་སྐབས་སྐུ་གཟུགས་ལ་ཟུག་གཟེར་དྲག་པོས་ཕྱི་དབུགས་ཆད་ནང་དབུགས་མ་ཆད་ཙམ་ཞིག་གི་ངང་ནས་གློ་བ་དང་མཆིན་པ་མཐོང་བའི་ཁུང་བུ་ཐོན་ཏེ་སྡུག་བསྔལ་དང་དུ་བླངས་ཏེ་བཞུགས་སོ། །དེ་ནས་ཡང་ལོ་གཅིག་གི་རྗེས་ལ་དཔལ་ཕྱག་ན་རྡོ་རྗེའི་སྤྲུལ་པ་ཁྱེའུ་ཞིག་མོ་རང་གི་མིང་པོ་དྷརྨ་པཱ་ལ་ཡིན་གསུང་བཞིན་ཕྱག་གཡས་ན་ཚེ་བུམ་བསྣམས། གཡོན་པས་ཐོད་པ་རྫས་ཀྱིས་བཀང་ནས་དགེ་སློང་མ་ལ་འདི་སྐད་ཅེས་གསུངས་སོ། །སྲིང་མོ་ཉོན་དང་ལཀྵམི་ཀ་ར་མ། །དེ་རིང་མིང་པོའི་སྐད་ལ་ཡར་གསོན་དང་། །ཕྱག་གཡས་ཚེ་ཡི་བུམ་པའི་ནང་ཤེད་ན། །མཛེ་རིགས་བཅོ་བརྒྱད་སེལ་བའི་ཁྲུས་ཆུ་ཡོད། །གཡོན་པ་ཐོད་པ་རྫས་ཀྱིས་བཀང་བ་འདི། །ཟག་མེད་བདེ་བའི་ཏིང་འཛིན་རྫས་མཆོག་ཡིན། །རིག་པའི་ངར་སྐྱེད་ད་ལྟ་ཡར་ལོངས་ཤིག །ཅེས་གསུངས་སོ། །
དེ་ནས་དགེ་སློང་མའི་ཐུགས་དགོངས་ལ་མིང་པོ་དྷརྨ་པཱ་ལའི་གསུང་ཡིན་པ་མཁྱེན་ནས་སྐུ་གཟུགས་ལ་དཀའ་ངལ་ཆེ་ཡང་ཡར་བཞེངས་པ་དང་། རང་གི་མདུན་ན་མི་སུ་ཡང་མི་འདུག་པས་དགེ་སློང་མ་རང་གི་བསམ་པ་ལ་ཆོས་སྔོན་དུ་མ་བྱས་པ་ནི་ངེད་རང་ལགས། གྲུབ་པ་ཐོབ་པ་ནི་དྷརྨ་པཱ་ལ་ལགས་པས། སྐྱེས་པ་དང་སྐྱེ་དམན་གྱི་བར་ལ་སྐྱེ་རབས་དགུ་ཡོད་ཟེར་བ་དེ་བདེན་པར་འདུག་བསམས་ནས། དགེ་སློང་མ་དེ་ཉིད་གྲོགས་ཀྱང་མེད་པས་སྐུ་ལུས་འགུལ་མི་ཚུགས་ཀྱང་བརྩོན་འགྲུས་དྲག་པོའི་སྒོ་ནས་ཞབས་སྐྱིལ་མོ་ཀྲུང་གིས་བཞུགས་ནས་གསོལ་བ་འདི་ལྟར་བཏབ།
སྐྱབས་གནས་བསླུ་མེད་དཀོན་མཆོག་རིན་པོ་ཆེ། །ཐུགས་རྗེ་མངའ་བའི་འཕགས་མཆོག་སྤྱན་རས་གཟིགས། །
བདག་གིས་ཇི་ལྟར་གསོལ་བ་བཏབ་པའི་དོན། །མྱུར་དུ་འགྲུབ་པར་བྱིན་གྱིས་རླབ་ཏུ་གསོལ། །
དགེ་སློང་མ་དཔལ་མོ་ལ་མིང་པོ་དྷརྨ་པཱ་ལས་གནང་བའི་མཛེ་རིགས་བཅོ་བརྒྱད་སེལ་བའི་ཁྲུས་ཆུ་དེ་ཁོག་ནང་དུ་འཐུང་བའི་སྣང་བ་ཤར། ཟག་མེད་བདེ་བའི་ཏིང་འཛིན་གྱི་ཟས་མཆོག་བྱིན་ཅན་དེ་ཡང་ལོངས་སྤྱོད་པའི་སྣང་བ་བྱུང་ངོ་། །
༧༽ མཁའ་འགྲོ་སྡེ་ལྔ་གདན་འདྲེན་དུ་བྱོན་པ།
དེ་ནས་བཟུང་དགེ་སློང་མའི་སྐུ་ལུས་ཀྱི་མཛེ་ནད་དེ་སྔར་ལས་བརྒྱ་ཕྱེད་དྭངས་པའི་ཕྱི་ནང་དུ་ཕེབས་པ་ལ་དཀའ་ངལ་དེ་ཙམ་མ་བྱུང་། དེ་ནས་དགེ་སློང་མ་དཔལ་མོའི་ཞལ་ནས་ཡི་གེ་དྲུག་པ་གཡེང་མེད་ཀྱི་ངང་ནས་སྒྲོང་བཞིན་བཞུགས་པའི་ཚེ་དགོང་ཞག་བདུན་གྱི་རྗེས་ཐོ་རངས་ཀྱི་དུས་ཤིག་ལ་དགེ་སློང་མའི་སྐུ་མདུན་ནས་ཚུར་དར་དཀར་དམར་སྔོ་སེར་ལྗང་དང་ལྡན་པའི་བུ་མོ་ལྔ་ཞལ་འཛུམ་དང་བཅས་ཏེ་དགེ་སློང་མ་ལ་ཅང་མི་སྨྲ་བར་བཞུགས་པ་དང་། དགེ་སློང་མའི་ཞལ་ནས་ཁྱེད་བུ་མོ་ལྔ་པོ་གང་ནས་བྱོན་ཟེར་ཞིང་འདི་ལྟར་ཞུས།
མཚར་སྡུག་ལྡན་པའི་བུ་མོ་ཁྱེད་ལྔ་པོ། །ཤར་ལྷོ་ནུབ་བྱང་ས་ཕྱོགས་གང་ནས་བྱོན། །ས་སྟེང་ས་འོག་བར་སྣང་གང་ནས་བྱོན། །ཕ་མ་རིགས་བཟང་སུ་ཡི་སྲས་མོ་ལགས། །མཚར་སྡུག་འོད་དང་ལྡན་པས་བཤད་དུ་གསོལ། །ཅེས་གསུངས་སོ། །དེ་ནས་མཁའ་འགྲོ་མ་རྣམས་ཀྱིས་གར་འཆམ་བྱེད་བཞིན་རིམ་བཞིན་འོངས་ཏེ་ཕྱི་ནས་ཌཱ་དྲིལ་གྱི་སྒྲ་དང་བཅས་ལོ་རྒྱུས་འདི་ལྟར་ཞུས་སོ། །
མོ་རྡོ་རྗེ་རིགས་ཀྱི་མཁའ་འགྲོ་ཡིན། །མོ་རིན་ཆེན་རིགས་ཀྱི་མཁའ་འགྲོ་ཡིན། །མོ་པདྨ་རིགས་ཀྱི་མཁའ་འགྲོ་ཡིན། །མོ་ལས་ཀྱི་རིགས་ཀྱི་མཁའ་འགྲོ་ཡིན། །མོ་བུདྡྷ་རིགས་ཀྱི་མཁའ་འགྲོ་ཡིན། །རྒྱལ་བ་རིགས་ལྔའི་ཡུམ་མཆོག་ཡིན། །དཔལ་རི་པདྨ་བཀོད་པའི་ཕོ་བྲང་ནས། །གྲུབ་ཐོབ་ལྭ་ཝ་པ་ཡིས་བཏང་བ་ཡིན། །ངེད་ཀྱི་སྲིང་མོ་དགེ་སློང་མ་དཔལ་མོ། །མིང་ནས་འབོད་དེ་ལིང་ཁར་ཤྲཱི་བསྐྱེལ། །ཁྱོད་དགེ་སློང་མ་ཞུ་བའི་ཕོ་ཉ་ཡིན། །ཞེས་གསུངས་སོ། །དེ་ནས་མཁའ་འགྲོ་མ་ལྔ་པོ་རེ་རེ་ནས་དར། ཤར་གྱི་སྔོ། ལྷོའི་སེར། ནུབ་ཀྱི་དམར། བྱང་གི་ལྗང་། དབུས་ཀྱིས་དཀར་རེ་སྟོན་ནས་དགེ་སློང་མས་སྐུ་གཟུགས་ལ་བཅིངས་པར་མཛད། དེ་ནས་དགེ་སློང་མ་དེ་ཉིད་དགུང་དང་སྤྲིན་གྱི་མཚམས་ནས་ཕར་གདན་ཞུས་ཏེ་ལིང་ཁར་ཤྲཱིའི་གཙུག་ལག་ཁང་དུ་འཕགས་པ་ཐུགས་རྗེ་ཆེན་པོ་བཅུ་གཅིག་ཞལ་བཞུགས་པའི་ལྷ་ཁང་ནང་དུ་བསྐྱལ་ནས་ཁོང་རང་བུ་མོ་ལྔ་པོ་ནམ་མཁའ་ལ་འཇའ་ཡལ་བ་བཞིན་དུ་ཡལ་ལོ། །དེ་ནས་དགེ་སློང་མ་ལིང་ཁར་ཤྲཱིའི་གཙུག་ལག་ཁང་གི་ནང་དུ་བྱོན་པ་དང་། འཕགས་པ་ཐུགས་རྗེ་ཆེན་པོ་བཅུ་གཅིག་ཞལ་དངོས་སུ་མཇལ་བའི་སྣང་བ་བྱུང་བས་ལུས་ཀྱི་སྤུ་ཉག་ཐམས་ཅད་གཡོ་ཞིང་སྙིང་ཁོང་རུས་པའི་གཏིང་ནས་དད་པ་སྐྱེས་ནས་འདི་ལྟར་གསུངས།
རིན་ཆེན་བརྒྱ་ལས་གྲུབ་པའི་ལིང་ཁར་ཡང་། །འཇའ་ཚོན་ལྟར་བཀྲ་འཆི་མེད་ལམ་ལྟར་ཡངས། །
སྣ་ཚོགས་རྒྱན་གྱིས་མཛེས་པའི་གཞལ་ཡས་ཁང་། །བདེ་བ་ཅན་དང་མཚུངས་པའི་སྣང་བ་བྱུང་། །
ཞེས་གསུངས་སོ། །དེ་ནས་དགེ་སློང་མ་དཔལ་མོ་ཁོང་རང་འཕགས་པ་ཐུགས་རྗེ་ཆེན་པོ་ལ་མོས་གུས་གདུང་བ་དྲག་པོའི་སྒོ་ནས་ལིང་ཁར་ཤྲཱིའི་གཙུག་ལག་ཁང་དེའི་ནང་དུ་དཀྱིལ་འཁོར་གསུམ་གྱི་སྒྲུབ་པ་ལ་བཞུགས་པའི་ཚེ། སང་སྔ་དྲོ་ལྷ་ཁང་གི་དཀོན་གཉེར་དེ་མཆོད་པ་འབུལ་བར་འོངས་པ་དང་། དགེ་སློང་མ་སོར་མོ་མ་ཚང་བའི་སྟབས་ཀྱིས་དཀོན་གཉེར་དེས་མིག་ཧྲིག་ཧྲིག་བལྟས་ནས་ཞེ་སྡང་མེ་ལྟར་འབར་ཏེ། ལྡེ་མིག་གི་ཐག་པས་བརྡུངས། མཛེ་ཅན་སྤྲང་མོ་ཁྱོད་ངེད་ཀྱི་ལྷ་ཁང་ནང་འོངས་པ་དང་། ངས་ལྷ་ཁང་ནང་ལྷ་བསངས་ཁྲུས་གསོལ་བྱས་ཀྱང་སྡོད་མི་ཚུགས་པས། ལོ་ཏོག་ཉེས་པ་དང་སེར་བས་བརྡུང་བ་སོགས་བྱུང་ན་ངེད་རང་གི་མགོར་འོངས་ངེས་ཡིན་ཟེར་ནས། ལྡེ་མིག་གི་ཐག་པས་སྤྱི་གཙུག་ནས་རྐང་མཐིལ་ཡན་ཆད་རྡུང་བཞིན་དགེ་སློང་མའི་ཞབས་ནས་འཐེན་ཏེ་ལྷ་ཁང་གི་རྒྱབ་ལ་བསྐྱལ་བས། དགེ་སློང་མའི་ཐུགས་དགོངས་ལ་སེམས་ཅན་གྱི་བློ་མ་རིག་པས་སྒྲིབ་པ་ཡིན་སྙམ་བྱང་ཆུབ་ཏུ་ཐུགས་བསྐྱེད། གང་ལྟར་ཡིན་རུང་ཡི་དམ་ལ་རྒྱབ་མདུན་མེད་སྙམ་པའི་ཐུགས་བཞེས་བཟང་པོའི་སྒོ་ནས་ལིང་ཁར་ཤྲིའི་གཙུག་ལག་ཁང་གི་རྒྱབ་ལོགས་སུ་འཇག་མའི་སྤྱིལ་པོ་ཞིག་གི་འགྲམ་དུ་བཞུགསས་ནས་སྔོན་ལྟར་ཉིན་གཅིག་བསྙེན་གནས་དང་ཉིན་གཅིག་སྨྱུང་གནས་ལ་རེས་མོ་བྱས་ཏེ་ཟླ་བ་གསུམ་དང་ཞག་གསུམ་ཐུགས་རྗེ་ཆེན་པོ་བསྒྲུབས་པར་མཛད་དོ། །
དེ་ནས་མི་ལོ་བདུན་རྫོགས་པའི་དུས་གཅིག་ལ་ཆོས་རྒྱལ་དྷརྨ་པཱ་ལ་ནུབ་ཕྱོགས་རྣམ་དག་གླིང་ནས་རང་ཡུལ་ཁ་ཆེ་ཁྲི་བརྟན་དུ་ཕྱིར་ལོག་ནས་ཕེབས་སོ། །བསམ་འཕེལ་མས་ལོ་བདུན་སྔོན་གྱི་སྐད་ཆ་རྣམས་རྒྱལ་པོ་དྷརྨ་པཱ་ལ་ལ་ཞུས་པས་ཆོས་རྒྱལ་སྐྱོ་བའི་སྒྲ་དེ་ལྟར་ཐོས་པ་ཙམ་གྱིས་རང་གི་སྲིང་མོ་ལཀྵམི་ཀ་ར་དྲན་ནས་དྲན་མེད་དུ་ས་ལ་བརྒྱལ་ལོ། །རྒྱལ་པོ་དུས་རིང་ཞིག་ནས་དྲན་གསོས་ནས་སྲིང་མོ་ལཀྵམི་ཀ་ར་མཇལ་ཕྱིར་རྒྱ་གར་ཤར་ཕྱོགས་སུ་མྱུར་མགྱོགས་ཕེབས་པའི་ཞལ་ཆད་མཛད། དེ་ནས་མི་ལོ་བདུན་རྫོགས་པའི་དུས་ཤིག་ལ་ཆོས་རྒྱལ་དྷརྨ་པཱ་ལ་ཁ་ཆེ་ཁྲི་བརྟན་གྱི་ཡུལ་ནས་རྒྱ་གར་ཤར་ཕྱོགས་སུ་ལིང་ཁར་ཤིང་འཕེལ་ཞེས་པའི་ཡུལ་དུ་རང་གི་སྲིང་མོ་ལཀྵམི་ཀ་ར་མཇལ་བར་འགྲོ་ཕྱིར་བློན་པོ་བདེ་ལེགས་བཟང་པོ་སོགས་བློན་པོ་ཉེར་གཅིག་དང་། གཡོག་མོ་བསམ་འཕེལ་མ་དང་། འབངས་འཁོར་གཡོག་སྟོང་ཕྲག་གཅིག་དང་། རྟ་གཅིག་སྟོང་གཅིག་བརྒྱ་དང་གཅིག་བཅས་ཞག་གསུམ་གྱི་རྗེས་སུ་རྒྱ་གར་ཤར་ཕྱོགས་ལ་འགྲོ་དགོས་པའི་བཀའ་གནང་ངོ་། །
དེ་ནས་བློན་པོ་བདེ་ལེགས་བཟང་པོས་བློན་པོ་རྣམས་དང་། གཡོག་མོ་བསམ་འཕེལ་མ་དང་འབངས་འཁོར་གཡོག་རྣམས་འདུས་ནས་ཉིན་གསུམ་གྱི་རིང་ལ་རྒྱ་གར་ཤར་ཕྱོགས་ལ་འགྲོ་ཕྱིར་རྟ་བརྒྱ་ཞིག་ལ་རྒྱལ་པོའི་བང་མཛོད་ནས་ནོར་བུ་དང་། འཚོ་བ་དང་སྔར་ལཀྵམི་ཀ་རའི་ན་བཟའ་རྣམས་དང་། དར་གོས་ཆེན་སོགས་བཀལ་ནས་འགྲོ་རྒྱུ་བྱས། ཆོས་རྒྱལ་དྷརྨ་པཱ་ལས་ཞག་བཟང་ཞིག་ལ་གཟིགས་ནས་སྔོན་ཕ་མེས་པོ་རྣམས་ཀྱིས་བཞེངས་པའི་ལྷ་ཁང་ནང་དུ་ཕེབས་ནས་གསོལ་བ་འདི་ལྟར་བཏབ།
ཕྱོགས་བཅུར་བཞུགས་པའི་ཐུབ་དབང་རྒྱ་མཚོའི་ཚོགས། །རྒྱལ་སྲས་དགྲ་བཅོམ་བྱང་ཆུབ་སེམས་དཔའ་དང་། །མཐུ་ལྡན་སྲུང་མ་མགོན་པོ་ཕྱག་དྲུག་པ། །གཏེར་བདག་ནོར་ལྷ་གཟུགས་མེད་མཁའ་འགྲོའི་ཚོགས། །མ་ལུས་གསོན་ཅིག་བདག་ལ་དགོངས་སུ་གསོལ། །བདག་ནི་སྲིང་མོ་ལཀྵམི་ཀ་ར་འཕྲད་པར་འགྲོ། །ལོག་པར་མི་འགྱུར་ཐར་ལམ་འདྲེན་པར་ཤོག །ལ་ལུང་མང་པོ་མྱུར་དུ་བགྲོད་པའི་ཚེ། །ངལ་དུབ་སྡུག་བསྔལ་ཅུང་ཟད་མེད་པར་ཤོག །ཤིང་ཐོག་སིལ་མ་ལ་སོགས་ཟ་བའི་ཚེ། །རོ་མཆོག་བརྒྱ་ལྡན་བདུད་རྩིར་འགྱུར་བར་ཤོག །ཁ་སྐོམ་བཏུང་བ་ཆུ་ལ་བྱེད་པའི་ཚེ། །རྒྱུན་ཆད་མེད་པར་འོ་མའི་ཆུ་རྒྱུན་ཤོག །གཅན་གཟན་གདུག་པས་ངར་སྐད་འདོན་པའི་ཚེ། །ཐེག་ཆེན་ཆོས་ཀྱི་སྒྲ་རུ་འགྱུར་བར་ཤོག །ལུས་ཀྱི་ན་ཚ་ཐོག་ཏུ་བྱུང་བའི་ཚེ། །སྨན་དག་འཚོ་བྱེད་ལྷུན་གྱིས་འགྲུབ་པར་ཤོག །བདག་གིས་སྙིང་ནས་སྨྲས་པའི་བདེན་ཚིག་གིས། །མིང་སྲིང་མྱུར་དུ་མཇལ་བའི་སྨོན་ལམ་འདེབས། །ཞེས་གསུངས་ཤིང་ཕྱག་གསུམ་འཚལ་ནས་སྲུང་མ་ལ་དར་མེ་ཏོག་གི་ཕྲེང་བ་ཞིག་ཕུལ་ཏེ་ཕྱིར་ལོག་ཕེབས། དེ་ནས་ཆོས་རྒྱལ་དྷརྨ་པཱ་ལ་དང་ནང་བློན་བདེ་ལེགས་བཟང་པོ་གཡོག་མོ་བསམ་འཕེལ་མ་དང་འབངས་འཁོར་གཡོག་ཐམས་ཅད་རྒྱ་གར་ཤར་ཕྱོགས་ལིང་ཁར་ཤིང་འཕེལ་དུ་བྱོན་པའི་ཚེ་ཆོས་རྒྱལ་དྷརྨ་པཱ་ལའི་ཤིང་རྟ་འདྲེན་པའི་རྟ་གཉིས། ཡང་བློན་འབངས་འཁོར་གཡོག་རྟ་དང་བཅས་པ་ཐམས་ཅད་དུ་ཞུགས་སོ། །
དེ་ནས་དཔོན་གཡོག་འཁོར་བཅས་ལ་ལུང་ཕྲན་ཚ་གྲང་མི་མེད་ལུང་སྟོང་དང་གཅན་གཟན་གདུག་པ་ཅན་རྣམས་གོམ་བཞིན་གོམ་བཞིན་ཟླ་བ་གསུམ་ཕེབས་པའི་རྗེས། སྔོན་དགེ་སློང་མ་དཔལ་མོ་བཞུགས་པའི་མཚམས་ཁང་དེར་འབྱོར་པ་དང་། མཚམས་ཁང་དེའི་ནང་དུ་དགེ་སློང་མ་དཔལ་མོ་བཞུགས་མེད་པ་དང་། མཚམས་ཁང་དེ་ཡང་ཆར་ཆུས་བཤལ་ནས་ཁང་རལ་དུ་གྱུར་ཡོད་པ་དང་། དེའི་མཐའ་བསྐོར་ནས་ཞབས་རྗེས་ཀྱང་མི་མངོན་པ་དང་། མཚམས་ཁང་དེ་བྱ་ཚང་ནས་འཐོན་ནས་ནམ་མཁའ་ལ་འཕུར་བ་ལྟར་སྟོང་སངས་ངེར་ཡོད་པས། སྔོན་དགེ་སློང་མ་དཔལ་མོ་དང་གཡོག་མོ་བསམ་འཕེལ་མ་གཉིས་མཉམ་དུ་བཞུགས་པའི་དུས་རྣམས་དྲན་བཞིན་གཡོག་མོ་བསམ་འཕེལ་མ་སྐྱོ་ཤས་དྲག་པོའི་སྒོ་ནས་མིག་ཆུ་འབྲལ་མེད་དུ་གཏོང་བཞིན་སྡུག་བསྔལ་བཟོད་གླགས་མེད་པའི་ངང་ནས་མགོ་རྡོ་ལ་བརྒྱབས་པ་དང་དྲན་མེད་དུ་ས་ལ་བརྒྱལ། བློན་པོ་རྣམས་ཀྱིས་གཡོག་མོ་བསམ་འཕེལ་མའི་མགོ་ལ་ཆུ་གཏོར་བ་དང་དུས་རིང་ཞིག་ནས་དྲན་གསོས། དེ་ནས་བསམ་འཕེལ་མ་དེ་ཉིད་སེམས་ལ་སྐྱོ་ཤས་དྲག་པོའི་སྒོ་ནས་དབུགས་རིང་འཐོན་བཞིན་འདི་ལྟར་ཞུས།
ཀྱེ་མ་ཀྱེ་ཧུད་སློབ་དཔོན་རིན་པོ་ཆེ། །སྨོན་ལམ་དབང་གིས་དཔོན་གཡོག་ལྷན་ཅིག་འཛོམས། །ལོ་བདུན་ཟླ་བདུན་རྫོགས་ནས་བཀའ་བཞིན་འབྱོར། །སྐུ་བཞུགས་མེད་པར་བདག་ནི་བློ་ཕམ་ཆེ། །ཀྱེ་མ་ཀྱེ་ཧུད་སློབ་དཔོན་ཐུགས་རྗེ་ཆུང་། །ད་ནི་བདག་གི་བློ་གཏད་སུ་ལ་འཆའ། །ང་ཡིས་ཆུང་ནས་ཁྱེད་ཀྱི་ཞབས་ཏོག་ཞུས། །རང་དོན་བདེ་སྐྱིད་ཙམ་ཡང་བྱེད་མ་མྱོང་། །ཁྱེད་ཀྱི་ལུས་ལ་ཐེབས་པའི་ན་ཚ་དང་། །བདག་གི་སེམས་ལ་འཕོག་པའི་སྡུག་བསྔལ་གཉིས། །ཚ་གྲང་མཉམ་དུ་མྱོང་བ་མ་གཏོགས་པར། །མ་ཤི་གསོན་འབྲལ་བྱེད་པ་ག་ལ་ཕོད། །ཅེས་སྨྲས་སོ། །
དེ་ནས་ཆོས་རྒྱལ་དྷརྨ་པཱ་ལས་སྤྱན་ཆབ་མང་དུ་བསིལ་བཞིན་འདི་སྐད་ཅེས་གསུངས་སོ། །ཀྱེ་མ་ཕྱོགས་མཚམས་གང་དུ་བལྟས་གྱུར་ཀྱང་། །ལཀྵམི་ཀ་ར་འཕྲད་པ་མི་འདུག་ཅིང་། །མི་མེད་ལུང་སྟོང་འདི་ལ་སེམས་པ་སྐྱོ། །འདི་འདྲ་ཡོང་བསམ་བདག་གི་སེམས་ལ་མེད། །གསུངས་ནས་རྒྱལ་པོས་སྨོན་ལམ་འདི་ལྟར་བཏབ་བོ། །བླ་མ་ཡི་དམ་མཁའ་འགྲོ་ཐུགས་རྗེ་ཅན། །གཞི་བདག་ཡུལ་ལྷ་ནུས་མཐུ་ལྡན་པ་རྣམས། །བདག་གི་སྨོན་ལམ་འགྲུབ་པའི་གྲོགས་མཛོད་ཅིག །བདག་གི་སྲིང་མོ་ལཀྵམི་ཀ་ར་ལ། །གློ་བུར་ནད་ཀྱི་བར་ཆད་འབྱུང་ཡོད་ཀྱང་། །ལས་ཀྱི་ཚེ་འདས་ཡོད་ན་བྱ་ཐབས་མེད། །མ་འཆི་ཡོད་ཚེ་མྱུར་དུ་མཇལ་བར་ཤོག །ཅེས་གསུངས་པ་དང་། ལམ་དེ་ཡང་དཔག་ཚད་བདུན་གྱི་ཉེ་བར་གྱུར་ཏེ་རྒྱལ་བློན་འབངས་འཁོར་གཡོག་རྟ་དང་བཅས་པ་ཐམས་ཅད་ལིང་ཁར་ཤྲཱིའི་རྒྱལ་ཕྲན་དེར་འབྱོར་ཏོ། །
དེ་ནས་བློན་པོ་བདེ་ལེགས་བཟང་པོ་དང་གཞན་བློན་པོ་བདུན་དང་བཅས་ཡུལ་དེའི་མི་རྣམས་ལ་ལུས་ལ་མཛེ་ནད་ཡོད་པའི་བུ་མོ་ཞིག་ཡོད་པ་མ་མཐོང་ངམ་ཟེར་བཞིན་འདྲིར་བྱོན་པའི་དུས། སངས་རྒྱས་འོད་དཔག་མེད་ཀྱི་སྤྲུལ་པ་བཙུན་པ་ཞིག་དང་ཞལ་མཇལ་ནས། བཙུན་པ་དེ་ན་རེ། འདི་ནས་རྒྱང་གྲགས་བདུན་གྱི་རྗེས་ལིང་ཁར་ཤྲཱིའི་གཙུག་ལག་ཁང་གི་རྒྱབ་ལོགས་སུ་འཇག་མའི་སྤྱིལ་པོ་ཞིག་གི་འགྲམ་དུ་འཕགས་པ་ཐུགས་རྗེ་ཆེན་པོ་སྒྲུབ་བཞིན་ཡོད་པས་དེར་སོངས་ཤིག་ཅེས་ལུང་བསྟན་ཏོ། །སྙན་པའི་སྒྲ་དེ་ཐོས་པ་དང་ཆོས་རྒྱལ་དྷརྨ་པཱ་ལ་དང་བློན་འབངས་རྣམས་གཅིག་རྗེས་གཅིག་གིས་མི་གནོན་བཞིན་ལཀྵམི་ཀ་ར་མཇལ་ཕྱིར་ལིང་ཁར་ཤྲཱིའི་གཙུག་ལག་ཁང་གི་ཕྱོགས་ལ་ཕེབས། དེར་གཙུག་ལག་ཁང་གི་རྒྱབ་ལོགས་སུ་དགེ་སློང་མ་དཔལ་མོས་སྐུ་ལུས་མཛེ་ནད་ཀྱིས་ཟིན་བཞིན་དུ་འཇག་མའི་སྤྱིལ་པོ་ཞིག་གི་འགྲམ་དུ་འཕགས་པ་ཐུགས་རྗེ་ཆེན་པོ་སྒྲུབ་བཞིན་དུ་བཞུགས་ཡོད་པས། དེར་དགེ་སློང་མའི་གསུང་སྐད་ཐོས་པ་དང་རྒྱལ་བློན་འཁོར་བཅས་དང་ཁྱད་པར་དུ་གཞོན་དུས་ནས་རྩེད་གྲོགས་བྱེད་ཅིང་ཐུགས་ལ་བཅངས་པའི་གཡོག་མོ་བསམ་འཕེལ་མ་ལ་ཤི་གསོན་འཕྲད་པ་ལྟར་སེམས་ལ་ཧ་ཅང་གི་དགའ་བ་ཚད་མེད་བྱུང་། དེ་ནས་མིང་པོ་དྷརྨ་པཱ་ལས་འདི་སྐད་ཅེས་གསུངས།
༨༽ དྷརྨ་པཱ་ལ་ལཀྵམི་ཀ་ར་དང་ཞལ་འཕྲད།
སྲིང་མོ་ཉོན་དང་ལཀྵམི་ཀ་ར་མ། །དེ་རིང་མིང་པོའི་སྐད་ལ་ཡར་གསོན་དང་། །ཚད་ལྡན་བུམ་པ་འདི་ཡི་ནང་ཤེལ་ན། །མཛེ་རིག་བཅོ་བརྒྱད་སེལ་བའི་ཁྲུས་ཆུ་ཡོད། །འཆི་མེད་བདུད་རྩིས་ཐོད་པ་བཀང་བ་འདི། །ཟག་མེད་བདེ་བའི་ཏིང་འཛིན་ཟས་མཆོག་ཡིན། །རིག་པའི་ངར་སྐྱེད་ད་ལྟ་ཡར་ལོངས་ཤིག །ཅེས་གསུངས་པས། དགེ་སློང་མའི་ཐུགས་དགོངས་ལ་མིང་པོ་དྷརྨ་པཱ་ལའི་གསུང་སྐད་ཡིན་པ་མཁྱེན་ནས་མཛེ་ནད་དེས་སྐུ་གཟུགས་ལ་དཀའ་ངལ་ཆེ་ཡང་ཡར་བཞེངས་པ་དང་ཕྱག་མཛུབ་དང་ཞབས་མཛུབ་རྣམས་མཁྲིག་མ་ལས་ཆད་ནས་མེད་པས་ཡར་བཞེངས་དུས་འོ་བརྒྱལ་ལན་གསུམ་བྱུང་ངོ་། །
དེ་ནས་མིང་པོ་ཆོས་རྒྱལ་དྷརྨ་པཱ་ལས་ཕྱག་གསུམ་འཚལ་ནས་དགེ་སློང་མའི་ཞལ་དུ་མཛེ་རིགས་བཅོ་བརྒྱད་སེལ་བའི་ཁྲུས་ཆུ་དང་ཟག་མེད་བདེ་བའི་ཟས་མཆོག་ཕུལ་བར་མཛད། དགེ་སློང་མ་དཔལ་མོས་མིང་པོ་དྷརྨ་པཱ་ལས་གནང་བའི་མཛེ་རིགས་བཅོ་བརྒྱད་སེལ་བའི་ཁྲུས་ཆུ་དང་། ཟག་མེད་བདེ་བའི་ཟས་མཆོག་རྣམས་བཞེས་པ་དང་། སྐུ་ལུས་ཀྱི་མཛེ་ནད་དེ་སྔར་ལས་ཀྱང་ཧ་ཅང་གི་དྭངས་པའི་སྣང་བ་བྱུང་ངོ་། །དེ་ནས་དགེ་སློང་མས་འདི་ལྟར་གསུངས། བྱམས་བརྩེ་བཀའ་དྲིན་བདག་ཉིད་མིང་པོ་དྷརྨ་པཱ་ལ་བདེ་བར་བྱོན་ལགས་སམ། མིང་པོས་ཡིན་ལགས་གསུངས། དེ་ནས་མིང་པོ་དྷརྨ་པཱ་ལས་སྙིང་དང་འདྲ་བའི་སྲིང་མོ་ལཀྵམི་ཀ་རའི་སྐུ་ལུས་ནས་འབབ་པའི་རྣག་དང་ཁྲག་ཐོན་པའི་མཛེ་ནད་དེའི་དཀའ་ངལ་ལ་གཟིགས་ནས་སྐྱོ་ཤས་དྲག་པོའི་སྒོ་ནས་སྤྱན་ཆབ་མང་དུ་བསིལ་བཞིན་འདི་སྐད་ཅེས་ཞུས།
ཟླ་བ་ལྟ་བུར་རབ་མཛེས་སྲིང་གཅིག་མ། །གློ་བུར་མཛེ་ནད་སྤྲིན་ཚོགས་འདུས་པ་ཡིས། །བདག་གི་ལོ་ཏོག་མྱ་ངན་སེར་བས་བཅོམ། །འདི་འདྲ་འོངས་བསམ་བདག་གི་སེམས་ལ་མེད། །བླ་མ་ཡི་དམ་མཁའ་འགྲོ་མཐུ་རྩལ་ཅན། །གཞི་བདག་ཡུལ་ལྷ་ནུས་མཐུ་ལྡན་པ་རྣམས། །ལོ་མང་ཞིག་ནས་མཛེ་ནད་འདི་ཡིས་ཟིན། །མྱུར་དུ་གྲོལ་བར་མཛོད་ཅིག་མཐུ་ལྡན་རྣམས། །ཚེ་འདིར་བདེ་སྐྱིད་ཕུན་སུམ་ཚོགས་གྱུར་ཀྱང་། །སྙིགས་དུས་མི་ཚེ་དགུན་ཁའི་ཉིན་དང་འདྲ། །འཆི་བདག་འབྱུང་དུས་རང་དབང་མི་འདུག་པས། །ཡབ་ཡུམ་བླ་མ་འཁོར་བཅས་ཞིང་ལ་གཤེགས། །མཐོ་རིས་མི་ཡི་བདེ་སྐྱིད་ཡད་ཡུད་ཙམ། །བསགས་པའི་ནོར་ལ་སྙིང་པོ་མི་འདུག་གོ །སྐད་ཅིག་ཙམ་ལ་མི་རྟག་འདི་འདྲ་བྱུང་། །ཕྱི་མ་གར་འགྲོ་རྟག་པ་མི་འདུག་གོ །བསགས་ནི་ཚེ་སྔོན་བསགས་པའི་འབྲས་བུ་ལས། །ཚེ་འདིར་སྟོབས་འབྱོར་ལྡན་པའི་རྒྱལ་པོར་སྐྱེས། །ཕྱི་མ་གར་འགྲོ་ང་ཡིས་མི་ཤེས་པས། །ད་ནི་བདག་ཀྱང་དམ་ཆོས་བསྒྲུབ་ངེས་ཡིན། །སྲིང་མོས་སེམས་ཅན་དོན་ལ་དམ་ཆོས་བསྒྲུབས། །དལ་འབྱོར་དོན་ཡོད་མཛད་པ་ངོ་མཚར་ཆེ། །ཆོས་ཀྱི་ཕྱིར་དུ་རང་སྲོག་གཏོང་ནུས་པའི། །སྲིང་མོ་གཏོང་ཕོད་ཅན་ལ་ཕྱག་འཚལ་ལོ། །ཆོས་དད་ཅན་གྱི་སྲིང་མོ་དཀར་ལྕམ་མ། །ཚེ་འདི་བློས་བཏང་ཕྱི་མའི་དོན་ཆེན་བསྒྲུབས། །འགྲོ་དོན་མཐར་ཕྱིན་མཛད་པ་ངོ་མཚར་ཆེ། །འཛམ་གླིང་འགྲན་ཟླ་མེད་པར་གནས་གྱུར་ཅིག །ཅེས་ཞུས་སོ། །དེ་ནས་དགེ་སློང་མས་འདི་ལྟར་གསུངས།
བརྩེ་གདུང་ཅན་གྱི་མིང་པོ་བདག་ལ་གསོན། །ཁྱོད་ཀྱིས་སྨྲས་པའི་གཏམ་དེ་ཤིན་ཏུ་བདེན། །ཚེ་འདི་མི་རྟག་ནམ་མཁའི་གློག་དང་འདྲ། །ཡུན་རིང་མི་སྡོད་འཆི་བ་མྱུར་དུ་འོངས། །སྐྱེ་གཟུགས་ཕུན་སུམ་ཚོགས་པའི་མིང་པོ་ཁྱོད། །སྨོན་ལམ་བཟང་བས་དམ་པའི་ཆོས་ལ་དཀར། །ད་ལྟ་ཅི་བྱེད་རང་དབང་ཡོད་དུས་སུ། །དལ་འབྱོར་དོན་ཡོད་མཛད་ན་ངོ་མཚར་ཆེ། །ཚེ་རབས་འཁོར་བ་ཐོག་མཐའ་མེད་པ་ནས། །ད་ལྟའི་མི་ལུས་འདི་ཡི་བར་དུ་ནི། །སྔར་བྱས་ཐམས་ཅད་དོན་མེད་ལས་སུ་སོང་། །ད་རེས་དོན་ཆེན་སྙིང་པོ་ལེན་པར་མཛོད། །སྤྱི་བོར་ཡི་དམ་ཐུགས་རྗེ་ཆེན་པོ་སྒོམས། །ཆོས་ཀྱི་སྙིང་པོ་ཡི་གེ་དྲུག་མ་བགྲོངས། །རྟག་ཏུ་རང་གི་སེམས་ལ་ཡང་ཡང་ལྟོས། །རྒྱུན་དུ་བྱམས་དང་སྙིང་རྗེ་སྒོམས་པར་མཛོད། །རྒྱལ་བ་ཀུན་ལས་ལྷག་པའི་བཀའ་དྲིན་ཅན། །ལམ་སྟོན་བཤེས་གཉེན་དམ་པ་འབབ་པ་ཡིས། །བཀའ་བཞིན་བསྒྲུབས་པའི་མཆོད་པས་མཉེས་པར་བྱེད། །ཚེ་འདིར་བླ་མ་ཚུལ་བཞིན་བསྟེན་པར་མཛོད། །ཅེས་གསུངས་སོ། །
དེ་ནས་དགེ་སློང་མས་བསམ་འཕེལ་མ་ཁྱེད་བདེ་བར་འབྱོར་རམ་གསུང་། གཡོག་མོ་བསམ་འཕེལ་མས་རང་གི་བླ་མའི་སྐུ་ལུས་ལ་བསྣམས་པའི་མཛེ་ནད་ཀྱི་དཀའ་ངལ་དེ་མཇལ་བ་དང་། བསམ་འཕེལ་མ་སྐྱོ་ཤས་དྲག་པོས་སྒོ་ནས་མིག་ཆུ་ཆར་ལྟར་བབ་བཞིན་བླ་མ་ལ་ཕྱག་གསུམ་འཚལ་ནས་འདི་ལྟར་ཞུས། བླ་མ་ལྷ་དང་དཀོན་མཆོག་ཐུགས་རྗེ་ཅན། །རྒྱལ་སྲས་དགྲ་བཅོམ་བྱང་ཆུབ་སེམས་དཔའ་དང་། །བློ་གཏད་སྐྱབས་མགོན་བྱེད་པའི་དགེ་སློང་མ། །མ་ལུས་གསན་ཅིང་བདག་ལ་དགོངས་སུ་གསོལ། །ཚེ་རབས་སྔོན་ནས་ད་ལྟ་ཚུན་ཆད་དུ། །ལས་དང་སྨོན་ལམ་དག་པའི་ཞལ་མཇལ་བའི། །ང་ཡི་ཆུང་ནས་ཁྱོད་ཀྱི་ཞབས་ཏོག་ཞུས། །རང་དོན་བདེ་སྐྱིད་ཙམ་ཡང་བྱེད་མ་མྱོང་། །ཁྱོད་ཀྱི་ལུས་ལ་ཐེབ་པའི་ན་ཚ་དང་། །བདག་གི་སེམས་ལ་ཕོག་པའི་སྡུག་བསྔལ་གཉིས། །ཚ་གྲང་མཉམ་དུ་མྱོང་བ་མ་གཏོགས་པར། །རང་དོན་སྐད་ཅིག་ཙམ་ཡང་བྱེད་མ་མྱོང་། །ཁྱེད་ཐུགས་བརྩེ་བའི་བུ་ཡང་ང་ཡིན་ནོ། །ང་ཡི་བློ་གཏད་ཕ་མ་ཁྱེད་ལས་མེད། །བདག་ནི་ཡང་བསྐྱར་ཞབས་ཏོག་བསྒྲུབ་ཕྱིར་དུ། །བླ་མའི་བཀའ་བཞིན་ལོག་ནས་འོངས་པ་ཡིན། །ཅེས་ཞུས་སོ། །
དེ་ནས་དགེ་སློང་མ་ན་རེ། ཡ་བསམ་འཕེལ་མ་གླེང་མོར་བྱེད་ཡར་ཤོག་གསུངས། དེ་ཉིན་བསམ་འཕེལ་མ་རང་གི་བླ་མ་ཡང་བསྐྱར་ཚེ་འདིར་དངོས་སུ་མཇལ་བ་དང་སེམས་ཤིན་ཏུ་དགའ་ཞིང་ལུས་ཀྱི་སྒོ་ནས་ཅི་དྲག་གིས་ཞབས་ཏོག་དང་། ངག་གི་སྒོ་ནས་སྙན་པའི་ཞབས་ཏོག་དང་། ཡིད་ཀྱི་སྒོ་ནས་དད་པའི་ཞབས་ཏོག་དང་། ལུས་ངག་ཡིད་གསུམ་གྱིས་ཞབས་ཏོག་ཚད་མེད་ཞུ་ཞིང་ལོ་གཅིག་གི་རྗེས་རང་གི་རྩ་བའི་བླ་མ་དགེ་སློང་དཔལ་མོའི་དྲུང་ནས་དགེ་ཚུལ་མའི་སྡོམ་པ་ཚུལ་བཞིན་བླངས་ནས་དགེ་ཚུལ་མའི་བསྲུང་བྱ་བླངས་འདས་སོ་དྲུག །ཕྱོགས་མཐུན་དང་བསྡམ་བྱའི་ཉེས་བྱས་སོགས་བསྲུང་ཞིང་མི་དགེ་བཅུ་སྤོང་དང་དགེ་བཅུ་དང་དུ་བླངས་ནས་མི་ཚེ་དོན་དང་ལྡན་པ་ཞིག་བྱས་སོ། །
དེ་ནས་རྒྱལ་པོ་དྷརྨ་པཱ་ལ་ཡི་སེམས་ཀྱང་ཡོངས་སུ་འདུལ་ནས་རྒྱལ་སྲིད་ཀྱི་བྱ་བ་དང་འཁོར་བའི་བདེ་བ་ལ་ཡིད་བརྟན་མེད་པར་མཁྱེན་ཏེ་མི་གཙང་བའི་རྫས་བཞིན་དུ་སྤངས་ནས་རྒྱལ་བློན་འཁོར་བཅས་རབ་ཏུ་བྱུང་ལ་ཐུགས་མོས་པར་གྱུར་ཏོ། །དེ་ནས་ལིང་ཁར་ཤྲཱིའི་གཙུག་ལག་ཁང་གི་མཁན་པོའི་དྲུང་ནས་དགེ་སློང་གི་སྡོམ་པ་ལེགས་པར་ཞུས་ནས། བསྲུང་བྱ་ཕམ་པ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས་བཅས་ཁྲིམས་ཉིས་བརྒྱ་ལྔ་བཅུ་རྩ་གསུམ་ལེགས་པར་བསྲུངས་པར་མཛད་དོ། །རྒྱལ་པོ་དྷརྨ་པཱ་ལ་རབ་བྱུང་མཛད་པའི་རྗེས་ཁ་ཆེ་ཁྲི་བརྟན་གྱི་རྒྱལ་སྲིད་སྲས་ཆེ་བ་བྱང་ཆུབ་ནམ་མཁས་འཛིན་ཏོ།། །།
༩༽ མཛེ་ནད་ཀྱི་སྙུང་ཟུག་ལས་གྲོལ་བ།
དེ་ནས་དགེ་སློང་མ་དཔལ་མོ་ལིང་ཁར་ཤྲཱིའི་གཙུག་ལག་ཁང་གི་རྒྱབ་ཕྱོགས་སུ་རྩྭའི་སྤྱིལ་བུ་ཞིག་གི་ནང་དུ་བཞུགས་ནས་ཉིན་གཅིག་བསྙེན་གནས་དང་ཉིན་གཅིག་སྨྱུང་གནས་སྲུང་བཞིན་ལོ་གཅིག་འཕགས་པ་ཐུགས་རྗེ་ཆེན་པོ་སྒྲུབ་པར་མཛད། དེ་ནས་ནུབ་གཅིག་ལ་རྩྭའི་སྤྱིལ་པོའི་ནང་དུ་འཇའ་འོད་སྣ་ཚོགས་ཀྱིས་ཁྱབ་པར་གཟིགས། དེའི་ཚེ་མཛེ་ནད་དྭངས་པའི་བཀྲ་ཤིས་པའི་ལྟས་དཔག་ཏུ་མེད་པ་བྱུང་། དེའི་ཉིན་ཐོ་རངས་ཀྱི་དུས་སུ་སངས་རྒྱས་སྨན་གྱི་བླ་བཻཌཱུརྱའི་འོད་ཀྱི་རྒྱལ་པོའི་སྤྲུལ་པ་གཞོན་ནུ་ལང་ཚོ་བཅུ་དྲུག་ལྡན་པའི་བཙུན་པ་ཕྱག་ལ་ཚེ་བུམ་བསྣམས་པ་ཞིག་མཇལ། དེ་ནས་བཙུན་པ་དེ་ན་རེ། བུ་མོ་ཁྱོད་དུས་གསུམ་སངས་རྒྱས་ཐམས་ཅད་ཀྱི་ངོ་བོ་འཕགས་པ་ཐུགས་རྗེ་ཆེན་པོ་བཅུ་གཅིག་ཞལ་དེ་རང་སྒྲུབས་དང་། ཁྱོད་ལོ་གསུམ་ཟླ་གསུམ་དང་ཞག་གསུམ་ཙམ་ནས་སངས་རྒྱས་ཀྱི་གོ་འཕང་ཐོབ་པར་འདུག་གོ །ཞེས་གསུང་བཞིན་དགེ་སློང་མའི་ལྕེ་ཐོག་ཏུ་འཆི་མེད་ཚེའི་རིལ་བུ་ཞིག་བཞག་ནས་བཙུན་པ་དེ་དེ་མ་ཐག་ཏུ་མི་སྣང་བར་གྱུར་ཏོ། །དགེ་སློང་མས་སངས་རྒྱས་སྨན་བླ་མཇལ་བ་དང་དད་པའི་ལུས་ཀྱི་སྤུ་ཉག་ཐམས་ཅད་གཡོ་བཞིན་འདི་ལྟར་ཞུས།
ཐུགས་རྗེ་ཀུན་ལ་སྙོམས་པའི་བཅོམ་ལྡན་འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སེལ། །
དུག་གསུམ་ནད་སེལ་སངས་རྒྱས་སྨན་གྱི་བླ། །བཻཌཱུརྱ་ཡི་འོད་ལ་ཕྱག་འཚལ་བསྟོད། །
ཅེས་ཞུས་པས། དེ་མ་ཐག་ཏུ་དགེ་སློང་མ་དཔལ་མོའི་སྐུ་གཟུགས་ཀྱི་མཛེ་ནད་དེ་གཞི་མེད་དུ་དྭངས་ནས་ཕྱག་ཞབས་གཉིས་ཀྱང་སྔར་བཞིན་དུ་སོས་སོ། །དགེ་སློང་མས་མེ་ཏོག་དྲི་ལྡན་ལས་ལེགས་པའི་ཚུལ་ཁྲིམས་ཀྱི་དྲི་མ་ཡུལ་ཕྱོགས་ཀུན་ལ་ཁྱབ་པས་སྐུ་ལུས་ཟླ་བ་ལྟ་བུ་མཛེས་པས་ཞལ་རས། མཛེས་ཤིང་ཡིད་དུ་འོང་བའི་དབུ་སྐྲ། མེ་ཏོག་ཆུ་སྐྱེས་ཟེའུ་འབྲུ་ལས་ལྷག་པའི་སྤྱན། དྲི་མེད་འོད་ཆགས་མུ་ཏིག་ཚོམ་བུ་ལས་མཛེས་པའི་ཞལ་ཚེམས། དྲི་ཟའི་བུ་མོ་ལས་སྙན་པའི་གསུང་སྐད། མཚལ་ལྟར་དམར་བའི་མཆུ། ལྟ་བའི་མི་ངོམས་སྐུ་གཟུགས་མཛེས་ཤིང་ཡིད་དུ་འོང་བའི་གཞོན་ནུ་མ་ལང་ཚོ་བཅུ་དྲུག་ལྡན་པའི་བུ་མོ་སྔར་ལས་ཀྱང་ཤིན་ཏུ་མཛེས་མ་ཞིག་ཏུ་གྱུར་ཏོ། །དེ་ནས་ཕྱོགས་བཅུ་སངས་རྒྱས་ཐམས་ཅད་དང་ཁྱད་པར་དུ་ཡང་འཕགས་པ་སྤྱན་རས་གཟིགས་དབང་ཕྱུག་དང་དམིགས་བསལ་དུ་སྡོང་གྲོགས་བྱེད་པའི་བཀའ་སྲུང་ལྷ་ཆེན་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་དང་། དཀར་ཕྱོགས་སྐྱོང་མཛད་མཁའ་འགྲོ་ཆོས་སྲུང་རྣམས་དང་། ཀླུ་ཆེན་བརྒྱད་དང་། རྟ་སྒོའི་གཞི་བདག་དང་། གཞན་ཡང་ལྷ་དང་མི་དང་ལྷ་མ་ཡིན་དང་དྲི་ཟ་བཅས་པས་འཇིག་རྟེན་ཡི་རངས་ཏེ། དགེ་སློང་མ་དཔལ་མོའི་ཡང་དག་པའི་ཚུལ་ཁྲིམས་ཀྱི་དྲི་བཟང་དེ་ལ་མངོན་པར་བསྟོད་དོ། །དེ་ནས་དགེ་སློང་མ་དཔལ་མོས་སྙིང་ཁོང་རུས་པའི་གཏིང་ནས་ལུས་ཀྱིས་ཕྱག་འཚལ་ཞིང་། ངག་གིས།
ཕྱག་སྟོང་འཁོར་ལོས་སྒྱུར་པའི་རྒྱལ་པོ་སྟོང་། །སྤྱན་སྟོང་བསྐལ་པ་བཟང་པོའི་སངས་རྒྱས་སྟོང་། །
གང་ལ་གང་འདུལ་དེ་ལ་དེར་སྟོན་པའི། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །
ཞེས་འདོན་ཞིང་། ཡིད་ཀྱིས་མོས་གུས་དྲག་པོས་སྐྱབས་སུ་འགྲོ་ཞིང་རྩྭའི་སྤྱིལ་བུ་ཞིག་ཏུ་བཞུགས་ནས་ཉིན་གཅིག་བསྙེན་གནས་དང་ཉིན་གཅིག་སྨྱུང་གནས་བཅས་སྲུང་བཞིན་ལོ་གསུམ་ཟླ་གསུམ་དང་ཞག་གསུམ་རྩེ་གཅིག་ཏུ་སྒྲུབ་པར་མཛད་དོ། །དགེ་སློང་མས་སྒྲུབ་པ་ཡུན་རིང་ཞིག་ནས་སྒྲུབ་པའི་དུས་ཤིག་ལ་རང་གི་དྲིན་ཅན་རྩ་བའི་བླ་མ་འཕགས་པ་སྤྱན་རས་གཟིགས་ལ་འདི་ལྟར་གསོལ་བ་འདེབས་པར་མཛད།
ན་མོ་གུ་རུ་ལོ་ཀི་ཤྭ་རཱ་ཡ། བླ་མ་སྤྱན་རས་གཟིགས་ལ་ཕྱག་འཚལ་ལོ། །མགོན་པོ་སྙིང་རྗེས་ལྷན་ཅིག་སྐུ་གསུང་ཐུགས། །ཐུགས་རྗེས་གཟིགས་ཤིག་འཇིག་རྟེན་དབང་ཕྱུག་ཞབས། །མགོན་སྐྱབས་མཛོད་ཅིག་རྗེ་བཙུན་ཐུགས་རྗེའི་གཏེར། །གསོལ་བ་འདེབས་སོ་འཕགས་མཆོག་སྤྱན་རས་གཟིགས། །མཐའ་མེད་འཁོར་བའི་རྒྱ་མཚོ་ཆེན་པོ་ལས། །སྒྲོལ་བའི་དེད་དཔོན་མཛོད་ཅིག་སྤྱན་རས་གཟིགས། །མི་ཤེས་གཏི་མུག་མུན་པས་འཐིབ་ཙ་ན། །གསལ་བའི་སྒྲོན་མེ་མཛོད་ཅིག་སྤྱན་རས་གཟིགས། །དགྲ་ལ་ཞེ་སྡང་མེ་ལྟར་འབར་ཙ་ན། །འཇིག་པའི་ཆུ་རྒྱུན་མཛོད་ཅིག་སྤྱན་རས་གཟིགས། །གཉེན་ལ་འདོད་ཆགས་ཆུ་ལྟར་འཁྲུག་ཙ་ན། །གནས་ལུགས་རྟོགས་པར་མཛོད་ཅིག་སྤྱན་རས་གཟིགས། །ནོར་ལ་སེར་སྣའི་མདུད་པས་སྡོམ་ཙ་ན། །གཏོང་བའི་གཉེན་པོ་མཛོད་ཅིག་སྤྱན་ར་གཟིགས། །འཆི་ཁར་མཚེར་ཞིང་འཇིགས་པས་སྐྲག་ཙ་ན། །ཞལ་བསྟན་སེམས་གསོ་མཛོད་ཅིག་སྤྱན་རས་གཟིགས། །གཤིན་རྗེའི་ཕོ་ཉས་ལས་ཀྱིས་བསྐོར་ཙ་ན། །སྐྱབས་དང་སྐྱོར་མ་མཛོད་ཅིག་སྤྱན་རས་གཟིགས། །རྒྱུས་མེད་བར་དོའི་འཕྲང་ལ་འགྲིམས་ཙ་ན། །མཛའ་བོའི་གཉེན་བཤེས་མཛོད་ཅིག་སྤྱན་རས་གཟིགས། །མ་ངེས་སྐྱེ་གནས་འཚོལ་ཞིང་འཁྱམ་ཙ་ན། །དག་པའི་ཞིང་དུ་སྐྱོལ་ཅིག་སྤྱན་རས་གཟིགས། །མངལ་སྒོར་ལས་ཀྱིས་སྡུག་བསྔལ་མྱོང་ཙ་ན། །འོད་ཀྱི་གུར་ཁང་ཕུབ་ཅིག་སྤྱན་རས་གཟིགས། །མི་ཤེས་བྱིས་པའི་ལུས་སུ་གྱུར་ཙ་ན། །གྲོགས་མཆོག་བཤེས་གཉེན་མཛོད་ཅིག་སྤྱན་རས་གཟིགས། །རྟག་ཏུ་སྤྱི་བོར་སྒོམ་ཞིང་མཆོད་འདོད་ན། །རྩ་བའི་བླ་མ་མཛོད་ཅིག་སྤྱན་རས་གཟིགས། །སྙིང་གི་པད་མོར་སྒོམ་ཞིང་མཆོད་འདོད་ན། །ཡི་དམ་ལྷ་ཚོགས་མཛོད་ཅིག་སྤྱན་རས་གཟིགས། །ཕྱི་ནང་རྐྱེན་ངན་བར་ཆད་བྱུང་ཙ་ན། །ཞི་བའི་སྲུང་མ་མཛོད་ཅིག་སྤྱན་རས་གཟིགས། །བཀྲེས་སྐོམ་དབུལ་བའི་ནོར་གྱིས་སེམས་འདོད་ན། །ཅི་འདོད་དངོས་གྲུབ་སྩོལ་ཅིག་སྤྱན་རས་གཟིགས། །ལྷང་ལྷང་ཡི་གེ་དྲུག་མས་གསོལ་འདེབས་ན། །རྒྱུན་དུ་ཐུགས་རྗེས་གཟིགས་ཤིག་སྤྱན་རས་གཟིགས། །དགེ་བ་འདི་ཡིས་འགྲོ་དྲུག་སེམས་ཅན་རྣམས། །ཐུགས་རྗེ་ཆེན་པོའི་གོ་འཕང་ཐོབ་པར་ཤོག །བླ་མ་སྤྱན་རས་གཟིགས་ཀྱི་བྱིན་རླབས་དང་། །སྙིང་པོ་ཡི་གེ་དྲུག་མའི་ནུས་མཐུ་ཡིས། །བདག་ཅག་འགྲོ་བ་རིགས་དྲུག་སེམས་ཅན་རྣམས། །བྱམས་དང་སྙིང་རྗེའི་ས་ལ་བཀོད་པར་ཤོག །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བྱེད་ཅིང་། །སེམས་ཅན་སྡུག་བསྔལ་མང་གཟིར་མྱུར་སྒྲོལ་ཤོག །ཅེས་བསྔོ་བ་དང་སྨོན་ལམ་བཏབ་ཅིང་འཕགས་པ་སྤྱན་རས་གཟིགས་ཀྱི་སྙིང་པོ་ཡི་གེ་དྲུག་མ་ཨོཾ་མ་ཎི་པདྨེ་ཧཱུྃ་ཞེས་པ་ཉིན་རེ་བཞིན་དུ་འབུམ་ཚར་རེ་འདོན་བཞིན་བཞུགས་སོ། །
དགེ་སློང་མ་དཔལ་མོ་ལ་ཆོ་འཕྲུལ་ཟླ་བའི་ཚེ་གཅིག་ཉིན་རྗེ་བཙུན་འཕགས་མ་སྒྲོལ་མའི་ཞལ་གཟིགས་བྱུང་། ཆོ་འཕྲུལ་ཟླ་བའི་ཚེ་བརྒྱད་ལ་འཕགས་པ་སྤྱན་རས་གཟིགས་དོན་ཡོད་ཞགས་པའི་ཞལ་གཟིགས་བྱུང་། ཆོ་འཕྲུལ་ཟླ་བའི་ཚེ་བཅོ་ལྔ་ལ་དུས་གསུམ་སངས་རྒྱས་ཐམས་ཅད་ཀྱི་ངོ་བོ་འཕགས་པ་སྤྱན་རས་གཟིགས་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་དང་ལྡན་པའི་ཞལ་གཟིགས་མངོན་སུམ་དུ་བྱུང་ངོ་། །དེའི་ཚེ་དགེ་སློང་མ་དཔལ་མོས་འཕགས་པ་སྤྱན་རས་གཟིགས་ལ་འདི་ལྟར་ཞུས། དེ་ཙམ་ཕོད་དམ་སངས་རྒྱས་ཐུགས་རྗེ་ཅན། བདག་གིས་ཡུན་རིང་པོ་དེ་ཙམ་དུ་བསྒྲུབས་ཀྱང་མངོན་སུམ་དུ་ཞལ་མི་སྟོན་པར་ཐུགས་རེ་ཆུང་ཞེས་ཞུས་པས། འཕགས་པ་ཐུགས་རྗེ་ཆེན་པོས་དགེ་སློང་མ་ལ་ཞལ་འཛུམ་མཛད་ནས་འདི་ལྟར་གསུངས། ང་དང་པོ་ནས་བཟུང་ཁྱོད་དང་མ་འབྲལ་བར་ཡོད་ཀྱང་ཁྱོད་ལུས་ཀྱི་སྒྲིབ་པ་མ་དག་པའི་དབང་གིས་ང་མ་མཐོང་བ་ཡིན། ད་ཁྱོད་ཀྱིས་ང་སྒོམ་བཞིན་མ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་ལ་མི་ལོ་བཅུ་གསུམ་བར་དུ་འཕགས་པ་སྤྱན་རས་གཟིགས་ཀྱི་གཟུངས་སྔགས་ཡི་གེ་དྲུག་མ་ༀ་མ་ཎི་པདྨེ་ཧཱུཾ་ཞེས་པ་བཟླས་པས་སྔོན་གྱི་ལས་ཀྱི་སྒྲིབ་པ་རྣམས་དག་ནས་ད་ལྟ་ང་མཐོང་བ་ཡིན་པས་ལྟོས་ཤིག་གསུངས། དགེ་སློང་མ་དཔལ་མོས་སྤྱན་རས་གཟིགས་ཀྱི་སྐུ་གཟུགས་མཇལ་བ་དང་སྔར་བསྙུངས་བས་ཚེ་རང་ལུས་ནས་ཐོན་པའི་ཁྲག་དང་རྣག་གི་འཐོར་མ་དང་ལུད་པ་རྣམས་གར་སོང་དུ་འཕངས་པས་དེ་རྣམས་འཕགས་པ་ཐུགས་རྗེ་ཆེན་པོའི་སྐུ་ལུས་ཀྱི་ན་བཟའ་སོགས་ལ་ཕོག་ནས་མཇལ་བ་དང་། དགེ་སློང་མའི་ལུས་ཀྱི་སྤུ་ཉག་ཐམས་ཅད་གཡོ་ཞིང་ཤིན་ཏུ་ཡིད་ཆེས་ཀྱི་དད་པ་སྐྱེས་ནས་ལུས་ངག་ཡིད་གསུམ་གྱི་སྒོ་ནས་འཕགས་པ་ཐུགས་རྗེ་ཆེན་པོ་ལ་ཕྱག་གསུམ་འཚལ་ཏེ་མཐོལ་བཤགས་འདི་ལྟར་ཞུས།
སེམས་ཅན་དོན་ལ་ཐུགས་རྗེས་གཟིགས་ཕྱིར་དུ། །འགྲོ་དོན་ཕྱོགས་མེད་ཕྱག་སྟོང་སྤྱན་སྟོང་སྤྲུལ། །
སངས་རྒྱས་རབ་བདུན་བདེ་གཤེགས་བཅུ་གཅིག་ཞལ། །ཐུགས་རྗེ་ཆེན་པོ་ཉིད་ལ་མཐོལ་ལོ་བཤགས། །
ཞུས་པས། དགེ་སློང་མ་ལ་འཕགས་པ་ཐུགས་རྗེ་ཆེན་པོ་དངོས་ཀྱིས་དབང་ལུང་མན་ངག་ཐམས་ཅད་གནང་བ་དང་དགེ་སློང་མ་ལ་མཆོག་གི་དངོས་གྲུབ་ཐོབ་སྟེ་དགོངས་པ་སངས་རྒྱས་དང་མཉམ་པར་གྱུར་ཏོ། །དེ་ནས་ཁོང་གིས་དུས་གསུམ་སངས་རྒྱས་ཐམས་ཅད་ཀྱི་ངོ་བོ་འཕགས་པ་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་ལ་བསྟོད་བསྔགས་འདི་ལྟར་བྱེད་བཞིན་རང་གི་མཐའ་སྐོར་ལ་མར་གྱུར་པའི་རིགས་དྲུག་སེམས་ཅན་ཐམས་ཅད་ཀྱང་འཁོད་པར་མཛད་ཅིང་། ལུས་ཀྱིས་ཕྱག་འཚལ། ངག་གིས་པོ་བསྟོད་འདོན་པ་དང་། ཡིད་ཀྱིས་མོས་གུས་དྲག་པོས་སྐྱབས་སུ་འགྲོ་ཞིང་འདི་ལྟར་བསྟོད།
༡༠༽ འཕགས་པ་ཐུགས་རྗེ་ཆེན་པོ་ལ་པོ་བསྟོད་ཀྱི་སྒོ་ནས་བསྟོད་བསྔགས་མཛད་པ།
འཕགས་པ་ཐུགས་རྗེ་ཆེན་པོ་ལ་པོ་བསྟོད་ཀྱི་སྒོ་ནས་བསྟོད་བསྔགས་མཛད་པ། ཨོཾ་འཇིག་རྟེན་མགོན་པོ་ལ་ཕྱག་འཚལ་ལོ། །འཇིག་རྟེན་བླ་མ་སྲིད་པ་གསུམ་གྱིས་བསྟོད་པ་པོ། །ལྷ་ཡི་གཙོ་བོ་བདུད་དང་ཚངས་པས་བསྟོད་པ་པོ། །ཐུབ་པའི་རྒྱལ་མཆོག་བསྟོད་པས་གྲུབ་པར་མཛད་པ་པོ། །འཇིག་རྟེན་གསུམ་གྱི་མགོན་པོ་མཆོག་ལ་ཕྱག་འཚལ་ལོ། །བདེ་གཤེགས་དཔག་མེད་སྐུ་སྟེ་སྐུ་བཟང་འཛིན་པ་པོ། །བདེ་གཤེགས་སྣང་བ་མཐའ་ཡས་དབུ་རྒྱན་འཛིན་པ་པོ། །ཕྱག་གཡས་མཆོག་སྦྱིན་ཡི་དྭགས་བཀྲེས་སྐོམ་སེལ་བ་པོ། །ཕྱག་གཡོན་གསེར་གྱི་བདྨས་རྣམ་པར་བརྒྱན་པ་པོ། །དྲི་ཞིམ་རལ་པའི་ཕྲེང་བ་དམར་སེར་འཁྱུག་པ་པོ། །ཞལ་རས་རྒྱས་པ་ཟླ་བ་ལྟ་བུར་མཛེས་པ་པོ། །སྤྱན་གྱི་པདྨ་མཆོག་ཏུ་བཟང་ཞིང་ཡངས་པ་པོ། །ཁ་བ་དུང་ལྟར་རྣམ་དཀར་དྲི་ངད་ལྡང་བ་པོ། །དྲི་མེད་འོད་ཆགས་མུ་ཏིག་ཚོམ་བུ་འཛིན་པ་པོ། །མཛེས་པའི་འོད་ཟེར་སྐྱ་རེངས་དམར་པོས་བརྒྱན་པ་པོ། །པདྨའི་མཚོ་ལྟར་ཕྱག་ནི་དངར་བར་བྱས་པ་པོ། །སྟོན་ཀའི་སྤྲིན་གྱི་མདོག་དང་ལྡན་ཞིང་གཞོན་པ་པོ། །རིན་ཆེན་མང་པོས་དཔུང་པ་གཉིས་ནི་བརྒྱན་པ་པོ། །ལོ་མའི་མཆོག་ལྟར་ཕྱག་མཐིལ་གཞོན་ཞིང་འཇམ་པ་པོ། །རི་དྭགས་པགས་པ་ནུ་མ་གཡོན་ལ་བཀབ་པ་པོ། །སྙན་ཆ་གདུ་བུས་སྒེག་ཅིང་རྒྱན་རྣམས་འཆང་བ་པོ། །དྲི་མ་མེད་པ་པདྨའི་མཆོག་ལ་གནས་པ་པོ། །ལྟེ་བའི་ངོས་ནི་པདྨའི་འདབ་ལྟར་འཇམ་པ་པོ། །གསེར་གྱི་སྐ་རགས་མཆོག་ལ་ནོར་བུས་སྤྲས་པ་པོ། །སྟ་ཟུར་དཀྲིས་པའི་རས་བཟང་ཤམ་ཐབས་འཛིན་པ་པོ། །ཐུབ་པའི་མཁྱེན་མཆོག་མཚོ་ཆེན་ཕ་རོལ་ཕྱིན་པ་པོ། །མཆོག་བརྙེས་བསོད་ནམས་མང་པོ་ཉེ་བར་བསགས་པ་པོ། །རྟག་ཏུ་བདེ་བའི་འབྱུང་གནས་རྒ་ནད་སེལ་བ་པོ། །གསུམ་མཐར་མཛད་ཅིང་མཁའ་སྤྱོད་སྤྱོད་པ་སྟོན་པ་པོ། །ལུས་ཅན་མཆོག་སྟེ་བདུད་དཔུང་འཁྲུག་ལས་རྒྱལ་བ་པོ། །གསེར་གྱི་རྐང་གདུབ་སྒྲ་ཡིས་ཞབས་ཡིད་འོང་བ་པོ། །ཚངས་པའི་གནས་པ་བཞི་ཡི་དབེན་པར་མཛད་པ་པོ། །ངང་པའི་འགྲོས་འདྲ་གླང་ཆེན་དྲེགས་ལྟར་གཤེགས་པ་པོ། །ཡོངས་རྫོགས་ཉེ་བར་བསགས་ཤིང་བསྟན་པ་གཉེར་བ་པོ། །འོ་མའི་མཚོ་དང་ཆུ་ཡི་མཚོ་ལས་སྒྲོལ་བ་པོ། །གང་ཞིག་རྟག་ཏུ་ཐོ་རངས་ལངས་ནས་གུས་པ་ཡིས། །སྤྱན་རས་གཟིགས་ཀྱི་དབང་པོ་ཡིད་ལ་སེམས་བྱེད་ཅིང་། །བསྟོད་པའི་མཆོག་འདི་དག་ཅིག་གསལ་བར་བསྟོད་བྱེད་ན། །དེ་ནི་སྐྱེས་པའམ་བུད་མེད་ཡིན་ཀྱང་རུང་། །སྐྱེ་བ་འདིའམ་མ་འོངས་སྐྱེ་བ་ཐམས་ཅད་དུ། །འཇིག་རྟེན་འཇིག་རྟེན་ལས་འདས་དགོས་པ་ཀུན་འགྲུབ་འགྱུར། །འཕགས་པ་སྤྱན་རས་གཟིགས་དབང་ཐུགས་རྗེའི་གཏེར། །འཁོར་དང་བཅས་པ་བདག་ལ་དགོངས་སུ་གསོལ། །བདག་དང་ཕ་མ་རིགས་དྲུག་སེམས་ཅན་རྣམས། །མྱུར་དུ་འཁོར་བའི་མཚོ་ལས་བསྒྲལ་དུ་གསོལ། །ཟབ་ཅིང་རྒྱ་ཆེན་བླ་མེད་བྱང་ཆུབ་སེམས། །མྱུར་དུ་རྒྱུད་ལ་སྐྱེ་བར་མཛད་དུ་གསོལ། །ཐོག་མེད་ནས་བསགས་ལས་དང་ཉོན་མོངས་རྣམས། །ཐུགས་རྗེའི་ཕྱག་བརྐྱངས་བདག་དང་འགྲོ་བ་རྣམས། །ཐུགས་རྗེའི་ཆབ་ཀྱིས་མྱུར་དུ་དག་མཛད་ནས། །བདེ་བ་ཅན་གྱི་ཞིང་དུ་དྲང་དུ་གསོལ། །འོད་དཔག་མེད་དང་སྤྱན་རས་གཟིགས་དབང་གིས། །ཚེ་རབས་ཀུན་ཏུ་དགེ་བའི་བཤེས་མཛད་ནས། །མ་ནོར་ལམ་བཟང་ལེགས་པར་བསྟན་ནས་ཀྱང་། །མྱུར་དུ་སངས་རྒྱས་ས་ལ་བཞག་ཏུ་གསོལ། །ཞེས་ལུས་ངག་ཡིད་གསུམ་གྱིས་གུས་པའི་ངང་ནས་གསོལ་བ་བཏབ་བོ། །ཞེས་དང་ཡང་དེ་ལས།
༡༡༽ གྲུབ་ཐོབ་ལཀྵམི་ཀ་རས་རྫུ་འཕྲུལ་བསྟན་ཚུལ།
དེ་ནས་དགེ་སློང་མ་དཔལ་མོ་ལོ་མང་ཞིག་གི་རྗེས་ལ་རྒྱ་གར་གྱི་གྲུབ་ཆེན་རྣམས་དང་ལྷན་དུ་བཞུགས་ནས་དུར་ཁྲོད་བསིལ་བའི་ཚལ་དུ་ཟླ་བ་ཡར་ངོའི་ཚེས་བཅུ་དང་མར་ངོའི་ཚེས་ཉེར་ལྔ་རྣམས་ལ་རྗེ་བཙུན་རྡོ་རྗེ་རྣལ་འབྱོར་ནཱ་རོ་མཁའ་སྤྱོད་མ་རྣམས་དང་དཔའ་བོ་དཔའ་མོ་བཅས་ལ་ཚོགས་འཁོར་རྒྱས་པ་འབུལ་བཞིན་བཞུགས། དེ་དུས་ཚོགས་ཀྱི་ཡོ་བྱད་བདུད་རྩི་ཤ་དང་ཆང་གཉིས་ཀྱང་ཕུལ། མ་ཟད་དགེ་སློང་མ་དཔལ་མོས་དེ་དག་ལ་ལོངས་ཡང་སྤྱད། དེ་ནས་ཡུལ་དེའི་མི་རྣམས་ཀྱིས་བདུད་རྩི་དམར་ནག་གཉིས་ལ་ལོངས་སྤྱོད་པར་མཐོང་ནས་དགེ་སློང་མ་དཔལ་མོ་ནི་མཛེ་ནད་དྲག་པོ་དེ་ལས་གྲོལ་ཀྱང་ཚུལ་ཁྲིམས་ཀྱི་བསླབ་པ་འཆལ་འདུག་ཟེར་ནས་ཧ་ཅང་གི་སྐུར་བ་བཏབ་བོ། །
དེ་དུས་དགེ་སློང་མ་དཔལ་མོས་ཡུལ་མི་རྣམས་ལ་འདི་ལྟར་གསུངས། བདག་ཚུལ་ཁྲིམས་མ་ཉམས་པའི་དཔང་པོར་ནི་ཡི་དམ་གྱི་ལྷ་འཕགས་པ་སྤྱན་རས་གཟིགས་བཞུགས་ཡོད། གསུངས་ནས་ཁ་སར་པ་ཎིའི་དུས་མཆོད་ཀྱི་ཉིན་སྐྱེ་བོ་ཁྲི་ཁྲག་མང་པོ་ཚོགས་པའི་ཁྲོམ་གསེབ་ཏུ་རང་གི་དབུ་གྲི་གུག་གིས་བཅད་དེ་འཁར་སིལ་གྱི་རྩེ་ལ་བསྐྱོན་ཏེ་ནམ་མཁར་འཕངས་ནས་སྤྲིན་གྱི་གསེབ་ཏུ་ངོ་མཚར་བའི་གར་མང་པོ་མཛད། སླར་ས་ལ་བབས་ནས་བདག་ཚུལ་ཁྲིམས་ཉམས་ཡོད་ཚེ་སྐེ་ལ་སླར་མི་འབྱར་བར་གྱུར་ཅིག །གལ་ཏེ་མ་ཉམས་པར་ཡོད་ཚེ་སྐེ་ལ་ཡང་བསྐྱར་སྔར་བཞིན་འབྱར་བར་གྱུར་ཅིག །ཅེས་བདེན་ཚིག་བརྗོད་པས། དབུ་སྐད་ཅིག་ཉིད་ལ་རང་གི་མགྲིན་པ་ལ་སྔར་བཞིན་འབྱར་རོ། །
དེ་ནས་སྐྱེ་བོའི་ཚོགས་ཐམས་ཅད་དད་པ་སྐྱེས་ཏེ་རང་དབང་མེད་པར་མིག་ཆུ་འཐོན་ནས་དད་པའི་བ་སྤུ་ཐམས་ཅད་གཡོ་ཞིང་འདི་ལྟར་ཞུས། འདི་ཕྱིའི་སྐྱབས་གནས་བླ་མ་རིན་པོ་ཆེ་ལགས། བདག་ཅག་རྣམས་རྨོངས་པའི་དབང་གིས་མི་ཤེས་པའི་བླ་མ་ལ་སྐུར་བ་བཏབ་པའི་ལས་ངན་བསགས་པ་དེ་ལ་ཚུལ་ཁྲིམས་དང་ལྡན་པའི་དགེ་སློང་མས་བདག་ཅག་རྣམས་ཀྱི་ལུས་ངག་ཡིད་གསུམ་གྱི་སྒོ་ནས་བཤགས་པ་བཞེས་ནས། བདག་ཅག་རྣམས་ཀྱང་རྗེས་སུ་གཟུང་བར་མཛོད་ཅིག་ཅེས་གསོལ་བ་བཏབ་པས། དགེ་སློང་མ་དཔལ་མོས་འཕགས་པ་ཐུགས་རྗེ་ཆེན་པོ་ལ་གསོལ་བ་བཏབ་པས་ཡུལ་གྲུ་དེའི་མི་ཐམས་ཅད་ཀྱང་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཀྱི་ཞིང་ཁམས་སུ་དྲངས་སོ། །དེ་ནས་དགེ་སློང་མ་དཔལ་མོས་འདི་ལྟར་བསྟོད།
སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་བསྟོད། །དུས་གསུམ་བདེ་བར་གཤེགས་པ་ཆོས་ཀྱི་སྐུ། །འགྲོ་དྲུག་སེམས་ཅན་རྣམས་ལ་སྤྱན་རས་གཟིགས། །ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ། །གཟི་བརྗིད་འོད་དཔག་མེད་ལ་ཕྱག་འཚལ་ལོ། །ལམ་འདི་ཕྱོགས་དུས་ཀུན་ཏུ་སྤེལ་བ་ལ། །སྟོང་གྲོགས་བྱེད་པའི་བཀའ་བསྲུང་ཕྱག་དྲུག་དང་། །ཀླུ་ཆེན་བརྒྱད་དང་རྟ་སྒོའི་གཞི་བདག་ལ། །བདག་གི་ལུས་ངག་ཡིད་གསུམ་གུས་པས་བསྟོད། །ཅེས་གསུངས་སོ། །དེ་ནས་དགེ་སློང་མ་དཔལ་མོ་དགུང་ལོ་དྲུག་ཅུ་རེ་བདུན་ཕེབས་པའི་ཚེ་ཆོ་འཕྲུལ་ཟླ་བའི་ཚེས་བཅོ་ལྔའི་ཉིན་ཆུ་བོ་ནེེ་རཉྫ་ནའི་ཤར་ཕྱོགས་སུ་ལི་ཁ་ར་ཤིང་འཕེལ་བྱ་བའི་ཡུལ་དེ་རུ་འཕགས་པ་སྤྱན་རས་གཟིགས་ཀྱི་ལྷ་ཁང་ཁ་སར་པ་ཎི་ཞེས་བྱ་བ་ཞིག་ཡོད་པའི་གཙུག་ལག་ཁང་དེ་རུ་ཁོང་གིས་སེམས་ཅན་གྱི་འགྲོ་དོན་རྒྱ་ཆེན་པོ་མཛད་བཞིན་བཞུགས་པའི་ལོ་མང་ཞིག་གི་རྗེས་སུ་ལྷ་ཁང་དེའི་རྩེ་ལ་ཕེབས་མ་ཐག་ཏུ་ནམ་མཁའ་ལ་འཇའ་ཡལ་བ་ལྟར་དགེ་སློང་མའི་སྐུ་ལུས་ཡལ་ལོ། །
དགེ་སློང་མའི་སྐུ་ལུས་ནམ་མཁའ་ལ་ཡལ་བའི་རྗེས་སུ་ཡུལ་གྲུ་དེའི་མི་ཐམས་ཅད་ནི་བྱི་ཕྲུག་ནམ་མཁའ་ལ་ཁ་གདངས་པ་ལྟར་ཁ་གདངས་ནས་བདག་ཅག་རྣམས་ཀྱང་རྗེས་སུ་ཟུངས་ཟེར་ནས་དབུགས་རིང་ཐོན་བཞིན་སྐད་ངན་བརྒྱབས། ལ་ལ་ནི་དྲན་མེད་དུ་ས་ལ་བརྒྱལ། ལ་ལས་ནི་མགོ་ས་ལ་བརྒྱབས། ལ་ལ་ནི་སྡུག་བསྔལ་གྱིས་མ་བཟོད་པར་ཡར་རྒྱུགས་མར་རྒྱུགས་བྱས། ལ་ལས་རང་སྲོག་རང་གིས་གཅོད་ཐབས་བྱས། ལ་ལ་ནི་བདེན་རྫུན་མགོ་མ་ཚོད་པར་མགོ་འཐོམས་ནས་ལུས། ལ་ལ་ནི་མིག་ཆུ་འབྲལ་མེད་དུ་འཐོན་ནས་ས་ཡང་ནག་པོར་མཐོང་། ལ་ལས་ནི་ཕར་འབོད་མར་འབོད་གཏོང་བཞིན་ལྷ་ཁང་དེའི་ཕྱི་ནང་རྒྱུག་བཞིན་རང་སེམས་འཐོར་ནས་ལུས། ལ་ལས་ནི་མ་རྒན་སེམས་ཅན་ཐམས་ཅད་རྗེས་སུ་གཟུང་བར་ཤོག་ཅིག་བྱས་ནས་སྨོན་ལམ་ཤུགས་ཆེན་བཏབ། ལ་ལས་ནི་བརྐྱངས་ཕྱག་མང་དུ་འབུལ་ཞིང་གསོལ་བ་བཏབ། ལ་ལས་ནི་འདི་སྐད་སྨྲས།
ཀྱེ་མ་ཀྱེ་ཧུད་ཐུགས་རྗེ་ཆུང་། །བདག་ཅག་བློ་གཏད་སུ་ལ་འཆའ། །
དམ་པའི་ཆོས་ནི་སུ་ལས་ཞུ། །འཆི་དུས་འཕོ་བ་སུ་ཡིས་འདེབས། །
བར་དོའི་སྡུག་བསྔལ་སུ་ཡིས་སེལ། །སྒྲིབ་སྦྱོང་འཕྲིན་ལས་སུ་ཡིས་མཛད། །
ཅེས་སོ། །དེ་ནས་ཁ་སར་པ་ཎིའི་ལྷ་ཁང་དེ་ཡང་བྱ་ཚང་ནས་བྱ་ཐོན་པ་ལྟར་སྟོང་སངས་ངེར་ལུས་སོ། །ཡུལ་གྲུ་དེའི་མི་རྣམས་ཀྱི་སྡུག་བསྔལ་གང་བྱེད་ཀྱང་བྱ་ཐབས་དང་བྲལ། དེ་དུས་ཡུལ་གྲུ་དེའི་མི་རྣམས་ལ་ནམ་མཁའ་ནས་སྒྲ་འདི་ལྟར་བྱུང་།
སྔོན་བྱོན་གྱི་སྐྱེས་བུ་དམ་པ་རྣམས། །མཛད་འཕྲིན་གྱིས་ཕྱོགས་བཅུར་ཁྱབ་ན་ཡང་། །སྐུ་མི་བཞུགས་མཚན་ཙམ་ཤུལ་དུ་ལུས། །དེ་ཀུན་ཀྱང་མི་རྟག་འཆི་བ་ཡིན། །སྔོན་ཡང་རང་སེམས་རྣམ་ཤེས་གཅིག་པུ་ཞིག །འཁྱམས་ཤིང་ལས་ལ་བརྟེན་ནས་འདིར་སྐྱེས་སོ། །ད་ཡང་མར་གྱི་དཀྱིལ་ནས་སྤུ་བཏོན་ལྟར། །ཐམས་ཅད་བཞག་ནས་རང་ཉིད་གཅིག་པུར་འགྲོ། །དེ་ནས་ཡུལ་གྲུ་དེའི་མི་རྣམས་ཀྱིས་སྒྲ་དེ་ལྟར་ཐོས་པ་དང་ཐམས་ཅད་ཀྱིས་མི་རྟག་པ་ཡིན་པར་ངོ་ཤེས་ནས་རང་གནས་སུ་ལོག་གོ །
དེ་ནས་རྒྱལ་པོ་དྷརྨ་པཱ་ལས་ཀྱང་དགེ་སློང་གི་སྡོམ་པ་ཚུལ་བཞིན་དུ་བསྲུངས་ནས། སོ་ཐར་བྱང་སེམས་གསང་སྔགས་ཀྱི་སྡོམ་པ་རྣམས་ལ་བཅས་མཚམས་སྲོག་གི་ཕྱིར་ཡང་མི་གཏོང་བར་བསྲུང་བའི་དགེ་བ་ཆོས་སྡུད་དང་། སེམས་ཅན་གྱི་དོན་སྒྲུབ་པ་དང་། ཚུལ་ཁྲིམས་ཀྱི་ཕར་ཕྱིན་རྫོགས་པའི་སྔོན་བསགས་སྡིག་ལྟུང་ཐམས་ཅད་མ་ལུས་པར་བྱང་ནས་རྒྱལ་བློན་འབངས་འཁོར་བཅས་སུམ་ཅུ་རྩ་གསུམ་པའི་ལྷར་སྐྱེས་སོ།། །།
[1] མཁའ་འགྲོའི་ཆོས་མཛོད་ཆེན་མོ། ༼༦༽ བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༧ ལོ། ཤོག་གྲངས་ ༣༡༤ ནས་དང་། འཕགས་བོད་ཀྱི་སྐྱེས་ཆེན་མ་དག་གི་རྣམ་པར་ཐར་པ་པདྨ་དཀར་པོའི་ཕྲེང་བ། ༼༥༽ བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༣ ལོ། ཤོག་གྲངས་ ༨༠ ནས་ ༡༢༣ བར་བཞུགས་པ་ལས་བཏུས་པའོ།།