མཁན་སློབ་ཆོས་གསུམ་གྱི་གསོལ་འདེབས།

མཁན་སློབ་ཆོས་གསུམ་གྱི་གསོལ་འདེབས[1]

མཛད་པ་པོ། འཇམ་མགོན་ཀོང་སྤྲུལ་བློ་གྲོས་མཐའ་ཡས་ (1813-1899) མཆོག

 རབ་འབྱམས་རྒྱལ་བའི་སྤྱི་གཟུགས་པདྨ་འབྱུང་། །ཐུབ་དབང་གཉིས་པ་མཁན་ཆེན་ཞི་བ་འཚོ། །ཆོས་སྐྱོང་རྒྱལ་པོ་ཁྲི་སྲོང་ལྡེའུ་བཙན་ལ། །གུས་པས་ཕྱག་འཚལ་སྙིང་ནས་གསོལ་བ་འདེབས། །གངས་ཅན་ལྗོངས་སུ་ཐུབ་བསྟན་ཉིན་མོར་བྱེད། །ཐོག་མར་འདྲེན་མཛད་ཆོས་རྒྱལ་མེས་དབོན་གྱི། །ངོ་མཚར་ཕྱག་རྗེས་ཆོས་འཁོར་རྣམ་པ་གསུམ། །རྟེན་དང་བརྟེན་པར་བཅས་ལ་གསོལ་བ་འདེབས། །ཁྱད་པར་མཁན་སློབ་ཆོས་གསུམ་ཞལ་འཇོམས་ཏེ། །འཛམ་གླིང་རྒྱན་གྱུར་སྤྲུལ་པའི་གཞལ་མེད་ཁང་། །བསམ་ཡས་མི་འགྱུར་ལྷུན་གྲུབ་གཙུག་ལག་ཁང་། །ས་གསུམ་སྙན་པར་གྲགས་ལ་གསོལ་བ་འདེབས། །འདུལ་བར་གཙུག་ལག་མདོ་སྡེར་ཞིང་ཁམས་ཚུལ། །མངོན་པ་ལྟར་ན་སྣོད་བཅུད་གཅིག་ཏུ་གྲུབ། །སྔགས་ཀྱི་ལུགས་སུ་དཀྱིལ་འཁོར་ཆེན་པོར་རྫོགས། །ངོ་མཚར་འགྲན་ཟླ་བྲལ་ལ་གསོལ་བ་འདེབས། །

དབུ་རྩེ་རིམ་གསུམ་ལུགས་གསུམ་བཀོད་པ་ཅན། །བསྐོར་ཁང་འཁོར་ས་ལྷོ་བྱང་ནུབ་ཀྱི་མཛོད། །རི་དབང་ལྷུན་པོར་ཉི་ཟླས་བརྒྱན་པའི་ཚུལ། །ཡཀྵ་ལྟག་འོག་བཅས་ལ་གསོལ་བ་འདེབས། །འཇམ་དཔལ་གླིང་དང་ཨཱརྱ་པ་ལོའི་གླིང་། །དགའ་ལྡན་བྱམས་པ་གླིང་དང་བྱང་ཆུབ་ཏུ། །སེམས་བསྐྱེད་གླིང་སྟེ་གླིང་ཆེན་བཞི་ཡི་ཚུལ། །ཕྱོགས་བཞིར་བཞུགས་པ་རྣམས་ལ་གསོལ་བ་འདེབས། །རྣམ་དག་ཁྲིམས་ཁང་བརྡ་སྦྱོར་ཚང་མང་གླིང་། །བདུད་འདུལ་སྔགས་པ་སྒྲ་སྒྱུར་རྒྱ་གར་གླིང་། །ལུང་བསྟན་བཻ་རོ་མི་གཡོ་བསམ་གཏན་གླིང་། །རིན་ཆེན་སྣ་ཚོགས་པེ་དཀར་དཀོར་མཛོད་གླིང་། །གླིང་ཕྲན་བརྒྱད་དང་བཀའ་རྟགས་མཆོད་རྟེན་བཞི། །ཁམས་གསུམ་ཟངས་ཁང་བུ་ཚལ་གསེར་ཁང་གླིང་། །དགེ་རྒྱས་ལྷ་ཁང་ཇོ་མོ་གླིང་གསུམ་དང་། །དེར་བཞུགས་དཀོན་མཆོག་རྣམས་ལ་གསོལ་བ་འདེབས། །འཕགས་བོད་མཁས་གྲུབ་བསམ་ཡས་བྱོན་པའི་གནས། །མདོ་རྒྱུད་བསྟན་བཅོས་བསམ་ཡས་བསྒྱུར་བའི་གནས། །ཉན་བཤད་སྒོམ་སྒྲུབ་བསམ་ཡས་མཛད་པའི་གནས། །མཚན་མཆོག་དོན་དང་མཐུན་ལ་གསོལ་བ་འདེབས། །ཡེཤེས་སེམས་དཔའི་དཀྱིལ་འཁོར་དངོས་སུ་བཞུགས། །ཁྱད་འཕགས་རིང་བསྲེལ་རྣམ་བཞིས་ཕྱུར་བུར་གཏམས། །གཏེར་ཆེན་གཏེར་ཕྲན་བསམ་མི་ཁྱབ་པའི་མཛོད། །ལྷ་མིའི་མཆོད་གནས་མཆོག་ལ་གསོལ་བ་འདེབས། །བརྒྱུད་གསུམ་རིག་འཛིན་བླ་མའི་བྱིན་རླབས་འཐིབས། །ཡི་དམ་ཞི་ཁྲོ་རབ་འབྱམས་དངོས་གྲུབ་སྟེར། །གནས་གསུམ་མཁའ་འགྲོའི་ཚོགས་ཀྱི་འདུ་བར་སྤྱོད། །ཆོས་སྲུང་མཐུ་རྩལ་ལྡན་ལ་གསོལ་བ་འདེབས། །མཇལ་ཚད་ངན་སོང་གསུམ་གྱི་སྐྱེ་སྒོ་གཅོད། །དད་པས་ཐོས་ཚད་བྱང་ཆུབ་ས་བོན་ཐེབས། །ཚོགས་བསགས་ཐར་པའི་ལམ་ལས་ཕྱིར་མི་ལྡོག །འབྲེལ་ཚད་དོན་དང་ལྡན་ལ་གསོལ་བ་འདེབས། །འཇིག་རྟེན་གསུམ་གྱི་བསོད་ནམས་ཞིང་གྱུར་པ། །གངས་ཅན་ཕན་བདེའི་འབྱུང་གནས་རྟེན་གྱི་མཆོག །འབྱུང་བཞི་སོགས་ཀྱིས་ནམ་ཡང་འཇིག་མེད་པར། །བསྐལ་བརྒྱར་རྟག་བརྟན་ཆེན་པོར་བཞུགས་གསོལ་འདེབས། །དད་མོས་གསོལ་བ་བཏབ་པའི་བྱིན་རླབས་ཀྱིས། །མི་མཐུན་ཀུན་ཞི་མཐུན་རྐྱེན་ལེགས་ཚོགས་རྒྱས། །སྒྲིབ་གཉིས་བྱང་ཞིང་ཚོགས་གཉིས་ཡོངས་སུ་རྫོགས། །དོན་གཉིས་ལྷུན་གྲུབ་སངས་རྒྱས་མྱུར་ཐོབ་ཤོག །ཅེས་པའང་དཔལ་བསམ་ཡས་ཆོས་འཁོར་ཆེན་པོའི་ཞབས་ཏོག་ཕུལ་དུ་ཕྱིན་པའི་སྡེ་པ་པདྨ་དར་རྒྱས་ནས་ཆེད་དུ་བསྐུལ་ངོར་ཀུ་སཱ་ལི་བློ་གྲོས་མཐའ་ཡས་ཀྱིས་དཔལ་དེ་བཱི་ཀོ་ཊིའི་སྒྲུབ་གནས་སུ་བགྱིས་པ་དགེ་ལེགས་འཕེལ།།  །།

[1] རྒྱ་ཆེན་བཀའ་མཛོད། པོད། ༼༡༽ ཤིང་དཔར། དཔེ་རིང་། ཤོག་གྲངས་ ༡ན༡ ནས་ ༢ན༢ བར།

Leave a Reply

Your email address will not be published. Required fields are marked *