པཎ་གྲུབ་ལས་གཞི།

སྒྲུང་རིང《གངས་འདབས་ཀྱི་དུར་ཁྲོད་དང་ཤམ་བྷ་ལའི་བྱ་རྒོད》ཅེས་པ་པར་སྐྲུན་བྱེད་བཞིན་པ།

དེང་གི་བོད་ཀྱི་རྩོམ་པ་པོ་དང་སྙན་ངག་མཁན་སྐྱབས་ཆེན་བདེ་གྲོལ་གྱིས་སྤྱི་ལོ༡༩༩༩ལོ་ནས་༢༠༠༢ཀྱི་བར་བརྩམས་གནང་མཛད་ཅིང་༢༠༡༧ལོ་ནས་༢༠༡༨བར་ནང་དོན་འཕྲི་སྣོན་གྱིས་གསར་དུ་བཅོས་པའི་བརྩམས་སྒྲུང་རིང་མོ<<གངས་འདབས་ཀྱི་དུར་ཁྲོད་དང་ཤམ་བྷ་ལའི་བྱ་རྒོད>>ཅེས་པ་སི་ཁྲོན་མི་དམངས་དཔེ་སྐྲུན་ཁང་གིས་པར་དུ་བསྐྲུན་ནས་ད་ལྟ་འགྲེམ་སྤེལ་གྱི་སྦྱོར་བ་དངོས་ལ་ཞུགས་ཡོད།

བརྩམས་སྒྲུང་དེ་ནི་བོད་ཀྱི་དེང་གི་རྩོམ་སྟེགས་སུ་དེང་རབས་རིང་ལུགས་དང་དེང་རབས་ཕྱི་མའི་རིང་ལུགས་ཀྱི་རྩོམ་ཉམས་མངོན་པར་དོད་པའི་སྒྲུང་རིང་དང་པོར་ངོས་འཛིན་ཆོག་ལ་སྲོལ་རྒྱུན་གྱི་བརྩམས་སྒྲུང་ལྟར་བྱུང་རིམ་ཀྱག་ཀྱོག་ཆེ་བ་དང་མི་སྣའི་སྣང་བརྙན་གཙིགས་སུ་འཛིན་པ་ཞིག་མིན་པར་སྒྲོམ་གཞི་ལྷོད་ཅིང་ཡུལ་དུས་ཀྱི་བཀག་རྒྱ་མེད་པ་དང་། རྟོག་སྣང་དང་ཁ་མཚར་ཀུ་རེ་ཡིས་ཕྱུག་པ། ཟུར་ཟའི་རི་མོ་ལྟ་བུའི་རྩོམ་ཉམས་ལྡན་པ། མངོན་སུམ་དང་ལྷ་སྒྲུང་། རྨི་ལམ། འབྱུང་འགྱུར་གྱི་དོན་སོགས་དབྱེར་མེད་དུ་འདྲེས་པ་ཞིག་ཡིན། བརྩམས་སྒྲུང་དེ་ཉིད“སྐྱོ་སྐྱོའི་ཉིན་ཐོ”དང་། “གཏམ་རྒྱུད” “ཡུལ་ལྗོངས” “རྩོམ་པ་པོའི་ཆིག་ལབ” བཅས་ཚན་པ་བཞི་རེས་མོས་སུ་འཁོར་ཏེ་གྲུབ་པ་ཞིག་ཡིན་པས་ཚན་པ་དེ་དག་ཀློག་མཁན་གྱིས་སེམས་རྣལ་མོས་རེ་རེ་བཞིན་སྦྲེལ་མ་ཐུབ་ཚེ་རྩོམ་ཧྲིལ་བོ་ཉམས་སུ་མྱོང་བར་བར་ཆད་ཆེན་པོ་ཐེབས་ངེས་ཀྱང་སྲིད་ལ། དེ་ནི་བརྩམས་སྒྲུང་དེ་ཉིད་འཇིག་རྟེན་སྟེང་གི་བརྩམས་སྒྲུང་གཞན་དང་མི་འདྲ་བའི་ཁྱད་ཆོས་སུ་འང་གྲུབ་ཡོད་དོ།།