ཇོ་བོ་རྗེའི་བླ་མ་གསེར་གླིང་པ་ཆོས་ཀྱི་གྲགས་པའི་རྣམ་ཐར།

ཇོ་བོ་རྗེའི་བླ་མ་གསེར་གླིང་པ་ཆོས་ཀྱི་གྲགས་པའི་རྣམ་ཐར། (གསེར་གླིང་ནི་ཨིན་ཌུ་ནི་ཤི་ཡ་ལའོ།།)
ལོ་ཙཱ་བའི་བསྟོད་པ་ལས། རྟག་ཏུ་བསྟེན་པའི་བླ་མ་ནི། །གསེར་གླིང་པ་དང་ཤནྟི་པ། །བྱང་ཆུབ་བཟང་པོ་ཛེ་ཏ་རི། །ཞེས་སོ། །འགྲན་ཟླ་མེད་པའི་བླ་མ་གསེར་གླིང་པའི་ཡོན་ཏན་མ་ལུས་པར་བརྗོད་པར་མི་ནུས་ཀྱང་ཕྱོགས་ཙམ་ཇོ་བོ་ཉིད་ཀྱིས་གསུངས་པ་ནི་གསེར་གླིང་ཞེས་བྱ་བ་གླིང་བཞི་གླིང་ཕྲན་བརྒྱད་དུ་མ་གཏོགས་པ། འཛམ་བུ་གླིང་དང་ཉེ་བ་རིན་པོ་ཆེ་སྣ་ཚོགས་ཡོད་པའི་གླིང་ཞིག་ཡོད་པ་དེ་ལ་གསེར་གླིང་ཞེས་ཟེར་རོ།།

གླིང་དེའི་རྒྱལ་རིགས་སུ་སྐུ་འཁྲུངས། རྒྱལ་བུ་དེ་སྐྱེས་མ་ཐག་ཏུ་སི་ན་སི་ན་ཞེས་དཀོན་མཆོག་གསུམ་ངག་ཏུ་འདོན་པ་ཞིག་བྱུང་། གླིང་དེ་མུ་སྟེགས་པ་ཡིན་ཡང་རྒྱལ་བུའི་བསོད་ནམས་ཀྱིས་སུས་ཀྱང་ངག་གཅོག་མ་ནུས་སོ། །རྒྱལ་བུ་དེ་ཆེར་སྐྱེས་ནས་རི་ཕུག་ཅིག་ནས་སངས་རྒྱས་ཤཱཀྱ་ཐུབ་པའི་སྐུ་ལུགས་མ་ཞིག་རྙེད་དེ་བྱུང་། དེ་ལ་མཆོད་པ་སྣ་ཚོགས་བྱས་པས་གླིང་དེ་སྔར་བས་བདུན་འགྱུར་གྱིས་ལོ་ལེགས་པ་ནད་ཉུང་བ་ལ་སོགས་བཀྲ་ཤིས་པར་གྱུར་ཏོ། །དེེར་གསེར་གླིང་པ་ཐམས་ཅད་སངས་རྒྱས་ཀྱི་བསྟན་པ་ལ་དད་ནས་རྒྱལ་བུ་འདི་ཆོས་ཚོལ་དུ་བཏང་ཟེར་བས་རྒྱལ་བུ་ཤིན་ཏུ་དགྱེས་ནས། འཛམ་བུ་གླིང་གི་རྡོ་རྗེ་གདན་མངོན་པར་བྱང་ཆུབ་པའི་གནས་ཡིན་པས་དེར་བྱོན་པ་དང་སྲིན་པོ་མཆོད་པ་ལ་འོངས་པ་དུས་མཚུངས་པར་གྱུར། དེའི་ཚེ་གང་ཟག་ཡོན་ཏན་ཐམས་ཅད་དེར་འདུ་བ་ཡིན་པས་སློབ་དཔོན་ཆེན་པོ་ཚེ་སྒྲུབ་པ་མཧཱ་ཤྲཱི་རཏྣ་དེར་བྱོན་པས་རྒྱལ་བུ་དེ་དམ་པ་གཞན་ལ་མོས་པ་མ་སྐྱེས་པར་མཧཱ་ཤྲཱི་རཏྣ་ལ་དད་པ་དང་གུས་པ་དང་མོས་པ་ཆེར་སྐྱེས་སོ། །དེར་ཞག་བདུན་འགྲོགས་ནས་སློབ་དཔོན་མེད་དེ་སོང་། རྒྱལ་བུས་བོས་ཀྱང་མེད། བཙལ་ཀྱང་མེད། ཀུན་ཏུ་དྲིས་ཀྱང་རྩད་མ་ཆོད་དོ། །དེར་རྒྱལ་བུས་ལུམ་པའི་ཚལ་དང་ན་ར་ཛ་ན་དང་བར་ན་སེ་ཐམས་ཅད་དུ་བཙལ་ཀྱང་མ་རྙེད་དོ། །དེར་རྒྱལ་བུ་ངལ་ནས་གཉིད་ལོག་པའི་རྨི་ལམ་དུ་བྱིས་པ་གཉིས་གླུ་ལེན་པ་ལ།
རང་ཡུལ་འཁོར་དང་ལོངས་སྤྱོད་བོར། །སྨོན་པ་ཞིག་གི་རྩ་མ་ཆོད། །
རིང་ནས་ཕུང་ངམ་མྱུར་དུ་ཕུང་། །རིགས་དང་བཟང་སྟེ་ཤེས་རབ་ཆུང་། །
ཟེར་རོ། །དེར་རྒྱལ་བུ་གཉིད་སད་དེ་རྡོ་རྗེ་གདན་དུ་བྱོན་པ་ལ་ཅི་ཡང་མེད་དོ། །དེ་ནས་ད་རང་གི་ཡུལ་དུ་འགྲོ་སྙམ་ནས་ཡོད་པ་ལ་མདུན་ན་བུ་མོ་གཉིས་གླུ་ལེན་པ།
གཉེན་འདུན་མཛའ་བཤེས་མང་པོ་དང་། །ཡུལ་དང་ཁང་ཁྱིམ་ནོར་ཆེན་དང་། །
ཟས་སྐོམ་གྱི་ནི་ལོངས་སྤྱོད་པ། །མྱ་ངན་སྐྱེ་བར་འགྱུར་བ་ཡིན། །
ཆོས་དང་རིང་དུ་འགྱུར་བ་ཡིན། །ནོར་མ་རྙེད་ཀྱི་ཚོང་པ་དག །
ཡུལ་དུ་སྟོང་པར་ལྡོག་པ་འདྲ། །
ཟེར་ཞིང་འདུག་པས། ང་ལ་ཟེར་སྙམ་པ་དང་མེད་དེ་སོང་ངོ་། །དེར་རྒྱལ་བུ་དགའ་ནས་ངེས་པར་ཆོས་སྐྱོང་མ་ཞིག་ཡིན་པ་ལ་དྲི་ས་མེད་དོ་སྙམ་ནས། ལོ་བདུན་དུ་རྒྱ་གར་དུ་བཞུགས་ཏེ་བླ་མ་མང་པོ་ལ་ཆོས་ནང་རིག་པ་མང་པོ་བསླབས་ནས་རྡོ་རྗེ་གདན་དུ་མཆོད་པ་བྱེད་ཅིང་ཆོས་སྐྱོང་མ་དེ་དང་ཕྲད་ན་སྙམ་པ་ལ། རྒན་མོ་ཞིག་ན་རེ།
སྐམ་སར་ཆུ་ཆུང་དྲངས་པ་ལྟར། །ཉིན་དང་མཚན་མོ་འདས་པ་ཡིས། །
མི་རྣམས་ཚེ་ནི་ཟད་པར་བྱེད། །རྨོངས་པ་ལོང་ཡོད་མ་ཟེར་ཞིག །
ཅེས་ཟེར་ནས་མི་སྣང་ངོ་། །དེར་རྒྱལ་བུས་སློབ་དཔོན་མཧཱ་ཤྲཱི་རཏྣ་འབའ་ཞིག་ཡིད་པ་བྱས་པ་དང་། རྒྱལ་བུའི་རྨི་ལམ་ན་སློབ་དཔོན་ན་རེ་རྒྱལ་སྲིད་ནི་དམན་པའོ། །དམ་པ་མ་ཡིན་པའོ། །དམ་པ་ལས་རིང་དུ་བྱེད་པའོ། །ཆོས་ཀྱི་རྒྱལ་སྲིད་འཛིན་ནུས་སམ་ཞེས་ལན་གསུམ་གསུངས། རྒྱལ་བུས་ཀྱང་ནུས་སོ་ཞེས་ལན་གསུམ་ཁས་བླངས་པ་དང་གཉིད་སད། སློབ་དཔོན་དངོས་སུ་བཞུགས་ཤིང་འདུག་གོ །དེར་སློབ་དཔོན་གྱིས་བྱིན་གྱིས་བརླབས་ཏེ་ཆོས་ཐམས་ཅད་ཀྱི་རང་དང་སྤྱིའི་མཚན་ཉིད་ཇི་ལྟར་ཡིན་པ་བསྟན། སངས་རྒྱས་ཀྱི་བཀའི་གདམས་པ་རྣམས་གནང་། ཁྱད་པར་དུ་བྱང་ཆུབ་ཀྱི་སེམས་ལ་བརྟེན་པའི་ཆོས་མང་དུ་གསུངས། རྒྱལ་བུས་ཀྱང་སྣོད་གཅིག་ནས་གཅིག་ཏུ་བྱོ་བ་བཞིན་དུ་ཐུགས་སུ་ཆུད། མཚན་ཡང་གསེར་གླིང་པ་ཆོས་ཀྱི་གྲགས་པ་ཞེས་བཏགས་སོ། །དེ་ནས་གསེར་གླིང་དུ་བྱོན་ཏེ་མུ་སྟེགས་ཀྱི་གྲུབ་མཐའ་འཛིན་པ་ཐམས་ཅད་སྤངས་ནས་སངས་རྒྱས་ཀྱི་བསྟན་པ་ལ་མ་ལུས་པར་བཀོད་དོ།།
གསེར་གླིང་པ་ཆོས་ཀྱི་གྲགས་པ་དེ་ནི་མཚན་དོན་དང་ལྡན་པ་ཡིན་ཏེ། ཆོས་ལ་བརྟེན་པའི་གྲས་པས་འཛམ་བུའི་གླིང་ལ་ཁྱབ་པའོ། །ཁོང་གསེར་གླིང་དུ་བཞུགས་ཀྱང་ཁོང་གི་གྲགས་པ་འཛམ་གླིང་དུ་ཁྱབ་སྟེ་ནང་པ་སངས་རྒྱས་ཐམས་ཅད་ཀྱི་གཙུག་གི་ནོར་བུ་ལྟ་བུ། ཁྱད་པར་དུ་བྱམས་པ་དང་སྙིང་རྗེ་ལས་བརྩམས་ནས་ཆོས་སྟོན་པ་ཞིག་ཡོད་ཅེས་ཟེར་བ་ཇོ་བོས་གསན་ནས། ཚེ་རབས་དཔག་ཏུ་མེད་པ་ནས་ཆོས་ཀྱི་བླ་མ་ཡིན་པས་མཚན་ཐོས་པ་ཙམ་གྱིས་དད་གུས་ཐུན་མོང་མ་ཡིན་པ་སྐྱེས། དེས་ཐུགས་འཕྲོགས་པ་བཞིན་དུ་གྱུར་པས་གསེར་གླིང་དུ་ནོར་བུ་རིན་པོ་ཆེ་ལེན་དུ་འགྲོ་བའི་ཚོང་པ་ཚན་གཅིག་དང་བསྡེབས་ནས་གཟིངས་ཆེན་པོ་བཅས་ནས་བྱོན། ཞེས་གསལ་ལོ།།
༼ཨིན་ཌུ་ནི་ཤར་ཡོད་པའི་བླ་མ་གསེར་གླིང་པའི་གདན་ས། ཇོ་བོ་དང་བླ་མ་གསེར་གླིང་མཇལ་ས་ཡང་འདི་ཉིད་ཡིན་པར་གསུངས།༽
སྣར་ཐང་གསེར་ཕྲེང་པོད་ ༼ང༽ པ་ལས། ཇོ་བོའི་རྣམ་ཐར་ནང་གསལ་བ་བས་ཟུར་འདོན་ཞུས་པའོ།།

Leave a Reply

Your email address will not be published. Required fields are marked *