སློབ་དཔོན་སངས་རྒྱས་ཡེ་ཤེས་ཞབས་ཀྱི་རྣམ་ཐར།

སློབ་དཔོན་སངས་རྒྱས་ཡེ་ཤེས་ཞབས་ཀྱི་རྣམ་ཐར།

འགོས་ལོ་གཞོན་ནུ་དཔལ་ (1392-1481) གྱིས་མཛད་པའི་དེབ་ཐེར་སྔོན་པོ་ལས[1]། ཡེ་ཤེས་ཞབས་ལུགས་ཀྱི་སྐབས། གསང་བ་འདུས་པ་ཡེ་ཤེས་ཞབས་ལུགས་ཞེས་གྲགས་པ་དེ་ཡང་བོད་ཀྱི་ཡུལ་འདིར་སྒོ་དུ་མ་ནས་བྱུང་ངོ་། །དེ་ལ་སློབ་དཔོན་སངས་རྒྱས་ཡེ་ཤེས་ནི། རིག་པའི་གནས་མཐའ་དག་ལ་མཁས་པའི་པཎྜི་ཏ་སྟེ། དེས་ཡུལ་མ་ག་དྷའི་བྱེ་བྲག་ཁ་བི་ཞེས་བྱ་བར་གྲོང་ཁྱེར་རྡོ་འཇོག་ཏུ། སློབ་དཔོན་སེང་གེ་བཟང་པོ་ཞེས་བྱ་བ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་ཤིན་ཏུ་མཁས་པ། རྗེ་བཙུན་གྱི་སྣང་བ་ཐོབ་པར་ཡང་གྲགས་པ་དེ་མཉེས་པར་བྱས་ནས། ཤེས་རབ་ཀྱི་ཕ་རོལ་ཏུ་ཕྱིན་པ་དང་། དེ་ལས་གཞན་པའི་གཞུང་ཡང་མང་དུ་ཐོས་ཤིང་། རིགས་པས་ཀྱང་རྣམ་པར་དཔྱད་པ་མཛད་ནས། སླར་ནཱ་ལེནྡྲར་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པའི་འགྲེལ་པ་ལ་སོགས་པ་བརྩམས་ནས་གཞན་དག་ལ་བཤད་པ་མཛད།

དེ་ནས་སྔགས་ཀྱི་ཐེག་པ་བཙལ་བའི་ཕྱིར་ཡུལ་དབུས་ནས་བྱང་དུ་དཔག་ཚད་ཉིས་བརྒྱ་སུམ་ཅུ་ན་ཨོ་ཌི་ཡཱ་ཎའི་ཡུལ་ཡོད་དེ། ཡུལ་དེ་མཁའ་འགྲོ་མ་མང་པོས་བྱིན་གྱིས་བརླབས་པས་གསང་སྔགས་ཀྱི་འབྱུང་གནས་ཡིན་པའི་ཕྱིར་དེར་བགྲོད་དེ། དེ་ན་ནོར་བུའི་གླིང་དུ་སྐུ་འཁྲུངས་པའི་སློབ་དཔོན་སྒེག་པ་རྡོ་རྗེ་ཞེས་བྱ་བ་ལ། བྱ་བ་དང་རྣལ་འབྱོར་གྱི་རྒྱུད་མང་པོ་ཐོས་ཤིང་འབད་པས་ལེགས་པར་བསླབས་སོ།།

ཡང་གནས་དེའི་ཕྱོགས་གཅིག་ན། བསམ་མི་ཁྱབ་ཀྱི་རིམ་པའི་མན་ངག་ཐོབ་པ། དེ་ཁོ་ན་ཉིད་རྟོགས་པའི་རྣལ་འབྱོར་མ་གུ་ནེ་རུ་ཞེས་གྲགས་པའི་དྲུང་དུ་བགྲོད་ཅིང་མཉེས་པར་བྱས་ཏེ། བླ་ན་མེད་པའི་རྒྱུད་མང་དུ་ཐོས་པར་བྱས། དབང་དང་དམ་ཚིག་ལ་སོགས་པ་ཡང་དག་པར་བླངས་ཏེ། དེ་ནས་སྒོམ་པ་ལ་ཡང་བཞུགས་སོ།།

ཡང་ལྷས་རྨི་ལམ་བསྟན་པས། ཨོ་ཌི་ཡཱ་ཎའི་བྱང་གི་སྒོ་སྲུང་བ་གདོལ་པ་ཛ་ཐིག་ཛ་ལ་ཞེས་བྱ་བའི་བུ་མོ་ལོ་བཅུ་དྲུག་ལོན་པ་ཞིག་ཡོད་པ་དེ་ལཀྵིམཱ་ཆེན་མོ་ཡིན་པས་དེར་སོང་ཞེས་བྱུང་བ་བཞིན་འཕྲལ་དུ་སོང་སྟེ། དེ་དང་བཤེས་སུ་འཐམས་ཏེ་ཟླ་བ་བརྒྱད་ཀྱི་བར་དུ་མཉེས་པར་བྱས་སོ། །དེས་ཀྱང་སློབ་དཔོན་ཕྱག་རྒྱ་ཆེན་པོ་ལ་བྲོད་པར་རྟོགས་ན་དེའི་ཆ་རྐྱེན་སྒྲུབ་པའི་ཕྱིར་ཕྲ་མོའི་ལུང་བཙལ་བ་ཙམ་གྱིས་གནོད་གནས་ཀྱི་གྲུབ་པ་ཐོབ་བོ། །དེ་ནས་ཛ་ལན་དྷ་རར་བྱོན་ཏེ་གྲོང་ཁྱེར་ཀོ་ནེ་ཇེར་གྱི་ཕྱོགས་གཅིག་ན། བྱིས་པ་ཆུང་བའི་ཞབས་ཞེས་ཤེས་རབ་ཀྱི་རྒྱུད་ལ་ལྷག་པར་མཁས་པ་ཞིག་ཡོད་པ་དེ་ལ་ལུང་མང་པོ་ཐོས་ཤིང་སྒོམ་པ་ལ་ནན་ཏན་དུ་མཛད་དོ།།

དེ་ནས་ཡུལ་དབུས་ནས་ལྷོ་ཕྱོགས་སུ་དཔག་ཚད་སུམ་བརྒྱ་ཕྱིན་པ་ན། ཡུལ་ཀཾ་ཀོ་ཞེས་བྱ་བ་ནམ་མཁའ་ལ་ནགས་ཚལ་འཁྲིགས་པ་ཞིག་ཡོད་པ་དེའི་ཕྱོགས་ཤིག་ན། སློབ་དཔོན་ཀླུ་སྒྲུབ་ཀྱི་སློབ་མ་སློབ་དཔོན་བསྲུང་བའི་ཞབས་ཞེས་བྱ་བ་ཐབས་ཀྱི་རྒྱུད་ལ་རབ་ཏུ་མཁས་པ། དེ་དག་ཀྱང་རྫུ་འཕྲུལ་སློབ་མས་བསྐོར་བ་ཞིག་ཡོད་པ་དེའི་དྲུང་དུ་བྱོན་ནས། བླ་མ་དེ་ལ་བྲམ་ཟེ་ཙ་ཏྲ་ར་ཞེས་བྱ་བ་དང་། བྲམ་ཟེ་གུ་བྱ་བརྟ་ཞེས་བྱ་བ་དང་། རྒྱལ་རིགས་མཉྫ་ཤྲཱི་ཞེས་བྱ་བ་དང་། རྗེའུ་རིགས་བུ་ཎ་བྷ་དྲ་ཞེས་བྱ་བ་དང་། དམངས་རིགས་དཱི་པཾ་ཀ་ཞེས་བྱ་བ་དང་། དམངས་རིགས་ཁཎ་བུ་ཏྲ་ཞེས་བྱ་བ་དང་། སྨད་འཚོངས་མ་ཨཱ་ལོ་ཀཱི་ཞེས་བྱ་བ་དང་། སྨད་འཚོང་མ་དུཤི་ལ་ཞེས་བྱ་བ་རྫུ་འཕྲུལ་ཐོབ་པ་དག་ཡོད་དེ། དེ་ཐམས་ཅད་ཀྱི་འཕྲལ་ཡོ་བྱད་ལྷ་མོ་ནོར་རྒྱུན་མས་ཉིན་རེ་ཞིང་གསེར་གྱི་མཱ་འཥ་བཅུ་དང་། མུ་ཏིག་གི་དོ་ཤལ་ཕྱེད་དང་། ཀཱནྟ་པ་ན་སུམ་བརྒྱ་རེ་སྦྱོར་བ་ཞིག་ཡོད་པ་དེའི་དྲུང་དུ་ལོ་དགུའི་བར་དུ་བསྟེན་ནས། སྐྱེ་བ་གཅིག་གིས་ཐོགས་པ་སྟེ། བསྐྱེད་པའི་རིམ་པའི་རྣལ་འབྱོར་ལ་སྐྱེ་བ་གཅིག་གིས་ཐོགས་པ་རྣལ་འབྱོར་གསུམ་པའི་མཐར་ཕྱིན་པར་མཛད་དོ།།

གནས་དེར་རྣལ་འབྱོར་མ་རྣམས་དང་ལྷན་ཅིག་པའི་སྤྱོད་པ་ཡང་ཟླ་བ་བཅོ་བརྒྱད་ཀྱི་བར་དུ་མཛད་དོ། །དེ་ལྟར་འབད་ཀྱང་དེ་ཁོ་ན་ཉིད་མངོན་སུམ་དུ་མ་རྟོགས་པས། བླ་མ་བསྲུང་བའི་ཞབས་ལ་དེ་སྐད་དུ་ཞུས་པ་ན། བསྲུང་བའི་ཞབས་ཀྱིས། དེ་ནི་ཁོ་བོས་ཀྱང་མ་རྟོགས་ཞེས་གསུངས་པས་ཐུགས་ཅུང་ཟད་ཆད་དེ། རང་གི་ཕྱག་རྒྱ་མ་གླེགས་བམ་གྱི་གཟུགས་སུ་བསྒྱུར་ཏེ། མགུལ་ཏུ་བཏགས་ནས། བྱང་ཕྱོགས་སུ་རྡོ་རྗེ་གདན་གྱི་རྒྱབ་ཀུ་བ་ཛ་ཞེས་བྱ་བའི་ནགས་སུ་ཕྱིན་ཏོ། །ནགས་དེ་ཡང་སྟག་དྲེད་ལ་སོགས་པ་ཤིན་ཏུ་འཇིགས་པའི་གནས་ཏེ། སྤྱིར་བྱང་ཆུབ་ཀྱི་སྙིང་པོ་ལ་རྒྱབ་ཀྱིས་ཕྱོགས་པའི་སེམས་ཅན་རྣམས་འཁོར་བའི་ནགས་ཉོན་མོངས་པའི་གཅན་གཅན་གྱིས་གང་བར་གནས་པ་ཡིན་ལ། བདག་ཀྱང་དེ་ཁོ་ན་ན་གནས་པས་དེ་ལས་ཐར་བར་བྱ་བའི་ཕྱིར། གནས་དེར་ལྷ་དྲག་ཏུ་སྐུལ་བའི་ཆོ་ག་ལ་བརྩོན་པས་ཟླ་བ་དྲུག་ཏུ་གནས་པས། གཟོད་ཆོས་རྣམས་ཀྱི་དེ་ཁོ་ན་ཉིད་རྟོགས་སོ།།

ཇི་ལྟར་རྟོགས་ན། སློབ་དཔོན་འཇམ་དཔལ་བཤེས་གཉེན་གྱིས་དགེ་སློང་འབན་པོ་ཤམ་ཐབས་བྱེ་ཞིང་ཆོས་གོས་ལ་ཐོད་བྱས་ནས་ཞིང་རྨོ་ཞིང་། ཆུང་མ་ངན་མ་ཞིག་དང་ཁྱི་མོ་དཀར་མོ་མཚན་མ་ཅན་ཞིག་ཏུ་སྤྲུལ། དེར་སློབ་དཔོན་སངས་རྒྱས་ཡེ་ཤེས་ཀྱིས་གཟིགས་པས་འདི་དག་ཅི་འདྲ་བ་ཞིག་སྙམ་དུ་ཐེ་ཚོམ་ཟོས་སོ། །སློབ་དཔོན་འཇམ་དཔལ་བཤེས་གཉེན་གྱིས་སངས་རྒྱས་ཡེ་ཤེས་སྔགས་ཀྱི་སྤྱོད་པ་མཆོག་ལ་གནས་པར་གཟིགས་ནས། དེ་ལ་ཕན་པའི་ཕྱིར་འཇམ་དཔལ་དབྱངས་ཀྱི་དཀྱིལ་འཁོར་གྱི་འཁོར་ལོར་སྤྲུལ་ཏོ། །དེ་ཡང་སྟོན་ཟླ་ར་བའི་མར་ངོའི་ཚེས་བརྒྱད་ཀྱི་སྐར་མ་མགོ་དང་ལག་གཉིས་ཡོལ་བ་ཐོ་རངས་ཀྱི་དུས་སོ། །དེར་བླ་མ་དང་དཀྱིལ་འཁོར་གང་ལ་མོས་ཞེས་དྲིས་པས། དཀྱིལ་འཁོར་ལ་མོས་ཞེས་ཞུས་པས། དགེ་སློང་བླ་མ་གཉིས་དང་བཅས་པ་ཁང་པ་ཆུང་ངུ་ཞིག་གི་ནང་དུ་ཞུགས་པར་གྱུར་ཏོ།།

དེ་ནས་སངས་རྒྱས་ཡེ་ཤེས་ཀྱིས་དེ་ཁོ་ན་ཉིད་བླང་བའི་ཕྱིར། ཁྱོད་ནི་སེམས་ཅན་ཀུན་གྱི་ཡབ་སྟེ་ཡུམ་ཡང་ཡིན། ཁྱོད་ཀྱིས་བདག་ལ་སོགས་པ་འཇིགས་པ་ཆེ་ལས་སྐྱོབས། འགྲོ་བའི་དབང་པོ་རྗེ་བཙུན་ཁྱོད་ཀྱིས་སྡུག་བསྔལ་སེལ། ཁམས་གསུམ་གཏོང་བྱེད་ཆེ་བས་ཆེ་ཁྱོད་སྐྱེ་བོ་སྐྱོངས། ཞེས་བྱ་བ་ལ་སོགས་པའི་གསོལ་བ་བཏབ་པས། དེར་དཀྱིལ་འཁོར་གྱི་གཙོ་བོར་ཞལ་གྱི་ལུང་ལེགས་པར་བཀའ་སྩལ་བས། སློབ་དཔོན་གྱིས་དེ་ཁོ་ན་ཉིད་ཐུགས་སུ་ཆུད་དེ་ཡང་དག་པའི་ཡེ་ཤེས་ལ་དབང་བའི་རྣལ་འབྱོར་པར་གྱུར་ཏོ།།

དེ་ནས་འཇམ་དཔལ་དབྱངས་ཀྱིས་སློབ་དཔོན་ལ་མ་འོངས་པའི་སེམས་ཅན་ལ་ཕན་པའི་ཕྱིར་བསྐྱེད་པའི་རིམ་པའི་སྒྲུབ་ཐབས་ཀུན་ཏུ་བཟང་པོ་དང་། ཀུན་ཏུ་བཟང་མོ་དང་། ཀུན་ཏུ་བཟང་པོའི་དོན་བསྡུས་པ་སྟེ་རྣམ་པ་གསུམ་དང་། སྦྱིན་བསྲེག་གཉིས་ཀྱི་ཆོ་ག་དང་། གཏོར་མ་མི་ནུབ་པའི་སྒྲོན་མ་དང་། ཚོགས་ཀྱི་འཁོར་ལོའི་ཆོ་ག་དང་། རིན་པོ་ཆེ་འབར་བ་དང་། རྒྱུད་ཀྱི་རྣམ་བཤད་དང་། དཀྱིལ་འཁོར་གྱི་ཆོ་ག་ཤླཽ་ཀ་བཞི་བརྒྱ་ལྔ་བཅུ་པ་དང་། རྩ་བའི་ཡེ་ཤེས་ཆེན་པོ་དང༌། ཚིགས་སུ་བཅད་པའི་མཛོད་དང་། གྲོལ་བའི་ཐིག་ལེ་དང་། བདག་སྒྲུབ་པ་དང་། བྱང་ཆུབ་སེམས་ཀྱི་ཐིག་ལེ་དང་། དཔལ་བཀྲ་ཤིས་ཀྱི་རྣམ་པར་བཤད་པ་ཆེན་པོ་དང་། བཞི་པ་ལ་འཇུག་པ་ཐབས་དང་བཅས་པ་དང་། ཆུ་སྦྱིན་དབང་པོའི་སྒྲུབ་པའི་ཐབས་གསུམ་སྟེ། ལུང་དང་མཐུན་པའི་ཆོས་བཅུ་བཞི་རྩོམས་ཤིག་པར་བཀས་གནང་ངོ༌། །དེ་ལ་ཀུན་ཏུ་བཟང་པོ་གསུམ་པོ་གཅིག་ཏུ་བྱས། ཆུ་དབང་གི་སྒྲུབ་ཐབས་གསུམ་པོའང་གཅིག་ཏུ་བྱས། རྒྱུད་ཀྱི་རྣམ་བཤད་ནི་སློབ་དཔོན་གྱིས་མ་མཛད་པས་ན། ལྷག་མ་རྣམས་ལ་ལུང་གི་ཆོས་བཅུ་བཞི་ཞེས་གྲགས་པ་ཡིན་ནམ་སྙམ་མོ། །དཀྱིལ་འཁོར་གྱི་ཆོ་ག་ཡང་དཔེ་ཁ་ཆེར་ཁྱེར་ནས་ཡུལ་དབུས་ན་མེད་དོ།།

སློབ་དཔོན་སངས་རྒྱས་ཡེ་ཤེས་དེ་ལམ་མཐོན་པོ་དེ་ཁོ་ན་ཉིད་མངོན་སུམ་དུ་མཛད་པ་ལ་མངའ་བརྙེས་ཀྱང་། གཟུགས་ཀྱི་ཕུང་པོ་ནི་གནས་མ་གྱུར་ཞེས་གསུངས་སོ། །སློབ་དཔོན་དེས་རྡོ་རྗེའི་གདན་ནས་རྒྱང་གྲགས་ལྔ་ཅུ་ཡོད་པའི་ས། དབང་ཆེན་རིའི་ཕུག་ཏུ་གནས་བཅས་ཏེ་བཀའ་སྩལ་བའི་ཆོས། རྒྱུད་ཀྱི་རྣམ་བཤད་མ་གཏོགས་པ་རྣམས་བརྩམས་ཤིང་སློབ་མ་རྣམས་ལ་ལེགས་པར་གསུངས་པས། སློབ་མའི་མཆོག་བཅོ་བརྒྱད་བྱུང་ཞིང་། དེ་རྣམས་ཀྱི་ནང་ནས་མར་མེ་མཛད་བཟང་པོ། རབ་ཏུ་ཞི་བའི་བཤེས་གཉེན། སྒྲ་གཅན་ཟིན་བཟང་པོ། རྡོ་རྗེ་བདེ་བ་ཆེན་པོ་སྟེ་བཞིས་ནི་ཚེ་དེ་ཉིད་ལ་རྡོ་རྗེ་འཆང་ཆེན་པོའི་གོ་འཕང་མངོན་དུ་མཛད་དོ། །སློབ་མ་ལྷག་མ་བཅུ་བཞི་པོའི་མཚན་ནི་གསལ་བར་མ་ངེས་ལ། སློབ་དཔོན་སྨན་ཞབས་ཀྱང་སློབ་དཔོན་གྱི་དངོས་ཀྱི་སློབ་མ་ནི་ཡིན་ནོ། །སྨན་པ་ཞབས་ཀྱིས་ཞལ་ལུང་གི་འགྲེལ་པ་ལ་སོགས་པ་བསྟན་བཅོས་མང་དུ་མཛད་ལ། གཞན་ཡང་འདིའི་སློབ་མ་རིམ་པར་བརྒྱུད་པ་རྣམས་ཀྱིས་རྒྱུད་ཀྱི་འགྲེལ་པ་དང༌། རིམ་པ་གཉིས་ཀྱི་གཞུང་མང་དུ་བརྩམས་པ་ལས་བོད་དུ་ཡང་ཤིན་ཏུ་མང་བར་འགྱུར་རོ། །དུས་ཕྱིས་སློབ་དཔོན་ཨ་བྷ་ཡས་དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བ་བརྩམས་པ་ཡང་། དཀྱིལ་འཁོར་གྱི་ཆོ་ག་བཞི་བརྒྱ་ལྔ་བཅུ་པ་ལ་གཙོ་བོར་བརྟེན་པས་ན། ཡེ་ཤེས་ཞབས་ལུགས་ཀྱི་ཁོངས་སུ་གཏོགས་སོ།།

སློབ་དཔོན་སངས་རྒྱས་ཡེ་ཤེས་ཞབས་ཀྱིས་དུས་ཕྱིས་རྡོ་རྗེ་གདན་དང་དེ་དང་ཉེ་བ་དག་ཏུ་བཞུགས་ཏེ། ལྷ་ཁང་གསར་དུ་བཞེངས་པ་དང་། མཆོད་པ་ཡང་རྒྱ་ཆེན་པོ་མཛད་དོ་ཞེས་གྲགས་སོ། །བོད་དུ་ནི་ཡེ་ཤེས་ཞབས་ལུགས་རྣམས་དང་པོར་ལོ་ཆེན་རིན་ཆེན་བཟང་པོ་ལ་མང་དུ་བྱུང་ནས་སློབ་མ་རྣམས་ལ་ཡང་གསུངས་ཤིང་རིམ་པར་བརྒྱུད་དོ། །པཎྜི་ཏ་སྨྲི་ཏིས་ཀྱང་ཁམས་སུ་ཡེ་ཤེས་ཞབས་ལུགས་རྣམས་མང་དུ་བཤད། སྔོན་གྱི་སློབ་དཔོན་སངས་རྒྱས་གསང་བ་དང་། སངས་རྒྱས་ཞི་བ་གཉིས་ཀྱང་ཡེ་ཤེས་ཞབས་ཀྱི་དངོས་ཀྱི་སློབ་མ་ཡིན་ལ། དེ་གཉིས་ཀྱིས་མཛད་ཅིང་འགྱུར་བའི་ཆོས་རྣམས་ཀྱང་ཡེ་ཤེས་ཞབས་ཀྱི་ལུགས་སོ། །བར་དུ་པཎྜི་ཏ་སུ་ན་ཡ་ཤྲཱི་དང་གཉན་ལོ་ཙཱ་བས་ཀྱང་བོད་དུ་ཡེ་ཤེས་ཞབས་ལུགས་མང་དུ་བཤད་ཅིང་། གཉན་གྱི་སློབ་མ་སྣང་ཁའུ་བ་ནས་ཀྱང་མང་དུ་འཕེལ་ལོ། །

[1] དེབ་ཐེར་སྔོན་པོ། ༼༡༽ སི་ཁྲོན་མི་རིགས་དཔེ་སྐྲུན་ཁང་། ༡༩༨༤ ལོ། ཤོག་གྲངས་ ༤༥༢

Leave a Reply

Your email address will not be published. Required fields are marked *