༄༅། །དཔལ་ཆོས་ཀྱི་གྲགས་པའི་བླ་སྒྲུབ་བཞུགས།།

 

༄༅། །དཔལ་ཆོས་ཀྱི་གྲགས་པའི་བླ་སྒྲུབ་བཞུགས།།[1]

 

༼རྫོང་གསར་མཁྱེན་བརྩེ་འཇམ་དབྱངས་ཆོས་ཀྱི་བློ་གྲོས་ (1893-1959) ཀྱིས་མཛད་པ།༽

 

སྐྱབས་སེམས་ཚད་མེད་སྔོན་དུ་བཏང་། ཨ། ཆོས་ཀུན་སྟོང་པའི་ངང་ཉིད་ལས། །རིན་ཆེན་ཁྲི་རྐང་པད་ཟླའི་སྟེང་། །སྨྲ་བའི་དབང་ཕྱུག་ཆོས་ཀྱི་གྲགས། །དཀར་དམར་འཛུམ་ཁྲོའི་ཉམས་ལྡན་པ། །རབ་བྱུང་ཆ་ལུགས་ཕྱག་གཡས་པ། །ཕྱོགས་ལས་རྣམ་རྒྱལ་ཕྱག་རྒྱ་ཅན། །གཡོན་པ་ལུས་སྟེང་སྐྱབས་སྦྱིན་མཛད། །དབུ་ལ་པཎ་ཞྭ་ལེབ་མོར་གསོལ། །ཞབས་གཉིས་རོལ་སྟབས་སྐུ་འགྱིང་ཉམས། །

གནས་གསུམ་ཡི་གེ་འབྲུ་གསུམ་དང་། །ཐུགས་དབུས་ཟླ་སྟེང་རལ་གྲི་སྔོ། །འཆང་བཟུང་ལྟེ་བར་དྷཱིཿདང་ནི། །ངོས་ལ་དབྱངས་གསལ་ཕྲེང་བ་འབར། །ཐུགས་ནས་འོད་འཕྲོས་ཡེ་ཤེས་པ། །སྤྱན་དྲངས་དམ་ཡེ་དབྱེར་མེད་བསྟིམ། །ཡན་ལག་བདུན་པས་མཆོད་པར་བྱ། སྤྲོ་ན་མཎྜལ་དག་ཀྱང་འབུལ། ཨེ་མ་ཧོ། ཀུན་ཏུ་བཟང་པོའི་སྨོན་ལམ་འཕྲུལ། །ཀུན་རྟོག་དྲྭ་བ་གཅོད་མཛད་པ། །ཕྱོགས་ལས་རྣམ་རྒྱལ་ཆོས་ཀྱི་གྲགས། །གསོལ་འདེབས་སོ་བྱིན་གྱིས་རློབས། །ཞེས་དང་། ཨོཾ་ཨཱཿགུ་རུ་དྷརྨ་ཀཱིརྟི་སརྦ་སིདྡྷི་ཕ་ལ་ཧཱུྃ། ཞེས་བཟླ། བླ་མའི་སྐུ་དང་ཐུགས་ཕྱག་མཚན། །སྔགས་དང་འོད་ཟེར་བདུད་རྩིའི་རྒྱུན། །ཆར་ལྟར་བབས་ནས་རང་ཐིམ་བསམ། །སླར་ཡང་གསོལ་བ་གདབ་པ་ནི། མཁྱེན་རབ་ཡེ་ཤེས་འོད་ཀྱི་ཟེར་སྟོང་གིས། །བདག་བློའི་མུན་པ་རིང་དུ་བསལ་མཛད་པ། །དཔལ་ལྡན་ཀུན་ཏུ་བཟང་པོ་ཆོས་ཀྱི་གྲགས། །འཛམ་གླིང་ཤིང་རྟ་ཆེན་པོར་གསོལ་བ་འདེབས། །ལོག་སྨྲ་མུ་སྟེགས་གླང་པོའི་སྤྱི་བོ་འགེམ། །རྩོད་པས་ཐུབ་པའི་བསྟན་པ་གསལ་བྱེད་པ། །སྨྲ་བའི་སེངྒེ་གཟི་བརྗིད་མཚུངས་པ་མེད། །ཧེ་རུ་ཀ་དཔལ་གྲུབ་པའི་དབང་ཕྱུག་ཆེ། །རྟག་ཏུ་བདག་ལ་དགོངས་པར་མཛད་ནས་ཀྱང་། །ཡང་དག་རིགས་པའི་ལམ་ནས་རྒྱལ་གསུང་ཀུན། །ཚད་མའི་ལམ་ནས་དྲངས་པའི་ངེས་ཤེས་ཀྱིས། །སྟོན་པ་བསྟན་པར་ཡིད་ཆེས་ཐོབ་པར་ཤོག །ཕྱིན་ཅི་ལོག་སྨྲ་མུ་སྟེགས་ཀླ་ཀློ་ཡི། །འཁྲུལ་པས་བསྐྱེད་པའི་རྣམ་གཞག་ཇི་སྙེད་པ། །འགྲོ་ལ་ཕན་བདེའི་རྒྱུ་རུ་མཆིས་རྣམས་ལས། །དོན་མེད་དོན་ལོག་གཞོམ་པའི་མཐུ་ལྡན་ཤོག །ཀུན་མཁྱེན་བསྟན་པ་ཇི་སྲིད་གནས་ཀྱི་བར། །ཚད་མ་རིག་པའི་ཞུགས་ལྕེ་རྣོན་པོ་ཡིས། །ཆོས་དང་ཆོས་མིན་སྤང་བླང་རབ་འབྱེད་ཅིང་། །ལྟ་བ་ངན་པའི་ཚང་ཚིང་བསྲེགས་པར་ཤོག །སྐྱེ་བ་ཀུན་ཏུ་དཔལ་ལྡན་ཀུན་ཏུ་བཟང་། །ཆོས་ཀྱི་གྲགས་པ་རིགས་ཀྱི་བདག་པོར་ཐོབ། །བཀའ་དང་བསྟན་བཅོས་ཚིག་དོན་རྣམ་འབྱེད་པའི། །བློ་གྲོས་སྤོབས་པའི་གཏེར་མཆོག་ཐོབ་པར་ཤོག །བླ་མའི་གནས་གསུམ་ཡིག་འབྲུ་གསུམ་རྣམས་ལས། །དཀར་དམར་སྔོ་བའི་འོད་ཟེར་རིམ་གྱིས་བྱུང་། །རང་གི་སྒོ་གསུམ་ལ་ཐིམ་ཐུགས་དབུས་ནས། །རལ་གྲི་ས་བོན་དང་བཅས་གཉིས་པ་ཆད། །རང་གི་སྙིང་ནང་ཞུགས་ཤིང་འོད་ཟེར་གྱིས། །སྙིང་གི་མུན་སེལ་རྩ་སྒོ་འབྱེད་པར་མོས། །ཨོཾ་ཨ་ར་པ་ཙ་ན་དྷཱིཿ གྲངས་མང་དང་དབྱངས་གསལ་རྟེན་སྙིང་བརྗོད། དཔལ་ལྡན་བླ་མ་འོད་ཞུ་རང་ཐིམ་དང་། །རིག་སྟོང་ཀུན་ཏུ་བཟང་པོའི་ངང་ལ་བཞག །ཐུན་མཐར་དགེ་བསྔོ་སྨོན་ལམ་སོགས་བྱའོ། །ཞེས་པའང་ཆོས་ཀྱི་བློ་གྲོས་པས་རང་གི་དོན་དུ་བྲིས་པའོ། །སརྦ་དཱ་ཀ་ལྱཱ་ཎཾ་བྷ་བཏུ་ཛ་ཡ།།  །།

[1] ཆོས་ཀྱི་བློ་གྲོས་བཀའ་འབུམ། པོད། ༼ང༽ ཆོས་ཚན་ ༥ འཕྲུལ་པར་དཔེ་རིང་། ཤོག་གྲངས་ ༢བ༡ ནས་ ༢ན༣ བར།

Leave a Reply

Your email address will not be published. Required fields are marked *