དཔལ་ནཱ་ལེནྡྲ། བྱོན་པ་ལེགས།
ཟ༽ གཙང་ལྗོངས་སུ་བསྟན་འགྲོའི་དོན་མཛད་ཚུལ།
དེ་ཡང་ཡོངས་འཛིན་ཡེ་ཤེས་རྒྱལ་མཚན་ (1713-1793) གྱིས་མཛད་པའི་ལམ་རིམ་བླ་མ་བརྒྱུད་པའི་རྣམ་ཐར་ལས[1]། དེ་ནས་དབུས་གཙང་གི་བླ་ཆེན་མི་ཆེན་རྣམས་ཀྱི་བསུ་བ་སླེབས། དེའི་ཚེ་བོད་ཀྱི་བླ་མ་ཆེན་པོ་རྣམས་ཀྱིས་བོད་ཀྱི་གཟབ་འཕྱོར་གྱི་ཆས་བསེ་ཐེབ་དང་། རྟ་ཕྱིང་གྱོན་རྟ་བཟང་པོ་ལ་ཆིབས་ནས་འོངས་པ་ན་ཇོ་བོས་རྒྱང་རིང་པོ་ནས་གཟིགས་མ་ཐག །ཨུ་པ་སི་ཀ་འདྲེ་མང་པོ་སླེབས་བྱུང་ཅི་ཡིན་ཞེས་དབུ་ན་བཟས་གཏུམས་ནས་བཞུགས།
དེ་ནས་འབྲོམ་རིན་པོ་ཆེས་བོད་ཀྱི་བླ་ཆེན་རྣམས་ལ་རབ་བྱུང་གི་ཆས་རྣམ་དག་མཛད་ནས་བྱོན་ཞེས་ཞུས་ནས་ཐམས་ཅད་ཀྱིས་ཆོས་གོས་རྣམ་པ་གསུམ་ལེགས་པར་བགོས་ཏེ་ཕེབས་པ་ན་ཇོ་བོ་མཉེས་ནས་བཞེངས་ཏེ་ཕྱག་ལན་མཛད། དེ་ནས་རིམ་གྱིས་གཙང་ཕྱོགས་ལ་ཕེབས་ཏེ་དཔལ་ཁུད་ཐང་དུ་མར་པ་ལོ་ཙཱ་རྒྱ་གར་དུ་རྟིང་མ་ཕེབས་པ་དང་མཇལ། མར་པས་ཇོ་བོའི་ཞབས་སྤྱི་བོར་བླངས་ཏེ་ཆོས་ཞུས། ཇོ་བོས་ངའི་ལོ་ཙཱ་ལ་འགྲོ་གསུངས་པས། ད་རེས་ཅིས་ཀྱང་རྒྱ་གར་དུ་ཕྱིན་ཆོག་པ་དགོས་སླར་མཇལ་ཆོག་པ་ཞུ་ཞེས་ཞུས། དེ་ནས་རིམ་གྱིས་ཕེབས་ཏེ་ས་སྐྱའི་ཐད་དུ་ཕེབས་པ་ན། ས་སྐྱ་ལ་ཕྱག་མཛུབ་གཏད་དེ་གནས་འདིར་འཇམ་དབྱངས་ཀྱི་སྤྲུལ་པ་བདུན་འབྱུང་ཞེས་ལུང་བསྟན།
དེ་ནས་རྒྱང་དུ་ཕེབས་གནས་དེའི་དགེ་འདུན་རྣམས་ལ་ཆོས་མང་དུ་གནང་། དེར་འབྲོག་མི་ལོ་ཙཱ་བས་ཇོ་བོའི་ཞབས་ལ་གཏུགས། བསྙེན་བཀུར་ཕུན་སུམ་ཚོགས་པ་མཛད། དེ་ནས་རིམ་གྱིས་ཕེབས་ཏེ་སྣར་ཐང་གི་ཐད་དུ་ཕེབས་པ་ན་གནས་འདིར་འཕགས་པའི་གནས་བརྟན་གྱི་སྤྲུལ་པ་འབྱུང་ཞེས་ལུང་བསྟན། དེ་ནས་ཚོང་དུས་སུ་ཕེབས་ཏེ་ཞ་ལུ་མཐིལ་གྱི་ལྷ་ཁང་དང་། ཁྱད་པར་རི་སྦུག་ཏུ་བཞུགས་ནས་ཆོས་མང་དུ་གསུངས་ཤིང་བྱིན་གྱིས་བརླབས།
༼ཞ་ལུ་དགོན་དང་ཕྱི་ཡི་མི་ཁྱིམ་བརྒྱ་རྩ།༽
དེ་ནས་མྱང་སྟོད་ཉན་ཚོར་བྱོན་ནས་དབྱར་གནས་མཛད། དབྱར་ཟླ་བ་གསུམ་གྱི་རིང་ལ་ཕྱོགས་ཕྱོགས་ནས་འདུས་པའི་དད་ལྡན་མང་པོ་ལ་ཆོས་རྒྱ་ཆེར་སྩལ། ཡོལ་ཆོས་དབང་། ཡོལ་དྲང་སྲོང་། ཡོལ་ཐོག་འབེབས་གསུམ་དང་། རྗེ་འགོས་ལོས་ཀྱང་གནས་དེར་ཕེབས་ནས་ཇོ་བོའི་ཞབས་ལ་གཏུགས། དགེ་བའི་བཤེས་གཉེན་དགོན་པ་བས་ཀྱང་གནས་དེར་ཕེབས་ནས་ཇོ་བོའི་ཞབས་ལ་གཏུགས་ཏེ་ཇོ་བོའི་མཆོད་གནས་མཛད། ཅེས་གསུངས་པ་ལྟར་རོ།། །།
ལུང་ཁུངས་དཔྱད་གཞིའི་ཡིག་ཆ།
[1] ལམ་རིམ་བླ་མ་བརྒྱུད་པའི་རྣམ་ཐར། ཐེ་ཝན་པར་མ། ༢༠༠༧ ལོ། ཤོག་གྲངས་ ༡༤༣ ནས་ ༡༦༩ བར།
ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཆ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༢༤༣ ནས་ ༢༤༥ བར་གསལ་བ་ལས་བཏུས་པའོ།།