༄༅། །རྒྱན་དྲུག་མཆོག་གཉིས་ལ་བསྟོད་པ་རིན་ཆེན་སྤུངས་པ་ཞེས་བྱ་བ།

༄༅། །རྒྱན་དྲུག་མཆོག་གཉིས་ལ་བསྟོད་པ་རིན་ཆེན་སྤུངས་པ་ཞེས་བྱ་བ།[1]

༼རོང་སྟོན་ཤཱཀྱ་རྒྱལ་མཚན་ (1367-1449) གྱིས་མཛད་པ།༽

 

བླ་མ་དང་ལྷག་པའི་ལྷ་ལ་ཕྱག་འཚལ་ལོ། །རྒྱལ་བའི་གསུང་རབ་ཟབ་དོན་སྙིང་པོ་བརྙེས། །ཡང་དག་རིག་པས་དངོས་སྨྲའི་རི་དྭགས་ཀུན། །མ་ལུས་སྐྲག་མཛད་ཀླུ་སྒྲུབ་སྙིང་པོ་ཞེས། །འཛམ་གླིང་མཁས་པའི་གཙོ་བོར་གྱུར་ལ་འདུད། །ཀླུ་སྒྲུབ་གསུང་རབ་ལེགས་བཤད་སྙིང་པོའི་དོན། །གཅིག་ཏུ་བསྡུས་ནས་གཞན་ལ་སྟོན་མཛད་ཅིང༌། །དབུ་མའི་རིང་ལུགས་མཆོག་ཏུ་སྨྲ་བ་པ། །ཨརྻ་དེ་བའི་ཞབས་ལ་ཕྱག་འཚལ་ལོ། །བྱམས་པའི་ཞལ་གྱི་གསུང་གི་བདུད་རྩི་ཐོབ། །

རྒྱ་ཆེན་ཤེས་བྱའི་གནས་ལ་སྤོབས་པ་བརྙེས། །ཆོས་མངོན་མཆོག་ཏུ་གསལ་བར་མཛད་པ་པོ། །འཕགས་པ་ཐོགས་མེད་ཞབས་ལ་ཕྱག་འཚལ་ལོ། །ཐོས་པ་རྒྱ་མཚོའི་བློ་གྲོས་ཕུལ་བྱུང་བརྙེས། །རིག་གནས་ཀུན་ལ་མི་འཇིགས་བདེན་པ་ཐོབ། །འཕགས་པའི་ཡུལ་དུ་སངས་རྒྱས་གཉིས་པ་ཞེས། །རབ་ཏུ་གྲགས་པ་དབྱིག་གཉེན་ཞབས་ལ་འདུད། །རྟོག་གེའི་རིང་ལུགས་སྔོན་མེད་རབ་གསལ་མཛད། །ས་གསུམ་ཁྱོན་འདིར་རིག་པའི་འབྲུག་སྒྲ་བསྒྲགས། །མུ་སྟེགས་རྒོལ་བའི་དཔུང་ཚོགས་བཟློག་པར་མཛད། །ཕྱོགས་ཀྱི་གླང་པོའི་ཞབས་ལ་ཕྱག་འཚལ་ལོ། །ཆོས་དང་ཆོས་མིན་འབྱེད་པའི་བློ་མངའ་ཞིང༌། །མ་རིག་ཚར་བཅད་རིག་པ་སྨྲ་བའི་དབང༌། །མུ་སྟེགས་རྒོལ་བ་ཐམས་ཅད་ཕྱིར་བཟློག་པ། །ཆོས་ཀྱི་གྲགས་པའི་ཞབས་ལ་གསོལ་བ་འདེབས། །སངས་རྒྱས་བསྟན་ལ་ཀླན་ཀའི་དྲི་མ་རྣམས། །རྣམ་པར་བསལ་ནས་ཡོན་ཏན་ཕུལ་བྱུང་བརྙེས། །འཛམ་གླིང་མཁས་པའི་རྒྱན་དུ་གྱུར་པ་པོ། །མཁས་མཆོག་རྒྱན་དྲུག་གཞན་ལ་ཕྱག་འཚལ་ལོ། །འདུལ་བ་རྒྱ་མཚོའི་དོན་ལ་དབང་འབྱོར་ཞིང༌། །ཉེས་ལྟུང་དྲི་མ་མེད་པའི་ཐུགས་མངའ་བས། །འདུལ་བའི་གཞུང་ལུགས་མཆོག་ཏུ་རྒྱས་མཛད་པ། །ཡོན་ཏན་འོད་ཀྱི་ཞབས་ལ་ཕྱག་འཚལ་ལོ། །འདུལ་བ་རྒྱ་མཚོའི་དབུས་ན་ཆེར་གནས་ཤིང༌། །བསླབ་གསུམ་ཡོན་ཏན་བང་རིམ་གྱིས་མཛེས་པ། །ཤཱཀྱ་འོད་དང་འཕགས་པ་ས་གའི་ལྷར། །རབ་ཏུ་དང་བའི་བློ་ཡིས་ཕྱག་འཚལ་ལོ། །རྒྱན་དྲུག་མཆོག་གསུམ་བསྟོད་པའི་དགེ་ཚོགས་ཀྱིས། །མི་ཤེས་དྲི་མ་རིང་དུ་རབ་སྤངས་ཏེ། །མཁྱེན་རབ་དྲི་མ་མེད་པའི་བློ་ཐོབ་ནས། །ཤེས་བྱ་ཀུན་ལ་བློ་གྲོས་རྒྱས་གྱུར་ཅིག །ཅེས་སོགས་དགོན་པ་བ་བསོད་ནམས་རྒྱལ་མཚན་གྱིས་བསྐུལ་བ་ལ་བརྟེན་ནས་རོང་སྟོན་ཆེན་པོས་དཔལ་ནཱ་ལེནྡྲའི་དགོན་པར་སྦྱར་བའོ།།  །།

[1] རོང་སྟོན་གསུང་འབུམ། པོད། ༼ཀ༽ སི་ཁྲོན་མི་རིགས་དཔེ་སྐྲུན་ཁང་། ༢༠༠༨ ལོ། ཤོག་གྲངས་ ༡༩༩

Leave a Reply

Your email address will not be published. Required fields are marked *