འཕགས་པ་ཐོགས་མེད་ཀྱི་རྟོགས་བརྗོད་ངེས་དོན་ཟླ་ཟེར་དཀར་པོའི་ཕྲེང་བས་སྙིང་གི་གདུང་བ་འཕྲོག་བྱེད།

 

༄༅། །ན་མོ་ཨཱརྻ་མཻ་ཏྲི་ནཱ་ཐ་ཡེ། འཕགས་པ་ཐོགས་མེད་ཞབས་ཀྱི་

རྟོགས་པ་བརྗོད་པ་ངེས་དོན་ཟླ་ཟེར་དཀར་པོའི་ཕྲེང་

བས་སྙིང་གི་གདུང་བ་འཕྲོག་བྱེད་ཅེས་བྱ་བ།[1]

 

༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽

 

ཇི་ལྟའི་དོན་ལ་འཕགས་པའི་ཐུགས་མངའ་ཞིང༌། ཇི་སྙེད་འཆད་ལ་ཐོགས་པ་མེད་པའི་གསུང༌། །ཇི་ལྟར་བཞེད་བཞིན་བྱམས་མགོན་གཟིགས་པའི་སྐུ། །ཇི་སྐད་གསུངས་བཞིན་འཛིན་ལ་ཕྱག་བགྱིའོ། །མི་ཕམ་ཞལ་གྱི་བདུད་རྩི་གསོལ་བ་ལས། །དབུ་སེམས་ཤིང་རྟའི་སྲོལ་ཆེན་གཉིས་གཟིགས་ནས། །ཐེག་ཆེན་ཆོས་ཀྱི་ངེས་དོན་གསལ་མཛད་པ། །བརྩེ་ཆེན་མཁྱེན་པའི་གཏེར་ལ་ཕྱག་འཚལ་ལོ། །

མཚན་ཉིད་གསུམ་དང་བདེན་པ་རྣམ་གཉིས་དང༌། །བདག་མེད་གཉིས་དང་ཀུན་གཞིའི་ཆོས་ལུགས་ཀྱིས། །ཐེག་ཆེན་གསུང་རབ་མ་ལུས་གསལ་མཛད་པའི། །ཤིང་རྟའི་སྲོལ་འབྱེད་དེ་ལ་ཕྱག་འཚལ་ལོ། །དངོས་གཅིག་དུ་མར་སྣང་བའི་གཏན་ཚིགས་ཀྱིས། །ཕྱི་རོལ་དོན་གཞན་མེད་པར་ཐག་བཅད་ནས། །སྣང་བ་སེམས་སུ་སྒོམ་པའི་རྣལ་འབྱོར་གྱིས། །དབུ་མར་འཁྲིད་མཛད་དེ་ལ་ཕྱག་འཚལ་ལོ། །བཟུང་བ་མེད་ན་དེ་འཛིན་མེད་པ་ཡིས། །རིགས་པས་གཟུང་འཛིན་རང་སྟོང་ཡིན་པའི་ཚུལ། །ལེགས་པར་བཤད་ནས་གཉིས་མེད་དོན་དམ་དུ། །སྟོན་མཛད་འཇིགས་མེད་དེ་ལ་ཕྱག་འཚལ་ལོ། །གཉིས་མེད་ཡེ་ཤེས་སྟོང་པར་མི་འཆད་ཀྱང༌། །ཀུན་རྫོབ་མཐའ་བཞིའི་སྤྲོས་བྲལ་ཁས་བླངས་ནས། །ལྷག་མེད་མྱང་འདས་ཐེག་ཆེན་ལམ་ཉིད་དུ། །འཇུག་ཚུལ་འདོམས་པ་དེ་ལ་ཕྱག་འཚལ་ལོ། །དཀོན་མཆོག་གསུམ་དང་ཟག་མེད་ཡེ་ཤེས་དང༌། །བྱང་ཆུབ་ཡོན་ཏན་སངས་རྒྱས་ཕྲིན་ལས་རྣམས། །དོན་དམ་ཡེ་ཤེས་རྡོ་རྗེར་གསལ་མཛད་ནས། །གཙང་བདག་བདེ་དང་རྟག་པའི་ཆོས་ལུགས་ཀྱང༌། །ཇི་བཞིན་འཆད་མཁས་དེ་ལ་ཕྱག་འཚལ་ལོ། །ཁྱོད་གཞུང་ལས་བྱུང་ཤིང་རྟའི་སྲོལ་གཉིས་པོ། །གངས་ཅན་འདི་ན་ལོག་པར་བཤད་མཐོང་ནས། །ཉིད་གཞུང་ཇི་བཞིན་རྟོག་པའི་རྣམ་དཔྱོད་ཀྱིས། །གཞན་ལ་མ་གྲགས་དོན་འགའ་འདིར་བཤད་བྱ། །བདེན་བཞིའི་ཆོས་དང་སྟོང་ཉིད་ཆོས་ཚུལ་དང༌། །དོན་དམ་རྣམ་ངེས་ཆོས་ཀྱི་ཚུལ་གསུམ་པོ། །ངེས་དོན་ཡིན་ལུགས་སྟོན་པར་ཆོས་མཚུངས་ཀྱང༌། །དགོངས་པའི་དབང་གིས་གྲངས་ངེས་རྣམ་པར་ཕྱེ། །བདག་དང་བདག་གིར་འཛིན་པས་སྟོང་པ་ཡི། །གཉིས་མེད་ཡེ་ཤེས་གང་ཟག་བདག་མེད་ཀྱི། །དོན་དུ་སྟོན་བྱེད་འཁོར་ལོ་དང་པོ་ཡི། །དགོངས་དོན་གང་ཡིན་ཐ་མས་གསལ་བར་བཤད། །འཁོར་ལོ་དང་པོར་བདེན་པ་གཉིས་བསྟན་པ། །ཀུན་རྫོབ་ཇི་བཞིན་སྒྲ་དང་དོན་དམ་ནི། །ལྡེམ་པོའི་ངག་གིས་བསྟན་ཕྱིར་དྲང་བའི་དོན། །ཕྱི་རོལ་དོན་དང་དེ་འཛིན་གྱིས་སྟོང་པའི། །གཉིས་མེད་ཡེ་ཤེས་ཆོས་ཀྱི་བདག་མེད་ཀྱི། །དོན་དུ་སྟོན་བྱེད་འཁོར་ལོ་གཉིས་པ་ཡི། །དགོངས་དོན་གང་ཡིན་འཁོར་ལོ་ཐ་མས་བཤད། །ངེས་དོན་མཐར་ཐུག་འཁོར་ལོ་གཉིས་པར་ནི། །གཉིས་སྟོང་བཤད་ཀྱང་གཉིས་མེད་དོན་དམ་དུ། །ཇི་བཞིན་སྒྲ་ཡིས་གསལ་པོར་མ་བཤད་པས། །བླ་ན་མཆིས་དང་དྲང་བའི་དོན་ཞེས་བྱ། །འཁོར་ལོ་ཐ་མར་གཉིས་མེད་ཡེ་ཤེས་ནི། །དོན་དམ་ཡིན་པ་ཇི་བཞིན་སྒྲ་ཡིས་བཤད། །དེར་བཤད་དེ་ལས་ལྷག་པའི་ངེས་དོན་ནི། །མེད་ཕྱིར་བླ་ན་མ་མཆིས་ངེས་པའི་དོན། །དོན་དམ་མཐར་ཐུག་གཉིས་མེད་ཡེ་ཤེས་ནི། །འཁོར་ལོ་བར་པའི་བསྟན་བྱའི་གཙོ་བོར་བཤད། །འཁོར་ལོ་བར་པ་དྲང་དོན་ཡིན་ནོ་ཞེས། །འཆད་པ་དེ་ནི་ཐོགས་མེད་བཞེད་གཞུང་མིན། །དྲང་ངེས་ཁྱད་པར་བརྗོད་བྱས་མི་འབྱེད་པར། །ལུགས་འདིར་བརྗོད་བྱེད་ཁོ་ནས་འབྱེད་དོ་ཞེས། །ཟེར་བ་རྣམ་བཤད་རིགས་པའི་གཞུང་དང་ནི། །ཐེག་ཆེན་བསྡུས་པའི་སྡོམ་དང་འགལ་བར་ངེས། །སྟོང་པའི་ཚུལ་ལ་ངེས་པ་རྙེད་ཀྱི་བར། །ངེས་དོན་ལྡེམ་པོའི་ངག་གིས་མ་བསྟན་ན། །གཉིས་མེད་ཡེ་ཤེས་བདག་ཏུ་འཁྲུལ་སྲིད་པས། །འཁོར་ལོ་བར་པ་ཇི་བཞིན་མིན་པའི་སྒྲ། །མེད་དང་ཡོད་དང་རང་བཞིན་སྟོང་ཉིད་ཀྱི། །རྣམ་གཞག་ཤེས་ནས་ཀུན་གཞིའི་ཡེ་ཤེས་དང༌། །གཉིས་མེད་ཡེ་ཤེས་བདེ་གཤེགས་སྙིང་པོ་སོགས། །ངེས་དོན་དེ་དག་བདག་དང་བདེན་པར་བཤད། །ཡེ་ཤེས་དེ་ཉིད་སྤྲོས་པ་ཀུན་བྲལ་ཞིང༌། །སྨྲ་བསམ་བརྗོད་པའི་ཡུལ་ལས་འདས་གྱུར་ཀྱང༌། །རང་རིག་ཡེ་ཤེས་ཆེན་པོས་རིག་བྱའི་ཕྱིར། །དམ་པའི་བདག་དང་བདེན་པའི་དངོས་པོར་ངེས། །བདེན་པར་གྲུབ་ཀྱང་སྤྲོས་པའི་ཡུལ་མིན་ཕྱིར། །དེ་ལ་མཚན་འཛིན་ཤེས་བྱའི་སྒྲིབ་པར་བཤད། །རྣམ་གཡེང་རྣམ་རྟོག་རྣམ་བཅུ་གཞན་གྱི་དབང༌། །དེ་ཡིས་གང་བརྟགས་ཀུན་དུ་བཏགས་པར་བཤད། །དེ་ཉིད་དེ་ཡིས་སྟོང་པ་ཡོངས་སུ་གྲུབ། །གཞན་ལ་གང་གྲགས་དེ་དག་གཞུང་ན་མེད། །སེམས་ལས་མ་གཏོགས་ཆོས་གཞན་ཡོད་མིན་ཞིང༌། །གཉིས་མེད་ཡེ་ཤེས་སེམས་ཀྱི་ངོ་བོར་བཤད། །དེ་ཕྱིར་སེམས་ཀྱི་ངོ་བོ་མི་སྟོང་ཡང༌། །བཟུང་འཛིན་གཉིས་ཀྱིས་སྟོང་དེ་གྲུབ་པའི་མཐའ། །ཀུན་བཏགས་རང་སྟོང་གཞན་དབང་གཞན་སྟོང་དང༌། །ཡོངས་གྲུབ་སྟོང་པའི་དངོས་དང་གཞན་དབང་གི །ངོ་བོར་བཤད་ནས་སྤྲོས་ཀུན་འབྱུང་བའི་གཞིར། །འཆད་པ་དེ་ནི་རྣལ་འབྱོར་སྤྱོད་གཞུང་ཡིན། །གཞན་དབང་བདེན་གྲུབ་ཡིན་པར་ཁས་བླངས་ན། །གཟུང་འཛིན་གཉིས་སྟོང་འབྱུང་བའི་གོ་སྐབས་མེད། །དེ་མེད་རྣལ་འབྱོར་སྤྱོད་གཞུང་རྒྱ་མཚོ་ཡི། །ངེས་དོན་མཐར་ཐུག་སྙིང་པོ་གང་ནས་ཚོལ། །གཟུང་འཛིན་རྫས་གཞན་ཁེགས་ཙམ་ཀུན་བཏགས་དག །རང་སྟོང་ཡིན་པར་བཤད་པས་ཤེས་པར་ནུས། །གཞན་དབང་སྒྱུ་མར་འཆད་ཚུལ་མ་ཤེས་ན། །རྣལ་འབྱོར་སྤྱོད་གཞུང་རྫོགས་པར་འཆད་མི་ནུས། །ཀུན་བཏགས་བདེན་མེད་གཞན་དབང་བདེན་གྲུབ་དང༌། །གཟུང་འཛིན་རྫས་གཞན་ཁེགས་པའི་སྟོང་ཉིད་ལ། །ཡོངས་གྲུབ་ཅེས་བྱར་འཆད་པ་རྣམ་བདེན་གཞུང༌། །སེམས་ཙམ་ཞེས་བྱའི་གྲུབ་པའི་མཐའ་དེ་ཡིན། །གཞན་དབང་བདེན་མེད་ཡོངས་གྲུབ་བདེན་པ་ཞེས། །གསལ་བར་བཤད་པས་མཐའ་གཉིས་སེལ་བ་ནི། །རྒྱན་དང་རྣམ་འབྱེད་གཉིས་ཀྱིས་ཤེར་ཕྱིན་མདོ། །དབུ་མར་བཀྲལ་བའི་ཚུལ་ལུགས་མཆོག་དེ་ཡིན། །དེ་ལས་གོང་ན་དབུ་མར་གྲུབ་པའི་མཐའ། །ཡོད་ན་དབང་ཟའི་ལྟ་བར་འགྱུར་ཞེས་བཤད། །དེ་ལྟར་ཤེས་ན་རྣལ་འབྱོར་སྤྱོད་གཞུང་གི །རིང་ལུགས་བླ་ན་མེད་དེ་རྫོགས་པར་མཐོང༌། །ཕྱི་རོལ་དོན་དང་དེ་ཡི་གཟུང་རྣམ་ལ། །གཟུང་འཛིན་ཀུན་བཏགས་ཞེས་བྱར་ངོས་བཟུང་ནས། །གཅིག་དང་དུ་མར་མེད་པའི་གཏན་ཚིགས་ཀྱིས། །གཟུང་རྣམས་བདེན་པར་མེད་པ་དབུ་མའི་ལམ། །གཞན་གྱི་དབང་གི་ངོ་བོ་ཁས་བླངས་ཀྱང༌། །དེ་ཡི་ངོ་བོ་དེ་མ་ཡིན་པའི་ཕྱིར། །གཞན་དབང་བདེན་པར་གྲུབ་པའི་ལུང་མ་ཡིན། །ཡོད་པའི་སྟོང་ཉིད་ཅེས་བྱ་གཞན་གྱི་དབང༌། །རྣལ་འབྱོར་སྤྱོད་གཞུང་གྲུབ་མཐའི་མཐར་ཐུག་ཚེ། །གཟུང་འཛིན་གཉིས་ཀ་ཀུན་དུ་བཏགས་པའི་ཆ། །གཉིས་མེད་ཡེ་ཤེས་ཁོ་ན་དོན་དམ་ཡིན། །དེ་ལས་ལོགས་ན་གཞན་དབང་ཉག་གཅིག་ཀྱང༌། །ངོས་བཟུང་མེད་ན་བདེན་པའི་གོ་སྐབས་ཅི། །སྣང་བ་སེམས་དང་གཞན་དབང་བདེན་གྲུབ་ཀྱང༌། །སེམས་ཙམ་ལུགས་ཡིན་དབུ་མའི་ལུགས་ཉིད་ལ། །རྣམ་རྫུན་ཞེས་བྱར་གྲགས་པ་དེ་གཞུང་མིན། །བདེན་གྲུབ་ཅེས་བྱ་དོན་དམ་བདེན་པའི་མིང༌། །གཞན་དབང་སྤང་བྱར་འཆད་པ་གྲུབ་པའི་མཐའ། །བདེན་པར་གྲུབ་ནས་སྤང་བྱར་སྟོན་པ་ཡང༌། །ཐེག་ཆེན་གཞུང་ལུགས་འཆད་པའི་ཚུལ་མ་ཡིན། །གཟུང་འཛིན་རྫས་གཞན་བཀག་པའི་མེད་དགག་ནི། །ལྡོག་པ་གཞན་སེལ་ཀུན་བཏགས་ཡིན་པའི་ཕྱིར། །ཡོངས་གྲུབ་ཡིན་པའི་ལུང་དང་རིགས་པ་མེད། །སྤྱི་མཚན་བདེན་གྲུབ་ཆོས་ཀྱི་གྲགས་པས་བཀག །ཟག་བཅས་ས་བོན་བསགས་པ་ཀུན་གཞི་སྟེ། །ངེས་འཕངས་རྣམ་སྨིན་ཀུན་གཞིའི་རྣམ་ཤེས་ཡིན། །ཟག་མེད་ས་བོན་གྱུར་པ་ཡེ་ཤེས་དེ། །རང་བཞིན་རིགས་དང་སངས་རྒྱས་སྙིང་པོར་བཤད། །འཁོར་འདས་ཀུན་གྱི་གཞི་དང་ས་བོན་ནི། །ཟག་པ་མེད་པའི་ཡེ་ཤེས་ཉིད་ཀྱིས་བྱས། །དེ་ཕྱིར་ཀུན་གཞིའི་ཡེ་ཤེས་རྣམ་སྨིན་དང༌། །ས་བོན་གསུམ་གྱིས་ཀུན་གཞིའི་ཆོས་ཀུན་བསྡུས། །ས་བོན་ཞེས་པ་ཟག་བཅས་ཀུན་གྱི་དེ། །རྣམ་སྨིན་ཞེས་བྱ་དེས་བསྐྱེད་ལུང་མ་བསྟན། །གདོད་མའི་ཡེ་ཤེས་དེ་ཉིད་ཟག་མེད་ཀྱི། །ས་བོན་ཡིན་ཕྱིར་ཐོས་པའི་རྐྱེན་གྱིས་གསོ། །གསོ་བྱེད་མ་ཚང་མྱ་ངན་མི་འདའ་ཡང༌། །རང་བཞིན་གནས་རིགས་ཆད་པ་ག་ལ་སྲིད། །ལྷག་མེད་དབྱིངས་ཀྱི་ཀུན་གཞིའི་ཡེ་ཤེས་ཀྱང༌། །ཤེས་སྒྲིབ་ས་བོན་ཚོགས་དང་ལྷན་ཅིག་གནས། །མ་རིག་བག་ཆགས་ས་དང་ཟག་མེད་ཀྱི། །ལས་ཀྱིས་ལུས་ལེན་ཞེས་པ་འདིར་མི་བཞེད། །ལྷག་བཅས་ཐེག་པ་ཆེན་པོར་སེམས་བསྐྱེད་ནས། །དབང་པོའི་ལུས་གཅིག་ས་བཅུའི་མཐར་འགྲོ་ཕྱིར། །ཇི་སྲིད་རྫོགས་སངས་མ་རྒྱས་དེ་སྲིད་དུ། །ཀུན་གཞིའི་རྣམ་པར་ཤེས་པ་འདོར་མི་སྲིད། །ཉན་ཐོས་མ་ངེས་སློབ་པའི་ལམ་དག་ནས། །ཐེག་ཆེན་ལམ་ཞུགས་སྨོན་ལམ་མཐུ་དང་ནི། །སྤྲུལ་དང་བསམ་མི་ཁྱབ་བསྒྱུར་འཆི་འཕོ་ཡིས། །སྐྱེ་བ་བླངས་ཏེ་རྫོགས་སངས་རྒྱས་པར་གསུངས། །ཐོགས་མེད་ཞབས་ཀྱིས་ཐེག་ཆེན་རྒྱུད་བླ་མ། །དབུ་མར་བཀྲལ་བའི་ངེས་དོན་མཐར་ཐུག་ནི། །གནས་བདུན་གྱིས་བསྟན་རྡོ་རྗེ་རྣམ་བདུན་ཏེ། །གནས་སྐབས་གསུམ་གྱི་ཟག་མེད་ཡེ་ཤེས་མཆོག །སྦྱང་གཞི་དྲི་བཅས་ཟག་མེད་ཡེ་ཤེས་ནི། །སྦྱོང་བྱེད་ཡོངས་སྦྱོང་དྲུག་བཅུའི་སྒྲུབ་པ་ཡིས། །རྣམ་པར་སྦྱངས་པས་དྲི་མེད་ཡེ་ཤེས་ནི། །མངོན་དུ་བྱེད་པའི་རིམ་པ་དེ་གཟིགས་སོ། །དཔལ་ཕྲེང་གྱིས་ཞུས་མདོ་ཡི་རྗེས་འབྲངས་ནས། །ལྷག་མེད་དབྱིངས་ཀྱི་མྱང་འདས་ཡེ་ཤེས་ཀྱང༌། །ཟག་མེད་ལས་ཀྱིས་མངོན་པར་མཚམས་སྦྱར་ནས། །སྐྱེ་བ་བླངས་ཏེ་མངོན་པར་འཚང་རྒྱའོ། །གཞན་སྟོང་ཚུལ་གྱིས་སྤྲོས་བྲལ་མ་གཏོགས་པ། །གཉིས་མེད་ཡེ་ཤེས་རང་གི་ངོ་བོ་ཡིས། །སྟོང་པར་འཆད་པའི་ལུང་རིགས་འདིར་མ་གསུངས། །འཁོར་ལོ་བར་པའི་དགོངས་དོན་འཆད་པ་ན། །ཡང་དག་མཐའ་དེ་འདུས་བྱས་ཚོགས་རྣམས་ཀྱིས། །རྣམ་པར་དབེན་པའི་གཞན་སྟོང་གསལ་བར་གསུངས། །སངས་རྒྱས་སྙིང་པོ་གློ་བུར་དྲི་མ་ཡིས། །སྟོང་པར་འཆད་ཅིང་བླ་མེད་ཆོས་ཀྱིས་ནི། །སྟོང་པར་མི་འཆད་དེ་ཡང་གཞན་སྟོང་ཚུལ། །གསལ་བར་འཆད་པའི་འགྲེལ་པས་ལེགས་པར་བཤད། །ཀླུ་སྒྲུབ་ཞབས་ཀྱིས་སྐད་ཅིག་ལ་བརྟགས་པའི། །རིགས་པས་བརྟགས་ན་དེ་བཞིན་གཤེགས་སྙིང་ཡང༌། །རྣམ་པར་འཇིག་པའི་ཆོས་ཅན་ཡིན་མོད་ཀྱི། །འགྱུར་མེད་དུ་འཆད་སྐབས་འདིར་དེ་མི་དཔྱོད། །ཀླུ་སྒྲུབ་རིགས་པའི་དཔུང་ཚོགས་མི་བཟོད་ན། །རྟག་བརྟན་གཡུང་དྲུང་ཉིད་དུ་ཇི་ལྟར་འགྱུར། །དེ་ཕྱིར་དབྱིངས་དེ་རྟག་བརྟན་ཞི་བ་དང༌། །གཡུང་དྲུང་ཉིད་དུ་འཆད་པ་དེ་ཡིན་ནོ། །དབྱིངས་དེ་ངོ་བོས་སྟོང་པར་མ་བཤད་ཀྱང༌། །དེ་ལ་མཚན་འཛིན་རྟོག་པ་ཡིན་པའི་ཕྱིར། །ཟབ་གསལ་གཉིས་མེད་ངང་ལ་མཉམ་གཞག་བློ། །མཚན་འཛིན་བག་ཆགས་དང་བཅས་འདིས་དྲུངས་འབྱིན། །ཟག་མེད་ཡེ་ཤེས་དེ་ལས་འགྲོ་ཀུན་དང༌། །རྫོགས་སངས་རྒྱས་ཀྱི་ཡོན་ཏན་ཀུན་འབྱུང་ཕྱིར། །དེ་ཉིད་སེམས་ཅན་ཁམས་དང་སངས་རྒྱས་ཀྱི། །ཁམས་དང་སྙིང་པོར་བཤད་པ་དེ་ཡིན་ནོ། །དབྱིངས་དེ་དགོངས་གཞིར་བཞག་ནས་སེམས་ཅན་ཀུན། །རྫོགས་སངས་རྒྱས་ཀྱི་སྙིང་པོ་ཅན་དུ་བཤད། །རྒྱུ་ཡོད་པ་ལ་འབྲས་བུ་ཡོད་དོ་ཞེས། །བཏགས་པའི་དགོས་པ་སྐྱོན་ལྔ་སྤང་ཕྱིར་ཏེ། །དངོས་ལ་གནོད་བྱེད་འོད་དང་འོད་ཟེར་ཚོགས། །རྣམ་པར་སྤངས་ཏེ་ཉི་མ་ལྟ་བ་བཞིན། །སངས་རྒྱས་སྙིང་པོ་རྟག་བརྟན་དུ་བཤད་པས། །གྲངས་ཅན་གྱིས་བརྟགས་བདག་ཏུ་འགྱུར་སྙམ་ན། །དེ་ལན་གསལ་པོ་ལང་ཀར་གཤེགས་པའི་མདོར། །ཀུན་མཁྱེན་ཉིད་ཀྱིས་གསལ་བར་གསུངས་དེ་ཡིན། །བདག་དང་བདག་མེད་སྤྲོས་པ་ཉེར་ཞི་ལ། །དམ་པའི་བདག་ཏུ་ཐེག་ཆེན་རྒྱུད་བླར་གསུངས། །བདག་མེད་པ་ཉིད་བདག་ཉིད་ཆེན་པོའི་བདག །ཡིན་ཞེས་ཐེག་ཆེན་མདོ་སྡེའི་རྒྱན་དུ་འབྱུང༌། །བླ་མེད་རྡོ་རྗེའི་ཐེག་པའི་གཞུང་དག་ཏུ། །གཉིས་མེད་ཡེ་ཤེས་དེ་ལ་འོད་གསལ་དང༌། །དོན་དམ་བདེན་པའི་མཆོག་ཏུ་བཤད་མང་ཕྱིར། །གང་འདིར་རྟག་བརྟན་བཤད་ལ་སྙེམས་མི་དགོས། །རྡོ་རྗེ་ལྟ་བུའི་གནས་བདུན་དོན་དམ་གྱི། །བདེན་པར་འཆད་པ་ཧ་ཅང་ཐལ་སྙམ་ན། །དཀོན་མཆོག་གསུམ་དང་ཡོན་ཏན་ཕྲིན་ལས་ལ། །བདེན་གཉིས་དབྱེ་བ་ཐོགས་མེད་ཞབས་ཀྱི་བཞེད། །ཁྱད་པར་དག་ལ་མ་དག་དེ་བཞིན་ཉིད། །བྱང་ཆུབ་སེམས་དཔར་རྩ་བས་དངོས་སུ་བསྟན། །སངས་རྒྱས་པས་བསྡུས་ཀུན་རྫོབ་བདེན་པ་ནི། །ཡོད་པར་འཆད་པའི་ཐེག་ཆེན་ཚུལ་མ་བྱུང༌། །སྤང་ཕྱིར་བསླུ་བའི་ཆོས་ཅན་སོགས་གསུངས་པ། །མདོ་གཞན་ལས་འབྱུང་དཀོན་མཆོག་རྣམ་གཉིས་ལ། །ཉེ་བར་དགོངས་པ་གོང་མའི་འཕྲོས་ཀྱིས་ཤེས། །གཞུང་འདིའི་སྐྱབས་གསུམ་དོན་དམ་བདེན་པར་ངེས། །ཐོགས་མེད་ཞབས་ཀྱི་ཐེག་ཆེན་རྒྱུད་བླ་མ། །ཐལ་འགྱུར་གཞུང་དུ་བཀྲལ་བ་གད་མོའི་རྒྱུ། །མདོ་དང་བྱམས་པའི་སྲོལ་ཕྱེ་མ་གཏོགས་པ། །བཤད་སྲོལ་གཞན་གྱི་རྗེས་སུ་འདི་མི་འབྲང༌། །རྒྱལ་བས་ལུང་བསྟན་སངས་རྒྱས་བསྟན་པའི་སྲོལ། །གཞན་ལ་མ་རག་ཉིད་ཀྱི་རྣམ་དཔྱོད་ཀྱིས། །ལེགས་པར་བཤད་ནས་དབུ་མའི་ལམ་ཆེན་པོ། །འཁྲུལ་མེད་འདོམས་པ་ཁྱོད་ལ་ཕྱག་འཚལ་ལོ། །ཐོགས་མེད་ཐོགས་དང་ཆགས་པའི་སྒྲིབ་པ་ལས། །རྣམ་གྲོལ་རྣམ་དཔྱོད་ཅན་གྱིས་གང་བཤད་པ། །འདིར་བཤད་འདིར་ནི་དགེ་བ་གང་ཡོད་དེས། །བདག་ཀྱང་བདག་རྟག་གཙང་བདེའི་གནས་ཐོབ་ཤོག །ཅེས་འཕགས་པ་ཐོགས་མེད་ཞབས་ཀྱི་བདུད་རྩིའི་ཟིལ་ཆར་བློ་གྲོས་ཀྱི་རྒྱ་མཚོས་ཉེ་བར་འཐུངས་པའི་བསོད་སྙོམས་པ། མི་ཕམ་དགེས་པའི་བཤེས་གཉེན་གྱིས་དགེ་བར་སྦྱར་བའི་ཡི་གེ་པ་ནི། ཆོས་ཀྱི་རྒྱལ་མཚན་ནོ།། །།ཤུ་བྷཾ།།

 

[1] པཎ་ཆེན་ཤཱཀྱ་མཆོག་ལྡན་གྱི་བཀའ་འབུམ། ༼མ༽ འཕྲུལ་པར་དཔེ་རིང་། ཤོག་གྲངས་ ༥བ༢ ནས་ ༩བ༢ བར་གསལ།

Leave a Reply

Your email address will not be published. Required fields are marked *