༄༅། །དཔལ་ཕྱོགས་ཀྱི་གླང་པོའི་རྟོགས་པ་བརྗོད་པའི་གཏམ། །

 

༄༅། །སྭསྟི། དཔལ་ཕྱོགས་ཀྱི་གླང་པོའི་རྟོགས་པ་བརྗོད་པའི་གཏམ། །[1]

(པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽

 

དེ་ཉིད་ཀྱི་གསུང་རབ་ལ་གུས་པས་ཕྱག་འཚལ་ལོ། །དཔལ་ལྡན་ཕྱོགས་རྣམས་ཐམས་ཅད་ལས། །རྒྱལ་རྔ་ལན་བརྒྱར་བརྡུངས་རྣམས་ཀྱི། །བསྟན་པའི་བརྒྱ་བྱིན་དེ་འཛིན་པའི། །ཉེ་དབང་ཚོགས་དང་བཅས་རྣམས་ནི། །ས་གསུམ་གླང་པོས་རྣམ་དཔྱོད་དང༌། །རིག་པའི་བརྩལ་གྱིས་འདིར་འདེགས་པ། །ཐུབ་པའི་དབང་པོས་དེ་མཁྱེན་ནས། །རྒྱལ་བའི་སྲས་པོར་ལུང་བསྟན་པ། །

འདི་དེ་འབིགས་བྱེད་ནགས་སུ་ནི། །མངོན་མེད་གཞུང་བརྩོམ་ལ་གཞོལ་ཚེ། །འཇམ་པའི་དབྱངས་ཉིད་མངོན་སུམ་དུ། །བྱོན་ནས་རྗེས་བཟུང་བྱིན་གྱིས་བརླབས། །ཕྱི་མའི་དུས་སུ་གཞུང་ཀུན་ལ། །བལྟ་བའི་མིག་ཏུ་དེ་འགྱུར་ཞེས། །གཞུང་བརྩོམ་བྱེད་པོར་རྗེས་གནང་བས། །ཡོངས་རྫོགས་བསྟན་པའི་ཁུར་ཆེན་པོ། །འདེགས་ལ་ངལ་བ་མེད་ཁྱོད་ཀྱིས། །ཐོག་མར་ཉན་ཐོས་སྡེ་པའི་གཞུང༌། །འཁྲུལ་མེད་མདོ་དང་སྦྱར་མཛད་ནས། །སེམས་ཙམ་གཞུང་དང་དབུ་མ་ཡང༌། །ཆོས་འཁོར་གསུམ་པའི་མདོ་བཞིན་བཀྲལ། །ཁྱད་པར་དུ་ཡང་ཤིང་རྟའི་སྲོལ། །གཞན་ལ་མ་གྲགས་རིག་པའི་གནས། །རང་ཉིད་གཅིག་པུའི་རྣམ་དཔྱོད་ཀྱིས། །རྩལ་སྟོན་མཛད་པ་ཚད་མའི་མདོ། །བསྟན་པའི་བདག་པོ་ཐུབ་པ་ཉིད། །མི་བསླུ་མ་ཤེས་དོན་གསལ་གྱི། །ཚོགས་པས་ཚད་མར་གྱུར་བསྒྲུབས་ནས། །དེས་གསུངས་ཆོས་ཀྱང་འཁྲུལ་མེད་ཀྱི། །ལམ་དུ་འདྲེན་པའི་སྲོལ་ཆེན་པོ། །ཕྱི་ནང་རྟོག་གེ་པ་གཞན་ལ། །མ་གྲགས་གཏན་ཚིགས་རིག་པའི་སྒོ། །ནང་དོན་ཀུན་ལ་འཇུག་འདི་ཕྱེ། །རང་ཕྱོགས་སྒྲུབ་ལ་ཕྱོགས་ཆོས་དང༌། །རྗེས་འགྲོ་ཙམ་ཞིག་ཀུན་ལ་གྲགས། །རྟགས་གང་མི་མཐུན་ཕྱོགས་ལས་ནི། །བཟློག་ཚུལ་གཞན་གྱིས་མ་བཤད་པ། །མེད་ན་མི་འབྱུང་འབྲེལ་ངེས་པ། །གཞན་ནས་མི་འབྱུང་ཁྱོད་ཀྱིས་བཤད། །དེ་ལས་དེ་འབྱུང་འབྲེལ་ཙམ་ནི། །བླུན་པོས་ཀྱང་ཤེས་བདག་གཅིག་པའི། །འབྲེལ་པ་ཤེས་པའི་རྩ་བ་ནི། །གཞན་སེལ་གོ་ལས་གཞན་མི་སྲིད། །ཐ་དད་ཉིད་དུ་སུ་ཡིས་ཀྱང༌། །མ་མཐོང་ཆོས་གཅིག་སྒྲ་རྟོག་གིས། །སོ་སོར་ཕྱེ་ལས་འབྲེལ་འདི་བཞག །དེ་ཕྱིར་དགག་སྒྲུབ་ཇི་སྙེད་པ། །གཞན་སེལ་ཤེས་ལ་རག་ལས་བྱུང༌། །དེ་ཕྱིར་འབྲེལ་འདི་མ་ཤེས་ན། །རྫོགས་པའི་སངས་རྒྱས་ཚད་མ་དང༌། །བསྟན་པའི་སྙིང་པོ་བདག་མེད་པ། །སྒྲུབ་དང་དེ་དེའི་ལོག་ཕྱོགས་ཀྱང༌། །སུན་འབྱིན་ལྟར་སྣང་ཁོ་ནར་ངེས། །དེ་ལྟར་དེ་ཤེས་གྱུར་འོག་ཏུ། །རྒྱུ་ཚོགས་པ་ལས་འབྲས་སྐྱེ་བར། །གྲུབ་དང་རྒྱུ་སྔོན་སོང་དུ་ཡང༌། །བསྒྲུབས་པས་ཚད་མར་གྱུར་ཉིད་དུ། །གྲུབ་མཛད་ཁྱོད་ཀྱི་དགོངས་པར་ནི། །རྣམ་འགྲེལ་མཛད་པས་བཀྲལ་དེ་ཡིན། །གཞལ་བྱ་གཉིས་ཕྱིར་ཚད་མ་ཡང༌། །གཉིས་སུ་ངེས་གསུངས་ཁྱོད་ཁོ་ན། །སྤྱི་མཚན་སེལ་ངོར་དོན་དམ་དུ། །བདེན་ཀྱང་སྣང་ངོར་ཀུན་རྫོབ་ཀྱི། །བདེན་ཕྱིར་ཡོད་མ་ཡིན་པས་ན། །གཞལ་བྱ་རང་མཚན་གཅིག་ཁོ་ནར། །གསུངས་མཛད་ཁྱོད་ལ་ཕྱག་འཚལ་ལོ། །རང་མཚན་ལ་ཡང་མངོན་གྱུར་དང༌། །ལྐོག་གྱུར་དུ་ངེས་གཏན་ཚིགས་ཀྱིས། །ཚད་མ་གཉིས་ལས་ཉུང་བ་དང༌། །དེར་མ་འདུས་པ་ཁྱོད་མི་བཞེད། །མངོན་སུམ་རྟོགས་བྲལ་མ་འཁྲུལ་བ། །འཆད་པ་ཁྱོད་ཀྱི་ལུགས་ཁོ་ན། །སྐབས་འདིར་ཞེན་པའི་བློ་ཁོ་ན། །རྟོག་པར་ངོས་འཛིན་འཕྲལ་གྱི་ནི། །འཁྲུལ་རྒྱུས་མ་བསླད་རིག་པ་ཙམ། །བཤད་མོད་རྣམ་རིག་སྨྲ་ལུགས་ལ། །ཡང་དག་མིན་རྟོག་དང་བྲལ་ཞིང༌། །ཕུགས་ཀྱི་འཁྲུལ་རྒྱུས་མ་བསླད་པ། །དགོས་པར་བློ་ཆེན་ཁྱོད་ཀྱིས་བཞེད། །ཚད་འབྲས་རྣམ་གཞག་ཚིག་མང་པོས། །བཤད་མོད་འབྲས་བུ་རང་རིག་པས། །གཞན་མེད་སྒྲུབ་བྱེད་ཚད་མ་ཡང༌། །གཟུང་དང་འཛིན་པའི་རྣམ་པ་ལས། །གཞན་བཤད་མེད་དོ་གཞལ་བྱ་དང༌། །སྦྱོར་ཚེ་རྣམ་གཞག་རྣམ་པ་བཞིར། །གསུངས་མཛད་ཁྱོད་ལ་ཕྱག་འཚལ་ལོ། །གཞལ་བྱ་དོན་དང་ཤེས་པ་ལས། །མང་ཉུང་མེད་ཕྱིར་འཇལ་བྱེད་ཀྱང༌། །ཕྱི་ནང་ལྟ་བ་གཉིས་བྱུང་མེད། །དངོས་ཀྱི་གཞལ་བྱ་རིག་པ་ལས། །གཞན་མེད་ཕྱིར་ན་རང་རིག་པར། །བསྡུ་མཛད་ཁྱོད་ལ་ཕྱག་འཚལ་ལོ། །དེ་ཚེ་ཕྱི་རོལ་དོན་དག་ནི། །ཡོད་པར་གང་གིས་འགྲུབ་ཟེར་ལ། །རྒྱུའི་ཁྱད་པར་དཔོག་པ་ཡི། །གཏན་ཚིགས་མདོ་སྡེ་པས་བཤད་ཚེ། །རྟགས་དེ་མི་མཐུན་ཕྱོགས་ལས་ནི། །བཟློག་པ་མེད་པར་དམིགས་རྟགས་སུ། །གསུངས་མཛད་ཁྱོད་ལ་ཕྱག་འཚལ་ལོ། །ལྷན་ཅིག་དམིགས་ངེས་གཏན་ཚིགས་དང༌། །ཚུལ་གཉིས་སྒྲུབ་པ་ཞེས་བྱ་བའི། །རིགས་པས་དོན་སྨྲ་རྣམས་ལ་ནི། །དོན་རྟོགས་སྒྲུབ་བྱེད་ཡོད་མིན་པར། །ཐག་གཅོད་མཛད་ནས་རྣམ་རིག་ཏུ། །གྲུབ་མཛད་ཁྱོད་ལ་ཕྱག་འཚལ་ལོ། །རྗེས་སུ་དཔག་པའི་ཚད་མ་ལ། །རྣམ་པ་གཉིས་སུ་དབྱེ་མཛད་ཚེ། །གཞལ་བྱའི་ཁྱད་པར་བསྒྲུབ་བྱ་དང༌། །སྒྲུབ་བྱེད་ཚུལ་གསུམ་གྱིས་ཕྱེ་ཞིང༌། །གཉིས་ཀ་འཇུག་ཡུལ་གཅིག་ཉིད་ལ། །རྒྱུད་ནས་འབྲེལ་ཕྱིར་མི་བསླུ་བ། །ཚུལ་གསུམ་རང་གིས་གང་ཤེས་པ། །གཞན་ལ་སྟོན་པའི་མིང་ཚིག་གི །ཚོགས་སུ་སྣང་བའི་རྣམ་རིག་ཀྱང༌། །རྗེས་སུ་དཔག་པའི་ཚད་མ་སྟེ། །དེའི་མཚན་ཉིད་ཚང་ཕྱིར་རོ། །ཞེས་པའང་རྣམ་རིག་སྨྲ་གཞུང་དུ། །གསུངས་མཛད་ཁྱོད་ལ་ཕྱག་འཚལ་ལོ། །སྨྲ་མཁས་ཁྱོད་ཀྱིས་གང་བཤད་པའི། །བསྒྲུབ་བྱའི་རྣམ་གཞག་རྣམ་འགྲེལ་གྱི། །མཛད་པོས་རྒྱས་པར་བཤད་གྱུར་ཀྱང༌། །གངས་ཅན་པ་འདིས་ཐམས་ཅད་ཀྱང༌། །ཕྱིན་ཅི་ལོག་ཏུ་བཤད་གཟིགས་ནས། །དོན་དེ་ཚུལ་བཞིན་འཆད་པ་ཡི། །རྣམ་བཤད་འགའ་ཞིག་ཕྱིས་འབྱུང་བར། །བྱིན་གྱིས་བརླབས་ལ་ཕྱག་འཚལ་ལོ། །དེ་ལྟར་དེ་བརྩམས་པ་ཡིས་ནི། །དགེ་བ་མི་ཟད་མུན་འཇོམས་ཤིང༌། །སྣང་བྱེད་འོད་ཟེར་ཚོགས་བཀྱེ་བས། །ཐུབ་བསྟན་ཉིན་མོར་བྱེད་ཐོབ་ཤོག། །།ཤུ་བྷཾ།། ༈ །།

 

[1] པཎ་ཆེན་ཤཱཀྱ་མཆོག་ལྡན་གྱི་བཀའ་འབུམ། པོད། ༼མ༽ འཕྲུལ་པར་དཔེ་རིང་། ཤོག་ ༡༡ན༦ ནས་ ༡༣བ༣ བར་གསལ།

Leave a Reply

Your email address will not be published. Required fields are marked *