༢༡༽ བྱང་སྒོ་སྲུང་བ་པཎ་ཆེན་ནཱ་རོ་པ།

བཞི་པ། བྱང་སྒོ་སྲུང་བ་པཎ་ཆེན་ནཱ་རོ་པ་ནི། བླ་མ་རྡོ་རྗེ་གདན་པས་མཛད་པའི་གྲུབ་ཐོབ་བརྒྱད་ཅུ་རྩ་བཞིའི་གསོལ་འདེབས་ལས1

བྲམ་ཟེ་རང་གི་བུ་མོ་བསྟེན། །རྡོ་རྗེ་བསྣུན་ཅིང་ས་འོག་བགྲོད། །

ནཱ་རོ་པ་ཞེས་བྱ་བ་ཡི། །བླ་མ་དེ་ལ་ཕྱག་འཚལ་ལོ། །

ཞེས་བསྟོད་ཕྱག་མཛད་ཡུལ་པཎ་ཆེན་ནཱ་རོ་པ་ནི། ཅོ་ནེ་གྲགས་པ་བཤད་སྒྲུབ་ (1675-1748) ཀྱིས་མཛད་པའི་རྒྱལ་རབས་དང་འབྲེལ་བའི་རྒྱ་བོད་ཀྱི་ཆོས་འབྱུང་དགོས་འདོད་ཀུན་འབྱུང་ལས2 བྱང་སྒོ་སྲུང་བའི་ནཱ་རོ་པ་ནི། གྲུབ་ཆེན་ཏེ་ལོ་པས་རྗེས་སུ་བཟུང་ཞིང་བྱིན་གྱིས་བརླབས་པའི་ལོ་རྒྱུས་ནི་གཞན་དུ་གསལ་ལ། འདིས་བདེ་མཆོག་གི་སྒོ་ནས་གྲུབ་པ་ཐོབ་ཅིང་། བདེ་གསང་གཉིས་རྒྱུད་དོན་མན་ངག་ཏུ་བླངས་པ་འཕགས་ཡུལ་དང་། བོད་ཀྱི་མར་པ་ལོ་ཙཱ་བ་སོགས་ལ་བཤད་པའི་སྲོལ་ད་ལྟ་དར་ཆེ་བ་འདི་བཞིན་ཏེ་བོད་ཀྱི་སྔགས་ཕྱོགས་ཀྱི་ཆོས་རྒྱུད་ལ་ཕན་ཆེན་པོ་བཏགས་པས་བཀའ་དྲིན་ཆེ། རྡོ་རྗེ་རྣལ་འབྱོར་མས་བྱིན་གྱིས་བརླབས་ཤིང་། མཐར་སྤྱོད་པ་ལ་གཤེགས་ནས་དངོས་གྲུབ་མཆོག་བརྙེས་ཞེས་གྲག་གོ །ཞེས་བྱུང་ངོ་།།

དེ་བཞིན་རྟ་ཚག་ཚེ་དབང་རྒྱལ་གྱིས་ (འཁྲུངས་དུས་དུས་རབས་15པ།) མཛད་པའི་ལྷོ་རོང་ཆོས་འབྱུང་ལས3། པཎ་ཆེན་ནཱ་རོ་པ་ནི། མཁས་པ་ཆེན་པོར་གྱུར་ཏེ་པཎྜི་ཏ་ཐམས་ཅད་བཀའ་བགྲོས་ནས་ན་ལེན་ཌའི་བྱང་སྒོ་སྲུང་བ་ལ་ཨ་བ་རུ་ཏི་པ་གྲོངས་པའི་ཚབ་ཏུ་བསྟན་པའི་གཉེར་གཏད་ནས་དབང་བསྐུར་དེའི་དུས་སུ་ཤར་སྒོ་ཤན་ཏི་པ་དང་། ལྷོར་ངག་དབང་གྲགས་པ། ནུབ་ཏུ་ཤེས་རབ་འབྱུང་གནས་སྦས་པ་སོགས་ལ་མཁས་པ་སྒོ་དྲུག་ཏུ་གྲགས་ཤིང་། དེ་དག་ཀུན་གྱིས་སྤྱི་བོར་བཀུར་ལ། རྒྱལ་པོ་ལ་སོགས་སྐྱེ་བོ་དུ་མས་མཆོད་དོ། །ཕྱི་ནང་གི་པཎྜི་ཏ་རྣམས་གྲལ་གཡས་གཡོན་ལ་འཁོད་ནས། དང་པོ་ནང་པའི་པཎྜི་ཏ་རྣམས་དང་རྩོད་པས་རྒྱལ་བར་གྱུར་ནས་ཐམས་ཅད་ཀྱིས་ཞབས་སྤྱི་བོར་བླངས་ཤིང་སློབ་མར་ཁས་བླངས། དེ་ནས་ཕྱི་པའི་པཎྜི་ཏ་རྣམས་དང་རྩོད་པས། དེ་དག་ཐམས་ཅད་བཅོམ་ནས་ནང་པའི་བསྟན་པ་ལ་བཙུད་པས། གནས་བརྟན་བསྟན་པ་འཛིན་པར་གྱུར། ཕྱི་ནང་གི་རྒོལ་བ་ཐམས་ཅད་བཟློག་ནས་འཇིགས་པ་མེད་པར་མཛད། མཚན་ཡང་འཇམ་དཔལ་འཇིགས་མེད་གྲགས་པ་ཞེས་པར་ཐོགས་ནས་བསྟན་པའི་བྱ་བ་ལ་དུས་འདའ་བར་བཞུགས་པའི་ཚེ། ཉིན་གཅིག་མི་སྡུག་པའི་མཚན་དང་ལྡན་པའི་བུད་མེད་གཅིག་བྱུང་ནས་ཁྱོད་ཀྱི་ལྟ་བ་དེ་ཅི་ཡིན་དྲིས་པས། དམ་པའི་ཆོས་སོ། །དེའི་ཚིག་ཤེས་སམ། ཤེས་སོ། །དེའི་དོན་ཤེས་སམ། ཤེས་སོ། །ཞེས་སྨྲས་པ་ལ་མི་དགའ་བར་གྱུར་པ་ལ། ཁྱོད་ཀྱིས་ཚིག་ཤེས་པ་ལ་དགའ་ནས། དོན་ཤེས་པ་ལ་མི་དགའ་བ་ཅི་ལྟར་ཡིན་ནམ། ཞེས་པ་ལ། བུད་མེད་དེས། པཎྜི་ཏ་རྫུན་སྨྲ་བ་ལ་ཁོ་མོ་མི་དགའ་བ་ཡིན་ནོ། །དེ་ན་དོན་ཤེས་པ་སུ་ཡོད། བདག་གི་མིང་པོ་ཁོ་ནའོ། །འོ་ན་ཁྱོད་ཀྱི་མིང་པོ་དེ་དང་ཁོ་བོ་སྤྲོད་ཅིག་ཅེས་པ། ཁོ་མོས་སྤྲད་མི་དགོས་ཀྱི། གསོལ་བ་ཐོབ་ཅིང་སོང་དང་ངེས་པར་རྙེད་པར་འགྱུར་རོ། །ཞེས་ཟེར་ནས་མི་སྣང་བར་གྱུར་ཏོ།།

དེ་ནས་སྒོ་སྲུང་ཆེན་པོ་རྣམས་དང༌། དགེ་འདུན་གྱིས་བཤོལ་བར་གསོལ་བ་བཏབ་ཀྱང་མ་གནང་ནས། ནཱ་ལེན་ཌའི་གཙུག་ལག་ཁང་ནས་རིང་དུ་ཕྱིན་པ་ན། ནམ་མཁའ་ནས་སྒྲ་ལ་བདེ་མཆོག་འཁོར་ལོ་བསྟན་ཏེ་བླ་མ་སངས་རྒྱས་ཚོལ་དང་རྙེད། ཅེས་པའི་སྒྲ་གྲགས་ནས་དུར་ཁྲོད་ན་ག་རར་འཇག་མའི་སྤྱིལ་པོ་བྱས་ཏེ། བདེ་མཆོག་གི་ཡི་གེ་བདུན་པ་འབུམ་བཟླས་པའི་ཚེ། ལྟས་དུ་མ་དང་བཅས་ཏེ་ནམ་མཁའ་ལས། འདི་ནས་ཤར་གྱི་ཕྱོགས་ངོས་སུ། །ཁྱོད་འདོད་བླ་མ་སངས་རྒྱས་ནི། །ཏེ་ལོ་པ་ཞེས་ཡོད་ཀྱིས་སོང་། །ཞེས་བྱུང་བ་ལྟར་ནཱ་ལེནྡྲའི་གཙུག་ལག་ནས་པཎ་ཆེན་ཏེ་ལོ་པ་འཚོལ་བར་བྱོན་ནོ།།

དེ་བཞིན་ཇོ་ནང་རྗེ་བཙུན་ཏཱ་ར་ནཱ་ཐས་ (1575-1634) མཛད་པའི་རྒྱ་གར་ཆོས་འབྱུང་ལས4བྱང་སྒོ་སྲུང་བ་ནི། ནཱ་རོ་པ་ཡིན་ལ། དེའི་ལོ་རྒྱུས་གཞན་དུ་ཤེས། སློབ་དཔོན་དེ་ལ་ནི་རྩོད་དུས་ཀྱི་ཐམས་ཅད་མཁྱེན་པ་ཤཱནྟི་པས་ཀྱང་ཆོས་གསན་ཏེ། དེ་ཡང་སློབ་དཔོན་ཤཱནྟི་པ་དཔོན་སློབ་མཆོད་པ་ཞིག་མཛད་པའི་སྐབས། སློབ་མ་ཞིག་གིས་གཏོར་མ་བསྐྱལ་བར་ཕྱིན་པས། གཏོར་སྟེགས་ཀྱི་སྟེང་ན་རྣལ་འབྱོར་བ་ཤིན་ཏུ་འཇིགས་པ་ཞིག་མཐོང་ནས་གཏོར་མ་ཅི་དགར་བསྐྱུར། ཤིན་ཏུ་སྐྲག་སྟེ་ནང་དུ་འོངས། སློབ་དཔོན་ལ་ཞུས་པས། ནཱ་རོ་པ་ཡིན་པར་མཁྱེན་ནས་སྤྱན་དྲངས། དུས་དེར་ཞབས་ལ་གཏུགས་ཏེ། དབང་བསྐུར་བ་དང༌གདམས་པ་དང༌རྗེས་སུ་གདམས་པ་ཤིན་ཏུ་མང་བར་གསན། ཕྱིས་ཀྱང་ཡང་ཡང་གུས་པས་བཏུད། དུས་ཕྱིས་ཤཱནྟི་པ་གྲུབ་པ་བརྙེས་ཙམ་གྱི་དུས་ཤིག་ན། ནཱ་རོ་པས་ཐོད་པ་ཅིག་བསྣམས་ཏེ། སྐྱེ་བོ་ཀུན་ལ་སློང་བ་ལྟར་མཛད་པ་ལ་ཆོམ་པོ་ཞིག་གིས་ཐོད་པའི་ནང་དུ་གྲི་ཆུང་གཅིག་བསྐྱུར། ནཱ་རོ་པས་ལྟ་སྟངས་མཛད་པས་མར་ཁུ་ལྟར་ལྟེམས་ཀྱིས་ཞུ་ནས་གསོལ་ཏེ་སོང༌། བཞི་མདོ་ན་གླང་པོ་ཆེ་ཤི་བའི་རོ་ཞིག་འདུག་པ་ལའང་གྲོང་འཇུག་མཛད་ནས་དུར་ཁྲོད་དུ་བསྐྱལ། དེའི་ལོགས་ནས་མར་ཤཱནྟི་པ་ཕེབས་པ་ལ། ནཱ་རོ་པའི་གསུང་གིས་ཁོ་བོ་རྣལ་འབྱོར་པ་ཡིན་པས་རྟགས་དེ་ལྟར་ལགས། ད་མཁས་པ་ཆེན་པོ་ཡང་རྟགས་སྟོན་པར་མི་སྤྲོའམ་གསུངས་པ་ལ། སློབ་དཔོན་ཤཱནྟི་པ་ན་རེ། བདག་ལྟ་བུས་གཞན་ཅི་ཞིག་འཚལ་ཏེ། འོན་ཀྱང་ཁྱེད་ལྟ་བུས་གནང་ན་བྱའོ་གསུང་སྟེ། མདུན་ན་ཚུར་ཆུའི་བུམ་པ་ཐོགས་པ་འགའ་བྱུང་བ་ལ་ཆུ་ལ་སྔགས་བཏབ་པ་ཙམ་གྱིས་གསེར་ཞུན་མར་སོང༌། དེར་དགེ་འདུན་རྣམས་དང་བྲམ་ཟེ་རྣམས་ལ་སོ་སོར་བགོས་ཏེ་བྱིན་ནོ། །ནཱ་རོ་པས་ཀྱང་བྱང་སྒོ་སྲུང་བ་ལོ་འགའ་ཞིག་མཛད་ནས། སྤྱོད་པ་ལ་གཤེགས་པ་ཡིན། ཞེས་གསུངས་པ་ལྟར་རོ།།

སློབ་དཔོན་འདིའི་གསུང་ལ་མཚོན་ན། སྡེ་བསྟན་དཀར་ཆག་ལས5༼རྒྱུད་ཟ་པ་ལ།༽ དཔལ་གསང་བ་རིན་པོ་ཆེ་ཡིད་བཞིན་གྱི་ནོར་བུ་སྙན་ནས་སྙན་དུ་བརྒྱུད་པ་ཞེས་བྱ་བ། དཔལ་ལྡན་ནཱ་རོ་པས་མཛད་པ། པཎྜི་ཏ་ཆེན་པོ་ཤྲཱི་ནཱ་རོ་པ་དང༌། བོད་ཀྱི་ལོ་ཙཱ་བ་མར་པ་ཆོས་ཀྱི་བློ་གྲོས་ཀྱི་འགྱུར། ༼རྒྱུད་འ་པ་ལ།༽ རྡོ་རྗེ་རྣལ་འབྱོར་མའི་སྒྲུབ་ཐབས། དཔལ་ནཱ་རོ་པའི་ཞལ་གྱི་བརྒྱུད་པ་རྗེས་སུ་གནང་བ། རྒྱ་གར་གྱི་མཁན་པོ་སུ་མ་ཏི་ཀཱིརྟི་དང༌། བོད་ཀྱི་ལོ་ཙཱ་བ་དགེ་སློང་པྲ་ཛྙཱ་ཀཱིརྟིའི་འགྱུར། འདི་ན་རོ་མཁའ་སྤྱོད་ཀྱི་གཞུང་ཡིན། ༼རྒྱུད་ཤ་པ་ལ།༽ དབང་ཆོས་རྟེན་འབྲེལ་འགྲོ་ལྡོག །དཔལ་ནཱ་རོ་པས་མཛད་པ། རྒྱ་གར་གྱི་བླ་མ་ཏེ་ཕུ་པ་དང༌། བོད་ཀྱི་ལོ་ཙཱ་བ་རྨ་བན་ཆོས་འབར་གྱི་འགྱུར། ༼རྒྱུད་ཞི་པ་ལ།༽ སློབ་དཔོན་ཆེན་པོ་ནཱ་རོ་པའི་རྡོ་རྗེའི་གླུ། མ་ཧཱ་ཡོ་ག་ནཱ་རོ་པའི་རྡོ་རྗེའི་གླུ། ཡང་རྡོ་རྗེའི་གླུ། རིམ་པ་ལྔ་བསྡུས་པ་གསལ་བ་ཞེས་བྱ་བ། དཔལ་ནཱ་རོ་པས་མཛད་པ། པཎྜི་ཏ་དེ་ཉིད་དང༌། བོད་ཀྱི་ལོ་ཙཱ་བ་མར་པ་ཆོས་ཀྱི་བློ་གྲོས་ཀྱི་འགྱུར། ༼རྒྱུད་ཟི་པ་ལ།༽ རྗེ་བཙུན་ཡི་གེ་བརྒྱ་པའི་སེམས་དཔའ་གསུམ་གྱི་སྒོམ་པའི་ཐབས། སློབ་དཔོན་ནཱ་རོ་པས་མཛད་པ་སོགས་བཞུགས་སོ།།

1 གྲུབ་ཐོབ་བརྒྱད་ཅུ་རྩ་བཞིའི་གསོལ་འདེབས། སྣར་ཐང་བསྟན་འགྱུར། རྒྱུད། ༼ནུ༽ ཤོག་གྲངས་ ༣༢༥ན༢

2 ཅོ་ནེ་གྲགས་པ་བཤད་སྒྲུབ་ཀྱི་གསུང་འབུམ། ༼༡༢༽ ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༩ ལོ། ཤོག་ ༡༧༧

3 ལྷོ་རོང་ཆོས་འབྱུང་། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༡༩༩༤ ལོ། ཤོག་གྲངས་ ༢༠

4 རྒྱ་གར་ཆོས་འབྱུང་། སི་ཁྲོན་མི་རིགས་དཔེ་སྐྲུན་ཁང་། ༡༩༨༦ ལོ། ཤོག་གྲངས་ ༢༨༧

5 སྡེ་དགེ་བསྟན་འགྱུར་དཀར་ཆག་ཡིད་བཞིན་ནོར་བུའི་ཕྲེང་བ། བོད་གཞུང་ཤེས་རིག་དཔར་ཁང་། ༢༠༠༨ ལོ། ཤོག་གྲངས་ ༧༤

Leave a Reply

Your email address will not be published. Required fields are marked *