༣༦༽ ལོ་ཙཱ་བ་རྩ་མི་སངས་རྒྱས་གྲགས་པའི་རྣམ་ཐར།

༣༦༽ ལོ་ཙཱ་བ་རྩ་མི་སངས་རྒྱས་གྲགས།

 

ལོ་ཙཱ་བ་རྩ་མི་ཆེན་པོའམ་རྩ་མི་སངས་རྒྱས་གྲགས་ནི། ཕྱི་ལོའི་དུས་རབས་བཅུ་གཅིག་པའི་དུས་སྨད་ཙམ་དུ་མདོ་ཁམས་མི་ཉག་གི་ཡུལ་རྩ་མི་ཞེས་བྱ་བའི་སར་སྐུ་འཁྲུངས་པའི་ལོ་ཙཱ་བ་ཞིག་སྟེ། ཐོག་མར་བོད་ཡུལ་ནས་སློབ་གཉེར་མཛད་ཅིང་། བསྟན་པའི་ཆོས་སྒོར་ཞུགས་ཏེ་འདུལ་བའི་ཆོས་གཞུང་སོགས་ལ་ཐོས་བསམ་མཛད། དེ་ནས་ཁ་ཆེ་དང་བལ་ཡུལ་བརྒྱུད་རྒྱ་གར་དུ་ཕེབས་ཏེ་པཎྜི་ཏ་ཨ་བྷ་ཡ་ཀ་ར་གུཔྟ་སོགས་ལ་བསྟེན་ནས་མདོ་སྔགས་གཉིས་ཀར་སྦྱངས་པ་དཔྱིས་ཕྱིན་པ་མཛད་ཅིང་། ལེགས་སྦྱར་གྱི་སྐད་ལ་ཡང་བྱང་ཞིང་ཆུབ་པར་བསླབས་ཏེ་བསྟན་བཅོས་དུ་མ་བསྒྱུར་བར་མཛད། རབ་བྱུང་གཉིས་པའི་མེ་རྟ་ཕྱི་ལོ་ ༡༡༢༦ ལོའི་ཡས་མས་སུ་སྟེང་པ་ལོ་ཙཱ་བ་ཚུལ་ཁྲིམས་འབྱུང་གནས་རྒྱ་གར་དུ་ཕེབས་སྐབས་རྩ་མི་སངས་རྒྱས་གྲགས་པས་ཁོང་བསྟེན་ནས་ལོ་བཅུ་ཡི་རིང་སློབ་གཉེར་མཛད་པར་གྲགས་ལ། ལོ་ཙཱ་བ་འདི་གུང་ཐང་བླ་མ་ཞང་གི་རྣམ་ཐར་ནང་གསལ་བས་ཁོང་དང་དུས་ཐོག་ཕལ་ཆེར་མཚུངས་པར་མངོན། མདོ་སྔགས་གཉིས་ཀར་མཁས་པས་རྒྱ་གར་རྡོ་རྗེ་གདན་གྱི་དགོན་པ་དང་། ནཱ་ལེནྡྲའི་མཁན་པོ་ཡང་མཛད་མྱོང་བར་གྲགས་ཤིང་། མཐར་རྒྱ་གར་དུ་སྐུ་གཤེགས་པར་གྲགས་སོ།།[1]

རྩ་མི་ལོ་ཙཱ་བས་དཔལ་ནཱ་ལེནྡྲའི་མཁན་པོ་མཛད་པའི་ཚུལ་ནི། པདྨ་གར་དབང་བློ་གྲོས་མཐའ་ཡས་ (1813-1899) ཀྱིས་མཛད་པའི་འདུ་ཤེས་གསུམ་ལྡན་སྤོང་བ་པའི་གཟུགས་བརྙན་པདྨ་གར་གྱི་དབང་ཕྱུག་’ཕྲིན་ལས་འགྲོ་འདུལ་རྩལ་གྱི་རྟོགས་པ་བརྗོད་པའི་དུམ་བུ་སྨྲིག་རྒྱུའི་བདུད་རྩི་ལས[2]། ཙ་མི་ལོ་ཙཱ་བ་ནི། མི་ཉག་འགའི་ཡུལ་དུ་འཁྲུངས། གཞོན་ནུ་ནས་རྒྱ་གར་དུ་ཐེགས་ཏེ། དུས་ཞབས་པ་དང་ཨ་བྷ་ཡ་སོགས་པཎ་གྲུབ་མང་པོ་བསྟེན་ནས་རང་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུ་ལ་མངའ་བརྙེས་པས་རྒྱ་གར་ཤར་ནུབ་ཐམས་ཅད་དུ་མཁས་པར་གྲགས་ཤིང་། འགྲན་ཟླ་མ་མཆིས་པར་ཀུན་གྱིས་ཚད་མར་འཛིན། པཎྜི་ཏ་ཐམས་ཅད་ཀྱི་འདྲི་གཏུགས་དང་། འབེལ་བའི་གཏམ་གྱི་དབང་པོ་དང་མན་ངག་ལེན་པའི་གནས་སུ་བྱེད། མཚན་སངས་རྒྱས་གྲགས་སུ་བཏགས། རྒྱུད་སྡེ་མཐའ་དག་གི་མཛོད་འཛིན་པ། མཆོག་གི་དངོས་གྲུབ་བརྙེས་ཤིང་ཚེ་ཡི་རིག་འཛིན་གྲུབ་པས། ཨ་བྷ་ཡ་ལས་ཀྱང་རྟོགས་པ་མཐོ་བར་གྲགས། རྡོ་རྗེ་གདན་དང་ན་ལེནྡྲའི་མཁན་པོ་མཛད་དེ་བོད་ཀྱི་སློབ་མ་རྣམས་ལ་ལྷག་པར་ཡང་ཐུགས་བརྩེ་བས་དུས་འཁོར་འགྲེལ་ཆེན་ལ་རང་འགྱུར་མཛད་ནས་ཁྲིད་པར་མཛད། མདོར་ན་བོད་ཀྱི་གང་ཟག་གིས་འཕགས་ཡུལ་རྡོ་རྗེ་གདན་གྱི་ཆོས་ཀྱི་ཁྲི་སྲུང་བ་འདི་ཉིད་ཙམ་སྟེ་རྣམ་ཐར་བསམ་གྱིས་མི་ཁྱབ་པའི་བདག་ཉིད་ཙམ་མོ། །ཞེས་གསུངས་པ་ལྟར། ཐུབ་བསྟན་འཇིགས་མེད་འོད་ཟེར་ (ཕལ་ཆེར།1976) གྱིས་བརྩམས་པའི་མི་ཉག་དང་ར་ཐིས་དགོན་གྱི་བྱུང་བ་བརྗོད་པ་ཆུ་དྭངས་ནོར་བུའི་ཕུང་པོ་ལས[3]། གཞན་ཡང་ཙ་མི་ལོ་ཙཱ་བ་སངས་རྒྱས་གྲགས་དཀའ་སྡུག་གིས་ལམ་ཕྲེང་རིང་མོར་སྲོག་དང་བསྡོས་ནས་འཕགས་ཡུལ་རྡོ་རྗེ་གདན་དང་ན་ལེནྡྲ་རུ་མི་ལོ་ཉི་ཤུ་ལྷག་ལ་སློབ་གཉེར་བྱས་ཤིང་ན་ལེནྡྲའི་མཁན་པོ་མཛད། ལོ་ཙ་བ་འདི་ཉིད་འཕགས་བོད་དང་མི་ཉག་ལ་བཀའ་དྲིན་འགྲན་ཟླ་དང་བྲལ་བ་བཅས་མདོར་ན་བསྟན་པ་རིན་པོ་ཆེ་དྲི་མ་མེད་པ་ཞིག་སྨད་ནས་རིམ་པར་དབུས་སུ་དར་བ་ཡིན། ཞེས་གསུངས་པ་ལྟར་བོད་ཀྱི་མཁས་གྲུབ་ལོ་པཎ་ནམ་མཁའི་སྐར་ཚོགས་ལྟར་བྱོན་པ་དག་གི་ཁྲོད་ནས་རྒྱ་གར་འཕགས་ཡུལ་གྱི་དཔལ་ནཱ་ལེནྡྲའི་གཙུག་ལག་ཁང་གི་མཁན་པོའི་མཛད་ཁུར་བཞེས་མཁན་བོད་མི་ཁོང་གཅིག་པུ་ཡིན་འདུག་གོ།

གཞན་ཡང་རྩ་མིས་ནཱ་ལེནྡྲའི་མཁན་པོ་མཛད་ཅེས་རྗེ་ཞྭ་དམར་བའི་ཟིན་བྲིས་སོགས་སུ་བྱུང་ངོ་། །ཞེས་བསྟན་རྩིས་ཀུན་བཏུས་སུ་གསལ་བ་ལྟར། ཁོང་ནི་བོད་མིའི་ཁྲོད་ནས་དཔལ་ནཱ་ལེནྡྲའི་གཙུག་ལག་ཁང་གི་མཁན་པོ་དང་། རྡོ་རྗེ་གདན་གྱི་མཧཱ་བོདྷིའི་གཙུག་ལག་ཁང་གི་མཁན་པོ་མཛད་པར་མ་ཟད། བི་ཀྲ་མ་ཤཱི་ལའི་མཁས་པ་སྒོ་དྲུག་གི་ནང་གསེས་ཀྱི་མཁས་པའི་མཚན་སྙན་ཐོབ་པའི་བོད་མི་གཅིག་པུ་དེ་ཡང་ཡིན་ལ། ད་དུང་བོད་གངས་ཅན་གྱི་ལྗོངས་སུ་བཀའ་འགྱུར་གྱི་ལུང་ཐོག་མར་སྤེལ་མཁན་དང་། དུས་འཁོར་གྱི་བཤད་བཀའ་ཐོག་མར་འཛུགས་མཁན། ནག་པོ་ཆེན་པོའི་ཆོས་སྐོར་ཐོག་མར་སྤེལ་མཁན་བཅས་ཀྱི་ལོ་ཙཱ་བ་ཆེན་པོ་དེ་ཉིད་ཡིན། དེ་ཡང་དུང་དཀར་ཚིག་མཛོད་ཆེན་མོ་ལས[4]། རྩ་མི་ལོ་ཙཱ་བ་སངས་རྒྱས་གྲགས་པ། ལོ་ཙཱ་བ་འདི་གུང་ཐང་བླ་མ་ཞང་གི་རྣམ་ཐར་ནང་གསལ་བས་ཁོང་དང་དུས་ཐོག་ཕལ་ཆེར་མཚུངས་པར་མངོན། འཁྲུངས་ཡུལ་མདོ་ཁམས་མི་ཉག་གི་ཡུལ་རྩ་མིར་འཁྲུངས། ལོ་ཙཱ་མཁས་པར་མཁྱེན་ཅིང། མདོ་སྔགས་གཉིས་ཀར་མཁས་པས་རྒྱ་གར་རྡོ་རྗེ་གདན་དགོན་པའི་མཁན་པོ་ཡང་མཛད། ཁེའུ་གད་པ་འཁོར་ལོ་གྲགས་དང། སྤང་ཞོ་གསལ་བ་གྲགས་གཉིས་དང་མཉམ་དུ་པཎྜི་ཏ་ཨ་བྷ་ཡ་ཀ་གུཔྟ་བསྟེན་ནས་དུས་འཁོར། ཕྲེང་བ་སྐོར་གསུམ། ཐུབ་པ་དགོངས་རྒྱན། མན་ངག་སྙེ་མ་བཅས་བསྒྱུར་བ་དང། རྒྱ་གར་རྡོ་རྗེ་གདན་དུ་སྟོན་པའི་རྒྱལ་ཚབ་ཀྱང་མཛད། ཅེས་གསལ་ལོ།།

རྩ་མི་ལོ་ཙཱ་བ་རྒྱ་གར་འཕགས་ཡུལ་གྱི་པཎ་གྲུབ་སྙན་གྲགས་ཅན་དག་གིའང་སློབ་དཔོན་དུ་གྱུར་པ་ནི། དཔའ་བོ་གཙུག་ལག་ཕྲེང་བས་ (1504-1564/1566) མཛད་པའི་ཆོས་འབྱུང་མཁས་པའི་དགའ་སྟོན་ལས་[5]ཀྱང་། ཙ་མི་སངས་རྒྱས་གྲགས་པ་འདི་མདོ་ཁམས་སྨད་མི་ཉག་གི་ཡུལ་དུ་འཁྲུངས། རྒྱ་གར་དུ་མཁས་ཤིང་དངོས་གྲུབ་ཐོབ་ནས་རྡོ་རྗེ་གདན་དུ་སྟོན་པའི་རྒྱལ་ཚབ་མཛད། དུས་འཁོར་ཙ་མིའི་རྒྱུད་གསུམ་སོགས་བསྒྱུར། རྒྭ་ལོ་གཞོན་ནུ་དཔལ་འདི་མདོ་ཁམས་སུ་འཁྲུངས། རུས་རྒྭ་ཡིན་པ་རྒན་གཞོན་གཉིས་ཕྱིན་པས་རྒྭ་ཆེན་རྒྭ་ཆུང་དུ་གྲགས། རྒྱ་གར་དུ་སུ་མཁས་དྲིས་པས་ཙ་མི་ཁོ་ན་མཁས་ཟེར་བས་རྒྱ་གར་དུ་ཡོང་ནས་བོད་གཅིག་གིས་གཅིག་ལ་ཉན་པ་མི་ཡོང་བསམས་ནས་གཞན་དྲིས་པས་ཨ་བྷྱ་ཀཱ་ར་དང་ཨོ་རྒྱན་གྱི་པཎྜི་ཏ་ཝཱ་གི་ཤྭ་ར་མཁས་ཟེར་ཏེ་དེ་གཉིས་ཀྱང་ཙ་མི་ལ་ཆོས་ཉན་ཞིང་འདུག་པས་སླར་ཙ་མི་དང་ཨ་བྷྱ་ལ་ཆོས་ཞུས།  བདེ་མཆོག་གི་བསྙེན་པ་བྱས་པས་ཡི་དམ་གྱི་ལུང་བསྟན་བྱུང་ནས་སྤྱོད་པ་ལ་དུར་ཁྲོད་བསིལ་བ་ཚལ་དུ་ཕྱིན། དེར་ལས་མགོན་བྱ་རོག་མས་སྲོག་སྙིང་ཕུལ། བར་ཆད་མེད་པར་ལོག་པས་བླ་མ་གཉིས་ཀྱིས་ཀྱང་བཀུར་སྟི་མཛད། མ་ག་དྷའི་རྒྱལ་པོས་སྤྱན་དྲངས། སྐྱེ་བོའི་ཚོགས་ས་གཞི་གང་བ་འདུས་ཏེ་མེ་ཏོག་གཏོར་བ་ལ་པུས་མོ་ནུབ་པ་ཙམ་བྱུང་སྟེ་སངས་རྒྱས་མྱ་ངན་ལས་འདས་རྗེས་ཆོས་སྨྲ་བ་ལ་མེ་ཏོག་གཏོར་བ་དེ་ལས་མང་བ་མ་བྱུང་བར་གྲགས། ཆོས་དུ་མ་བསྒྱུར་ཞིང་ཁྱད་པར་མགོན་པོ་བྱ་རོག་མ་སྤྱན་དྲངས་ཏེ་རྗེ་དུས་མཁྱེན། ཞང་རིན་པོ་ཆེ། ཁམས་པ་ཨ་སེང་གསུམ་ལ་གནང་ཞིང་ཁམས་པ་ཨ་སེང་ལ་དཔལ་ཕག་མོ་གྲུ་པས་གསན་ཏེ་མགོན་པོ་ཀུར་ལུགས་ཚལ་ལུགས་འབྲི་གདན་གྱི་ལུགས་རྣམས་བྱུང་ངོ་། །ཞེས་གསལ་ལོ།།

དེ་ལྟར་བོད་ཀྱི་ལོ་པཎ་རྣམས་ཀྱི་ཁྲོད་ནས་རྩ་མི་ལོ་ཙཱ་བ་སངས་རྒྱས་གྲགས་ཀྱིས་ནཱ་ལེནྡྲའི་གཙུག་ལག་ཁང་གི་མཁན་པོ་མཛད་པར་མ་ཟད། ལོ་ཙཱ་བ་ཆེན་པོ་རྩ་མི་སངས་རྒྱས་གྲགས་ཀྱི་འགྱུར་གཞུང་ལས[6]། འཕགས་ཡུལ་གྱི་མཁས་པ་ཆེན་པོ་སློབ་དཔོན་འཇིགས་མེད་འབྱུང་གནས་སྦས་པས་མཛད་པའི་ཡང་དག་པར་སྦྱོར་བའི་རྒྱུད་ཀྱི་རྒྱལ་པོའི་རྒྱ་ཆེར་འགྲེལ་པ་མན་ངག་གི་སྙེ་མ་ཞེས་བྱ་བ་ཡུལ་དབུས་ཀྱི་མཁས་པ་ཆེན་པོ་དེ་ཉིད་དང་མང་དུ་ཐོས་པའི་དགེ་སློང་བསོད་སྙོམས་པ་རྩ་མི་སངས་རྒྱས་གྲགས་ཀྱིས་ནཱ་ལེནྡྲར་བསྒྱུར་བ་དང་། རྒྱལ་པོ་པདྨ་དཀར་པོས་མཛད་པའི་འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་དྲི་མ་མེད་པའི་འོད་ཅེས་བྱ་བ་ཡུལ་མ་ག་དྷཱའི་དཔལ་ནཱ་ལེནྡྲར་རྗེ་བཙུན་སྒྲོལ་མའི་ལྷ་ཁང་དུ་བསྒྱུར་བ། མཁས་པ་ཆེན་པོ་ཨ་བྷ་ཡཱ་ཀ་ར་གུཔྟས་མཛད་པའི་རྡོ་རྗེ་ཐེག་པའི་ལྟུང་བའི་སྙེ་མ་ཞེས་བྱ་བ་ཡང་རྩ་བ་སངས་རྒྱས་གྲགས་ཀྱིས་ནཱ་ལེནྡྲར་བསྒྱུར་བའི་ཚུལ་རྣམས་བསྟན་འགྱུར་དཀར་ཆག་དང་། འགྱུར་བྱང་ཁག་ཏུ་གསལ་བར་བྱུང་བ་འདི་དག་གིས་ཀྱང་སྐད་གཉིས་སྨྲ་བའི་ལོ་ཙཱ་བ་ཆེན་པོ་རྩ་མི་སངས་རྒྱས་གྲགས་དཔལ་ནཱ་ལེནྡྲའི་གཙུག་ལག་ཁང་གི་མཁས་པ་ཡིན་པ་བསྙོན་དུ་ག་ལ་ཡོད།

ལོ་ཙཱ་བ་གྲགས་ཅན་འདི་ཉིད་ཀྱི་བསྒྱུར་རྩོམ་ནི་བསྟན་འགྱུར་ལས། ཡང་དག་པར་སྦྱོར་བའི་རྒྱུད་ཀྱི་རྒྱལ་པོའི་རྒྱ་ཆེར་འགྲེལ་པ་མན་ངག་གི་སྙེ་མ་ཞེས་བྱ་བ་མཁས་པ་ཆེན་པོ་འཇིགས་མེད་འབྱུང་གནས་སྦས་པས་མཛད་པ་ཤོ་ལོ་ཀ་སྟོང་ཕྲག་བརྒྱད་པ། ཡུལ་དབུས་ཀྱི་མཁས་པ་ཆེན་པོ་དེ་ཉིད་དང་མང་དུ་ཐོས་པའི་དགེ་སློང་བསོད་སྙོམས་པ་རྩ་མི་སངས་རྒྱས་གྲགས་ཀྱིས་ནཱ་ལེནྡྲ་བསྒྱུར་ཅིང་། སླད་ནས་དཔྱལ་ལོ་ཙཱ་བ་ཆོས་ཀྱི་བཟང་པོས་ཡུལ་དབུས་ཀྱི་དཔེ་དང་བསྟུན་ནས་བཅོས་པ་ལ། སླར་ཡང་དཔང་ལོ་ཙཱ་བ་དགེ་སློང་དཔལ་ལྡན་བློ་གྲོས་བརྟན་པས་རྒྱ་གར་གྱི་དཔེ་གཉིས་ལ་གཏུགས་ཏེ་འདིའི་སྔ་འགྱུར་མ་དག་པར་གཟིགས་པ་ལ་བརྟེན་ནས་ལེགས་པར་བསྒྱུར་ཅིང་དག་པར་བཅོས་པ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་འགྲེལ་པ་དྲི་མ་མེད་པའི་འོད་ཅེས་བྱ་བ་རྒྱལ་པོ་པདྨ་དཀར་པོས་མཛད་པ། ཡུལ་མ་ག་དྷཱའི་དཔལ་ན་ལེནྡྲར་རྗེ་བཙུན་སྒྲོལ་མའི་ལྷ་ཁང་དུ་བསྒྱུར་བ་། རྡོ་རྗེ་ཐེག་པའི་ལྟུང་བའི་སྙེ་མ་ཞེས་བྱ་བ་མཁས་པ་ཆེན་པོ་ཨ་བྷ་ཡཱ་ཀ་ར་གུཔྟས་མཛད་པ། འདི་ནི་ནཱ་ལེནྡྲར་བསྒྱུར། རྡོ་རྗེ་ཐེག་པའི་རྩ་བའི་ལྟུང་བའི་ལས་ཀྱི་ཆོ་ག་བླ་མ་རྡོ་རྗེ་གདན་པས་མཛད་པ། ལྷག་པར་འཕགས་པ་ཀླུ་སྒྲུབ་ཀྱིས་མཛད་པའི་དཔལ་ནག་པོ་ཆེན་པོའི་སྒྲུབ་ཐབས་ཞེས་བྱ་བ་དང་། དཔལ་ནག་པོ་ཆེན་པོའི་ནང་སྒྲུབ་ཅེས་བྱ་བ་གཉིས་ལོ་ཙཱ་བ་རྩ་མི་ཆེན་པོས་སྒྲ་སྒྱུར་མཛད་པ་སོགས་བཞུགས་སོ།།[7]

གཞན་ཡང་གཤམ་དུ་བཀོད་པའི་རྒྱ་གར་སྲིད་འཛིན་གྱི་གསུང་བཤད་ལས[8]། འདི་ནང་གི་དགེ་འདུན་ཚང་མ་ཐེག་པ་ཆེན་པོའི་ཆོས་འབའ་ཞིག་ཉམས་སུ་བླངས་ཏེ་ཁྱད་པར་འདིའི་ནང་གི་སློབ་གཉེར་བ་མཐའ་དག་རིག་པའི་གནས་ལྔ་ལའང་སྦྱངས་པ་བསྟེན་དགོས་ཤིང་། དེ་སྐབས་ཨ་ཙརྱ་ཤཱི་ལ་བྷ་དྲ་ཞེས་པ་འདིའི་ནང་གི་མཁན་པོའི་གཙོ་བོ་ཞིག་རེད། རྒྱ་ནག་གི་ཡུ་ཝན་ཅངྒ་ནས་ཀྱང་བཤེས་གཉེན་ཁོང་ལ་བསྟེན་ཅིང་རིག་པའི་གནས་ལྔ་དཔྱིས་ཕྱིན་པ་བྱུང་བ་རེད། ཨ་ཙརྱ་ཤཱི་ལ་བྷ་དྲའི་སྔོན་དུ་འདི་གའི་གཙོ་བོ་དྷརྨ་པཱ་ལ་ཞེས་པ་རེད། རྒྱ་ནག་ཡུ་ཝན་ཅང་གི་དུས་སུ་ཨ་ཙརྱ་ཤཱི་ལ་བྷ་དྲ་དང་། པྲ་མ་མི་ཏྲ་དང་། སི་ཐར་མ་ཏི་དང་། གུཎ་མ་ཏི་ལ་སོགས་པ་འདི་གའི་མཁན་པོའི་གཙོ་བོ་ཡིན་པ་འདུག །ཅེས་པཎ་གྲུབ་འདི་དག་ཀྱང་དཔལ་ནཱ་ལེནྡྲའི་གཙུག་ལག་ཁང་གི་མཁན་པོ་ཡིན་པར་གསུངས། བོད་གཞུང་ཁག་ཏུ་ཞིབ་གསལ་མ་བྱུང་ངོ་།།

དེ་ལྟར་དཔལ་ནཱ་ལེནྡྲའི་གཙུག་ལག་ཁང་གི་མཁན་རབས་ ༤༧ བྱུང་ཞིང་། པཎ་གྲུབ་བཅུ་བདུན་གྱི་ཁྲོད་ནས་ནཱ་ལེནྡྲའི་མཁན་པོའི་མཛད་འཁུར་བཞེས་མྱོང་བ་མགོན་པོ་ཀླུ་སྒྲུབ་ཡབ་སྲས་གཉིས་དང་། ཐོགས་མེད་སྐུ་མཆེད་གཉིས། རིགས་པའི་དབང་ཕྱུག་ཕྱོགས་གླང་ཆོས་གྲགས་རྣམ་གཉིས་བཅས་རྒྱན་དྲུག་དང་། གཞན་ཡང་དཔལ་ལྡན་ཟླ་བ་གྲགས་པ་དང་། མཁན་ཆེན་བཞི་བ་འཚོ། ཇོ་བོ་ལྷ་གཅིག་དཱི་པཾ་ཀ་ར་བཅས་དགུ་བྱོན་པ་རྣམས་ཀྱི་རྣམ་ཐར་ཟུར་དུ་ཞིབ་རྒྱས་སུ་བཀོད་ཡོད་ལ། དེ་འཕྲོས་མཁན་རབས་རྣམས་ཀྱི་རྣམ་ཐར་ཡང་ཞིབ་འབྲི་དགོས་པ་ལྟ་བུར་སྣང་ཡང་། གཅིག་ནས་མཁན་རབས་རྣམས་ཀྱི་རྣམ་ཐར་གྱི་དཔྱད་གཞིི་ཡིག་ཆ་ལག་སོན་དཀའ་བ་དང་། གཉིས་ནས་དུས་ཚོད་དཀོན་པ། གསུམ་ནས་ཡིག་ཚོགས་ལ་འཇིགས་ཏེ་སྙིང་བསྡུས་རེ་སྐབས་འདིར་མཚམས་སྦྱོར་ཞུས་པ་འདི་གས་འཐུས་པར་བྱས་ཤིང་། པཎ་གྲུབ་འགའ་ཞིག་ལ་རྣམ་ཐར་གྱི་དཔྱད་གཞི་གཏན་ནས་མ་ཐོབ་པས་བྱ་ཐབས་ཟད་ལགས།

 

[1] བོད་ཀྱི་སྒྲ་སྒྱུར་ལོ་རྒྱུས་དང་ལོ་ཙཱ་བ་རིམ་བྱོན་གྱི་མཛད་རྣམ་གསལ་བའི་མེ་ལོང་། མི་རིགས་དཔེ་སྐྲུན་ཁང་། ༢༠༠༡ ལོ། ཤོག་གྲངས་ ༢༧༧

[2] རྒྱ་ཆེན་བཀའ་མཛོད། དཔལ་སྤུངས་པར་མ་འབྲུག་སྤ་གྲོའི་བསྐྱར་པར་མ། པོད། ༼བ༽ ཤོག་གྲངས་ ༡༧བ༣

[3] མི་ཉག་དང་ར་ཐིས་དགོན་གྱི་བྱུང་བ་བརྗོད་པ་ཆུ་དྭངས་ནོར་བུའི་ཕུང་པོ། སི་ཁྲོན་མི་རིགས་དཔེ་སྐྲུན་ཁང་། ༢༠༠༧ ལོ། ཤོག་གྲངས་ ༢༠

[4] དུང་དཀར་ཚིག་མཛོད་ཆེན་མོ་ལས། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༢ ལོ། ཤོག་གྲངས་ ༡༦༧༣

[5] མཁས་པའི་དགའ་སྟོན། སྟོད་ཆ། མི་རིགས་དཔེ་སྐྲུན་ཁང་། ༡༩༨༦ ལོ། ཤོག་གྲངས་ ༥༣༠

[6] གངས་ལྗོངས་སྐད་གཉིས་སྨྲ་བ་དུ་མའི་འགྱུར་བྱང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༣ ལོ། ཤོག་གྲངས་ ༢༢༥

[7] གངས་ལྗོངས་སྐད་གཉིས་སྨྲ་བ་དུ་མའི་འགྱུར་བྱང་། མཚོ་སྔོན་མི་རིགས་དཔེ་སྐྲུན་ཁང་། ༡༩༨༣ ལོ། ཤོག་གྲངས་ ༢༢༥

[8] ལྕགས་ཡོས་ཧོར་ཟླ་ ༡༠ ཚེས་ ༣ བོད་རབ་ལོ་ ༩༢༥ ཡུལ་ཕྱོགས་སོ་སོའི་གསར་འགྱུར་མེ་ལོང་། སྤྱི་ཟླ་ ༡༢ ཚེས་ ༡ འདས་ལོ་ ༡༩༥༡ ཤོག་ངོས་ ༣ དང་། ལྕགས་ཡོས་ཧོར་ཟླ་ ༡༢ ཚེས་ ༦ བོད་རབ་ལོ་ ༩༢༥ ཡུལ་ཕྱོགས་སོ་སོའི་གསར་འགྱུར་མེ་ལོང་། སྤྱི་ཟླ་ ༢ ཚེས་ ༡ འདས་ལོ་ ༡༩༥༢ ཤོག་ངོས་ ༢

Leave a Reply

Your email address will not be published. Required fields are marked *