ནང་པ་དང་ཚན་རིག་པའི་ཤེས་ཡོན་བརྗེ་རེས་ཀྱི་ལམ་སྟོན་བཀའ་སློབ།

ནང་པ་དང་ཚན་རིག་པའི་ཤེས་ཡོན་བརྗེ་རེས་ཀྱི་ལམ་སྟོན་བཀའ་སློབ།

གཙོ་བོ་སངས་རྒྱས་པའི་ཆོས་སྤྱི་དང་།  ལྷག་པར་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་ཞིག་གི་ངོས་ནས་བལྟས་ན། རིག་གནས་གསར་པ་འཕྲུལ་ཆས་ལ་སོགས་པའི་ཚན་རིག་གི་རིགས་ལ་གཏིང་ཟབ་པོས་སློབ་སྦྱོང་དང་ཞིབ་འཇུག་བྱ་རྒྱུ་གལ་ཆེན་པོ་ཆགས་ཡོད། དེ་མཚུངས་ཚན་རིག་པ་དག་ལ་མཚོན་ན། ད་ལྟ་བར་ཞིབ་འཇུག་བྱེད་ཡུལ་གཙོ་བོ་ནི་ཚད་འཇལ་རྒྱུ་ཡོད་པའི་ཕྱིའི་གཟུགས་ཅན་གྱི་རིགས་ཆགས་ཡོད། ཚན་རིག་པས་ནང་ཤེས་པ་ཞེས་བརྗོད་ན་མྱོང་ཚོར་དངོས་སུ་མྱོང་གི་ཡོད་པ་ཞིག་ལ་བརྩིས་པ་ལས། དངོས་སུ་ཕྱི་དངོས་པོའི་གཟུགས་ཅན་རིགས་ལ་དཔྱད་ཚུལ་བཞིན་ནང་སེམས་ཀྱི་འགྲོ་སྟངས་ཐོག་ཞིབ་འཇུག་བྱས་མེད། དེང་སྐབས་ཚན་རིག་པ་ཚོས་གནའ་རབས་རྒྱ་གར་གྱི་རིག་གཞུང་ངམ་དཔལ་ནཱ་ལེནྡྲའི་སྔོན་གྱི་མཁས་པ་དུ་མས་མཛད་པའི་སེམས་ཁམས་རིག་པ་ཞིབ་ཚགས་པོ་ཡོད་པ་དེར་ཡིད་དབང་འཕྲོག་ནས་དོ་སྣང་བྱེད་བཞིན་ཡོད། དེར་བརྟེན་གཉིས་ཀར་ཕན་ཐོགས་ཡོང་གི་ཡོད་པ་གསལ་པོ་རེད།

ཕྱི་ལོ་ ༢༠༡༥ ཟླ་བ ༡༢ ཚེས་ ༡༤ ཉིན་རྒྱ་གར་ལྷོ་ཕྱོགས་ཀྱི་སེ་ར་ཐེག་ཆེན་གླིང་དུ་བཀའ་སྩལ་བ་ལས་བཏུས་པའོ།།