ནཱ་ལེནྡྲ་ཆེས་མཐོའི་གཙུག་ལག་སློབ་ཁང་གསར་པར་སྩལ་བའི་བཀའ་སློབ།

༄༅། །ཕྱི་ལོ་ ༢༠༡༧ ཟླ་བ་ ༣ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྷི་ཧཱར་མངའ་སྡེའི་ནཱ་ལེནྡྲ་རྫོང་དུ་རྟེན་གཞི་བྱས་པའི་རྒྱལ་པོའི་ཁབ་ཏུ་ Rajgir ནཱ་ལེནྡྲ་གཙུག་ལག་ཁང་ཆེན་གསར་པའི་ Nav Nalanda Mahavira University ནང་བཀའ་སློབ་སྩལ་དོན།

རྒྱ་གར་སྤྱི་དང་ལྷག་པར་དཔལ་ནཱ་ལེནྡྲའི་གཙུག་ལག་སློབ་གྲྭའི་པཎ་གྲུབ་རྣམས་ཀྱིས་ཕྱི་རོལ་པ་རྣམས་ལ་རིགས་པའི་ལམ་ནས་ཚར་བཅད་པ་དང་སྦྲགས། ནང་པའི་གཞུང་དེ་ཡང་ཕྱུག་ཏུ་ཕྱིན་པ་དེ་འདྲ་བྱུང་ཡོད།

དེ་མཚུངས་ཁྱེད་རང་ཚོས་ཀྱང་གཞུང་འདྲ་མིན་མང་པོར་གཟིགས་དགོས། དེ་ལྟར་བྱུང་ན་གཞུང་ལུགས་སྤྱིའི་གོ་བ་ཡག་པོ་ལོན་ཐུབ། དཔལ་ནཱ་ལེནྡྲའི་མཁས་པ་དཔལ་མགོན་འཕགས་པ་ཀླུ་སྒྲུབ་དང་། དཔལ་ལྡན་ཟླ་བ་གྲགས་པ། སློབ་དཔོན་ལེགས་ལྡན་འབྱེད། སློབ་དཔོན་སངས་རྒྱས་བསྐྱངས་སོགས་ཧ་ཅང་མཁས་པ་ཆེན་པོ་གྲངས་ལས་འདས་པ་བྱོན་ཡོད། མཁས་པ་དེ་དག་གིས་སངས་རྒྱས་ཀྱི་བཀའི་དགོངས་དོན་རྣམས་ལེགས་པར་བཀྲལ་བ་ཙམ་དུ་མ་ཟད། ཐེག་པ་གསུམ་དང་རྒྱུད་སྡེ་བཞིས་བསྡུས་པའི་རྒྱལ་བའི་གསུང་རབ་ཀྱི་དགོངས་དོན་རྣམས་ལུང་ཙམ་ལ་མ་བརྟེན་པར་དཔྱད་གསུམ་རྣམ་པར་དག་པའི་སྒོ་ནས་གཏན་ལ་ཕབ་ཡོད་ཅིང་། ལེགས་བཤད་དེ་དག་དེ་སྔ་ཙམ་མ་ཟད། དེང་སྐབས་དུས་རབས་ ༢༡ པའི་ནང་འཚེ་མེད་ཞི་བའི་འཛམ་གླིང་ཞིག་བསྐྲུན་རྒྱུར་ཞབས་འདེགས་རླབས་པོ་ཆེ་བསྒྲུབ་ཐུབ་པའི་ནུས་པ་ལྡན་ཡོད། ཅེས་བཀའ་སློབ་སྩལ་ཏོ།།  །།

Leave a Reply

Your email address will not be published. Required fields are marked *