༄༅། །སློབ་དཔོན་ཨཱརྱ་དེ་བ་ལ་བསྟོད་པ་འཕགས་པ་དགྱེས་པའི་གླུ་དབྱངས་ཞེས་བྱ་བ་བཞུགས་སོ།།

 

༄༅། །སློབ་དཔོན་ཨཱརྱ་དེ་བ་ལ་བསྟོད་པ་འཕགས་པ་དགྱེས་པའི་གླུ་དབྱངས་ཞེས་བྱ་བ་བཞུགས་སོ།།[1]

༼མཛད་པ་པོ། ཆོས་རྗེ་བློ་བཟང་ཆོས་འཛིན་དཔལ་བཟང་པོ།༽

 

ཨོཾ་བདེ་ལེགས་སུ་གྱུར་ཅིག །སྡེ་སྣོད་རིན་ཆེན་སྐས་ལ་འཛེག །སྲིད་ཞིའི་གཡང་ལས་རིང་དུ་འཕགས། །ས་བརྒྱད་སེང་ཁྲིར་ངལ་བསོས་པ། །ལྷ་ཆེན་གདོང་བཞིའི་ཞབས་ལ་འདུད། །ཚུལ་ཁྲིམས་རིན་ཆེན་ཕོ་བྲང་དུ། །ཡེ་ཤེས་རྡོ་རྗེ་རྩེ་བརྒྱ་ཡིས། །བདེན་འཛིན་སྦྱིན་སྐྱེས་བུ་བཅོམ་པ། །འཕགས་པ་ལྷ་དབང་རྒྱལ་པོར་འདུད། །ཀླུ་སྒྲུབ་སྲས་ཀྱི་ཐུ་བོ་མཆོག །ཐེག་མཆོག་བསྟན་པ་རྒྱས་མཛད་དེ། །ཚེ་འདིར་ཟུང་འཇུག་མངོན་གྱུར་པ། །ཨཱརྱ་དེ་ཝའི་ཞབས་ལ་འདུད། །

རྒྱ་གར་ཡུལ་མཆོག་སིངྒཱ་ལའི། །ཆོས་ལྡན་རྒྱལ་པོ་ཆེན་པོ་ཡི། །སྐྱེད་ཚལ་པདྨའི་ལྡུམ་ར་རུ། །མེ་ཏོག་དམར་པོ་ཉིན་མཚན་ཀུན། །འདབ་མ་ཟུམ་པ་གཅིག་བྱུང་བས། །རྒྱལ་པོ་འཁོར་བཅས་ངོ་མཚར་ཏེ། །གཅེས་སྤྲས་མཛད་པས་ཞག་བདུན་ནས། །པདྨའི་འདབ་མ་ཕྱེ་བའི་དབུས། །ཤིན་ཏུ་མཛེས་ཤིང་ཡིད་འཕྲོག་པ། །ཁྱེའུ་ལོ་བརྒྱད་ལོན་པའི་ཚེ། །ཟིལ་པ་ཁྲོམ་མེར་བཞུགས་པ་མཐོང་། །དགའ་བའི་སྦྲང་རྩིས་ཡིད་རབ་མྱོས། །བསྔགས་པའི་གླུ་དབྱངས་དར་དིར་སྒྲོག །མངལ་སྐྱེས་ལག་པས་རྗེན་པར་ནི། །སྐུ་ལ་རེག་པ་མི་རུང་སྙམ། །པཉྩ་ལི་ཀའི་རས་ཁུད་དུ། །བཀུར་སྟི་ཆེན་པོས་སྤྱན་དྲངས་ཚེ། །ལམ་བར་ཁྱེའུ་བཟང་པོ་ཡིས། །སློབ་དཔོན་ཀླུ་སྒྲུབ་བཞུགས་སམ་ཞེས། །བཀའ་ལུང་སྩལ་ལ་གསོལ་བ་འདེབས། །རྒྱལ་པོས་རང་གི་བུར་བཟུང་སྟེ། །གཅེས་པར་བསྐྱངས་ཤིང་ཆེར་སྐྱེས་ཚེ། །བཤེས་གཉེན་རྒྱ་མཚོར་རབ་འཇུག་ཀྱང་། །རྟོགས་པའི་མྱུ་གུ་མ་སྐྱེས་ནས། །དཔལ་མགོན་འཕགས་པ་ཀླུ་སྒྲུབ་ཀྱི། །ཞབས་སེན་སྤྱི་བོའི་རྒྱན་དུ་བཀོད། །ཞལ་གདམས་བདུད་བརྩིས་ལུས་སེམས་བརྟས། །བསྙེན་པར་རྫོགས་ཏེ་འཇམ་དཔའི་དབྱངས། །བསྒྲུབས་པས་ཞལ་བཟང་མངོན་དུ་གྱུར། །འཕགས་པ་ལྷ་ཞེས་སྙན་པའི་རྔ། །ཕྱོགས་ཀྱི་བུ་མོའི་རྣ་རྒྱན་དུ། །ལེགས་པར་བཀོད་ལ་གསོལ་བ་འདེབས། །དེ་ཚེ་རྒྱ་གར་ལྷོ་ཕྱོགས་ན། །བྲམ་ཟེ་མུ་སྟེགས་རྟ་དབྱངས་ཞེས། །ཐུན་མོང་རིག་པའི་གནས་ལ་མཁས། །དབང་ཕྱུག་ཆེན་པོས་མངལ་སྐྱེས་ཀྱིས། །མི་ཐུབ་མཆོག་བྱིན་མངོན་སུམ་དུ། །ཚངས་པ་ཁྱབ་འཇུག་ཨུ་མ་གསུམ། །རྩོད་པའི་གྲོགས་སུ་བྱིན་པ་དེས། །རྒྱ་གར་ཤར་ཕྱོགས་མཁས་པ་རྣམས། །ཕལ་ཆེར་ཕམ་བྱས་དེ་ཡི་མ། །སངས་རྒྱས་བསྟན་ལ་རབ་གུས་པས། །ཡིད་མ་རངས་ཏེ་ནཱ་ལེནྡྲར། །བཏང་ན་མཁས་པས་ཚར་བཅད་དེ། །སངས་རྒྱས་བསྟན་ལ་འཇུག་པ་ཡང་། །སྲིད་དོ་སྙམ་ནས་བུ་ཁྱོད་ཀྱིས། །ཕམ་བྱས་འདི་ནི་ཆུ་ཐིགས་ཙམ། །ཕྱོགས་ལས་རྣམ་པར་རྒྱལ་འདོད་ན། །མཁས་མང་རྒྱ་མཚོའི་ཀློང་གྱུར་པ། །དབུས་སུ་སོང་སྟེ་མཁས་རྣམས་ཀུན། །རྩོད་པས་རྒྱལ་ན་གྲགས་སྙན་འབར། །དེ་ལྟར་གྱིས་ཤིག་ཟེར་བ་ལྟར། །ནཱ་ལེནྡྲ་ཡི་པཎྜི་ཏ། །སྟོང་དང་ལྔ་བརྒྱའི་མདུན་ས་ཆེར། །ཁོ་དང་རྩོད་པར་ནུས་པ་ཡི། །མཁས་པ་སུ་ཡོད་དྲིལ་བསྒྲགས་པས། །མཁས་རྣམས་ཞུམ་སྟེ་དཔལ་གྱི་རིར། །ཀླུ་སྒྲུབ་ཡབ་སྲས་བཞུགས་པའི་དྲུང་། །སྤྲིང་པ་བཏང་བར་རིགས་ན་ཡང་། །བཤུལ་ཐག་རིང་བས་བཏོལ་མེད་བགྲོས། །པཎྜི་ཏ་འགའ་ཡི་རྨི་ལམ་ལྟར། །འཕྲིན་ཡིག་གཏོར་མའི་མགོར་བཞག་སྟེ། །ཆོས་སྐྱོང་མགོན་པོར་མཆོད་གཏོར་ཚོགས། །ལེགས་པར་ཕུལ་ནས་འཕྲིན་ལས་བཅོལ། །རང་བྱོན་རྡོ་སྐུའི་ཐུགས་ལས་བྱུང་། །སྤྲུལ་པའི་བྱ་རོག་ཕོ་ཉར་མངགས། །འཕྲིན་ཡིག་དཔོན་སློབ་ཕྱག་ཏུ་གཏད། །དེ་ཚེ་དཔོན་སློབ་བཀའ་བགྲོས་བྱས། །རྗེ་འདི་ཉིད་ཀྱིས་འདུལ་སྐལ་གཟིགས། །འཕྲུལ་གྱིས་བྱོན་པའི་ལམ་བར་དུ། །ཤིང་གི་ལྷ་མོས་མིག་སློང་བར། །སྤྱན་གཅིག་སྟེར་ལ་གསོལ་བ་འདེབས། །འཕགས་ལྷ་བྱོན་ཞེས་ཕྱོགས་ཀུན་གྲགས། །ཕྱི་ནང་པཎྜི་ཏ་འབུམ་ཕྲག་འདུས། །གང་རྒྱལ་བསྟན་པར་འཇུག་དམ་བཅའ། །སློབ་དཔོན་གྱིས་ནི་དགེ་བསྙེན་དང་། །དྲག་པོ་མིག་གསུམ་ལྡན་པ་དང་། །བརྒྱ་བྱིན་མིག་སྟོང་ལྡན་ན་ཡང་། །དེ་ཉིད་མཐོང་མིན་ཨཱརྱ་ང་། །མིག་གཅིག་ཡིན་ཡང་སྲིད་གསུམ་པོ། །མ་ལུས་དེ་ཉིད་མཐོང་ངོ་ཞེས། །བདེན་གསུང་སྩལ་ལ་གསོལ་བ་འདེབས། །སྲིང་མོ་སོགས་དང་རྩོད་གྱིས་ཟེར། །དགེ་བསྙེན་ངོ་ཚ་མེད་པ་ཡིས། །ཨུ་མ་དེ་བ་སྐྱེངས་ཏེ་བྲོས། །སྤྲུལ་པའི་བྱི་ལས་ཚངས་པ་ཡི། །པཎྜི་ཏ་ནེ་ཙོའི་མགྲིན་པ་བཅད། །དེ་མཐོང་མ་ཁོལ་སློབ་དཔོན་ལ། །ཁྱོད་ལ་སྡིག་ཏུ་མི་འགྱུར་རམ། །སྡིག་སྦྱོང་ང་ཡི་སློབ་དཔོན་འདུག །དེས་སྦྱོང་ཁྱོད་ལ་ཕན་ནམ་ཟེར། །བྱི་ལས་སྡིག་བྱས་བདག་གནོད་དམ། །བྱས་པས་མ་ཁོལ་ལན་མེད་གྱུར། །ཐུགས་རྗེ་སྣུམ་གྱི་ཐིགས་པ་ཡིས། །ཁྱབ་འཇུག་ཐོད་ལེ་ཀོར་བསུབས་ཤིང་། །ཁྲི་སྟེང་ལྷམ་བཀྲད་སོགས་བཏགས་པས། །ལྷ་ཆེན་མ་འཁོར་རིང་དུ་བྲོས། །ལྟར་སྣང་ལུང་རིགས་སྐད་ངན་སྒྲོགས། །སློབ་དཔོན་ཕྱག་སྟོང་སྤྲུལ་པས་མནན། །ཐུབ་དཀའ་ནག་ཅེས་འབྱུང་པོའི་བྱ། །སྤོབས་མེད་ཕམ་ལ་གསོལ་བ་འདེབས། །ལུང་རིགས་རྡོ་རྗེའི་མེ་ཆར་གྱིས། །ལོག་ལྟའི་བྲག་རི་ཀུན་བཤིགས་ཚེ། །རྫུ་འཕྲུལ་འགྲན་ཟེར་མིག་སྟོང་སྤྲུལ། །སློབ་དཔོན་ཕྱག་སྟོང་སྤྲུལ་པས་མནན། །ཁ་ནས་མེ་ཕྱུང་ཞབས་མཐིལ་ནས། །ཆུ་ཕྱུང་བ་ཡིས་བསད་པ་སོགས། །ཅི་བྱ་གཏོལ་མེད་གྱུར་པའི་ཚེ། །ཀུན་གྱི་མིག་ངོར་ལྷ་ཆེན་གྱིས། །བདག་ནི་བསླུས་ཞེས་སྨྲེ་སྔགས་བཏོན། །ལྷ་ཆེན་སྙེགས་སྙམ་མཁའ་ལ་བྲོས། །ཕྱི་བཞིན་འཕུར་བས་སླར་བཀུགས་མཛད། །མཐུ་སྟོབས་ཅན་ལ་གསོལ་བ་འདེབས། །གཙུག་ལག་ཕྱུར་བུར་གཏམས་པ་ཡི། །ཁང་བཅུག་སྒོ་ལ་ལྕགས་གཟེར་བཏབ། །སྐྱོ་སྟེ་མདོ་རྒྱུད་མང་བལྟས་པས། །འཇམ་དཔལ་རྩ་བའི་རྒྱུད་ཉིད་ལས། །གཞན་ཡང་རབ་བྱུང་དམ་པ་ནི། །སིང་གྷ་ལ་ཡི་གྲོང་ན་གནས། །འཕགས་པ་མིན་ལ་འཕགས་པའི་མིང་། །ཕ་རོལ་རྒོལ་བ་བཟློག་ནས་ནི། །མུ་སྟེགས་རྣམས་ཀྱི་སྔགས་སུན་ཕྱུང་། །ཞེས་སོགས་འཕགས་ལྷའི་ལུང་བསྟན་དང་། །དགེ་སློང་མང་དུ་ཐོས་པ་ནི། །དེ་ཡི་ཚེ་ན་འབྱུང་འགྱུར་བ། །མ་ཁོལ་ཞེས་ཀྱང་བྱ་བ་སྟེ། །ང་ཉིད་ཀྱིས་ནི་བསྟོད་བྱེད་པ། །ཞེས་སོགས་རང་ཉིད་ལུང་བསྟན་པའི། །མདོ་སྡེ་ལ་སོགས་མཐོང་བའི་ཚེ། །སྔར་བྱས་ལ་འགྱོད་སངས་རྒྱས་ལ། །ཡང་དག་ཡིད་ཆེས་རྙེད་ནས་ནི། །བདག་ཉིད་འདྲེན་པར་གསོལ་བ་ལ། །རབ་བྱུང་གནང་ལ་གསོལ་བ་འདེབས། །རབ་ཏུ་བྱུང་ནས་སྡེ་སྣོད་སྦྱངས། །ཐུབ་པའི་སྐྱེས་རབས་སོ་བཞི་དང་། །བསྟོད་པ་བརྒྱ་རྩ་ལྔ་བཅུ་པ། །བསྔགས་འོས་བསྔགས་བསྟོད་ལ་སོགས་པས། །སྟོན་པའི་ཡོན་ཏན་ཡང་དག་བསྒྲགས། །དཔའ་བོ་ཞེས་བྱའི་མཁས་པར་གྱུར། །དེ་ཚེ་རྗེས་འབྲང་མུ་སྟེགས་དང་། །ཁྱིམ་པ་སྟོང་ཕྲག་མང་པོ་ཞིག །བསྟན་པའི་སྒོར་བཙུད་རབ་བྱུང་མཛད། །འཆད་རྩོད་རྩོམ་པའི་ཚ་ཟེར་གྱིས། །མཉམ་མེད་བུ་རམ་ཤིང་པ་ཡི། །བསྟན་དར་གཉེན་ལ་གསོལ་བ་འདེབས། །གཞན་ཡང་མི་མིན་བྲན་དུ་འཁོལ། །གཙུག་ལག་ཁང་ཆེན་རྒྱལ་གྲངས་བཞེངས། །ཀུན་ལ་ཐེག་ཆེན་ཆོས་སྡེ་བཙུགས། །སེམས་དཔའ་ཆེན་པོར་གསོལ་བ་འདེབས། །ཞལ་གདམས་གསུང་གི་བདུད་རྩི་ནི། །དང་པོ་བསོད་ནམས་མིན་བཟློག་ཆེད། །གཙང་བདེ་རྟག་འགོག་རབ་བྱེད་གསུམ། །བར་དུ་བདག་ལྟ་བཟློག་བྱེད་གཅིག །ཐ་མར་ལྟ་ངན་ཀུན་བཟློག་ཆེད། །རབ་བྱེད་ལྷག་མ་བཅུ་གཉིས་ཏེ། །བཅུ་དྲུག་བདག་ཉིད་བཞི་བརྒྱ་པ། །གཞན་ཡང་དབུ་མ་ལག་ཚད་མ། །ཡེ་ཤེས་སྙིང་པོ་ཀུན་ལས་བཏུས། །གསང་སྔགས་སྤྱོད་བསྡུས་སྒྲོན་མ་དང་། །སེམས་ཀྱི་སྒྲིབ་སྦྱོང་ལ་སོགས་པ། །ཀླུ་སྒྲུབ་ཐུགས་ཀྱི་བཅུད་ཕྱུང་བ། །མདོ་དང་སྔགས་ཀྱི་ལེགས་བཤད་ཀྱི། །བང་མཛོད་ལེགས་པར་ཕྱེ་བ་ཡིས། །བློ་གསལ་སྐལ་ལྡན་བྱེ་བའི་ཚོགས། །ཚིམ་མཛད་ཁྱོད་ལ་གསོལ་བ་འདེབས། །དཔལ་ལྡན་གསང་བ་འདུས་པ་ཡི། །ཏིང་འཛིན་གསུམ་གྱི་འོད་དཀར་གྱིས། །སྐྱེ་ཤི་བར་དོའི་མུན་སེལ་བའི། །བསིལ་ཟེར་ཅན་ལ་གསོལ་བ་འདེབས། །སྒྲ་གཅན་ལམ་དུ་ཟླ་ཉིའི་བགྲོད། །བཀག་མཐུས་བདེ་སྟོང་མཁའ་དབྱིངས་སུ། །འཇའ་ཚོན་སྒྱུ་མའི་གར་ཤཪ་བ། །ཟུང་འཇུག་དཔའ་བོར་གསོལ་བ་འདེབས། །སྣ་ཚོགས་སྤྲུལ་པའི་ཟློས་གར་གྱིས། །དག་དང་མ་དག་ཞིང་མྱུལ་སླད། །མེ་ཏོག་ཆར་འབེབས་འཇའ་འོད་ཟུག །འཕྲུལ་གྱིས་གཤེགས་ལ་གསོལ་བ་འདེབས། །དེང་ནས་བྱང་ཆུབ་མ་ཐོབ་བར། །ཁྱོད་སྐུ་པད་དཀར་ཚལ་ཆེན་དང་། །འབྲལ་མེད་ཞལ་ལུང་སྦྲང་རྩི་ཡིས། །བདག་རྒྱུད་གང་བར་བྱིན་གྱིས་རློབས། །དེ་ལྟར་བསྟོད་ཅིང་གསོལ་བཏབ་མཐུས། །ལྟ་ངན་ལམ་གོལ་འཁྱམས་པ་རྣམས། །ཡང་དག་ལྟ་ལ་འགོད་ནུས་པའི། །མཁས་པའི་གོ་འཕང་མྱུར་ཐོབ་ཤོག །ཅེས་སློབ་དཔོན་ཨཱརྱ་དེ་བ་ལ་བསྟོད་པ་འཕགས་པ་དགྱེས་པའི་གླུ་དབྱངས་ཞེས་བྱ་བ་འདི་ནི། བཙུན་གཟུགས་དྷརྨ་དྷ་རས་སྦྱར་བའི་ཡི་གེ་པ་ནི་དཔྱོད་ལྡན་དགེ་སློང་བློ་བཟང་ཚེ་རིང་ངོ་། །ཤུབྷཾ། །དུས་འཁོར་ཁམས་ཚན་དགེ་སློང་གུ་རུ་སྐྱབས་ཀྱིས་དཔར་དུ་བཞེངས་པས་དགེ་ལེགས་འཕེལ་གྱུར་ཅིག།།  །།

 

[1] ཆོས་རྗེ་བློ་བཟང་ཆོས་འཛིན་དཔལ་བཟང་པོའི་གསུང་འབུམ། ཨཱརྱ་བསྟོད། ཤིང་དཔར་དཔེ་རིང་། ཤོག་ ༡ན༡ ནས་ ༤ན༧ བར།

Leave a Reply

Your email address will not be published. Required fields are marked *