ཞིང་འདི་སྐྱོང་བའི་གུང་རུ་ཡེ་ཤེས་ཀྱི་མཁའ་འགྲོ་མའི་འཁྲུངས་རབས་བཤད་པ།

༄༅། །ཞིང་འདི་སྐྱོང་བའི་གུང་རུ་ཡེ་ཤེས་ཀྱི་མཁའ་འགྲོ་མའི་འཁྲུངས་རབས་བཤད་པ།

 

མདོ་སྨད་རྒན་གྱའི་ལོ་རྒྱུས་ལས་བཏུས།

 

ད་ནི་དཔལ་འཁོར་ལོ་སྡོམ་པའི་ཕོ་བྲང་གཉའ་གོང་བྲག་དཀར་གྱི་གནས་ཀྱི་བདག་པོའི་ཚུལ་དུ་སྐུའི་སྒྱུ་འཕྲུལ་བསྟན་པ་གུང་རུ་ཡེ་ཤེས་ཀྱི་མཁའ་འགྲོ་མའི་སྐུ་ཕྲེང་རིམ་བྱོན་རྣམས་ཇི་ལྟར་བྱོན་ཚུལ་འཆད་པ་ལ། སྡེ་ཁྲི་འཇམ་དབྱངས་ཐུབ་བསྟན་ཉི་མས་མཛད་པའི་རྗེ་འདིའི་འཁྲུངས་རབས་གསོལ་འདེབས་ལས།

དཔལ་ལྡན་བདེ་ཆེན་ཡེ་ཤེས་སྒྱུ་མའི་གར། །ཁྱབ་བདག་མགོན་པོ་ཧེ་རུ་ཀ་དཔལ་མཆོག །

སྙོམས་འཇུག་ལྷན་སྐྱེས་དགའ་བ་སྦྲང་རྩིའི་རོས། །ཚིམ་མཛད་རྡོ་རྗེ་ཕག་མོ་ལ་ཕྱག་འཚལ། །

གྲུབ་རིགས་ཀུན་གྱི་སྤྱི་བོར་ངལ་གསོ་བ། །དཔའ་བོ་མཚོ་ལས་སྐྱེས་པའི་རྡོ་རྗེ་ཡི། །

གསང་ཡུམ་ཌཱ་ཀི་ཡེ་ཤེས་མཚོ་རྒྱལ་ཞབས། །མཁའ་འགྲོའི་གཙོ་མོ་མཆོག་ལ་གསོལ་བ་འདེབས། །

གདོད་ནས་སྤྲོས་བྲལ་མཁའ་ལྟར་དག་པའི་ཡུམ། །སྣ་ཚོགས་ཐབས་ཀྱིས་གང་འདུལ་རོལ་པའི་དཔྱིད། །

ཟབ་གསང་གཅོད་ཡུལ་གདམས་པ་ཀུན་གྱི་གཏེར། །ཨ་མ་ལབ་ཀྱི་སྒྲོན་མར་གསོལ་བ་འདེབས། །

ཞེས་གསུངས་པ་ལྟར། སྤྲུལ་གཞི་མ་ཅིག་ལབ་སྒྲོན་གྱི་རྣམ་ཐར་ཅུང་ཟད་རྒྱས་པར་བཤད་པ། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མའི་ཐུགས་ཀྱི་སྤྲུལ་པ་ཨ་མ་ལབ་ཀྱི་སྒྲོན་མ་མཆོག་ནི། ཇི་སྐད་དུ། མདོ་དྭངས་སྙིགས་འབྱེད་པའིི་ལེའུ་ལས།

སྙིགས་མ་རྩོད་པ་རྒྱས་པའི་དུས། །བྱང་ཕྱོགས་ཁ་བ་ཅན་ལྗོངས་སུ། །

རྒྱལ་བའི་ཡུམ་གྱི་སྤྲུལ་པ་ནི། །སྒྲོལ་མའི་མཚན་ཅན་འབྱུང་བར་འགྱུར། །

ཞེས་དང་། འཇམ་དཔལ་རྩ་བའི་རྒྱུད་རྒྱས་པ་ལས།

ང་ཡི་བསྟན་པའི་སྙིགས་མ་ལ། །ཁ་བ་ཅན་ཞེས་བྱང་ཕྱོགས་སུ། །

ཤེས་རབ་ཡུམ་ཆེན་ཐུགས་སྤྲུལ་ནི། །ལབ་ཀྱི་སྒྲོན་མ་བྱ་བ་འབྱུང་། །

སྐྱེ་མེད་སྙིང་པོའི་དོན་སྟོན་ཅིང། །གྲོང་དང་གྲོང་ཁྱེར་རི་སུལ་དང༌། །

དུར་ཁྲོད་བས་མཐའ་ཁྱབ་པར་ཉུལ། །དེ་ཡི་ཆོས་ནི་རྒྱས་པར་འགྱུར། །

ཞེས་སངས་རྒྱས་ཀྱི་བཀའ་ཡི་ལུང་གིས་དངོས་སུ་ཟིན་པ་ལྟར། ལབ་ཕྱིའི་དབྱིའི་གངས་པར་ངམ་ཤོད་བྱ་བའི་སྨད་དུ་ལབ་ཀྱི་ཡུལ་གྲོང་དམ་པར། ཡབ་ཆོས་ཀྱི་ཟླ་བ་དང་ཡུམ་འབུམ་སྐྱིད་གཉིས་ཀྱི་སྲས་སུ་རབ་བྱུང་གཉིས་པའི་ཆུ་ལུག་ (ཕྱི་ལོ་ ༡༡༠༣ འདི་བྲག་དགོན་པའི་རྩིས་གཞུང་དང་བསྟུན་མོད། དཔྱད་གཞི་ཡོད་ཚུལ་འོག་ཏུ་གསལ་ཞིང་། དགུང་སྙིང་ལུག་ཡིན་པ་མ་ཅིག་གི་རྣམ་ཐར་དང་མཐུན་མོད། ཀུན་མཁྱེན་བསྟན་རྩིས་དང་མདོ་སྨད་ཆོས་འབྱུང་དུ་དགུང་སྙིང་རྟ་ཡིན་པར་གསལ་) ལོའི་ཟླ་བ་གསུམ་པའི་ཚེས་བཅོ་ལྔ་ལ་ནམ་མཁའ་ལ་སྒྲ་གྲག་ཅིང་བར་སྣང་ལ་འཇའ་འོད་འཁྱུག་པ་སོགས་ངོ་མཚར་བའི་ལྟས་དུ་མ་དང་བཅས་སྐུ་འཁྲུངས་མ་ཐག་ཏུ་ཨ་མ་ལ་ཁམས་བདེའམ་ཞེས་དྲིས། ལྕེའི་སྟེང་དུ་ཧྲཱིཿདམར་པོ་འོད་ཟེར་འབར་བ་ཞིག་འཁོར་བའི་ཚུལ་དུ་སྣང་། དཔྲལ་བར་མིག་གཅིག་སྣང་བ་ལ་འོད་ཁ་དོག་སྣ་ལྔ་རྟའི་རྔ་འཇག་བཞིན་གཤིབ་པ། སྤྱི་བོའི་གཙུག་ཏུ་འོད་དཀར་པོ་མཐེའུ་ཆུང་གི་རྩེ་ཙམ་ཞིག་ལ་ཨ་དཀར་པོ་ཞིག་གིས་མཚན་པ་ཨ་དེ་ལ་ཟུག་ནས་སྣང༌། དེ་མ་ཐག་ཨ་ཅེ་འབུམ་མེས་རས་ཀྱིས་ལྗིབས་ཏེ་པང་དུ་བླངས་ནས་ཡུད་ཙམ་ཞིག་སོང་བ་དང་། ལྕེ་སྟེང་གི་ཧྲཱིཿདེ་ལྕེ་ལ་ནུབ་ནས་མི་མངོན་པར་གྱུར། དེ་ནས་མར་དཀར་དང་རྒྱལ་མོ་ཀ་ར་ (ཀ་ར་ནི་རྒྱ་གར་ཡུལ་གྱི་ཀ་ར་འབྱུང་བའི་ཤིང་གི་མིང་ཡིན་པས་དེ་རིམ་བཞིན་ཤིང་དེ་གདུས་པའི་ཁཎྜ་ལ་བརྡར་ཆགས་པ་སྟེ། བོད་ཀྱི་སྐད་དུ་བསྒྱུར་ན་སྲེད་བྱེད་ཅེས་སུ་འགྱུར་བར་བཤད་དོ། །ཞེས་དཔལ་སྤུངས་དབོན་ཀརྨ་བསྟན་འཛིན་འཕྲིན་ལས་རབ་རྒྱས་ཀྱིས་མཛད་པའི་རྒྱུད་བཞིའི་དཀའ་འགྲེལ་ལས་གསུངས་) སྦྱར་ནས་བྱིན་པས་ཕྱིར་བྱུང་ནས་ཟ་མ་འདོད་ནས་སྤྱན་གསུམ་ཁྲ་ཟིམ་མེ་ནམ་མཁའ་ལ་གཟུགས་ཏེ། ཅུང་ཟད་ནས་སྤྱི་བོའི་འོད་མར་ནུབ། དཔྲལ་བའི་སྤྱན་གྱི་འོད་ལྔ་ཡང་སྤྱན་ལ་ཕར་ཐིམ་པ་དང༌། དེ་ནས་མགྲིན་པ་མར་ཅུང་ཟད་བཀུག་སྟེ། ཨ་ཅེའི་གདོང་ལ་ཧྲིག་གེ་གཟིགས་སོ། །དེ་ནས་རྐན་ཅུང་ཟད་བརྡེབ། མར་བྱིན་པ་ལེགས་པར་ཟོས་ནས་ལྕེ་སོ་ཤད་ཀྱིས་བྱས་ཤིང་ཡུམ་ལ་བལྟས་ཏེ་འཛུམ་བྱས། དེ་ནས་ཨ་ཅེའི་པང་དུ་གཉིད་དུ་སོང་། ཡུམ་ཡང་སྲས་འཁྲུངས་བཙས་ཀྱིས་གནོད་པ་ཅི་ཡང་མེད་པར་ལུས་སེམས་དགའ་བདེས་ཁྱབ། ནངས་པར་སྲས་མོས་ཁྲ་ས་ལེ་ཨ་ཅེ་ལ་བལྟས་པས། ཨ་ཅེ་འབུམ་མེས་ཨ་མ་བོས་ཏེ། ཨ་མ་བུ་མོ་འདིས་མིག་གསུམ་དང་བཅས་ང་ལ་བལྟས་པ་མཛེས་པ་ལ་རང་རེ་ལ་འདི་འདྲ་ཞིག་ཡོད་དོ་ཟེར་ནས་དགའ་ཚོར་བྱས་སོ། །

དེ་ནས་ཡབ་ཕྱི་ནས་འོང་བཞིན་འདུག་ཟེར་བ་ཐོས་པས། ཨ་ཅེ་འབུམ་མེས་བུ་མོ་སྦ་དགོས་ཟེར་ནས་ལྐོག་ཏུ་བཞུགས་སུ་གསོལ། ཡབ་མཆོད་ཁང་དུ་བྱོན་པ་དང་། འབུམ་མེས་ཡབ་ལགས། ཨ་མ་ལ་བུ་མོ་ངན་པ་མིག་གསུམ་ཡོད་པ་ཞིག་སྐྱེས་པས་དེ་འབོར་རམ་ཞེས་པས་ཡབ་ཀྱིས་གར་ཡོད་ཁྱེར་ཤོག་གསུངས་སོ། །དེ་ནས་འབུམ་མེས་བུ་མོ་བླངས་ཏེ་ཡབ་ཀྱི་རྩར་ཁྱེར་བས། ཡབ་ཀྱིས་ལེགས་པར་བརྟགས་ནས་བུ་མོ་འདིའི་མིག་དབུས་མའི་དཀྱིལ་དུ་ཨ་དཀར་པོ་སྤུས་བྲིས་པ་ཙམ་ཞིག་འདུག་ཅིང་ཕྱག་གི་ཚིགས་བར་མ་ཆད་པར་དྲ་བར་འབྲེལ་ཞིང་། སེན་མོ་རྣམས་ཅུང་ཟད་དམར་ལ་ཉ་ཕྱི་ལྟར་འོད་སྣ་ཚོགས་པ་འཇའ་འོད་ལྟར་གསལ་བ་ལ་ཨོཾ་ཨཱཿཧཱུྃ་གིས་མཚན་པའི་ཡི་གེ་གསུམ་འཆར་བས། མཁའ་འགྲོ་མའི་མཚན་རྟགས་ཐམས་ཅད་ཚང་བར་འདུག་པས་བུ་མོ་ཉ་ར་ལེགས་པར་གྱིས། འབུམ་མེ་ཁྱོད་ཀྱིས་བུ་མོ་འདི་སྒོར་མ་ཁྱེར་ལ་ཁྱོད་ཀྱང་གྲོང་ཁྱེར་དུ་མ་རྒྱུག་པར་བུ་མོ་འདི་པང་ཞིག་ཟེར། ལོ་གསུམ་ལོན་དུས་ཡིག་དྲུག་དང་། ཏཱ་རེ་དང་། ཧྲཱིཿདང༌། ཨཱཿདང༌། ག་ཏེ་དང་། ཧ་རི་ནི་ས་རྣམས་གསུངས་ཤིང་མཆོད་ཁང་གི་ལྷ་ལ་ཕྱག་བྱེད་པ་སོགས་རང་ཤུགས་ཀྱིས་མཁྱེན། ལོ་ལྔ་ནས་ཡུམ་དང་ཨ་མཆོད་ཇོ་མོ་དམ་པ་གཉིས་ཀྱིས་ཡི་གེ་བསླབས་པར་བརྟེན། དགུང་ལོ་བརྒྱད་ཀྱི་ཐོག་ཉིན་རེར་འཕགས་པ་བརྒྱད་སྟོང་པ་ཚར་གཉིས་རེ་ཀློག་གྲུབ་པ་ཡིན་ནོ། །

དེའི་སྟབས་ཀྱིས་ཨ་མཆོད་ཇོ་མོ་ན་རེ། བུ་མོ་འདི་རང་ག་བ་ཞིག་མ་ཡིན་པར་མཁའ་འགྲོ་མ་བཟང་པོ་ཞིག་ཡིན་འདུག །ངས་འདིའི་ཤེས་རབ་ཀྱི་རྩེ་མི་ནོན་ཏེ། འདིའི་ཤེས་རབ་ནི་ནགས་ལ་མེ་མཆེད་པ་བཞིན་འབར་བས། ཤེས་རབ་སྒྲོན་མེ་ཐོགས་ཤིག་ཟེར། དེ་ནས་མི་སྡེ་ཐམས་ཅད་ཀྱིས་དང་པོར་ཇོ་མོ་འབུམ་སྐྱིད་ལ་བུ་མོ་མིག་གསུམ་པ་ཅན་ཞིག་འདུག་ཟེར་ནས་བལྟ་རུ་འོངས་པས། མཐོང་བ་ཙམ་གྱིས་སྣང་བ་འགྱུར་ཏེ་ཕྱག་དང་བྱིན་རླབས་ཞུས། དེ་ནས་མངའ་བདག་རྒྱལ་པོས་སྟོན་མོ་བཤམས་ནས་ཡབ་ཟླ་བ་རྒྱལ་མཚན་དང་། ཡུམ་འབུམ་སྐྱིད་ལ་ཁྱོད་གཉིས་ཀྱི་བུ་མོ་ཆུང་བ་དེ་ཁྱེར་ལ་ཤོག་ཟེར་ནས་མངག་བཞུད་པ་བཏང་བས། ཡབ་ཡུམ་གཉིས་ཀྱིས་སྲས་མོ་སྒྲོན་ཚེའམ་ཤེས་རབ་སྒྲོན་མེ་གཡོག་ཉེར་གཉིས་དང་བཅས་སོང་བས། རྒྱལ་པོས་ཀྱང་བསུས་ཤིང་རྒྱལ་པོས་ཡུམ་ལ་བཀའ་འདྲི་གནང་བས་ཡུམ་ཞུམ་སྟེ་སྐད་འདར་བ་ན། སྲས་མོ་འདིས་ལན་ཕུལ་ཞིང་། དེ་ནས་རྒྱལ་པོས་ཡི་གེ་ཤེས་སམ་གསུངས་པར། ཤེས་ཞུས་པས་འཕགས་པ་སྡུད་པ་ཞིག་བལྟ་རུ་བཅུག་པར། སྐད་སུམ་འགྱུར་གྱིས་བཀླགས་པས་ཐམས་ཅད་ཀྱིས་སྐད་འགྱུར་དང་ཡི་གེ་ལ་མཁས་འདུག་ཟེར། རྒྱལ་པོའི་དྲུང་གི་པཎྜི་ཏས་ཁྱོད་ཀྱིས་དོན་ཤེས་སམ་དྲིས་པར། དོན་ཤེས་གསུངས་ནས་བཤད་པས་ཐམས་ཅད་ཡིད་ཆེས་ཤིང་མཁའ་འགྲོ་མའི་སྤྲུལ་པར་ངེས་པ་རྙེད། རྒྱལ་པོས་སྒྲོན་མའི་མིང་དང་ལབ་ཕྱིར་སྐུ་འཁྲུངས་པས་ལབ་སྒྲོན་ཞེས་ཐོགས་དང་རྟེན་འབྲེལ་འགྲིགས་པ་ཡིན་གསུངས་པས་དེ་ནས་བཟུང་ལབ་སྒྲོན་དུ་གྲགས་སོ། །

དེ་ནས་ཡབ་ཡུམ་སྲས་མོ་གཡོག་འཁོར་དང་བཅས་པ་ཕྱིར་ལོག་ནས་སྲས་མོས་ཡུམ་རྒྱས་འབྲིང་བསྡུས་གསུམ་ལ་ཞལ་འདོན་མཛད་བཞིན་བཞུགས་པས། དགུང་ལོ་བཅུའི་དུས་སུ་ཉིན་རེར་པོ་ཏི་བཞི་ཚར་བ་དང༌། དགུང་ལོ་བཅུ་གསུམ་ལོན་དུས་ཉིན་རེར་པོ་ཏི་བརྒྱད་ཚར་བ་བྱུང་། ལོ་དེར་མ་ཡུམ་མྱ་ངན་ལས་འདས་ཤིང་ཨ་ཅེ་འབུམ་མེའམ་བཙུན་མིང་སྟོན་མཚོ་རིན་ཆེན་འབུམ་གྱིས་ཁྲིད་དེ་དགེ་བཤེས་ཨ་སྟོན་ལ་མཇལ་དུ་སོང་བས་དགེ་བཤེས་ཀྱི་ཞལ་ནས། བུ་མོ་འདི་ལ་མཚན་རྟགས་ཡང་ཚང་འདུག །བརྒྱད་སྟོང་སྐད་ཅིག་གི་ཡུན་ལ་ཀློག་ཚར་བས་སྐད་འགྱུར་བཟང་པོ་མི་འདྲ་བ་བརྒྱད་ཡོད་འདུག་ད་འདི་ལ་དོན་བཤད་པར་བྱའོ་གསུངས་ནས་ལོ་གསུམ་ལ་ཨ་ཅེ་དང་ལྷན་དུ་དགེ་བཤེས་ཀྱི་དྲུང་དུ་ཤེར་ཕྱིན་ས་བཅུ་ལམ་ལྔའི་འཆད་ཚུལ་སྦྱངས་པས་དགེ་བཤེས་ཀྱིས་ངས་ཁྱོད་ཀྱི་སློབ་དཔོན་མི་ཡོང་བར་འདུག །ད་གཡོན་རུ་གྲྭ་ཐང་དུ་གཏེར་སྟོན་གྲྭ་པ་མངོན་ཤེས་ (༡༠༡༢-༡༠༩༠ དེབ་སྔོན་དུ་ཡང་གཞོན་ནུ་ནས་གྲྭ་པ་མངོན་ཤེས་ལ་རབ་ཏུ་བྱུང་། ཞེས་གསལ་མོད། གྲྭ་མངོན་དང་དུས་མི་མཚུངས་པ་འདི་ལྟ་ལགས་པས་མ་ཅིག་གི་འཁྲུངས་འདས་གོང་དུ་བཀོད་པ་དེར་དཔྱད་གཞི་ཡོད་པས། བདུད་འཇོམས་ཆོས་འབྱུང་དུ་མ་ཅིག་ཕྱི་ལོ་ ༡༠༣༡ ལོར་འཁྲུངས་པར་བཤད་པ་དང་། སུམ་པས་ ༡༠༥༥ ལོར་འཁྲུངས་པར་བཤད་པ་ལྟར་ཕྱི་མ་གཉིས་ཀྱི་གང་རུང་དཔྱད་དགོས་) ཅན་བྱ་བ་མཁྱེན་པ་དང་ལྡན་ཞིང་ཡོན་ཏན་ཤིན་ཏུ་ཟབ་པ་ཞིག་གིས་བུ་སློབ་མང་པོ་སྐྱོང་བ་ཞིག་ཡོད་པས་དེར་སོང་ལ་སྒྲོ་འདོགས་ཆོད་གསུངས།

དེ་ནས་ལོ་བཅུ་དྲུག་གི་དུས་སུ་ཨ་ཅེ་དང་ལྷན་དུ་གཏེར་སྟོན་གྲྭ་པ་མངོན་ཤེས་ཀྱི་དྲུང་དུ་སོང་བས། སློབ་དཔོན་གྲྭ་པའི་ཞལ་ནས། བུ་མོ་ཡི་གེ་ལ་མཁས་པ་ཞིག་ཡོད་པ་དེ་འདི་ཡིན་ནམ་གསུངས། ཨ་ཅེས་འདི་ཡིན་ཞུས་པས། བླ་མའི་ཞལ་ནས། འོ་ན་ངའི་མཆོད་གནས་སམ་ཨ་མཆོད་སྒྲ་དྲུག་འགྱུར་བྱ་བ་ཉིན་གཅིག་ལ་པོ་ཏི་བཞི་ཚར་བ་འདི་དང་ལབ་སྒྲོན་གཉིས་ཀློག་འགྲན་དགོས་གསུངས་ནས། སྒྲ་དྲུག་འགྱུར་གྱིས་པོ་ཏི་བཞི་ལས་མ་ཚར། ལབ་སྒྲོན་གྱིས་པོ་ཏི་བཅུ་གཉིས་པོ་སྐད་འགྱུར་གྱི་སྒོ་ནས་བཀླགས་པས་ཚར། བླ་མའི་ཞལ་ནས་ཇོ་ཆུང་འདི་ངའི་སྒྲ་དྲུག་འགྱུར་ལས་སྐད་གཉིས་ཀྱིས་ལྷག་ཅིང་ལྕེ་རླབས་ལ་སྒྲ་དྲུག་འགྱུར་གྱིས་ཐག་ཉེ་ཙམ་ཡང་མི་ཟིན་པར་འདུག་པས། ལབ་སྒྲོན་ངའི་དྲུང་ནས་ཆོས་སྦྱང་ཞོར་དུ་ངའི་ཨ་མཆོད་ཀྱང་མཛོད་གསུངས། དེ་ནས་ཨ་ཅེ་འབུམ་མེས་ཨ་སྒྲོན་རང་ཅག་གཉིས་སྒྲུབ་པ་བྱས་ནས་མྱུར་དུ་མཁའ་སྤྱོད་ཞིང་དུ་ཨེ་འགྲོ་ཟེར་བ་ལ། ལབ་སྒྲོན་གྱིས་ང་ནི་མི་འགྲོ་སེམས་ཅན་ལ་ཕན་འདོགས་དགོས། ཁྱོད་མྱུར་དུ་སྒྲུབ་པ་བྱས་ནས་མཁའ་སྤྱོད་ཞིང་དུ་སོང་དང༌། ངས་ཀྱང་འགྲོ་དོན་རྫོགས་ནས་འོང་གིས་དེ་དུས་འཕྲད་པར་བྱའོ་གསུངས། དེ་ནས་ཨ་ཅེས་སྒྲུབ་པ་ལོ་གསུམ་བྱས་ནས་མཁའ་སྤྱོད་དག་པའི་ཞིང་དུ་གཤེགས་སོ། །

གཏེར་སྟོན་གྲྭ་པ་མངོན་ཤེས་རིན་པོ་ཆེས་ལབ་སྒྲོན་སྣོད་ལྡན་དུ་གཟིགས་ནས། འབུམ། ཉི་ཁྲི། བརྒྱད་སྟོང་པ། མདོ་མང་པོའི་ལུང་དང་དེའི་དོན་གསལ་བར་བཤད་པས་ལབ་སྒྲོན་གྱིས་ཀྱང་འབུམ་གྱི་འགྲེལ་ཆེན། ཉི་ཁྲིའི་འགྲེལ་ཆུང་ནས་བཟུང་ཤེར་ཕྱིན་ཡི་གེ་གཅིག་མ་ཡན་ཆད་ཀྱི་དོན་ཀུན་ཐུགས་སུ་ཆུད་ཅིང་། བླ་མ་ལ་རྟོགས་པ་ཕུལ་བས་བླ་མ་ཐུགས་ཤིན་ཏུ་མཉེས་ནས་ཁྱེད་ཀྱི་རྒྱས་འབྲིང་རྣམ་གསུམ་ཐུགས་སུ་ཆུད་ཅིང༌། མདོ་སྡེ་ལ་རང་དབང་ཐོབ་པར་འདུག་ངས་ནི་དེ་ཙམ་བློ་ལ་ཆུད་དཀའ་བར་འདུག་གསུངས་ནས། འབོལ་གདན་སུམ་བརྩེགས་ཀྱི་སྟེང་དུ་བཞུགས་སུ་གསོལ་ཞིང་། དར་ཞྭ་པད་འདབ་བཅུ་བ་ཞིག་ཀྱང་གནང་བས། དེ་ནས་བཟུང་ཇོ་མོ་ཞྭ་ཆུང་ཅན་ཞེས་ཀྱང་གྲགས་སོ། །

དེའི་དུས་སུ་ཁོར་ཡུག་གི་མི་རྣམས་ན་རེ། འཕན་པོའི་རྒྱལ་ལྷ་ཁང་དུ་ཨ་ཙ་ར་ཞིག་འོངས་ནས། རྒྱ་གར་པོ་ཏ་རིའི་བྷ་དྲ་ཕུག་གི་སྒོམ་ཆེན་པཎྜི་ཏ་ཞིག་བོད་དུ་སྐྱེས་ནས་ལབ་སྒྲོན་དུ་གྲགས་པ་དེ་ད་ལྟ་གང་ན་ཡོད་ཅེས་འཚོལ་བཞིན་ཡོད་ཟེར། དེའུ་ནུབ་མོ་ལབ་སྒྲོན་གྱི་མཚན་ལམ་དུ་མཁའ་འགྲོ་མ་དཀར་མོ་ཞིག་གིས་རྒྱ་གར་ནས་ཨ་ཙ་ར་ནག་པོ་ཞིག་འདིར་བྱོན་ནས་སང་ཉིན་ཁྱེད་ལ་མཇལ་དུ་འོང་བར་ཡོད་ཟེར། ཨ་ཙ་ར་ཨ་ཙ་ར་ཞེས་པ་སློབ་དཔོན་གྱི་མིང་དེ་སུ་ཡིན་དྲིས་པས་ཕ་དམ་པ་བྱ་བ་ཡིན་ཟེར་དེ་གཟིམ་སད། ཕྱི་ཉིན་ལུང་བསྟན་ལྟར་ཨ་ཙ་ར་དང་མཇལ་ཏེ། ཕྱག་ཕུལ་བས་ཕྱག་མ་བཞེས་པར་དབུ་གཏུགས་མཛད། ལབ་སྒྲོན་གྱིས་དམ་པ་རིན་པོ་ཆེ་བོད་དུ་འགྲོ་དོན་དུ་བྱོན་པ་ངོ་མཚར་ཆེ་ཞུས་པས། དམ་པའི་ཞལ་ནས། ཡེ་ཤེས་ཀྱི་མཁའ་འགྲོ་མ་ལབ་སྒྲོན་ཁྱོད་བོད་དུ་འགྲོ་དོན་ལ་བྱོན་པ་དེ་བས་ཀྱང་ངོ་མཚར་ཆེ་ལ་རྗེས་སུ་ཡི་རང་གསུངས། དེ་ནས་ལབ་སྒྲོན་གྱིས་ངས་འགྲོ་དོན་ཇི་ལྟར་བགྱི་ཞུས་པས་དམ་པའི་ཞལ་ནས། བུ་མོ་ཁྱོད་མཚང་ཡུལ་ནས་ཐོན། མི་ཕོད་པ་རྫིས། མི་ནུས་པ་སྒྱུར། འཁྲི་བ་ཆོད། ཞེན་པ་ཐོངས། གཉན་ས་འགྲིམས། སེམས་ནམ་མཁའ་ལྟར་ཤེས་པར་གྱིས་ལ་གཉན་ཁྲོད་སངས་རྒྱས་རིང་ལ་ཚོལ་དང༌། ཁྱོད་ཀྱི་བསྟན་པ་མཁའ་ལ་ཉི་མ་ཤར་བ་བཞིན་དུ་འོང་བ་ཡིན་གསུངས་ནས་ལུང་བསྟན་གནང་སྟེ་ཕ་དམ་པ་ཕེབས།

འདིར་འཕྲོས་དོན་ཅུང་ཟད་བཤད་ན། ཕ་དམ་པ་དང་ཨ་མ་ལབ་སྒྲོན་གྱི་གསུང་རབ་ན་ཡོངས་སུ་གྲགས་པའི་མདོ་སྔགས་ཀྱི་བརྡ་ཆད་དང་ཡེ་མི་འདྲ་བ་ཁ་ཤས་ཡོད་སྣང་ཡང༌། དེ་དག་བཏང་སྙོམས་དང་དད་པའི་ཡུལ་ཁོ་ན་ལས་རྟོག་གེ་བ་དག་གིས་ཞྭ་དཔེ་ལྷམ་འགེབས་དང་ཐེ་ཚོམ་བྱས་ན་དངོས་གྲུབ་ཀྱི་གེགས་སུ་འགྲོ་སྟེ། གསུང་འབུམ་པོ་ཏི་བརྒྱ་དང་སུམ་ཅུ་བརྩམས་གནང་བའི་བོ་དོང་པཎ་ཆེན་གྱི་རྣམ་ཐར་ལས། (འདིའི་གསུང་འབུམ་ཆ་ཚང་ད་ལྟའང་ཨ་རིའི་འགྱིན་ཟེ་དཔེ་མཛོད་ཁང་དུ་ཡོད་ཀྱང་། ནང་རྒྱལ་དུ་ད་ལྟ་དཔེ་བསྐྲུན་བྱེད་བཞིན་མཆིས།) རྗེ་བཙུན་དམ་པ་སངས་རྒྱས་ཀྱི་གདན་ས་དཔལ་གླང་འཁོར་གྱི་སེང་གེའི་ཁྲི་ལ་ཕེབས་ཏེ། ཞི་བྱེད་ཀྱི་གླེགས་བམ་རྣམས་ལ་གཟིགས་པ་སྩལ་པས། བཤད་སྲོལ་རྣམས་ཡོངས་སུ་གྲགས་པའི་མདོ་སྔགས་ཀྱི་གསུང་རབ་ཐམས་ཅད་དང་བརྡ་ཆད་ཡེ་མི་འདྲ་བའི་ཚུལ་དུ་གཟིགས་ཤིང་། འདི་ནི་རྗེ་དམ་པ་རྒྱ་གར་བ་བཞེད་པའི་སྐབས་མི་སྲིད་ཀྱིས། གཞན་ཞིག་གིས་རང་དགར་བྱས་སོ་དགོངས་ནས། རྒྱལ་བ་བཅོམ་ལྡན་འདས་ཀྱི་བསྟན་པ་རིན་པོ་ཆེ་ལ་བྱི་དོར་མཛད་པར་བཞེད་པ་དང༌། ལྷག་པར་རྗེ་དམ་པའི་དགོངས་པ་ལ་ལོག་པར་བྱེད་པ་སུན་འབྱིན་པའི་སླད་དུ་ཞི་བྱེད་འགོག་པ་ལ་ཞུགས་ཏེ། དགག་ཡིག་ཤོག་བུ་ཁ་ཡར་གྱི་དབུ་ཚུགས་པ་ན། མཚན་མ་ངན་པ་དང་། སྐུའི་མགྲིན་པ་སྙེལ་བ་སྙམ་པའི་ཆ་གཟིགས་ནས་འདི་ལྟར་བརྩམས་པའི་ཆོས་བདག་གི་འབྱུང་པོ་ཆེ་ཞིག་གི་ཕྲག་དོག་ཡིན་ནོ་དགོངས་ནས། དེ་བཟློག་པའི་ཐུགས་དམ་གྱི་རྣམ་པ་དེ་དང་དེ་མཛད་པ་ན། རྐྱེན་བཟློག་གི་གཉེན་པོ་ཆེས་ཟབ་ཏུ་བཏང་བ་ཙམ་གྱིས་སྙུང་བ་ཡང་སྟོབས་སུ་འཕེལ་ནས། ཇི་ཞིག་ལྟར་ན་ཞལ་གྱི་ནང་ཐམས་ཅད་སྐྲངས་ཏེ་གསུང་འབྱོན་མི་མཁྱེན་པ་ཙམ་དུ་གྱུར་ལ།

དེ་ནས་སྔོན་རྗེ་ས་སྐྱ་པཎྜི་ཏ་ཆེན་པོས་ཞི་བྱེད་ལ་དགག་པ་མཛད་པས་ཡི་དམ་གྱི་ལྷས་དེ་ཟློག་པའི་ཐབས་ཀྱི་རྗེས་སུ་བཟུང་བའི་གཏམ་རྒྱུད་ཐུགས་ལ་དྲན་ནས། འདི་ནི་དགག་པར་བྱེད་མི་ནུས་ཤིང་རིགས་པ་མ་ཡིན་པ་འདྲ་ན། ད་ནི་བཏང་སྙོམས་སུ་བཞག་སྟེ། རྗེ་དམ་པ་སངས་རྒྱས་ཀྱི་དགོངས་པ་དཔྱིས་ཕྱིན་པའི་གོ་བ་རྙེད་པ་ཞིག་མཛད་སྙམ་ནས། དགག་ཡིག་བྲི་བ་བཤོལ་ཏེ་ཞི་བྱེད་ཀྱི་གླེགས་བམ་མཐའ་དག་ལ་གཟིགས་ཤིང་དཔྱད་པས། མདོ་སྔགས་ཀྱི་གཞུང་ཆེན་མོ་རྣམས་ཀྱི་ཤུགས་བསྟན་གྱི་དགོངས་པ་ཟབ་མོ་ཆེས་མཆོག་ཏུ་གྱུར་ཅིང༌། ལྷག་པར་མགོན་པོ་མི་ཕམ་ཉིད་ཀྱིས། ཐ་སྙད་དུ་དབང་པོ་རྟུལ་པོ་རྗེས་སུ་བཟུང་བ་ལ་དགོངས་པས་རྟོགས་སླ་ཞིང༌། དོན་གྱི་ཆ་དབང་རྣོན་རྗེས་སུ་བཟུང་བའི་ཟབ་ལམ་མཆོག་ཏུ་དགོངས་ནས། དམ་པ་རྒྱ་གར་གྱི་དགོངས་པ་ཇི་ལྟ་བ་བཞིན་རྙེད་དེ། དགག་ཡིག་གི་འཕྲོ་བཤོལ་བ་ཙམ་གྱིས་སྙུང་བ་མ་ལུས་པ་ལས་གྲོལ་ཞིང་། ཐུགས་དོགས་པར་གྱུར་པའི་གནས་ལ་བཟོད་པར་གསོལ་བའི་སླད་དུ་གླང་འཁོར་ཕྱི་མཆོད་ཀྱི་གཙུག་ལག་ཁང་ཆེན་དུ་ཕེབས་ནས་དམ་པ་སངས་རྒྱས་ཀྱི་སྐུ་འདྲའི་དྲུང་དུ་མཇལ་ཏེ། དད་པའི་ཤུགས་ཀྱིས་སྐུ་ཤིན་ཏུ་འདར་ཞིང་གཡོ་ལ། སྐུ་ས་ལ་བརྡབས་ཏེ་ཕྱག་ཕུལ་ཅིང་སྤྱན་ཆབ་ལྡོག་མེད་དུ་བཏང་ནས་བཤགས་སྡོམ་མཛད་དོ། །ཕ་བླ་མ་མཁྱེན་གསུངས་ཤིང་དད་པའི་ངང་དུ་བརྒྱལ་བ་ལྟར་གྱུར་ལ། དེ་ནས་ཆོས་འདི་ཉིད་ལ་ཚད་མར་གྱུར་པའི་བླ་མ་དཀའ་བཞི་བ་ནམ་མཁའ་འོད་ཟེར་ལ་ཞི་བྱེད་ཀྱི་ཆོས་སྐོར་མ་ལུས་པ་གསན་ཞིང་། ཞེས་གསུངས་པ་འདི་ནི་རྟོག་གེ་མགོ་མཁྲེགས་རྣམས་ཀྱིས་ཤེས་དགོས་པ་ཞིག་གོ །

ད་ནི་དཀྱུས་ལ་འཇུག་པར་བྱ་སྟེ། ཉིན་གཅིག་ཐོས་དོན་སྒྲུབ་ལ་གཞོལ་བའི་སྐྱོ་སྟོན་བསོད་ནམས་བླ་མ་བྱ་བ་བྱོན་ནས། བུ་མོ་ཁྱོད་ཕ་རོལ་ཏུ་ཕྱིན་པའི་ཚིག་ལ་མཁས་པར་འདུག །དེའི་དོན་ཤེས་སམ་གསུངས། ལབ་སྒྲོན་གྱིས་དོན་ངས་ཤེས་བྱས་པས། འོ་ན་དོན་ཤོད་གསུངས། ས་བཅུ་ལམ་ལྔའི་ཚུལ་དུ་བཤད་པས་ལམ་བགྲོད་པའི་ཚུལ་དང༌། དོན་ཉམས་སུ་ལེན་ཚུལ་དང༌། མཐར་འབྲས་བུ་སངས་རྒྱས་འཐོབ་ཚུལ་རྣམས་ཞིབ་ཏུ་བཤད་པས། བླ་མའི་ཞལ་ནས། དོན་བཤད་པ་ལ་མཁས་པར་སྣང་སྟེ། དོན་རང་རྒྱུད་ལ་མ་སྐྱེས་པར་འདུག་གསུངས། དོན་རང་རྒྱུད་ལ་སྐྱེས་པ་བྱ་བ་ཇི་ལྟར་ཡིན་ཞུས་པས། བླ་མའི་ཞལ་ནས། ཁྱེད་ཀྱིས་གསུངས་པ་དེ་ལ་གོ་བ་ཟེར། ཆོས་ཐམས་ཅད་ཇི་ལྟ་བ་བཞིན་ཤེས་ཟེར་བ་དེ་མ་ཡིན། ཆོས་ཐམས་ཅད་ཀྱི་དོན་ཤེས་པ་དེ་རང་གི་རྒྱུད་ལ་སྐྱེས་ནས་འོང་ཙམ་ན། སྔར་གྱི་བློའི་འཛིན་སྟངས་དེ་དང་མི་འདྲ་བའི་བློ་གསར་པ་ཞིག་ཀྲོང་གིས་སྐྱེས་ནས་འོང་བ་ཡིན། དེ་དུས་སུ་སྔར་གྱི་བློའི་འཛིན་སྟངས་དང་བྲལ་བློ་ཞིག་སྐྱེས། བྱར་མེད་ཤེས་རབ་ཆེན་པོའི་མེ་ཆེན་རྒྱས་ནས་བདག་འཛིན་མ་རིག་པའི་མུན་པ་ཐམས་ཅད་འཇོམས་པར་བྱེད་པ་ཡིན་པས། དོན་གྱི་རྩ་བ་རང་སེམས་ལ་གད་བདར་ལེགས་པར་བྱོས་ཤིག་གསུངས་ནས་བླ་མ་ཕེབས་སོང་།

དེ་ནས་ལབ་སྒྲོན་གྱིས་བླ་མས་གསུངས་པ་ལྟར་ཤེར་ཕྱིན་ལ་ཞལ་འདོན་མཛད་ཅིང༌། དེའི་དོན་རྩེ་གཅིག་ཏུ་བསྒོམས་ཏེ། བརྒྱད་སྟོང་པའི་བདུད་ཀྱི་ལེའུའི་ནང་དུ་སྟོང་པ་ཉིད་མངོན་སུམ་དུ་རྟོགས་ཏེ། བདག་འཛིན་གྱི་དབང་དུ་མི་འགྲོ་བའི་རྟགས་མང་དུ་བྱུང༌། དེ་ནས་བླ་མ་གཏེར་སྟོན་གྲྭ་པ་མངོན་ཤེས་ཀྱིས་མངགས་པ་ལྟར། བླ་མ་སྐྱོ་སྟོན་བསོད་ནམས་དྲུང་དུ་ཕེབས་ཏེ། ནས་ཁལ་བཅུ་གསུམ། གཡག་གི་ཤ་བུབས་གཅིག་དང༌། གོས་ཡུག་མང་པོ་བཅས་དབང་ཡོན་དུ་ཕུལ་ནས། ཕ་དམ་པ་ནས་བརྒྱུད་པའི་ནམ་མཁའ་སྒོ་འབྱེད་ཀྱི་དབང་། སྒྱུ་འཕྲུལ་ཆེན་མོའི་དབང་ཞུས་པས། ལབ་སྒྲོན་ལ་ཡེ་ཤེས་པ་བབས་ཏེ་ལུས་ཁྲི་དོ་ཡིས་ས་ལ་མ་རེག་པར་ཞི་བའི་གར་སྟབས་ཉི་ཤུ་རྩ་བཞི་མཛད། གསུང་ལེགས་པར་སྦྱར་བ་ལྷའི་སྐད་ཀྱིས་དབྱངས་ཡན་ལག་དྲུག་ཅུ་མཛད། ཐུགས་ཆོས་ཉིད་ལ་ཐོགས་པ་མེད་པ་རྡོ་རྗེ་ལྟ་བུའི་ཏིང་ངེ་འཛིན་གྱི་ཉམས་དང་ལྡན་པས། ཁང་པའི་གྱང་རྩིག་ལ་ཐོགས་པ་མེད་པར་ཕྱི་རོལ་ཏུ་བུད་ནས། ནམ་མཁའ་ལ་འཕུར་ནས་ཤིང་སྡོང་གསེར་གློག་བྱ་བའི་རྩ་བར་བབས་ཏེ། ཆུ་མིག་འོད་པོ་གནམ་ཁོལ་ལ་གནས་པའི་ཀླུ་རྒྱལ་མ་རུངས་བ་དྲག་པོ་ཟླ་སྐྱོང་བཏུལ་པར་མཛད། དེ་ནས་སྒྱུ་འཕྲུལ་ལྷ་ལྔ་དང༌། ཁྲོས་མ་ལྷ་ལྔའི་ཞལ་གཟིགས་པ་དང༌། བདེ་མཆོག་ལྷ་ཚོགས་དང་། ཁྱད་པར་དུ་ཡུམ་ཆེན་མོ་ཕྱོགས་བཅུའི་སངས་རྒྱས་ཀྱིས་སྐོར་བ་བྱོན་ནས་ཕྱག་བརྐྱངས་ཏེ་འདི་སྐད་དུ། རྣལ་འབྱོར་མ་ཁྱོད་ཀྱིས་གཉན་ཁྲོད་ཕྱོགས་མེད་དུ་འགྲིམ་ལ་སེམས་ཅན་གྱི་དོན་ལ་སེམས་བསྐྱེད་རྒྱ་ཆེན་པོ་སྐྱེད་ཅིག་གསུངས།

གཞན་ཡང་སངས་རྒྱས་ཐོད་པའི་སྤྲུལ་པ་ཐོད་པ་བྷ་དྲ་ཡ་ཞེས་པའི་རྣལ་འབྱོར་བ་ཞིག་བོད་དུ་འབྱོན་གྱིན་ཡོད་པས་དེ་དང་ཐབས་ཤེས་འགྲིག་པར་གྱིས་ལ་གཉན་ཁྲོད་དང་ཆུ་མིག་བརྒྱ་རྩ་བརྒྱད་དུ་འགྲོ་དོན་བྱོས་དང༌། ཁྱོད་ཀྱི་བསྟན་པ་མཁའ་ལ་ཉི་མ་ཤར་བ་བཞིན་འོངས་ནས་ཕྱིར་མི་ལྡོག་པའི་ས་ནོན་པ་ཡིན་ཞེས་གསུངས་ནས་འཇའ་ཡལ་བ་བཞིན་ཡལ་ལོ། །བླ་མས་སློབ་མ་གཞན་ལ་འདུས་བྱས་རྫས་ཀྱི་དབང་དེ་ཁྱེད་ཚོས་ཐོབ། ཆོས་ཉིད་དོན་གྱི་དབང་དེ་ཇོ་ཆུང་འདིས་ཐོབ་གསུངས།

གཞན་ཡང་། བླ་མ་ཞྭ་དམར་བའི་དྲུང་ནས་བྱམས་ཆོས་སྡེ་ལྔ། སེམས་བསྐྱེད་སྐོར་དང་སྒྲ་འགྱུར་སོགས་ཞུས་པ་དང་། བླ་མ་སྦས་སྟོན་པ་ལ་རྫོགས་པ་ཆེན་པོའི་སྐོར་ཞུས། བླ་མ་ཡར་ཏིང་བ་ལ་ཕྱག་རྒྱ་ཆེན་པོ་དང་། ནཱ་རོ་ཆོས་དྲུག་གི་སྐོར། རྗེ་བཙུན་མའི་ཆོས་སྐོར། དུས་འཁོར་སྦྱོར་དྲུག་དོ་ཧ་སྐོར་གསུམ། བྱེད་པ་སྐོར་གསུམ། བྱེད་པའི་སྐོར་ཁ་ཤས་བཅས་གསན་པ་རྣམས་ཐུགས་སུ་ཆུད་པར་མཛད་དེ། སྔར་གྱི་བླ་མ་གཏེར་སྟོན་གྲྭ་པ་མངོན་ཤེས་ཀྱི་དྲུང་དུ་ཕེབས་པས། བླ་མས་དབུས་སུ་འགྲོ་བར་ལུང་བསྟན་པ་བཞིན་ལྷ་སར་ཕེབས་ནས། ཇོ་བོ་རིན་པོ་ཆེར་མཆོད་པ་ཆེན་པོ་བགྱིས་པས་འཇའ་འོད་དང་རོལ་མོའི་སྒྲ་ནམ་མཁར་གྲག་པ་དང་། མེ་ཏོག་གི་ཆར་ཆེན་པོ་བབས་ཏེ་ངོ་མཚར་བའི་ལྟས་མང་པོ་བྱུང་བས། ཐམས་ཅད་དད་པའི་འུར་ལངས་ཏེ་ཆོས་ཞུས།

དེ་ནས་ལྷོ་ཁའི་གྲ་ཐང་དུ་ཕེབས་སྐབས་ཕ་དམ་པ་དང་མཇལ་ཏེ་ཕྱག་འཚལ་བས། ཕ་དམ་པའི་ཞལ་ནས། ཤེས་རབ་བཞི་དང་ལྡན་པ་ཡི། །ཡུམ་ཆེན་མཁའ་འགྲོའི་སྤྲུལ་པ་ཁྱོད། །རྣམ་ཐར་གསུམ་གྱི་སྒོ་ཕྱེ་ནས། །བདུད་ཀྱི་དཔུང་རྣམས་ཕམ་མཛད་མ། །ལབ་ཀྱི་སྒྲོན་མ་ཁྱོད་ལ་ནི། །བདག་དང་ལྷར་བཅས་ཕྱག་འཚལ་ལོ། །བདག་ཀྱང་ཁྱེད་ལ་ཡི་རང་འབུལ། །ཁྱོད་ཀྱི་ཡོན་ཏན་ཐུགས་རྗེའི་རྩལ་གྱིས་ནི། །སྙིགས་མའི་སེམས་ཅན་སྨིན་གྲོལ་མཛད་ལགས་ཀྱང༌། །ཕྱི་རབས་དོན་དུ་ངས་ཀྱང་གདམས་ངག་སྟོན། །ཞེས་གསུངས་ནས་གདམས་ངག་ལྷག་མ་མེད་པར་ལབ་སྒྲོན་ལ་གནང་བས། ལབ་སྒྲོན་གྱིས་བླ་མ་ལ་བསྟོད་པ་འདི་ཕུལ་བ།

ཕ་ཀུན་ཤེས་ཀུན་རིག་དམ་པ་པོ། །དུས་གསུམ་སངས་རྒྱས་ཐམས་ཅད་ཀྱི། །

ཐུགས་ཀྱི་སྲས་མཆོག་འགྲོ་བའི་མགོན། །སྤྲུལ་པའི་སྐུ་ལ་ཕྱག་འཚལ་ལོ། །

ཞེས་བསྟོད་ནས་དབུས་སུ་ལོ་གསུམ་བཞུགས་ཏེ་སླར་རང་ཡུལ་དུ་ཕེབས། བླ་མ་རྣམ་གཉིས་དང་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་མགྲིན་གཅིག་ཏུ་སངས་རྒྱས་ཐོད་པའི་སྤྲུལ་པ་གྲུབ་ཆེན་བྷ་དྲ་ཡ་དང་ཐབས་ཤེས་རབ་ཀྱི་སྒོ་ནས་རིག་པ་བརྟུལ་ཞུགས་ཀྱི་སྤྱོད་པ་བསྐྱངས་ཏེ། ཆོས་རྒྱུད་རིགས་རྒྱུད་ཀྱིས་འཛིན་དགོས་པར་ལུང་བསྟན་པ་ལྟར། དགུང་ལོ་ཉེར་བཞིའི་ཐོག་སྲས་གཅིག་སྐུ་འཁྲུངས་ཏེ། ད་ལུང་བསྟན་ཐམས་ཅད་ཀྱི་དོན་གྲུབ་པས་བུ་འདི་ལ་གྲུབ་པ་བཏགས་སོ་གསུངས་ནས་མིང་གྲུབ་པ་ཞེས་བཏགས་སོ། །

དེ་ནས་ཉང་པོར་ལོ་གཅིག་བཞུགས་ཏེ་ཀོང་པོར་བྱོན་ཏེ་བཞུགས་བཞིན་ཐུགས་དམ་ལ་རྩལ་འདོན་མཛད། དགུང་ལོ་ཉེར་བདུན་སྲས་གཅིག་འཁྲུངས་པར་མིང་གྲུབ་ཆེན་ཞེས་བཏགས། དེ་ནས་དགུང་ལོ་སུམ་ཅུ་ལ། ང་ལའི་བཀྲལ་དོལ་བྱ་བ་ན་ཚོགས་འཁོར་ཆེན་པོ་བྱས་པས་མཁའ་འགྲོ་མ་མང་དུ་འདུས་པའི་ཚེ་སྲས་མོ་གཅིག་འཁྲུངས་པར། གྲུབ་ཆུང་མ་ཞེས་བཏགས་སོ། །དེ་ནས་དགུང་ལོ་སོ་བཞིའི་སྟེང་དབུས་ཀྱི་འཕན་ཡུལ་གླང་ཐང་དུ་བཞུགས་ཏེ་འགྲོ་དོན་མཛད། དགུང་ལོ་སོ་ལྔར་མཁའ་འགྲོའི་ལུང་བསྟན་བྱུང་བ་ལྟར་ལ་སྟོད་དུ་བྱོན་ནས་བླ་མ་བསོད་ནམས་པར་ཕག་མོ་ཐུགས་སྒྲུབ་ལྷ་ལྔའི་དབང་ཞུས་ཤིང་། བླ་མས་མཁའ་འགྲོ་མར་དངོས་སུ་མཐོང༌། ལབ་སྒྲོན་ཡང་མཁའ་འགྲོའི་བསྐྱེད་རིམ་ལ་བརྟན་པ་ཐོབ་པའི་ཚུལ་མཛད། གསང་མཚན་རྡོ་རྗེ་དབང་ཕྱུག་བཏགས་སོ། །

བླ་མ་གྲྭ་པ་མངོན་ཤེས་ལ་རྟེན་འབྲེལ་ཡན་ལག་བཅུ་གཉིས་ཀྱི་བགྲོ་གླེང་ཕུལ་པས་བླ་མ་མཉེས་ཏེ། ཚུལ་འདིར་ཁྱེད་ལྟ་བུར་དཀོན་པས་ཁྱེད་རྟེན་འབྲེལ་གྱི་གྲུབ་ཐོབ་ཆེན་མོ་ཡིན་གསུངས། སེམས་བསྐྱེད་ཆོ་ག་ཞུས་པས། བླ་མའི་ཞལ་ནས་ཁྱེད་ལ་སེམས་བསྐྱེད་འབོག་དགོས་པ་མེད་ཁྱེད་རང་རྩོད་པ་དང་བྲལ་བའི་གྲུབ་ཐོབ་ཆེན་མོ། སངས་རྒྱས་བྱང་སེམས་བསྐྱེད་པའི་ཡུམ་ཆེན་མོ་ཡིན་པས་ཁྱེད་རང་ལ་སེམས་བསྐྱེད་མི་དགོས་པར་མ་ཟད། ང་ནི་ཁྱེད་ཀྱི་དྲུང་དུ་ཟླ་བའི་འོག་ཏུ་སྐར་མ་དང་འདྲ་སྟེ། འོན་ཀྱང་། ང་ནི་ཁྱེད་ཀྱི་སློབ་དཔོན་ཡིན་པས་རྟེན་འབྲེལ་འགྲིགས་པའི་ཕྱིར་ཆོ་ག་བྱ་གསུངས་ནས་སེམས་བསྐྱེད་ཀྱི་ཆོ་ག་ཕོག་ཅིང་དགེ་བསྙེན་གྱི་སྡོམ་པ་ཡང་གནང་བའི་ཚེ་ལབ་སྒྲོན་གྱིས་བླ་མ་གྲྭ་པ་མངོན་ཤེས་སངས་རྒྱས་ཤཱཀྱ་ཐུབ་པར་དངོས་སུ་གཟིགས། བླ་མས་དབུས་སུ་རི་དམར་པོ་ཟངས་དམར་གྱི་མདོག་འདྲ་བར་གདུལ་བྱའི་དོན་འབྱུང་བར་ཡོད་ཅེས་ལུང་བསྟན་པར། ལ་སྟོད་དུ་ཕ་དམ་པ་མཇལ་རྗེས་དབུས་སུ་འགྲོ་ཞུས་པས་དེ་ག་མཛོད་གསུངས། མ་ཅིག་ལབ་སྒྲོན་དིང་རིར་ཕེབས་ཏེ་ཕ་དམ་པར་གདམས་པ་ཁྱད་པར་ཅན་ཞིག་གནང་བར་ཞུས་པས་དམ་པའི་ཞལ་ནས། གདམས་པ་སྔར་བཤད་པ་ལས་ཟབ་པ་གང་ཡང་མེད། འོན་ཀྱང་། ཡུམ་ཆེན་མོར་དུས་གསུམ་གྱི་སངས་རྒྱས་ཀྱིས་སྐོར་བ་སྤྱན་དྲངས་པས་བར་ཆད་སེལ་ཞིང་། མཆོག་གི་དངོས་གྲུབ་ཐོབ་ནུས་པ་ཞིག་ཡོད་གསུངས་པར། དེ་གནང་བར་ཞུས་པས་ཕ་དམ་པས་དགྱེས་བཞིན་དུ་གནང་། དེའི་ཚེ་མ་ཅིག་གིས་ཕ་དམ་པ་འཇམ་དཔལ་དམར་པོ་ཡིན་པར་དངོས་སུ་གཟིགས་ཤིང་། བླ་མས་ཀྱང་སྒྲུབ་ཐབས་ཡན་ལག་བཅས་པ་གནང་སྟེ་མ་ཅིག་གི་གདུལ་བྱ་དབུས་ཀྱི་ཟངས་རི་ན་ཡོད་པར་ལུང་བསྟན།

དགུང་ལོ་སོ་བདུན་སྟེང་ཟངས་རི་མཁར་དམར་དུ་བྱོན། གཞི་བདག་ཟངས་རི་འཁྱུལ་བས་སེམས་བསྐྱེད་ཞུས་ནས་བསྟན་པ་བསྲུང་བར་ཁས་བླངས། གནས་བརྟན་ཀམ་པ་གྲགས་པ་སོགས་འཆི་བའི་འཇིགས་པ་ལས་བསྐྱབས་པས་ཨ་མ་ལབ་སྒྲོན་བྱིན་རླབས་ཆེ་ཟེར་ནས་ཐམས་ཅད་ལ་གྲགས། བསྟན་མ་བཅུ་གཉིས་དང་། ཡར་ལྷ་ཤམ་པོ་དང་། གཉན་ཆེན་ཐང་ལྷ་སོགས་ཀྱིས་སེམས་བསྐྱེད་ཞུས་ཤིང༌། ཞག་ཉེར་གཅིག་གི་བར་དུ་སྐྱབས་འགྲོ་སེམས་བསྐྱེད་ཀྱི་བསླབ་བྱ་ཉན། ཤོལ་པོ་ལོ་ཙཱ་བ་དཔོན་སློབ་བཅོ་བརྒྱད་སོགས་མང་པོ་བྱོན་ནས་ཆོས་ལ་བརྩད་པས་ཚིག་དོན་གང་ལའང་མ་ཅིག་མ་ཐུབ། བླ་མ་དཔོན་སློབ་དད་པ་དངོས་སུ་སྐྱེས་ནས་ཆོས་ཞུས་ཏེ། སྒྲོལ་མ་དངོས་ཡིན་པར་འདུག་ཟེར་རོ། །སྟོང་སྡེ་ངག་གི་དབང་ཕྱུག་དང༌། གྲོལ་སྡེ་རྒྱལ་བའི་འབྱུང་གནས་གཉིས་ཀྱིས་མ་ཅིག་ལ་ཆོས་ཞུས་ཏེ་ཐུགས་ཟིན་གྱི་སློབ་མར་གྱུར། བལ་པོ་ཕམ་མཐིང་བ་དང་ཉམས་རྟོགས་བསྡུར་ཞིང་། ཕམ་མཐིང་བར་མངོན་པ་ཞུས། སྐབས་འདི་ཙམ་ན་ཨ་མ་ལབ་སྒྲོན་ལ་ཆོས་ཕྱག་རྒྱ་ཆེན་པོ་གཅོད་ཅེས་པའི་ཆོས་ནད་རིགས་བཞི་བརྒྱ་རྩ་བཞི་དང་། བགེགས་རིགས་སྟོང་ཕྲག་བརྒྱད་ཅུའི་གནོད་པས་མི་ཚུགས་པའི་གདམས་པ་ཁྱད་པར་ཅན་ཞིག་ཡོད་ཅིང༌། འབྲས་བུ་སངས་རྒྱས་ཀྱི་ས་ལ་འགོད་པའི་གདམས་པ་ཁྱད་པར་ཅན་ཡོད་འདུག་ཅེས་པའི་སྙན་པ་གངས་ཅན་བོད་ཡུལ་དང་། བལ་ཡུལ་སོགས་ལ་འབྲུག་ལྟར་གྲགས་སོ། །

དེ་ནས་དགུང་ལོ་ཞེ་གཅིག་ལོར་མཆིམས་ཕུག་གི་སྒྲུབ་གནས་ཕུག་བཟང་དུ་བཞུགས་དུས། དཔྱིད་ཟླ་ཐ་ཆུང་གི་ཚེས་བརྒྱད་ཀྱི་ནུབ་མོར་རྗེ་བཙུན་སྒྲོལ་མ་མཁའ་འགྲོ་མ་མང་པོས་སྐོར་བ་བྱོན་ཏེ། གསང་སྔགས་ཨུ་དུམ་ཝ་རའི་རྒྱུད་ནས། སངས་རྒྱས་རིགས་ལྔ་རེ་རེའི་སྒོ་ནས། དབང་བཞི་ཡོངས་སུ་རྫོགས་པ་རེ་རེ་སྐུར་བའི་རིགས་ལྔ་གའི་སྦྱོར་ཡུམ་སྒྲོལ་མ་མཛད་ཅིང་ལུང་བསྟན་མང་དུ་གསུངས། དགུང་ལོ་ཞེ་གཉིས་སྟེང་ཡབ་ཡུམ་གཉིས་ཀྱི་རྟོགས་པའི་ཉམས་བསྡུར་མཛད་དེ་ཡབ་རྒྱ་གར་དུ་ཕེབས། སྲས་གྲུབ་ཆེན་དགུང་ལོ་བཅོ་ལྔ་ལོན་པ་དེས། ཡབ་ཀྱི་ལུགས་ཀྱི་བདེ་མཆོག་དང༌། མཚོ་སྐྱེས་དང་མི་འཁྲུགས་པའི་ཆོས་སྐོར། རྡོ་རྗེ་རྣམ་འཇོམས་དང་། རྟ་མགྲིན་ནག་པོའི་སྒྲུབ་ཐབས་རྣམས་ཤེས་ཤིང་། སྲས་མོ་གྲུབ་ཆུང་མ་ལོ་བཅུ་ལོན་པ་དེས་རྗེ་བཙུན་མ་དམར་མོ། ཐུགས་རྗེ་ཆེན་པོ་ཁ་སར་པ་ཎིའི་སྒྲུབ་ཐབས། ཉི་ཁྲི་དང་འབུམ་སོགས་ཀྱང་ཀློག་ཐུབ་པ་བྱུང༌། དེའི་ཚེ་གྲུབ་ཆེན་ལ་ཞལ་གྱི་སྨྱོ་རྒྱལ་གྱིས་ཟིན་པས་མ་ཅིག་གིས་གདམས་པ་གནང་སྟེ། དུར་ཁྲོད་དུ་ཞག་བདུན་ཉལ་བས། སྨྱོ་འབོག་གི་ནད་ཞི་ནས་རྟོགས་པ་ཁྱད་པར་ཅན་རྒྱུད་ལ་སྐྱེས།

དེ་ནས་ཕ་དམ་པ་སངས་རྒྱས་ཟངས་རིར་སྤྱན་དྲངས་ཏེ་སྲས་རབ་ཏུ་བྱུང་ནས་ཆོས་སྟོན་མཛད། མ་ཅིག་གི་ཞལ་ནས་ཁོའི་མིང་ངས་འདོགས། ཁོའི་ཕ་ཐོད་པ་ཡིན། ཁོ་སྨྱོ་འབོག་གིས་ཐེབས་པ་སངས། བླ་མ་ཁྱེད་དང་མཇལ་བས་རབ་ཏུ་བྱུང་ཞིང་། ཁོའི་བསམ་པ་འགྲུབ་ཡོད་པས། མིང་ལ་ཐོད་སྨྱོན་བསམ་འགྲུབ་གྱིས། ངའི་ཆོས་རྒྱུད་ཀྱང་ཁོས་འཛིན་པ་ཡིན་ནོ་གསུངས་ཤིང་། ཕ་དམ་པས་ཐོད་སྨྱོན་བསམ་འགྲུབ་ལ་གདམས་པ་མ་ལུས་པ་གནང་སྟེ་ལ་སྟོད་དུ་བྱོན། དེ་ནས་ཐོད་སྨྱོན་བསམ་འགྲུབ་བླ་མ་ལ་ལྷག་པར་དད་ནས་ངའི་ཕ་ནི་དམ་པ་ཡིན་ཟེར་ནས་ཉིན་མཚན་གཉིས་ཀར་གསོལ་བ་རྩེ་གཅིག་ཏུ་བཏབ་པས་དེ་ནས་བཟུང་དམ་པ་སངས་རྒྱས་ལ་ཕ་དམ་པ་ཞེས་གྲགས་སོ། །ཐོད་སྨྱོན་བསམ་འགྲུབ་དགུང་ལོ་བཅུ་དྲུག་གི་དུས་སུ་མ་ཅིག་གིས་གདམས་པ་རྫོགས་པར་གནང་སྟེ། ཤམ་པོའི་གངས་ལ་སྒྲུབ་པ་བྱེད་དུ་མངགས་ཤིང༌། སྲས་ཀྱིས་ཀྱང་མ་ཅིག་རྡོ་རྗེ་ཕག་མོར་དངོས་སུ་གཟིགས། དེ་ནས་མ་ཅིག་གིས་རྒྱ་གར་ཨ་ཙ་ར་གསུམ་གྱི་དོགས་པ་བསལ་ཞིང་། ཁྱད་པར་དུ་རྒྱ་གར་པོ་ཏ་རིའི་བྲག་ཕུག་བྷ་དྲ་ཞེས་པ་རྗེ་བཙུན་སྒྲོལ་མས་བྱིན་གྱིས་རླབས་པའི་ཕུག་པར། མ་ཅིག་གི་སྐྱེ་བ་སྔ་མའི་ལུས་ད་ལྟའང་བཀྲག་མདངས་མ་ཉམས་པར་ཡོད་གསུངས་པས། རྐང་མགྱོགས་ཨ་ཙ་ར་གསུམ་དང་དམ་པ་སངས་རྒྱས་བཅས་རྒྱ་གར་དུ་ཕེབས་ནས། རྒྱ་གར་བ་རྣམས་རྡོ་རྗེ་གདན་དུ་བསྡུས་ནས་མ་ཅིག་གི་གསུང་རྣམས་ལྷག་ལུས་མེད་པར་བཤད་པས། ཚོགས་པ་རྣམས་ཀྱིས་འདིའི་གདམས་པ་རྣམས་རྩད་གཅོད་དགོས་པས་པོ་ཏ་རིར་ལྟད་མོར་འགྲོ་ཟེར། པཎྜི་ཏ་དེ་གཉིས་བཅས་ཕེབས་པས། མ་ཅིག་གིས་གསུངས་པ་ཇི་ལྟ་བ་བཞིན་བཞུགས་འདུག་པས། ཐམས་ཅད་མ་ཅིག་དང་ཆོས་ལ་ཡིད་ཆེས་ཐོབ་བཞིན་གདུང་སྐལ་ཁྱེར་ཏེ་བོད་ཀྱི་ཟངས་རིར་རྐང་མགྱོགས་པ་གསུམ་གྱིས་མ་ཅིག་ལ་ཁྱེད་ཡུམ་ཆེན་མོའི་ཐུགས་ཀྱི་སྤྲུལ་པ་ངོ་མཚར་ཆེ། ཞལ་ནས་ཇི་ལྟར་གསུངས་པ་རྣམས་ནོར་འཁྲུལ་དང་ལྷག་ཆད་ཚིག་གཅིག་ཀྱང་མེད་པར་སྣང༌། ཞེས་ཞུས་ཏེ་རྒྱ་བོད་གཉིས་ཀས་མ་ཅིག་དང་དམ་ཆོས་གཅོད་ལ་ཡིད་ཆེས་ཐོབ་སྟེ། ཉམས་སུ་བླངས་པས་བོད་ཆོས་རྒྱ་ལ་དར་ཞེས་པའི་སྙན་པ་དཀར་པོའི་བ་དན་སྲིད་པའི་རྩེ་མོའི་བར་དུ་ལྷབ་ལྷུབ་ཏུ་གཡོ་བཞིན་པ་འདིའོ། །

ཤིང་འབྲུག་ལོར་འབྱུང་འགྱུར་བསྟན་འགྲོའི་བདེ་སྐྱིད་ཀྱི་ཆེད་དུ་ཐོད་སྨྱོན་རྡོ་རྗེ་སེང་གེས་གཏེར་བུམ་བཟོས། ཐོད་སྨྱོན་བསམ་འགྲུབ་ཀྱིས་གཏེར་ལྕིབས་ཀྱིས་བཏུམ། སྟོང་སྡེ་ངག་གི་དབང་ཕྱུག་གིས་གཏེར་ཡིག་བྲིས། མ་ཅིག་རང་གིས་གཏེར་བུམ་ལ་རྒྱས་བཏབ་ཅིང་། ཡུམ་སྲས་འཁོར་བཅས་རྫུ་འཕྲུལ་གྱིས་གཡའ་རིའི་རྨོག་ལུང་དུ་ཕེབས། (ད་ལྟའི་གཏེར་ལུང་གི་ལུང་པའི་ཕུག་)ནས་གཏེར་སྦས་ཏེ་ཆོས་རྒྱལ་དང་ཞལ་བཞི་པ་གཉིས་ལ་གཏད་ནས་ཕྱིར་ཨེའི་ལབ་ཏུ་རྫུ་འཕྲུལ་གྱིས་བྱོན། ལྷོ་ཕྱོགས་བ་ཙེའི་མན་དུ་ལབ་སྒོམ་ཁང་མ་ཅིག་དང་སྟོང་སྡེ་ངག་གི་དབང་ཕྱུག་ཡུམ་སྲས་ཀྱི་བཞུགས་གནས་རྣམ་གཉིས་ཀྱི་ཞབས་རྗེས་མཇལ་རྒྱུ་སྣང་ཞེས་དེབ་ཐེར་རྒྱ་མཚོར་གསལ།

དགུང་ལོ་གོ་དགུའི་སྟེང་དག་པ་མཁའ་སྤྱོད་དུ་ཕེབས་པ་དང་། སྲས་གྲུབ་པ་ཡང་རང་ལོ་ཞེ་གཉིས་སྟེང་མ་ཅིག་གིས་དགེ་བསྙེན་བསྒྲུབས་ཏེ་གདམས་པ་བྱིན་པས་རང་ལོ་ང་གཉིས་སྟེང་གྲུབ་པ་ཐོབ་སྟེ་སྲས་རྒྱལ་བ་དོན་གྲུབ་ཏུ་གྲགས་ཤིང་། དེབ་སྔོན་སོགས་སུ་དགུང་ལོ་གོ་ལྔ་པ་དང་། ཀློང་རྡོལ་བླ་མས་གོ་གཅིག་པར་འདས་པར་བཤད་པས་མཚོན་མ་ཅིག་གི་འཁྲུངས་འདས་ལ་ད་དུང་དཔྱད་དགོས་མང་ཡང་དུས་ཚོད་ཀྱིས་མི་ལོངས་པས་རེ་ཞིག་འདི་ཙམ་བྱས་སོ། །

 

༈ གུང་རུ་སྐུ་ཕྲེང་དང་པོ་ལྷ་རྩེ་དཔོན་མོ་བསོད་ནམས་རྒྱན་གྱི་མཛད་རྣམ།

 

༸གུང་རུ་སྐུ་ཕྲེང་དང་པོ་ལྷ་རྩེ་དཔོན་མོ་བསོད་ནམས་རྒྱན་ནི། ཁམས་གུང་རུར་འཁྲུངས་ཤིང་། སྤྱིར་འདིའི་གུང་རུ་ནི་ཁམས་ལྷོ་རོང་རྫོང་དང་ཤོ་པ་མདོ་སོག་རྫོང་བཅས་ཀྱི་སྤྱི་མིང་ལ་ཟེར་ཞིང་། དེའི་ནང་ཚན་དཔལ་འབར་རྫོང་ཤར་རྒྱུད་ཀྱི་ལྷ་རྩེ་ཡུལ་ཚོ་རུ་ཧ་ལམ་སྤྱི་ལོའི་དུས་རབས་བཅུ་བདུན་པའི་ནང་སྐུ་བལྟམས། ཁོང་རབ་བྱུང་བཅུ་བའི་ལྕགས་བྱ་སྤྱི་ལོ་ ༡༦༢༡ ལོར་དབུས་སུ་བྱོན་ནས་འཁོན་སྟོན་དཔལ་འབྱོར་ལྷུན་གྲུབ་སོགས་བསྟེན་ནས་གསན་སྒོམ་མཛད་པས་གྲུབ་པའི་གོ་འཕང་མཐོན་པོར་གཤེགས་པ་མཛད་རྗེས་ལས་རྗེས་སུ་དཔག་ཐུབ། མངོན་ཤེས་དང་རྫུ་འཕྲུལ་ཐོགས་པ་མེད་པའི་གྲུབ་ཐོབ་ཚད་ལྡན་དུ་ཡབ་རྗེ་སྐལ་ལྡན་རྒྱ་མཚོས་གསུངས་པ་དོན་ལ་གནས་ཤིང༌། ལྷ་སར་བཞུགས་དུས་སུ་གཏེར་མང་པོ་བཏོན་ཅིང་། མདོ་སྨད་ཤེལ་དགོན་ནས་ཀྱང་ཚེ་ཆུའི་བུམ་པ་གཏེར་ནས་གདན་དྲངས། ༸གོང་ས་ལྔ་པས་རྗེ་འདིའི་གཏེར་ལུང་ན་ཁྲི་རལ་ལས་ལབ་སྒྲོན་སྔ་བ་བྱས་འདུག་པས་རྫུན་གྱི་རྫོབ་རྟགས་མང་གསུངས་པ། བསྟན་པ་སྤྱི་ལ་དགོངས་པ་བཞེས་པས་དྲང་དོན་གྱི་གསུང་སྟེ། གུ་རུ་ཨུ་རྒྱན་གླིང་པས་གཏེར་ནས་བཏོན་པའི་ཐང་ཡིག་གཏེར་ལུང་ཚད་ལྡན་ཡིན་པ་གཞིར་བྱས་ལ། དེའི་ལོ་ཚིགས་རྣམས་ནི་གཏན་ནས་སྒྲིག་ཐབས་མེད་པར་གསུངས་པའི་ཕྱིར་ཏེ། རང་རྣམ་དུ་ཀཱུ་ལའི་གོས་བཟང་ལས། ཐང་ཡིག་གི་ལོ་ཚིགས་རྣམས་ཡེ་སྒྲིག་ཐབས་མེད་ཅིང་། ཞེས་གསུངས་པ་གང་ཞིག་ཐང་ཡིག་ཏུ་རྫུན་གྱི་རྫོབ་རྟགས་མང་བ་དང་། ཨུ་རྒྱན་གླིང་པ་ལས་འབྲས་མི་ཤེས་པའི་མི་སྙིང་ཁམས་ཅན་དུ་ཞལ་གྱིས་མི་བཞེས་པའི་ཕྱིར་རོ། །

རྣམ་ཐར་པད་དཀར་འཁྲི་ཤིང་ལས། སྐུ་སྔ་མའི་མཛད་པ་ཕྱི་མ་ལ་སྦྱར་བ་ས་བོན་མ་དག་པས་ཡིན་ཞིང་། རྣམ་ཐར་དེར་སྐུ་ཕྲེང་གཉིས་པ་སྐུ་ཕྲེང་དང་པོར་བྱས་པ་དང༌། སྐུ་ཕྲེང་དང་པོའི་མཚན་བློ་བཟང་ཆོས་སྒྲོན་བྱ་བ་སྐུ་ཕྲེང་གསུམ་པས་མཚན་དུ་སྦྱར་བ་སོགས་སྒྲ་ཇི་བཞིན་དུ་མི་རུང་ཞིང་། འཁྲུངས་རབས་གསོལ་འདེབས་ཀྱང་དེ་ལས་མ་འདས་ལ། ལོ་རྒྱུས་སྨྲ་བའི་དབང་པོ་བྲག་དགོན་དཀོན་མཆོག་བསྟན་པ་རབ་རྒྱས་ཀྱི་དེབ་ཐེར་རྒྱ་མཚོ་ལས། རྐྱེན་དང་དགོས་དབང་གིས་མདོ་སྨད་དུ་བྱོན། མཚན་བློ་བཟང་ཆོས་སྒྲོན། བྱ་ཁྱུང་དང་སྐུ་འབུམ་སོགས་དགོན་སྡེ་དུ་མར་ཕན་གྲོགས་མཛད། སྡེ་པ་ཆོས་རྗེའི་ཞབས་ལ་གཏུགས། ཤེལ་དགོན་ནས་ཚེ་ཆུའི་བུམ་པ་གཏེར་ནས་བཏོན། (གཟུངས་རྡོར་དང་བཅས་པའི་ཚེ་བུམ་དེ་ཉིད་ཐུབ་སྐུའི་གཟུངས་གཞུག་ཏུ་ཕུལ་བའི་གཟུངས་ཐག་སྣེ་ཕྱི་ལ་ཐོན་པ་སྐབས་རེར་རིང་ཐུང་དུ་འགྲོ་བའི་ཡ་མཚན་པ་དེ་ཉིད་རབ་རྒྱལ་ས་ཁྱི་ཕྱི་ལོ་ ༡༩༥༨ སླེབས་རག་བར་ཡོད་དོ། །) ཕྱོགས་ཕྱོགས་སུ་ཕེབས་ནས་ཕྱག་ནས་ཐེབས་པའི་འབུམ་པ་དང་། ལྷ་ཁང་ཟེར་བ་མང་། རྫུ་འཕྲུལ་དང་མངོན་ཤེས་ཐོགས་པ་མེད་པའི་གྲུབ་ཐོབ་ཚད་ལྡན་དུ་རྗེ་སྐལ་ལྡན་རྒྱ་མཚོས་གསུངས་ཞེས་གསུངས། མེ་སྟག་ཕྱི་ལོ་ ༡༦༢༦ ལོར་དབྱིག་ཀྱ་དཀའ་བཅུ་ཀུན་དགའ་ལེགས་པ་དང་། ཁ་གྱའི་བསོད་ནམས་བཀྲ་ཤིས་ལ་བཀའ་གནང་སྟེ་རྡོ་སྦིས་མཚན་ཉིད་གྲྭ་ཚང་འཛུགས་སུ་བཅུག །རབ་བྱུང་བཅུ་གཅིག་པའི་ས་འབྲུག་ཕྱི་ལོ་ ༡༦༢༨ ལོར་བྱ་ཁྱུང་དུ་སྐྱིད་ཤོད་སྡེ་པ་ཆོས་རྗེ་བསྟན་འཛིན་བློ་བཟང་རྒྱ་མཚོའི་དྲུང་དུ་བཀའ་ཆོས་མང་དུ་གསན། རབ་བྱུང་བཅུ་གཅིག་པའི་ས་སྟག་ཕྱི་ལོ་ ༡༦༣༨ ལོར་རོང་པོའི་གྲུབ་ཆེན་ཆོས་པ་རིན་པོ་ཆེ་བློ་བཟང་བསྟན་པའི་རྒྱལ་མཚན་ཡང་སློབ་མར་འདུས། གསོལ་ཁང་ཆོས་རྗེ་སངས་རྒྱས་ཕྱི་ལོ་ ༡༥༥༨-༡༦༤༣ རྒྱ་མཚོ་འདུ་བའི་བླ་མ་ཡིན་པར་དེའི་རྣམ་ཐར་དུ་འབྱུང་ཞིང་། སྐབས་དེའི་དུས་ནས་རྒན་གྱའི་མཁའ་འགྲོ་མ་ཞེས་གྲགས་ཡོད་པར་ཡང་གསལ། རབ་བྱུང་བཅུ་གཅིག་པའི་མེ་འབྲུག་ཕྱི་ལོ་ ༡༦༧༦ ལོ་ཡས་མས་སུ་ཆུ་བཟང་བློ་བཟང་བསྟན་པའི་རྒྱལ་མཚན་གྱི་གསུང་བཀོད་བཞིན་རྗེ་སྐུའི་བླུག་དཔར་བཟོས་ཏེ་རྗེ་སྐུའི་སྐུ་སྟོད་རང་བྱོན་དུ་ཕེབས་པ་སྐུ་འབུམ་ཆུ་ཀྱ་ཚོ་པས་སྦྱིན་བདག་བྱས་ཏེ་བཞེངས། མཆོད་རྟེན་དྲིལ་གསིལ་མར་ཞིག་གསོས་ཀྱིས་སྐུ་དཀར་གསོལ། འདི་ཁྲི་ཀར་ཡོད། མཆོད་འབུལ་སྨོན་ལམ་གནང་བས་འཇའ་དང་མེ་ཏོག་གི་ཆར་སོགས་ངོ་མཚར་བའི་ལྟས་བྱུང༌། ལོ་རྒྱུས་རྣམས་མངོན་ཤེས་ཀྱིས་གཟིགས་ནས་གསུང་ཞེས་ལི་ཀྱ་དབོན་པོ་ཤེས་རབ་དཔལ་བཟང་གི་དཀར་ཆག་ལས་བཤད་སྐད། འདིའི་མཚན་ལ་བློ་བཟང་ཆོས་སྒྲོན་ཟེར་བར་རྗེ་སྐལ་ལྡན་པའི་ཨ་མདོའི་ཆོས་འབྱུང་དང༌། ཆོས་པ་རིན་པོ་ཆེའི་རྣམ་ཐར། སྐྱིད་ཤོད་པའི་རྣམ་ཐར་སོགས་མང་པོར་གསལ། དེའི་སྤྲུལ་སྐུ་བློ་བཟང་སྒྲོལ་མ་ཡིན་ཞིང་། རྗེ་སྐལ་ལྡན་པས་བསྔགས་བརྗོད་བྱེད་ཡུལ་བློ་བཟང་སྒྲོལ་མ་མ་ཡིན་པར། ཁམས་གུང་རུ་ནས་འཁྲུངས་པའི་མཁའ་འགྲོ་མ་དེ་ཡིན་པར་དེབ་ཐེར་རྒྱ་མཚོར་གསུངས་པ་ཤིན་ཏུ་ལེགས་ཏེ། ཡབ་རྗེ་སྐལ་ལྡན་རྒྱ་མཚོས།

སྐུས་རྫུ་འཕྲུལ་སྟོན་ལ་ཐོགས་མེད་པ། །

ཡུལ་གུང་རུའི་ཡེ་ཤེས་མཁའ་འགྲོ་མས། །

གཏེར་བུམ་པ་ཤེལ་དགོན་བྲག་ནས་བཏོན། །

ཞེས་པའི་ཚིག་ནུས་ཀྱིས་ཤེས་ལ། དུས་མཚུངས་བསྒྲིགས་ནའང་ཕྱི་མ་བདེན་པར་རྟོགས་སླའོ། །ད་དུང་གསེར་ཏོག་ཚང་གི་སྐུ་འབུམ་གདན་རབས་སུ་སྐུ་ཐོག་དང་པོ་ལྷ་རྩེ་དཔོན་མོ་བསོད་ནམས་རྒྱན། སྐུ་ཕྲེང་གཉིས་པ་བློ་བཟང་ཆོས་སྒྲོན། གསུམ་པ་བློ་བཟང་སྒྲོལ་མ། བཞི་པ་དཀོན་མཆོག་ཆོས་སྒྲོན། ལྔ་པ་དཀོན་མཆོག་རིག་འཛིན་སྒྲོན་མ་ཡིན་པར་བཤད་པའི་ཁུངས་གང་ལ་བརྟེན་དཔྱད། ལྷ་རྩེ་དཔོན་མོ་གུང་རུའི་མཁའ་འགྲོ་མ་འདི་པ་མདོ་སྨད་དུ་འགྲོ་དོན་མང་དུ་བསྐྱངས་མཐར་ཕྱིར་སྐུ་ཡུལ་དུ་བྱོན་ནས་གཤེགས་པ་ཡིན་སྣང་སྟེ། སྐུ་གཤེགས་ཁར་སྦར་བའི་མཆོད་མེ་སྐུ་ཕྱི་མ་མགོན་ཁང་དུ་ཕེབས་དུས་ད་དུང་ཡོད་པར་སྐུ་ཕྱི་མའི་རྣམ་ཐར་ཐད་དུ་འབྱུང་བ་བཞིན་ལ། ལྷ་རྩེ་དཔོན་མོ་འདི་ཉིད་སྔགས་ཀྱི་སྒོ་ནས་བུད་མེད་གྲུབ་པ་བརྙེས་པ་རྒྱ་གར་བ་གསུམ། བོད་ཁ་བ་ཅན་པ་བཅུ་གཉིས་ཏེ། གསང་སྔགས་ཀྱི་སྒོ་ནས་ཕྱག་རྒྱར་བསྟེན་དུ་རུང་བའི་རྣལ་འབྱོར་མ་བཅོ་ལྔའི་ཡ་གྱལ་དུ་ཀློང་རྡོལ་བླ་མ་གསུངས་སོ། །

 

༈ གུང་རུ་སྐུ་ཕྲེང་གཉིས་པ་བློ་བཟང་སྒྲོལ་མའི་མཛད་རྣམ།

 

༸གུང་རུ་སྐུ་ཕྲེང་གཉིས་པ་བློ་བཟང་སྒྲོལ་མ་མཆོག་ནི་རྒན་གྱའི་ཤིས་སྐོར་རམ་ཞོལ་སྐོར་བེའུ་ཚང་དུ་སྐུ་འཁྲུངས། རིམ་གྱིས་དབུས་སུ་བྱོན་པའི་ལམ་བར་ནས་ཁམས་གུང་རུར་ཕེབས་ཏེ་མགོན་ཁང་དུ་མཇལ་རྒྱུ་ཡིན་གསུངས་པར། ཁོ་ཚོས་མཁའ་འགྲོ་མ་གཤེགས་ནས་མགོན་ཁང་གི་སྒོ་འབྱེད་མ་མྱོང༌། ལྡེ་མིག་ཀྱང་གར་ཡོད་མི་ཤེས་ཟེར། རྗེ་འདིས་ལྡེ་མིག་འདི་ན་ཡོད་ཅེས་གསུངས་ནས་སྙན་ཤལ་གསེབ་ནས་ལྡེ་མིག་བླངས་ནས་སྒོ་ཕྱེ་བས་མཁའ་འགྲོ་མ་གཤེགས་དུས་སྦར་བའི་མར་མེ་ད་དུང་ཡོད་པས་གུང་རུའི་མཁའ་འགྲོ་མའི་སྐྱེ་བར་ངོས་བཟུང༌། གཞུང་ས་དགའ་ལྡན་ཕོ་བྲང་ནས་ཀྱང་འདོད་རྒྱལ་དང་གཅམ་བུའི་ཟོལ་བསྟོད་ཙམ་མ་ཡིན་པར་གུང་རུ་ཡེ་ཤེས་ཀྱི་མཁའ་འགྲོ་མ་ཞེས་གཟེངས་བསྟོད་བགྱིས།

རིམ་གྱིས་རང་ཡུལ་དུ་ཕེབས་ནས་འདིར་ཐོག་མར་ལྷ་ཁང་རྟེན་དང་བརྟེན་པར་བཅས་པ་གསར་བཞེངས་མཛད་པར་གུང་ཐང་བསྟན་པའི་སྒྲོན་མེས་མཛད་པའི་ཐུབ་སྐུའི་དཀར་ཆག་ཏུ་གསལ་བར་ཡོད་སྣང་བས། ཧོར་སྐལ་བཟང་མཁས་གྲུབ་ཚང་གིས་མཛད་པའི་རྩེ་གཞུང་སོག་ཡུལ་གྱི་དགོན་སྡེ་འགའི་ལོ་རྒྱུས་རགས་བསྡུས་བྱ་བ་ལས། ཉིད་ཀྱི་གཟིམ་ཁང་ཡང་དགོན་པའི་སྟེང་ཟུར་གྱི་ཀླད་དུ་བསྐྱིལ། ཕྱིས་སུ་གུང་རུའི་བླ་བྲང་དུ་གྱུར། དེ་བས་མི་རབས་རྗེས་མ་ཚོས་གུང་རུའི་ནང་ཆེན་ལ་ལ་ཁའི་ནང་ཆེན་ཞེས་སྔོན་མ་བཞིན་གླེང་འདུག་ཅེས་གསུངས་མོད། ལ་ཁ་ཚང་གི་གཟིམ་ཁང་གི་ཤུལ་ད་ལྟའང་དགོན་པར་སྟོན་རྒྱུ་ཡོད་པས་འཐད་དཀའ་ལ། ཀན་ལྷོའི་བོད་བརྒྱུད་ནང་བསྟན་དགོན་སྡེ་སོ་སོས་ལོ་རྒྱུས་མདོར་བསྡུས་སུ་རྗེ་འདི་པ་བྲག་དཀར་གནས་སྒོའི་དྲང་ཐད་ཤར་ངོས་སུ་བཞུགས་པ་ན། ལ་ཁ་མཆོག་གིས་གཟིམ་ཁང་ཞིག་བཞེངས་ནས་ཕུལ་བ་ཡིན་ཞེས་གུང་རུ་སྐུ་ཕྲེང་གཉིས་པ་ལ་ཕུལ་བར་བཤད་པ། རྒན་གྱར་འཁྲུངས་པའི་ལ་ཁ་དེ་དང་དུས་མི་འགྲིག་ཅིང་། ལ་ཁ་སྐུ་ཕྲེང་གསུམ་པ་སྲིང་མོ་ལ་ཁའི་མཁའ་འགྲོ་མ་ཟེར་བ་ལོ་བརྒྱ་ལོན་པ་ཞིག་ཡོད་པར་མདོ་སྨད་ཆོས་འབྱུང་དུ་བཤད་པ་གུང་རུ་ཚང་གི་སྐུ་ཕྲེང་ཞིག་ཡིན་པའི་བགྲོའི་མི་འདུག་ཅིང་ཡིན་ན་རིགས་པའི་གནོད་བྱེད་འབབ་ཚུལ་གཤམ་དུ་འཆད་པར་འགྱུར། གུང་རུ་སྐུ་ཕྲེང་གཉིས་པ་འདི་དགུང་ལོ་ཅི་ཙམ་བཞུགས་མི་གསལ་ཡང་། དགུང་ལོ་རེ་བརྒྱད་ལས་ལྷག་བཞུགས་མེད་པ་ཐག་ཆོད་དེ། རབ་བྱུང་བཅུ་གཅིག་པའི་མེ་འབྲུག་ཕྱི་ལོ་ ༡༦༧༦ ཡས་མས་སུ་སྐུ་གོང་མ་བཞུགས་ཡོད་པ་ཆུ་བཟང་ཚང་གི་རྣམ་ཐར་དུ་གསལ་བ་དང་། རབ་བྱུང་བཅུ་གཉིས་པའི་ཤིང་གླིང་ཕྱི་ལོ་ ༡༧༤༥ ལོར་སྐུ་ཕྲེང་གསུམ་པ་འཁྲུངས་པར་དཀོན་མཆོག་རིག་འཛིན་དཔལ་མོའི་རྣམ་ཐར་དུ་གསལ་བས་སོ། །

དེས་ན་ལ་ཁ་སྐུ་ཕྲེང་གསུམ་པ་བློ་བཟང་སྙན་གྲགས་རྒྱ་མཚོ་དང་དུས་མཉམ་པ་ནི་གུང་རུ་སྐུ་ཕྲེང་གསུམ་པ་འདི་པ་ཡིན་པས། དགུང་ལོ་བརྒྱར་བཞུགས་པའི་ལ་ཁའི་མཁའ་འགྲོ་མ་བྱ་བ་དེ་གུང་རུ་ཚང་གི་སྐུ་ཕྲེང་མིན་པ་ཡང་ཞོར་ལ་ཤེས་སོ། །ཀན་ལྷོའི་བོད་བརྒྱུད་ནང་བསྟན་དགོན་སྡེ་སོ་སོའི་ལོ་རྒྱུས་མདོར་བསྡུས་བྱ་བར། གུང་རུ་སྐུ་ཕྲེང་གསུམ་པས་ལྕང་ཤར་དགོན་བཏབ་པར་བཤད་པ་ཡེ་ནས་མིན་ཏེ། ལྕང་ཤར་དགོན་ཁ་གྱའི་བསོད་ནམས་བཀྲ་ཤིས་ཀྱིས་རབ་བྱུང་བཅུ་པའི་མཇུག་གི་ཟད་པ་མེ་སྟག་ཕྱི་ལོ་ ༡༦༢༦ ལོར་བཏབ་ཅིང༌། གུང་རུ་སྐུ་ཐོག་དང་པོ་མཁའ་འགྲོ་མ་བློ་བཟང་ཆོས་སྒྲོན་གྱི་ཐུགས་བཀོད་ལྟར། དབྱིག་ཀྱ་དཀའ་བཅུ་པ་ཀུན་དགའ་ལེགས་པ་དང་། ཁ་གྱའི་བསོད་ནམས་བཀྲ་ཤིས་ཡོན་མཆོད་ཟུང་གིས་རྡོ་སྦིས་གྲྭ་ཚང་ངམ་དགོ་རི་གྲྭ་ཚང་ལ་མཚན་ཉིད་བཙུགས་པར་ཡབ་རྗེ་སྐལ་ལྡན་རྒྱ་མཚོའི་ཨ་མདོའི་ཆོས་འབྱུང་དུ་གསལ་བར་ཡོད་དེ། དེ་ཉིད་ལས། མཁའ་འགྲོ་མ་བློ་བཟང་ཆོས་སྒྲོན་གྱིས་བཀའ་བསྐུལ་ནས། བསྟན་པའི་སྦྱིན་བདག་བསོད་ནམས་བཀྲ་ཤིས་དང༌། ཆོས་རྗེ་ཀུན་དགའ་ལེགས་པ་གཉིས་ཀྱིས་གྲྭ་ཚང་གསར་དུ་བཙུགས། སྦྱིན་བདག་གིས་ལྕང་ཤར་གྱི་དགོན་གསར་དུ་བཏབ་ཅེས་རྡོ་སྦིས་གྲྭ་ཚང་དང་ལྕང་ཤར་དགོན་སོ་སོར་གསུངས་ཡོད་ཀྱང་། དེབ་ཐེབ་རྒྱ་མཚོར་ལྕང་ཤར་སྒར་མཁའ་འགྲོ་མ་བློ་བཟང་ཆོས་སྒྲོན་གྱི་ངག་བཀོད་ལྟར། སྦྱིན་བདག་ཁ་ཤི་པན་བསོད་ནམས་བཀྲ་ཤིས་དང༌། ཆོས་རྗེ་ཀུན་དགའ་ལེགས་པ་གཉིས་ཀྱིས་བཏབ་ཅེས་དགོ་རི་ལ་སྦྱར་རྒྱུ་དེ་ལྕང་ཤར་ལ་སྦྱར་བས། དགོ་རིའི་ཐད་དུ་སྔོན་གྱི་དགོན་རྙིང་ཞེས་པ་ཙམ་ལས་འདེབས་མཁན་མི་གསལ་བ་དེ་ཡིན་ཞིང་། ཐོག་མར་འདེབས་མཁན་ལོ་རྒྱུས་ལ་ལར་ཆོས་རྗེ་བསམ་གཏན་རིན་ཆེན་གྱིས་རབ་བྱུང་དྲུག་པའི་མེ་སྤྲེལ་ཕྱི་ལོ་ ༡༣༥༦ ལོར་ས་སྐྱའི་ལུགས་སུ་བཏབ་པར་བཤད་དོ། །

 

༈ གུང་རུ་སྐུ་ཕྲེང་གསུམ་པ་དཀོན་མཆོག་ཆོས་སྒྲོན་གྱི་མཛད་རྣམ།

 

༸སྐུ་ཕྲེང་གསུམ་པ་དཀོན་མཆོག་ཆོས་ཀྱི་སྒྲོན་མ་ནི། རབ་བྱུང་བཅུ་གཉིས་པའི་ཤིང་གླང་ཕྱི་ལོ་ ༡༧༤༥ ལོར་རྗེ་གོང་མའི་ཡུལ་བར་ཡབ་ལྷ་སྐྱབས་དང་། ཡུམ་བཟང་མོའི་སྲས་སུ་སྐུ་འཁྲུངས་ཤིང་། ཀུན་མཁྱེན་འཇིགས་མེད་དབང་པོ་དང་། གུང་ཐང་རིན་པོ་ཆེ། ཁྲི་ཆེན་འཇིགས་མེད་རིག་པའི་སེང་གེ་སོགས་བསྟེན་ནས་གསན་བསམ་གནང་མཐར་གནས་ངེས་མེད་ཀྱི་རི་ཁྲོད་འགྲིམ་པར་གསལ་ཏེ། བྲག་ལུང་རི་ཁྲོད་དགེ་ལྡན་དར་རྒྱས་གླིང་དུ་རྗེ་འདི་ཡུན་རིང་བཞུགས་དུས་ཀྱི་སླང་རིས་ཁོ་ཚོའི་རྟེན་གྲས་སུ་ཡོད་པར་བཤད་པས་ཤེས་སོ། །

སྣང་ཚོད་ལ་ཐུགས་ཧ་ཅང་གཏུམ་ཞིང་མཐོ་དམན་བར་གསུམ་ཆ་ཡོད་མེད་སུའང་ཞལ་བརྡ་དང་ངོ་འཛིན་མི་བྱེད་པར་རང་ཚུགས་ཅན་ཞིག་ཡིན་སྟབས། ཞལ་འདོན་ཉམས་ལེན་འདི་འདྲ་བྱས་ཟེར་བ་སུ་ལ་ཡང་བཤད་རྒྱུ་མེད། ཐུའུ་བཀྭན་རིན་པོ་ཆེས་བསྔགས་བརྗོད་རེ་གནང་བའི་ལོ་རྒྱུས་རེ་ཡོད་ཅེས་རྗེ་དཀོན་མཆོག་རིག་འཛིན་དཔལ་མོས་གསུངས་འདུག །དགུང་ལོ་རེ་བདུན་དུ་ཕེབས་པའི་ཚེ་ན། སྐབས་ཤིག་ལ་སྐུ་ཕྲེང་རྗེས་མའི་འཁྲུངས་གཞིས་དེར་ཕེབས་དོན་གཞན་མེད་ཀྱང་། རང་དགར་ཕེབས་ནས་ཞག་གཉིས་བཞུགས་ཤིང༌། སྐུ་ཕྲེང་རྗེས་མའི་མ་ཡུམ་དེ་ལ་མར་གྱི་རིལ་བུ་ཞིག་གནང་ནས་འདི་ཁྱོད་ཀྱིས་ཟོ། ཁྱོད་ལ་གོས་སྐུད་སེར་པོ་ཡོད་ན་ངས་ཕྲེང་ཐག་སྤོར་གསུངས་ནས་ཐུའུ་བཀྭན་རིན་པོ་ཆེའི་ཕྱག་ཕྲེང་ཞིག་ཡོད་པ་དེའི་ཕྲེང་ལུང་བརྗེས་ནས་ཕུལ། ཕྱི་ཉིན་ཕེབས་དུས་སྦྲ་སྒོ་ནས་ཞལ་ཕྱིར་འཁོར་ནས་སྦྲ་སྒོ་ཕྱག་གཉིས་ཀྱིས་བཟུང་ནས་ཐོ་གཏུགས། གཡང་སྒོ་འདི་འདྲ་བྱས་ནས་ཞོག་དང་བཟང་གསུངས་ནས་ཕེབས། དེ་ནས་ཆེར་མ་འགྱང་བར་ཟླ་བརྒྱད་པའི་ཚེས་བཅུའི་ཉིན་སྐུའི་བཀོད་པ་ཉེ་བར་བསྡུས་སོ། །དགོངས་རྫོགས་དབུ་སྔས་སུ་ཁྲི་ཆེན་འཇིགས་མེད་རིག་པའི་སེང་གེ་གདན་དྲངས་ཏེ་ཐུགས་ཟག་མེད་ཀྱི་དགོངས་པ་རྫོགས་ཕྱིར་བསྔོ་སྨོན་གང་རྒྱས་དང༌། སྤྲུལ་སྐུ་མྱུར་འབྱོན་གྱི་སྨོན་ཚིག་ཀྱང་གསུངས།

 

༈ གུང་རུ་སྐུ་ཕྲེང་བཞི་པ་དཀོན་མཆོག་རིག་འཛིན་དཔལ་མོའི་མཛད་རྣམ།

 

༸སྐུ་ཕྲེང་བཞི་པ་དཀོན་མཆོག་རིག་འཛིན་དཔལ་མོ་མཆོག་ནི། རྒན་གྱའི་གསེར་ཆེན་ཐང་དུ་ཡབ་གཡུང་དྲུང་རྒྱལ་ལ་ལར་གཡུང་དྲུང་སྐྱབས་ཞེས་བྲིས་འདུག་དང༌། ཡུམ་ལྷ་མོ་རྒྱལ་གཉིས་ཀྱི་སྲས་སུ་རབ་བྱུང་བཅུ་བཞི་པའི་ཤིང་ཁྱི་ཕྱི་ལོ་ ༡༨༡༤ ལོའི་ཟླ་བ་གཉིས་པའི་ཚེས་བཅུ་གཅིག་ཉིན་འཁྲུངས། ཀྲུང་གོའི་བོད་བརྒྱུད་ནང་དགོན་དཀར་ཆག་ལས་ཀན་སུའུ་གླེགས་བམ་བྱ་བར། དེའི་སྤྲུལ་སྐུ་དཀོན་མཆོག་དཔལ་མོ་བོད་རབ་བྱུང་བཅུ་བཞི་པའི་ཤིང་ཁྱི་ཕྱི་ལོ་ ༡༨༡༤ ལོར་ཡབ་བེའུ་ཚང་གཡུང་དྲུང་སྐྱབས་དང༌། ཡུམ་ལྷ་མོ་རྒྱལ་གྱི་སྲས་སུ་རྒན་གྱའི་གསེར་ཆེན་ནས་སྐུ་འཁྲུངས། ཞེས་སྐུ་འདི་པ་ཡང་བེའུ་ཚང་དུ་འཁྲུངས་པར་བཤད་ཀྱང་བརྟག་དགོས་ཏེ། མདོ་སྨད་ཆོས་འབྱུང་དུ་འདི་གཉིས་ཀ་རྒན་གྱའི་ཤིས་སྐོར་ཞོལ་སྐོར་བེའུ་ཚང་ནས་འཁྲུངས། དེའི་སྤྲུལ་སྐུ་དཀོན་མཆོག་རིག་འཛིན་སྒྲོལ་མ་ཞེས་བེའུ་ཚང་དུ་འཁྲུངས་པ་དཀོན་མཆོག་རིག་འཛིན་དཔལ་མོའི་སྐུ་སྔ་མ་གཉིས་ཡིན་པར་གསུངས་ཤིང༌། རིག་འཛིན་དཔལ་མོ་ཚང་འདི་པ་གསེར་ཆེན་དུ་འཁྲུངས་པར་གསལ་བ་ལས། འཁྲུངས་ཁྱིམ་ཞོལ་སྐོར་བེའུ་ཚང་ཡིན་པར་རྣམ་ཐར་དུའང་མི་གསལ་བས་སོ། །

དཀྱུས་ལ་འཇུག་པར་བྱ་སྟེ། ཁོང་མ་འཁྲུངས་གོང་ཡུམ་གྱི་རྨི་ལམ་དུ་སྐུ་གོང་མ་རྟ་དཀར་པོ་ཞིག་ལ་བཅིབས་ནས་ཁྱིམ་དུ་ཕེབས་པར་རྨིས་པ་དང༌། ཡང་ནུབ་གཅིག་སྐུ་གོང་མའི་དབུ་མནབ་སེར་པོ་ཞིག་ཡོད་པ་ཡུམ་གྱི་མགོ་ཐོག་ཏུ་ལྷུང་བར་རྨིས་པ་དང་། ཡང་ནུབ་གཅིག་གནས་ཁང་གི་ལུང་པའི་ཕུ་ན་སྤྲིན་མང་པོ་འཐིབས་ཤིང་འབྲུག་སྒྲ་དྲག་པོ་དང་བཅས་ཆར་འབབ་པ་དེའི་ནང་ནས་སྦྲང་མ་སེར་པོ་ཆེ་བ་ཞིག་སྐད་སྒྲ་སྒྲོག་བཞིན་དུ་འཕུར་ཡོང་ནས་མོའི་པང་དུ་བབས་པ་རས་དཀར་པོ་ཞིག་གིས་བཀབ་པ་རྨིས་པ་དང༌། ཞག་ཁ་རེ་ནས་རྔ་མོང་རྟ་དྲེའུ་ཞོན་པའི་མི་མང་པོ་སྟག་རྔ་འདྲ་ཁུར་ནས་ཁྱིམ་དུ་འོངས་ནས་ཅུང་ཟད་རེ་བསྡད་ནས་འགྲོ་བ་ཡང་ཡང་རྨིས་པ་ནི། བཀའ་སྲུང་རྣམས་ཀྱིས་མེལ་ཚེ་མཛད་པའི་བརྡའོ། །

ཡུམ་ལ་སྔར་བྱིས་པ་གསུམ་ཙམ་བཙས་ཀྱང་མ་བསྡད་པས། བསེ་ཚང་ལ་ཞུས་པར་སྔར་གྱི་བྱིས་པ་གསུམ་བུ་ལོན་ཡིན། འདི་ལ་ཤཱ་ས་ན་འབུམ་དང་མགོན་པོའི་ཞི་བའི་སྦྱིན་སྲེག་བླུགས་ན་སྐྱོན་མེད་གསུངས། འོན་ཀྱང་མ་ཡུམ་ཅུང་ཟད་འདུ་ཕུང་མ་བདེ་བར་བརྟེན་རྒན་གྱའི་སྐུ་སྐྱེས་ (འདི་པ་དགེ་འཕེལ་རི་ཁྲོད་དུ་ཡུན་རིང་བཞུགས་མྱོང་ཞིང་ཀུན་མཁྱེན་སྐུ་ཕྲེང་གཉིས་པས་ཏེ་ཐུང་བྲག་དགོན་སྐྱོང་བར་མངགས་པས་མཉམ་བཞག་ལ་འབྱམས་ནས་ཉིན་གུང་བར་དུ་ཐུན་མི་གྲོལ་བས་དེ་ཕྱོགས་ཀྱི་མི་རྣམས་ཁོང་ལ་དད་གུས་ཤིན་ཏུ་ཆེ་) ཟེར་བའི་སྨན་པ་ཞིག་གི་རྩར་སྨན་ལེན་དུ་སོང་བས་སྐུ་སྐྱེས་ན་རེ། ཁྱོད་ཀྱི་བྱིས་པ་དེ་ལ་མིང་མ་འདོགས། རྗེས་སུ་ཁོས་འདོགས་དགོས་གསུངས། རྗེས་སུ་སྐར་བཟང་ཞིག་དང་བསྟུན་མིང་ལ་རིག་འཛིན་སྒྲོལ་མ་ཞེས་མཚན་གསོལ། འཁྲུངས་ནས་ཟླ་བ་གཅིག་གི་རྗེས་སུ་སྐུ་བསྙུངས་པས་སྔགས་འཆང་ཞིག་གིས་རིམ་གྲོ་བྱེད་བཞིན་ཡོད་པ་དེའི་རྨི་ལམ་དུ་བྲག་དཀར་ཕྱོགས་ནས་རྟ་ནག་པོ་ཞོན་པའི་མི་ཞིག་འོངས་ནས་ཁྱེད་ཀྱིས་དེ་ལ་ཕན་མི་ཐོགས། བྲག་དཀར་ལ་ཁྱེར་ཟེར་བ་རྨིས་པས་གསུམ་པའི་ཉེར་གསུམ་ཉིན་བྲག་དཀར་ལ་མ་ཡུམ་དང་ལྷན་དུ་ཕེབས་ནས་གཏན་བཞུགས་གནང་བས་བསྙུན་ལས་ཀྱང་གྲོལ། གནས་ཁང་གི་ཐད་ཀྱི་རི་མགོ་དེར་ཕེབས་དུས་མ་ཡུམ་ལ་འདི་ན་གཏེར་ཞིག་འདོན་རྒྱུ་ཡོད་ཀྱང་བདག་དང་མི་གསུམ་མེད་པར་ལེན་མི་ཐུབ་ཅེས་གསུངས་འདུག །

དགུང་ལོ་གསུམ་གྱི་ཐོག་གུང་ཐང་འཇམ་པའི་དབྱངས་བསྟན་པའི་སྒྲོན་མེས་གོང་མའི་སྤྲུལ་སྐུར་ངོས་འཛིན་གནང་ཞིང་། ཕྱག་མདུད་ཕུར་མདུད་བཅས་གནང་། འོན་ཀྱང་གུང་ཐང་རིན་པོ་ཆེའི་རྣམ་ཐར་དུ་མ་འཁོད་འདུག །དགུང་ལོ་བཞིའི་ཐོག་ཟླ་བ་ལྔ་པའི་ཚེས་པ་ལྔའི་ཉིན་གུང་ཐང་རིན་པོ་ཆེར་མཇལ་བས་ཕྱག་རྗེ་འདིའི་དབུ་ལ་བཞག་ནས་ཡུན་རིང་གཟིགས་རྟོག་གནང་ཞིང་། ཞིམ་མངར་གྱི་ཀ་ར་ལན་གསུམ་གནང་སྟེ་མཚན་ལ་དཀོན་མཆོག་རིག་འཛིན་དཔལ་མོ་ཞེས་གསོལ། ཕྱིར་རང་ཡུལ་དུ་སླེབས་ནས་བཞུགས་ཤིང་ཉེ་འབྲེལ་ཨ་ཁུ་ཞིག་ཡོད་པ་དེས་གདན་དྲངས་ཏེ་རྟ་དཀར་པོ་ཞིག་ཕུལ་བ་རྙེད་པའི་ཐོག་མ་ཡིན་ཞིང་། གུང་ཐང་རིན་པོ་ཆེ་བྲག་དཀར་དུ་ཕེབས་དུས་མཇལ་རྟེན་དུ་རྟ་དཀར་པོ་དེ་ཕུལ། རྗེ་ཉིད་ཀྱི་ཞལ་ནས། དེ་དུས་བསམ་པ་ཅང་མེད་ཀྱང་ད་འདང་བརྒྱབས་ན་རྙེད་པའི་དང་པོ་བླ་མ་ལ་དབུལ་རྒྱུ་བྱུང་བ་རྟེན་འབྲེལ་འགྲིགས་བསམ་ཞེས་གསུངས།

གདན་སར་བཀོད་རྗེས་ཡོངས་འཛིན་དུ་རི་ཁྲོད་པ་འཇམ་དབྱངས་མཆོག་གྲུབ་གདན་དྲངས་ཤིང་། ཁོང་གི་མཚན་ལམ་དུ་ཡང་མི་ནག་པོ་ཞིག་འོངས་ནས་སང་ཉིན་ཁྱོད་འབོད་མཁན་ཞིག་འོངས་བས་དེ་ལ་ཅིས་ཀྱང་སོང་ཟེར་བ་ཞིག་རྨིས་འདུག་གསུངས། སྡེ་ཁྲི་ཚང་ལ་རྗེ་འདིའི་འཁྲུངས་རབས་སྐུལ་མཁན་ཡང་འདི་པ་ཡིན། དགུང་ལོ་བདུན་གྱི་ཐོག་ཡོངས་འཛིན་གྱིས་ཁྲིད་ནས་གུང་ཐང་རིན་པོ་ཆེར་འཇིགས་བྱེད་ཀྱི་དབང་ཞུས་པས། བླ་མའི་ཞལ་ནས། འདིའི་སྐྱེ་བ་སྔ་མས་བདེ་མཆོག་འདོན་ཚོད་ཡིན་བདེ་མཆོག་ཅིག་བཏོན་ན་བཟང་གསུངས་ནས་དྲིལ་བུ་ལྷ་ལྔའི་དབང་དང༌། ཛམ་དཀར་ལྷ་ལྔའི་རྗེས་གནང༌། མགོན་པོའི་རྗེས་གནང་སོགས་གནང༌། བསླབ་སྦྱངས་རྣམས་ཀྱང་བརྡ་བསྟན་པ་ཙམ་གྱིས་ཐུགས་སུ་ཆུད་ཅིང་། བླ་མཆོད། དཔའ་གཅིག །བརྒྱ་རྩ། མགོན་པོ། ལྷ་མོ་སོགས་ཆག་མེད་དུ་ཞལ་འདོན་གནང༌། ཆུང་དུས་ནས་བག་ཡོད་ཀྱི་སྤྱོད་པ་ལྷན་སྐྱེས་སུ་མངའ་བས་རྗེ་ཉིད་ཀྱི་ཞལ་ནས་ར་སྐོར་ཕྱི་མ་ན་གྲོང་པ་མང་པོ་འདུག་པས་དེ་ལ་གཏན་ནས་མ་འགྲོ། ཆུང་དུས་མི་མང་དང་འགྲོགས་ན་ལད་འགྲོ་ཞེས་གསུངས།

སྐབས་ཤིག་སྡེ་ཁྲི་རིན་པོ་ཆེ་བཀྲ་ཤིས་འཁྱིལ་གྱི་ཚོགས་ཆེན་ཁྲི་པའི་ཕྱི་ལོ་ ༡༨༢༤ དུས་བྲག་དཀར་དགོན་པའི་ལྟག་ག་ནས་སྒར་བཏབ་ནས་བཞུགས། འོན་ཀྱང་རྗེ་དེའི་རྣམ་ཐར་དུ་འདི་མ་འཁོད་འདུག་ཉིན་ཤས་ལ་མདུན་དུ་མ་སོང་བར། མཁའ་འགྲོ་མ་འདིར་མི་ཕེབས་པ་གསུངས་པ་ཐོས་པས། སྐུ་མདུན་དུ་ཕེབས་པར་གནས་ཁང་ནས་ཕྱིར་བྱོན་འདུག་པས་ང་གནས་ཁང་དུ་སོང་བ་ཡིན། དེ་ན་ཚིལ་མང་པོ་འདུག་འདི་ཚིལ་རེད་ཅེས་རྡོ་དཀར་བསྟན་པར་རྗེ་འདིས་དེ་རྡོ་ཞིག་རེད་ཞུས་པར་མ་རེད་ཅེས་སྐུ་རྩེད་གནང༌། ད་སོང་ནས་རྩེད་མོ་རྩེས། ངེད་ཚོས་གྱོད་ཅིག་བཤད་ཀྱིན་ཡོད། ཉིན་གཅིག་ཤོག་དང་ངས་བདེ་མཆོག་གི་རྗེས་གནང་ཞིག་བསྐུར་གསུངས་ནས་ཕྱིས་སུ་གནང༌། རྗེ་ཉིད་ཀྱི་ཞལ་ནས། སྐབས་ཤིག་གཉན་ཁྲོད་པ་འགའ་ཆུ་ཁ་ནས་རས་གུར་ཕུབ་སྟེ་བསྡད་འདུག །ཕྱི་ཉིན་ཇ་མ་རྒན་པོ་ཞིག་ཡོད་པས་དེ་བསོད་གྲགས་ཚང་རེད་ཟེར་བས་མཚན་ཐོས་པ་ཙམ་གྱིས་སྡོད་མི་ཚུགས་པ་བྱུང་སྟེ་མདུན་དུ་ཕེབས། གནས་ཁང་དུ་ཕེབས་གྲབས་འདུག་པས་ང་ཡང་འགྲོ་རྒྱུ་ཡིན་ཞུས་པར། དེ་མི་རུང་ཁྱོད་ལྷུང་འགྲོ་གསུངས་པར་སྐྱོན་མེད་ང་ཅིས་ཀྱང་འགྲོ་རྒྱུ་ཡིན་ཞུས་ནས་ཞབས་ཞུར་སོང་བ་ཡིན། གནས་ཁང་དུ་དང་པོར་ཁོང་དང་མཉམ་དུ་སོང་བ་དེ་རྟེན་འབྲེལ་ལེགས་འདུག །གཤིན་རྗེའི་འཕྲང་ནས་རྗེ་དེ་ཉིད་ཀྱིས་ཐག་པ་བསྣམས་ཏེ་རྐང་བརྒྱད་གསུང་བཞིན་མི་རྣམས་ཡར་འཐེན་གྱིན་འདུག་ཅེས་གསུངས། འདི་དག་གཞོན་དུས་ཀྱི་མཛད་པ་ཆེ་ལོང་ཙམ་མོ། །

རབ་བྱུང་གི་ཚུལ་ཁྲིམས་གུང་ཐང་རིན་པོ་ཆེར་ཞུས་ཤིང༌། མཚན་ལ་དཀོན་མཆོག་རིག་འཛིན་སྒྲོལ་མ་ཞེས་གསོལ་ཏེ། གསོལ་དཀར་ཕྱི་ནང་གཉིས་ཀ་སེར་པོ་ཞིག་ཞོས་བཀང་སྟེ་གནང་། རྗེ་འདི་ལ་ནམ་མཇལ་ཡང་ཕྱག་གཡོན་པས་མཇལ་ཁ་དང༌། གཡས་པས་ཕྱག་མདུད་གནང་བ་བདེ་མཆོག་གི་རྒྱུད་དོན་དང་འབྲེལ་བའི་དགོས་པ་ཁྱད་པར་ཅན་ཡོད་པར་སེམས། མཁའ་འགྲོ་མ་འདི་ཉིད་དགུང་ལོ་དགུར་སོན་སྐབས་གུང་ཐང་འཇམ་པའི་དབྱངས་ཞི་བར་གཤེགས་མོད། རྗེ་འདི་ཉིད་ཀྱི་ཞལ་རས་གཏན་ནས་མི་བརྗེད་ཅེས་ཞལ་ནས་གསུངས།

 

༈ དེ་ནས་མང་དུ་ཐོས་པ་ཇི་ལྟར་མཛད་ཚུལ་ནི།

 

༸ཀུན་མཁྱེན་སྐུ་ཕྲེང་གསུམ་པ་ ༡༧༩༢-༡༨༥༥ དང༌། བཞི་པ་ ༡༨༥༦-༡༩༡༦ རྣམ་གཉིས་དང༌། གུང་ཐང་སྐུ་ཕྲེང་གསུམ་པ་ ༡༧༦༢-༡༨༢༣ བཞི་པ་ ༡༨༢༤-༡༨༥༩ ལྔ་པ་ ༡༨༦༠-༡༩༢༥ གསུམ་དང༌། ཧོར་གཙང་ཁྲི་ཆེན་འཇིགས་མེད་རིགས་པའི་སེང་གེ་ ༡༧༤༧-༡༨༡༦ དང་། ཁོང་གི་ཡང་སྤྲུལ་འཇིགས་མེད་བསྟན་པའི་ཉི་མ་ ༡༨༡༦-༡༨༧༥ དང༌། དེའི་ཡང་སྤྲུལ་སྐལ་བཟང་དཔལ་ལྡན་གྲགས་པ་ ༡༨༧༥-༡༩༡༢ གཉིས། སྡེ་ཁྲི་འཇམ་དབྱངས་ཐུབ་བསྟན་ཉི་མ་ ༡༧༧༩-༡༨༦༢ དང་། ཁོང་གི་སྤྲུལ་སྐུ་བློ་བཟང་ལུང་རིགས་ཉི་མ་ ༡༨༦༢-༡༨༧༤ དང་། དེའི་ཡང་སྤྲུལ་འཇིགས་མེད་ཐུབ་བསྟན་ཉི་མ་ ༡༨༧༤-༡༨༩༨ གསུམ། དབལ་མང་དཀོན་མཆོག་རྒྱལ་མཚན་ ༡༧༦༤-༡༨༥༣ བསོད་གྲགས་དཀོན་མཆོག་རྒྱ་མཚོ་ ༡༧༩༠- དང་ཁོང་གི་སྤྲུལ་སྐུ་འཇིགས་མེད་བསོད་ནམས་རྒྱ་མཚོ་གཉིས། མཁན་ཆེན་ངག་དབང་ཐུབ་བསྟན་རྒྱ་མཚོ་ ༡༨༣༦-༡༨༨༩། སྒོ་མང་བློ་བཟང་ཚུལ་ཁྲིམས་རྒྱ་མཚོ་ ༡༨༤༡-༡༩༠༧། གླིང་དཀོན་མཆོག་དགྱེས་པའི་བློ་གྲོས་ ༡༧༧༣- དང་། མཆོག་སྤྲུལ་འཇིགས་མེད་བློ་གྲོས་རྒྱ་མཚོ་ ༡༨༣༩- གཉིས། སྟག་ལུང་དཀོན་མཆོག་ཉི་མ་ ༡༧༨༢-༡༨༣༦ དང་། མཆོག་སྤྲུལ་བློ་བཟང་དམ་ཆོས་རྒྱ་མཚོ་ ༡༨༤༠-༡༨༨༩ གཉིས། རྡོ་རྗེ་འཆང་རྗེ་བཙུན་ཤེས་རབ་རྒྱ་མཚོ་ ༡༨༠༣-༡༨༧༥ སོགས་བསྟེན་ཏེ་གསན་བསམ་རྒྱ་ཆེར་གནང༌། ཁོང་གི་དགེ་རྒན་གཙོ་བྱས་པའི་བླ་མ་དེ་དག་གི་ཞལ་ཐང་བཞེངས་ཏེ་བཤེས་གཉེན་བསྟེན་ཚུལ་གྱི་དམིགས་སྐོར་ལ་ནན་ཏན་གནང་ཞིང་། རྒྱུན་དུ་བྱིན་རླབས་ཞུ་བར་མཛད་ལ་སྡེ་ཁྲི་རིན་པོ་ཆེ་དང་། བསོད་གྲགས་ཚང་རྣམ་གཉིས་ལ་དད་གུས་གཞན་དང་མི་འདྲ་བ་གནང་ཞིང་། ཐུན་མིན་གྱི་རྣམ་ཐར་དཔོག་པར་དཀའ།

ས་བྱི་ཕྱི་ལོ་ ༡༨༢༨ ལོར་ཞབས་དཀར་ཚོགས་དྲུག་རང་གྲོལ་མཇལ་ཚུལ་དེའི་རང་རྣམ་ལས། རྒན་གྱ་རུ་སོང་དུས་གནས་ཆེན་བྲག་དཀར་ལ་མཇལ། ཉི་མ་མང་པོར་གནས་ཁང་དུ་བསྡད་གནས་འབྲེལ་བཞག །བྲག་དཀར་མཁའ་འགྲོ་མ་ལ་མཇལ། རྟེན་གསུམ་ཕུལ་ནས་ཆོས་འབྲེལ་ཞུས། དགོན་པར་མང་ཇའི་དོད་དུ་རྟ་གཅིག་ཕུལ། ཞག་གཉིས་བསྡད་ནས་ཕྱག་སྐོར་བྱས་ཞེས་སོ། །ཀུན་མཁྱེན་བཞི་པ་ཆེན་མོར་རྗེ་འདིས་ཞལ་ཕུ་ཞིག་གནང་རོགས་ཞུས་པར་དེ་མི་རུང་གསུངས། རྗེ་འདིས་དེས་ཅི་སྐྱོན།

མགོན་པོ་ཁྱོད་ཀྱི་ཞལ་གྱི་དབུགས་ཙམ་ཡང་། །མཐའ་དག་འགྲོ་ལ་སྨན་པའི་རྒྱུར་འགྱུར་ན། །

གསུངས་འདུག་མོད་ཞུས་པར། ཀུན་མཁྱེན་གྱིས་དེ་རྗེ་རིན་པོ་ཆེ་རེད་མོད་གསུངས། རྗེ་འདིས་ང་ལ་རྗེ་རིན་པོ་ཆེ་དང་ཁྱེད་གཉིས་ཁྱད་ཅི་ཡང་མེད་ཞུས་པར། འོ་འོ་དེས་ན་ཆོག་གི་གསུངས་ནས་ཞལ་ཕུ་མཛད། ཀུན་མཁྱེན་སྐུ་ཕྲེང་བཞི་པའི་རང་རྣམ་ལས། རབ་བྱུང་བཅོ་ལྔ་པའི་ཆུ་འབྲུག་ཕྱི་ལོ་ ༡༨༩༢ ལོའི་ཐད་དུ་བྱུང་བ་མ་དག་སྟེ། དེའི་སྔ་ལོར་རྗེ་འདི་གཤེགས་ཟིན་པ་རང་རྣམ་དེར་གསལ་བས་སོ། །

བཀྲ་ཤིས་འཁྱིལ་དུ་ཕེབས་རེས་ཀྱིས་སྐྱབས་མགོན་སྐུ་ཕྲེང་རིམ་བྱོན་གྱི་གསོལ་འདེབས་གསུངས་ནས་ཇ་ཕུད་ཕུལ། ཞལ་ཕྱིར་ཕྱོགས་ཏེ།

སྒྲིབ་བྲལ་ལྷན་སྐྱེས་བདེ་བའི་ངོ་བོ་ཉིད། །སྣ་ཚོགས་སྒྱུ་འཕྲུལ་དྲྭ་བའི་རོལ་པ་ལས། །

དག་པའི་རྟེན་དང་གཡོ་བའི་རང་བཞིན་གྱིས། །རྟེན་དང་བརྟེན་པར་ཤར་ལ་མཆོད་པ་འབུལ། །

ཞེས་གསུངས་ནས་བྲག་དཀར་ཕྱོགས་ལ་མཆོད། དེ་ནས་རྐང་བརྒྱད་གསུང་བཞིན་ཕེབས་པ་ཡིན་འདུག །རྗེ་ཐུའུ་བཀྭན་རིན་པོ་ཆེས་ཁ་དར་གང་གནང་རྣམས་བདེ་མཆོག་གི་གསང་ཐང་ལ་འབུལ་བར་མཛད་པ་སོགས་དགེ་བའི་བཤེས་གཉེན་བསྟེན་ཏེ་གདམས་ངག་གསན་ནས་ཐོས་བསམ་གནང་བའི་སྐོར་རོ། །

 

༈ གདམས་དོན་ཉམས་སུ་བཞེས་པའི་སྐོར་ནི།

 

རྗེ་ཐམས་ཅད་མཁྱེན་པའི་དགོངས་པ་ལྟར་སྡོམ་གསུམ་དག་པ་ཉམས་ལེན་གྱི་མཐིལ་དུ་མཛད་ནས་ཉིན་རེ་བཞིན་དུ་ཐུན་དྲུག་རྣལ་འབྱོར་ཆག་མེད་དུ་མཛད། ནངས་རེ་བཞིན་དུ་ལྗགས་བྱིན་རླབས། གང་བློ་མ། དགའ་ལྷ། ས་གསུམ་མ། དམིགས་བརྩེ་མ་གང་འགྲུབ། བདེ་མཆོག་གི་ཆོ་ག །བརྒྱ་རྩ། སྤྱི་གཏོར། དཀར་གཏོར། ཕྱག་དང་འབྲེལ་ཏེ་ལྟུང་བཤགས། སྨན་བླ། བླ་མཆོད། དཔའ་གཅིག །བཟང་སྤྱོད། བྱམས་པའི་དམ་གཟུངས། བདེ་གསང་འཇིགས་གསུམ་གྱི་རྩ་རྒྱུད། དུས་འཁོར་བསྡུས་རྒྱུད། མཚན་བརྗོད། བྱམས་ཆོས་སྡེ་ལྔ། དབུ་མ་འཇུག་པ། བསྐལ་བཟང་རྒྱན་ཕྲེང༌། གསེར་འོད། བརྒྱད་སྟོང་རྣམས་ཅི་ཐུབ་རེ་ལྗགས་ཀློག །དེའི་རྗེས་ནས་སྐོར་བ་གང་འགྲུབ། ཚེ་དཔག་མེད། མཁའ་སྤྱོད་མ། ཁྲོས་ནག །དམིགས་བརྩེ་མ། ཁྱུང་ཁྲ། རྟ་མགྲིན། འཁོར་ཆེན། སེང་གདོང་། རིག་བྱེད་མ། རྣམ་འཇོམས་མ། ལོ་གྱོན་མ། རྣམ་རྒྱལ་མ། བདེ་མཆོག་དཀར་པོ། ཧེ་རུ་ཀའི་ཡིག་བརྒྱ་རྣམས་བརྒྱ་རྩ་རེ་བཞེས་པ་གནང་བའི་སྐབས་གཅོད་ཀྱི་ཚོགས་འཁོར། ཕྱི་དྲོ་མགོན་པོ་དང་ལྷ་མོའི་བསྐང་གསོ། ཆོས་སྐྱོང་གཞན་གྱི་གཏོར་བསྔོས། ལུས་སྦྱིན་བཅས་འདི་རྣམས་ཆག་མེད་དུ་གནང་། བསྙེན་པ་གནང་བའི་ལྷག་ལྷ་ཡང་། བདེ་གསང་འཇིགས་གསུམ། དུས་འཁོར། འཁོར་ཆེན། མཁའ་སྤྱོད་མ། རིག་བྱེད་མ། རྟ་མགྲིན། ཀུན་རིག །རྣམ་སྣང་མངོན་བྱང༌། ཚེ་དཔག་མེད། ཐུགས་རྗེ་ཆེན་པོ། སྒྲོལ་དཀར། གསང་བདག །འཇམ་དབྱངས་དཀར་པོ། ཁྱུང་ཁྲ། སེང་གདོང་མ། མགོན་ཆོས་གཉིས་སོགས་ཀྱི་བསྙེན་པ་གནང་བར་མཛད།

གཉན་ཁྲོད་ལ་ཕེབས་རྒྱུ་བསོད་གྲགས་ཚང་ལ་ཞུས་པས། ཁྱོད་ཕྱི་མཚམས་ལྟར་འགྲོ་མི་དགོས། ཆུ་མིག་བརྒྱ་རྩ་ནས་རྡེའུ་བླངས་ཏེ་གདན་འོག་ཏུ་ཞོག །བྲག་ངོས་ན་ཁྱོད་རང་ལ་མཚམས་ཁང་ཡོད་པ་དེ་ན་སྡོད། བདུན་མཚམས་གསུམ་སོགས་ཞག་གྲངས་དང་ཐུན་གྲངས་ཐམས་ཅད་བཤད་ཚོད་ལྟར་གྱིས་དང་དེས་ཆོག་གསུངས། འོ་ན། མི་གཉིས་ང་རང་དང་མཉམ་དུ་འགྲོ་རྒྱུ་བྱས་ཡོད་པས་དེ་ལྟར་བསྡད་ཨེ་ཆོག་ཞུས་པར་དེ་གཉིས་ཀྱིས་དེ་ལྟར་མི་ཆོག་གསུངས། ཕྱིས་སུ་རྗེ་ཉིད་ཀྱིས་ཀྱང་མཚམས་ཁང་དེ་གཅོད་ཀྱི་གཞུང་ནས་བཤད་པ་ལྟར་གྱི་གནས་རེད་གསུངས། མཚམས་ཁང་དེར་གཞན་སུ་ཡིན་སྡོད་མི་ཐུབ་པ་ཞིག་ཡིན་འདུག །གུང་ཐང་འཇམ་པའི་དབྱངས་ནས་སྤྱན་རས་གཟིགས་ཀྱི་ཞིང་བཀོད་གནང་བ་དེའི་མདུན་དུ་སྙུང་གནས་བརྒྱ་རྩ་བརྒྱད་བསྲུངས། མ་ཎི་དུང་ཕྱུར་གཅིག །ཡིག་བརྒྱ་འབུམ་ཐེར་གསུམ། བཞི་སྦྲགས་ཚར་བཅུ་གསུམ་ས་ཁུངས་བསྒྲིགས་ནས་དཔེ་གཟིགས་གནང་། ལོ་རེ་བཞིན་བདེ་གསང་འཇིགས་གསུམ། རྣལ་འབྱོར་མའི་བདག་འཇུག་ཉིན་བདུན་རེ། ཟླ་བ་དང་པོའི་ཚེས་གཅིག་ནས་བདེ་མཆོག་དཀར་པོའི་ཚེ་སྒྲུབ་སྔགས་འབུམ་འགྲོ་ངེས་གནང་སྟེ་བླ་མ་རྣམས་ལ་བུམ་ཆུ་འབུལ་བར་མཛད། ལོ་ཀྱཱ་ཏུན་དུ་ལན་བདུན་ལ་ཕེབས་ནས་བདག་འཇུག་བཞེས། དང་པོར་ཕེབས་སྐབས་ཞལ་རས་སྔོན་པོར་གཟིགས་གསུངས། དེར་བཞུགས་སྐབས་ཤིག་མཚན་ལམ་དུ་བླ་མ་པཎ་ཞྭ་སྣེ་རིང་ཅན་སྐུ་གཟུགས་རིང་བ་ཞིག་ཕེབས་ནས་ང་བློ་བཟང་ཆོས་ཀྱི་ཉི་མ་ཡིན་གསུངས་ཤིང་། འདི་དུས་ནང་ཇེ་དཀར་ཇེ་དཀར་ལ་སོང་ནས་བླ་མ་དེ་ཉིད་མངོན་སུམ་པ་ལྟ་བུར་ཕེབས་བྱུང་གསུངས།

སྐབས་ཤིག་དཀྱིལ་འཁོར་འོག་གི་ཅོག་ཙེའི་སྟེང་དུ་མིའི་རྐང་རྗེས་གསལ་བར་བབས་པ་ཡུན་རིང་པོར་ཡོད་འདུག །དེར་རྡོའི་ཐོད་པ་ནང་ན་སྙིང་འདྲ་བ་ཡོད་པ་ཞིག་ཀྱང་རྙེད། ཕེབས་རེས་ཤིག་རྨ་ཆུའི་ཁ་ན་མར་འབྲོག་མོ་ཞིག་འགྲོ་གིན་འདུག་པས་ང་ལ་ཡང་ཡང་བལྟས་བྱུང་། རྒྱ་ནང་ན་དེ་འདྲ་མེད་ཀྱང་ཅི་ཡིན་མ་ཤེས་གསུངས། ས་ལུག་ཕྱི་ལོ་ ༡༨༥༩ ལོར་རྗེ་ཤེས་རབ་རྒྱ་མཚོའི་མདུན་ནས་སྒྲོལ་དཀར་དང་དམ་ཅན་སེང་ཞོན་གྱི་རྗེས་གནང༌། འཇིགས་བྱེད་བདུད་ལས་རྣམ་རྒྱལ། མཁས་གྲུབ་བསྟན་འཛིན་པའི་སྒྲོལ་དཀར་ཚེ་ཆོག །མན་ངག་བཀའ་རྒྱ་མའི་ལུང་། སྒྲོལ་དཀར་ཚེ་ཁྲིད་བཅས་གསན། ཡང་རྗེ་དེའི་མདུན་ནས་ལྕགས་བྱ་ཕྱི་ལོ་ ༡༨༦༡ ལོར་རླུང་ཁྲིད་འཇའ་ལུས་མངོན་གྱུར་ལུང་ཁྲིད་དང་། མན་ངག་ཧ་འདོན་གྱི་དམིགས་ཁྲིད། འཇམ་དབྱངས་དཀར་པོའི་རྗེས་གནང༌། བདེ་མཆོག་གི་ཟས་མཆོད་ཤིན་ཏུ་གསང་བའི་མགུར་དབྱངས་རྡོ་རྗེ་མཁའ་འགྲོ་མ་རྣམས་ཀྱི་སྙིང་གི་ཐིག་ལེ་སྐུལ་བའི་སྒྲ་དབྱངས། གྲུབ་མཆོག་ལཱུ་ཨི་པའི་ལུགས་ཀྱི་བདེ་མཆོག་བསྐྱེད་རྫོགས་ཀྱི་ཁྲིད་ཞལ་ཤེས་ཀྱིས་བརྒྱན་པ་གསན།

ཆུ་ཁྱི་ཕྱི་ལོ་ ༡༨༦༢ ལོར་རྗེ་དེའི་དྲུང་ནས་བླ་མཆོད་ཀྱི་ཁྲིད་རྒྱས་པ་གསན། ཆུ་ཕག་ཕྱི་ལོ་ ༡༨༦༣ ལོར་རྗེ་དེའི་དྲུང་ནས་བདེ་མཆོག་ལཱུ་ཨི་པའི་དབང་སྟ་གོན་དང་བཅས་པ་བསོད་གྲགས་ནང་ཆེན་དུ་གསན། ཤིང་བྱི་ཕྱི་ལོ་ ༡༨༦༤ ལོར་རྗེ་དེ་ཉིད་ཀྱི་དྲུང་ནས་གསང་འདུས་འགྲེལ་པ་བཞི་སྦྲགས་ཀྱི་བཤད་ལུང་གསན། ཤིང་གླང་ཕྱི་ལོ་ ༡༨༦༥ ལོར་རྗེ་དེའི་མདུན་ནས་བརྒྱ་རྩའི་ཁྲིད། སྨན་བླའི་དབང་གསན། མེ་སྟག་ཕྱི་ལོ་ ༡༨༦༦ ལོར་རྗེ་དེའི་དྲུང་ནས་རྗེ་ཉིད་ཀྱིས་མཛད་པའི་ཟིན་བྲིས་ཡོངས་རྫོགས་ཀྱི་ལུང་གསན། མེ་ཡོས་ཕྱི་ལོ་ ༡༨༦༧ ལོའི་ཟླ་གསུམ་པར་རྗེ་ཤེས་རབ་རྒྱ་མཚོར་བཀའ་གདམས་ཐིག་ལེ་བཅུ་དྲུག་གི་དབང་། བདེ་མཆོག་མཁའ་འགྲོ་སྙན་བརྒྱུད་ཀྱི་དབང་སོགས་གསན། ཆུ་སྤྲེལ་ཕྱི་ལོ་
༡༨༧༢ ལོར་རྗེ་དེའི་དྲུང་ནས་བརྒྱད་སྟོང་པའི་ལྗགས་ལུང་གསན། མེ་ཁྱི་ཕྱི་ལོ་ ༡༨༨༦ ལོར་ཀུན་མཁྱེན་བཞི་པ་མཆོག་ཀྱེ་རྡོར་ཚོགས་དབུར་གདན་འདྲེན་ཞུས་ཤིང་གྱ་ནོམ་པའི་མཆོད་སྤྲིན་ཕུལ་ཏེ་ཚེ་རབས་རྗེས་འཛིན་གྱི་སྐྱབས་འཇུག་ཞུས། མེ་ཕག་ཕྱི་ལོ་ ༡༨༨༧ ལོར་སྐྱབས་མགོན་དེ་ཉིད་རང་གི་ནང་ཆེན་དུ་གདན་དྲངས་ཏེ་ཚེ་དབང་ཞུས། དུས་རྒྱུན་ཡར་མར་གྱི་ཚེས་བཅུ་ལ་བདེ་མཆོག་བདག་འཇུག་ཚོགས་འཁོར་དང་བཅས་པ་གནང་བ་སོགས་སྤོང་བ་བསམ་གཏན་གྱི་ཉམས་བཞེས་མཛད་པའི་སྐོར་རོ། །

 

༈ དེ་ནས་བྱ་བ་ལས་ཀྱི་འཁོར་ལོ་མཛད་པའི་ཚུལ་ནི།

 

ལོ་ཀྱཱ་ཏུན་དུ་དང་པོ་ཕེབས་སྐབས་དོང་ཙེ་ཆེ་བ་འགའ་ཞིག་དད་ལྡན་ཞིག་གིས་ཕུལ་བས་མགོན་པོའི་བྲིས་སྐུ་བཞེངས་པ་རྟེན་བཞེངས་ཀྱི་ཐོག་མ་ཡིན། གཟིམ་ཁང་དང་ལྷ་ཁང་རྙིང་པ་གསར་བཞེངས་བྱེད་རྩིས་གནང་བར་དོང་ཙེ་ཁྱོན་བརྒྱ་ལས་མེད་པས་ཐབས་མ་རྙེད་མར་བཞུགས་སྐབས། མཚན་ལམ་དུ་གྲྭ་པ་ཞིག་གིས་ཁྱེད་ཀྱིས་བཞེངས་ཐབས་གྱིས་དང་ངས་གྲོགས་བྱེད་ཟེར་བ་བྱུང་བས། དེ་ནས་གདན་འདྲེན་པ་མང་དུ་བྱུང་སྟེ་ལེགས་མར་གྲུབ། འོན་ཀྱང་འཚུབ་ཆ་ཤིན་ཏུ་ཆེ་བས་བསོད་གྲགས་རིན་པོ་ཆེ་གློ་བུར་དུ་ཕེབས་ནས་ཁྲོས་མའི་གཏོར་ཟློག་ཅིག་གནང་བ་དང༌། ཧེ་རུ་ཀའི་ཡིག་བརྒྱ་མང་དུ་སྒྲུབས་གསུངས་པ་ལྟར་བསྒྲུབས་པས་རང་ཞིར་སོང༌། ཡང་ནུབ་གཅིག་ཁོང་སྒམ་ཞིག་གི་ནང་དུ་བཅུག་འདུག་པར་སྔར་གྱི་གྲྭ་པ་དེ་འོངས་ནས་བུ་ག་ཕྲ་མོ་ནས་ལག་པ་བཟེད་པས་དེ་མ་ཐག་ཕྱིར་ཐོན་ཏེ་ནང་དུ་ཕེབས་པ་ན། གྲྭ་པ་དེ་ཧོར་གཙང་རིན་པོ་ཆེའི་ཕྱག་བྲིས་ཀྱི་བཀྲ་ཤིས་རྟགས་བརྒྱད་ཅིག་ཡོད་པ་དེ་ལ་ཐིམ་འགྲོ་བ་ཞིག་རྨིས་གསུངས། དེ་དམ་ཅན་གྱི་འཕྲུལ་དུ་འདུག་གསུངས་ནས་སྐབས་རེར་རྗེ་ཆོས་ཀྱི་ཉི་མས་མཛད་པའི་དམ་ཅན་གྱི་ཆོ་ག་རྒྱས་པ་དེ་འདོན་དུ་འཇུག་པ་གནང༌། བཀྲ་ཤིས་འཁྱིལ་དུ་མང་ཇ་ལན་བདུན་གནང་ཞིང་། བྲག་དཀར་དགོན་འདི་ཉིད་ལ་འགྱེད་མང་སྐོལ་ལན་གྲངས་དུ་མ་དང་གཏོར་ཆེན་ཡང་མང་དུ་བཏང་། དགོན་པའི་ལྷ་ཁང་འདུ་ཁང་ཞིག་གསོས་དང་། འདུ་ཁང་ཕུའི་བྱམས་སྐུ། ཇོ་བོ། རྡོ་རྗེ་འཆང་གསུམ་ལ་ཞིག་གསོས་མཛད་ནས་རྟེན་གཟུངས་གཞུག་མང་པོ་ཕུལ། ཧོར་ཚང་དང་རྣམ་གཉིས་ཀྱིས་རབ་གནས་རྒྱས་པ་གནང༌། དེ་ནས་བཟུང་ཟླ་རེ་བཞིན་དུ་བྱམས་ཁང་དུ་ཁྲུས་གསོལ་དང་རྟེན་བསྟོད་བྱམས་བསྟོད་བཅས་དུས་ཆེན་རྣམས་ལ་ཆག་མེད་མཛད་དགོས་པའི་གསུང་བཀོད་མཛད། རྗེ་ཉིད་ཀྱི་ལྷ་ཁང་ལའང་གྲིབ་ཕོག་པའི་རྐྱེན་གྱིས་ཁྲུས་གསོལ་དང་མཁའ་འགྲོའི་རྨུག་བསང་གནང་བས་ཐུབ་དབང་ཐུགས་ཀའི་གཟུངས་ཐག་སོར་དོ་ལས་མེད་པ་རིམ་གྱིས་སྐྱེས། རང་རེའི་དགོན་འདིར་ཡང་དབྱར་གནས་མ་ཚུགས་གོང་རྗེ་ཉིད་ཀྱིས་ནང་དུ་གྲྭ་པ་བདུན་རེ་གདན་དྲངས་ནས་ལོ་བདུན་ལ་དབྱར་གནས་བཟུང་བ་སོགས་བྱ་བ་ལས་ཀྱི་འཁོར་ལོའི་སྐོར་རོ། །

 

༈ ཐོར་བུའི་མཛད་པ་རྣམས་ཕྱོགས་གཅིག་ཏུ་བསྡུས་ཏེ་བྲིས་ན།

 

སྡེ་ཁྲི་རིན་པོ་ཆེས་ཁྱེད་ཤེལ་དགོན་དུ་སོང་ན་བཟང་གསུངས་པ་ལྟར་དེར་ཕེབས་པས་བྲག་ཟླ་ཕྱེད་རྡོ་རྗེ་འདྲ་བ་ཞིག་གིས་བཅད་འདུག་པའི་ཕར་ནང་ན་རུས་པ་ཆེ་ཆུང་མང་བོ་དང༌། ཤ་རློན་པ་སྤུངས་འདུག་པའི་ནང་ནས་དུམ་བུ་རེ་བསྣམས་ནས་ཕེབས་ཏེ། རྗེ་ཤེས་རབ་རྒྱ་མཚོ་དང་། རྗེ་ཞང་སྟོན་བསྟན་པ་རྒྱ་མཚོ་རྣམ་གཉིས་ལ་ཕུལ་བ་དང༌། བྲག་ནང་དེར་མཚན་ཐོག་ཐག་བཞུགས་པར་བྲག་ངོས་ཐམས་ཅད་ཡི་གེས་གང་འདུག་པ་གཟིགས་ཀྱང་ནམ་ལང་པ་ན་མེད་འགྲོ་བར་འདུག་གསུངས། སྡེ་ཁྲི་ཚང་ནས་བྲག་དཀར་འདིའི་བྲག་སོར་མོའི་དབྱིབས་སུ་འདུག་པས་སྐུ་འཁོར་གྱི་གནས་ནཱ་ག་ར་ཡིན་པར་འདུག །དེ་ན་ཧེ་རུ་ཀ་དང་ཤིན་ཏུ་དཔའ་མོ་ཞེས་གསུངས་འདུག་པས་ཤིན་ཏུ་དཔའ་མོ་ཁྱོད་ཡིན་རྒྱུ་རེད་གསུངས། དབལ་མང་ཚང་ལ་མཇལ་བར་ཕེབས་སྐབས་སྐུ་མདུན་པས་རྗེ་འདི་ཕེབས་འདུག་ཞུས་པར། གུང་རུ་མཁའ་འགྲོ་མ་དམག་ཟོར་མ་དངོས་ཡིན་པ་རེད་གསུངས། གྲུབ་པ་དུང་རྣ་བས་རྗེ་འདི་ཁོའི་སྒྲུབ་ཁང་དུ་ལན་གསུམ་གདན་དྲངས་ཤིང་། རྗེ་འདི་ལ་ནམ་མཇལ་ཡང་སྨྲ་བསམ་བརྗོད་མེད་མ་བཏོན་ནས་མཇལ་ཁ་ཞུ་བར་མཛད། གྲུབ་ཆེན་འདིའི་རྣམ་ཐར་འོག་ཏུ་འབྱུང་།

རྗེ་འདི་ལ་བླ་མའི་རྣལ་འབྱོར་ཞུ་མཁན་རྣམས་ལ་ཞི་བ་ལམ་ཟབ་ཐོན་དང་དེས་ཆོག་ཅེས་དང༌། རྗེ་ཉིད་ཀྱི་སྐུ་འདྲ་བཞེངས་རྒྱུ་ཡིན་ཞུས་ན། ལབ་སྒྲོན་བཞེངས་ན་བཟང༌། ང་འདྲ་བ་བཞེངས་པས་ཅི་བྱེད་གསུངས། འདི་ཡང་དོན་གྱི་གནད་མཁྱེན་པའི་གསུང་སྟེ། དེང་སང་བསྟན་པའི་བདག་པོ་དང་། རྒྱན་དྲུག་མཆོག་གཉིས་རྗེ་ཡབ་སྲས་ལྟ་བུའི་སྐུ་གཟུགས་ལ་རྩིས་ཆེན་དུ་མི་བྱེད་པར་བཤེས་གཉེན་བསྟེན་ཚུལ་གྱི་གོ་བ་ཕྱིན་ཅི་ལོག་ཏུ་སོང་སྟེ་སྡོམ་གསུམ་སོགས་ཆོས་ཀྱིས་རང་རྒྱུད་ལ་ཕན་ཐོགས་བྱས་པ་ཅི་ཡང་མེད་བཞིན་དུ་ཆེན་པོའི་མིང་ཐོགས་ཤིང་དག་སྣང་སྦྱོང་དཀའ་བའི་བྱ་སྤྱོད་ཡ་མ་ཟུང་སྟོན་མཁན་གྱི་འདྲ་པར་རྫིག་ཉམས་ཅན་མང་པོས་ས་གང་བ་འདི་ལ་དགོངས་ནས་ངེས་དོན་གྱི་མཁའ་འགྲོ་མ་འདིས་ཀྱང་ང་འདྲ་བ་བཞེངས་ནས་ཅི་བྱེད་གསུངས་པར་གདོན་མི་ཟའོ། །

རྗེ་ཉིད་ཀྱི་ཞལ་ཚབ་ལྟ་བུར་ལབ་སྒྲོན་གྱི་སྐུ་གཟུགས་བཞེངས་པ་རང་བྱོན་ལྟ་བུར་ཕེབས་ཤིང་། ལོ་གཅིག་གི་ཡུན་ལ་རྗེ་ཉིད་ཀྱིས་རབ་གནས་ཆག་མེད་མཛད་པས་བྱིན་རླབས་ཀྱི་གཏེར་དུ་གྲུབ་པ་དེའི་དཀར་ཆག་རྒྱས་པ་མཁན་ཆེན་ངག་དབང་ཐུབ་བསྟན་རྒྱ་མཚོས་མཛད་པ་དང༌། ཀུན་མཁྱེན་བཞི་པ་མཆོག་གིས་འདི་གསོན་པོ་ལྟ་བུར་འདུག་གསུངས་སོ། །འོན་ཀྱང་རབ་རྒྱལ་ས་ཁྱི་ཕྱི་ལོ་ ༡༩༥༨ ལོ་ནས་བཟུང་སེམས་ཅན་སྤྱི་མཐུན་གྱི་ལས་དབང་བཟློག་ཏུ་མ་བཏུབ་པར་བསྟན་འགྲོ་གཉིས་ཀར་ཆག་ཆེ་ཉམ་ང་བྱུང་སྐབས་སྐུ་དེ་ཡང་འཕྲིན་ལས་ཀྱི་མཇུག་རེ་ཞིག་བསྡུས་མོད། བསྟན་པ་ཡང་དར་སྐབས་གུང་རུ་མཁའ་འགྲོ་མའི་ཡང་སྲིད་དྲུག་པ་མཆོག་གིས་ལབ་སྒྲོན་གྱི་སྐུ་བཞིན་ལེགས་ཡ་མཚན་ཅན་དེ་ཉིད་སྐྱེ་རྒུའི་བསོད་ནམས་བསགས་པའི་ཞིང་སར་བཞེངས་ཡོད་དོ། །

ད་ནི་དཀྱུས་ལ་འཇུག་པར་བྱ་སྟེ། བྱང་ཆུབ་ཀྱི་སེམས་གོང་དུ་སྤེལ་ཕྱིར་མཁན་ཆེན་ངག་དབང་ཐུབ་བསྟན་རྒྱ་མཚོར་སེམས་བསྐྱེད་མཆོད་པ་ཞུས་ཏེ། དེ་རིང་ང་བྱང་ཆུབ་སེམས་དཔའ་ངེས་པར་ཡིན་ཞུས་པར། བླ་མས་ཁྱོད་བྱང་ཆུབ་སེམས་དཔའ་ལོས་ཡིན། ཁྱོད་དང་མཉམ་དུ་སེམས་བསྐྱེད་རྒྱུ་ཞིག་བྱུང་བ་ང་ཡང་སྐལ་བ་བཟང་གསུངས། རྗེ་ཞང་སྟོན་བསྟན་པ་རྒྱ་མཚོར་གཅོད་གདོན་ཚོགས་དགུ་མའི་ལུང་དང་། བདེ་མཆོག་ཡབ་ཡུམ་གྱི་རྐང་བརྒྱད། རིན་ཆེན་རྣམ་བཞིའི་སྔགས། ཡུམ་ཆེན་ཐུགས་སྲས་མའི་ལུང་དང་། གཞན་བཀའ་རྒྱ་མའི་སྐོར་ཁ་ཤས་གནང་བ་དང༌། ཧོར་སྐུ་ཕྲེང་བཞི་པ་བློ་བཟང་དགེ་ལེགས་རྒྱ་མཚོར་ཡང་རྗེ་ཤེས་རབ་རྒྱ་མཚོའི་གསུང་འབུམ་གྱི་ལུང་གནང་བར་མཛད། དགོན་པས་རྗེ་ཞང་སྟོན་པར་ལམ་ཁྲིད་ཞུས་པར། དེ་བཀའ་དྲིན་ཆེ། འདི་རྒྱུད་གྲྭ་ཡིན་པས་དབང་རེ་ཞུ་གིན་འདུག །ལམ་རིམ་གོ་མ་མྱོང་བས་སྐས་ཀྱི་རྟིང་པ་ནས་མི་འགྲོ་བར་མགོ་ནས་མར་བབས་པ་ཅི་ཡང་མ་རེད་གསུངས། ཉང་ཚང་སྤྲུལ་སྐུས་རྗེ་ཉིད་ལ་ཚེ་རབས་རྗེས་འཛིན་ཞུས་པར།

བསླུ་མེད་གཏན་གྱི་སྐྱབས་གནས་བླ་མ་དང་། །བརྩེ་ཆེན་ཐུགས་རྗེའི་གཏེར་ཆེན་ཝ་ར་ཧི། །

ཁྱོད་མིན་རེ་སའི་སྐྱབས་གཞན་མ་མཆིས་པས། །མཁའ་སྤྱོད་ཞིང་དུ་འཁྲིད་པར་མཛད་དུ་གསོལ། །

ཞེས་པ་གནང་བར་མཛད། བཀྲ་ཤིས་འཁྱིལ་གྱི་གྲྭ་པ་ཞིག་གིས་ཞུས་ངོར།

དཀོན་མཆོག་ཀུན་འདུས་བླ་མ་རྗེ་བཙུན་མ། །རིག་འཛིན་མཁའ་འགྲོ་ཀུན་འདུས་རྗེ་བཙུན་མ། །

དཔའ་མོ་ཐུགས་རྗེའི་གཏེར་ཆེན་རྗེ་བཙུན་མ། །དེང་ནས་བཟུང་སྟེ་བྱང་ཆུབ་སྙིང་པོའི་བར། །

ཨཱརྱ་ཏཱ་རེ་འགྲོ་བའི་སྐྱབས་གཅིག་མ། །ཁྱོད་མིན་རེ་སའི་སྐྱབས་གཞན་མ་མཆིས་པས། །

སྲིད་ཞིའི་འཇིགས་པ་ཀུན་ལས་བསྐྱབ་ཏུ་གསོལ། །ཚེ་དང་དཔལ་འབྱོར་ལེགས་ཚོགས་མ་ལུས་པ། །

ཡར་ངོའི་ཟླ་ལྟར་འཕེལ་བར་བྱིན་གྱིས་རློབས། །

ཞེས་པ་གཞན་ལ་མ་སྟོན་གསུངས་ནས་གནང༌། ཡང་བོ་ཆུང་སུ་རུག་གི་རུས་ཤིག་ཡིན་བན་དེ་ཟེར་བ་ཞིག་ལ་སེམས་ཁུག་ལ་ཁ་ཏོན་རེ་གྱིས་གསུངས་པར། ཁོས་ངའི་སེམས་ཁུག་འདུག་ཞུས་པས། ཁྱོད་སོང་ལ་ང་སེམས་ལ་ཨེ་འཆར་བལྟས་ནས་སྐྱབས་འགྲོ་བརྒྱ་ཐོན་ལ་ཡར་ཤོག་གསུངས་པ་ལྟར་བྱས་པས། ཁོ་ན་རེ། སེམས་མི་ཁུག །བླ་བྲང་མན་ཆད་ཟ་ལར་ཡན་ཆད་ལ་སོང་ནས་མི་ཐུབ་པར་འདུག་ཞུས་པར། འོ་འོ་དེ་ཡིན་ཁྱོད་ཀྱིས་སེམས་ཁུག་པ་མ་རེད། བསམ་ཤེས་པ་རེད། ཕྱིན་ཆད་ངའམ་བསོད་གྲགས་རིན་པོ་ཆེ་ལྟ་བུ་རེ་སེམས་ལ་ཨེ་ཤར་བལྟས་ནས་གསོལ་བ་རེ་ཐོབ། མང་བའི་ཁ་ན་མེད་གསུངས། བླ་བྲང་ལྷ་སྡེའི་མི་ཞིག་ངག་ལྐུགས་ནས་ཁ་ནས་སྒྲ་ཙམ་ཡང་མི་ཐོན་པ་ལ་སྐྱབས་མགོན་མཆོག་ནས་མཁའ་འགྲོ་མ་ཚང་གི་མདུན་དུ་སོང་གསུངས་པ་ལྟར་སླེབས་དུས་སྐུ་མཚམས་ལ་བཞུགས་འདུག་པས། མདུན་དུ་མ་ཆུད་ཀྱང་རྗེ་ཉིད་ཀྱི་དབུ་སྐྲ་དང་སྲུང་མདུད་བུམ་ཆུ་བཅས་གནང་། མཚན་མོ་ཁོ་རང་གི་རྨི་ལམ་དུ་ཕུ་རུང་ནང་ཤིག་གིས་གང་བ་མཐོང་བས་སྐྲག་ནས་སྐད་ཆེན་པོ་བཏོན་པས་ཟླ་བོ་སད་ནས་ཁྱོད་ཀྱིས་ཁ་གྲག་ཐུབ་པ་ཨེ་རེད་ཟེར། ཐུབ་པར་འདུག་བྱས་པས། མ་ཅིག་ལབ་ཀྱི་སྒྲོན་མ་ཞེས་གསོལ་བ་བཏབ་པས་དེ་ཕྱིན་ཆད་ནས་སངས་དྭངས་སུ་སོང་། རྒན་གྱའི་གླ་ནག་གི་བྱིས་མོ་ཞིག་ཀྱང་ངག་ལྐུགས་པས་རྗེ་འདིས་ལུས་སྦྱིན་དང་བུམ་ཆུ་གནང་སྟེ། དོ་ནུབ་གནས་ཁང་ནས་ཉོལ་གསུངས་པ་ལྟར་བྱས་པས་ཕྱི་ཉིན་ལེགས་པར་གྲོལ་འདུག །མཛེ་མོ་ཞིག་ལའང་ཕྱག་གཉིས་ཀས་མགོའི་གཡས་གཡོན་བསྐྱོར་ཏེ་མཚན་དང་གཟུངས་སྔགས་གསུངས་ཤིང་ཞལ་ཕུ་གནང་བ་སོགས་བརྩེ་བ་སྙིང་རྗེའི་གཞན་དབང་དུ་གྱུར་པའི་རྟགས་མང་ཡང་། རྗེ་ཉིད་ཀྱི་ཞལ་ནས། ངའི་ཁང་པ་འདི་གུང་ཐང་རིན་པོ་ཆེ་དང༌། སྡེ་པ་ཚང་། བསོད་གྲགས་ཚང་གང་རུང་ལ་ཕུལ་ནས་ང་རང་མཚམས་ཁང་དུ་བསྡད། ཕྱིན་ཆད་སྤྲུལ་སྐུ་སོགས་མེད་པ་བྱས་ན་ཞེས་རྗེ་ཤེས་རབ་རྒྱ་མཚོར་ཞུས་པར། དེ་མི་ཆོག་ཁྱོད་ཀྱི་རྗེས་ནས་མཁའ་འགྲོ་མ་ཟེར་བ་ཞིག་དགོས་པ་རེད། གནས་འདིའི་བདག་པོ་ཡིན་པས་ཅིས་ཀྱང་དགོས་པ་རེད་གསུངས། འོ་ན། དཔའ་བོ་ཞིག་ཡོང་ན་བཟང་རྒྱུ་རེད། གྲྭ་ས་རེ་ལ་བསྡད་ནའང་ཆོག །རྟེན་བཟང་བས་གང་བྱས་ཀྱང་ལེགས་པོ་ཡོང་རྒྱུ་རེད་དཔའ་མོ་མི་བཟང་། བྱིས་མོ་ཞིག་ཡོང་ན་སྐྱུག་བྲོ་བོ་བྱས་ཡོང་། དེ་འདྲའི་ཆེད་དུ་ཨ་ལགས་གླིང་ཚང་ལ་འདུལ་བའི་གླེང་འབུམ་མཉན་པ་ཡིན། ཡང་སྐུ་ན་ཕྲ་མོའི་དུས་སྡེ་ཁྲི་རིན་པོ་ཆེར་མཇལ་སྐབས་དགྱེས་པའི་ཉམས་ཀྱིས་རང་རེ་ཚོ་སྔར་ནས་འགྲོགས་ནས་ཡོང་བ་ཞིག་ཡིན། ད་དུང་ཡང་འགྲོགས་ནས་སོང་ན་ཆོག་གསུངས། ཅི་ཙམ་གྱི་བར་འགྲོགས་ཞུས་པར། ཟུང་འཇུག་འཐོབ་ཀྱི་བར་ཡིན་མོད་གསུངས། ཟུང་འཇུག་ནམ་འཐོབ་རྒྱུ་རེད་ཞུས་པར། འདི་འདྲ་བྱས་འགྲོ་གིན་བསྡད་ན་ནམ་ཞིག་འཐོབ་ལོས་ཡོང་གསུངས། སྐབས་ཤིག་ཞལ་ཤུལ་ངག་དབང་བསྟན་པའི་རྒྱ་མཚོར་ཕྱི་ལོ་ ༡༨༥༨-༡༩༡༧ ཁ་དར་ལྔ་འབྲེལ་ཞིག་བསྐུར་གནང་མཛད་ན་རྗེ་དེ་ཉིད་རྔ་ཡུལ་སྒོ་མང་གི་ཁྲིར་ལན་ལྔ་བཞུགས་པའི་ལུང་བསྟན་དུ་གསུངས་ཏེ། རྗེ་དེའི་གསང་རྣམ་ལས།

རྒྱལ་ཡུམ་ལབ་ཀྱི་སྒྲོན་མའི་སྤྲུལ་པའི་གར། །མ་ཅིག་གུང་རུ་ཡེ་ཤེས་མཁའ་འགྲོ་མས། །

གནས་ཆེན་ནཱ་ག་ར་ནས་ལྔ་ཕྲག་དར། །བསྐུར་བ་འབྱུང་འགྱུར་ལུང་བསྟན་ཡིན་ཞེས་གསུངས། །

ཞེས་གསུངས་པ་ལྟར་རོ། །རབ་བྱུང་བཅོ་ལྔ་པའི་ཆུ་རྟ་ཕྱི་ལོ་ ༡༨༨༢ ལོར་བཟང་པོ་སྐུ་ཕྲེང་དྲུག་པ་བློ་བཟང་བསྟན་པའི་ཉི་མར་སྒྲོལ་མ་དཀར་ལྗང་གི་ལུང་གནང་ཞིང་མཇལ་ཁ་སྩལ། སྐྱབས་རྗེ་ཨ་རོལ་རིན་པོ་ཆེ་བློ་བཟང་ལུང་རིགས་རྒྱ་མཚོ་ཕྱི་ལོ་ ༡༨༠༦-༡༨༨༦ མེ་ཁྱི་ལོར་སྐུ་སྙུང་བའི་ཚུལ་བསྟན་པར། ཁོང་གི་བུ་སློབ་བྱང་རྒྱུད་ཀྱི་རི་ཁྲོད་པ་ཐམས་ཅད་ཀྱིས་གུང་རུ་མཁའ་འགྲོ་མ་འདི་ཉིད་ལ་ལུང་བསྟན་ཞུས་པའི་ཚུལ་ནི། རྗེ་དེ་ཉིད་ཀྱི་རྣམ་ཐར་ཞྭ་དམར་པཎྜི་ཏས་ཕྱི་ལོ་ ༡༨༥༢-༡༩༡༡ མཛད་པ་ལས། ལུང་བསྟན་པ་ཡོད་རྒུས་བརྟག་པ་བྱེད་ཀྱིན་འདུག་རུང༌། གུང་རུ་མཁའ་འགྲོ་མའི་བརྟགས་ལན་དུ་རིམ་གྲོ་དང་སྨན་གྱིས་ཕན་ངོ་ཆེར་མེད། གཙོ་ཆེར་ཁོང་གི་ཕྱག་ན་ཡོད་པས་ཐམས་ཅད་ཀྱིས་དད་གདུང་དྲག་པོས་བརྟན་གསོལ་བྱས་ན་ཨེ་དགའ། ལོ་རྙིང་ལ་བདེ་བ་གལ་ཆེ་ཟེར་བ་བྱུང་བ་བློ་རྩེ་ཅན་གྱི་གཏམ་དུ་སྣང་ཞེས་དང་། ཨ་རོལ་རིན་པོ་ཆེ་ཁོང་གིས་ཀྱང་། ཞྭ་དམར་ཚང་ལ་གུང་རུ་མཁའ་འགྲོ་མས་ལོ་གསར་རྙིང་མཚམས་ལ་རྩུབ་ཟེར་ཏེ་བདེན་པ་འདྲ་གསུངས་པ་ལྟར། ལོ་དེའི་ཟླ་བཅུ་གཉིས་པའི་ཚེས་པ་དགུར་ཁོང་ཞི་བར་གཤེགས་སྣང་ངོ་། །

མེ་ཕག་ཕྱི་ལོ་ ༡༨༨༧ ལོར་ཞྭ་དམར་ཚང་གིས་མཁའ་འགྲོ་མ་འདི་ཉིད་ལ་གཏན་བཞུགས་གནང་ས་གང་ལེགས་ཞུས་པར། མཚེར་མོ་ཆེ་བཟང་བར་བཀའ་གནང་ཞིང་། རབ་ཚེས་ས་བྱི་ཕྱི་ལོ་ ༡༨༨༨ ལོར་གཙང་མིག་དམར་དགེ་བཤེས་འཇམ་དབྱངས་དོན་གྲུབ་ཚང་ལ་རེབ་གོང་དར་ཞིང་དུ་བཅད་རྒྱར་བཞུགས་དགོས་པའི་ལུང་བསྟན་སྩལ། ས་གླང་ཕྱི་ལོ་ ༡༨༨༩ ལོར་གྲུབ་དབང་འཇིགས་མེད་བསམ་གཏན་ཚང་བྱོན་ནས་རྗེ་འདི་ཉིད་དང་མཇལ་འཛོམས་གནང་ཞིང༌། ཕན་ཚུན་གུས་ཉམས་དང་ཉིན་ཞག་དུ་མར་ཐུན་མོང་དང་ཐུན་མིན་གྱི་ཆོས་ལྡན་གྱི་གསུང་གླེང་ཤིན་ཏུ་འཕེལ་ཏེ། གྲུབ་དབང་གིས་རྗེ་འདི་ཉིད་ལ་ཆོས་འབྲེལ་ཞུས། འདི་ལོར་ཞྭ་དམར་རིན་པོ་ཆེ་བྲག་དཀར་འདིར་བྱོན་ནས་མཁའ་འགྲོ་མ་འདི་པར་མཇལ་འཕྲད་གནང་ཚུལ་གསལ། རབ་ཚེས་ལྕགས་སྟག་ཕྱི་ལོ་ ༡༨༩༠ ལོར་རོང་པོའི་ཁྲི་རྒན་འཇམ་དབྱངས་ཐུབ་བསྟན་རྒྱ་མཚོ་མཁའ་འགྲོ་མ་འདི་པའི་གསུང་བཀོད་ལྟར་རེབ་གོང་ལྕང་སྐྱར་འཇིགས་བྱེད་གཞི་བསྙེན་ཆེན་མོར་བཞུགས། ཡང་མེ་ཁྱི་ཕྱི་ལོ་ ༡༨༨༦ ལོར་ཚ་གན་ནོ་མོན་ཧན་ནམ་ཆས་པུ་གཤིས་བླ་མ་དཀར་པོ་བྱམས་པ་མཐུ་སྟོབས་ཀུན་དགའ་རྒྱལ་མཚན་ཕྱི་ལོ་ ༡༨༣༥-༡༨༩༥ གྱིས་ཅོ་ནེ་ཆོས་དཔལ་ཞིང་བཀྲ་ཤིས་ཆོས་འཁོར་གླིང་གསར་འདེབས་ལ་ལུང་བསྟན་ཞུས་པས། གདུགས་དཀར་བཟློག་ཆེན། གཏོ་ནག་དགྲ་ཟོར། སྲི་ཟློག །ཐ་འོག་གཏོར་ཟློག་སོགས་བསྒྲུབ་དགོས་པའི་གསུང་ལན་སྩལ་པ་སོགས་འདི་དག་གིས་སྐབས་དེའི་བླ་ཆེན་དག་གིས་མཁའ་འགྲོ་མ་འདི་པར་ཡིད་ཆེས་དད་གུས་ཇི་ལྟར་བྱེད་པ་ཅུང་ཟད་མཚོན་ཐུབ་བོ། །འདི་དག་འཕྲོས་དོན་ནོ། །

རབ་བྱུང་བཅོ་ལྔ་པའི་ལྕགས་སྟག་ཕྱི་ལོ་ ༡༨༩༠ ལོའི་དགུན་མཚམས་ནས་སྐུ་སྙུང་ཚུལ་བསྟན་ཞིང༌། ལྕགས་ཡོས་ཕྱི་ལོ་ ༡༨༩༡ ལོའི་ཟླ་དང་པོའི་ཉེར་ལྔའི་ཉིན་དགོན་པའི་གྲྭ་དམངས་དང་ཕྱོགས་ཀྱི་དད་ལྡན་རྣམས་ལ་མཇལ་ཁ་གནང་། ཟླ་གཉིས་པའི་ནང་རྗེ་ཞང་སྟོན་པ་ཕེབས་པར་མི་གཉིས་ཀྱིས་བསྟེན་ནས་གཟིམ་ཁང་ར་སྐོར་དུ་བསུ་བར་ཕེབས། ཁྱབ་བདག་ཞང་སྟོན་པས་གདུང་ཤུགས་དྲག་པོས་བརྟན་བཞུགས་ཕུལ་ཀྱང་ཞལ་བཞེས་མ་ཐོབ། ཐུའུ་བཀྭན་རིན་པོ་ཆེར་དབུལ་བ་འགའ་བསྐུར་ཏེ་ཁྱོད་ཀྱིས་ངའི་གོ་ཆོད་པའི་སྐྱབས་འཇུག་ནན་ཏན་ཞུས་གསུངས། ཁྱབ་བདག་ཞང་སྟོན་པར་གནད་ཆེ་བའི་གསང་ལུང་འགའ་ཞིག་གནང་། ཟླ་བ་གསུམ་པའི་ནང་མཚན་སྒྲོག་མཁན་པོ་ཕེབས་ཏེ་རྗེ་ཡབ་སྲས་གསུམ་གྱི་བཟོས་གྲུབ་ཅིག་ཕུལ་བར་རྟེན་འབྲེལ་ལེགས་ཞེས་ཤིན་ཏུ་མཉེས་ཚོར་གནང་། སྐུ་འཁོར་རྣམས་ལའང་རྗེས་མ་ང་འདྲ་བ་ཞིག་མི་འོང་བའི་ཐབས་མི་འདུག་སྨོན་ལམ་ཞིག་གི་སྟབས་རེད། ཆུང་དུས་གྲོང་ཆོག་ལ་གཏན་ནས་མ་ཁྱེར། ངས་ཆོས་སྐྱོང་ལ་གཏད་གཉེར་ཡང་བྱས་ཡོད་གསུངས་པ་དང་། ཡང་སྐུ་གདུང་གནས་རིའི་ངོས་དེར་ཁོང་གི་མ་ཡུམ་བཞག་ཤུལ་དེར་བཞག་ནས་བྱ་ལ་བྱིན་ན་བཟང༌། རུས་པ་རྣམས་བླངས་ནས་བྲག་ངོས་ཀྱི་མི་མི་ཐར་བ་ཞིག་ཏུ་སྐྱོལ། རུས་དུམ་ཅུང་ཟད་ཀྱང་བླང་མི་ཆོག །གདུང་མཇལ་སོགས་ཀྱང་མི་དགོས། འཁྱེར་དུས་གནས་ཁང་ཕྱོགས་ཀྱི་སྒོ་ནས་ཁྱེར། མཛོ་ལ་བཀལ་ན་ཆོག །འ་འུར་མང་པོ་བྱེད་ཀྱིན་མ་འདུག་གསུངས་ཀྱང་། བསོད་གྲགས་རིན་པོ་ཆེས་ནན་ཞུས་ངོར་དབུ་ཐོད་བླངས་ཆོག་པ་དང༌། གདུང་མཇལ་ཡང་བྱེད་རྒྱུ་གནང་། གསུམ་པའི་ཉི་ཤུའི་ནངས་སྔ་བར་ཇ་དཀར་པོ་ཞིག་ཁྱེར་ཤོག་མཐའ་མ་རེད་མོད་གསུངས། སྡེ་པ་ཚང་གི་ཡི་གེ་ཞིག་ཁྱེར་འོངས་པ་དེ་སུས་ཁྱེར་ཡོང་བ་རེད་གསུངས་པར། དེ་འདྲ་མ་འོངས་ཞུས་པས་ལོས་ཡོང་སྒོ་ལ་བུད་ནས་བཏོན་པ་ཡིན་གསུངས་པར། ཁོང་གིས་མཚན་ལམ་རྨིས་པ་ཡིན་འགྲོ། སུ་ཡང་མ་ཡོང་ཞུས་པར་ཅང་མ་གསུངས། དེ་ནས་གནས་ཁང་ཕྱོགས་ལ་ཞལ་བསྟན་ནས་བཞུགས་ཏེ་ཕྱག་དཔྲལ་བར་ཐལ་མོ་སྦྱར་ནས་བཞུགས་པ་རིམ་གྱིས་མདུན་དུ་བསྒུར་ཏེ་ཧིག་མཐོན་པོ་གནང་ནས་འོད་གསལ་ནང་གི་མཁའ་སྤྱོད་མངོན་དུ་བྱས་སོ། །

ཀྲུང་གོའི་བོད་བརྒྱུད་ནང་དགོན་དཀར་ཆག་ལས་ཀན་སུའུ་གླེགས་བམ་བྱ་བར་རབ་བྱུང་བཅོ་ལྔ་པའི་ལྕགས་ཡོས་ཕྱི་ལོ་ ༡༨༢༡ ལོར་སྐུའི་མེ་ཏོག་འཐོར་རོ། །ཞེས་པའི་ཕྱི་ལོ་འབྲི་ཚུལ་ནོར་ཡོད་དོ། །ཁོང་གི་གསུང་བཀོད་ལྟར་བསོད་གྲགས་ཚང་གི་སྐུ་གཟན་བཀབ་སྟེ་ཞག་གསུམ་གྱི་བར་དུ་གཞན་ལ་གསང༌། དེ་ནས་སྐུ་གདུང་ལྷ་ཁང་དུ་སྤྱན་དྲངས་སྐབས་ཕྱག་གཉིས་འཁྱུད་རྒྱ་མཛད་ཅིང་ཤངས་བུག་ནས་བྱང་སེམས་དམར་པོ་བབས་པ་སོགས་ཐུགས་དམ་གྱི་རྟགས་ཁྱད་པར་ཅན་བྱུང་། ཀུན་མཁྱེན་སྐུ་ཕྲེང་བཞི་པ་མཆོག་དང་བསྟན་འགྲོའི་དཔལ་མགོན་ཤར་ཚང་རྣམ་གཉིས་གདན་ཞུ་ཞུས་ཏེ་གདུང་མཆོད་རིམ་པ་རྒྱས་པར་བསྟར། ཀུན་མཁྱེན་མཆོག་ལ་སྤྲུལ་སྐུ་ཨེ་འབྱོན་ཞུས་པར་བཀྲ་ཤིས་འཁྱིལ་གྱི་བྱང་ཕྱོགས་འདི་ནས་མ་ཅིག་ལབ་ཀྱི་སྒྲོན་མ་བཞུགས་འདུག་དགོས་པ་རེད་། གནས་འདིའི་བདག་པོ་ཡིན་པས་སྤྲུལ་སྐུ་ལོས་ཕེབས། ཁ་མགོ་མ་ཐུག་ན་བཟང་གསུངས་སོ། །ཞལ་སློབ་གོང་གསལ་དེ་དག་དང་བིས་མདོའི་ཁྲི་ཟུར་སྒར་པ་ཐུབ་བསྟན་སེང་གེ་སོགས་ཤིན་ཏུ་མང་ངོ་། །

 

༈ གུང་རུ་སྐུ་ཕྲེང་ལྔ་པ་དཀོན་མཆོག་བསྟན་པའི་དབང་མོའི་མཛད་རྣམ།

 

༸གུང་རུ་སྐུ་ཕྲེང་ལྔ་པ་དཀོན་མཆོག་བསྟན་པའི་དབང་མོ་ནི་རབ་བྱུང་བཅོ་ལྔ་པའི་ཆུ་འབྲུག་ཕྱི་ལོ་ ༡༨༩༢ ལོར་རྡོ་སྦིས་ལྕང་ཤར་དུ་ཡབ་དོན་གྲུབ་དང་། ཡུམ་མཁའ་འགྲོའི་སྲས་སུ་ཐང་རིང་སྤྲུལ་སྐུ་དང་སྟག་ལུང་སྤྲུལ་སྐུ་རྣམ་གཉིས་དང་སྐུ་མཆེད་དུ་འཁྲུངས། ཡུམ་གྱི་མཚན་དེ་ལྕང་ཤར་དགོན་པའི་ལོ་རྒྱུས་སུ་གོང་ལྟར་ཡོད་ཀྱང་། ཀྲུང་གོའི་བོད་བརྒྱུད་ནང་དགོན་དཀར་ཆག་ལས་ཀན་སུའུ་གླེགས་བམ་བྱ་བར་ཡུམ་མཁར་མོ་སྐྱིད་ཅེས་འབྱུང་བ་དཔྱད་གཞི་ཆུ་སྦྲུལ་ཕྱི་ལོ་ ༡༨༩༣ ལོར་གྲུབ་དབང་འཇིགས་མེད་བསམ་གཏན་ཚང་དགུང་ལོ་བརྒྱད་ཅུའི་སྟེང་རྡོ་སྦིས་སུ་ཕེབས་སྐབས་མཇལ་བའི་ཁྲོད་དུ་རྗེ་འདིའི་མ་ཡུམ་གྱིས་རྗེ་འདི་ཉིད་པང་དུ་བསྣམས་ཡོད་པ་ལ་རྩེ་གཟིགས་ཀྱིས་བྱིན་རླབས་མཛད་དེ་འདི་གུང་རུ་ཚང་གི་སྤྲུལ་སྐུ་རེད་ཅེས་པ་མིན་མོད། གང་ལྟར་ཡང་བསོད་གྲགས་ཚང་སྨད་ནས་ཕེབས་ཀྱི་བར་མནོལ་གྲིབ་ལ་འཛེམ་ཞིང་ཚེ་དབང་རེ་བསྐུར་གསུངས་ཏེ། རྗེ་འདི་ཉིད་དོན་གྱིས་ངོས་འཛིན་གནང་། ཤིང་ལུག་ཕྱི་ལོ་ ༡༨༩༥ ལོའི་ཟླ་གསུམ་པའི་ཚེས་བཅོ་ལྔའི་ཉིན་ཀུན་མཁྱེན་བཞི་པ་མཆོག་གིས་གུང་རུ་ཚང་གི་ཡང་སྲིད་དུ་ཐག་བཅད། ལོ་དེར་ཁྱབ་བདག་ཞང་སྟོན་པའི་དྲུང་ནས་སྐྱབས་འགྲོ། དགའ་ལྷ། ལམ་རིམ་བསྡུས་དོན། རྐང་བརྒྱད། སྒྲོལ་དཀར་སྙིང་པོ། ཚེ་དབང་། མཚན་བརྗོད། ཚེ་མདོ་སོགས་གསན་ཞིང་མཚན་ལ་དཀོན་མཆོག་བསྟན་པའི་དབང་མོ་ཞེས་གསོལ། སྐུ་གོང་མའི་ཚ་བོ་དུས་འཁོར་གསུང་རབ་ཡོངས་འཛིན་དུ་བསྟེན། རབ་ཚེས་ས་ཕག་ཕྱི་ལོ་ ༡༨༩༩ ལོའི་ཟླ་བ་གསུམ་པར་རོང་པོའི་ཁྲི་རྒན་འཇམ་དབྱངས་ཐུབ་བསྟན་རྒྱ་མཚོ་འཁོར་བཅས་རྗེ་འདི་ལ་མཇལ་ཕྲད་དུ་བྱོན། རབ་བྱུང་བཅོ་ལྔ་པའི་ལྕགས་བྱི་ཕྱི་ལོ་ ༡༩༠༠ ལོར་བཟང་པོའི་ཡང་སྲིད་དྲུག་པས་མཇལ་ཁ་ཞུས། གོང་མའི་ཞལ་ཆེམས་ལྟར་དགུང་གྲངས་ཉི་ཤུའི་བར་གྲོང་ཆོག་ལ་མ་ཕེབས། ཆུ་ཡོས་ཕྱི་ལོ་ ༡༩༠༣ ལོར་ཀིརྟི་བློ་བཟང་འཕྲིན་ལས་དང་མཇལ་ཕྲད་གནང་། ཆུ་གླང་ཕྱི་ལོ་ ༡༩༡༣ ལོར་གཏེར་སྟོན་བསོད་རྒྱལ་དང་མཇལ་ཕྲད་མཛད་ཚུལ་ཁ་གྱའི་གཏེར་སྟོན་གྱི་རྣམ་ཐར་ལས། རྒན་གྱའི་རི་ངན་དུ་ཞག་མལ་གྱི་ཉམས་སྣང་ལ་རེབ་གོང་ཤེལ་དགོན་དང་། རྒན་གྱའི་བྲག་དཀར། གནམ་ལྷའི་གཏེར་ལུང་སོགས་ཀྱི་གནས་གཏེར་དང་གཏེར་སྟོན་རིམ་བྱོན་གྱི་གསལ་སྣང་ཞིག་བྱུང༌། ནངས་པར་གུང་རུ་མཁའ་འགྲོ་མ་གནས་ཁང་དུ་སྐྱོ་བསང་མཛད་པའི་སྐུ་དྲུང་དུ་སྒྲོམ་ཆེན་མོ་སྤྱན་དྲངས་ཏེ་ཕྱིན་སྐབས་སྔོན་བསུ་དང༌། རས་གུར་ནང་དུ་འབོལ་གདན་བཞག་སྟེ་བསྙེན་བཀུར་ཡང་དག་པ་བྱས། སྒྲོམ་གཏེར་ཆེན་མོར་མཇལ་འདུན་གསུང་ཡང་རྒྱ་མ་ཁྲོལ་བས་སྒམ་དང་བཅས་དབུ་ཐོག་ཏུ་བྱིན་རླབས་ཞུས། ཞག་མལ་ནན་ཆེན་ཞུས་རུང་ཁ་གྱའི་གཏེར་སྟོན་གྱི་དྲུང་དུ་བདུན་པའི་ཚེས་གསུམ་ཉིན་ཅིས་ཀྱང་ཐོན་དགོས་ཚུལ་དགོངས་བསྟུན་ཕུལ། ཞེས་སོ། །

ཡང་འདི་ལོའི་ཟླ་དགུ་པའི་བཅུ་གཅིག་ཉིན་ཡོངས་འཛིན་གསུང་རབ་ཀྱིས་ཞུས་པ་བཞིན་ཀུན་མཁྱེན་བཞི་པ་མཆོག་གིས་གུང་རུ་ཚང་གི་ཞབས་བརྟན་གསོལ་འདེབས་མཛད། འཇིགས་བྱེད་གཞི་བསྙེན་དང་ཆུ་མིག་བརྒྱ་རྩ་འགྲིམས། ས་བྱ་ཕྱི་ལོ་ ༡༩༠༩ ལོར་སྐུ་སྙུང་ཚབས་ཆེན་བཞེས་ཚུལ་བསྟན་པར་ཀུན་མཁྱེན་བཞི་པ་མཆོག་གིས་ཞབས་པད་བརྟན་དགོས་པའི་བཀའ་ལྕི་བ་སྩལ་པས་དྭངས་ཚུལ་མཛད། ཚོམས་ཆེན་སུམ་ཐོག་བཞེངས་ཤིང་། གཟིམ་ཁང་རྒྱ་བསྐྱེད། ཀུན་མཁྱེན་སྐུ་ཕྲེང་བཞི་པ་དང་ཐུགས་ནང་ཤིན་ཏུ་ཉེ་ཞིང་། ཀུན་མཁྱེན་མཆོག་གིས་ཀྱང་ཆུ་གླང་ཕྱི་ལོ་ ༡༩༡༣ ལོའི་ཟླ་ ༡༠ ཚེས་ ༩ ལ་གུང་རུའི་ནང་ཆེན་དུ་ཆེད་དུ་ཕེབས་ནས་མཁའ་འགྲོ་མ་འདི་པར་མཇལ་ཕྲད་གནང་ཞིང་སྐྱབས་མགོན་མཆོག་གིས་རང་གི་སྤྱན་བསྙུན་པའི་དོན་ལ་ཐུགས་དམ་བརྟག་བཅུག་པ་སོགས་ཐུགས་ཀྱི་གཏད་ས་ལྟ་བུ་མཛད་དོ། །

ཀུན་མཁྱེན་མཆོག་དང་བདེ་མཆོག་ཚོགས་འཁོར་ལྷན་ཅིག་མཛད་པ་དང༌། ཐེངས་གཅིག་སྐྱབས་མགོན་མཆོག་རང་གི་གཟིམ་ཁང་དུ་གདན་དྲངས་ནས་དངུལ་སྲང་ལྔ་བཅུའི་དབུལ་བ་བཏེགས་པ་སོགས་སྐྱབས་མགོན་རང་རྣམ་དུ་གསལ། བཟང་པོ་མཆོག་སྤྲུལ་བློ་བཟང་བསྟན་པའི་ཉི་མ་དང་ ༡༨༧༡-༡༩༣༡། དཔའ་རིས་པ་འཇིགས་མེད་རབ་གསལ་རྒྱ་མཚོ་ ༡༨༨༠-༡༩༥༦ སོགས་སློབ་མར་འདུས། མེ་འབྲུག་ཕྱི་ལོ་ ༡༩༡༦ སོག་པོའི་རྒྱལ་པོ་ཝང་དཔལ་འབྱོར་རབ་བརྟན་སྐུ་གཤེགས་རྗེས་དཔོན་མོ་ཀླུ་སྨན་ཚང་གིས་སྲས་ཀུན་དགའ་དཔལ་འབྱོར་སོགས་སྐུ་འཁོར་ཉུང་ཤས་བཅས་འདིར་འོངས་ནས་རེ་ཞིག་བར་རྗེ་ཉིད་ལ་སྐྱབས་བཅོལ་ཏེ་ (བཙུན་མོ་འདི་དང་བླ་བྲང་ཕྱག་མཛོད་བརྩོན་འགྲུས་གཉིས་ཀྱི་གླེང་བརྗོད་ལ་བརྟེན་ནས་དཔོན་ཚང་གཉེར་པ་བཟོད་པ་ཆོས་ནམ་མཁའ་དང་མགྲོན་གཉེར་མཁྱེན་རབ་སོགས་ཚོགས་འདུས་འཛིན་བཟུང་བྱས་པའི་རྒྱུ་མཚན་གྱིས་ཡིན་ནམ་བརྟག་) འདུག་དགོས་བྱུང༌། དེའི་དྲིན་གཟོ་ལྟ་བུར་རྗེས་སུ་ཀུན་དགའ་དཔལ་འབྱོར་དགུང་ལོ་བཅུའི་སྐབས་རྗེ་ཉིད་སོག་པོར་གདན་ཞུ་གནང་སྟེ་ཝང་ཧོ་ཞོན་བཞིར་ཁྱིམ་ཞུ་དང་བང་ངའི་ལ་བཙས་གཞི་རྟོད་བྱས་ཚུལ་རྨ་ལྷོ་སོག་རྫོང་གི་རིག་གནས་ལོ་རྒྱུས་དཔྱད་ཡིག་དེབ་དང་པོའི་ཤོག་ངོས་ ༡༤༧ དུ་གསལ། ལྕགས་སྤྲེལ་ཕྱི་ལོ་ ༡༩༢༠ ལོར་ཀུན་མཁྱེན་ལྔ་པ་ཆེན་མོ་གདན་སར་འཁོད་པར་གྲྭ་ཚང་དང་ལྷན་དུ་བསུས། ལྕགས་བྱ་ཕྱི་ལོ་ ༡༩༢༡ ལོའི་ཟླ་བ་གཉིས་པའི་ཉེར་གཉིས་ཉིན་སྐྱབས་མགོན་ལ་སྒེར་མཇལ་ཞུས། ཟླ་ ༥ ཚེས་ ༡༨ ལ་ཡང་༸གོང་སར་མཇལ་ཁ་ཞུས། ལྕགས་སྤྲེལ་ཕྱི་ལོ་ ༡༩༢༠ ལོར་རྗེ་གུང་ཐང་བློ་གྲོས་རིན་པོ་ཆེ་བྲག་དཀར་དུ་ཕེབས་སྐབས་སོགས་སུ་ཆོས་རྒྱུན་མང་དུ་ཞུས། གཉན་ཁྲོད་ཚད་ལྡན་འགྲིམ་གནང་མཛད། བྱང་མཇལ་དང་ལང་གྲུ་སྡེ་བཞི་སོགས་ལ་གནས་མཇལ་དུ་ཕེབས་ཤིང་། རབ་ཚེས་ཤིང་བྱི་ཕྱི་ལོ་ ༡༩༢༤ ལོའི་ཟླ་ ༦ ཚེས་ ༢༨ ཉིན་ལོར་ལན་གྲུ་རུ་པཎ་ཆེན་དགུ་པ་ཆེན་མོར་བརྟན་གསོལ་འདེགས་འབུལ་ཞུས་ཏེ་གསོལ་འདེབས་ཀུན་བཟང་མཆོད་སྤྲིན། བདེ་སྨོན། ཤམ་སྨོན་བཅས་ཀྱི་ལུང་ཞུ་གནང་མཛད། རབ་བྱུང་བཅུ་དྲུག་པའི་ས་སྦྲུལ་ཕྱི་ལོ་ ༡༩༢༩ ལོའི་ཟླ་ལྔ་པའི་ཚེས་ཉེར་གཉིས་ཉིན་ཀུན་མཁྱེན་མཆོག་ལ་རང་གི་ནང་ཆེན་དུ་དགའ་ལྡན་ལྷ་བརྒྱ་མ་འདོད་གསོལ་བཅས་དང༌། སྒྲོལ་དཀར་བསྟོད་པ། བདེ་མཆོག་རྐང་བརྒྱད་བཅས་ཀྱི་ལུང་ཞུས། དེ་ལྟར་བསྟན་འགྲོའི་དོན་རྒྱ་ཆེར་མཛད་མཐར་རབ་རྒྱལ་ཆུ་བྱ་ཕྱི་ལོ་ ༡༩༣༣ ལོའི་ཟླ་གཉིས་པའི་ཚེས་བཅུ་དྲུག་ལ་ཞི་བར་གཤེགས་སོ། །

ལོ་རྒྱུས་ཁ་ཤས་སུ་ཤིང་ཁྱི་ཕྱི་ལོ་ ༡༩༣༤ ལོར་འདས་པར་བཤད་འདུག་ཀྱང་བདག་གིས་བཀོད་པ་འདི་བརྟག་བཟོད་ཀྱི་ངག་རྒྱུན་ཁུངས་དག་ཅིག་ལ་བརྟེན་པ་ཡིན་པས་ཞིབ་མོར་དཔྱོད་ཅིག་དེའི་སྤྲུལ་སྐུ་ཞིག་ཐེ་བུ་རུ་འཁྲུངས་པ་མཚན་ཐོ་ཁ་འབྱེད་པར་བསོད་གྲགས་ཚང་བྱོན་ནས་ཁ་ཕྱེ་སྐབས་འོས་ཐོ་སྐུ་ཡལ་ནས་ཟླ་ཁ་ཤས་སོང་འདུག་ཅིང་། གདན་སར་མ་བཀོད་པས་འདི་སྐུ་ཕྲེང་གི་གྲས་སུ་བརྩི་སྲོལ་མེད་དེ། དཔེར་ན། ཀུན་མཁྱེན་འཇམ་དབྱངས་བཞད་པའི་སྤྲུལ་སྐུ་ཐུ་མེད་ཧོ་ལོ་ཆིའི་སྲས་སུ་འཁྲུངས་པ་དགུང་ལོ་ལྔའི་དུས་གཤེགས་པར་ལོ་རྒྱུས་སུ་འབྱུང་བ་ལྟར་ཡིན་མོད། གདན་སར་མ་བཀོད་པས་ཡོངས་གྲགས་ལ་སྐུ་ཕྲེང་གི་གྲས་སུ་བརྩི་སྲོལ་མེད་པ་བཞིན་ནོ། །

 

༈ གུང་རུ་སྐུ་ཕྲེང་དྲུག་པ་སྐལ་བཟང་དམ་ཆོས་སྒྲོན་མའི་མཛད་རྣམ།

 

༸གུང་རུ་སྐུ་ཕྲེང་དྲུག་པ་སྐལ་བཟང་དམ་ཆོས་སྒྲོན་མ་མཆོག་ནི་རབ་བྱུང་བཅུ་དྲུག་པའི་མེ་བྱི་ཕྱི་ལོ་ ༡༩༣༦ ལོར་རེབ་གོང་རྒྱལ་པོར་ཡབ་མཁར་རྩེ་དང་ཡུམ་ཀླུ་མོ་ཐར་གྱི་སྲས་སུ་སྐུ་འཁྲུངས། དགུང་ལོ་བདུན་གྱི་སྟེང་གདན་སར་བཀོད། ཆུ་རྟ་ཕྱི་ལོ་ ༡༩༤༢ ལོའི་ཟླ་གཉིས་པའི་ཚེས་བཅོ་ལྔར་རྗེ་འཇིགས་མེད་འཕྲིན་ལས་རྒྱ་མཚོའི་མདུན་དུ་དགེ་བསྙེན་བསྒྲུབས་ཤིང་མཚན་ལ་སྐལ་བཟང་དམ་ཆོས་སྒྲོན་མ་ཞེས་གསོལ་ཞིང་། འདི་ཉིན་སྐྱབས་མགོན་ལྔ་པ་མཆོག་ལ་གསར་མཇལ་ཞུས། བྲག་དཀར་དགེ་སློང་འཕྲིན་ལས་རྒྱ་མཚོས་ཞུས་ངོར་རྗེ་བླ་ཁོ་ཚང་གིས་ཞབས་བརྟན་གསོལ་འདེབས་ཀྱང་བརྩམས་གནང་མཛད། མེ་ཁྱི་ཕྱི་ལོ་ ༡༩༤༦ ལོའི་ཟླ་དང་པོར་རྗེ་བླ་ཁོ་རིན་པོ་ཆེར་སེང་གདོང་མའི་རྗེས་གནང་ཆེད་དུ་ཞུས། རྗེ་འདིའི་དྲུང་ནས་དབང་ལུང་མན་ངག་མང་དུ་གསན། གཞན་ཡང་དགེ་བའི་བཤེས་གཉེན་རྒྱུད་སྨད་པའི་ས་དམར་དཔལ་བཟང་ཚང་འདི་པ་ཕྱི་ལོ་ ༡༩༤༣ ཙམ་ལ་ཁོང་བླ་ཁོ་རྡོ་རྗེ་འཆང་གིས་ཁ་གྱའི་སྒར་རྙིང་དུ་དགེ་རྒན་དུ་མངགས་གནང་མཛད་ཅིང་འགྱིང་རྒན་སྐུ་ཕྲེང་ལྔ་པ་འཇམ་དབྱངས་བསྟན་པའི་རྒྱལ་མཚན་གྱི་ཡོངས་འཛིན་དང་རང་དགོན་འདིའི་བླ་མ་དབུ་མཛད་ཀྱང་མཛད་མྱོང་དང་སྔགས་རམས་པ་མཁྱེན་རབ་འདི་བ་སོག་པོ་གཡུ་སྒང་ཉིན་གྲོང་རྡལ་གྱི་རྡོ་གཏེར་རུ་ཁག་གི་དྲུང་ཡིག་ཚོ་བའི་ཚེ་ཇ་ཚང་དུ་འཁྲུངས། བླ་བྲང་བཀྲ་ཤིས་འཁྱིལ་དུ་རིག་པའི་གནས་ཀུན་ལ་སྦྱངས་པས་མཁས་པར་གྱུར། ཀུན་མཁྱེན་བླ་མའི་བླ་སྨན་དུའང་བཞུགས་མྱོང་། རྩིས་རམས་པ་བསམ་འགྲུབ་རྒྱ་མཚོས་འདི་པའི་དྲུང་དུ་འབྱུང་རྩིས་གསན་མྱོང་བས་དེ་དང་གུང་ཐང་དྲུང་ཡིག་ངག་དབང་དང་སོག་པོ་དྲུང་ཡིག་སྡེ་པའི་སྨན་པ་རབ་རྒྱས་དང་། སངས་རྒྱས་སོགས་སློབ་བུ་བྱས་རྗེས་ཅན་མང་པོ་བསྐྱངས་རྒྱ་མཚོའི་མཚན་ཅན་སོགས་བསྟེན་ནས་གསན་སྦྱང་མང་དུ་གནང༌། ཆུ་མིག་བརྒྱ་རྩ་ལན་ལྔ་འགྲིམས་ཞེས་དྲུང་ཡིག་ངག་དབང་གིས་བསྒྲིགས་པའི་རྗེ་འདིའི་རྣམ་ཐར་ས་བོན་ཞིག་ཏུ་འཁོད་འདུག་ཅིང་། ལབ་སྒྲོན་མདུན་དུ་ཁྲོས་མའི་བདག་འཇུག་གསུང་བའི་སྲོལ་བཙུགས་པ་ད་ལྟའང་གནས། ཁོང་གི་བླ་སྨན་སོག་པོའི་སྨན་པ་ཡོ་ནེ་ཡིན་ཞེས་སོག་རྫོང་གི་ལོ་རྒྱུས་སུ་མཆིས། བྲག་དཀར་འདུ་ཁང་དང་རང་གི་བླ་བྲང་སོགས་ལ་ཞིག་གསོས་མཛད། ལྷག་ལྷ་མང་པོར་བསྙེན་པ་གནང་། སྔར་བླ་ཁོ་རྡོ་རྗེ་འཆང་རྗེ་འཇིགས་མེད་འཕྲིན་ལས་རྒྱ་མཚོར་སྐུ་འབུམ་གྱི་བླ་མ་འགས་ཆུ་མིག་འགྲིམ་ཚུལ་གྱི་སྐོར་ཞུས་པར། ཞལ་ནས། ངེད་ཀྱིས་གུང་རུ་མཁའ་འགྲོ་མའི་སྤྲུལ་སྐུ་སྐལ་བཟང་དམ་ཆོས་སྒྲོན་མ་ལ་ཆུ་མིག་བརྒྱ་རྩ་འགྲིམ་ཚུལ་གྱི་གཅོད་ཀྱི་ཕྱག་ལེན། འདོན་རྟ་དབྱངས་གར་འགྲོས་བཅས་ཞིབ་ཁྲིད་ཆིག་སྐྱ་ཐུབ་པ་བསླབས་ཡོད་པས། ཁོང་མོའི་མདུན་ནས་སློབས་ཤིག་ཅེས་གསུངས་པ་ལྟར། ལྕགས་ཡོས་ཕྱི་ལོ་ ༡༩༥༡ ལོར་ལ་མོའི་ཡོངས་འཛིན་བློ་བཟང་མཁས་གྲུབ་རྒྱ་མཚོས་བཀྲ་ཤིས་འཁྱིལ་གྱི་དགེ་བཤེས་ཐར་ཤུལ་བ་བྱམས་པ་འཕྲིན་ལས་ཚང་མཁའ་འགྲོ་མ་འདི་ཉིད་ཀྱི་མདུན་དུ་མངགས་པ་བཞིན། གཅོད་ཀྱི་ཕྱག་ལེན་ཐམས་ཅད་ཞིབ་པར་སྩལ་ཏེ་དགེ་བཤེས་པ་སླར་ཐར་ཤུལ་རྣམ་དག་ཁྲིམས་ལྡན་གླིང་དུ་བྱོན་ནས་དེ་གའི་གྲྭ་པ་རྣམས་ལ་བསླབ་གནང་མཛད། མེ་སྤྲེལ་ཕྱི་ལོ་ ༡༩༥༦ ལོར་རྒྱལ་ནང་དུ་གཟིགས་སྐོར་ལ་ཕེབས། རབ་རྒྱལ་ས་ཁྱིའི་སྐབས་ཡོངས་འཛིན་མཆོག་ནས་བསླབ་འབུལ་གནང་བཅུག་སྟེ་རིག་པ་བརྟུལ་ཞུགས་ཀྱི་སྤྱོད་པ་སྐྱོང་བར་བཀའ་ཡི་གནང་བ་འཁྲོལ་པས། ལྕགས་གླང་ཕྱི་ལོ་ ༡༩༦༡ ལོར་ནུབ་བྱང་མི་རིགས་སློབ་གྲྭ་ཆེན་མོར་འགྲིམས། ཆུ་ཡོས་ཕྱི་ལོ་ ༡༩༦༣ ལོར་ཞིང་ཆེན་ན་གཞོན་མཉམ་འབྲེལ་ལྷན་ཚོགས་ཀྱི་ཨུ་ཡོན་ལ་གདམས། དེའི་རྗེས་སུ་ཁ་སྟོད་ནས་ངལ་རྩོལ་ལ་ཞུགས་དགོས་བྱུང༌། ཆོས་སྒོ་སླར་ཕྱེ་ནས་རྒན་གྱའི་སློབ་གྲྭའི་སློབ་གཙོར་བཞུགས་པས་བྱས་རྗེས་ལ་གོང་རིམ་ནས་བདག་རྐྱེན་གནང་། ༸གོང་ས་པཎ་ཆེན་བཅུ་པ་མཆོག་གིས་ཁོང་ལ་ན་བཟའ་ཆ་ཚང་གནང༌། གཟིམ་ཁང་བསྐྱར་བཞེངས་གནང་ཞིང་བྲག་དཀར་དགོན་ལ་གཟིགས་སྐྱོང་རྒྱུན་དུ་གནང། ཆུ་འབྲུག་ལོའི་ཟླ་བཅུ་གཉིས་པའི་ཚེས་བཅུ་གསུམ་ཉིན་ཕྱི་ལོ་ ༢༠༡༣ ལོའི་ཟླ་ ༡ ཚེས་ ༢༤ སྐུ་འདས་པའི་ཚུལ་བསྟན་ཏོ། །

རྗེ་བཙུན་མ་འདི་ཉིད་དམ་པའི་ལུང་གིས་བསྔགས་ཤིང་བཤེས་གཉེན་ཚད་ལྡན་གྱིས་ཟིན་པའི་མཐུ་ལས། ལས་འབྲས་ལ་ཐུགས་ཞིབ་ཅིང་བླང་དོར་འབྱེད་པའི་རྣམ་དཔྱོད་མི་དམན་པས་བླ་མ་བསྟེན་ཚུལ་ལེགས་ལ། སྐྱབས་གནས་དགེ་འདུན་གྱི་སྡེ་ལ་གུས་ཞབས་ཆེ་ཞིང་། ཅི་ཙམ་གྱིས་ནན་ཏན་བྱས་ཀྱང་འཕགས་པའི་དགེ་འདུན་རིན་པོ་ཆེའི་གོང་དི་ཁྲི་མཐོན་པོར་བཞུགས་མི་བཞེད་པ་བདག་གིས་ཀྱང་མངོན་སུམ་དུ་མཐོང་བས། ལྕང་སྐྱ་རོལ་པའི་རྡོ་རྗེ་མཆོག་གི་ཞལ་ནས།

གནས་བརྟན་རྒན་པའི་ཕྱག་དང་བསྙེན་བཀུར་ལེན། །

ལྔ་བདོའི་སྐུ་སྐྱེས་རྣམས་ལ་ཐུགས་རྗེ་གཟིགས། །

ཞེས་གསུངས་པ་དེ་ལྟ་བུའི་གྲས་མིན་པར་སྣང་བས་འདི་ཙམ་ཡང་དད་པར་བྱ་བའི་གནས་སོ། །

དེས་ན། གུང་རུ་ཚང་གི་སྐུ་ཕྲེང་བརྩི་ཚུལ་གསེར་ཏོག་ཚང་གི་སྐུ་འབུམ་གདན་རབས་དང༌། དེ་ལ་བརྟེན་པའི་དུང་དཀར་ཚིག་མཛོད། རྗེ་དཀོན་མཆོག་རིག་འཛིན་དཔལ་མོའི་རྣམ་ཐར་པད་དཀར་འཁྲི་ཤིང་དང་། བྲག་དཀར་གནས་བཤད་བཅས་སུ་གསུང་ཚུལ་སྣ་ཚོགས་ཡོད་ཀྱང་། ལོ་རྒྱུས་མང་པོ་གོང་འོག་བསྒྲིགས་ན་དཔྱད་བཟོད་པ་ནི་དེབ་ཐེར་རྒྱ་མཚོ་དང་། དེ་ལ་བརྟེན་པའི་ཀན་ལྷོའི་བོད་བརྒྱུད་ནང་བསྟན་དགོན་སྡེ་སོ་སོའི་ལོ་རྒྱུས་མདོར་བསྡུས་གཉིས་ཡིན་ལ། རྗེ་ཞང་སྟོན་པས་དེབ་ཐེར་རྒྱ་མཚོ་ཚད་མར་བཞེད་ཀྱང༌། གོང་ལྟར་གསུངས་པ་སྐབས་དེར་དེབ་ཐེར་རྒྱ་མཚོ་ཕྱག་ཏུ་མ་ཆུད་པར་ཐུགས་ཐོག་ནས་བརྩམས་པས་ཡིན་ཏེ། བྲག་དཀར་གནས་བཤད་ལས། སྐུ་གོང་མ་རྣམས་ཀྱི་ལོ་རྒྱུས་དེབ་ཐེར་རྒྱ་མཚོ་ན་མདོར་བསྡུས་ཡོད་ཀྱང་གནས་སྐབས་ལག་ཏུ་དཔེ་ཆ་མ་འབྱོར་བས་བློ་ཡུལ་ན་ཡོད་པ་ནི་དེ་ཙམ་མོ། །ཞེས་གསུངས་པས་ཤེས་སོ། །

སྨྲས་པ།

གདོད་མའི་དུས་ནས་རྒྱལ་ཀུན་ཡུམ་དུ་གྱུར། །

མཐའ་བརྒྱད་སྤྲོས་པའི་སྨག་རུམ་དབྱིངས་སུ་སངས། །

དངོས་འཛིན་གཅོད་པའི་ཆོས་ཀྱི་ཤིང་རྟ་བ། །

མ་ཅིག་ལབ་ཀྱི་སྒྲོན་མ་ཞེས་བྱར་གྲགས། །

 

སྐྱེས་སྦྱངས་རྫུ་འཕྲུལ་མཁའ་ལ་ཐོགས་མེད་རྒྱུ། །

སྐལ་བཟང་འཇུག་ངོགས་ཆོས་ཀྱི་སྡེ་ཆེན་བསྐྱངས། །

མིག་སེར་འཁུན་སྒྲ་སྟོང་གིས་མི་གཡོ་བ། །

གུང་རུའི་མཁའ་འགྲོ་མ་ཞེས་སྙན་པ་འཕུར། །

 

སྔ་མའི་ཉམས་རྟོགས་རི་མོ་ལྷང་ངེར་བཀྲ། །

བརྟག་ཐུབ་མཛད་པས་འགྲོ་ཀུན་དགའ་བ་བསྐྱེད། །

ཟུང་འཇུག་ཡོལ་གོ་གསར་པར་ལོངས་སྤྱོད་པ། །

རྗེ་བཙུན་བློ་བཟང་སྒྲོལ་མ་དད་པའི་གནས། །

 

ཟབ་གསང་ལེགས་བཤད་སྙན་བརྒྱུད་གླུ་ལ་གཡེངས། །

དབེན་ཞིང་ཉམས་དགའི་སུལ་ན་གཅིག་པུར་རྒྱུ། །

ལྷ་སྔགས་ཏིང་འཛིན་བྱེ་བར་དབང་བསྒྱུར་པ། །

དཀོན་མཆོག་ཆོས་ཀྱི་སྒྲོན་མ་བསྟན་འགྲོའི་དཔྱིད། །

 

ཞི་དུལ་པད་མའི་ལང་ཚོ་ཡིད་དུ་འོང་། །

གསུང་གསང་བུང་བའི་གླུ་སྐད་སྙན་ཞིང་འཇེབས། །

སྣང་སྟོང་འོད་གསལ་མར་མེ་འབར་ཞིང་མཆེད། །

དཀོན་མཆོག་རིག་འཛིན་དཔལ་མོ་རྗེས་སུ་དྲན། །

 

འཇིགས་རུང་སྙིགས་མའི་ར་རི་རྒྱང་དུ་བསྲིངས། །

ལྷན་སྐྱེས་ཀུན་སྦྱོར་སྒྲ་གཅན་ལས་གྲོལ་བ། །

སྔོན་མེད་ཆོས་ཀྱི་ཟླ་བ་རྗེ་བཙུན་མ། །

དཀོན་མཆོག་བསྟན་པའི་དབང་མོ་ཞིང་གི་དཔལ། །

 

བསླུ་མེད་ཐུབ་དགོངས་སྙིང་གི་མཐོངས་སུ་དཔྱང༌། །

གང་འཚམ་སྒྱུ་འཕྲུལ་སྨྲ་བསམ་བརྗོད་མེད་མ། །

བསྐལ་བཟང་དམ་ཆོས་གསལ་བའི་སྒྲོན་མ་འདི། །

གཞུང་འདིའི་ཐུན་མོང་ལས་ཀྱི་བགོ་སྐལ་ཉིད། །

ཅེས་བྱ་བ་ནི་བར་སྐབས་ཀྱི་ངལ་གསོ་བའི་ཚིགས་སུ་བཅད་པའོ།།[1]  །།[2]

 

[1] ཞིང་འདི་སྐྱོང་བའི་གུང་རུ་ཡེ་ཤེས་ཀྱི་མཁའ་འགྲོ་མའི་འཁྲུངས་རབས། མདོ་སྨད་རྒན་གྱའི་ལོ་རྒྱུས་དང་། གངས་ཅན་རིག་པ་འཛིན་མ་དག་གི་རྣམ་ཐར། ༼༡༤༽ བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༧ ལོ། ཤོག་གྲངས་ ༢༠༣ ནས་ ༢༥༧ བར་བཞུགས་པ་ལས་བཏུས་པའོ།།

[2] གུང་རུ་མཁའ་འགྲོ་མ་སྐུ་ཕྲེང་བདུན་པ་བློ་བཟང་གཡང་འཛོམས་སྒྲོལ་མ་ནི། རབ་བྱུང་བཅུ་བདུན་པའི་ཆུ་སྦྲུལ་ཕྱི་ལོ་ ༢༠༡༣ ལོར་རྒན་གྱའི་དགའ་ལྡན་ལ་ཁར་ཡབ་བན་དེ་མཁར་དང་། ཡུམ་དཔའ་མོ་སྐྱིད་གཉིས་ཀྱི་སྲས་མོར་སྐུ་འཁྲུངས། ཆུང་དུས་ཀྱི་མཚན་ལ་ཀླུ་མོ་གཡང་འཛོམས་ཞེས་འབོད། རྒན་གྱའི་སེར་སྐྱ་ཡོངས་ཀྱིས་ཡང་ཡང་གསོལ་བ་བཏབ་པ་བཞིན་༸ཀུན་མཁྱེན་ཆེན་པོ་སྐུ་ཕྲེང་དྲུག་པ་མཆོག་གིས་ཕྱི་ལོ་ ༢༠༢༡ ལོའི་ཧོར་ཟླ་བཅུ་གཅིག་པའི་ཚེས་གསུམ་ཉིན་༸རྗེ་བླ་ཁོ་རྡོ་རྗེ་འཆང་འཇིགས་མེད་འཕྲིན་ལས་རྒྱ་མཚོའི་སྐུ་གདུང་རིན་པོ་ཆེའི་མདུན་ནས་ཟན་བསྒྲིལ་ཏེ་ཐུགས་ཐག་བཅད། མཚན་ལ་བློ་བཟང་གཡང་འཛོམས་སྒྲོལ་མ་ཞེས་མཚན་གསོལ་བ་ད་ལྟ་གཞིས་སུ་བཞུགས་པ་འདི་ཉིད་དོ།།