༄༅། །དཔལ་བདག་ཉིད་ཆེན་པོ་འཕགས་པ་ཀླུ་སྒྲུབ་ཞབས་ཀྱི་རྟོགས་པ་བརྗོད་པ་ངེས་དོན་ཉིན་མོར་བྱེད་པའི་སྣང་བས་སྙིང་གི་མུན་པ་སངས་བྱེད།

༄༅། །དཔལ་བདག་ཉིད་ཆེན་པོ་འཕགས་པ་ཀླུ་སྒྲུབ་ཞབས་ཀྱི་རྟོགས་པ་བརྗོད་པ་ངེས་དོན་ཉིན་མོར་བྱེད་པའི་སྣང་བས་སྙིང་གི་མུན་པ་སངས་བྱེད་ཅེས་བྱ་བ།།[1]

༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽

 

ན་མོ་མཉྫུ་ཤྲཱི་ཡེ། ཆོས་དབྱིངས་ཞི་བའི་ནགས་སུ་རྟག་བཞུགས་ནས། །འགྲོ་ཀུན་མཚན་མའི་ལམ་ལས་བསྲུང་བྱའི་ཕྱིར། །རྟེན་འབྲེལ་སྒྱུ་མར་འཆར་བའི་གསུང་དབྱངས་ཀྱིས། །ཐུབ་བསྟན་ཉི་མོར་མཛད་ལ་ཕྱག་བགྱིའོ། །བྱིས་བློས་བཏགས་པའི་བདེན་དོན་རྣམ་གཉིས་པོ། །ཐད་སོར་བཞག་ནས་བླང་དོར་སྤྱོད་པའི་ཆོས། །སྨོན་ལམ་མཐར་ཕྱིན་གཞན་དོན་སྐུ་གཉིས་པོའི། །ལམ་སྟོན་མཛད་པ་དེ་ལ་ཕྱག་འཚལ་ལོ། །

འཇིག་རྟེན་ལུགས་ཀྱི་དོན་དམ་ཇི་སྙེད་པ། །བརྫུན་པའི་ཡུལ་དང་ངོ་བོས་སྟོང་པའི་ཚུལ། །རྣམ་པར་བཤད་ནས་ངེས་པར་ལེགས་པའི་ལམ། །འཆད་མཛད་མཁས་པ་དེ་ལ་ཕྱག་འཚལ་ལོ། །འཕགས་པའི་དོན་དམ་དེ་ཀུན་ཡང་དག་པའི། །ཀུན་རྫོབ་ཅེས་བྱར་བཤད་ནས་ཆོས་རྣམས་ཀུན། །བརྗོད་བྲལ་ཚུལ་གྱིས་ཆོས་སྐུའི་ལམ་ཆེན་པོ། །གསལ་མཛད་དཔའ་བོ་དེ་ལ་ཕྱག་འཚལ་ལོ། །དང་པོར་བདག་དང་བར་དུ་བདག་མེད་དང༌། །ཐ་མར་སྤྲོས་བྲལ་འཆད་པའི་རིམ་པ་ཡིས། །འཁོར་མང་བསྡུས་དང་སྨིན་དང་གྲོལ་མཛད་ནས། །སྟོན་པའི་བསྟན་པ་བཟུང་ལ་ཕྱག་འཚལ་ལོ། །རྒྱ་ཆེན་སྤྱོད་པའི་ཕྱོགས་རྣམས་མ་ལུས་དང༌། །བདེན་བཞིའི་ཚུལ་དང་ཕ་རོལ་ཕྱིན་ཚུལ་དང༌། །ཚུལ་ཆེན་གསུམ་ཀ་སྟོང་ཉིད་ཁ་ལོ་ཡིས། །བསྒྱུར་མཛད་ཁྱུ་མཆོག་དེ་ལ་ཕྱག་འཚལ་ལོ། །ཚུལ་གསུམ་ཆོས་དང་སྤྲོས་བྲལ་ཆོས་ལུགས་ལ། །ཇི་བཞིན་མཁས་པའི་འོག་ཏུ་འཕགས་རྣམས་ལ། །གཙང་བདག་བདེ་དང་རྟག་པའི་ཕ་རོལ་ཏུ། །ཕྱིན་ཚུལ་གསུང་བ་དེ་ལ་ཕྱག་འཚལ་ལོ། །རྣམ་ཤེས་ཡུལ་དུ་མཚན་མ་གང་ཤར་བ། །ལྟོས་ནས་གྲུབ་ཕྱིར་ཡེ་ཤེས་ཡུལ་དུ་ནི། །ངོ་བོས་སྟོང་ཕྱིར་སྣང་སྟོང་ཟུང་འཇུག་ཞེས། །སྟོན་མཛད་ཚད་མའི་སྐྱེས་བུ་ལ་ཕྱག་འཚལ། །བསོད་ནམས་སྒོ་ཆེན་སྔོན་དུ་མ་ཕྱེ་ན། །སྟོང་ཉིད་གཏམ་གྱིས་ཆད་མཐར་ལྷུང་སྲིད་ཕྱིར། །འཇིག་རྟེན་ཆོས་ལུགས་བདེ་འགྲོའི་ལམ་དག་ཏུ། །སྟོན་མཛད་ཐབས་མཁས་དེ་ལ་ཕྱག་འཚལ་ལོ། །བར་དུ་བདག་མེད་བདུད་རྩིས་མ་སྦྱངས་ན། །ལེགས་བྱས་ཇི་སྙེད་འཇིག་རྟེན་ལམ་འགྱུར་ཕྱིར། །རྣམ་ཐར་སྒོ་བཞི་འཇིག་རྟེན་འདས་ལམ་དུ། །འཁྲིད་མཛད་སྨྲ་མཁས་དེ་ལ་ཕྱག་འཚལ་ལོ། །བརྗོད་བྲལ་ལམ་གང་སྔོན་དུ་མ་བཏང་ན། །ལུང་སྟོན་གཏམ་གྱིས་བདག་ཏུ་རྟོག་སྲིད་ཕྱིར། །སྤྲོས་བྲལ་ཤེས་ནས་སེམས་ཀྱི་རྡོ་རྗེ་ཡང༌། །ཇི་བཞིན་སྟོན་མཛད་ཁྱོད་ལ་ཕྱག་འཚལ་ལོ། །སེམས་ཀྱི་རྡོ་རྗེ་ཆོས་དབྱིངས་ཡེ་ཤེས་དང༌། །དོན་དམ་བྱང་སེམས་སངས་རྒྱས་སྙིང་པོ་དང༌། །གནས་བདུན་གྱིས་བསྟན་རྡོ་རྗེ་རྣམ་བདུན་ཡང༌། །བསྟོད་པའི་ཚོགས་སུ་ཁྱོད་ཀྱིས་གསལ་བར་བཤད། །གཉིས་མེད་ཡེ་ཤེས་ཁོ་ན་ཆོས་དབྱིངས་དང༌། །དོན་དམ་བྱང་སེམས་ཡིན་པར་ཁྱོད་ཀྱིས་བཤད། །སྤྲོས་པའི་ཚོགས་རྣམས་བཀག་ཙམ་ཆོས་དབྱིངས་དང༌། །སྒྲིབ་ཀུན་སྦྱང་གཞི་ཡིན་པར་ཁྱོད་མི་བཞེད། །གནས་སྐབས་གསུམ་དུ་ཁྱད་པར་མེད་ཞུགས་པའི། །རང་རིག་ཡེ་ཤེས་དོན་དམ་བདེན་པར་བཤད། །དོན་དམ་གང་ཡིན་སྤྲོས་མཐའ་བཀག་ཙམ་དུ། །ངེས་པར་འཆད་པ་ཁྱོད་ཀྱི་གཞུང་མ་ཡིན། །ཟག་མེད་ཡེ་ཤེས་བདེ་གཤེགས་སྙིང་པོ་དང༌། །སེམས་ཀྱི་རྡོ་རྗེར་འཆད་པ་ཁྱོད་ཀྱི་ལུགས། །རང་སེམས་སྟོང་རྐྱང་སངས་རྒྱས་སྙིང་པོ་དང༌། །རྡོ་རྗེར་འཆང་བ་ཁྱོད་ཀྱི་གཞུང་མ་ཡིན། །འོད་གསལ་ཞེས་བྱ་རྟོག་པས་མ་སྦགས་པའི། །ཕྱོགས་སུ་མ་ཆད་རིག་པའི་ཆ་ལ་བཤད། །རང་བཞིན་བཀག་པའི་མེད་པར་དགག་པ་ཙམ། །འོད་གསལ་ཞེས་བྱའི་དོན་དུ་ཁྱོད་མི་བཞེད། །རང་བཞིན་འོད་གསལ་གཞི་ལམ་འབྲས་གསུམ་ལ། །ཁྱད་པར་མེད་པ་ཆོས་སྐུའི་དགོངས་གཞིར་བཤད། །འགྲོ་ཀུན་ཆོས་སྐུའི་སྙིང་པོ་ཅན་ཡིན་ཞེས། །གསལ་བར་འཆད་པ་ཁྱོད་ཀྱི་གཞུང་མ་ཡིན། །དྲི་མས་བསྒྲིབས་པའི་ཆོས་དབྱིངས་སེམས་ཅན་དང༌། །སྒྲིབ་བྲལ་ཆོས་དབྱིངས་སངས་རྒྱས་ཡིན་པར་བཤད། །སེམས་ཅན་ཀུན་ཀྱང་སངས་རྒྱས་ཡིན་ནོ་ཞེས། །གསལ་བར་འཆད་པ་ཁྱོད་ཀྱི་གཞུང་མ་ཡིན། །གསལ་རིག་ཙམ་གྱི་མཐའ་དབུས་བྲལ་བ་ལ། །རྟག་དང་འདུས་མ་བྱེད་པར་ཁྱོད་ཀྱིས་བཤད། །འདུས་མ་བྱེད་ཕྱིར་ཡེ་ཤེས་མིན་ནོ་ཞེས། །བཅོམ་སྒྲོགས་དབྱངས་སུ་སྒྲོགས་པ་ཁྱོད་གཞུང་མིན། །ཆོས་དབྱིངས་ཡེ་ཤེས་རྟག་བརྟན་ཞི་བ་དང༌། །གཡུང་དྲུང་ཡིན་པར་བྱམས་པའི་ཆོས་ལས་འབྱུང༌། །སྐྱེ་འཇིག་མེད་པའི་རྟག་བརྟན་དུ་བསམས་ནས། །ཆོས་དབྱིངས་རིག་པར་མི་འཆད་ཁྱོད་མི་བཞེད། །གཞི་ཡི་དུས་སུ་བདག་ཏུ་རྨོངས་པའི་གཞི། །ལམ་གྱི་དུས་སུ་གཉིས་མེད་ཡེ་ཤེས་དང༌། །འབྲས་བུའི་དུས་སུ་དྲི་བྲལ་ཆོས་ཀྱི་སྐུ། །ཀུན་ཀྱང་ཟག་མེད་ཡེ་ཤེས་ཉག་གཅིག་ཡིན། །རང་གི་ངོ་བོ་རང་བཞིན་གྱིས་དག་ཀྱང༌། །ཇི་སྲིད་སྒྲིབ་ལས་མ་གྲོལ་དེ་སྲིད་དུ། །མཐའ་ཡས་ཡོན་ཏན་ཚོགས་རྣམས་ཡོད་མི་སྲིད། །སྟོབས་སོགས་ཆོས་དང་ཉེས་ཚོགས་ལྷན་ཅིག་འགལ། །དྲི་མེད་ཚོགས་རྣམས་དེ་དང་ལྷན་ཅིག་ཏུ། །ཡུན་རིང་འགྲོགས་ཀྱང་དེ་དང་འདྲེས་པ་མེད། །སྟོབས་སོགས་ཡོན་ཏན་དེ་ཡི་རང་བཞིན་དུ། །འདྲེས་པར་འགྱུར་འདི་རྣམ་དབྱེར་མེད་པའི་དོན། །ཆུ་ཀླུང་རྒྱ་མཚོར་གནས་པ་མིན་མོད་ཀྱང༌། །རྒྱ་མཚོར་སོན་ན་ཀུན་ཀྱང་དབྱེར་མེད་འགྱུར། །སྟོབས་སོགས་ཡོན་ཏན་གདོད་ནས་ཡོད་མིན་ཀྱང༌། །དྲི་མས་དག་ཚེ་ཆོས་དབྱིངས་ཉིད་དུ་འགྱུར། །རང་བཞིན་རྣམ་དག་ཆོས་སྐུའི་དགོངས་གཞི་དང༌། །སྒྲིབ་ཀུན་འབྲལ་རུང་རྟོགས་པ་དགོས་པ་དང༌། །གནོད་བྱེད་སྦུན་པས་གཡོགས་པའི་སྭ་བ་ལ། །ས་ལིར་མི་བརྗོད་དཔེ་ཡིས་གསལ་བར་ (ཆོས་དབྱིངས་བསྟོད་པར།) བསྙད། །རང་བཞིན་ཆོས་སྐུ་སངས་རྒྱས་དངོས་ཡིན་ན། །རང་བཞིན་ལོངས་སྤྱོད་རྫོགས་དང་སྤྲུལ་པའི་སྐུ། །གཞན་དོན་མཐར་ཕྱིན་སྐུ་དང་དེ་བློ་ཡང༌། །ཐམས་ཅད་གཟིགས་བློ་ཡིན་པར་ཁས་ལོངས་ཤིག །ལམ་ཆེན་ལྔ་དང་ཚོགས་གཉིས་མ་རྫོགས་ཤིང༌། །སྐུ་གསུམ་ཡེ་ཤེས་རྣམ་བཞི་མ་ཚང་བའི། །རང་བཞིན་ཆོས་སྐུ་དེ་བཞིན་གཤེགས་ཡིན་ན། །རྫོགས་པའི་སངས་རྒྱས་ཉིད་དུ་ཁས་ལོངས་ཤིག །འགྲོ་ཀུན་རྫོགས་སངས་རྒྱས་ན་དེ་དག་ལ། །སངས་རྒྱས་སྙིང་པོ་མེད་པར་འགལ་ཞེ་ན། །ཆུ་ཤིང་སྙིང་པོ་ཁོ་ན་མི་གནས་ཀྱང༌། །འབྲས་བུ་དངར་པོ་ཀུན་གྱིས་སྤྱད་བྱར་འགྱུར། །དེ་བཞིན་འགྲོ་ཀུན་སངས་རྒྱས་སྙིང་པོ་ཅན། །མིན་ཡང་རྒྱུ་མཐུན་འབྲས་བུ་འབྱུང་ངོ་ཞེས། །ཆོས་དབྱིངས་བསྟོད་པར་ཀླུ་སྒྲུབ་ཞབས་ཉིད་ཀྱིས། །གསལ་བར་བཤད་པའི་དགོངས་པ་གང་ཡིན་སྨྲོས། །ཀླུ་སྒྲུབ་ཞབས་དང་ཐོགས་མེད་མཆེད་གཉིས་ཀྱང༌། །ཆོས་དབྱིངས་ཡེ་ཤེས་སངས་རྒྱས་སྙིང་པོ་དང༌། །རང་བཞིན་གནས་རིགས་ཡིན་པར་འཆད་པའི་ཚུལ། །མི་མཐུན་མེད་དེ་རང་རང་གཞུང་ན་ (རྒྱུད་བླ་དང་ཆོས་དབྱིངས་བསྟོད་པ།) གསལ། །བྱམས་པའི་གཞུང་ན་ཆོས་ཀྱི་དབྱིངས་ཞེས་པ། །མེད་དགག་ཁོ་ནར་འཆད་པའི་གསལ་ཁ་མེད། །དྲི་བཅས་དེ་བཞིན་ཉིད་དེ་ཟག་བཅས་ཀྱི། །ཡེ་ཤེས་ཁོ་ནར་འཆད་པ་དེ་གཞུང་ཡིན། །ཀླུ་སྒྲུབ་གཞུང་དུ་ཐ་མར་སྤྲོས་པ་ཀུན། །བཟློག་པའི་ཚེ་ན་ཆོས་ཀྱི་དབྱིངས་ཞེས་པ། །ཡོད་མེད་ལ་སོགས་སྤྲོས་པའི་མཐའ་བསལ་ནས། །ངོས་བཟུང་མེད་པར་འཆད་པའི་སྐབས་ཤིག་སྣང༌། །དེ་ཚེ་སྤྲོས་པའི་མཐའ་ཀུན་བྲལ་དེ་ལ། །ཆོས་དབྱིངས་ཡེ་ཤེས་སངས་རྒྱས་སྙིང་པོ་དང༌། །རང་བཞིན་ (རིགས་ཚོགས་སུ།) གནས་རིགས་སེམས་ཀྱི་རྡོ་རྗེ་སོགས། །ངེས་དོན་ཐ་སྙད་མང་པོ་དེར་མི་འདོགས། །ཐ་སྙད་དེ་དག་སྤྲོས་བྲལ་ཆོས་ལ་ནི། (བསྟོད་ཚོགས་སུ།) །ངེས་པ་རྙེད་ནས་ཕྱིར་མི་ལྡོག་པའི་གཏམ། །གང་ལ་བསྙད་པ་ཐེག་ཆེན་འཕགས་པའི་ཚོགས། །བྱང་ཆུབ་མཆོག་ཏུ་ལུང་སྟོན་སྐབས་དེ་ཡིན། །བདག་དང་བདག་མེད་སྤྲོས་བྲལ་རིམ་པ་ཡིས། །རྣམ་དཔྱོད་བཟང་པོར་བྱས་པའི་འོག་རོལ་ཏུ། །དམ་པའི་བདག་དང་སེམས་ཀྱི་རྡོ་རྗེ་ལ། །གང་བརྟེན་ཐེག་མཆོག་གསུང་ཁྱོད་ཕྱག་གི་གནས། །གང་ལ་བསྟོད་ནས་གང་གི་ལུགས་བཟང་པོ། །ལེགས་པར་བཤད་ལ་ལེགས་ཚོགས་ཅི་མཆིས་པ། །མཐའ་ཡས་འགྲོ་བ་མཐའ་དག་སྲིད་ཞི་ལས། །རྣམ་པར་གྲོལ་བའི་རྣམ་མཁྱེན་དོན་དུ་བསྔོ། །ཞེས་པ་འདི་ཡང༌། ཀླུ་སྒྲུབ་ཞབས་ཀྱི་བདུད་རྩིའི་ཟིམ་ཆར་བློ་གྲོས་ཀྱི་དཔག་བསམ་ལ་ཉེ་བར་སིམ་པའི་སྤོང་བ་པ་འཇམ་དཔལ་དགའ་བའི་བཤེས་གཉེན་གྱིས་ཉེ་བར་སྦྱར་བའི་ཡི་གེ་པ་ནི་ཆོས་ཀྱི་རྒྱལ་མཚན་ནོ།། །།མངྒ་ལཾ།།

 

[1] པཎ་ཆེན་ཤཱཀ་མཆོག་བཀའ་འབུམ། པོད། ༼མ༽ འཕྲུལ་པར་དཔེ་རིང་། ཤོག་གྲངས་ ༡བ༡ ནས་ ༤ན༤ བར་གསལ།

Leave a Reply

Your email address will not be published. Required fields are marked *