༄༅། །རྒྱན་དྲུག་མཆོག་གཉིས་ལ་བསྟོད་པ་ཨུ་དུམ་ཝ་རའི་ཆུན་འཕྱང་།

༄༅། །རྒྱན་དྲུག་མཆོག་གཉིས་ལ་བསྟོད་པ་ཨུ་དུམ་ཝ་རའི་ཆུན་འཕྱང་།

༼རྫོགས་ཆེན་མཁན་ཆེན་སྐྱབས་རྗེ་ཡོངས་འཛིན་རིན་པོ་ཆེ་འཇིགས་མེད་རྟ་མགྲིན་ཡོན་ཏན་མགོན་པོས་ (1899-1959) མཛད་པ།༽[1]

ན་མོ་རཏྣ་ཏྲ་ཡཱ་ཡ། ཞི་བའི་མཁའ་ལ་ཐུགས་རྗེའི་ཆུ་འཛིན་འཁྲིགས། །ཚངས་དབྱངས་འབྲུག་སྒྲ་གདུལ་བྱའི་ཞིང་ཁྱབ་ལས། །ཕན་བདེའི་ཆོས་ཆར་རབ་ཏུ་འབེབས་མཁས་པའི། །སྐྱེ་དགུའི་བླ་མ་དོན་ཀུན་གྲུབ་པ་རྒྱལ། །རྒྱལ་གསུང་ཆུ་གཏེར་ཆེ་ལ་དབང་བསྒྱུར་ནས། །ལེགས་བཤད་རིན་ཆེན་འབར་བའི་གདེངས་ཀ་ལས། །སྐལ་བཟང་ཡིད་ཀྱི་འདོད་པ་ཀུན་སྩོལ་བའི། །ཀླུ་སྒྲུབ་ཀླུ་ཡི་དབང་པོར་གུས་པས་འདུད། །

བྱམས་ཆོས་ཐུགས་ཀྱི་བུམ་བཟང་ལས་འོངས་པའི། །ཟབ་རྒྱས་ཆོས་ཀྱི་བཅུད་མཆོག་ངོམས་མེད་དུ། །འཐུང་ལས་མཁྱེན་སྟོབས་ཕ་རོལ་ཕྱིན་བརྙེས་པའི། །ཐོགས་མེད་ཆོས་ཀྱི་དབང་ཕྱུག་དེར་ཕྱག་འཚལ། །བློ་གྲོས་དྲི་མེད་ཤེལ་གྱི་མེ་ལོང་དུ། །མཐའ་ཡས་ཆོས་ཚུལ་མ་འདྲེས་ཡོངས་བཀོད་དེ། །སྒྲུབ་དང་སུན་འབྱིན་རིགས་པའི་མཚོན་རྣོན་པོས། །ཕས་རྒོལ་མཐར་བྱེད་ཨཱརྱ་དེ་ཝ་རྒྱལ། །མང་ཐོས་མཁྱེན་རབ་མ་དྲོས་མཚོ་ཆེན་ལས། །བདེན་བཞིའི་གཞུང་ལུགས་ཁ་འབབ་རྒྱུན་སྤྲོས་པས། །ཀུན་རྨོངས་དྲི་མ་དག་བྱེད་མཁས་པའི་ཕུལ། །སངས་རྒྱས་གཉིས་པ་དབྱིག་གི་གཉེན་ལ་འདུད། །འདུལ་ལུང་དྲི་མེད་ལྷ་ཡི་བདུད་རྩིའི་བཅུད། །བློ་གྲོས་གསེར་གྱི་བུམ་པར་བསྐྱིལ་ནས་སླར། །ཐར་འདོད་ཡིད་ལ་ཞི་བསིལ་ཕན་བདེའི་རོ། །སྟེར་མཁས་ཡོན་ཏན་འོད་ལ་ལྷག་པར་གུས། །ཐུབ་བསྟན་ཀེ་ལ་ཤ་རིའི་ལྷུན་པོའི་སྤོར། །འཆད་རྩོད་རྩོམ་པའི་རྩལ་གསུམ་རབ་རྫོགས་པས། །ལུང་རིགས་སེངྒེའི་ང་ཚོས་ས་གསུམ་ལྗོངས། །དོག་པོར་བགྱིད་མཛད་ཕྱོགས་གླང་ཞབས་ལ་འདུད། །བསླབ་གསུམ་གསེར་གྱི་ཁང་བཟང་ལ་གནས་པའི། །ཡོན་ཏན་རིན་ཆེན་དུ་མའི་མཛོད་ཆེན་པོ། །བསྟན་འགྲོའི་རྒུད་པ་སེལ་བའི་དཔལ་ཡོན་ཏན། །མཚུངས་མེད་ཤཱཀྱ་འོད་ལ་གུས་པས་བསྙེན། །མཁྱེན་རབ་ཆུ་འཛིན་རོལ་བའི་ལྡིང་ཁང་ནས། །ལུང་རིགས་གློག་ཕྲེང་གཡོ་དང་ཆབས་ཅིག་ཏུ། །བརྒལ་བརྟག་གནམ་ལྕགས་འབར་བའི་འཕྲུལ་འཁོར་གྱིས། །ཕས་རྒོལ་མཐར་བྱེད་ཆོས་ཀྱི་གྲགས་པ་རྒྱལ། །བསིལ་ལྡན་ར་བ་དཀར་པོའི་ནང་ལོགས་སུ། །མདོ་སྔགས་ཆོས་ཚུལ་འོད་ཀྱི་སྣང་ཆེན་འབུམ། །སྤྲོ་མཁས་བསྟན་པ་རྒྱ་མཚོའི་མགོན་གཅིག་པུ། །དྲི་མེད་འོད་ཟེར་རྒྱལ་བ་གཉིས་པར་འདུད། །ཐུན་མོང་ཐུབ་པའི་ལྟ་གྲུབ་པདྨོའི་ཚལ། །རྒྱས་མཛད་མཁྱེན་རབ་ཉིན་བྱེད་འབར་བའི་གཟིས། །རྨོངས་དང་ཐེ་ཚོམ་མུན་པ་དྲུང་འབྱིན་པའི། །སྨྲ་བའི་དབང་ཕྱུག་རོང་ཟོམ་ཆེན་པོར་འདུད། །ལྔ་རིག་ཤེས་བྱའི་པད་ཚལ་ཇི་སྙེད་པ། །བློ་གྲོས་ཟེར་གྱིས་གཅིག་ཆར་ཁ་ཕྱེ་ནས། །ལེགས་བཤད་ཟིལ་མངར་ཕྱོགས་བརྒྱར་སྤྲོ་མཁས་པའི། །གངས་ཅན་མིག་གྱུར་ས་སྐྱ་པཎ་ཆེན་རྒྱལ། །དེ་ལྟར་འཕགས་བོད་མཁས་དབང་རིམ་བྱོན་ལ། །རབ་བསྔགས་མེ་ཏོག་མཐོན་ཀའི་ཆུན་པོ་ཡིས། །ཆ་ཙམ་བསྟོད་པའི་ལེགས་བྱས་གང་ཐོབ་དེས། །འགྲོ་ཀུན་ཀུན་མཁྱེན་ཡེ་ཤེས་མཆོག་ཐོབ་ཤོག།  །།

 

[1] འཇིགས་མེད་ཡོན་ཏན་མགོན་པོའི་གསུང་འབུམ། སི་ཁྲོན་མི་རིགས་དཔེ་སྐྲུན་ཁང་། ༢༠༠༥ ལོ། ཤོག་ ༢༡༠ ནས་ ༢༡༢ བར།

Leave a Reply

Your email address will not be published. Required fields are marked *