༄༅། །ཀུན་མཁྱེན་གཉིས་པ་དབྱིག་གཉེན་ཞབས་ཀྱི་རྟོགས་བརྗོད་བསྟན་པ་ལ་འཇུག་པའི་ཡིད་བཞིན་མཛོད་སྒོ་ཞེས་བྱ་བ།།

 

༄༅། །ཀུན་མཁྱེན་གཉིས་པ་དབྱིག་གཉེན་ཞབས་ཀྱི་རྟོགས་བརྗོད་བསྟན་པ་ལ་འཇུག་པའི་ཡིད་བཞིན་མཛོད་སྒོ་ཞེས་བྱ་བ།།[1]

༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽

༄༅། །ན་མོ་བུདྡྷ་ཡ། ངོ་མཚར་ཆོས་ཀྱི་ཡིན་ལུགས་མཐར་ཐུག་པ། །རབ་དགོངས་མཛད་པས་མཁྱེན་པའི་རྩེ་མོར་སོན། །ཐུགས་རྗེའི་དབང་གྱུར་འགྲོ་བ་ཐམས་ཅད་ཀྱི། །བྲན་བཞིན་མཛད་པས་ཕྱག་འོས་ཤཱཀྱའི་སྲས། །སུམ་རྩེན་དཔའ་བོ་རྗེ་བཙུན་མ་ཕམ་པས། །ངེས་དོན་བདུད་རྩིར་མཛད་པའི་འཆི་མེད་བཅུད། །ཐུབ་བསྟན་སྦྲང་རྩིའི་དགྲ་བོ་མ་མྱངས་པ། །ཐོགས་མེད་སྙན་ཤལ་རིང་པོའི་དཔལ་དུ་བྱོན། །

ཐེག་གསུམ་དཔག་བསམ་འཚོ་བའི་རྣམ་དཔྱོད་ཀྱི། །རྩ་ལག་རབ་རྒྱས་བསྟན་བཅོས་དུ་མའི་བདག །དབྱིག་གཉེན་ཞེས་བྱར་གྲགས་པའི་རྔ་བོ་ཆེ། །ཀུན་གྱི་རྣ་བར་སིམ་མཛད་དེ་ལ་འདུད། །ཕྱི་དུས་འདི་ན་ཁྱོད་ལ་མཁས་མཆོག་ཅེས། །གཅམ་བུའི་ངོར་བྱས་བརྙན་བརྗོད་མང་ན་ཡང༌། །བློ་ངན་མང་པོས་དངོས་སྨྲའི་འདམ་དུ་བཅིངས། །དེང་འདིར་དག་བྱེད་ཁྲུས་ཀྱི་རྒྱུན་ཆེན་དབུལ། །ཐུབ་བསྟན་འབུམ་ཕྲག་བརྒྱ་ཡི་མཛོད་བཟུང་ནས། །ཉིན་རེ་བཞིན་ཡང་ངེས་དོན་མཆོག་ཅིག་པའི། །ཕ་རོལ་ཕྱིན་གྱུར་སྟོང་ཕྲག་བརྒྱ་པའི་མདོ། །ཚིག་ཟུར་མ་ཉམས་ལྗགས་རྩེར་འདོན་པས་གདོན། །མཁྱེན་ལྡན་ཁྱོད་ཀྱི་གཞུང་རྩོམ་སྐབས་ཀྱི་ཚེ། །ཉན་ཐོས་བསྟན་པ་ཕལ་ཆེར་དྲི་མས་སྦགས། །ཐེག་ཆེན་བསྟན་པ་ཤར་ཡང་མ་དར་བར། །གཟིགས་ནས་ཐེག་གསུམ་བསྟན་བཅོས་མང་དུ་མཛད། །བདེན་བཞིའི་ཆོས་དང་བདེན་གཉིས་རྣམ་དབྱེ་བ། །ཐུབ་བསྟན་ཡོངས་ཀྱི་རྩ་བར་མཁྱེན་གྱུར་ནས། །གྲུབ་མཐའ་རྣམ་བཞིའི་དྲང་ངེས་མ་ལུས་ཕྱེ། །འདུལ་བའི་ལུང་དང་ཉན་ཐོས་མདོ་སྡེའི་གཞུང༌། །གྲུབ་མཐའ་སྨྲ་བས་མཐུན་པར་འཛིན་མོད་ཀྱང༌། །མངོན་པའི་བསྟན་བཅོས་དྲི་མས་རྙོགས་གྱུར་པ། །ལུང་དང་རིགས་པས་བླང་དོར་གསལ་བར་མཛད། །ཆོས་ཀྱི་བདག་མེད་ཕལ་ཆེར་མངོན་པའི་ལུགས། །གང་ཟག་བདག་མེད་མདོ་སྡེའི་གཞུང་བཞིན་དུ། །གསལ་མཛད་བསྟན་བཅོས་མངོན་པའི་མཛོད་ཆེན་དེ། །ཉི་མ་ཇི་བཞིན་འཛམ་གླིང་ཀུན་ལ་གསལ། །ཞིབ་མོའི་མི་བདག་གསལ་བར་མ་བསྟན་ནས། །ཆོས་ཀྱི་བདག་མེད་ཇི་བཞིན་མཚོན་མི་ནུས། །དེ་ཕྱིར་ཁྱོད་ཀྱི་འདུས་བྱས་ཆོས་ཀུན་ལ། །གནས་པ་མེད་པར་ལུང་དང་རིགས་པས་བསྒྲུབས། །ཕྲ་མོའི་སྡུག་བསྔལ་ཇི་བཞིན་མ་བཤད་ན། །ཕྱི་ནང་ཐར་པའི་ཁྱད་པར་དབྱེ་མི་ནུས། །དེ་ཕྱིར་ཁྱོད་ཀྱིས་བྱིས་པས་སྡུག་བསྔལ་དུ། །མ་རྟོགས་འདུ་བྱེད་སྡུག་བསྔལ་རྒྱས་པར་བཤད། །རྨོངས་ཆེན་འཁོར་བའི་རྩ་བར་མ་བཤད་ན། །ཕྱི་ནང་ལམ་གྱི་དབྱེ་བ་མི་ཕྱེད་པས། །རིག་བྱེད་གཞུང་དུ་མ་གྲགས་གང་ཟག་གི །བདག་ཏུ་འཛིན་པ་འཁོར་བའི་རྩ་བར་བཤད། །དེ་ལྟར་བདག་དང་བདག་གིས་སྟོང་ལྟ་བའི། །འཁྲུལ་མེད་ལམ་དེ་སུ་ཡི་གོམས་བྱས་ཀྱང༌། །ཐུབ་པའི་བསྟན་ལ་རྩོད་པ་དང་བྲལ་བའི། །ཐར་པའི་གོ་འཕང་རྙེད་པར་ཁྱོད་ཀྱིས་བཤད། །དམན་པར་ངེས་པའི་ཉན་ཐོས་མང་པོས་ཀྱང༌། །བདེན་བཞིའི་ཆོས་ལུགས་རྒྱས་པར་ཤེས་པ་ན། །སྐད་ཅིག་གིས་མཚོན་ཆོས་ཀྱི་བདག་མེད་ཀྱང༌། །ཤེས་མོད་གོམ་བྱེད་མིན་པར་ཁྱོད་ཀྱིས་བཤད། །འདི་ན་ལ་ལ་དབྱིག་གཉེན་གྱིས་བཤད་པའི། །ལམ་གྱིས་ཐར་པའི་གོ་འཕང་རྙེད་དཀའ་ཟེར། །མཛོད་འདིར་མ་བཤད་གང་ཟག་བདག་མེད་པ། །འཆད་བྱེད་རིགས་པ་སངས་རྒྱས་ཀྱིས་མ་གསུངས། །རང་རང་གཞུང་ནས་བཤད་པའི་སྒྲིབ་པ་ཀུན། །དེ་ནས་བཤད་པའི་གཉེན་པོས་མི་སེལ་ན། །རྒྱལ་བས་དབང་པོར་འཚམས་པའི་ཆོས་བསྟན་པ། །གཞུང་རྩོམ་ཁྱོད་ཀྱིས་གསལ་བར་བཀྲལ་མིན་ནམ། །ཆོས་ཀྱི་བདག་མེད་གསལ་བར་མ་ཤེས་ན། །ཁམས་གསུམ་ཉོན་མོངས་སྤོང་ནུས་མིན་ཞེས་པའི། །ཀླན་ཀ་དེ་ཡིས་ཁྱོད་ལ་རྒོལ་མི་ནུས། །སྐད་ཅིག་གནས་པ་མེད་པར་ཁྱོད་ཀྱིས་བཤད། །འཇིག་རྟེན་བློ་ཡི་རྣམ་དཔྱད་མི་བཟོད་པ། །ཀུན་རྫོབ་ཆོས་སུ་བཤད་པར་མ་ཟད་ཀྱི། །འཕགས་བློས་དཔྱད་ཚེ་རྒྱུན་དང་རགས་པའི་དངོས། །མ་ལུས་ངོ་བོས་སྟོང་པར་ཁྱོད་ཀྱིས་བཤད། །བྱེ་སྨྲའི་གཞུང་ལ་རྟོག་གེའི་བློས་བརྟགས་པ། །མང་ཞིག་ཁྱོད་ཀྱིས་ལེགས་པར་བསལ་མཛད་ནས། །བྱེ་བྲག་སྨྲ་གཞུང་ཐུབ་བསྟན་ཡིད་བཞིན་མཚོ། །འདེགས་བྱེད་གསེར་གྱི་ས་གཞི་ཁྱོད་ཀྱིས་བཤད། །དེ་ནས་ཐེག་ཆེན་བསྟན་པ་ནོར་བུའི་ཕྲེང༌། །རྣམ་བཤད་རྒྱལ་མཚན་རྩེ་མོར་བཞུགས་གསོལ་ནས། །དག་བྱེད་རིམ་གསུམ་ལྡན་པའི་སྦྱོང་ཚུལ་གྱིས། །ལེགས་པར་སྦྱངས་པའི་ངེས་དོན་ཁྱོད་ལ་མངའ། །འཁོར་ལོ་བར་པ་དྲང་བའི་དོན་ཉིད་དུ། །ཐོགས་མེད་མཆེད་ཀྱིས་འཆད་ཅེས་འདི་ན་གྲགས། །ཤེར་མདོའི་དགོངས་པ་ངེས་པའི་དོན་ཅན་དུ། །བློ་བཟང་ཁྱོད་ཀྱིས་རྣམ་བཤད་རིག་པར་གསུངས། །ངེས་པའི་དོན་ཞིག་ངོས་འཛིན་དགོས་གྱུར་ན། །ཁྱོད་དང་ཀླུ་སྒྲུབ་ལུགས་ལ་ཁྱད་པར་མེད། །ཐལ་རང་གཞུང་གི་དངོས་བསྟན་ཇི་བཞིན་པ། །ངེས་དོན་ངོས་བཟུང་མེད་པར་ཆེ་རྣམས་བཞེད། །དགོངས་འགྲེལ་མདོ་དང་ཁྱོད་གཞུང་ལས་བཤད་པའི། །ཆོས་དབྱིངས་ཡེ་ཤེས་ངེས་པའི་དོན་མིན་ན། །རྒྱུད་གཞུང་ཀུན་དང་འདུས་པའི་རིམ་ལྔ་སོགས། །གང་དེར་བཤད་པའི་ངེས་དོན་སུ་ཡིས་ཤེས། །དེ་ཕྱིར་ཐེག་ཆེན་སེམས་བསྐྱེད་ཐུགས་ལ་འཁྲུངས། །རྒྱུད་དང་རྒྱུད་བླའི་དགོངས་པ་ཁྱོད་ཀྱིས་མཁྱེན། །སྣང་ཚད་སེམས་སུ་བདེན་པར་ཁྱོད་མི་བཞེད། །དབུ་མའི་མཚན་དོན་མ་ལུས་ཁྱོད་ལ་མངའ། །ཤེས་བྱ་ནང་གིར་སྨྲ་བའི་གྲུབ་པ་ནི། །ཐེག་མཆོག་རྩེ་མོ་ཡིན་ཏེ་གང་གི་ཕྱིར། །ཆོས་དབྱིངས་མ་གཏོགས་ཆོས་འགའ་ཡོད་མིན་ཞིང༌། །ཆོས་དབྱིངས་དེ་ཡང་ཡེ་ཤེས་ཉིད་ཕྱིར་རོ། །ཆོས་དབྱིངས་ཡེ་ཤེས་རིགས་པས་དཔྱད་པ་ན། །རིགས་ངོར་ཡོད་མ་མིན་ཡང་འཕགས་ཆེན་བློས། །རྟག་ཏུ་གཟིགས་ཕྱིར་སེམས་ཀྱི་རྡོ་རྗེ་ཞེས། །ངེས་དོན་གསུང་བ་ཁྱོད་ལ་ཕྱག་འཚལ་ལོ། །ཞེས་ཀུན་མཁྱེན་གཉིས་པ་དབྱིག་གཉེན་ཞབས་ཀྱི་རྟོགས་བརྗོད་བསྟན་པ་ལ་འཇུག་པའི་ཡིད་བཞིན་མཛོད་སྒོ་ཞེས་བྱ་བ། དཔལ་ཤཱཀྱ་མཆོག་ལྡན་དྲི་མེད་ལེགས་པའི་བློས། ཉེ་བར་སྦྱར་བའི་ཡི་གེ་པ་ནི་ཆོས་ཀྱི་རྒྱལ་མཚན་ནོ།། །།

 

[1] པཎ་ཆེན་ཤཱཀྱ་མཆོག་ལྡན་གྱི་བཀའ་འབུམ། པོད། ༼མ༽ འཕྲུལ་པར་དཔེ་རིང་། ཤོག་གྲངས་ ༩བ༢ ནས་ ༡༡ན༦ བར་གསལ།

Leave a Reply

Your email address will not be published. Required fields are marked *