དཔལ་ནཱ་ལེནྡྲ། བྱོན་པ་ལེགས།
ཐ༽ མཁས་བཙུན་བཟང་གསུམ་གྱི་ཡོན་ཏན་ཇི་ལྟར་མངའ་ཚུལ།
སློབ་དཔོན་ཡོན་ཏན་འོད་ལ་མཁས་བཙུན་བཟང་གསུམ་གྱི་ཡོན་ཏན་ཇི་ལྟར་མངའ་བའི་ཚུལ་ནི། ༸སྐྱབས་མགོན་༸པཎ་ཆེན་སྐུ་ཕྲེང་བཅུ་པ་རྗེ་བཙུན་བསྟན་འཛིན་འཕྲིན་ལས་འཇིགས་མེད་ཆོས་ཀྱི་དབང་ཕྱུག་གམ་དགེ་སློང་ཤནྟིའི་མིང་ཅན་ (1938-1989) གྱིས་མཛད་པའི་རྒྱན་དྲུག་མཆོག་གཉིས་ཀྱི་བསྟོད་འགྲེལ་དད་ལྡན་དགའ་བསྐྱེད་ལས[1]། གཉིས་པ་མཆོག་གཉིས་ལ་བསྟོད་པ་ནི།
ཚུལ་ཁྲིམས་རྒྱ་མཚོའི་དབུས་ན་གནས་བཅས་ཤིང་། །
འབུམ་ཕྲག་འདུལ་བའི་གཞུང་གི་གདེངས་ཀས་བརྗིད། །
རྣམ་གྲོལ་ཐར་པའི་ནོར་བུས་གཙུག་ན་མཛེས། །
མཆོག་གཉིས་ཀླུ་ཡི་དབང་པོ་ལ་ཕྱག་འཚལ། །[2]
ཞེས་པའོ། །དོན་ནི། འདུལ་བའི་བསླབ་གཞི་ཡོངས་སུ་རྫོགས་པའི་ཚུལ་ཁྲིམས་རྒྱ་མཚོའི་དབུས་ན་རབ་ཏུ་གནས་བཅས་ཤིང་། ཤླཽ་ཀ་འབུམ་ཕྲག་ལྷག་ཙམ་ཡོད་པའི་འདུལ་བའི་གཞུང་ལུགས་ལུང་སྡེ་བཞིའི་གདེངས་ཀས་རྣམ་པར་བརྗིད་ཅིང་། ཉོན་སྒྲིབ་ལས་རྣམ་པར་གྲོལ་བའི་ཐར་པའི་ནོར་བུ་སྤྱི་གཙུག་ན་རྣམ་པར་མཛེས་པའི་འདུལ་བ་འཛིན་པའི་མཆོག་ཏུ་གྱུར་པ་སློབ་དཔོན་ཆེན་པོ་ཡོན་ཏན་འོད་དང་ཤཱཀྱ་འོད་གཉིས་ཀྱི་ཀླུ་ཡི་དབང་པོ་དེ་ལ་ཕྱག་འཚལ་ལོ་ཞེས་པའོ། །དེ་ལ་མཆོག་གཉིས་ལས། དང་པོ་ཡོན་ཏན་འོད་ནི།
མཁས་པའི་ཡོན་ཏན་ལྔ་[3]རིག་ཆ་ཤས་རྫོགས། །
བཙུན་པའི་སྤོང་བདུན་[4]ཁྲིམས་ཀྱི་འོད་སྟོང་འཕྲོ། །
བཟང་པོའི་འཕགས་པའི་ས་ཡི་ཀུནྡའི་གཉེན། །
ཡོན་ཏན་འོད་ཀྱི་ཞབས་ལ་ཕྱག་འཚལ་ལོ། །
ཞེས་བསྔགས་ཤིང་། དེ་ཡང་འདུལ་བ་མདོ་རྩ་བ་ལས། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་འཛིན་པ་ཆེན་པོ་བྲམ་ཟེའི་སློབ་དཔོན་བཙུན་པ་ཡོན་ཏན་འོད་བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ། བདེ་བར་གཤེགས་པའི་ཆོས་འདུལ་བ་བདུད་རྩིའི་ཉིང་ཁུས་ཤེས་རབ་ཀྱི་དབང་པོ་རྒྱས་པ། དེ་བཞིན་གཤེགས་པའི་བཀའ་དམ་པ་ནན་ཏན་སྙིང་པོར་བསྒྲུབས་པས། ཞེས་གསུངས་སོ།།
འདི་ལ་གསུམ། རིགས་ཕུན་སུམ་ཚོགས་པར་སྐྱེ་བ་བཞེས་པའི་ཚུལ། རྟེན་དེ་ལ་ཡོན་ཏན་བརྙེས་པའི་ཚུལ། བརྙེས་ནས་བསྟན་པ་ལ་བྱ་བ་མཛད་པའི་ཚུལ་ལོ། །དང་པོ་ནི། འདུལ་བ་ལ་མཁས་པའི་མཆོག་ཏུ་གྱུར་པ་སློབ་དཔོན་ཡོན་ཏན་འོད་འདི་ནི། རྒྱ་གར་འཕགས་པའི་ཡུལ་གྱི་ཁོངས་སུ་གཏོགས་པ་བཅོམ་བརླག་ཅེས་པའི་ཡུལ་དུ་བྲམ་ཟེའི་རིགས་སུ་སྐུ་འཁྲུངས། ཆུང་ངུའི་དུས་ནས་རིག་པའི་གནས་མཐའ་དག་ལ་མཁས་པར་སྦྱངས་པའི་ཡོན་ཏན་ཕུལ་དུ་བྱུང་བའི་འོད་དང་ལྡན་པས་ན་མཚན་དུ་ཡོན་ཏན་འོད་ཅེས་ཐོགས་སོ། །དེ་ལྟར་ཡང་མདོ་རྩ་བ་ལས། འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་འཛིན་པ་ཆེན་པོ་བྲམ་ཟེའི་སློབ་དཔོན་བཙུན་པ་ཡོན་ཏན་འོད། ཅེས་གསུངས་སོ།།
གཉིས་པ་ལ་གསུམ་ལས། དང་པོ་མཁས་པའི་ཡོན་ཏན་དང་ལྡན་ཚུལ་ནི། དེ་ནས་རྒྱལ་བའི་བསྟན་པ་ལ་རབ་ཏུ་བྱུང་ཞིང་བསྙེན་པར་རྫོགས། བདག་ཉིད་ཆེན་པོ་མཁས་མཆོག་དབྱིག་གཉེན་གྱི་དྲུང་དུ་རང་གཞན་གྱི་གྲུབ་མཐའི་གཞུང་ལུགས་སྤྱི་དང་། ཁྱད་པར་སྡེ་སྣོད་གསུམ་ལ་སྦྱངས་ཤིང་ཐེག་པ་ཆེན་པོའི་ལམ་གྱི་རིམ་པ་མཐའ་དག་གསན་ནས། ཐེག་ཆེན་གྱི་མདོ་སྡེ་མཐའ་དག་ལ་ཤིན་ཏུ་ལེགས་པར་སྦྱངས། སྡེ་པ་བཅོ་བརྒྱད་པོ་སོ་སོའི་ལུགས་སྲོལ་རྣམས་མ་འདྲེས་པར་མཁྱེན་ཅིང་། བདེ་བར་གཤེགས་པའི་དམ་པའི་ཆོས་འདུལ་བ་མཐའ་དག་གི་བདུད་རྩིའི་ཉིང་ཁུ་གསོལ་བས་ཤེས་རབ་ཀྱི་དབང་པོ་རྒྱས་ཤིང་། འདུལ་བ་འབུམ་སྡེ་མཐའ་དག་ཐུགས་ལ་བཟུང་སྟེ་རྒྱུན་དུ་ཁ་འདོན་དུ་མཛད་དོ།།
རྩ་བར། དགེ་སློང་གིས་ཆོས་བཤད་པར་བྱའོ། །ནས། ལངས་ནས་རྣམ་པར་དབྱེ་བར་བྱའོ། །ཞེས་པའི་དོན་ལྟར་འདུལ་བའི་སྡེ་སྣོད་སོགས་གཞན་ལ་ཚུལ་དང་མཐུན་པར་ཕྱིན་ཅི་མ་ལོག་པ་ལེགས་པར་འཆད་པ་ལ་མཁས་པ་དང་། རྩ་བར། དོན་བཏུས་ཏེ་བརྗོད་པར་ཡང་ངོ་། །ཞེས་པའི་དོན་ལྟར་ཚིག་སྦྱོར་ཕུན་སུམ་ཚོགས་པའི་བསྟན་བཅོས་རྩོམ་པ་ལ་མཁས་པ་དང་། རྩ་བར། གལ་གཟུང་བ་དང་གཞུང་གཟུགས་པ་ཡང་ངོ་། །ཞེས་པའི་དོན་ལྟར་རྩོད་པའི་ཁྱུ་མཆོག་ཏུ་གྱུར་ཏེ་ཕ་རོལ་པོའི་ལོག་རྟོག་སེལ་བའི་རྩོད་པ་ལ་མཁས་པའོ། །དེ་ལྟར་མཁས་པའི་ཡོན་ཏན་དེ་དག་དང་ལྡན་པ་ནི། རྩ་བ་ལས། བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ། བདེ་བར་གཤེགས་པའི་ཆོས་འདུལ་བ་བདུད་རྩིའི་ཉིང་ཁུས་ཤེས་རབ་ཀྱི་དབང་པོ་རྒྱས་པ། ཞེས་དང་། ཉིད་ཀྱི་རྣམ་བཤད་ཀྱི་མཇུག་ཏུ་ཡང་། ཡུལ་བཅོམ་བརླག་གི་འཕགས་པ་གཞི་ཐམས་ཅད་ཡོད་པར་སྨྲ་བའི་རྩོད་པ་བ་ཆེན་པོ་རྣམས་ཀྱི་ཁྱུ་མཆོག་བསྟན་བཅོས་དུ་མ་མཛད་པ་གཞུང་འབུམ་ཕྲག་བཅོ་བརྒྱད་ལ་ཁ་འདོན་མཛད་པའི་སློབ་དཔོན་ཡོན་ཏན་འོད། ཅེས་གསུངས་སོ།།
གཉིས་པ་བཙུན་པའི་ཡོན་ཏན་དང་ལྡན་ཚུལ་ནི། དེ་ལྟ་བུའི་བདག་ཉིད་ཆེན་པོ་དེ་ནི་ཉིན་ལྟར་ཀློག་པ་ཐོས་བསམ་དང་། སྤོང་བ་བསམ་གཏན་ལ་བརྩོན་པར་མཛད་པས་རང་གཞན་གྱི་གྲུབ་མཐའ་ཀུན་མཐར་ཕྱིན་ཅིང་། གཟུངས་དང་སྤོབས་པ་དང་མངོན་པར་ཤེས་པ་དང་། ཏིང་ངེ་འཛིན་གྱི་སྒོ་བརྒྱ་ཕྲག་མང་པོ་ཐུགས་ལ་འཁྲུངས། ཚུལ་ཁྲིམས་རྣམ་པར་དག་པའི་སྟོབས་ཀྱིས་རྒྱལ་པོ་ཤཱི་ཧ་རུའི་བློན་པོ་མ་ཧང་ག་ར་ཛ་ཞེས་པ་ལན་ཅིག་རྒྱལ་པོའི་ཆད་པས་མིག་ཕྱུང་བ་ཡང་སློབ་དཔོན་གྱི་སྨོན་ལམ་གྱི་སྟོབས་ཀྱིས་སོར་ཆུད། རྒྱལ་པོའི་བླ་མར་གྱུར་པས་ཉིན་རེ་བཞིན་ཡོ་བྱད་དཔག་ཏུ་མེད་པའི་འདུ་བ་བྱུང་ཡང་དེ་མ་ཐག་ཏུ་ཡོ་བྱད་གང་བྱུང་ཐམས་ཅད་དགེ་བར་བསྒྱུར་ཏེ། རང་ཉིད་སྦྱངས་པའི་ཡོན་ཏན་ལས་ཉམས་པ་མི་མངའ་བར་མཛད། སྐབས་ཤིག་ཏུ་བདག་གི་རྒྱུད་ལ་འདུལ་བའི་ཉེས་པ་ཕྲ་ཞིང་ཕྲ་མོ་ཙམ་གྱིས་ཀྱང་མ་གོས་ན་ཤིང་ལྗོན་པ་སྐམ་པོ་འདི་ལ་ཡལ་ག་དང་ལོ་མ་མེ་ཏོག་དང་འབྲས་བུ་མཐའ་དག་འབྱུང་བར་གྱུར་ཅིག །ཅེས་བདེན་སྟོབས་བརྗོད་པས་ན་དེ་ལྟར་དུ་བྱུང་ངོ་། །ཞེས་གྲགས་པའི་སྐྱེས་བུ་ཡིན་པར་གཞུང་དུ་མར་གསུངས་པས་སོ་ཐར་གྱི་ཉེས་བྱས་ཕྲ་མོ་ཡན་ཆད་ཀྱིས་མ་གོས་པའི་བཙུན་པའི་ཡོན་ཏན་དང་ལྡན་པ་ཡིན་ནོ། །དེ་ལྟར་ཡང་རྩ་བ་ལས། དེ་བཞིན་གཤེགས་པའི་བཀའ་དམ་པ་ནན་ཏན་སྙིང་པོར་བསྒྲུབས་པས། ཞེས་གསུངས་སོ།།
གསུམ་པ་བཟང་པོའི་ཡོན་ཏན་དང་ལྡན་ཚུལ་ནི། དེ་ཡང་བཟང་པོའི་ཡོན་ཏན་གྱི་མཆོག་ཏུ་གྱུར་པ་ནི་ཐེག་པ་ཆེན་པོའི་བྱང་ཆུབ་ཀྱི་སེམས་རིན་པོ་ཆེ་ཡིན་ཅིང་། སློབ་དཔོན་འདིས་ཀྱང་སྤྱིར་ལམ་གྱི་རིམ་པ་དང་ཁྱད་པར་དུ་སློབ་དཔོན་ཆེན་པོ་དབྱིག་གཉེན་གྱི་མན་ངག་ལ་བརྟེན་ནས་ཐེག་པ་ཆེན་པོའི་བྱང་ཆུབ་ཀྱི་སེམས་རིན་པོ་ཆེ་ཡང་དང་ཡང་དུ་བསྒོམས་ཏེ། རང་རྒྱུད་ལ་སྐྱེས་པ་སོགས་ལམ་རིམ་གྱིས་བགྲོད་དེ་ཐེག་ཆེན་འཕགས་པའི་ས་ཐོབ་པས་སློབ་དཔོན་འཕགས་པ་ཡོན་ཏན་འོད་ཅེས་སྙན་པའི་གྲགས་པས་ཕྱོགས་ཀུན་ཏུ་ཁྱབ་པར་གྱུར་ཏོ། །དེ་ལྟར་རང་ཉིད་བྱང་ཆུབ་ཀྱི་སེམས་དང་བསླབ་བྱ་རྣམས་ལ་སློབ་པར་མ་ཟད་ཕྱི་རབས་ཀྱི་གདུལ་བྱ་རྣམས་ལ་ཡང་དེ་ལྟར་དུ་སློབས་ཤིག་ཅེས་འདོམས་པའི་ཆེད་དུ་བྱང་སའི་ཚུལ་ཁྲིམས་ཀྱི་ལེའུའི་འགྲེལ་པ་མཛད་དོ། །དེ་ལྟར་ཡང་ཉིད་ཀྱི་རྣམ་བཤད་འགྱུར་བྱང་ལས[5]།
ས་གསུམ་བརྙེས་ནས་དཔལ་ལྡན་རྒྱལ་བ་རྣམས་ཀྱི་སྲས། །
ཡོན་ཏན་འོད་ཅེས་བྱ་བ་ཡོན་ཏན་རྣམས་ཀྱི་གཙོས། །
ཞེས་དང་། སློབ་དཔོན་ཤཱཀྱ་འོད་ཀྱིས་ཀྱང་། འཕགས་པ་ཡོན་ཏན་འོད་དང་། འཕགས་པ་ཉེར་སྦས་དང་། ཞེས་དང་། འདུལ་གཞུང་ལྟ་སྒྲོན་ལས་ཀྱང་། ས་གསུམ་བརྙེས་པའི་འཕགས་པ་ཡོན་ཏན་འོད། །ཅེས་དང་། ཐོས་གླིང་འདུལ་བར་ཡང་། རྟགས་གསུམ་པ་གྲུབ་སྟེ། ས་གསུམ་པ་ཐོབ་པའི་གང་ཟག་ཡིན་པའི་ཕྱིར་ཏེ། ཞེས་གསུངས་སོ།།
གསུམ་པ་ནི། རང་རྒྱུད་ལ་ལུང་རྟོགས་ཀྱི་ཡོན་ཏན་དེ་ལྟར་མངའ་ཡང་། རྒྱལ་བའི་བསྟན་པ་ལ་བྱ་བ་རྒྱ་ཆེན་པོ་མཛད་པའི་ཕྱིར་དུ་འདུལ་བ་ལུང་སྡེ་གཞིའི་གནད་ཐམས་ཅད་བསྡུས་པ་འདུལ་བ་རྒྱ་མཚོའི་སྙིང་པོ་ཞེས་བྱ་བའི་བསྟན་བཅོས་ཆེན་པོ་མཛད། དེ་ལ་ནི་དེང་སང་འདུལ་བའི་མདོ་ཞེས་ཡོངས་སུ་གྲགས་ཤིང་། རྒྱལ་བའི་བཀའ་དང་ཁྱད་པར་མེད་པར་རྒྱལ་བའི་བསྟན་པ་ལ་རབ་ཏུ་བྱུང་བ་ཐམས་ཅད་ཀྱིས་ཚད་མར་འཛིན་པ་ཡིན་ལ། འདུལ་བ་ལུང་སྡེ་བཞི་ལ་བལྟ་བའི་མིག་ལྟ་བུ་སངས་རྒྱས་ཀྱི་བསྟན་པའི་སྒྲོན་མེ་སྔོན་བྱོན་པའི་མཁས་གྲུབ་ཐམས་ཅད་ཀྱིས་གཙིགས་པོ་ཆེར་མཛད་དོ།།
གཞན་ཡང་འདུལ་བའི་ལས་བརྒྱ་རྩ་གཅིག་གི་ཆོ་ག་ཀརྨ་ཤ་ཏམ་དུ་གྲགས་པ་ཡང་མཛད་དོ། །ད་ལྟ་རྒྱལ་བའི་བསྟན་པ་ལ་ཞུགས་ནས་དགེ་བསྙེན་དང་། བར་མ་རབ་བྱུང་དང་། ཚིགས་སྔ་མ་དགེ་ཚུལ་གྱི་སྡོམ་པ་དང་། བསླབ་གཞི་ཡོངས་སུ་རྫོགས་པ་དགེ་སློང་གི་སྡོམ་པ་ལེན་པའི་ཆོ་ག་དང་། གཞི་གསུམ་གྱི་ཆོ་ག་སོགས་འདུལ་བའི་ལས་ཀྱི་ཆོ་ག་རྣམས་བདག་ཉིད་ཆེན་པོ་སློབ་དཔོན་འདི་ཁོ་ནའི་བཀའ་དྲིན་ལས་བྱུང་བས་བསྟན་པ་འདི་ལ་བཀའ་དྲིན་མཚུངས་པ་མེད་པ་ཞིག་ཡིན་ནོ།།
སློབ་དཔོན་འདི་བྱོན་ཕྱིན་གྱི་མཁས་པ་རྣམས་ཀྱིས་དམ་པའི་ཆོས་འདུལ་བའི་དོན་འཚོལ་བ་ལ་སློབ་དཔོན་འདིའི་གཞུང་རྣམས་ཚད་མར་འཛིན་པ་ཡིན་ནོ། །བདག་ཉིད་ཆེན་པོ་འདི་ཡུལ་བཅོམ་བརླག་གི་གཙུག་ལག་ཁང་ཨ་གྲ་པུ་རི་ཞེས་བྱ་བར་བཞུགས། འཕྲིན་ལས་ཀྱི་ཁྱབ་བདལ་ཤིན་ཏུ་ཆེ་བས་ལྷན་ཅིག་གནས་པའི་དགེ་སློང་ཡང་སྟོང་ཕྲག་ལྔ་རེ་ཙམ་ཡོད་པར་གྲགས་ཤིང་། དེ་ཐམས་ཅད་ཀྱང་སྡེ་སྣོད་གསུམ་ལ་མང་དུ་ཐོས་པ་དང་ལྡན་པ། ཉིན་ཞག་ཕྲུགས་རེའི་ནང་དུ་ལྟུང་བ་བཤགས་པར་འོས་པ་རྣམས་བཤགས། བསྡམ་པར་འོས་པ་རྣམས་བསྡམས། བྱིན་གྱིས་བརླབ་པར་འོས་པ་རྣམས་བྱིན་གྱིས་བརླབས་ཏེ། བསྡམ་བྱའི་ཉེས་བྱས་ཕྲ་མོ་ཚུན་ཆད་སོ་སོར་ཕྱིར་བཅོས་ཀྱིས་འཕྲལ་དང་འཕྲལ་དུ་དེ་མ་ཐག་ཏུ་བཅོས་པ་དང་། ཚུལ་ཁྲིམས་རྣམ་པར་དག་པ་སྔོན་རྒྱལ་བ་ཞལ་བཞུགས་དུས་དང་། བསྟན་པའི་གཏད་རབས་ཀྱི་སྐབས་དགྲ་བཅོམ་པ་རྣམས་ཀྱིས་སངས་རྒྱས་ཀྱི་བསྟན་པ་སྐྱོང་བའི་དུས་བཞིན་ཡོད་ཅིང་། མདོ་སྡེ་འཛིན་པ་དང་། མ་མོ་འཛིན་པ་ཡང་མང་དུ་ཡོད་ལ། འདུལ་བ་འབུམ་སྡེ་ངག་ཏུ་ཐོན་པའང་ལྔ་བརྒྱ་ཙམ་ཡོད་ཅེས་སྔོན་གྱི་ཆོས་འབྱུང་དག་ཏུ་བཤད་ཅིང་། སྔོན་བྱུང་གི་མཁས་པ་རྣམས་ལ་གཏམ་དུ་ཡང་གྲགས་སོ།།
བསྟན་པ་ལ་བྱ་བ་མཛད་ཕྱིར་གསུངས་པའི་འདུལ་བའི་མདོ་ཡང་རང་བཟོ་ཙམ་མ་ཡིན་པར་ཁུངས་བཙུན་པར་བྱ་བའི་ཕྱིར་ཏུ་རྒྱལ་བའི་གསུང་རབ་སྡེ་པ་བཅོ་བརྒྱད་པོ་ཐམས་ཀྱི་འདུལ་བའི་སྡེ་སྣོད་མཐའ་དག་གི་གཙོ་བོར་གྱུར་པ་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་ཀུན་ལས་བཏུས་ནས་མཛད་པ་ཡིན་ནོ། །དེ་ལྟར་ཡང་རྩ་བ་ལས། སྡེ་པ་ཐམས་ཅད་ཀྱི་འདུལ་བའི་སྡེ་སྣོད་མཐའ་དག་གི་གཙོ་བོར་གྱུར་པ་འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་ཀུན་ལས་བཏུས་པ་ཡིན་ནོ། །ཞེས་གསུངས་སོ།།
དེ་བཞིན་སློབ་དཔོན་ཡོན་ཏན་འོད་འཕགས་པའི་གང་ཟག་ཡིན་པ་ནི། འདུལ་བ་ནས་འཕྲོས་པའི་ཇོ་བོ་ཨ་ཏི་ཤའི་གསུང་སྒྲོས་ལས[6]། ཇོ་བོའི་ཞལ་ནས་ནི་ལུང་དྲངས་ན་ཡང་གཞུང་དམ་པ་ལ་ཡིད་ཆེས་བྱ་དགོས་གསུང་། འདི་ངེས་པའི་དོན་གྱི་ལུང་ཡིན་བྱིན་རླབས་ཀྱང་ཅི་སྟེ་ནུབ་གསུང་། རྒྱ་ཆེར་འགྲེལ་བར་ལུང་དུ་དྲངས་པ་དང་། ལུང་མ་མཐུན་ན་འགྲེལ་པ་འགྱུར་བཟང་བས་ཡིད་ཆེས་བྱ་དགོས་དགེ་བཤེས་སྒོམ་པ་གསུང་། བསྟན་བཅོས་ལ་ཡང་ཇོ་བོའི་ཞལ་ནས་སློབ་དཔོན་ཡོན་ཏན་འོད་འཕགས་པའི་གང་ཟག་ཡིན། ཞེས་བྱུང་བ་ལྟར་རོ།། །།
དཔྱད་གཞིའི་ལུང་ཁུངས་ཡིག་ཆ།
[1] བསྟན་འཛིན་འཕྲིན་ལས་འཇིགས་མེད་ཆོས་ཀྱི་དབང་ཕྱུག་གི་གསུང་འབུམ། ༼༡༽ བྲིས་མ། ཤོག་ ༡ན༡ ནས་ ༤༤ན༤ བར།
[2] རེད་མདའ་བའི་བསྟོད་ཚོགས། ༼ང༽ འཕྲུལ་པར་དཔེ་རིང་། ཤོག་གྲངས་ ༧བ༣ ནས་ ༨ན༥ བར།
[3] བཟོ་རིག་པ་དང་། གསོ་བ་རིག་པ། སྒྲ་རིག་པ། ཚད་མ་རིག་པ། ནང་དོན་རིག་པ་སྟེ་རིག་གནས་ཆེ་བ་ལྔའོ།།
[4] ཉན་ཐོས་ཀྱི་སོ་ཐར་སྡོམ་པ་ནི། སྤོང་བདུན་འཁོར་དང་བཅས་པ་སྤོང་བ་སྟེ། ལུས་ཀྱི་མི་དགེ་བ་གསུམ་དང་། ངག་གི་མི་དགེ་བ་བཞི་བཅས་སྤོང་བ་དང་། དེའི་ཕྱོགས་གཏོགས་ཀྱི་སྤང་བྱ་མཐའ་དག་སྤོང་བའི་ལུས་ངག་སྡོམ་པའི་ཚུལ་ཁྲིམས་སོ།།
[5] བསྟན་འགྱུར་དཔེ་བསྡུར་མ། འདུལ་བ། ༼ཟུ༽ དེབ་ཨང་ ༨༩ པ། ཤོག་གྲངས་ ༡༤༤༢
[6] འདུལ་བ་ནས་འཕྲོས་པའི་ཇོ་བོ་ཨ་ཏི་ཤའི་གསུང་སྒྲོས། དབུ་མེད་བྲིས་མ། ཤོག་གྲངས་ ༥ན༦
ཡོང་ཁུངས། པཎ་གྲུབ་བཅུ་བདུན་གྱི་རྣམ་ཐར་འཛམ་གླིང་མཛེས་རྒྱན། ༼ཅ༽ རྩོམ་པ་པོ་རྣམ་གྲྭ་ཐུབ་བསྟན་ཡར་འཕེལ། སྐུ་བཅར་རྣམ་རྒྱལ་གྲྭ་ཚང་དང་བཀྲ་ཤིས་སྒོ་མང་གྲྭ་ཚང་། ༢༠༢༣ ལོ། ཨ་རིའི་རྒྱལ་ས་ཝ་ཤིང་ཀྲོན། Westphalia Press ཤོག་གྲངས་ ༢༨༥ ནས་ ༢༩༡ བར་གསལ་བ་ལས་བཏུས་པའོ།།