༄༅། །འཕགས་པ་ཡོན་ཏན་འོད་མཛད་ཀྱི་རྟོགས་བརྗོད་ཅེས་བྱ་བ།

 

༄༅། །སྭསྟི། འཕགས་པ་ཡོན་ཏན་འོད་མཛད་ཀྱི་རྟོགས་བརྗོད་ཅེས་བྱ་བ།[1]

 

༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽

 

དེ་ཉིད་ཀྱི་གསུང་རབ་ལ་གུས་པས་ཕྱག་འཚལ་ལོ། །བྲམ་ཟེའི་རིགས་ལས་རབ་བྱུང་བ། །གང་གི་ཡོན་ཏན་ས་གསུམ་པ། །འོད་བྱེད་པོ་ལ་བཞུགས་བཞིན་དུ། །གཞུང་ལུགས་འབུམ་ཕྲག་བཅོ་བརྒྱད་ཙམ། །ཐུགས་ལ་བྱོན་ནས་ཞལ་འདོན་དུ། །མཛད་ལ་ཐོགས་པ་མི་མངའ་ཞེས། །ས་སྟེང་ཆེན་པོར་གྲགས་འགའ་ཡིས། །སྙན་པར་བསྒྲགས་ལ་ཕྱག་འཚལ་ལོ། །

ས་ཕྱོགས་གང་ན་སྟོན་པའི་འཁོར། །རྣམ་བཞི་གང་ན་ཡོད་གྱུར་པ། །དེ་ན་བསྟན་པའི་རྩ་བ་ནི། །བཞུགས་ཞེས་ཚད་ལྡན་གཞུང་ལས་གསུངས། །དགེ་བསྙེན་ཕ་མས་བསྟན་པ་ཡི། །ཞབས་ནས་འདེགས་སོ་དགེ་སློང་དག །འདུས་པར་གྱུར་པས་འདུལ་བ་ཡི། །བསྟན་པ་རྫོགས་གསལ་འཛིན་པར་ནུས། །དགེ་ཚུལ་ཚོགས་རྣམས་ཁྱིམ་པ་ཡི། །ཕྱག་འོས་བསྟན་པའི་གདུང་འཚོབ་པ། །གྱུར་ཀྱང་འདུལ་བར་རྟོགས་མཐའ་དག །མི་འཛིན་བླ་མའི་བྱ་བས་ངལ། །འདུས་རྣམས་ཚུལ་ཁྲིམས་མ་འཁྲུལ་བ། །ཉིད་དང་ལས་ཀྱི་ཆོ་གའི་ཚོགས། །ཞལ་ནས་རྫོགས་པར་ཐོན་ནུས་པ། །མེད་ན་ཐུབ་བསྟན་མི་འབྱུང་བར། །གསུང་མཛད་ཁྱོད་ལ་ཕྱག་འཚལ་ལོ། །ཁྲིམས་ལྡན་འདུལ་བ་མི་འཛིན་དང༌། །ཟུང་འབྲེལ་དཀོན་པའི་མཐའ་འཁོབ་ཏུ། །རེ་རེ་ཡང་ནི་བསྟན་འཛིན་དུ། །བསྔགས་མཛད་ཁྱོད་ལ་ཕྱག་འཚལ་ལོ། །ཁྲིམས་ལྡན་སྡེ་སྣོད་མི་འཛིན་ན། །སྡེ་སྣོད་འཛིན་པ་ཁྲིམས་འཆལ་ཡང༌། །རྒྱང་རིང་བསྐྲད་པར་མི་བྱ་ཞེས། །གསུངས་མཛད་ཁྱོད་ལ་ཕྱག་འཚལ་ལོ། །ཁ་སྐོང་ཡན་ལག་འདུལ་བ་ཡི། །བསླབ་སྦྱངས་ཀུན་རྫོགས་མིན་མོད་ཀྱང༌། །བསྟན་པའི་གཙུག་ལག་ཁང་ཆེན་པོ། །དེ་མེད་གཞན་གྱིས་བསྲུང་མི་ནུས། །མུ་སྟེགས་སྐྲག་བྱེད་སེང་གེའི་བུ། །འདི་ལས་གཞན་པ་གང་ཞིག་ཚོལ། །ཚོགས་པའི་ནང་དུ་ལས་རེས་དང༌། །ཆད་པའི་ལས་ཀྱི་མི་འཇིགས་ཤིང༌། །ལྟུང་ལས་ལྡང་བ་ཡང་བ་དང༌། །ལྟུང་བར་གྱུར་ཀྱང་ལྕི་མིན་པས། །སྡེ་སྣོད་འཛིན་པ་མཆོག་ཉིད་དུ། །གཅེས་པ་ཡིན་ནོ་དེ་ལས་ཀྱང༌། །ཁ་སྐོང་ཡན་ལག་ཚང་ཙམ་ཞིག །ཐོག་མར་དགེ་འདི་མེད་མི་རུང༌། །བསྟན་པ་ནུབ་ལ་ཐུག་གྱུར་ན། །གནས་སྟེར་ནུས་པ་ཁྱིམ་པ་དང༌། །མཁན་པོ་བསྟན་མེད་ཉིད་ཀྱང་ནི། །རུང་བ་ཁྱོད་ཀྱི་གཞུང་ལས་འབྱུང༌། །འདུལ་བ་འཛིན་ལ་གཅེས་སྤྲས་སུ། །བྱ་བར་གསུངས་པས་སངས་རྒྱས་ཀྱི། །ཞལ་ནས་གསུངས་པའི་སོ་ཐར་དང༌། །ལས་བརྒྱ་ཚིག་ཏུ་ཐོན་ལ་དགོངས། །གནས་སྟེར་ནུས་ལ་དེ་ཙམ་ཡང༌། །དགོས་པ་མིན་པར་ལྔ་ཕྲུགས་ཀྱི། །ལྷན་ཅིག་སྦྱར་བའི་གཞུང་མཛད་པས། །གསལ་བར་རྟོགས་ལ་ཕྱག་འཚལ་ལོ། །དགེ་སློང་རེ་རེའི་འཁོར་དག་ཏུ། །དགེ་ཚུལ་གཅིག་ལས་མི་ལྷག་ཅིང༌། །དགེ་ཚུལ་རེ་ཡང་དགེ་སློང་ལ། །ངེས་པར་བརྟེན་ཞེས་ཁྱོད་ཀྱིས་གསུངས། །དགེ་ཚུལ་རྐྱང་པའི་ཚོགས་ཀྱི་ནི། །དགེ་འདུན་སྡེ་བཟུང་འདིར་མི་སྲིད། །དགེ་སློང་རྐྱང་པའི་ཚོགས་ཀྱི་ནི། །དེ་འཛིན་ནུས་སོ་དེ་ཡི་ཚེ། །དགེ་བསྙེན་མེད་མི་རུང་ཡིན་ཕྱིར། །རྫོགས་སངས་རྒྱས་ཀྱི་འཁོར་བཞི་པོ། །ཚང་བ་མེད་དུ་མི་རུང་བར། །གསུངས་མཛད་ཁྱོད་ལ་ཕྱག་འཚལ་ལོ། །མཐའ་གཉིས་བསལ་ནས་སོ་ཐར་གྱི། །བསྟན་པ་འཛིན་ནུས་དགོན་པ་ནི། །ཁོ་ནར་གནས་དགོས་མ་ཡིན་པས། །གྲོང་ཁྱེར་དབུས་ཀྱི་གཙུག་ལག་ཁང༌། །སྡེ་ཚན་མི་འདྲ་མང་པོ་ཡང༌། །མཚམས་ཆེན་གཅིག་གི་བསྐོར་ནང་དུ། །དབྱར་གནས་ཀྱིས་མཚོན་བྱ་རུང་བར། །གསུངས་མཛད་ཁྱོད་ལ་ཕྱག་འཚལ་ལོ། །ཟླ་བ་གསུམ་དུ་དབྱར་གནས་པར། །ཁས་བླངས་པ་ནི་དཔག་བསམ་གྱི། །ལྗོན་ཤིང་དང་ནི་ཡིད་བཞིན་གྱི། །ནོར་བུ་ལྟ་བུར་འདི་ན་དགེ །དབྱར་གྱི་རྙེད་པ་བདེ་བླག་ཏུ། །རྟེན་ཅིང་འབྲེལ་བར་འབྱུང་ལས་དང༌། །གནས་མལ་དང་ནི་གནས་རྙེད་དང༌། །ཆོས་གོས་ཚེགས་ཡོད་མིན་པ་དང༌། །འཕྲལ་དུ་མི་རྩོད་ཕྱི་མཐར་ཡང༌། །རྩོད་པའི་རྒྱུ་རྣམས་ཞི་བར་བྱེད། །དགག་དབྱེ་བསྲ་བརྐྱང་དབྱར་གནས་པ། །མེད་པར་མི་འབྱུང་དེ་ཡོད་ལས། །དེ་འབྱུང་དཔག་བསམ་ཤིང་ལྟ་བུར། །གསུངས་མཛད་ཁྱོད་ལ་ཕྱག་འཚལ་ལོ། །གསོ་སྦྱོང་དུས་ཀྱི་སྟ་གོན་དུ། །སྔར་ཡོད་ལྟུང་བ་ཕྱིར་འཆོས་པ། །མེད་དུ་མི་རུང་དེ་དེ་ལྟར། །མི་ནུས་ན་ཡང་འདོན་པ་ལྔ། །སོ་སོའི་སྐབས་སུ་དེ་མཐོལ་བ། །ངེས་པར་དགོས་པ་དེ་ནས་ནི། །ཕྱིར་འཆོས་པ་ལ་བདེ་བླག་ཏུ། །འཇུག་ཕྱིར་ཉ་ཤིའི་གསོ་སྦྱོང་ནི། །ལྟུང་ལས་ལྡང་བྱེད་ཐབས་མཆོག་ཏུ། །གསུངས་མཛད་ཁྱོད་ལ་ཕྱག་འཚལ་ལོ། །མཚམས་ཆེན་བཅད་པས་ལས་སོ་སོའི། །སྒྲུབ་བྱེད་ཀྱིས་ནི་གང་སྒྲུབ་ཚེ། །འདུལ་བ་འཛིན་པ་གཅིག་གིས་ཀྱང༌། །ཁྱབ་ཆེ་དེ་རྙེད་སླ་བ་དང༌། །མི་འབྲལ་སྣང་བ་འཆགས་པ་དང༌། །དགེ་འདུན་དབྱེན་གྱི་རྒྱུ་ཚོགས་པ། །འབྱུང་རུང་མཐའ་དག་ཁེགས་པ་དང༌། །ས་གཞན་གནས་པའི་ཆད་པ་ཅན། །ཀུན་ཀྱང་མཚམས་ལས་མི་འདའ་བར། །བྱེད་པར་དགོངས་ལ་ཕྱག་འཚལ་ལོ། །མཚམས་ཆུང་མང་པོའི་མཚམས་ཆེན་གྱི། །སྐོར་ལ་དགོས་པ་དེ་དང་དེ། །ཁོ་ནར་མ་ཟད་ལ་ལའི་དུས། །ཁྱབ་ཆེན་ལས་ལ་འཇུག་ཀའི་ཚེ། །སོ་སོའི་དཀྱིལ་འཁོར་པ་དག་ཏུ། །དགེ་འདུན་ལས་ཀྱི་བྱེ་བྲག་ཅན། །དམིགས་ཀྱིས་བསལ་རྣམས་གེགས་མེད་པར། །གྲུབ་པ་ཉིད་ཕྱིར་ལུས་དང་སེམས། །བདེ་བར་གནས་མཛད་ལ་ཕྱག་འཚལ། །བདེ་བར་གནས་རྐྱེན་གཙུག་ལག་ཁང༌། །སྟན་དང་དམིགས་བསལ་མ་གསུངས་པའི། །རྫས་ནོར་མང་པོ་དག་ལ་ཡང༌། །བྱིན་རློབ་འབད་རྩོལ་མི་དགོས་པར། །གོས་དང་སྨན་ལ་ཚད་དང་ནི། །བྱིན་རླབས་ཇི་ལྟར་ལོངས་སྤྱོད་ཚུལ། །གནང་བས་ཚུལ་ཁྲིམས་བསྲུང་མཛད་རྣམས། །བདེ་བར་འཚོ་ལ་ཕྱག་འཚལ་ལོ། །དེ་ལྟར་དེ་བརྩམས་པ་ལས་ནི། །བྱུང་བའི་མཆོད་ཕྲེང་དྲི་ཞིམ་པ། །ཙནྡན་ས་མཆོག་ལྟར་དགེ་བ། །འགྲོ་ལ་རིང་དུ་གནས་པར་ཤོག།  །།ཤུབྷཾ།།

[1] པཎ་ཆེན་ཤཱཀྱ་མཆོག་ལྡན་གྱི་གསུང་འབུམ། པོད། ༼མ༽ འཕྲུལ་པར་དཔེ་རིང་། ཤོག་གྲངས་ ༡༧ན༣ ནས་ ༡༨བ༦ བར།

Leave a Reply

Your email address will not be published. Required fields are marked *