༄༅། །དཔལ་ཆོས་ཀྱི་གྲགས་པའི་རྟོགས་བརྗོད་པདྨ་དཀར་པོའི་ཕྲེང་བ་བཞུགས་སོ།།

 

༄༅། །དཔལ་ཆོས་ཀྱི་གྲགས་པའི་རྟོགས་བརྗོད་པདྨ་དཀར་པོའི་ཕྲེང་བ་བཞུགས་སོ།།[1]

 

༼པཎ་ཆེན་ཤཱཀྱ་མཆོག་ལྡན་ (1428-1507) གྱིས་མཛད་པ།༽

 

༄༅། །ན་མོ་མཉྫུ་ཤྲཱི་ཡེ། དཔལ་ཕྱོགས་ཐམས་ཅད་ལས་རྣམ་པར་རྒྱལ་བ་ཆོས་ཀྱི་གྲགས་པའི་ཞལ་སྔ་ནས་ཀྱི་རྟོགས་པ་བརྗོད་པ་ངེས་དོན་པདྨ་དཀར་པོའི་ཕྲེང་བས་རིགས་པའི་སྣང་བ་རྒྱས་བྱེད་ཅེས་བྱ་བ། ཆོས་ཀྱི་ཉི་མ་གྲུབ་པའི་ལང་ཚོ་ཅན། །ནམ་ཡང་གྲགས་པའི་ཁྲི་ལ་རབ་འཁོད་ནས། །རིགས་པའི་སྣང་བ་བགྲང་ཡས་སྤྲོ་མཁས་པ། །རྒྱལ་བས་ལུང་བསྟན་དེ་ལ་ཕྱག་འཚལ་ལོ། །

ཆོས་ཀྱི་ཟླ་བ་གྲགས་པའི་འོད་དཀར་ཅན། །ཕྱི་རྒོལ་ནུབ་ཀྱི་རི་བརྒྱ་ལ་དགོངས་ནས། །ཐུབ་བསྟན་ཤར་གྱི་རི་བོའི་རྩེར་འཆར་བ། །མང་པོས་ཕྱག་འོས་དེ་ལ་ཕྱག་བགྱིའོ། །རྣམ་འགྱུར་མི་འདྲའི་རྟ་བརྒྱས་དྲངས་པ་ཡི། །ལུང་དང་རིགས་པའི་རབ་མཉམ་ཁ་ལོ་བས། །གཞུང་ལུགས་ཀུན་གྱི་ལམ་སྲོལ་སྟོན་མཁས་པ། །ཤིང་རྟའི་སྲོལ་འབྱེད་དེ་ལ་ཕྱག་བགྱིའོ། །ཀུན་ཏུ་བཟང་པོའི་ཞལ་གྱི་འཛུམ་ཕྲེང་ལས། །དལ་བུར་བབ་པའི་ཆོས་ཀྱི་སྦུ་ཕྲེང་ནི། །ཉེ་བར་སིམ་པ་གྲགས་པའི་ཟློས་གར་མཁན། །ལུང་དང་རིགས་པའི་ལམ་དུ་བདེ་བར་རྒྱུ། །འཇམ་པའི་དབྱངས་ཀྱིས་ཕྱོགས་ཀྱི་གླང་པོ་ལ། །ལེགས་འདོམས་རྟོག་གེའི་ཉི་མ་ཆེར་འབར་བ། །བརྩེ་ཆེན་ཁྱོད་ཀྱི་རྣམ་དཔྱོད་ནམ་མཁའ་ལས། །གཞན་དུ་གསལ་བར་འཆར་བའི་སྐབས་མ་ཐོབ། །སྒྲུབ་དང་སུན་འབྱིན་རྩ་བ་འབྲེལ་བ་དང༌། །དེ་ཡང་མེད་ན་མི་འབྱུང་ངེས་པའི་ཚུལ། །རྟགས་གང་མི་མཐུན་ཕྱོགས་ལས་བཟློག་པ་ནི། །མེད་ན་མི་འབྱུང་སྒྲུབ་བྱེད་ཡིན་པར་གསུངས། །དེ་ལྟར་ཤེས་ན་རིག་བྱེད་བསྟན་བཅོས་བཞི། །བྱེད་པོ་དང་བཅས་ཚད་མ་མིན་པར་གྲུབ། །རིག་བྱེད་བདེན་པར་སྒྲུབ་པའི་གཏན་ཚིགས་ནི། །མི་མཐུན་ཕྱོགས་ལས་བཟློག་པ་མེད་ཕྱིར་རོ། །མངོན་ལྐོག་ལུང་གིས་སྒྲུབ་བྱེད་མིན་བཤད་ནས། །ཤིན་ལྐོག་ཁོ་ན་དཔྱད་གསུམ་གྱིས་དག་པའི། །ལུང་གིས་འགྲུབ་ཚུལ་བཤད་པས་རིག་བྱེད་དང༌། །སྟོན་པའི་བསྟན་པ་གཉིས་ཀྱི་ཁྱད་པར་ཕྱེ། །བཅོམ་ལྡན་ཚད་མར་སྒྲུབ་པའི་གཏན་ཚིགས་ཀྱང༌། །རང་དོན་ལེའུར་འབྲེལ་པ་བཤད་པ་ལ། །རག་ལས་དེ་ཕྱིར་ཚད་མ་གྲུབ་པ་ཡི། །ཐོག་མར་རང་དོན་རྗེས་དཔག་ཁྱོད་ཀྱིས་བཤད། །ཚད་མ་གྲུབ་པར་སྙིང་རྗེ་ཆེན་པོ་དང༌། །གང་ཟག་བདག་མེད་གོམས་པའི་ཚུལ་བཤད་ནས། །མངོན་སུམ་ལེའུར་ཆོས་ཀྱི་བདག་མེད་ནི། །རྒྱས་པར་བཤད་པ་ཐམས་ཅད་མཁྱེན་པའི་ལམ། །བདག་ཆད་སྨྲ་བའི་འཇིག་རྟེན་རྒྱང་འཕན་ངོར། །རྣམ་ཤེས་མིན་པ་རྣམ་ཤེས་ཉེར་ལེན་དུ། །མི་རིགས་རྟགས་དང་ཧ་ཅང་ཐལ་བ་ཡི། །རིགས་པས་བདེ་འགྲོའི་ལམ་བཟང་གསལ་བར་བསྟན། །རྟག་པར་སྨྲ་བའི་མུ་སྟེགས་རྣམས་ལ་ནི། །བདག་ཡོད་སྨྲ་དང་ཐར་པ་ཁས་ལེན་པ། །འགལ་བར་བཤད་ནས་ཐར་འདོད་རྣམས་ལ་ནི། །བདག་མེད་ལྟ་བ་གྲོལ་བའི་ལམ་དུ་བཤད། །སྙིང་རྗེ་ཆེ་དང་བདག་མེད་ལྟ་བ་ཡི། །ཟུང་འཇུག་སྐྱེ་བ་དུ་མར་གོམས་པ་ལས། །དེ་གོམས་བྱེད་པའི་སྐྱེ་བོ་ཀུན་མཁྱེན་དུ། །འབྱུང་རུང་སྒྲུབ་པའི་རང་བཞིན་གཏན་ཚིགས་དང༌། །བདེ་བར་གཤེགས་དང་སྐྱོབ་པའི་གཏན་ཚིགས་ཀྱིས། །ཐུགས་རྗེ་ཆེ་ལྡན་སྟོན་པས་སྔོན་དུས་སུ། །བསམ་སྦྱོར་ཕུན་ཚོགས་ཉམས་སུ་བཞེས་སོ་ཞེས། །འབྲས་བུའི་རྟགས་ཀྱིས་ཐུབ་ཆེན་ཚད་མར་བསྒྲུབས། །དེ་ལྟར་འབྲས་རང་གཏན་ཚིགས་རྣམ་གཉིས་ཀྱིས། །སྟོན་པ་ཚད་མར་བསྒྲུབས་ནས་བསྟན་པ་ཡང༌། །དེ་ཉིད་གཤེགས་པའི་ལམ་སྲོལ་དེ་ཡིན་པར། །དཔྱད་གསུམ་དག་པའི་ལུང་གིས་བསྒྲུབས་པ་ཡིན། །ཚད་མ་གྲུབ་པར་ཀུན་མཁྱེན་དངོས་སྟོབས་ཀྱི། །རིགས་པས་བསྒྲུབས་ཞེས་ཟེར་བ་གད་མོའི་གནས། །གཞལ་བྱའི་གནས་གཉིས་དཔྱད་པས་མ་དག་པར། །ཤིན་ལྐོག་སྒྲུབ་བྱེད་ཚལ་བ་འདིར་མི་བཞེད། །འདི་ཡི་ཁྱབ་འབྲེལ་ལུང་ལ་རག་ལས་ཕྱིར། །དངོས་སྟོབས་ཚད་མས་འགྲུབ་པའི་གོ་སྐབས་མེད། །དངོས་སྟོབས་ཞེས་བྱ་ལུང་ལ་མ་ལྟོས་པའི། །ཡང་དག་རིགས་པའི་མིང་གི་རྣམ་གྲངས་ཡིན། །གཞན་དུ་མ་གྲགས་ལྡོག་པ་གཞན་སེལ་གྱི། །རྣམ་གཞག་ཞིབ་མོས་གཞལ་བྱའི་ཆོས་རྣམས་ཀུན། །རང་སྤྱི་གཉིས་སུ་ངེས་པར་ཐག་བཅད་ནས། །ལྡོག་པའི་ཆོས་རྣམས་རྟོག་པས་སྒྲོ་བཏགས་ཤིང༌། །རགས་རྒྱུན་དངོས་པོ་བཏགས་ཡོད་ཡིན་པའི་ཕྱིར། །སྤྱི་མཚན་ཆོས་རྣམས་བདེན་པར་མེད་དོ་ཞེས། །མདོ་སྡེ་སྨྲ་བའི་ལུགས་དང་ཐུན་མོང་དུ། །ཆོས་ཀྱི་བདག་མེད་སྒོ་ཆེན་དང་པོར་ཕྱེ། །མངོན་སུམ་དོན་ལ་བསྙོན་པ་མེད་གྲགས་ཀྱང༌། །མངོན་སུམ་བློ་ཡིས་ཕྱི་རོལ་དོན་གྲུབ་དང༌། །ལྡོག་པའི་ཆོས་དང་རགས་རྒྱུན་དངོས་པོ་རྣམས། །རྟོག་མེད་བློ་ཡིས་བཟུང་བར་འཆད་པ་སོགས། །རང་གཞན་སྡེ་པའི་ལོག་པའི་བློ་གྲོས་ཀྱིས། །མངོན་སུམ་ཡུལ་ལ་རྣམ་བཏགས་མང་གཟིགས་ནས། །མངོན་གྱུར་དོན་ཡང་རིགས་པའི་ལམ་ཉིད་དུ། །ལེགས་པར་དྲངས་ནས་འཆད་མཁས་ཁྱོད་ཁོ་ན། །མངོན་གྱུར་གྲགས་པས་འཇོག་པ་གཞན་གྱི་ལུགས། །དེ་ནས་ཕྱི་རོལ་དོན་དང་དོན་སྣང་གི །རྣམ་པ་བདེན་མེད་བསྒྲུབས་ནས་གཉིས་མེད་ཀྱི། །ཡེ་ཤེས་དེ་ཉིད་དོན་དམ་ཡིན་ཞེས་པ། །མངོན་སུམ་ལེའུར་བཤད་པའི་ངེས་དོན་ཡིན། །དོན་སྣང་ཤེས་ལ་གང་སྣང་དོན་ཡིན་ཞེས། །འཇིག་རྟེན་བླུན་པོའི་བློ་གྲོས་ཀྱིས་བརྟགས་ཤིང༌། །བྱེ་བྲག་སྨྲ་བའི་གཞུང་གིས་དེ་བཟུང་ནས། །རྟེན་བཅས་དབང་པོས་ཕྱི་དོན་རྟོགས་ཤེས་འཆད། །གསལ་ཞིང་རིག་དང་ཚུལ་གཉིས་སྒྲུབ་རིགས་ཀྱིས། །གང་སྣང་དེ་ཀུན་སེམས་སུ་རབ་བསྒྲུབས་ནས། །དོན་སྣང་ཤེས་པས་དོན་དངོས་མི་འཛིན་པའི། །རྣམ་བཅས་ཚུལ་དེའང་ཆོས་ཀྱི་བདག་མེད་སྒོ། །དོན་སྣང་རེས་འགའ་སྐྱེ་བའི་གཏན་ཚིགས་ཀྱིས། །དོན་ཡོད་ཅེས་པ་མདོ་སྡེ་སྨྲ་བའི་གཞུང༌། །བག་ཆགས་སད་དང་གཅིག་དང་དུ་བྲལ་གྱི། །རིགས་པས་གཟུང་འཛིན་རྫས་གཞན་ཐོག་མར་བཀག །གཟུང་བ་མེད་ན་དེ་འཛིན་མེད་པ་དང༌། །གཅིག་དང་དུ་མར་མེད་པའི་གཏན་ཚིགས་ཀྱིས། །གཟུང་རྣམ་བདེན་མེད་ཡིན་པར་ལེགས་གྲུབ་ནས། །གཟུང་འཛིན་གཉིས་སྟོང་ཚུལ་དེ་བར་དུ་བཤད། །གཉིས་མེད་ཡེ་ཤེས་ཁོ་ན་ཆོས་ཀུན་གྱི། །དེ་བཞིན་ཉིད་དང་འགྱུར་མེད་ཡོངས་གྲུབ་དང༌། །ཡང་དག་མཐའ་དང་ཆོས་ཀྱི་དབྱིངས་དང་ནི། །དོན་དམ་ཡིན་ཞེས་ཁྱོད་ཀྱིས་ཐ་མར་བཤད། །ཚུལ་གཉིས་པ་དང་རང་རིག་སྒྲུབ་བྱེད་ཀྱི། །རིགས་པས་དོན་སྣང་རྣམ་བཅས་གྲུབ་པ་ན། །ཕྱི་དོན་རྟོགས་པའི་མངོན་སུམ་མི་བཞེད་ཀྱང༌། །རྟགས་ཀྱིས་བསྒྲུབས་ནས་ཕྱིར་ལྟའི་ཤེས་པ་ཀུན། །རང་རིག་ཡིན་ཚུལ་བཤད་པའི་མདོ་སྡེ་པའི། །གྲུབ་མཐའི་རྩ་བ་བསྡུས་པར་ཁྱོད་ཀྱིས་བཤད། །བག་ཆགས་བློ་དང་སྣང་རུང་མ་དམིགས་པའི། །རྟགས་ཀྱིས་ཕྱི་དོན་བཀག་ནས་དེ་འཛིན་གྱི། །རྣམ་པའང་དངོས་པོར་མེད་པའི་ཚུལ་འཆད་པ། །རྣམ་རིག་སྨྲ་བའི་གྲུབ་པའི་རྩ་བར་གསུངས། །དེ་ལྟར་བདག་མེད་གཉིས་ཀྱི་ལྟ་བ་ནི། །རང་གིས་རྟོགས་བཞིན་གཞན་ལ་བསྟན་བྱའི་ཕྱིར། །སྒྲུབ་པའི་ངག་དང་བསྒྲུབ་བྱའི་སྐྱོན་རྣམ་གཉིས། །ཇི་ལྟར་སེལ་ཚུལ་གཞན་དོན་ལེའུར་བཤད། །ཚུལ་གསུམ་ཚད་མའི་ལམ་དུ་བསྟན་བྱས་ནས། །བསྒྲུབ་བྱའི་དོན་དེ་ངག་ཏུ་མི་བརྗོད་པར། །རྟགས་ཚིག་གསལ་བར་བསྙད་པས་དམ་བཅའི་དོན། །རྟོགས་པའི་རྗེས་དཔག་བསྐྱེད་པ་སྒྲུབ་པའི་ངག །རང་ཕྱོགས་ཐལ་བས་གྲུབ་ཅིང་མ་གྲུབ་པའི། །སྒྲུབ་བྱེད་བཀོད་ནས་སླར་ཡང་དེ་སྒྲུབ་པའི། །ཤེས་བྱེད་རིམ་པར་བཀོད་པའི་ཕྲེང་བ་ཡིས། །ཐ་མར་གྲུབ་དོན་མེད་འདི་ཁྱོད་གཞུང་མིན། །རང་རྒྱུད་འགོད་པའི་རྒོལ་བ་དེ་དག་ཀྱང༌། །རྟགས་ཀྱི་ཚེར་མ་དབྱུང་བའི་མིང་ཙམ་ཡང༌། །མེད་པར་དམ་བཅས་ཚིག་ཟིན་བརྗོད་པ་ཡི། །སྦྱོར་བའི་འགོད་ཚུལ་ཁྱོད་ཀྱི་གཞུང་དང་འགལ། །གཞན་གྱི་ཁས་བླངས་རྟགས་སུ་སྦྱར་བྱས་ནས། །རྟགས་ཆོས་འབྲེལ་པ་ཚད་མས་འགྲུབ་ངེས་ལ། །ཐལ་བའི་ཆོས་གང་ཚད་མས་བསལ་གྱུར་པ། །འཁོར་གསུམ་ཚང་བའི་ཐལ་འགྱུར་ཡིན་པར་བཞེད། །རྟགས་ལ་ཁས་བླངས་མེད་ན་ཁྱབ་ཆོས་ཙམ། །ཁས་བླངས་ཡིན་ཀྱང་ཐལ་འགྱུར་དུ་མི་རུང༌། །དངོས་སྟོབས་ཡུལ་ལ་ཁས་བླངས་འགལ་བ་ཙམ། །ཕན་ཚུན་གེགས་བྱེད་ཡིན་པར་ཁྱོད་ཀྱིས་བཤད། །གཞན་ཕྱོགས་འགོག་ཚེ་རྗེས་དཔག་བསྐྱེད་པ་དང༌། །ལོག་རྟོག་སེལ་བའི་ཚུལ་དེ་མི་སེམས་པར། །ཁས་བླངས་འགལ་བ་འདུས་ཙམ་རྒྱལ་ཕམ་གྱི། །ཚད་དུ་འཇོག་པ་ཁྱོད་ཀྱི་གཞུང་དང་འགལ། །རྟགས་ཀྱིས་སྒྲུབ་མི་ནུས་པ་བསྒྲུབ་བྱ་ཡི། །སྐྱོན་ཞེས་དེང་སང་འདི་ན་མཐུན་པར་སྨྲ། །རྟགས་དང་བསྒྲུབ་བྱའི་མཚན་ཉིད་དེ་དག་གི །གསལ་བྱ་སོ་སོར་ངེས་པ་ཁྱོད་ཀྱི་བཤད། །དམ་བཅའ་ཡང་དག་ཡིན་ན་ཞེན་པའི་དོན། །སྨྲ་བོའི་ཚད་མས་གྲུབ་ཅེས་འདི་ན་སྨྲ། །བསྒྲུབ་པར་བྱ་དང་དམ་བཅའི་ཞེན་དོན་ལ། །གྲུབ་གསལ་མེད་ཅིང་དཔག་འདོད་དགོས་པར་བཤད། །མ་དམིགས་གཏན་ཚིགས་གང་ཡིན་དགག་པ་ཡི། །ག་ཚིགས་ཡིན་ཞེས་འདི་ན་ཀུན་གྱིས་སྨྲ། །སྣང་རུང་མ་དམིགས་གཙོ་བོ་སྒྲུབ་པ་ཡི། །གཏན་ཚིགས་ཡིན་པར་སྨྲ་མཁས་ཁྱོད་ཀྱིས་བཤད། །ཆེན་པོར་གྲགས་རྣམས་སྡེ་བདུན་མཛད་པའི་གཞུང༌། །ངོ་བོ་ཉིད་མེད་སྨྲ་བའི་གཞུང་དུ་འཆད། །ཀླུ་སྒྲུབ་ཞབས་དང་ཐོགས་མེད་བཞེད་གཞུང་ལ། །མི་མཐུན་མེད་པར་སྨྲ་མཆོག་འདི་བཞེད་མོད། །ཐལ་རང་ལུང་དང་མཐུན་པའི་དབུ་མ་ནི། །གང་འདིའི་གཞུང་ཆེན་དེ་དང་དེར་མི་འབྱུང༌། །དེ་ཕྱིར་ཚུལ་འདི་རྣལ་འབྱོར་སྤྱོད་གཞུང་གི །དབུ་མའི་ལུགས་དེར་གདོན་མི་འཚལ་བ་ཡིན། །དེ་ཡང་ཐེག་ཆེན་མདོ་སྡེའི་རྒྱན་དང་ནི། །མཐའ་དབུས་སེལ་བའི་བསྟན་བཅོས་རྣམ་གཉིས་སུ། །ཤེར་ཕྱིན་མདོ་དོན་དབུ་མར་འགྲེལ་བའི་ཚུལ། །ཇི་སྐད་གསུངས་དེ་ཕྱོགས་ཀྱི་གླང་པོས་བཞེད། །འདི་ལ་བོད་རྣམས་སེམས་ཙམ་རྣམ་བརྫུན་ཟེར། །རྣམ་བརྫུན་བཞེད་ཀྱང་སེམས་ཙམ་དོན་མི་གནས། །དོན་དམ་ཡེ་ཤེས་ཡིན་པར་བཞེད་གྱུར་ཀྱང༌། །ཀུན་རྫོབ་སེམས་ཙམ་ཉིད་དུ་ཞལ་མི་བཞེས། །སེམས་དང་སེམས་བྱུང་ཡང་དག་མིན་རྟོག་གི །དབྱེ་བར་འཆད་པ་རྗེ་བཙུན་བྱམས་པའི་གཞུང༌། །ཡེ་ཤེས་གང་ཡིན་སེམས་དང་སེམས་བྱུང་དུ། །བཤད་ན་ཐེག་ཆེན་བསྡུས་པའི་ལུང་དང་འགལ། །རྣམ་ཤེས་ཡེ་ཤེས་སོ་སོར་དབྱེ་བ་ནི། །འཕགས་པ་དཀོན་མཆོག་བརྩེགས་པའི་མདོ་སྡེ་དང༌། །དབྱིག་གཉེན་ཞབས་ཀྱི་མདོ་སྡེའི་རྒྱན་འགྲེལ་དང༌། །ཚིགས་བཅད་སུམ་ཅུའི་རབ་ཏུ་བྱེད་པར་བཤད། །རྫོགས་སངས་རྒྱས་ལ་སེམས་དང་སེམས་བྱུང་གི །རྒྱུ་བ་འདོད་ན་མདོ་སྡེའི་རྒྱན་གཞུང་དང༌། །རྣལ་འབྱོར་སྤྱོད་གཞུང་ཐེག་ཆེན་བསྡུས་པ་ལས། །ཚོགས་བརྒྱད་གནས་གྱུར་བཤད་པ་ཇི་ལྟར་དྲང༌། །གནས་གྱུར་ནས་ཀྱང་དེ་དེར་ཁས་ལེན་ན། །རྫོགས་སངས་རྒྱས་ལ་ཀུན་གཞིའི་རྣམ་ཤེས་དང༌། །འབྱུང་ལས་གྱུར་པའི་དབང་པོ་རྣམ་ལྔ་དང༌། །ཉོན་མོངས་ཅན་ཡིད་ཡོད་པར་ཁས་ལོངས་ཤིག །བདག་ཉིད་ཆེ་ཁྱོད་ཀུན་གཞི་མི་བཞེད་ཅེས། །དེང་སང་འདི་ན་མང་པོའི་མགྲིན་པར་གླེང༌། །ཀུན་གཞི་མེད་ན་ཐོགས་མེད་བཞེད་གཞུང་གི །ཤིང་རྟའི་སྲོལ་གྱི་ལམ་ཆེན་འཛིན་མི་ནུས། །མཐར་ཐུག་ཐེག་གཅིག་འཆད་པའི་གསལ་ཁ་ནི། །གཞུང་འདིར་མེད་མོད་འོན་ཀྱང་དགྲ་བཅོམ་པ། །ཐ་མའི་སེམས་ཀྱིས་སེམས་གཞན་མཚམས་སྦྱོར་བར། །བཤད་པ་དེ་ཡིས་དེ་དོན་བསྒྲུབས་ཀྱང་རུང༌། །དེ་ལྟར་འཆད་ཚེ་ལྷག་བཅས་དགྲ་བཅོམ་ནས། །ཐེག་ཆེན་ལམ་དུ་ཞུགས་ཚེ་སྔོན་གྱི་ལུས། །དེ་ཉིད་དབང་པོའི་ལུས་སུ་བྱིན་རློབ་ཅེས། །རྣམ་པར་གཏན་དབབ་བསྡུ་བའི་ལུང་དུ་བཤད། །ལྷག་མེད་དབྱིངས་ནས་ཐེག་ཆེན་ལམ་འཇུག་པ། །མདོ་སྡེའི་རྒྱན་སོགས་རྣལ་འབྱོར་སྤྱོད་པའི་གཞུང༌། །རང་སོར་གཞག་ཚེ་གསལ་བར་མ་གསུངས་མོད། །ཐོགས་མེད་ཞབས་ཀྱིས་ཐེག་ཆེན་རྒྱུད་བླ་མ། །ངེས་དོན་སྙིང་པོར་བཀྲལ་ཚེ་སངས་རྒྱས་ལས། །གཞན་ལ་མྱང་འདས་མེད་པའི་ཤེས་བྱེད་ཀྱིས། །ལྷག་མེད་དབྱིངས་ནས་སེམས་མཆོག་བསྐྱེད་པར་གསུངས། །དེ་ཚེ་དཔལ་ཕྲེང་མདོ་ཡི་རྗེས་འབྲངས་ནས། །མ་རིག་བག་ཆགས་ས་དང་ཟག་མེད་ཀྱི། །ལས་ཀྱི་ལུས་གཞན་བརྒྱུད་མར་བླངས་ནས་ནི། །བྱང་ཆུབ་མཆོག་ཏུ་རྫོགས་སངས་རྒྱ་བར་གསུངས། །ཐོགས་མེད་ཞབས་ཀྱི་དབུ་མའི་ཚུལ་ལུགས་འདིར། །ལྟ་བའི་རྣམ་གཞག་ཕྱོགས་ཀྱི་གླང་པོ་ཡི། །ཤེར་ཕྱིན་བསྡུས་པར་བཤད་ལས་གཞན་མེད་ཀྱང༌། །མཐར་ཐུག་ཐེག་གཅིག་ཚུལ་དེ་གསལ་བར་བཤད། །གཉིས་མེད་ཡེ་ཤེས་བདེན་པར་བཞེད་གྱུར་ཀྱང༌། །བདེན་འཛིན་ལྟ་ཅི་མཚན་འཛིན་ཕྲ་མོ་ཡང༌། །སྤང་བྱར་བསྟན་ནས་ཐམས་ཅད་མཁྱེན་པ་ཡི། །གོ་འཕང་བླ་ན་མེད་དེ་ཐོབ་བྱར་བཤད། །འཇམ་པའི་དབྱངས་ཀྱིས་ཕྱོགས་ཀྱི་གླང་པོ་ལ། །གང་འདོམས་རིགས་པའི་སྲོལ་ཆེན་ཟླ་མེད་པ། །གསལ་བར་བཤད་ནས་ཐོགས་མེད་བཞེད་གཞུང་གི །ངེས་དོན་འཆད་མཁས་ཁྱོད་ལ་ཕྱག་འཚལ་ལོ། །དྲང་དོན་རྟོག་གེའི་ལུས་བརྒྱད་འདིས་ནི་གཞུང་ལུགས་མཐའ་དག་རིགས་པའི་ལམ་དུ་དྲང༌། །ངེས་དོན་གཉིས་མེད་ཡེ་ཤེས་འདི་ཡང་དཔལ་ལྡན་གྲགས་པའི་དགོངས་དོན་སྙིང་པོར་ངེས། །སྒོ་བརྒྱ་འབྱེད་པའི་ལྡེ་མིག་འདི་ཡིས་མ་ཕྱེད་གཞན་མེད་དེ་ཡང་ཆོས་ཀྱི་སྒོ། །ཅིག་ཆར་མུན་སེལ་རིགས་པས་བསྟོད་འདིས་བདག་ཀྱང་རིགས་པ་སྨྲ་བ་ཉིད་གྱུར་ཅིག །ཅེས་དཔལ་ལྡན་ཆོས་ཀྱི་གྲགས་པའི་ཞབས་ཀྱི་རིགས་པའི་སྦྲང་རྩི་མཚར་པོས། རྣམ་དཔྱོད་ཀྱི་རོ་འཛིན་གཤིན་པོར་བྱས་པའི་ཀློག་པ་པ། མི་ཕམ་དགེས་པའི་བཤེས་གཉེན་གྱིས་དགེ་བར་སྦྱར་བའི་ཡི་གེ་པ་ནི་ཆོས་ཀྱི་རྒྱལ་མཚན་ནོ།། །།ཤུ་བྷཾ་མསྟུ།། །།

 

[1] པཎ་ཆེན་ཤཱཀྱ་མཆོག་ལྡན་གྱི་བཀའ་འབུམ། པོད། ༼མ༽ འཕྲུལ་པར་དཔེ་རིང་། ཤོག་གྲངས་ ༡༣ན༣ ནས་ ༡༧ན༣ བར།

Leave a Reply

Your email address will not be published. Required fields are marked *