༄༅། །ཟླ་བ་གྲགས་པའི་རྟོགས་བརྗོད་ངེས་དོན་གཏམ་གྱི་རོལ་མོ་འདྲེན་པའི་ངག་གི་ཤིང་རྟ།

 

༄༅། །བསྙེངས་བྲལ་ཟླ་བ་གྲགས་པའི་ཞབས་ཀྱི་རྟོགས་པ་བརྗོད་ནས་

ཞུ་བའི་ཕྲིན་ཡིག་བདེན་བརྫུན་གྱི་ཤན་རྣམ་པར་འབྱེད་པ་

ངེས་དོན་གཏམ་གྱི་རོལ་མོ་འདྲེན་པའི་

ངག་གི་ཤིང་རྟ་ཞེས་བྱ་བ[1]

 

༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽

 

དོན་དམ་གཟིགས་པའི་ཆ་ཤས་མ་ཉམས་ཤིང་། །ཀུན་རྫོབ་གྲགས་པའི་འོད་དཀར་མ་འགྲིབས་པར། །རྟེན་འབྲེལ་ནམ་མཁའི་ལམ་ལ་ལྷམ་མེ་བ། །ཟླ་བ་གྲགས་པའི་ཞབས་ལ་ཕྱག་འཚལ་ལོ། །ཀུན་རྫོབ་ཆོས་ལུགས་འཇིག་རྟེན་གཞུང་བཞིན་དུ། །ཞལ་གྱིས་བཞེས་ནས་བསོད་ནམས་ཚོགས་མང་པོས། །འགྲོ་ཀུན་ཕན་བདེའི་ལམ་དུ་འདྲེན་བརྩོན་པའི། །ཤིང་རྟའི་སྲོལ་འབྱེད་ཁྱོད་ལ་ཕྱག་བགྱིའོ། །དོན་དམ་ཆོས་ཚུལ་གྲུབ་མཐའ་གཞུང་ཇི་བཞིན། །རིགས་པར་བཤད་ནས་སྲིད་ཞིའི་རྟོག་པ་ཀུན། །རང་བཞིན་མྱ་ངན་འདས་པའི་ལམ་ཆེན་པོར། །བདེ་བར་འདྲེན་མཛད་ཁྱོད་ལ་ཕྱག་འཚལ་ལོ། །བླང་དོར་ཇི་སྙེད་རྣམ་ཤེས་ཡུལ་གྱི་ཆོས། །ཡེ་ཤེས་ཡུལ་དུ་ངོ་བོས་སྟོང་པའི་ཚུལ། །མི་འགལ་དོན་གཅིག་འདུ་བ་ཟུང་འཇུག་གི །ལམ་དུ་སྟོན་མཛད་ཁྱོད་ལ་ཕྱག་བགྱིའོ། །ཆོས་ཀུན་གདོད་ནས་ཡོད་མ་མྱོང་བ་ན། །རྟག་དང་ཆད་པའི་མཐའ་ལས་གྲོལ་ལོ་ཞེས། །དབུ་མའི་ལམ་ནས་མཐར་འཛིན་གཞིལ་མཛད་པའི། །མཐའ་བྲལ་གསུང་བ་དེ་ལ་ཕྱག་བགྱིའོ། །ཆོས་ཀུན་རང་རང་ངོ་བོས་སྟོང་པ་ལ། །སྤྲོས་པའི་མཚན་མ་ཅི་ཡང་མི་གཟིགས་པར། །རྟེན་དང་ལྟོས་པའི་རྟེན་འབྲེལ་གསུང་བ་ལ། །འཇིགས་མེད་སྨྲ་མཁས་ཁྱོད་ལ་འདི་སྤྲིངས་སོ། །ཁྱོད་གཞུང་འཆད་མཁས་ཉིན་བྱེད་ནུབ་པ་ན། །གྲགས་འདོད་ཁུར་གྱིས་ངལ་བའི་ཁྱབ་འཇུག་གིས། །རྣམ་དཔྱོད་འཁྱོག་པོའི་ལག་པ་རིང་བརྐྱངས་ནས། །ཉིད་གཞུང་འོད་རིས་བསྒྲིབས་པ་ཡིན་སྙམ་བྱེད། །འཆད་རྩོམ་ཉི་ཟླའི་མིག་ཡངས་རྣམ་དཔྱོད་ཀྱི། །གདོང་མཛེས་ལྟ་བུའི་ཀུན་གསལ་ལང་ཚོ་ཡིས། །སྤོབས་པའི་གོ་སྐབས་ཡངས་པར་ཕྱེ་བ་ན། །ཟླ་བར་གྲགས་གཞུང་བདེ་བར་རྒྱུ་མིན་ནམ། །འགྲོ་ཀུན་བསོད་ནམས་ལམ་དུ་འཇུག་པ་ན། །འཇིག་རྟེན་གཞུང་དང་མཐུན་པར་ཁྱོད་ཀྱིས་བཤད། །ལྷན་སྐྱེས་འཁྲུལ་པར་བཏགས་པ་གང་གང་ལ། །ཡོད་མེད་འདོར་ལེན་བྱེད་པར་ཁྱོད་བཞེད་དམ། །འཇིག་རྟེན་ལུགས་ཀྱི་དོན་དམ་ཇི་སྙེད་པ། །ཐ་སྙད་བདེན་པའི་མཚན་གཞིར་ཁྱོད་ཀྱིས་བཤད། །བདག་དང་བདེན་གྲུབ་ཐ་སྙད་བདེན་པ་ཡང་། །ཁས་ལེན་མིན་པ་ཁྱོད་ཀྱི་གཞུང་ཡིན་ནམ། །མུ་སྟེགས་ཀྱིས་བརྟགས་བདག་དང་བདེན་པ་སོགས། །འཇིག་རྟེན་གཞུང་གི་ཀུན་རྫོབ་བདེན་པར་བཤད། །ཀུན་རྫོབ་བདེན་པའི་རྣམ་གྲངས་ཇི་སྙེད་པ། །ཐམས་ཅད་མཁྱེན་བློས་གཟིགས་ལ་ཁྱོད་བཞེད་དམ། །འཇིག་རྟེན་ལུགས་ཀྱི་བདེན་པ་གཉིས་པ་ལ། །ཡང་ལོག་ཀུན་རྫོབ་ཅེས་བྱར་ཁྱོད་ཀྱིས་བཤད། །ཀུན་རྫོབ་གང་ཡིན་ལོག་པའི་ཀུན་རྫོབ་ཏུ། །འཆད་པ་དེ་ཡང་ཁྱོད་ཀྱི་གཞུང་ཡིན་ནམ། །འཇིག་རྟེན་ལུགས་དང་དབུ་མའི་གཞུང་དག་ཏུ། །ཀུན་རྫོབ་གང་ཡིན་འཁྲུལ་པའི་སྣང་བར་བཤད། །ཐམས་ཅད་མཁྱེན་བློའི་ཡུལ་དུ་ཀུན་རྫོབ་ཀུན། །རང་སྣང་ཚུལ་གྱིས་མཁྱེན་པར་ཁྱོད་བཞེད་དམ། །གཉིད་སད་བློ་ལ་རྨི་ལམ་ཇི་བཞིན་དུ། །རྫོགས་སངས་རྒྱས་བློར་ཡུལ་སྣང་མེད་ཅེས་གསུངས། །ཐམས་ཅད་མཁྱེན་བློས་གཟིགས་པ་ལོག་གྱུར་ན། །ཐ་སྙད་ཡུལ་དུའང་མེད་པར་ཁྱོད་བཞེད་དམ། །བདེན་དང་སྒྱུ་མ་སྣང་མེད་ཅེས་བྱ་བའི། །ཀུན་རྫོབ་ཤེས་ཚུལ་རྣམ་གསུམ་ཁྱོད་ཀྱིས་བཤད། །རྫོགས་སངས་རྒྱས་ལ་ཀུན་རྫོབ་སྣང་ཞེས་པ། །ཀླུ་སྒྲུབ་གཞུང་ལུགས་ཡིན་པར་ཁྱོད་བཞེད་དམ། །བདེན་བརྫུན་ཁྱད་པར་ཚད་མའི་ལམ་དུ་ནི། །ཡོད་དང་མེད་ལ་འཆད་པར་ཁྱོད་ཀྱིས་བཤད། །ཀུན་རྫོབ་ཚད་མའི་ཡུལ་ལ་ཡོད་བཞིན་དུ། །རྫུན་པར་འཆད་པ་ཁྱོད་ཀྱི་གཞུང་ཡིན་ནམ། །ཀུན་རྫོབ་རྫུན་ཞིང་མྱ་ངན་འདས་གཅིག་པུ། །བདེན་པར་འཆད་པ་ཁྱོད་ཀྱི་གནས་སྐབས་ལུགས། །བདེན་གཉིས་རང་ལུགས་ཚད་མས་གྲུབ་མཉམ་དུ། །ཁྱོད་ཀྱིས་བཤད་པའི་གནས་སྐབས་ཡོད་དམ་ཅི། །མདོ་སེམས་ལ་སོགས་རང་གི་གྲུབ་པའི་མཐས། །རྣམ་པར་བརྟགས་ནས་ཐ་སྙད་བདེན་པར་འཇོག །ཁྱོད་ཀྱིས་འཇིག་རྟེན་གཞུང་ལ་མ་བརྟེན་པར། །ཐ་སྙད་བདེན་པའི་འཇོག་ལུགས་ཇི་ལྟར་བཞེད། །ཐ་སྙད་འཇོག་པའི་ཚད་མ་ཇི་སྙེད་པ། །དབུ་མའི་གཞུང་གི་ཚད་མ་མིན་པར་བཤད། །གཉིས་སྣང་འཁྲུལ་པས་བསླད་པའི་ཤེས་པ་ཡང་། །ཚད་མར་འཆད་པ་ཁྱོད་ཀྱིས་གཞུང་ཡིན་ནམ། །དབུ་མའི་གྲུབ་མཐར་ཞུགས་ནས་ཀུན་རྫོབ་ཆོས། །རང་རང་ངོ་བོས་སྟོང་པར་ཁྱོད་ཀྱིས་བཤད། །མིག་དང་གཟུགས་སོགས་རང་རང་ཡིན་ཞེས་པ། །དབུ་མའི་གཞུང་ལུགས་ཡིན་པར་ཁྱེད་བཞེད་དམ། །ཇི་སྲིད་དོན་དམ་བདེན་པ་ཁས་ལེན་པ། །དེ་སྲིད་དེ་དེ་རང་སྟོང་མིན་པར་བཤད། །དོན་དམ་བདེན་དང་ངོ་བོས་སྟོང་ཞེས་པ། །གཞི་གཅིག་འདུ་བ་ཁྱོད་ཀྱི་གཞུང་ཡིན་ནམ། །ཆོས་ཀུན་སྤྲོས་དང་བྲལ་བར་འཆད་པ་ན། །དོན་དམ་བདེན་པའི་མཚན་གཞི་ཁྱོད་མི་བཞེད། །མཐའ་བྲལ་དེ་ཉིད་དོན་དམ་བདེན་ནོ་ཞེས། །ཁས་ལེན་བྱེད་པ་ཁྱོད་ཀྱི་གཞུང་ཡིན་ནམ། །དངོས་ཀུན་དེ་ཉིད་དེ་ཡིས་སྟོང་པ་གང་། །རང་སྟོང་ཞེས་བྱའི་དོན་དུ་ཁྱོད་ཀྱིས་བཤད། །རང་རང་དེ་ཉིད་ཡིན་པར་ཁས་བླངས་ནས། །རང་སྟོང་འདོད་པ་ཁྱོད་ཀྱི་བཞེད་ཡིན་ནམ། །དེ་ཉིད་དེ་ཡི་ངོ་བོས་མི་སྟོང་བ། །ཐ་སྙད་བདེན་པའི་འཇོག་ཚུལ་ཡིན་པར་བཤད། །ཀུན་རྫོབ་ཏུ་ཡང་ཆོས་ཀུན་རང་བཞིན་གྱིས། །སྟོང་ཞེས་འཆད་པ་ཁྱོད་ཀྱི་གཞུང་ཡིན་ནམ། །རིགས་དྲུག་སོ་སོའི་ཡུལ་སྣང་ཇི་སྙེད་པ། །སྐྲ་ཤད་འཛིན་བློའི་ཡུལ་དང་མཚུངས་པར་བཤད། །གང་སྣང་དེ་ཀུན་ཡོད་ལ་ཁྱོད་གཞུང་གི །ཐ་སྙད་བདེན་པའི་འཇོག་ཚུལ་ཡིན་ནམ་ཅི། །གང་གི་བཏགས་དོན་འཚོལ་བའི་རིགས་པ་ཡིས། །མ་རྙེད་པ་དེ་བདེན་མེད་ཚད་དུ་བཤད། །བདེན་མེད་ངེས་པའི་ཐོག་མར་བདེན་གྲུབ་ཚད། །སྟོན་དགོས་ཤེས་པ་ཁྱོད་ཀྱི་གཞུང་ཡིན་ནམ། །རང་བཞིན་མེད་པའི་དཔེ་དང་ཤེས་བྱེད་ཀྱི། །གཏན་ཚིགས་ཡོད་ཕྱིར་གཞན་ལ་བསྟན་པར་སླ། །རང་བཞིན་སྒྲུབ་པའི་དཔེ་དང་ཤེས་བྱེད་ཀྱི། །གཏན་ཚིགས་མེད་ཕྱིར་བསྙད་བྱ་མིན་ཞེས་གསུངས། །མཐའ་བྲལ་དཔྱོད་ཚེ་ཀུན་རྫོབ་ལྟ་ཅི་འཚལ། །དོན་དམ་དམ་བཅའ་མེད་པར་ཁྱོད་ཀྱིས་བཤད། །གཞན་གསུང་བཀག་ནས་རང་གཞུང་སྒྲུབ་པ་ནི། །མཐའ་བྲལ་ཆེན་པོའི་འཆད་ཚུལ་དུ་བཞེད་དམ། །ཆོས་ཀུན་རང་རང་ངོ་བོས་མི་སྟོང་བ། །རང་སྟོང་ཞེས་བྱའི་དོན་དུ་ཁྱོད་མི་བཞེད། །ཚད་གྲུབ་ཆོས་རྣམས་ཚད་མས་མ་གྲུབ་པའི། །བདེན་པས་སྟོང་པ་གཞན་སྟོང་ཚུལ་མིན་ནམ། །བདག་དང་ཤིང་རྟའི་འདོགས་ཚུལ་མཚུངས་བཤད་ནས། །དེ་ཉིད་དེས་སྟོང་བདག་མེད་གཉིས་ཀྱི་དོན། །ཡིན་པར་བཤད་མོད་བདག་དང་ཤིང་རྟ་གཉིས། །ཡོད་མཉམ་འཆད་པ་ཁྱོད་ཀྱི་གཞུང་ཡིན་ནམ། །ཆོས་དང་གང་ཟག་དེ་ཉིད་ཀྱིས་སྟོང་པ། །བདག་མེད་གཉིས་པོའི་དོན་དུ་ཁྱོད་ཀྱིས་བཤད། །ཁྱོད་ཆོས་གཅིག་པུ་ཆོས་ཅན་སོ་སོ་ཡིས། །རྣམ་པར་དབྱེ་བ་ཁྱོད་ཀྱི་གཞུང་ཡིན་ནམ། །གཞི་དང་རྟགས་དཔེ་གཞན་གྱིས་ཁས་བླངས་པ། །གཞན་གྲགས་ཞེས་བྱའི་དོན་དུ་ཁྱོད་ཀྱིས་བཤད། །ཚུལ་གསུམ་ཚད་མས་གྲུབ་པ་གཞན་གྲགས་ཀྱི། །དོན་དུ་འཆད་པ་ཁྱོད་ཀྱི་གཞུང་ཡིན་ནམ། །དོན་དམ་དཔྱོད་ཚེ་བསྒྲུབ་བྱ་བསྒྲུབ་པ་ནི། །རང་རྒྱུད་རྟགས་ཀྱི་དམ་བཅར་ཁྱོད་ཀྱིས་བཤད། །དགག་བྱ་འགོག་དང་བསྒྲུབ་བྱ་བསྒྲུབ་པ་གཉིས། །དོན་གཅིག་འདུ་བ་ཁྱོད་ཀྱི་གཞུང་ཡིན་ནམ། །སེམས་དང་སེམས་བྱུང་ཇི་སྙེད་གཉིས་སྣང་གི །བག་ཆགས་འཁྲུལ་པའི་སྣང་བར་ཁྱོད་ཀྱིས་བཤད། །རྫོགས་སངས་རྒྱས་ཀྱང་སེམས་དང་སེམས་བྱུང་གི །རྒྱུ་བས་ཆོས་ཀུན་གཟིགས་པར་ཁྱོད་བཞེད་དམ། །དབུ་མར་ཞུགས་ནས་ཡེ་ཤེས་ལ་རྟོན་གྱི། །རྣམ་པར་ཤེས་པ་ཡིད་རྟོན་མེད་པར་བཤད། །འཕགས་པའི་མཁྱེན་བློ་ཡིད་ཀྱི་རྣམ་ཤེས་སུ། །འཆད་པ་དེ་ཡང་ཁྱོད་ཀྱི་གཞུང་ཡིན་ནམ། །ཐུབ་པའི་དམ་ཆོས་སྟོན་ཚུལ་རྣམ་གསུམ་ལས། །དང་པོར་བདག་དང་བར་དུ་བདག་མེད་དག །ངེས་བསྟན་ཐ་མར་ཁས་ལེན་མེད་ཅེས་པ། །ཁྱོད་ཀྱི་ངེས་དོན་འཆད་པའི་མན་ངག་ཡིན། །ཐོག་མར་བདེན་གྲུབ་མིང་ཡང་མི་འདོད་ཅིང་། །བར་དུ་བདེན་མེད་ངོ་བོས་སྟོང་པ་དང་། །ཐ་མར་ཆོས་ཀུན་ཡོད་པར་ཁས་ལེན་པ། །གྲགས་དཀར་ཁྱོད་ཀྱི་གཞུང་ལུགས་མིན་སྙམ་བྱེད། །མཉམ་གཞག་ཚེ་ན་ཆོས་ཀུན་སྟོང་ངོ་ཞེས། །ཡིད་བྱེད་དེ་འདྲ་ལྟ་བའི་དུག་ཏུ་བཤད། །བདེན་པས་སྟོང་ཞེས་ཡིད་ཀྱིས་མ་བཟུང་ན། །སྤྲོས་བྲལ་རྟོགས་བློ་མིན་པར་ཁྱོད་བཞེད་དམ། །དངོས་གཞིའི་ཚེ་ན་སོར་རྟོག་ཤེས་རབ་ཀྱང་། །ཡེ་ཤེས་མེ་ཡིས་བསྲེག་བྱར་ཁྱོད་ཀྱིས་བཤད། །ཡང་ཡང་སེམས་དང་འཇལ་དང་ངེས་རྟོག་པ། །མཉམ་གཞག་དངོས་གཞིར་གྲགས་དཀར་ཁྱོད་བཞེད་དམ། །ཀླུ་སྒྲུབ་བཞེད་གཞུང་སྤྲོས་པའི་མཐའ་བྲལ་བ། །སྲོལ་འབྱེད་གཞན་གྱི་ལམ་ནས་མ་དྲངས་པར། །ཆོས་ཀུན་རང་རང་ངོ་བོས་སྟོང་པའི་ཚུལ། །གསལ་བར་འདོམས་མཁས་ཁྱོད་ལ་ཕྱག་འཚལ་ལོ། །ཉིད་གཞུང་ཇི་བཞིན་བཤད་ན་ཀུན་གྱི་བློར་མི་ཤོང་། །གཞན་ཟེར་དེ་ཉིད་སྨས་ན་ཁྱོད་གཞུང་འཇིག་པར་དོགས། །མི་སྨྲའི་བརྟུལ་ཞུགས་འཛིན་ནམ་ཁྱོད་གཞུང་ཉིད་འཆད་ཅེས། །མཁྱེན་བཟང་གྲགས་དཀར་ལྡན་པ་ལ་སྤྲིངས་སོ། །ཟླ་བའི་གཞུང་ལུགས་ངེས་དོན་ཆ་ཤས་མཛོད། །རང་བཟོའི་སྒྲ་གཅན་གྱིས་ཟོས་རྣམ་བརྟགས་པས། །གང་ནས་བསྒྲིབས་དེ་ཐོག་མར་བསལ་གྱུར་ནས། །འོད་དཀར་སྣང་བས་ཁྱོད་གཞུང་མཛེས་བྱེད་ཤོག །གངས་ཅན་འདི་ན་གྲགས་པ་གསལ་ལྡན་འགས། །ཟླ་གཞུང་ཤིང་རྟ་འཁྱོག་པོར་དྲངས་མཐོང་ནས། །མཐའ་གཉིས་སེལ་བའི་རབ་མཉམ་ཁ་ལོ་པས། །ངེས་དོན་ལམ་དུ་དྲངས་པ་མི་མཚར་རམ། །ཞེས་དཔལ་ལྡན་ཟླ་བ་གྲགས་པའི་ཞལ་སྔ་ནས་ཀྱིས་ངེས་དོན་གྱི་རྔ་སྒྲས། བློ་གྲོས་ཀྱི་ཁང་བཟང་དགེ་བར་བྱས་པའི་སྤོང་བ་པ། འཇམ་དཔལ་དགའ་བའི་བཤེས་གཉེན་གྱིས་ཉེ་བར་སྦྱར་བའི་ཡི་གེ་པ་ནི་ཆོས་ཀྱི་རྒྱལ་མཚན་ནོ།།  །།མངྒ་ལཾ།།   །།[2]

 

[1] པཎ་ཆེན་ཤཱཀ་མཆོག་བཀའ་འབུམ། པོད། ༼མ༽ འཕྲུལ་པར་དཔེ་རིང་། ཤོག་གྲངས་ ༡༨བ༦ ནས་ ༢༢ན༦ བར།

[2] གསུང་འབུམ་དུ་གསལ་བའི་རྟོགས་བརྗོད་ནང་དུ་མཆན་གྱི་ཡིག་ཆུང་རྣམས་འདིར་བཀོད་མེད་པས་དེ་དོན་དགོངས་འཇགས་འཚལ།།

Leave a Reply

Your email address will not be published. Required fields are marked *