༄༅། །བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བ་ལྷའི་རྟོགས་པ་བརྗོད་པ་པདྨ་དཀར་པོའི་ཕྲེང་བ་བྱིན་རླབས་ཀྱི་དྲི་བསུང་འཕྲོ་བྱེད།

 

༄༅། །བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བ་ལྷའི་རྟོགས་པ་བརྗོད་པ་པདྨ་དཀར་པོའི་ཕྲེང་བ་བྱིན་རླབས་ཀྱི་དྲི་བསུང་

འཕྲོ་བྱེད་ཅེས་བྱ་བ་བཞུགས་སོ།།[1]

 

༼པཎ་ཆེན་བློ་བཟང་ཆོས་རྒྱལ་ (1570-1662) གྱིས་མཛད་པ།༽

 

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །མ་ལུས་སངས་རྒྱས་ཀུན་གྱི་ཡེ་ཤེས་ནི། །སྲིད་འདིར་བརྩེ་བས་སྐྱོང་བའི་ཟློས་གར་ལས། །བློ་བཟང་གྲགས་པའི་བ་དན་མཛེས་པའི་ཞབས། །རྟེན་བྱེད་པདྨོའི་ཕྲེང་བ་སྤྱི་བོར་འཛིན། །ཡིད་འོང་འཆར་གའི་ཚོན་རིས་ལ་འཁུ་ཟླ་བ་དམར་བའི་འཛུམ་འོད་ཅན། །

ཚོགས་གཉིས་རྡུལ་མང་ཆ་ཤས་ཡོངས་རྫོགས་མཚན་དཔེ་འོད་བརྒྱའི་དྲ་བས་འཁྱུད། །རྨོངས་པའི་ཚ་གདུང་མ་ལུས་སེལ་བྱེད་ཐུགས་རྗེའི་བསིལ་ཟེར་ཕྱོགས་བཅུར་འགྱེད། །བློ་གྲོས་ཀུ་མུད་བཞད་པའི་དཔལ་སྟེར་ངག་གི་དབང་པོར་ཕྱག་འགྱིད་དོ།།

མཁྱེན་བརྩེའི་ཆུ་གཏེར་གཏིང་མཐའ་མི་མངོན་ཞིང་། །ཡོན་ཏན་རིན་ཆེན་དུ་མས་ཡོངས་སུ་གང་། །རྨད་བྱུང་འཕྲིན་ལས་རླབས་ཕྲེང་གཡོ་བ་ཅན། །རྒྱལ་སྲས་རྒྱ་མཚོ་ཆེ་རྣམས་རྒྱལ་གྱུར་ཅིག །གང་གི་ཡོན་ཏན་པདྨའི་མཚོར། །བདག་ཡིད་བུང་བ་སོང་གྱུར་པས། །སྙན་ངག་མགྲིན་པའི་རྔ་གསང་སྟོང་། །སྒྲོག་ལ་སུ་ཞིག་བཏང་སྙོམས་འཛིན། །བུང་བ་བུང་བ་གཞོན་ནུའི་ཐབས་མཁས་ཀྱིས། །ཆུ་སྲིན་ཆུ་ཡི་འབྱུང་གནས་འདྲེན་བྱེད་པ། །དེ་བཞིན་དེ་བཞིན་གཤེགས་པའི་སྲས་ཆེན་འདི། །བསྔགས་ཀྱང་བསྔགས་པའི་ཡུལ་ལས་འདས་ན་ཡང་། །ཐོག་མེད་དུས་ནས་བྱུང་རྒྱལ་སྨྲ་བ་ཡིས། །དག་ནི་དོན་དང་བཅས་ལས་རྣམ་པར་གོལ། །ད་ནི་རོ་འཛིན་སྙིང་པོ་བླང་བའི་ཕྱིར། །རྟོགས་བརྗོད་པད་དཀར་ཕྲེང་བ་སྤེལ་བར་བྱ།།

གང་ཡང་རྙེད་པ་དང་བཀུར་བསྟི་དང་གྲགས་པ་སོགས་རྩྭ་ལྟར་དོར་ཏེ། གཞན་གྱི་དོན་ཚུལ་བཞིན་དུ་བསྒྲུབས་ན་ཡོངས་སུ་རྟོག་པ་མེད་པར་འདོད་དགུ་ཐམས་ཅད་རྩོལ་བ་མེད་པར་སྦྱིན་པ་བླ་ན་མེད་པའི་བྱང་ཆུབ་ཀྱི་ནོར་བུ་རིན་པོ་ཆེ་ཡང་རྙེད་པར་དཀའ་བ་མིན་ན། ཚོར་བ་གདུང་བའི་རྣམ་པ་ཅན་ཕྱིར་བཅོས་པ། མངོན་པར་མཐོ་བའི་བདེ་ཙམ་ལྟ་ཅི་སྨོས། དེའི་ཕྱིར་བདག་ལ་ཕན་པར་འདོད་པའི་སྐྱེ་བོ་རྣམས་ཀྱིས་ཡང་དག་པའི་བདེ་བའི་དཔལ་ལ་དུས་རྟག་ཏུ་འཇུག་པར་བྱ་བའི་ཕྱིར། བླ་ན་མེད་པའི་བྱང་ཆུབ་ལས་སླར་ལྡོག་པ་མེད་པའི་གོ་ཆ་བགོ་བ་དང་། སྐྱེ་བོ་ཕལ་མོ་ཆེས་རྗེས་སུ་ཡི་རང་བ་ཙམ་ཡང་བྱ་དཀའ་བའི་གསལ་མཆོག་རྣམས་ཀྱིས་སྤྱོད་པ་ལ་སློབ་པ་དང་། ཤེས་བྱ་མཐའ་དག་ལ་ཁྱབ་པའི་མཁྱེན་པ་ནི་ལྷའི་ལམ་ལྟར་མཐའ་ཡས། སེམས་ཅན་ཐམས་ཅད་ལ་ནི་རྒྱུ་མེད་པར་བདག་ཉིད་ཀྱི་བུ་བཞིན་དུ་བྱམས། ཐུབ་པའི་བསྟན་པ་ལ་ནི་རྒྱལ་སྲས་དམ་པ་ཞི་བའི་ལྷ་ཞེས། མིའི་སེང་གེ་ལྟར་སྙན་པའི་གྲགས་པ་ཕྱོགས་ཀྱི་ཕ་མཐར་འགྲོ་བ་དེ་ཉིད་ཀྱི་རྨད་དུ་བྱུང་བའི་མཛད་པ་རྒྱ་མཚོ་ལྟ་བུ་ལས། ཟེགས་མ་ཙམ་ཞིག་མཆོག་ཏུ་དད་པའི་རྔ་ཡབ་ཀྱི་རྩེ་མོས་བླངས་ཏེ་སྙན་ངག་གི་སྙིམ་པས་མཆོད་པར་བྱའོ།།

རྒྱལ་སྲས་གསར་པའི་ཟླ་ཚེས་ཆེས་ཕྲ་ཡང་། །ལྷ་བཅས་བདེ་འབྱུང་གཙུག་ཏུ་བསྟེན་པར་འོས། །དེའི་ཕྱིར་གང་གི་ཡོན་ཏན་ཆ་ཤས་ཙམ། །མགྲིན་པའི་རྒྱུད་མང་ལམ་དུ་མཚོན་བྱེད་པ། །དེ་ལས་བྱུང་བའི་གནམ་བསྐོས་ཁོར་ཡུག་གི །ས་འཛིན་ཁོངས་སུ་ཡངས་པ་མིན་ནོ་ཞེས། །ཉི་མའི་གཉེན་གྱི་ལྗགས་ཡངས་པད་ཚལ་དབུས། །ལུང་མང་བུང་བའི་དབྱངས་ཀྱིས་ལེགས་པར་བསྒྲགས། །དེའི་སླད་རྣམ་དཔྱོད་ཀུ་ཤའི་ཕོན། །གང་གི་ཡོན་ཏན་རྒྱ་མཚོ་ལ། །རེག་པ་ལས་བྱུང་ངོ་མཚར་གྱི། །ཆུ་ཐིགས་བླངས་ཏེ་གར་བགྱིད་དོ། །ལྷག་བསམ་དག་པའི་སྤྲིན་གསེབ་ནས། །དམ་པ་རྣམས་ཀྱི་མཛད་པ་ཡི། །དབྱར་སྐྱེས་རྔ་གསང་བསྒྲགས་པ་ལ། །རབ་དགའ་མི་རྒྱས་མདོངས་ལྡན་སུ།།

དེ་ཡང་འདི་སྐད་ཐོས་ཏེ། བསྐལ་པ་བཟང་པོའི་སངས་རྒྱས་སྟོང་གིས་ཆོས་ཀྱི་འཁོར་ལོ་བསྐོར་བའི་བསྟི་གནས་དམ་པ། རྡོ་རྗེའི་གདན་གྱི་ནུབ་ཕྱོགས་ན་དགེ་བཅུའི་ཡོན་ཏན་གྱིས་ཆེད་དུ་བརྒྱན་པ་ལྟ་བུའི་ཡུལ་འཁོར་མོ་བཟང་པོ་ཞེས་བྱ་བར། སྔོན་གྱི་ལྷའི་ལྷ་དམ་པ་དུ་མ་ལ་བསོད་ནམས་ཀྱིས་ས་བོན་ཡོངས་སུ་བསྐྲུན་པ། མཆོག་ཏུ་དཀར་བ་ཁ་བའི་དུམ་བུ་འཁྲིགས་པ་ལྟ་བུའི་རིགས་དང་ལྡན་པའི་ལྷ་མིའི་དབང་ཕྱུག་ཤིང་སཱ་ལ་ཆེན་པོ་ལྟ་བུ། ཡབ་རྒྱལ་པོ་དགེ་བའི་གོ་ཆ་ཞེས་བྱ་བ་དང་། ཡུམ་ནི་རྡོ་རྗེ་རྣལ་འབྱོར་མའི་སྤྲུལ་པར་གྲགས་པ་ཞིག་སྟེ། གཉིས་ཀའང་རང་བཞིན་གྱིས་དབང་པོ་རྣམས་ནི་ཡོངས་སུ་དུལ། ཡ་རབས་ཀྱི་སྤྱོད་ཚུལ་དུ་ཀཱུ་ལའི་གོས་ནི་གྱོན། ངོ་ཚའི་སྐ་རགས་ཁྲེལ་ཡོད་ནོར་བུའི་ཟ་ར་ཚགས་འཕྱང་བས་ནི་དཀྲིས། དད་པའི་ལང་ཚོ་གཏོར་བའི་རྒྱན་གྱིས་མཆོག་ཏུ་མཛེས་པ་ཞིག་གོ།

རབ་རྨོངས་ཕ་རོལ་མཚོན་གྱིས་གཡུལ་བཟློག་པའི། །དགེ་བའི་གོ་ཆ་དོན་མཐུན་རིགས་ཀྱི་ནི། །ཐིག་ལེ་གང་གིས་འཛིན་པའི་དཔལ་མོ་མཆོག །བྱང་ཆུབ་སེམས་དཔའི་མ་མ་མཛེས་སྡུག་མ། །དོན་ཀུན་གྲུབ་པས་སྒྱུ་འཕྲུལ་བཞིན། །རྨད་བྱུང་སྙིང་སྟོབས་རབ་རྫོགས་པའི། །ཕུན་ཚོགས་རྒྱལ་བའི་མྱུ་གུ་ཡིས། །དེ་ཡི་མངལ་ནི་སྐལ་བཟང་བྱས། །སྐྱེ་རྒ་ན་འཆིའི་ཚང་ཚིང་འཁྲིགས་པ་མ་ལུས་པ། །བདག་མེད་ཡེ་ཤེས་བྱིན་ཟ་འབར་བས་བཅོམ་གྱུར་ཀྱང་། །བདག་བཞིན་གཞན་ལ་རྣམ་པར་བལྟ་བའི་རླུང་ཤུགས་ཀྱིས། །ཀུན་ནས་དྲངས་པས་ཡུམ་གྱི་ལྷུམས་སུ་དེ་ཡིད་ཁྱེར།།

དེ་ལྟར་ཟླ་བའི་གྲངས་ཡོངས་སུ་རྫོགས་པ་ན། རྒྱལ་བུ་དོན་ཐམས་ཅད་གྲུབ་པས། ལྷ་མོ་ཆེན་མོ་སྒྱུ་འཕྲུལ་ཇི་ལྟ་བ་བཞིན་དུ། ཡུམ་ལ་ཚོར་བ་གདུང་བའི་རེག་པས་གོས་པ་མེད་པར། ཁྱེའུ་གཟུགས་བྱད་ཤིན་ཏུ་མཛེས་ཤིང་བལྟ་བས་ངོམས་པ་མེད་པ་མགོ་ཟླུམ་ཞིང་རྒྱས་པ། དཔྲལ་བའི་དབྱེས་ཟླ་བ་ལྟར་ཆེ་བ་ཞིག་འཁྲུངས་པར་གྱུར་ཏོ། །མིན་མ་འདུལ་བྱེད་གཞུ་ཡི་སྒྱུ་འཕྲུལ་གྱིས། །མཛེས་ལྡན་ཟླ་བའི་བཞིན་ཅན་རི་དྭགས་མིག །གསེར་གྱི་རྡུལ་མང་བརྩེགས་པའི་ལྗོན་པ་ཞིག །མི་རྣམས་ཡ་མཚན་མཚོན་སླད་བསྐྲུན་པ་སྙམ། །ཇི་ལྟར་འདམ་ལས་སྐྱེས་པའི་ཀ་མ་ལ། །མི་གཙང་འདམ་གྱི་དྲི་མ་སྤངས་པ་བཞིན། །མངལ་གྱི་ཆུ་འཛིན་ལྟོ་བ་ལས་འོངས་ཀྱང་། །དེ་ཡི་འཆིང་བའི་རྒྱ་ལས་རྣམ་པར་གྲོལ། །མི་བཟད་སྙིགས་མ་མཚོ་ལྟར་བདོ་བའི་མཐུས། །བུ་རམ་ཤིང་པ་ཉིན་མོའི་དབང་ཕྱུག་ཀྱང་། །དུས་ཀྱི་ནུབ་རིའི་རྩེ་མོར་གོས་དམར་བཟུང་། །དེའི་ཚེ་སྲས་བཅས་ཕྱོགས་བཅུའི་རྒྱལ་བ་ཡི། །མཁྱེན་བརྩེའི་ཆུ་ཤེལ་རྫོགས་པ་ལས་འཁྲུངས་པའི། །རྒྱལ་སྲས་དཔའ་བོ་སྨྲ་བའི་ཟླ་བ་ཞིག །འཕགས་ཡུལ་ཤར་རིའི་རྩེ་མོར་མངོན་འཕགས་ཏེ། །ཐུབ་བསྟན་ཀུནྡའི་ཚལ་ལ་ངལ་བསོ་བྱིན།།

དེ་ནས་བཙས་པའི་ཆོ་ག་རྣམས་རྒྱས་པར་བྱས་ཏེ། མཚན་ཡང་ཞི་བའི་གོ་ཆ་ཞེས་བརྟགས་སོ། །དེ་དེ་ལྟར་གདུགས་རེ་རེ་འདས་པ་ནའང་། ཡར་ངོའི་ཟླ་ལྟར་གཟི་མདངས་ནི་ཇེ་ཆེར་གྱུར། བྱིས་པ་ནས་ཕ་མ་དང་རྒན་རབས་རྣམས་ལ་ནི་བསྙེན་བཀུར་བར་བྱེད། མངའ་རིས་ཀྱི་སྐྱེ་བོ་རྣམས་ནི་བདག་གི་བུ་བཞིན་སྐྱོང་། ལེ་ལོ་མེད་ཅིང་རང་བཞིན་གྱིས་ཡིད་གཞུངས་པས་རྒྱལ་སྲིད་སྐྱོང་བ་དང་རྗེས་སུ་མཐུན་པའི་རིག་པའི་གནས་བཅོ་བརྒྱད་རྟོགས་པའི་བློ་རྒྱ་ཆེན་པོར་གྱུར་ཏོ། །དེ་ལ་དམ་པའི་རྗེས་འགྲོ་བློ་ཡི་དབྱིག །དབྱར་གྱི་དཔལ་མོ་དར་ལ་བབ་པའི་དུས། །རྒྱ་མཚོ་ཆུ་བོའི་རྒྱུན་གྱིས་གང་བ་ལྟར། །ཕན་ཚུན་འགྲན་པ་བཞིན་དུ་འཕེལ་བར་གྱུར། །མཐའ་དག་ཤེས་བྱའི་ཆུ་གཏེར་ཆེར། །རྣམ་དཔྱོད་གྲུ་ཡིས་ལེགས་ཞུགས་ཏེ། །ལེ་ལོའི་དགྲ་ཡིས་བསྐྱོད་པ་ལས། །ཕ་རོལ་སོན་པར་ཅིས་མི་འགྱུར།།

དེ་ལྟ་བུའི་གཞོན་ནུ་དེ་སྐྱེད་ཚར་བསྲིངས་ཏེ། ལོ་ལྔ་དྲུག་ཙམ་ལོན་པའི་ཚེ། གྲུབ་པ་ཐོབ་པའི་རྣལ་འབྱོར་བ་སྦས་པའི་བརྟུལ་ཞུགས་སྤྱོད་པ་ཞིག་དང་མཇལ་ཏེ། འཇམ་དཔལ་རྣོན་པོ་བསྒྲུབ་པའི་ཐབས་ཞུས་ནས། ཉིན་མཚན་ཀུན་ཏུ་གཡེང་བའི་གོ་སྐབས་སྒོམ་བཟླས་དང་། མཆོད་བསྟོད་སོགས་ལ་བརྩོན་པའི་བྱ་བས་ཕྲོགས་པས། རིང་པོ་མ་ལོན་པར་འཇིག་རྟེན་གྱི་མཛེས་པ་གཅིག་ཏུ་བསྡུས་པ་ལྟ་བུའི་རྗེ་བཙུན་འཇམ་པའི་དབྱངས་ཀྱི་ཞལ་བཟང་མངོན་པར་དགའ་བའི་རི་དྭགས། གཞོན་ནུ་དེའི་ལྟ་བྱེད་རྣམ་པར་གཡོ་བའི་སྒྲོ་ལྡན་གྱིས་བཟུང་བར་གྱུར་ཏོ།།

གྲུབ་པའི་མན་ངག་པདྨོའི་འབྱུང་གནས་ཀྱི། །སྦྱོར་བས་འཇམ་དབྱངས་ཞལ་བཟང་པདྨོའི་ཚལ། །རྣམ་པར་ཕྱེ་བའི་མཛེས་པ་ལ་ཆགས་པ། །གཞོན་ནུ་རྐང་དྲུག་ལྡན་པ་མགོན་དང་བཅས། །བརྩེ་བས་སྲིད་གནས་སྲིད་པའི་ཉེས་པ་སྤངས། །རིགས་ཀྱིས་མཐོ་ཡང་མཐོ་བའི་རློམ་པ་མེད། །ཤེས་རབ་གསལ་ཡང་གསལ་མཆོག་གཞན་ལ་གུས། །འདི་ལྟའི་རྒྱལ་སྲས་རྒྱལ་བའི་གདུང་འཚོབ་ཡིན། །ཡོན་ཏན་དེ་དང་དེ་དག་གི །དཀྱིལ་འཁོར་ཡོངས་སུ་རྫོགས་པ་ནི། །ཡིད་འོང་ལང་ཚོའི་མདངས་བཀྲ་བ། །རྒྱན་གྱི་བརྒྱན་པ་བཞིན་དུ་གྱུར། །དེ་རིམ་གྱིས་ནར་སོན་པར་ནི་གྱུར། རང་གི་ལྷག་པའི་ལྷ་གང་ཡིན་པའི་ཡི་དམ་གྱི་ལྷའི་ཞལ་ནི་མཐོང་། འཇུངས་པ་ལ་དགའ་བའི་འདྲིས་པ་ཡོངས་སུ་དོར་ཞིང་། རང་བཞིན་བཟང་བས་ནང་མིའི་འཁོར་རྒྱ་ཆེན་པོ་དག་དང་། མངའ་འོག་གི་སྐྱེ་བོ་རྣམས་ཀྱི་སྤྱི་བོས་བསྟེན་ཅིང་། ཚེ་རབས་ཀུན་ཏུ་ཀུནྡ་ལྟ་བུའི་ལས་རྣམ་པར་བསགས་པའི་འབྲས་བུ་ཕུན་སུམ་ཚོགས་པའི་དཔལ་ལ་བདེ་བར་སྤྱོད་པ་ལས། རེ་ཞིག་གི་ཚེ། བསགས་པ་ཀུན་གྱི་མཐའ་འཛད་ཅིང་། །མཐོན་པོའི་མཐའ་ནི་དམའ་བ་ཡིན། །ཞེས་པ་དང་། ཀྱེ་མ་འདུས་བྱས་རྣམས་མི་རྟག །སྐྱེ་ཞིང་འཇིག་པའི་ཆོས་ཅན་ཡིན། །ཞེས་གསུངས་པ་ལྟར་དུས་ཀྱི་ཕོ་ཉས་བརྡ་སྤྲོད་པ་མེད་པར་ཡབ་རྒྱལ་པོ་འཇིག་རྟེན་འདི་ལས་ཕ་རོལ་ཏུ་སོང་བར་གྱུར་ཏོ།།

བསགས་པའི་ལོངས་སྤྱོད་སྤྱོད་པའི་མཐུ་མེད་པར། །གཉེན་དང་ནོར་རྫས་སོགས་ལ་ཆགས་བཞིན་ཏུ། །འཇིགས་རུང་བར་དོའི་འཕྲང་དེར་འགྲོ་དགོས་ན། །སེམས་དང་ལྡན་པ་སུ་ཞིག་བདེ་བར་འདུག །དེ་ནས་བློན་འབངས་ཐམས་ཅད་ཀྱིས་སེམས་དཔའ་ཆེན་པོ་དེ་ཉིད་རྒྱལ་ཚབ་ཏུ་འབྱོན་པར་གསོལ་བ་ན། བདག་ཉིད་ཆེན་པོ་དེ་སྐྱེ་བ་དཔག་ཏུ་མེད་པའི་སྔ་རོལ་ནས་རབ་ཏུ་བྱུང་བ་ལ་གོམས་པས། ཁྱིམ་ན་གནས་པ་ནི་བྱ་བ་ངན་པས་བྲེལ་ཞིང་ཉེ་བར་ཞི་བ་དང་འགལ་བ། སྡུག་བསྔལ་མང་པོའི་འབེན་དུ་གྱུར་ཅིང་ཆོག་མི་ཤེས་པ། བག་མེད་པའི་གནས་སུ་གྱུར་པར་ནི་རིག །རབ་ཏུ་བྱུང་བ་ནི་ཉེས་པ་དེ་དག་ལས་གཞན་དུ་གྱུར་ཅིང་། དགེ་བའི་ཆོས་བྱང་ཆུབ་ཀྱི་ཕྱོགས་རྣམས་དང་རྗེས་སུ་མཐུན་པར་ནི་ཤེས། འདུས་བྱས་རྣམས་ནི་ཤིན་ཏུ་མཐོ་བའི་ས་འཛིན་གྱི་རྩེ་མོ་ནས་ལྷུང་བའི་འབབ་ཆུ་དྲག་པོ་ལྟར་སྡོད་པའི་གོ་སྐབས་མེད་པར་མཐོང་ནས། དེའི་ཚེ་ཡིད་ལ་བསམ་པ་འདི་ལྟ་བུ་སྐྱེས་པར་ངེས་སོ།།

འདོད་དགུའི་འབྱོར་པ་ཆུ་ཡི་ཆུ་བུར་བཞིན། །ལང་ཚོའི་དཔལ་ཡང་སྟོན་ཀའི་སྤྲིན་ཚོགས་བཞིན། །འཚོ་བའི་ཚེ་ནི་གློག་ཕྲེང་བྲོ་གར་བཞིན། །གནས་པ་མི་བརྟན་རྒྱ་མཚོའི་རླབས་ཕྲེང་བཞིན། །འཇིགས་རུང་སྐྱེ་རྒ་ན་འཆིའི་ཞགས་པ་ཡིས། །འགྲོ་བ་འདི་ལྟ་བུར་ནི་བཅིངས་གྱུར་ཏེ། །མཐུ་ཆེན་དགག་པར་མི་ནུས་ཡོད་བཞིན་དུ། །དོགས་པ་ཙམ་ཡང་མི་སེམས་དགའ་ཞིང་སྤྱོད། །དབྱར་དུས་མེ་ཏོག་གཞོན་ནུ་མདངས་མཛེས་པས། །ཀུན་གྱི་ཡིད་དང་མིག་ལ་དཔལ་སྟེར་ཡང་། །དབྱར་དུས་དེ་ལ་སུ་ཞིག་དགའ་བར་སེམས། །དེ་བཞིན་དབྱར་དུས་སྐྱེས་པའི་མེ་ཏོག་ཀྱང་། །སྙན་པའི་སྒྲ་འབྱིན་བུང་བའི་ཁྱུ་འཁྲིགས་ཤིང་། །མཛེས་པའི་འདབ་སྟོང་རྒོད་པའི་འཛུམ་སྟོན་ཀྱང་། །ནམ་ཞིག་སྟོན་དུ་གྱུར་པའི་དུས་ཀྱི་ཚེ། །བ་མོའི་རེག་པས་ཐམས་ཅད་མོག་པོར་བྱེད། །དེ་བཞིན་འགྲོ་བའི་རྒྱུད་ནི་གཡོ་བ་ལ། །བློ་དང་ལྡན་པ་སུ་ཞིག་དགའ་བར་སེམས། །བསགས་པ་ཀུན་ཀྱང་མཐའ་ནི་འཛད་པ་སྟེ། །དེ་བཞིན་འདུས་པའི་མཐའ་ནི་བྲལ་བ་ཉིད། །དར་བའི་མཐའ་ཡང་རྒུད་པས་བསྙེགས་པ་ལ། །སྐད་ཅིག་འཇིག་པ་ལྷོད་པ་ཀྱེ་མ་མཚར། །དེ་ལྟར་དེ་ཡིས་འདོད་པའི་དཔལ། །རླུང་གིས་བསྐྱོད་པའི་ལོ་མའི་རྩེར། །གྲེང་བའི་ཆུ་ཐིགས་ལྟར་མཐོང་ནས། །འདོད་ལ་ཆགས་པར་རིང་དུ་དོར།།

དེ་ལྟར་དེས་འདུས་བྱས་ཀྱི་ངང་ཚུལ་གཡོ་བའི་ཚུལ་རྟོགས་ཤིང་། དབེན་པའི་གནས་ནི་དགེ་བ་དང་རྗེས་སུ་མཐུན་པའི་བདེ་བ་དུ་མའི་འབྱུང་ཁུངས་སུ་གྱུར་པ་དང་། ཁྱིམ་ན་གནས་པ་ཚུལ་ཁྲིམས་ཀྱི་གཉེན་པོར་ཤེས་པས་དགའ་བར་མ་གྱུར་ཏོ། །དེ་ལྟར་དགའ་བར་མ་གྱུར་ཀྱང་།  ཐོག་མ་མེད་པ་ནས་གཞན་གྱི་ངོ་བསྲུང་བ་ལ་གོམས་པས་བཟློག་པར་མ་ནུས་པས་ཞལ་གྱིས་བཞེས་ཏེ།  ནང་པར་ཀུན་གྱི་གཙུག་རྒྱན་དུ་མངའ་གསོལ་བའི་དོ་ནུབ་གཞོན་ནུ་དེའི་རྨི་ལམ་དུ། སང་རང་གི་ཞབས་སེན་ནོར་བུའི་ལན་ཚར་གྱིས་མཛེས་པར་བྱེད་རྒྱུའི་ཁྲི་དེ་ལ། རྗེ་བཙུན་འཇམ་པའི་དབྱངས་བཞུགས་པའི་ཞལ་ནས། བུ་གཅིག་འདི་ནི་ང་ཡི་སྟན་ཡིན་ཏེ། །ང་ནི་ཁྱོད་ཀྱི་དགེ་བའི་བཤེས་གཉེན་ཡིན། །ང་དང་ཁྱོད་གཉིས་སྟན་གཅིག་ལ་འདུག་པ། །འདི་ནི་རྣམ་པ་ཀུན་ཏུ་རིགས་མ་ཡིན། །ཞེས་གསུངས་པར་གསལ་ནས་གཉིད་སད་པ་ན། རྒྱལ་སྲིད་ཀྱི་དཔལ་ལོངས་སྤྱོད་མི་རིགས་པར་ཤེས་ཏེ། དེ་མ་ཐག་བདག་ཉིད་གཅིག་པུར་དཔལ་ནཱ་ལེནྡྲའི་ལམ་དུ་ཞུགས་ནས་སོང་ངོ་།།

ཉི་གཞོན་འཆར་གའི་མདངས་འཛིན་འཇམ་པའི་དབྱངས། །ཡིད་འོང་སྐུ་ཡིས་མིག་ལ་བདུད་རྩི་བསྐྲུན། །ཐེ་ཚོམ་སྤངས་པའི་གསུང་གིས་ལུང་ཡང་བསྟན། །དེའི་ཚེ་རྒྱལ་སྲས་མཁའ་ལྡིང་དབང་པོ་དེ། །ཕུན་ཚོགས་ཀུན་དགའ་བསྐྱེད་པའི་རྒྱལ་པོའི་དཔལ། །དུག་ཅན་ལག་འགྲོ་གནས་པའི་ཚང་ཚིང་ལྟར། །ལེགས་པར་མཐོང་བས་རྩྭ་བཞིན་དོར་བྱས་ཏེ། །ཞི་བའི་གནས་མཆོག་ས་འཛིན་ངོགས་སུ་སོང་། །གང་གི་དོན་དུ་གཉིས་སྐྱེས་རྣམས། །འབད་པ་བསྒྲུབ་བྱེད་རྒྱལ་སྲིད་ཀྱི། །དཔལ་དེ་ལག་ན་འདུག་བཞིན་དུ། །ཡོངས་སུ་འདོར་བ་ཨེ་མ་མཚར། །དེ་ནས་བདག་ཉིད་ཆེ་དེ་དེ་ཉིད་ལ། །དྭངས་པའི་ཆུ་གཏེར་རླབས་ཀྱིས་བསྐྱོད་པ་ལྟའི། །ཐུགས་ཀྱི་བྱ་ལམ་དགའ་བདེའི་ཆུ་ཁུར་ཅན། །མཐའ་དབུས་སྤྲོས་པ་མེད་པར་ཀུན་ཏུ་ཁེབས། །བྱང་ཆུབ་སེམས་དཔའ་ཆེན་པོ་ཞི་བའི་ལྷའི་རྟོགས་པ་བརྗོད་པ་པདྨ་དཀར་པོའི་ཕྲེང་བ་བྱིན་རླབས་ཀྱི་དྲི་བསུང་འཕྲོ་བྱེད་ཅེས་བྱ་བ་ལས། །ཁྱིམ་ན་གནས་པའི་སྐབས་ཀྱི་རྟོགས་པ་བརྗོད་པ་སྟེ། འདབ་མ་དང་པོའོ།། །།

 

ཟླ་ཞལ་རི་དྭགས་མིག་ཅན་མཛེས་པའི་སྐུ། །མཉེན་ལྕུག་འཁྲི་ཤིང་དལ་བུས་བསྐྱོད་པ་ལྟར། །ལྡེམ་ལྡེམ་གར་གྱིས་རོལ་པའི་འཇམ་པའི་དབྱངས། །ད་དུང་ངག་ལ་སྤོབས་པའི་མཆོག་སྦྱིན་སྩོལ། །དེ་ནས་དཔལ་ལྡན་ནཱ་ལེནྡྲར་ཕེབས་ཏེ། རྒྱལ་བའི་རིང་ལུགས་པ་ཆེན་པོ། རྩོད་པའི་དུས་འདིར་ཐམས་ཅད་མཁྱེན་པ་ལྟར། པཎྜི་ཏ་ལྔ་བརྒྱའི་གཙུག་རྒྱལ་མཚན་གྱི་རྩེ་མོར་བཻཌཱུ་རྱ་བཞིན་མཛེས་པའི་མཁན་པོ་རྒྱལ་བའི་ལྷ་ལས་ཚིགས་སྔ་མ་དགེ་ཚུལ་གྱི་སྡོམ་པ་མནོས་ཏེ། ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་མཚན་ཡང་ཞི་བའི་ལྷ་ཞེས་གསོལ་ཏོ།།

ཙནྡན་ཡལ་ག་ཇི་བཞིན་མཉེན་པའི་ཐུགས། །བུང་བ་ལྟ་བུར་སྤོང་བའི་སེམས་ཀྱིས་རྩེན། །ཤིང་བལ་ལྟར་འཇམ་སྐུ་ཡི་ལྷུན་པོ་ནི། །དམར་སེར་བླ་གོས་འཚམས་སྤྲིན་གཞོན་ནུས་འཁྱུད། །རིན་ཆེན་དོ་ཤལ་ནོར་བུའི་རྣམ་ཆ་ཡིས། །རབ་རྨོངས་བྱིས་པའི་ཚོགས་རྣམས་སྤྲས་པ་ལྟར། །ངོ་ཚ་དྲན་དང་ཤེས་བཞིན་བག་ཡོད་པས། །བདག་ཉིད་ཆེན་པོ་དེ་ནི་ཡོངས་སུ་བརྒྱན། །གང་གི་འདུལ་བའི་དཔལ་གྱིས་བཅུ་ཕྲག་བཅུའི། །ལོ་དག་ཡོངས་སུ་བརྒལ་བར་ཚངས་སྤྱོད་ཀྱི། །བརྟུལ་ཞུགས་རྣམ་པར་བསྟེན་པའི་དྲང་སྲོང་ཡང་། །སར་བུའི་དགེ་སྦྱོང་གནས་ལ་རབ་ཏུ་བཀོད། །དེ་ཚེ་ཐུབ་དབང་གཉིས་པ་ཞིག །འོག་མིན་གནས་ནས་བྱོན་པ་བཞིན། །ལེགས་བྲིས་བཅས་པའི་འཇིག་རྟེན་འདིའི། །ཡོན་གནས་བླ་ན་མེད་པར་གྱུར། །ཚུལ་ཁྲིམས་མ་ལ་ཡ་དག་གི །དྲི་བཞིན་གསར་པའི་དགའ་སྟོན་གྱིས། །ཕྱོགས་ཀྱི་བུ་མོའི་དྲི་འཛིན་ལ། །བདུད་རྩིའི་མཆོག་ཀྱང་དེ་ཡིས་བྱིན།།

དེ་ལྟར་རབ་ཏུ་བྱུང་ནས་ཕྱི་རོལ་གྱི་གཡེང་བའི་དགྲ་སྡེ་མ་ལུས་དུག་ཅན་ཉོན་མོངས་པའི་དཔུང་དང་ལྷན་ཅིག་ཕམ་པར་མཛད་ཅིང་། །ཆེད་དུ་རྗེ་བཙུན་འཇམ་པའི་དབྱངས་ཀྱི་གསུང་གི་བདུད་རྩི་ངོམས་པ་མེད་པར་གསོལ་བ་དང་། གསོལ་བ་དག་ཀྱང་རྩེ་གཅིག་ཏུ་དྲིལ་ནས་ཡང་དག་པར་འཇོག་པ་དང་། ཕྱི་རབས་ཀྱི་གདུལ་བྱ་གཞན་དག་ལ་མ་བུ་གཅིག་པུ་ལ་ཡིད་ཀུན་ཏུ་བརྩེ་བ་ལྟ་བུའི་ཐུགས་རྗེ་ཆེན་པོས་བསྐུལ་ནས། ཡང་དག་པའི་བསྟན་བཅོས་རྩོམ་པ་སོགས་རྣམ་པ་ཐམས་ཅད་དུ་མཁས་པའི་བྱ་བས་དུས་འདའ་བར་མཛད་ཀྱང་། དམ་པ་མ་ཡིན་པའི་སྐྱེ་བོ་རྣམས་ཀྱི་ཆེད་ངོར་ཟས་ཀྱི་འཚོ་བ་བསྟེན་པ་དང་། གྱི་ནར་འདུག་པ་དང་། འཆག་པ་མ་གཏོགས་མ་མཛད་ཅིང་། ཕལ་མོ་ཆེས་མ་རིག་པས། བྷུ་སུ་ཀུ་འདུ་ཤེས་གསུམ་པ་ཞེས་གྲགས་སོ། །དེའི་ཚེ་མངོན་པར་ཤེས་པའི་ལྟ་བྱེད་དང་བྲལ་བ་འགའ་ཞིག་གིས། ཕྱིའི་ཀུན་ཏུ་སྤྱོད་པ་དེ་དག་ལ་དཔགས་ཏེ། དམ་པའི་ཆོས་འདུལ་བ་ལ་རབ་ཏུ་བྱུང་བ་རྣམས་ཀྱིས་ལས་སུ་བྱ་བ་ནི་འཁོར་ལོ་གསུམ་གྱི་རོལ་པར་གནས་པ་ཤ་སྟག་ཡིན་པ་ལ། འདི་ནི་གང་དང་ཡང་མི་ལྡན་པ་ཞིག་སྟེ། དེ་བས་ན་དད་པས་བྱིན་པ་ལ་ལོངས་ཡོངས་སུ་སྤྱོད་པར་མི་བཏུབ་པས་ན་གཞན་དུ་བསྐྲད་པར་བྱའོ།།

དེ་ཡང་མདོ་འདོན་རེས་བྱས་པས་དོན་དེ་ཉིད་འགྲུབ་པར་འགྱུར་རོ་སྙམ་ནས། བདག་ཉིད་ཆེན་པོ་དེ་ལ་མདོ་འདོན་པར་གསོལ་བས། དེ་ལྟ་བུ་བདག་གིས་ཇི་ལྟར་ནུས་ཞེས། ཞལ་གྱིས་མ་བཞེས་པས། སླར་ཡང་ནན་ཏུར་བསྐྱེད་དེ་གསོལ་བས། དེ་ལྟར་ན་བགྱིའོ་ཞེས་ཞལ་གྱིས་བཞེས་སོ། །དེ་ནས་དཔལ་ལྡན་ནཱ་ལེནྡྲའི་དགེ་འདུན་ཐམས་ཅད་འདུས་པའི་དབུས་སུ། ཉམས་སད་པར་བྱ་བའི་ཕྱིར། འཇིགས་བྲལ་གདོང་ལྔས་བཏེགས་པའི་ཁྲི་མཐོན་པོ་བཤམས་ནས། དེ་ལ་ཇི་ལྟར་འཛེག་པ་དག་ཀྱང་མི་ཤེས་སོ་སྙམ་ན། ཕྱག་གིས་ཅུང་ཟད་མནན་ནས་སྟེང་དུ་ཐོགས་པ་མེད་པར་གཤེགས་པས། སེམས་དཔའ་ཆེན་པོ་དེ་ལ་ཞེ་འགྲས་སུ་ལྟ་བ་རྣམས་ཀྱང་སེམས་ཤིན་ཏུ་ཐེ་ཚོམ་དུ་གྱུར་ཏོ།།

དེ་ནས་བདག་ཉིད་ཆེན་པོ་དེས་འཛུམ་ཟེར་གསལ་བར་ཕྱུང་སྟེ། མདོ་སྔོན་ཆད་གྲགས་པ་ཞིག་འདོན་ནམ། མ་གྲགས་པ་ཞིག་འདོན་ཞེས་དགེ་འདུན་རྣམས་ལ་བཀའ་སྩལ་པ་ནི་འདི་ལྟར། ཁོ་བོའི་བློ་གྲོས་དབྱར་སྐྱེས་ཁང་བཟང་ལས། །ལེགས་བཤད་སར་པའི་ཆུ་ཆར་སྤྲོས་པ་ཡིས། །ཐུབ་བསྟན་རྩི་བཅུད་རྒྱས་པར་བྱའམ་ཅི། །འོན་ཏེ་སྔོན་གྲགས་ལེགས་བཤད་དགའ་སྟོན་འགྱེད། །ཅེས་གསུངས་པ་ན། སྔོན་མ་གྲགས་པ་ཞིག་གསུང་བར་ཞུས་པས། བཞིན་གྱི་མདངས་གསལ་པོར་ཕྱུང་ནས། ལྷའི་རྔ་ལྟར་རྣ་བར་འོང་ཞིང་ཡིད་དུ་འབབ་པ། རྒྱལ་བ་རྣམས་ཀྱི་རྣམ་པ་ཐམས་ཅད་པའི་དབྱངས་ཀྱི་རྗེས་སུ་འགྲོ་བའི་གསུང་གི་ཤེལ་སྐྱོགས་བཟང་པོས། འདུས་པ་རྒྱ་མཚོའི་ཚོགས་ཀྱི་རྣམ་པར་དཔྱད་པའི་རོ་འཛིན་གྱི་དབུས་སུ། བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལེགས་བཤད་ཀྱི་རོ་བཅུད་ཕུན་ཚོགས་པའི་བཏུང་བ་སྩལ་བས། དཔག་ཏུ་མེད་པའི་གདུལ་བྱ་བླ་ན་མེད་པའི་བྱང་ཆུབ་ཏུ་རིགས་ངེས་པའི་བདེ་བས་ཁྱབ་པར་མཛད་དོ།།

དེ་ཡང་ཤེས་རབ་ལེའུའི། གང་ཚེ་དངོས་དང་དངོས་མེད་དག །ཅེས་པ་ནས་རྫུ་འཕྲུལ་གྱིས་ནམ་མཁའ་ལ་འཕགས་ཏེ། མཐར་སྐུའི་མངོན་པར་བསྔོ་བའི་ལེའུ་བཏོན་ནས་གཤེགས་སོ། །ཀུན་འདུས་མཐོན་པོའི་ཁྲི་ལ་མགོན་པོ་སྟེ། །ཞུམ་ཕྱིར་དམ་ཆོས་སྟོན་པར་གསོལ་བ་ན། །གང་གི་ཞབས་སེན་གསར་པའི་ཟླ་རིས་ནི། །མཐོ་ཡང་ཤར་རིའི་རྩེ་མོར་མངོན་པར་འཛེགས། །ལྷུན་པོ་ལྟ་བུར་མཐོ་བའི་སྤོབས་པ་དང་། །རྒྱ་མཚོ་ལྟ་བུར་ཟབ་པའི་མཁྱེན་པ་ཡིས། །དོན་ཟབ་སྡེབ་ལེགས་སྔོན་མེད་གཎྜིའི་དབྱངས། །མ་ལུས་རྣ་རྒྱན་བཞིན་དུ་མཛེས་པར་གྱུར། །གསེར་གྱི་འདབ་བརྒྱ་རྒོད་པའི་ཞལ་བཟང་ངོགས། །དུང་ལྟར་དཀར་བའི་ཚེམས་ཀྱི་ཟེའུ་འབྲུའི་གསེབ། །ཟབ་གསལ་སྦྲང་རྩི་རྒྱས་པའི་དུས་སྟོན་གྱིས། །བློ་གསལ་བུང་བའི་ཚོགས་ལ་ཕན་བདེ་བསྒྲུབས། །དེ་ཚེ་ལྷ་ཡི་ལམ་བཟང་ནས། །ག་པུར་དྲི་བཟང་གིས་བསྒོས་པའི། །ཡིད་འོང་ཆུ་སྐྱེས་གཞོན་ནུ་རྣམས། །ཕན་ཚུན་རྩེ་ཞིང་རྣམ་པར་ལྡིང་། །དེ་ནས་བདག་ཉིད་ཆེ་དེ་དེ་མ་ཐག །ཇེ་མཐོ་ཇེ་མཐོར་རྫུ་འཕྲུལ་གཤོག་རླབས་ཀྱིས། །མཁའ་དང་མཁྱེན་པ་འགྲན་པར་ཆས་པ་ན། །འདིས་ནི་བདག་གི་ཕ་མཐའ་སྟོན་ནོ་ཞེས། །མཁའ་དབྱིངས་མཛེས་མ་ཟ་འོག་ཕག་ཏུ་བྲོས། །དེ་ལྟར་བདག་ཉིད་ཆེན་པོ་དེས་རྫུ་འཕྲུལ་ཆེན་པོ་མངོན་པར་འདུ་བྱེད་པ་དེ་ལྟར་བསྟན་པ་དང་། འདུས་པའི་ཚོགས་རྣམས་ལས་གང་དག་སྡང་བར་སེམས་པ་དག་ནི་ལྷག་པར་འགྱོད་ཅིང་། མཆི་མས་མགྲིན་འགགས་ཏེ་འཛེར་འཛེར་བའི་ཆོ་ངེ་འདོན། གཞན་ཐམས་ཅད་དད་པས་ཡི་རང་ནས་དང་བས་ཐལ་མོ་སྙིང་ལ་སྦྱོར་བར་བྱེད་དོ།།

དེའི་ཤུལ་དུ་རྣ་བའི་མངོན་པར་ཤེས་པ་དང་། མི་བརྗེད་པའི་གཟུངས་ལ་དབང་འབྱོར་པའི་པཎྜི་ཏ་རྣམས་ཀྱིས་གཞུང་བསྡུས་པ་ན། ཁ་ཆེ་བ་རྣམས་ཀྱིས་ལེའུ་དགུ་པའི་བདག་ཉིད་ཤློ་ཀ་བདུན་བརྒྱ་ཡོད་པར་བཟུང་ཞིང་། ཡུལ་དབུས་པ་རྣམས་ཀྱིས་ལེའུ་བཅུ་པའི་བདག་ཉིད་ཤློ་ཀ་སྟོང་ཡོད་པར་བཟུང་བས་མ་མཐུན་པ་དང་། བསླབ་པ་ཀུན་ལས་བཏུས་པ་ཡང་། །ངེས་པར་ཡང་དང་ཡང་དུ་བལྟ། །ཡང་ན་རེ་ཞིག་མདོར་བསྡུས་པའི། །མདོ་རྣམས་ཀུན་ལས་བཏུས་པ་བལྟ། །ཞེས་གསུངས་པའི་བསྟན་བཅོས་གཉིས་པོའང་ཇི་ལྟར་ཡིན་མ་རིག་པས་ཐེ་ཚོམ་དུ་གྱུར་པ་ན། དུས་ནམ་ཞིག་གི་ཚེ་མཆོད་རྟེན་དཔལ་ཡོན་ཅན་ཞེས་བྱ་བ་ན་བཞུགས་པ་ཐོས་ཏེ། དགེ་སློང་གཉིས་སྤྱན་འདྲེན་དུ་བཏང་བས། གཞུང་གི་ཚད་ཡུལ་དབུས་པ་རྣམས་ཀྱིས་བསྡུས་པ་ལྟར་ཡིན། བསླབ་པ་ཀུན་ལས་བཏུས་པ་དང་། མདོ་ཀུན་ལས་བཏུས་པ་གཉིས་པོ་ཁོ་བོའི་སྤོང་ཁང་གི་གདུང་གསེབ་ན་པཎྜི་ཏའི་ཡི་གེ་ཕྲ་མོས་བྲིས་ནས་ཡོད། ཅེས་དེ་དག་གི་བཤད་པ་དང་བསྒྲུབ་པའི་བཀའ་ཡང་གནང་ངོ་།།

གསེར་མདོག་རློན་ལྡན་ཕྱོགས་སུ་མྱུལ་བ་ལྟར། །མཛེས་པའི་སྐུ་ནི་ལྷ་ཡི་ལམ་ན་མཛེས། །དྲི་ཟའི་རྒྱུད་མང་སྒྲ་ལ་འགྲན་བཟོད་པའི། །སྙན་པའི་གསུང་ནི་ལེགས་བཤད་རྩེ་དགས་འཁྱུད། །དེའི་ཚེ་འཛིན་མའི་ངོས་སུ་གུར་ཀུམ་གྱི། །དོག་པ་བཀོད་འདྲའི་འདུས་པ་རྒྱ་མཚོ་ཚོགས། །པད་དཀར་དྲ་བས་ཁེབས་པའི་ཆུ་ཡི་གཏེར། །རིང་ནས་མིག་ལམ་གྱུར་པའི་ངང་པ་བཞིན། །གང་གི་མཛད་པའི་སྣང་བ་ཆ་ཙམ་ཞིག །དང་བའི་ཡིད་ངོར་ཤར་བར་གྱུར་མ་ཐག །མིག་གི་བུ་གར་མཆི་མའི་ཆུ་ཐིགས་གཡོ། །ལག་པའི་པདྨོ་སྙིང་གར་འཛུམ་པར་བྱེད། །འབྲས་བཟང་ཁུར་གྱིས་ནོན་པའི་ལྗོན་པ་བཞིན། །གཙུག་གི་ཅོད་པན་ས་ལ་དུད་པར་བྱས། །མ་ལུས་ཡིད་ཀྱིས་དད་པའི་སྤུ་ལོང་འཛིན། །དག་པའི་སེམས་ནི་རངས་པའི་ཞགས་པས་བཅིང་། །སླར་ཡང་ཡིད་གཉིས་མུན་པ་སྟུག་པོ་རྣམས། །བརྩེ་བའི་འོད་ཚོགས་འདུས་པའི་སྒྲོལ་མ་ཡིས། །གསལ་ཞིང་ལེགས་པར་བཤད་པའི་འོད་དཀར་གྱིས། །ཐུབ་བསྟན་ཀུནྡའི་ཚལ་རབ་རྒྱས་པར་མཛད། །བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་ལྷའི་རྟོགས་པ་བརྗོད་པ་པདྨ་དཀར་པོའི་ཕྲེང་བ་བྱིན་རླབས་ཀྱི་དྲི་བསུང་འཕྲོ་བྱེད་ཅེས་བྱ་བ་ལས། ཁྱིམ་ནས་ཁྱིམ་མེད་པར་རབ་ཏུ་བྱུང་ནས། ཐུབ་པའི་བསྟན་པ་ལ་བྱ་བ་ཇི་ལྟར་མཛད་པའི་རྟོགས་པ་བརྗོད་པ་སྟེ། འདབ་མ་གཉིས་པའོ།།  །།

 

རྒན་ལས་ཐོས་དང་བདག་སྐྱེས་སྦྲང་རྩིའི་བུ། །ཁྲུང་ཁྲུང་འཇོམས་སོགས་ཆེས་ཆེར་རློམ་རྣམས་ཀྱི། །རལ་པའི་ནགས་ནང་ཞབས་སེན་རྟག་འགོད་པ། །རྗེ་བཙུན་འཇམ་པའི་དབྱངས་ཀྱིས་དགེ་ལེགས་མཛོད། །དེ་ནས་བདག་ཉིད་ཆེན་པོ་དེ་ཤར་ཕྱོགས་ལོགས་སུ་སོང་སྟེ། རྩོད་པ་ཆེན་པོ་བྱེད་པ་ཞིག་གི་ཐབས་ཟླ་བྱས་ནས། རྫུ་འཕྲུལ་གྱིས་ཞི་བར་མཛད་དེ། ཡང་དག་པའི་བདེ་བ་ལ་བཀོད་ནས། སླར་ཡང་བདག་ཉིད་ཀྱིས་གདུལ་བར་བྱ་བའི་འགྲོ་བ་གང་ན་འདུག་མངོན་པར་ཤེས་པའི་བལྟ་བས་བརྟགས་སོ།།

ཀུན་རྟོག་རྟོག་པའི་དྲི་མ་དང་བྲལ་བའི། །སྤྲོས་ཞི་ཞི་བའི་ཡིད་ཀྱི་མེ་ལོང་དབྱིངས། །ཡོངས་དག་དག་དང་ཉེས་སྤྱོད་འགྲོ་བའི་ཚོགས། །མ་ལུས་ལུས་པ་མེད་པར་ཡོངས་སུ་གསལ། །དེ་ལྟར་གཟིགས་པ་ན། ཡུལ་མ་ག་དྷའི་ནུབ་ཕྱོགས་ཧ་ཅང་མི་རིང་བ་ཞིག་ན། ཡ་མཚན་ཅན་གྱི་ལྟ་བ་ལོག་པ་འཛིན་པ་ལྔ་བརྒྱ་ཙམ་གནས་ཤིང་། དེ་ལྟ་བུའི་ལྟ་བ་བཟུང་བས་ངན་འགྲོའི་སྒོ་ནི་དབྱེ་བ་ལྟར་བྱས། མངོན་པར་མཐོ་བ་དང་། ངེས་པར་ལེགས་པའི་ལམ་ལས་ནི་རིང་དུ་གོལ། དམ་པའི་བཤེས་གཉེན་དང་བྲལ་ནས་ལེགས་ཉེས་སོ་སོར་འབྱེད་པའི་བློ་གྲོས་མིག་ནི་ལྡོངས། དེ་དག་ཁོ་ནར་མ་ཟད་གཟུ་བོར་གནས་པ་དུ་མའང་སྡིག་གྲོགས་ཀྱི་བྲང་འགྲོས་བཅིངས་ནས་ཉམ་ང་བའི་གཡང་དུ་ལྷུང་བར་གཟིགས་ནས། ཤིན་ཏུ་སྙིང་བརྩེ་བར་གྱུར་ཏེ། དེ་ལས་ལྡོག་པའི་ཐབས་བསམས་སོ།།

བགྲང་ཡས་དུས་ནས་ལེགས་སྦྱང་ལྷུར་བླངས་ཕུན་ཚོགས་རྭ་བས་བསྐོར་བའི་དབུས། །དུས་ཀྱི་བ་མོའི་མདངས་ལྷའི་ལྷག་བསམ་ན་ཆུང་མཛེས་མའི་ལུས་སྨིན་ཞིང་། །རིན་ཆེན་འོད་ཚོགས་མཛེས་པར་འཁུ་ལྡན་བྱམས་པའི་མེ་ཏོག་ཐོད་ཀྱིས་སྒེག །མ་རྒད་ཞུན་མའི་ལང་ཚོར་འགྲན་བྱེད་བརྩེ་བའི་ལག་མཉེན་ཕྱོགས་བཅུར་གཡོ། །འགྲོ་འདིའི་བླ་ན་མེད་པའི་ཡོན་གནས་དེ། །སྐྱེ་བོ་ངན་འགྲོའི་ལམ་འཇུག་གསེར་བུ་ཡིས། །ཡིད་ཀྱི་པདྨོ་ལན་བརྒྱར་བསྐྱོད་པ་ན། །ངོ་མཚར་དྲི་ཡིས་ཕྱོགས་ཀུན་ཡོངས་སུ་འགེངས། །ཆུ་ཡི་ལྕིད་ཀྱིས་ནོན་པའི་བསིལ་བྱེད་འཕེལ། །སྤྲིན་གྱི་སྒྲ་དབྱངས་མ་བསྒྲགས་མི་ལྡོག་བཞིན། །ཀུན་གྱི་འདོད་དགུ་སྦྱིན་པའི་བསམ་འཕེལ་དབང་། །ཕོངས་པ་རེ་བའི་འབྲས་བུ་ཅིས་མི་སྩོལ། །དེ་ནས་བདག་ཉིད་ཆེན་པོ་དེས་བསམ་པ། ད་ནི་ངེས་པར་དུས་ལ་བབས་པོ་སྙམ་ནས། རང་གི་ལུས་མཐུ་དང་སྟོབས་ཀྱི་སྐལ་བ་དམན་པ་རིང་པོ་ཞིག་ཏུ་སྤྲུལ་ནས།

ཟླ་བས་འཕེལ་ལས་རྒྱན་འཛིན་དང་། །རྒྱན་འཛིན་ལས་ཀྱང་སྤྲིན་གྱི་བཅུད། །དེ་ལས་ཆུ་བོའི་རྒྱུན་ཇི་བཞིན། །དེ་ནི་རིམ་གྱིས་སོང་བར་གྱུར། །དེ་ལྟར་མཐར་གྱིས་སོང་སོང་སྟེ། ལྟ་བ་ངན་པ་འཛིན་པ་དེ་དག་གི་འཁོར་དུ་བསྡད་ནས། དེ་རྣམས་ཀྱིས་ཇི་ལྟར་བསྒོ་བ་བཞིན་མཉན་ཞིང་གུས་པ་ལྟར་བྱས་པས། དེ་རྣམས་ཀྱི་ཡིད་དུ་འཐད་པར་གྱུར་ནས། བཞིན་འཛུམ་ཞིང་མིག་བགྲད་དེ་ལེགས་སོ་ལེགས་སོ་ཞེས་བརྗོད་པར་བྱེད་དོ།།

དེ་ནས་བདག་ཉིད་ཆེན་པོ་དེའི་མཐུ་ཕུན་སུམ་ཚོགས་པ་དང་། ལོག་པར་སྨྲ་བ་དེ་དག་གི་ཡང་སྔོན་གྱི་ལས་དང་སྨོན་ལམ་རྣམ་པར་དག་པའི་མཐུ་ལས། དུས་ནམ་ཞིག་གི་ཚེ་ཞག་བདུན་གྱི་བར་དུ་བུ་ཡུག་ཆེན་པོ་བྱུང་ནས། བཟའ་བ་དང་བཏུང་བས་ཕོངས་པས་ཉོན་མོངས་པར་གྱུར་ཏེ། དཔེར་ན། མདེའུ་དུག་ཅན་གྱི་མདའ་གནད་དུ་ཕོག་པ་དག །འདི་ལྟ་བུའི་ཟུག་རྔུ་འབྱིན་པའི་སྨན་པ་ཞིག་ནམ་རྙེད་པར་འགྱུར་སྙམ་པ་ལས་གཞན་དུ་ཡིད་ལ་བྱེད་པ་མེད་པ་དེ་བཞིན་དུ། ཟས་དང་སྐོམ་ཡིད་ལ་སེམས་ཤིང་། ངག་ཏུའང་། ཀྱེ་བདག་ཅག་འདི་ལྟ་བུའི་བཀྲེས་སྐོམ་གྱི་སྡུག་བསྔལ་ལས་སྐྱོབ་པར་ནུས་པའི་བཟའ་བཏུང་ཚོལ་བར་ནུས་པ་སུ་ཡོད། དེ་ལྟ་བུའི་ནུས་པ་ཡོད་ན་ཇི་ལྟར་ཡིན་ཡང་རུང་དཔོན་དུ་བཀུར་ཞིང་། བཀའ་སྤྱི་བོས་ལེན་ནོ། །ཞེས་ཐམས་ཅད་མགྲིན་གཅིག་ཏུ་བརྗོད་པར་བྱེད་དོ།།

དེ་ལྟར་བརྗོད་པ་ན་བདག་ཉིད་ཆེན་པོ་དེས། ད་ནི་བདག་གི་དོན་ལེགས་པར་གྲུབ་བོ་སྙམ་ནས་བྱམས་པ་དང་སྙིང་རྗེ། གྲང་བ་ལ་འཛེམ་པ་དང་ཚམ་ཚོམ་མེད་པར་འབྲས་ཆེན་ལྷུང་བཟེད་གང་ཙམ་གྱི་བསོད་སྙོམས་བསླངས་ཤིང་། ཏིང་ངེ་འཛིན་གྱིས་མང་པོར་བྱིན་གྱིས་བརླབས་ཏེ་བྱིན་པས། དེ་རྣམས་ཚིམ་ཞིང་བདེ་བར་མཛད་དེ། སྔར་གྱི་ལྟ་བ་ངན་པ་དེ་རྣམས་ཚུལ་དང་མི་མཐུན་པར་གཏན་ཚིགས་དུ་མའི་སྒོ་ནས་སུན་ཕྱུང་སྟེ། ཡང་དག་པའི་ལྟ་བ་ལ་ཆུད་པར་མཛད་དོ།།

དགེ་བ་རྣམས་ནི་དམའ་བའི་ཚུལ་བཟུང་ནས། །འགྲན་བྲལ་མཐོན་པོའི་རྩེ་མོར་ཆོས་སྲིད་ཐོབ། །ཁེངས་དང་དྲེགས་པའི་ཆང་གིས་རབ་མྱོས་པའི། །སྐྱེ་བོ་ཕལ་པ་དེ་དང་ཉེ་བ་མིན། །འདི་ལྟར་རིན་ཆེན་རྡུལ་བརྩེགས་ཇི་བཞིན་མཛེས་པའི་སྐུ། །ལྷ་ཡི་རྔ་ཆེན་ལྟ་བུར་འདོམས་པའི་གསུང་། །མཐའ་བྲལ་རྒྱ་མཚོའི་འཇིངས་ལྟར་ཟབ་པའི་ཐུགས། །འགྲོ་མང་དབུས་ན་ཡོན་ཏན་ཚོགས་ཀྱིས་མཐོ། །ལམ་ངན་ཀུནྡའི་གཉེན་གྱི་ཞགས་པ་ཡི། །ཡོངས་སུ་བསྡམས་པའི་ཡིད་ཅན་འདབ་སྟོང་ཅན། །ཉིན་མོའི་དབང་ཕྱུག་འདི་ཡི་ནུ་ཞོ་ཡིས། །བསྐྱངས་པས་ཐལ་མོ་རང་འབྱུང་ས་ལ་ལྷུང་། །བྱམས་པའི་ཐུགས་ཀྱིས་ཀུན་ཏུ་རྒྱུ་རྣམས་ལ། །གང་ཚེ་དགེ་བའི་སྣང་བ་མཚོན་བྱས་པའི། །བདུད་རྩི་བས་ཀྱང་དཀར་བའི་གྲགས་པའི་ཚོགས། །གཟུར་གནས་ཀུན་གྱི་རྣ་བའི་རྒྱུན་དུ་འཆང་། །དེའི་ཚེ་རྒྱལ་སྲས་དཔའ་བོ་ཆེན་པོ་དེ། །ལུང་རྟོགས་འདོད་དགུ་འབྱུང་བས་བལྟམས་པ་ཡི། །ཐུགས་ཀྱི་ཆུ་གཏེར་དགའ་བའི་རླབས་ཕྲེང་གིས། །མཐའ་དབུས་ཀུན་ཏུ་རྣམ་པར་ཁེབས་པར་གྱུར།།

དེ་ལྟར་རང་ཉིད་ཇི་ལྟར་འདོད་ཅིང་ཡིད་ལ་གཅགས་པའི་གནས་ནི་འབྲས་བུ་དང་བཅས་པར་གྱུར། ཁེངས་པ་དང་དྲེགས་པའི་སྐྱོན་ཐམས་ཅད་ནི་ནག་ཕྱོགས་ཀྱི་ཟླ་བ་ལྟར་བྲི། ནགས་ཀྱི་དགོན་པར་གནས་ཤིང་ན་ཚོད་ཡོངས་སུ་ཡོལ་བའི་དྲང་སྲོང་ལྟར་དུལ་བའི་ཕ་རོལ་ཏུ་ནི་སོན། མཐོང་བ་དང་། ཐོས་པ་དང་། དྲན་རེག་གིས་ཀྱང་གཞན་ཡིད་ཐར་པ་ལ་འཁུལ་བར་ནུས་པའི་རྒྱལ་སྲས་ཆེན་པོ་དེ། ཡིད་ཀྱི་མཁའ་ནི་ཀུན་ཏུ་རྟོག་པ་ཡི། །སྒྲིབ་བྱེད་སྤྲོས་པའི་ཆུ་འཛིན་སྟུག་པོ་རྣམས། །ཆུ་ལ་ཆུ་ལྟར་དབྱིངས་སུ་ཐིམ་པ་ཡིས། །ཏིང་འཛིན་དབང་སྔོན་མདངས་བཟང་ཅི་ཡང་འཛིན། །སླར་ཡང་། སྒྱུ་མ་ལྟ་བུའི་བརྟན་གཡོ་ཀུན། །སྒྱུ་མ་ལྟ་བུར་ཐུགས་ཆུད་པས། །སྒྱུ་མ་ལྟ་བུའི་རྣམ་རོལ་གྱིས། །སྒྱུ་མ་ལྟ་བུར་འགྲོ་བ་སྒྲོལ།།

དེ་ལྟ་བུའི་དགོན་པའི་གནས་རྣམས་རྒྱུ་རྒྱུ་ཞིང་སོང་བ་ལས། རེ་ཞིག་གི་ཚེ། སེམས་ཅན་རྣམས་ཡིད་སྲུབས་བདག་པོ་གཉེན་དང་བཅས་པས་རྒྱུད་བསླད་པས། མི་སྲུན་པའི་ལས་འགའ་ཞིག་སྤྱད་པའི་འབྲས་བུ་མངོན་པར་གྲུབ་སྟེ། མུ་གེ་ཆེན་པོས་འགྲོ་བ་དུ་མ་ཉམ་ང་བར་གྱུར་ཅིང་། ཁྱད་པར་སྔོན་སྦྱིན་པའི་བྱ་བ་ལ་རྒྱབ་ཀྱིས་ཕྱོགས་པས། ཤིན་ཏུ་དབུལ་བ་སློང་བ་འབའ་ཞིག་ལ་བརྟེན་ནས་ཚེ་འདི་རྫོགས་པར་བྱེད་པའི་སྤྲང་པོ་སྟོང་ཙམ། མུ་གེ་དེས་གཞན་གྱིས་འཚོ་བཅུད་ཟད་ཀྱང་སྦྱོར་བར་བྱེད་པ་མ་བྱུང་བས། འཆི་བདག་མངོན་སུམ་དུ་འོངས་པ་བཞིན་དུ་འགུམ་པ་ལ་ནི་ཕྱོགས། བཀྲེས་པ་དང་སྐོམ་པས་ཡོངས་སུ་གཟིར་བས་ལུས་ནི་སྐྱ་བོ་སེང་སེང་པོར་གྱུར། སྐད་ཀྱི་མདངས་ཉམས་པས་འདར་ཞིང་འདི་སྐད་ཅེས། ཀྱེ་མ་བདག་ཅག་རྣམས་སྐྱོབ་པར་བྱེད་པའི་སྙིང་རྗེ་དང་ལྡན་པ་སུ་ཡོད། དུས་ལ་བབ་བོ། །ཀྱི་ཧུད་ཀྱི་ཧུད་ཅེས་ཤུགས་ནར་འབྱིན་པ་བདག་ཉིད་ཆེན་པོས་དེས་གསན་པས། ལུས་ལ་ལྕགས་གཟེར་བཏབ་པ་བཞིན་གྱུར་པ་ནི་འདི་ལྟར། ཕོངས་པ་རྣམས་ཀྱིས་མྱ་ངན་ཤུགས་འབྱིན་པའི། །བྱིན་ཟས་ཡིད་ཀྱི་བུད་ཤིང་བསྲེགས་པ་ན། །འཐོར་བྱེད་ཤུགས་ཀྱིས་རང་དབང་འཕྲོག་པ་ཡི། །འདབ་མ་ལྟ་བུར་དེ་ཡིད་རབ་ཏུ་གཡོས།།

དེ་ནས་བདག་ཉིད་ཆེན་པོ་དེས། ཕོངས་པ་རྣམས་ལ་བྱམས་པས་བསྒོས་པའི་བལྟ་བ་དང་ལྡན་པས། དབུགས་ཕྱུང་བ་དང་། དེ་རྣམས་ཡིད་གསོས་པ་སྙམ་བྱེད་ཅིང་། འདི་སྐད་དུ། ཕྱོགས་རྣམས་དག་ནི་ཐམས་ཅད་དུ། །བརྒྱ་ཕྲག་ངལ་བ་རབ་བསྟེན་ནས། །ཡང་དག་གཏོང་བ་བཙལ་བྱས་ཀྱང་། །ནམ་མཁའི་པདྨོ་བཞིན་དུ་གྱུར། །ད་ནི་བདག་ཅག་རྣམས། ཉིན་མོའི་དབང་ཕྱུག་ཟེར་གྱིས་ཕྱེ་བ་ཡི། །གུར་ཀུམ་མདངས་སམ་འཆར་གའི་ཐུན་མཚམས་ཀྱི། །སྟོད་གཡོགས་གསར་པའི་དཔལ་ཡང་འཕྲོག་བྱེད་པའི། །དཔའ་བོ་ཁྱེད་ཉིད་མཐོང་བར་གྱུར་མ་ཐག །བདག་ཅག་མགོན་དང་བཅས་པར་གྱུར་སྙམ་སེམས།།

ཞེས་དེས་མཚོན་པའི་སེམས་དཔའ་ཆེན་པོ་དེའི་ཡོན་ཏན་བརྗོད་ཅིང་། རེ་བའི་མཚན་མ་གསལ་བར་བྱེད་པ་ན། བདག་ཉིད་ཆེན་པོ་དེས་མྱུར་དུ་ཁ་ཟས་བསོད་པ་དཔག་ཏུ་མེད་པའི་སྟ་གོན་བྱས་ཏེ། དཀར་མཉེན་པདྨའི་རྩ་བ་ལྟ་བུའི་ཕྱག་གིས་དེ་རྣམས་ལ་སྩལ་བས། ལུས་ཟུངས་ཡོངས་སུ་རྫོགས་པར་བསྐྱེད་ཅིང་། དམ་པའི་ཆོས་ཀྱི་བདུད་རྩིའི་རོས་ཀྱང་རབ་ཏུ་ཚིམ་པར་མཛད་པས། ཕོངས་པ་དེ་དག་ཀྱང་ཡིད་ཤིན་ཏུ་རངས་ཏེ། གྲོང་དང་གྲོང་ཁྱེར་དང་ཡུལ་ལྗོངས་རྣམས་མྱུལ་ཞིང་། སློབ་དཔོན་དེའི་བཀའ་དྲིན་བསམས་ཏེ། ཨེ་མ་ཧོ་ཤིན་ཏུ་རྨད་དུ་བྱུང་ཞིང་ངོ་མཚར་རོ། །ཞེས་སྨྲས་ནས། ཕྱོགས་དང་ཕྱོགས་མཚམས་རྣམས་སུའང་དོན་དེ་དྲན་ནོ།།

འཁྲི་ཤིང་ལྕུག་ཕྲན་ལྟ་བུར་མཉེན་པའི་ཕྱག །བདོག་པ་མ་ལུས་གཏོང་བའི་རྒྱན་གྱིས་སྤུད། །ཀུན་ལ་ཁྲོ་བ་སྤངས་པའི་ཐུགས་རྗེ་ནི། །དབུལ་བ་རྣམས་ལ་དཔག་བསམ་ལྗོན་པ་བཞིན། །དེ་ཡི་གཏོང་བ་ལས་ཐོན་གྲགས་པའི་ཚོགས། །རྒྱ་མཚོའི་གོས་ཅན་མཐའ་གྲུ་ཡོངས་སུ་བརྒལ། །འོད་གཟི་བདག་པོའི་མདུན་སར་ཆ་ཤས་ཅན། །རི་དྭགས་རྒྱལ་པོའི་དྲུང་ན་རི་དྭགས་བཞིན། །ཞིང་འདིར་སྟོན་པའི་བསྟན་ལ་མགོན་ཁྱོད་ལས། །མཆོག་ཏུ་གྱུར་པའི་སེམས་དཔའ་ག་ལ་ཞིག །བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་ལྷའི་རྟོགས་པ་བརྗོད་པ་པདྨ་དཀར་པོའི་ཕྲེང་བ་བྱིན་རླབས་ཀྱི་དྲི་བསུང་འཕྲོ་བྱེད་ཅེས་བྱ་བ་ལས། འཐབ་རྩོད་དང་ལྟ་བ་ངན་པ་བཟློག་པ་དང་། ཕོངས་པ་རྣམས་གཏོང་བའི་ཕྱག་གིས་དབུགས་ཕྱུང་བའི་རྟོགས་པ་བརྗོད་པ་སྟེ། འདབ་མ་གསུམ་པའོ།། །།

 

ཡིད་འཕྲོག་གུར་ཀུམ་གཞོན་ནུའི་ས་འཛིན་རྩེ། །ཨིནྡྲ་ནཱི་ལའི་སྤྲིན་གྱིས་གཡོགས་པ་བཞིན། །དམར་སེར་མཐོན་མཐིང་རལ་པའི་ཟུར་ཕུད་ཅན། །རྗེ་བཙུན་མཁྱེན་པའི་གཏེར་གྱིས་རིང་དུ་སྐྱོངས། །དེ་ནས་བདག་ཉིད་ཆེན་པོ་དེ། དེ་ལྟ་བུའི་རྒྱལ་བའི་སྲས་ཀྱི་བྱ་དཀའ་བའི་སྤྱད་པ་སྤྱོད་པའི་ངང་ནས་ཤར་ཕྱོགས་སུ་སོང་སྟེ། ཨ་རི་བི་ཤ་ན་ཞེས་བྱ་བའི་རྒྱལ་པོའི་ཕོ་བྲང་གི་ཉེ་ལོགས་ཀྱི་བཞི་མདོ་རྣམས་མྱུལ་ཞིང་བཞུགས་པ་ན། མ་ཙ་ལའི་གནོད་པ་ཞེས་བྱ་བ་འཚོ་བ་མ་ཕྱིད་པས་གཞན་གྱི་རྫས་འཇོམས་པ་ལ་དགའ་ཞིང་སྙིང་རྗེ་མེད་པ། དྲག་ཤུལ་ཅན། རྩུབ་པ། མི་སྲུན་པ། ཡུལ་གཞན་ནས་ཀྱང་དེ་དང་ཚུལ་མཚུངས་པ་དུ་མ་འདུས་པ་ལས། གྲངས་ཀྱང་ཤིན་ཏུ་མང་བ་དག །རྒྱལ་པོ་དེའི་འབྱོར་པ་ལ་ལྟོས་ནས་འོངས་པ་ནི། ཚ་བས་ཉེན་པའི་བ་གླང་གི་ཁྱུ་ཚོགས་བསིལ་བའི་མཚོར་ཆས་པ་བཞིན་དུ་གྱུར་ཏོ།།

སོས་ཀྱི་དུས་སུ་ནམ་མཁའི་ནོར་བུ་ཡི། །གདུང་བས་ཉེན་པའི་ནགས་ཚལ་ལག་ལྡན་རྣམས། །སྟེང་ནས་ཆུ་སྐྱེས་བླ་བྲེ་གཡོགས་པ་ཡི། །དྭངས་བའི་མཚོ་ཡིས་མགྲོན་དུ་གཉེར་བ་བཞིན། །དེ་རྣམས་འདུས་པ་དང་མིའི་བདག་པོ་དེ་བཞིན་གནགས་ཏེ། འདི་ལྟར། གནོད་བྱེད་འདི་རྣམས་འབྱོར་པ་ཀུན་གྱིས་མགུ་བར་བྱས་ན་ནི། སའི་བདག་པོའི་དཔལ་ཡང་ཆུ་ཤིང་གི་སྙིང་པོ་ལྟ་བུར་འགྱུར་ལ། གལ་ཏེ་གཞན་བགྱིས་ན་ནི་གནོད་བྱེད་འདི་དག་གིས་ལུས་དང་སེམས་གཉིས་པོ་ཕན་ཚུན་ཕྲ་མོས་རྣམ་པར་འབྱེད་པར་གདོན་མི་ཟ་བ་ཞིག་གོ་སྙམ་ནས་སྨྲེ་སྔགས་འདོན་པ་ན། སེམས་དཔའ་ཆེན་པོ་དེ་རྒྱལ་པོ་ལ་ཐུགས་བརྩེ་བས་དེ་དག་བསྲུང་བར་ཞལ་གྱིས་བཞེས་ཏེ་སྐུ་བསྲུང་མཛད་དོ།།

གཡོ་མེད་རྡོ་རྗེ་ལྟ་བུའི་ཐུགས་མངའ་ཞིང་། །བྱམས་པའི་མགོ་སྐྱེས་ཤེས་བྱའི་མཁའ་ལམ་ཁྱབ། །སྙིང་རྗེའི་མིག་རྩ་དམར་པོ་རབ་ཏུ་འཁྲུག །ཕས་རྒོལ་གཉིས་འཐུང་འཇོམས་པའི་སྦར་ཁྱིམ་ཅན། །རྟེན་འབྱུང་རིགས་ཚུལ་ང་རོས་སྲིད་པ་གསུམ། །གཡོ་བའི་ཆུ་ནང་ཟླ་བའི་གཟུགས་ཇི་བཞིན། །ཀུན་ཀྱང་འགྲོས་པ་ལྟ་བུར་རྩོམ་པ་ན། །གང་ཞིག་དེ་ལ་འཚོ་བའི་རྒོལ་བ་ངན། །མེ་ཏོག་མདའ་ཅན་དཔུང་དང་ལྷན་ཅིག་པར། །མི་བཟད་རྡོ་རྗེའི་གནམ་ལྕགས་འབར་བ་ཡིས། །རྡུལ་ཚོགས་ས་འཛིན་སྤོ་ལ་ཇི་བཞིན་དུ། །སྐད་ཅིག་ཉིད་ལ་མཐའ་དག་ཕྱེ་མར་བྱས། །དེ་ལྟར་མཐུ་ཚད་མེད་པས་གནོད་བྱེད་དེ་རྣམས་ཟིལ་གྱིས་མནན་ནས། སྐྱེ་དགུ་ཐམས་ཅད་དང་། ཁྱད་པར་སའི་བདག་པོ་འབངས་དང་བཅས་པ་རྣམས་བདེ་བར་བྱས་ཏེ། རང་ཉིད་ལའང་བཀུར་སྟི་ཆེན་པོ་ཐོབ་པ་ན། དམ་པ་འདི་ཉིད་ལ་རྗེ་བཙུན་གྱི་ཕྱག་ཆར་བཅངས་པའི་ཤིང་གི་རལ་གྲི་ཞིག་མ་གཏོགས། རང་བཞིན་གྱི་མཚོན་གྱི་རིགས་དང་བྲལ་བ། ཕྲག་དོག་གི་གཟུག་རྔུས་སེམས་གཟུ་བོར་མི་གནས་པའི་གྲོགས་ཀྱིས་མཐོང་བར་གྱུར་ཏོ།།

ཞེ་སྡང་བཞིན་རས་སྙིང་རྗེའི་མདངས་དང་བྲལ། །ཁྲོ་བའི་མཚོན་གྱིས་བཟོད་པའི་ལྗོན་པ་དབྱུང་། །ཡིད་ཀྱི་འཛིན་མ་ཕྲག་དོག་ཚེར་མས་བལྟམས། །འདི་དག་སྐྱེ་བོ་ངན་པ་ཀུན་གྱི་གནས། །ངན་པ་དེ་ལྟ་བུས་མ་བཟོད་པར་རྒྱལ་པོ་ལ་འདི་ནི་སྐྱེས་བུ་གཡོ་ཅན་ལགས་ཏེ། མཚོན་ཆ་ཡང་ཤིང་གི་རལ་གྲི་ཞིག་ལས་མེད་པའི་ཕྱིར། ལྷ་ཉིད་ཀྱི་སྐུ་བསྲུང་བར་མི་ནུས་པས་བརྟག་འཚལ་ལོ། །ཞེས་གསོལ་བས། རྒྱལ་པོ་དེར་རབ་ཏུ་ཁྲོས་ཏེ་བདག་ཉིད་ཆེན་པོ་དེ་ལ་མཚོན་ཆ་ཇི་ལྟ་བུ་འདུག་པ་བརྟག་པའི་ཕྱིར། གཞན་རྣམས་ལའང་སྙད་བཏགས་ཏེ། མཚོན་ཆ་རིམ་གྱིས་ཕྱུང་ངོ་། །སེམས་དཔའ་ཆེན་པོ་དེས་བདག་གི་རལ་གྲི་ཕྱུང་ན་ལྷ་ཉིད་ལ་ངན་པར་འགྱུར་རོ་ཞེས་གོ་བར་བྱེད་ན་ཡང་། ཕྲ་མས་སྤྱོས་པས། ངན་ཡང་བླའི། ཕྱུངས་ཤིག་ཟེར་རོ།།

དབྱེན་གྱི་གནམ་ལྕགས་སེར་བ་བབ་གྱུར་ན། །མཛའ་བའི་མེ་ཏོག་གཞོན་ནུ་ལྷག་མར་འགྱུར། །དེ་ལྟར་ནའང་དགེ་བའི་སྐྱེས་བུ་རྣམས། །ཉེས་པ་བྱས་པ་སེམས་ལ་གོམས་མི་འགྱུར། །འོ་ན་ལྷའི་སྤྱན་གཅིག་ཁོག་ལ། གཅིག་གིས་གཟིགས་སུ་གསོལ་གསུངས་ནས་རལ་གྲི་ཕྱུང་བས། དེའི་འོད་ཟེར་གྱིས་བལྟ་བར་བརྩམས་པའི་མིག་དེ་འབྲས་བཟང་སྨིན་པའི་མགྲིན་པ་གྲང་རེག་གི་དབྱུག་པས་བསྣུན་པ་བཞིན་དུ། རང་དབང་མེད་པར་འཛིན་མའི་མཐིལ་དུ་ལྷུང་ངོ་།།

དེ་ནས་འཁོར་དང་བཅས་པ་སྐྲག་ཅིང་། འདི་ནི་མཐུ་དང་ལྡན་པའི་དཔའ་བོ་ཞིག་སྟེ། ད་ནི་བཟོད་པ་དང་སྐྱབས་དམ་པར་གསོལ་ནས་བཀའ་འབངས་སུ་འཆི་བར་བགྱིའོ་སྙམ་དུ་བསམས་ནས་སྨྲས་པ། ལྷག་བསམ་རྩ་བ་རབ་བརྟན་མཁྱེན་པའི་ཡལ་ག་རབ་ཏུ་རྒྱས། །བརྩེ་བ་འདབ་བརྒྱའི་ཕྲེང་འཁྲིགས་མཛད་པའི་གྲིབ་བསིལ་ཕྱོགས་སུ་འབབ། །མཐུ་སྟོབས་འབྲས་བུས་བརྗིད་ཅིང་རིགས་དྲུག་འདོད་ལྷའི་ཉེར་འཚོ་རུ། །ལེགས་འཁྲུངས་འདོད་དགུ་སྤྱི་དང་རྣམ་གྲོལ་བདུད་རྩིའི་དཔལ་རབ་སྟེར། །ལེགས་ཚོགས་ནམ་མཁའི་གྲོང་དུ་གནས་བཅས་ཤིང་། །ཆོས་ཀུན་ཡོངས་སུ་གཟིགས་པའི་མིག་སྟོང་ལྡན། །ཕྱིར་རྒོལ་ལྷ་མིན་འཇོམས་པའི་རྡོ་རྗེ་ཅན། །མཐོ་རིས་མགོན་པོ་ཁྱོད་ཀྱིས་བཟོད་པའི་རིགས། །ཞེས་བཟོད་པར་གསོལ་ནས་སྐྱབས་སུ་གསོལ་བ་དང་། རྒྱལ་པོ་དེ་ཡང་དགེ་བའི་ཆོས་ཀྱི་སྣོད་དུ་རུང་བར་མཁྱེན་ནས། ཕན་པའི་གདམས་ངག་གིས་ཡང་དག་པར་ཚིམ་པར་མཛད་དོ།།

དམིགས་མེད་ཀུན་ལ་སྙོམས་པའི་དབྱར་སྐྱེས་ཕྲེང་། །ལེགས་བཤད་ཆུ་ཆར་ཟེགས་མའི་རལ་པ་ཡིས། །མི་དབང་རྒྱ་མཚོའི་གོས་ཅན་དགེ་ལེགས་ཀྱི། །རིན་ཆེན་མྱུ་གུ་མཐའ་དག་རྒྱས་པར་མཛད། །ཡོན་ཏན་བཅུད་ཀྱིས་བལྟམས་པའི་འདབ་བརྒྱ་པ། །དེ་དང་ཉེ་བའི་ཤེས་ལྡན་བུང་བ་ལ། །ཆེད་དུ་བསྒོས་པ་མེད་པར་ཡོན་ཏན་གྱི། །སྦྲང་རྩིའི་དོག་པ་ལག་པ་དག་ལ་དགོད།།

དེ་ནས་ཡང་སེམས་དཔའ་ཆེན་མོ་དེ་འགྲོ་བ་དུ་མ་རྗེས་སུ་བཟུང་བའི་ཕྱིར་རིངས་པ་ལྟར་ཆས་ཏེ་འབྱོན་པར་བརྩམས་པ་ན། མིའི་བདག་པོ་དེས་བསོད་ནམས་ཀྱི་ཞིང་དུ་བཞུགས་པར་ལན་གཅིག་ལན་གཉིས་ལན་གསུམ་གྱི་བར་དུ་གསོལ་ཡང་། རྒྱ་མཚོར་འཇུག་པའི་གངྒཱའི་རྒྱུན་ནི་སུས་ཀྱང་སླར་བཟློག་པ་མེད་པ་བཞིན་དུ་མ་གནང་ནས། དཔལ་གྱི་རིའི་ལྷོ་ཕྱོགས་ཀྱི་ངོས་སུ་ཞབས་ཀྱི་ཐིག་ལེ་མངོན་པར་གསལ་བར་བཀོད་ནས། ཨུཙྪུ་སྨའི་སྤྱོད་པ་ཞེས་བྱ་བ་སྐུ་གཅེར་བུ་སྤྲང་པོའི་ཆ་བྱད་ཅན། ཁྲུད་མ་པོ་བའི་ཚིགས་མ་ཙམ་གྱི་འཚོ་བ་ལ་བརྟེན་ཅིང་། རིག་པ་བརྟུལ་ཞུགས་ཀྱི་སྤྱད་པ་སྤྱོད་ཅིང་གནས་པ་ན། ཁ་ཏ་བི་ཧ་རའི་རྒྱལ་པོའི་ཕྲན་མོ་ཀ་ཙ་མ་ཧཱས་ཁྲུད་མའི་བྱ་བ་བྱས་ཏེ། ཆུ་བོ་ཟེགས་མ་འཐོར་བ་སློབ་དཔོན་ཆེན་པོ་དེའི་ཞབས་ལ་ཕོག་པ། ལྕགས་བསྲེགས་ལ་བྲན་པ་ལྟར་ཁོལ་ཞིང་འབར་བ་མཐོང་། དེའི་ཚེ་རྒྱལ་པོ་དེ་ལ་མུ་སྟེགས་བྱེད་ཀྱི་སྟོན་པ་ཤང་ཀར་དེ་ཝ་ཞེས་བྱ་བས་ནང་པའི་པཎྜི་ཏ་དང་རྩོད་ཅིང་རྫུ་འཕྲུལ་འགྲན་པར་བྱས་ཏེ། དེ་ཡང་ཇི་ལྟར་ཕམ་པ་དེ། རྒྱལ་བ་དེའི་བསྟན་པ་ལ་འཇུག་ཅིང་ཆོས་དང་གཙུག་ལག་ཁང་སོགས་ཀྱང་བསྲེག་པར་བྱེད་པས། ཁྱོད་ཀྱིས་གནང་བར་མཛད་ཅིང་དྲང་པོར་བཞུགས་སུ་གསོལ། ཞེས་གསོལ་བ་ལྟར། རྒྱལ་པོས་ཕོ་ཉ་བཀྱེ་སྟེ་དགེ་འདུན་རྣམས་བསྡུས་ནས་དོན་དེ་བསྙད་པ་ན། སུས་ཀྱང་ཁས་ལེན་མ་ནུས་པས། རྒྱལ་པོ་དེ། སྐྱོན་བྲལ་ཨིནྡྲ་རྙིལ་གྱི་བསྟི་གནས་སུ། གཉིས་མེད་གསུང་བའི་ལུགས་བཟང་ག་བུར་གྱི་ཉལ་འགྲོའི་ཕུང་པོ་མུ་སྟེགས་ཧ་ལའི་ཕྱེ་མས་རྙོག་པར་གོར་མ་ཆག་གོ་སྙམ་ནས། ཡིད་ཀྱི་སྐྱེས་བུ་མྱ་ངན་གྱི་ཁུང་བུར་ཞུགས་པ་ནི། ལྷ་བུ་ལང་ཚོ་གསར་པ་འདོད་དགུའི་འབྱོར་པས་ཀུན་དགའ་བསྐྱེད་པའི་སྐྱེད་ཚལ་ནས། དུས་ཀྱི་སྲིན་པོའི་མྱོང་བྱེད་ཀྱི་ལམ་དུ་འཇུག་པའི་མཚན་མ་མངོན་དུ་གྱུར་པའི་དཀའ་ཐུབ་ལ་འགྲན་པ་བཞིན་དུ་གནས་པ་ན། སྔར་བདག་ཉིད་ཆེན་པོའི་རྫུ་འཕྲུལ་གྱི་ཆ་ཤས་རྡུལ་ཕྲན་གྱི་གོས་ཙམ་དག་པའི་མིག་ཡུལ་དུ་གྱུར་པའི་བྲན་མོ་དེས། ཞིབ་མོར་སྟོན་པའི་དག་གིས་གསོལ་ནས། དེ་ཡི་ནུས་པ་མ་ལགས་སམ་ཞུས་པ་དང་། དེ་ལྟ་བུའི་རྣལ་འབྱོར་པ་དེ་གང་ན་འདུག་ཀྱང་སྤྱན་དྲོངས་ཤིག་ཅེས་ཕོ་བྲང་འཁོར་གྱི་མི་རྣམས་ལ་བསྒོའོ།།

དེ་ལྟར་བསྒོ་བ་དང་། སྐྱེ་བོ་དུ་མ་སློབ་དཔོན་ཆེན་པོ་དེ་བཙལ་བའི་ཕྱིར་ཕྱོགས་མཚམས་རྣམས་སུ་སོང་སོང་བ་ལས། ཤིང་སྡོང་པོ་ཞིག་གི་དྲུང་དུ་མཇལ་ནས། རྒྱུ་མཚན་རྣམས་ཞུས་པས། དེ་ལྟ་བུ་ཁོ་བོས་ནུས་ཀྱི། ཁྱེད་རང་རྣམས་ཆུ་ཀ་ལ་ཤ་གང་། མེ། ཀ་ཤིའི་རས་ཟུང་རྣམས་སྟ་གོན་གྱིས་ཤིག །ཅེས་བཀའ་སྩལ་ཏོ། །བཀའ་སྩལ་པ་ལྟར་དགོས་པའི་ཡོ་བྱད་རྣམས་ནི་སྦྱར། སྐྱེ་བོའི་ཚོགས་འདུས་པའི་ཁྲོད་དུ་གདན་ཁྲི་ཚད་མེད་པར་བཤམས་པའི་དབུས་སུ་ནི་རྒྱལ་པོ། གཡས་གཡོན་དུ་ནི་སེམས་དཔའ་ཆེན་པོ་དང་། མུ་སྟེགས་ཀྱི་སྟོན་པ་རྣམས་འཁོད་ནས་རྩོད་པས། བདག་ཉིད་ཆེན་པོའི་ལུང་དང་རིགས་པའི་མཐུ་ཕུལ་དུ་བྱུང་བས། ཕྱིར་རྒོལ་བ་དེ་ཉིད་ཀྱི་སྤོབས་པ་ལན་བརྒྱར་ཕྱེ་མར་བརླག་གོ།

འགྲན་འདོད་རྙོག་པའི་ཆུ་གཏེར་ཆེ་ལས་བྱུང་། །འབྲེལ་བྲལ་ངག་གི་མེ་ཏོག་འཐོར་བ་ན། །གང་གི་ལུང་དང་རིགས་པའི་བ་མོ་ཡིས། །རེག་པས་སྒྲ་ཡི་ལྷག་མ་ཙམ་དུ་གྱུར། །རླབས་ཆེན་སྨོན་ལམ་རྟ་བདུན་ཤུགས་ཀྱིས་དྲངས། །རྒྱལ་སྲས་སྤྱོད་པ་ལྷུན་པོའི་ངོས་ན་མཛེས། །ངོ་མཚར་མཛད་པའི་འོད་ཟེར་འབུམ་ཕྲག་འགྱེད། །རིགས་པའི་ཉིན་བྱེད་དབང་པོ་ཤར་བའི་ཚེ། །རབ་རྨོངས་རྒྱུ་སྐར་དབུས་ན་གསལ། །ཕྲག་དོག་རི་དྭགས་མཚན་མས་བརྒྱན། །ལུས་མེད་བདག་པོ་གསེར་མིག་ལྡན། །མགུ་བ་བསྒྲུབ་པའི་བྲན་གཡོག་དེ། །གཏན་ཚིགས་ལྡན་པའི་ལམ་ལས་རྣམ་པར་གོལ། །གཞན་ལ་སྨོད་པའི་ངན་ཚིག་མདའ་རྒྱང་འཕེན། །རང་ཉིད་འདོད་པའི་ལམ་ལས་ལྐོག་གྱུར་ཀྱང་། །གཅམ་བུའི་ངག་གིས་སྤྱི་བོའི་གཙུག་ཏུ་བསྟེན། །ཤིན་ཏུ་དཔའ་བའི་རབ་འབར་མཚོན་ཆ་ལ། །ཉམ་ཆུང་དབྱུག་པས་འགྲན་པ་ལས་ཀྱང་མཚར།།

སླར་ཡང་མུ་སྟེགས་བྱེད་དེ་ཆོག་མ་ཤེས་པར་རྫུ་འཕྲུལ་འགྲན་པར་ཆས་ཏེ། བར་སྣང་ལ་དབང་ཕྱུག་ཆེན་པོའི་དཀྱིལ་འཁོར་བྲིས་ནས་ཤར་སྒོ་ཙམ་ཟིན་པ་ན། སློབ་དཔོན་ཆེན་པོ་དེས་ཟད་པར་རླུང་གི་ཏིང་ངེ་འཛིན་ལ་སྙོམས་པར་ཞུགས་པར་གྱུར་ཏོ། །མཉམ་པར་བཞག་མ་ཐག་ཏུ་འཚུབ་མ་ཆེན་པོ་བྱུང་ནས། དཀྱིལ་འཁོར་དང་བཅས་པའི་མུ་སྟེགས་བྱེད་དང་རྒྱལ་པོ་བཙུན་མོ་དང་བཅས་པ་རྣམས་ནི་འཚུབ་མས་གོས་ཆེད་དུ་བཤམས་པ་ལྟར་གྱུར་ཅིང་ཁྱེར། ཤིང་ལྗོན་པ་རྣམས་ནི་ཕན་ཚུན་འཐབ་པ་ལྟར་འཁྲུགས། རི་བོ་རྣམས་ནི་བསེར་བུའི་ཤུགས་མ་བཟོད་པར་ཉལ་བ་བཞིན་དུ་ཉིལ་བར་གྱུར་ཏོ།།

དུས་ཀྱི་འཐོར་བྱེད་དྲག་པོ་འོངས་པ་ལྟར། །འུར་འུར་བྱེད་པའི་སྒྲ་ཆེན་སྒྲོག་བྱེད་ཅིང་། །མྱུལ་བའི་ལག་པ་གཡོ་བའི་གར་བྱེད་པས། །དངོས་ཀུན་སྟོང་པའི་དབྱིངས་སུ་འདྲེན་ནམ་སྙམ། །ཡང་ན་འཁོར་ཡུག་ས་འཛིན་ཁོང་སེང་ནས། །གྲངས་མེད་རྡུལ་མང་དཔའ་བའི་དམག་ཚོགས་ནི། །ཕྱི་རོལ་དཀྱིལ་འཁོར་ནམ་མཁར་གནས་པ་རྣམས། །སྐྱེངས་པར་བྱེད་ལ་ཆེད་དུ་བྱས་པ་བཞིན། །རྫུ་འཕྲུལ་མངོན་པར་འདུ་བྱེད་པ་དེ་ལྟར་བསྟན་ནས། ཐུགས་རྗེ་ཆེན་པོས་སྨིན་མཚམས་ནས་འོད་ཟེར་སྤྲོས་དེ། རྒྱལ་པོ་བཙུན་མོ་དང་བཅས་པ་ལ་ལམ་བསྟན་ནས་མདུན་དུ་བཀུག་སྟེ། ལུས་གོས་དང་བྲལ་བ་རྡུལ་གྱིས་གཡོགས་ནས་འདུག་པ་ཆུས་བཀྲུས་ཏེ། རས་གསར་པ་གཡོགས། མེ་ལ་བསྲོས་ནས་བདེ་བར་མཛད་པས། བདག་ཉིད་ཆེན་པོའི་མཛད་པ་ལ་ཡི་རངས་ཏེ་ཨུཏྤལའི་ལྦ་བ་ལྟར་བཞིན་འཛུམ་ཞིང་ཨ་ལ་ལ་ཞེས་བརྗོད་པར་བྱེད་དོ།།

དེ་ནས་ཡུལ་དེ་དང་དེའི་ཉེ་ལོགས་ན་ཡོད་པའི་མུ་སྟེགས་བྱེད་ཀྱི་ལྷ་ཁང་རྣམས་དང་། ངན་པའི་ཆོས་རྣམས་དང་། དབང་ཕྱུག་ཆེན་པོ་ལ་སོགས་པའི་གཟུགས་བརྙན་ལུགས་མ་དང་། རས་བྲིས་ལ་སོགས་པ་རྣམས་ལ་འཇིག་དུས་ཀྱི་མེའི་བསྐལ་པ་མངོན་སུམ་དུ་འོངས་པ་ལྟར་ནི་བྱས། དེ་དང་དེའི་སྲོལ་འཛིན་པའི་གཙོ་བོ་དང་། རྗེས་སུ་སྤྱོད་པའི་ལོག་ལྟ་ཅན་མང་པོ་སྔར་རང་ཉིད་སྤྱོད་པའི་བརྟུལ་ཞུགས་དོར་ནས། སྐྲ་དང་ཁ་སྤུ་རིང་པོ་ནི་བྲེགས། གོས་ཁ་དོག་ལེགས་པར་བསྒྱུར་བའི་ངུར་སྨྲིག་ནི་བགོས། དམ་པའི་ཆོས་འདུལ་བ་ལ་རབ་ཏུ་བྱུང་ཞིང་། དུལ་བ་དང་སྡོམ་པའི་དཔལ་ལ་ཡང་དག་པར་གནས་པར་མཛད་དོ།།

བྱམས་དང་བརྩེ་བའི་མཆེ་སྡེར་མི་བཟད་པས། །སྡུག་བསྔལ་ཟླ་བའི་འབྱུང་གནས་གཟིར་བྱེད་ཅིང་། །ཐབས་དང་ཤེས་རབ་འདབ་མའི་ཤུགས་བསྐྱོད་པས། །རྣམ་གྲོལ་ལྷ་ཡི་གནས་ལ་དབང་བསྒྱུར་བའི། །རྒྱལ་སྲས་མཁའ་ལྡིང་ཀུན་གྱི་དབང་པོ་ཁྱོད། །མཐོང་བ་ལྟ་ཞོག་སྒྲ་ཡི་ཕོ་ཉ་བ། །རྣ་བའི་དྲུང་དུ་བསྙེགས་པ་ཙམ་ཞིག་གིས། །ཆུ་སྲིན་རྒྱལ་མཚན་གདེངས་ཀ་ཅན་གྱི་ཚོགས། །བཟོད་གླགས་མེད་པའི་མྱ་ངན་མེ་ལྕེ་ཡིས། །ཡིད་ཀྱི་བུད་ཤིང་བསྲེགས་པས་སྤ་བཀོང་གྱུར། །དེ་ལྟ་བས་ན་ཁྱིམ་ན་གནས་པ་ནི་ཚུལ་ཁྲིམས་ཀྱི་གཉེན་པོར་གྱུར་ཅིང་། སྡུག་བསྔལ་མང་པོའི་འབྱུང་ཁུངས་སུ་གྱུར་པའི་ཕྱིར། བདག་བདེ་བར་འདོད་པ་རྣམས་ཀྱིས་ནི་ཡོངས་སུ་བཏང་ངོ་། །ཞེས་ཁྱིམ་གྱི་ཉེས་པ་བསྟན་པ་ལ་ཡང་བརྗོད་པར་བྱའོ། །དགོན་པ་ཞི་བ་རྣམས་སུ་དམ་པའི་ཆོས་ལེགས་པར་བསྒྲུབ་ནུས་ཀྱི། ཁྱིམ་ན་དེ་ལས་ཕྱིར་ཕྱོགས་སོ་ཞེས་རབ་ཏུ་དབེན་པའི་གཏམ་བྱ་བ་ལ་ཡང་བརྗོད་པར་བྱའོ། །བྱང་ཆུབ་སེམས་དཔའི་སྤྱོད་པ་ནི་ཤིན་ཏུ་བྱ་དཀའ་ཞིང་རྨད་དུ་བྱུང་བའི་ཕྱིར། དེ་ལ་ཕྱོགས་པའི་སེམས་ཅན་རྣམས་ལ་བརྙས་པར་མི་བྱའོ། །ཞེས་བྱང་ཆུབ་སེམས་དཔའ་རྣམས་ཀྱི་ཡོན་ཏན་བསྔགས་པ་ལ་ཡང་བརྗོད་པར་བྱའོ། །སྐྱེས་བུ་དམ་པ་རྣམས་དང་ཕྲད་པ་ནི་ཇི་ལྟར་ཡིན་ཡང་རུང་། དགེ་བར་འགྱུར་བས་བདག་ཉིད་ལེགས་པར་འདོད་པ་རྣམས་ཀྱིས་ནི་སྐྱེ་བོ་དམ་པ་བཙལ་བར་བྱའོ། །ཞེས་སྐྱེས་བུ་དམ་པའི་ཡོན་ཏན་བསྔགས་པ་ལ་ཡང་བརྗོད་པར་བྱའོ། །སྙིང་རྗེ་ཆེན་པོ་དང་ལྡན་པ་རྣམས་ཀྱིས་གཞན་སྡུག་བསྔལ་གྱིས་གདུངས་པ་མཐོང་བ་ན། ལུས་སྲོག་ལ་ཡང་ཕངས་པ་མེད་པར་བདོག་པ་ཐམས་ཅད་ཡོངས་སུ་གཏོང་ངོ་ཞེས་གཏོང་བ་ལ་དཔའ་བ་རྣམས་གཟེངས་བསྟོད་པ་དང་། སྙིང་རྗེ་ཆེན་པོའི་ཡོན་ཏན་བསྔགས་པ་ཡང་བརྗོད་པར་བྱའོ། །དེ་ལྟར་སྐྱེས་བུ་དམ་པ་རྣམས་ཀྱིས་དཀའ་བ་དུ་མས་དམ་པའི་ཆོས་བཙལ་ཞིང་ཡོངས་སུ་བསྒྲུབས་པའི་ཕྱིར། རིམ་གྲོ་བསྐྱེད་དེ་ཆོས་ཉན་པ་ལས་ཡང་བརྗོད་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་ལྷའི་རྟོགས་པ་བརྗོད་པ་པདྨ་དཀར་པོའི་ཕྲེང་བ་བྱིན་རླབས་ཀྱི་དྲི་བསུང་འཕྲོ་བྱེད་ཅེས་བྱ་བ་ལས། རྒྱལ་པོ་དང་མུ་སྟེགས་བྱེད་རྣམས་བཏུལ་བའི་རྟོགས་པ་བརྗོད་པ་སྟེ། འདབ་མ་བཞི་པའོ།།  །།

 

གང་ཞིག་རྒྱལ་བའི་སྲས་ཀྱི་མཛད་པ་གང་། །ཀུན་གྱི་དེད་དཔོན་མཁས་པའི་བསྔགས་པ་ཀུན། །ཚུལ་བཞིན་དགོངས་པ་མ་ནོར་གསལ་བའི་ཚུལ། །རྒྱན་མང་སྡེབ་ལེགས་ཚིག་གིས་རྣམ་པར་བརྒྱན། །ལྷག་བསམ་རྣམ་དག་དག་པའི་སྙིམ་པ་ཆེན་པོ་ཡིས། །མཛད་པ་རབ་བཀྲ་བཀྲ་བའི་མེ་ཏོག་གཞོན་ནུ་ནི། །དཀར་བའི་པདྨ་མ་ལུས་དགའ་བསྐྱེད་མགྲིན་སྐྱེས་ཀྱི། །སྲིད་པའི་ལམ་དུ་དུ་མའི་མངོན་བརྗོད་ཟེའུ་འབྲུས་ཕྱུག །ཆོས་དང་མཐུན་པའི་རོ་ཡིས་ཀུན་ནས་བལྟམས། །བྱིན་རླབས་དྲི་བསུང་བཟང་པོའི་ངད་དང་ལྡན། །སྤེལ་ལེགས་ས་རྒའི་འདབ་མ་ཕྱོགས་བཞིར་མཛེས། །རྟོགས་བརྗོད་པདྨ་དཀར་པོའི་ཕྲེང་བ་འདི། །འགྲན་དང་གྲགས་འདོད་བསེར་བུ་ཡིས། །རང་དབང་བྲལ་བས་ལྷུང་བ་མིན། །ཡན་ལག་དྲུག་ཅུའི་ཕུན་ཚོགས་ཀྱི། །འབྲས་བཟང་བསྐྲུན་ཕྱིར་འདི་བསྒྲུབས་སོ། །རྣམ་ཐར་གསར་པའི་ཆུ་རིས་བཀྲ་བའི་སྤྲིན་ཕྲེང་ལས། །ཡ་མཚན་བཞད་པའི་སྒྲ་དབྱངས་རྣ་བར་འོངས་བ་ན། །དང་བས་མགྲིན་བཏེགས་དབྱངས་ཅན་སོར་མོས་མཆོད་པ་ཡི། །སྙན་བརྗིད་འགྲན་ཟླ་ཅ་ཅོའི་གླུ་དབྱངས་འདི་བསྒྲགས་སོ། །མཁས་རྣམས་ཟླ་ཤེལ་ཡིད་འོང་མེ་ལོང་ངོས། །དོན་ཟབ་སྡེབ་ལེགས་ཚོན་གྱིས་བསྒོས་པ་ཡི། །རྟོགས་བརྗོད་རྨ་བྱའི་ལུས་ཀྱི་མེ་ཏོག་འདིའི། །ངོ་མཚར་སྣང་བརྙན་འཛིན་པར་ཅིས་མི་བྱེད། །རྨོངས་པའི་རབ་རིབ་ཟུག་རྔུ་ལས། །རིང་དུ་གྱུར་པའི་ཤེས་རབ་ཀྱི། །མིག་དང་ལྡན་པའི་གཞོན་ནུ་དག །ཅི་དགར་སྙན་ཚིག་སྒྲོག་པར་གྱིས། །ཚུལ་འདིར་འབད་ལས་བྱུང་བའི་བསོད་ནམས་གང་། །གང་ཞིག་མཆོག་ཏུ་དཀར་བ་ཟླ་འདྲ་ཀུན། །ཀུན་ཏུ་བསྡོམས་པ་དེ་ཡིས་འགྲོ་བ་ཀུན། །ཀུན་མཁྱེན་རྫོགས་པའི་སངས་རྒྱས་མྱུར་ཐོབ་ཤོག །བདག་ཀྱང་དེང་ནས་སྐྱེ་བ་ཐམས་ཅད་དུ། །རིན་ཆེན་བྱང་ཆུབ་སེམས་དང་མི་བྲལ་ཞིང་། །རླབས་ཆེན་ཀུན་ཏུ་བཟང་པོའི་སྤྱོད་པ་ལ། །བརྟེན་ནས་འགྲོ་བ་འདྲེན་པའི་དཔལ་གྱུར་ཅིག །གནས་སྐབས་སུ་ཡང་མགོན་པོ་ཞི་བའི་ལྷའི། །དྲི་མེད་རྣམ་ཐར་ཇི་བཞིན་ལེགས་བཟུང་ནས། །བསྟན་དང་འགྲོ་བའི་དོན་མཆོག་བསྒྲུབ་པ་ལ། །མགོན་པོ་འཇམ་པའི་དབྱངས་དང་མཚུངས་པར་ཤོག །ཅེས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བ་ལྷའི་རྟོགས་པ་བརྗོད་པ་པདྨ་དཀར་པོའི་ཕྲེང་བ་བྱིན་རླབས་ཀྱི་དྲི་བསུང་འཕྲོ་བྱེད་ཅེས་བྱ་བ་འདི་ནི། རྗེ་བཙུན་དམ་པ་དེ་ཉིད་ཀྱི་རྣམ་པར་ཐར་པ་མཐོང་བས། དང་བའི་དད་པ་ཆེན་པོས་ཉེ་བར་བསྐུལ་ཏེ། ཤཱཀྱའི་བཙུན་པ་བློ་བཟང་ཆོས་ཀྱི་རྒྱལ་མཚན་ཞེས་བྱ་བས། ན་ཚོད་ལོ་བཅུ་དྲུག་ལོན་པའི་ཚེ། གྲུབ་པའི་གནས་མཆོག་དབེན་ས་ཆོས་ཀྱི་ཕོ་བྲང་གི་གཙུག་ལག་ཁང་དུ་བདག་ཉིད་ཀྱིས་སུག་བྲིས་སུ་བགྱིས་པའོ། །འདིས་ཀྱང་རྒྱལ་བའི་བསྟན་པ་སྤྱི་དང་། ཁྱད་པར་ཐེག་པ་མཆོག་གི་བསྟན་པ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག། །།

 

[1] པཎ་ཆེན་བློ་བཟང་ཆོས་རྒྱན་གྱི་གསུང་འབུམ། པོད། ༼ཀ༽  དཔེ་གཟུགས། ཤོག་གྲངས་ ༡ན༡ ནས་ ༡༨ན༢ བར་བཞུགས།

Leave a Reply

Your email address will not be published. Required fields are marked *